Molambo ngadto sa mga Baruganan sa Pagpadayag

Ni Presidente Russell M. Nelson

Preidente sa Ang Simbahan ni Jesukristo sa mga Santos sa Ulahing mga Adlaw

Awhagon ko kamo sa paghimo sa gikinahanglang mga lakang aron pagpaminaw og mas maayo sa Ginoo ug mas kanunay aron nga kamo makadawat og kalamdagan nga gusto Niyang ihatag nganha kaninyo.

Niadtong Septyembre 30, 2017, human sa sesyon sa hapon sa kinatibuk-ang komperensya, mihapit ko sa ospital aron susihon ang akong pinalangga nga sakop sa korum nga si Elder Robert D. Hales. Naospital siya gumikan sa pag-antus sa pag-atake sa kasingkasing pipila ka adlaw ang milabay.

Aduna mi maanindot kaayong panag-istorya, ug ingon og aduna siyay kalamboan. Gani nagginhawa na siya sa iyang kaugalingon, nga usa ka maayong timailhan.

Nianang gabhiona, hinoon, ang Espiritu namulong sa akong kasingkasing ug hunahuna nga kinahanglan nga mobalik ko sa ospital inig ka Dominggo. Atol sa sesyon sa Dominggo sa buntag sa kinatibuk-ang komperensya, kanang kusog nga impresyon mibalik. Gibati nako nga palabyon lang usa ang paniudto ug magdali sa pag-adto sa kiliran ni Eler Hales pagkahuman gyud dayon sa sesyon sa buntag, nga maoy akong gibuhat.

Sa dihang miabut na ko, akong nakita nga si Elder Hales nagkagrabe ang iyang kahimtang. Subo lang, siya mipanaw 10 minutos human ko miabut, apan mapasalamaton ko nga didto ko sa iyang kiliran uban sa iyang pinalangga nga asawa, si Mary, ug sa ilang duha ka anak nga mga lalaki sa dihang mitaliwan siya niining kinabuhia.

Mapasalamaton kaayo ko nga ang mga paghunghong sa Espiritu Santo miaghat nako sa pagbuhat sa butang nga wala unta nako nabuhat. Ug mapasalamaton kaayo ko sa katinuod sa pagpadayag ug nga ang kalangitan sa makausa pa abli.

Niining tuiga ang atong tutukan alang sa personal ug sa klasehanan nga pagtuon mao ang Doktrina ug mga Pakigsaad. Kining “balaan nga mga pagpadayag ug dinasig nga mga pamahayag” makapanalangin sa tanan nga magtuon niini ug sa pagbuhat sa balaan nga mando niini. Nagdapit kini sa “tanang tawo bisan asa sa pagpaminaw sa tingog sa Ginoong Jesukristo,”¹ sa tinuoray “ang tingog sa Ginoo alang ngadto sa tanan nga mga tawo” (Doktrina ug mga Pakigsaad 1:2).

Kakuyaw, Kangitngit, Paglingla

Ang pisikal ug espirituhanong mga kalisdanan maoy bahin sa kinabuhi dinhi sa yuta, samtang ang COVID-19 nga pandemya nga mikuyanap sa tibuok kalibutan mipahinumdom kanato. Sa panahon sa dili pa ang Iyang Ikaduha nga Pag-anhi, ang Manluluwas mitagna sa mga adlaw sa dakong kalisdanan. Miingon Siya, “Adunay mga gutom, ug mga sakit, ug mga linog, sa nagkalain-lain nga mga dapit” (Joseph Smith—Mateo 1:29).

Gisamutan pa ang mga kalisdanan sa nagkataas nga kangitngit ug pagpanglingla nga naglibut kanato. Sama sa gisulti ni Jesus sa Iyang mga disipulo, “ang kadautan modagsang” sa dili pa ang Iyang pagbalik (Joseph Smith—Mateo 1:30).

Gipundok ni Satanas ang iyang mga pwersa ug misulong batok sa buhat sa Ginoo ug kanato nga miapil niini. Tungod sa nagkadaghang peligro nga atong giatubang, ang atong panginahanglan sa balaanong giya mas nagkadagko gayud, ug ang atong mga paningkamot sa pagpaminaw sa tingog ni Jesukristo—nga atong Tigpataliwala, ang Manluluwas, ug Manunubos—mas nagkadinalian pa gayud.

Sa ako nang gikasulti dili pa dugay human ko natawag isip Presidente sa Simbahan, ang Ginoo andam na sa pagpadayag sa Iyang hunahuna ngari kanato. Mao kini ang usa sa Iyang labing talagsaon nga mga panalangin ngari kanato.²

Sa atong panahon, Siya misaad, “Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42: 61).

Nasayud ko nga Siya motubag sa atong mga pangamuyo.

Unsaon Nato sa Pagpaminaw Kaniya

Ang pagkasayud kon sa unsang paagi ang Espiritu mamulong mahinungdanon karon. Sa pagdawat og personal nga pagpadayag, sa pagpangita og mga tubag, ug sa pagdawat og proteksyon ug direksyon, kita mahinumdom sa mga sumbanan nga gipakita ni Propeta Joseph Smith alang kanato.

Una, atong isubsob ang atong kaugalingon diha sa mga kasulatan. Ang pagbuhat sa ingon makapaabli sa atong mga hunahuna ug mga kasingkasing sa mga pagtulun-an ug mga kamatuoran sa Manluluwas. Ang mga pulong ni Kristo “magtug-an [kanato] sa tanan nga mga butang nga [atong] buhaton” (2 Nephi 32: 3), ilabi na niining mga panahon sa kawalay kasigurohan ug kasamok.

Sunod mag-ampo kita. Ang pag-ampo nagkinahanglan og pagpasiugda, busa atong ipaubos ang atong mga kaugalingon sa atubangan sa Dios, mangita og usa ka hilom nga dapit diin kanunay natong maadto, ug ibubo ang atong tibuok kasingkasing ngadto Kaniya.

Ang Ginoo nag-ingon “Paduol ngari kanako ug Ako mopaduol nganha kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo” (Doktrina ug mga Pakigsaad 88:63).

Ang pagpaduol ngadto sa Ginoo magdala og kahupayan ug kadasig, paglaum ug pagkaayo. Busa, kita mag-ampo diha sa Iyang ngalan mahitungod sa atong mga kabalaka ug atong mga kahuyang, sa atong pangandoy ug sa atong mga minahal, sa atong mga calling ug sa atong mga pangutana.

Dayon maminaw kita.

Kon magpabilin kita nga moluhod sa makadiyot pagkahuman sa atong mga pag-ampo, ang mga hunahuna, mga pagbati, ug direksyon moabut sa atong hunahuna. Ang pagrekord niadto nga mga impresyon makatabang kanato sa paghinumdom kon unsa nga mga aksyon nga ipabuhat sa Ginoo kanato.

Samtang atong balikon kini nga proseso, kita, sa mga pulong ni Propeta Joseph Smith, “molambo ngadto sa mga baruganan sa pagpadayag.”³

Takus sa Pagdawat og Pagpadayag

Ang pagpalambo sa atong abilidad sa pag-ila sa mga paghunghong sa Espiritu Santo ug pagdugang sa atong kapasidad sa pagdawat og pagpadayag nagkinahanglan og katakus. Ang katakus wala magkinahanglan og pagkahingpit, apan kini nagkinahanglan nga maningkamot kita alang sa dugang nga kaputli.

Ang Ginoo naglaum sa matag adlaw nga paningkamot, matag adlaw nga kalamboan, matag adlaw nga paghinulsol. Ang katakus nagdala og kaputli, ug ang kaputli mopasarang kanato alang sa Espiritu Santo. Samtang kita modawat sa “Espiritu Santo alang sa [atong] paggiya” (Doktrina ug mga Pakigsaad 45: 57), kita makasarang alang sa personal nga pagpadayag.

Kon adunay makapahunong kanato gikan sa pag-abli sa pultahan ngadto sa langitnong direksyon, kita kinahanglang maghinulsol. Ang paghinulsol nagtugot kanato aron maablihan ang pultahan aron kita makadungog sa tingog sa Ginoo nga mas kanunay ug sa klaro nga paagi.

“Ang sumbanan klaro,” mitudlo si Elder David A. Bednar sa Korum sa Napulog Duha ka mga Apostoles. “Kon kanang butang nga atong mahunahuna, makita, madungog, o mabuhat nga makapalayo kanato sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga matang sa kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayud para kanato.”⁴

Kon atong paresan ang gipausbawan nga kaputli ug kamasulundon sa pagpuasa, makugihon nga pagsiksik, pagtuon sa mga kasulatan ug sa mga pulong sa buhing mga propeta, ug sa buhat sa templo ug family history, ang kalangitan moabli. Ang Ginoo, motuman sa Iyang saad: “Ako mohatag nganha kanimo sa akong Espiritu, nga mohatag og kahayag sa imong hunahuna” (Doktrina ug mga Pakigsaad 11:13).

Kinahanglan nga magmapailubon, apan ang Dios mamulong kanato sa Iyang kaugalingong paagi ug sa Iyang kaugalingong panahon.

Usa ka Espiritu sa Pagsabut

Si Job namahayag, “Apan anaay usa ka espiritu diha sa tawo: ug ang gininhawa sa Makagagahum nagahatag kanila ug salabutan” (Job 32:8). Niining bag-ong tuig, awhagon ko kamo sa panghimo sa gikinahanglang mga lakang sa pagpaminaw og mas maayo sa Ginoo ug sa mas kanunay aron nga kamo makadawat sa kalamdagan nga gusto Niya nga ihatag kaninyo.

Sa wala pa mipanaw si Elder Hales nianang adlaw sa Oktubre niadtong 2017, nag-andam siya og gamay nga pakigpulong alang sa kinatibuk-ang komperensya nga wala niya mahatag. Niana nga pakigpulong, siya misulat, “Ang atong hugot nga pagtuo nag-andam kanato nga maanaa sa presensya sa Ginoo.”⁵

Kon kita makadawat og pagpadayag, mogahin kita og panahon sa presensya sa Dios kon Siya mopadayag sa Iyang hunahuna, kabubut-on, ug tingog ngari kanato (tan-awa sa Doktrina ug mga Pakigsaad 68:4). Hinaut nga kita mobutang sa atong hugot nga pagtuo diha sa buhat, sa pagtawag Kaniya, magpakabuhi nga takus sa Iyang gisaad nga pagdasig, ug molihok sa giya nga atong nadawat.