Librarya
Pagpadayag

“Pagpadayag,” Mga Hilisgotan ug mga Pangutana (2023)

Imahe
batang babaye nga nag-ampo gawas sa balay

Giya sa Pagtuon sa Ebanghelyo

Pagpadayag

Kada adlaw, indibidwal nga giya gikan sa mahigugmaong Langitnong Amahan

Sagad nga bahin sa kinabuhi ang mga pangutana ug kawalay kasegurohan. Importante kaayo kon kang kinsa ka moduol para sa mga tubag ug pasalig. Maayo na lang, naa ang Dios nga motabang sa imong pagpangita og mga tubag ug pagsabot. Makasalig ka sa saad nga “kon … ikaw nakulangan ug kaalam,” makapangayo ka og tabang Niya ug “dili gayod [ka] mapakyas” (Santiago 1:5).

Indibidwal nga nakig-istorya ang Dios sa Iyang mga anak uban ang personal nga pagpadayag pinaagi sa Espiritu Santo. Nagtagana siya og mga propeta ug ubang mga tawo ug mga kapanguhaan aron mogiya nato nga maatubang ang mga pagsulay ug mga kasinatian niini nga kinabuhi. Usa sa labing importante mao ang gisaad nga pagpakig-istorya nga moabot kanato gikan sa Dios pinaagi sa Espiritu Santo.

Unsa Ang Pagpadayag?

Ang pagpadayag mao ang balaang giya ug pagpakig-istorya nga gihatag sa atong mahigugmaong Langitnong Amahan ngadto sa Iyang mga anak. Sagad kining masinati isip hilom nga mga pagbati o mga panghunahuna nga gihulagway isip “ligdong nga hinagawhaw nga tingog” sa Espiritu Santo (Doktrina ug mga Pakigsaad 85:6). Atong mapun-an ang atong abilidad sa pagdawat ug pagkaila sa personal nga pagpadayag kon modangop kita sa Dios pinaagi sa pag-ampo, magtuon sa balaang mga kasulatan, ug maningkamot nga motuman sa mga sugo sa Dios. Gigiyahan sa Ginoo ang Iyang Simbahan pinaagi sa pagpadayag nga ginahatag Niya sa Iyang awtorisadong mga sulugoon. Dugang pa niini, ang matag usa kanato makadawat og personal nga pagpadayag nga motabang nato sa pihong mga panginahanglan, mga responsibilidad, ug mga pangutana.

Katibuk-ang pagpasabot sa hilisgotan: Pagpadayag

May kalabotan nga mga giya sa pagtuon sa ebanghelyo: Gasa sa Espiritu Santo, Pag-ampo, Mga Kasulatan, Pagpangita sa Kamatuoran ug Paglikay sa Pagpanglimbong

Seksiyon 1

Mahimong Makig-istorya Nimo ang Dios pinaagi sa Personal nga Pagpadayag

Imahe
Batang babaye nga nagluhod diha sa higdaanan nga nag-ampo

Gimahal ka sa Dios ug nahibalo sa hingpit sa mga hagit ug mga pagsulay nga imong giatubang; wala gyod ka Niya biyai nga nag-inusara (tan-awa ang Juan 14:18). Makahimo ka og importante nga mga lakang aron maandam ang imong kaugalingon sa pagdawat ug pag-ila sa personal nga pagpadayag. Apil sa espirituwal nga pagpangandam mao ang pagtuon sa mga kasulatan, pagsimba sa adlaw sa Igpapahulay ug sa balay sa Ginoo, paghinulsol kada adlaw, pagpuasa, ug pag-ampo nga kinasingkasing. Nagsaad ang Ginoo nga giyahan ka Niya kon maningkamot ka nga mopaduol ngadto Niya (tan-awa sa Doktrina ug mga Pakigsaad 88:63).

Si Presidente Russell M. Nelson mitudlo:

“Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.

“Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Irekord ang inyong mga gibati ug sundi kini sa paglihok sa unsay giaghat nga angay ninyong buhaton. …

“Walay lain nga makabukas sa kalangitan sama sa kombinasyon sa nagtubo nga kaputli, hingpit nga kamasulundon, sinserong nangita, inadlaw nga pagbasa sa mga pulong ni Kristo diha sa Basahon ni Mormon, ug regular nga panahon nga ipasalig alang sa buhat sa templo ug kasaysayan sa pamilya.”

Mga butang nga angayang hunahunaon

  • Ang matag usa sa mga anak sa Dios moanhi niini nga kalibotan uban ang Kahayag ni Kristo. Basaha ang Moroni 7:16–18; Doktrina ug mga Pakigsaad 84:46–48; 93:2, nga mangita kon unsay nalangkit niini nga gasa ug kon nganong importante kini.

  • Ang imong tinguha sa pagpangita sa espiritu sa pagpadayag mahimong modako kon mas masabtan nimo ang kaandam sa Dios nga ipakigbahin kini kanimo. Itandi ang mosunod nga mga tudling sa kasulatan aron makita ang mga baroganan nga makaandam kanimo aron masinati ang espiritu sa pagpadayag: 1 Nephi 10:17–19; 2 Nephi 32:3; Doktrina ug mga Pakigsaad 9:8; Joseph Smith—Kasaysayan 1:10–17. Unsa nga mga baroganan sa personal nga pagpadayag ang gitudlo niini nga mga kasulatan? Nganong bililhon ang pag-ila nga kita adunay responsibilidad sa pag-andam sa atong mga kaugalingon aron makadawat og personal nga pagpadayag?

Kalihokan alang sa pagkat-on uban sa laing mga tawo

  • Sa Enero 2021 nga artikulo sa Liahona nga giulohan og “Molambo ngadto sa mga Baroganan sa Pagpadayag,” gihisgotan ni Presidente Russell M. Nelson kon sa unsang paagi nato mas masabtan kon unsaon pagdapit sa giya sa Langitnong Amahan sa atong kinabuhi. Dapita ang mga sakop sa imong grupo nga tun-an ang mga bahin sa artikulo. Hisgoti og dungan ang bahin sa mosunod nga mga pangutana: Unsa ang mga baroganan nga gihatagan og gibug-aton ni Presidente Nelson? Unsa ang imong gibati nga nadasig nga buhaton sa lahi nga paagi human mabasa kini nga mensahe?

Pagkat-on pa og dugang

Seksiyon 2

Ang Personal nga Pagpadayag sa Kasagaran Moabot isip mga Impresyon, mga Hunahuna, ug mga Pagbati

Imahe
tawo nga naghunahuna

Nakakat-on ka na ba og mga hugpong sa mga pulong sa bag-ong pinulongan? Uban sa pagtuon ug pagpraktis, makasugod ka sa pag-ila niadto nga mga pulong kon isulti kini sa uban sa panag-istoryahanay. Sa susamang paagi, posibleng dili nimo kanunayng mailhan ang tingog sa Espiritu sa sinugdanan, apan ang pagkat-on og importanteng mga baroganan makaandam kanimo nga mas masabtan ang balaanong komunikasyon. Pananglitan, nasaksihan ni propeta Elias sa Daang Tugon ang kusog nga hangin, linog, ug kalayo, apan miingon si Elias nga “ang Ginoo wala” niadto nga mga butang. Apan nakadungog siya og “usa ka hinay ngahagawhaw nga tingog” ug nailhan kini isip ang tingog sa Ginoo (tan-awa ang 1 Mga Hari 19:11–13). Makig-istorya nato ang Ginoo pinaagi sa “hagawhaw nga tingog nga hingpit sa kalumo” (tan-awa sa Helaman 5:28–30) ug uban ang mga pagbati nga sama sa kalinaw, kahupayan, ug kalipay (tan-awa ang Mga Taga-Galacia 5:22–23).

Lain pang baroganan sa pagpadayag mao nga ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto” (2 Nephi 28:30). Nagpasabot kini nga ang Dios dili mohatag kanato sa tanang butang sa usa ka higayon. Hinuon, ang personal nga pagpadayag mahimong ipadayag paglabay sa panahon.

Gipasiugda ni Elder David A. Bednar kini nga konsepto: “Kita isip mga miyembro sa Simbahan daw mohatag og gibug-aton sa kahibulongan ug mahinuklogong espirituhanon nga mga pagpakita nga tingali kita napakyas sa pagdayeg ug gani sa pag-alinggat sa naandan nga sundanan diin ang Espiritu Santo nagbuhat sa Iyang buluhaton. Ang mao gayod nga ‘pagkayano sa paagi’ (1 Nephi 17:41) sa pagkadawat sa gamay ug nagtubo nga espirituhanong mga hunahuna nga sa kadugayan ug sa kinatibuk-an naghan-ay sa usa ka gitinguha nga tubag o sa direksyon nga atong gikinahanglan makahimo kanato sa pagtan-aw ‘lapas sa tumong’ (Jacob 4:14).”

Mga butang nga angayang hunahunaon

  • Sa iyang Abril 2020 nga pakigpulong sa kinatibuk-ang komperensiya nga “Paminaw Kaniya,” si Presidente Nelson miingon, “Wala gayod sukad nga mas importante nga makahibalo unsaon sa pagpaminaw sa Espiritu nga mamulong kaninyo kay sa karon. … Ako mousab sa akong hangyo alang ninyo nga inyong buhaton bisan unsa ang makapadugang sa inyong espirituhanong kapasidad sa pagdawat og personal nga pagpadayag.” Sa unsang mga paagi nimo nasinati ang personal nga pagpadayag?

Kalihokan alang sa pagkat-on uban sa laing mga tawo

Pagkat-on pa og dugang

Seksiyon 3

Ang Ginoo Nagdumala sa Iyang Simbahan pinaagi sa Pagpadayag

Imahe
Korum sa Napulog Duha ka Apostoles

Ang espiritu sa pagpadayag makagiya sa matag usa kanato sa tagsa-tagsa, apan kon gusto sa Ginoo nga mogiya sa Iyang Simbahan, mosulti Siya pinaagi sa buhing mga propeta nga nagserbisyo isip Presidente sa Simbahan (tan-awa sa Doktrina ug mga Pakigsaad 107:91–92). Si Elder Dale G. Renlund mitudlo: “Ang propeta lamang ang makadawat og pagpadayag alang sa Simbahan. Mahimong ‘supak kini sa mga lagda sa Dios’ nga ang uban makadawat niana nga pagpadayag. … Ang personal nga pagpadayag husto nga ilaha sa mga indibidwal. Kamo makadawat og pagpadayag, sama pananglit, mahitungod kon asa mopuyo, unsa nga dalan sa panarbaho ang sundon, o kinsa ang minyoan. Ang mga lider sa Simbahan mahimong motudlo og doktrina ug mopakigbahin og dinasig nga tambag, apan ang responsibilidad alang niini nga mga desisyon anaa kaninyo. Kana mao ang inyong pagpadayag nga madawat.”

Mga butang nga angayang hunahunaon

  • Sa wala madugay human maorganisar ang Simbahan, naklaro sa mga miyembro sa Simbahan ang importanteng tahas ni Joseph Smith isip propeta. Basaha ang Doktrina ug mga Pakigsaad 43:1–7. Sa unsang paagi ang baroganan nga gihulagway niini nga tudling makapanalipod nimo nga malimbongan niadtong dili iya sa Dios?

Kalihokan alang sa pagkat-on uban sa laing mga tawo

  • Uban sa imong grupo, basaha ang mensahe ni Presidente M. Russell Ballard nga “Ang Panan-awon sa Katubsanan sa mga Patay,” nga pangitaon kon sa unsang paagi giandam sa Ginoo si Presidente Joseph F. Smith sa pagdawat sa ingon niadto ka importanteng pagpadayag para sa Simbahan. Sa unsang paagi ang mga kasinatian sa kinabuhi ni Presidente Smith nag-andam niya para sa panan-awon nga iyang nadawat? Sumala sa Doktrina ug mga Pakigsaad 138:1–11, unsay gihimo ni Presidente Smith nga nakaandam niya aron matudloan gikan sa langit? Sa unsang paagi kini nga ehemplo nakatabang kanato nga masabtan ang kaimportante sa pagpangandam aron mailhan ang espiritu sa pagpadayag?

Pagkat-on pa og dugang

Iprinta