Nakasentro sa panimalay nga Simbahan nga Layo sa Panimalay
Unsaon nako pagtabang sa akong mga anak sa pagtukod og pundasyon sa ebanghelyo kon layo ko sa panimalay?
Litrato gihatag sa tagsulat; ubang mga hulagway gikan sa Getty Images
Sa dihang si Presidente Russell M. Nelson mihulagway sa usa ka nakasentro sa panimalay nga Simabahan atol sa 2018 nga kinatibuk-ang komperensya, ug sa dihang gipahibalo ang programa sa Kabataan ug Kabatan-onan niadtong 2019, ang among pamilya naghinamhinam.
Samtang nagkaduol ang 2020, hinoon, nag-atubang kami og dakong babag. Sugod sa Enero, kinahanglan kong mobiya sa panimalay alang sa unom ka bulan nga buluhaton sa militar. Nasayud ko nga ang akong asawa ug ako adunay sagradong responsibilidad sa pagsentro sa pagkat-on sa ebanghelyo sa among panimalay alang sa among lima ka anak, apan naghunahuna ko kon unsaon nako pagbuhat ang akong bahin samtang layo sa panimalay.
Ang among mga anak nagsugod sa paghunahuna og mga tumong nga makatabang kanila sa pagtubo “sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52), sama sa gibuhat sa Manluluwas. Ang akong otso anyos nga anak nga babaye misulti kanako nga usa sa iyang mga tumong mao ang pagkat-on sa pagluto kauban ni Papa. Uban sa masulub-on nga kasingkasing, gikinahanglan nako nga idirekta pag-usab ang iyang tumong ngadto sa usa ka butang nga mahimo niya sa makadiyot nga wala ang akong tabang. Ang akong mga anak nga lalaki gusto nga mahimong mas maayo sa basketball ug pagdagan—duha ka butang nga gusto namong magka-uban nga buhaton. Giawhag nako sila sa ilang mga tumong, nasayud nga makapalta ko og mga oportunidad sa pagtabang kanila. Isip usa ka pamilya, nangandam kami kutob sa among mahimo.
Ang pagkabulag sa pamilya kanunay nga usa ka pagsulay, apan ang kombinasyon sa teknolohiya ug ang direksyon sa usa ka buhi nga propeta nakapahimo kanako sa pag-apil sa among pagkat-on sa ebanghelyo sa pamilya bisan pa man.
Kami mibati nga nagkahiusa, bisan kon 10 ka time zone ang among pagkabulag, samtang nagtuon kami sa Dali, Sunod Kanako. Kon itugot sa panahon, mag-video chat ko sayo sa buntag atol sa gabii nga pagtuon sa kasulatan sa akong pamilya ug maghisgot mahitungod sa mga kapitulo sa Basahon ni Mormon nga among gitun-an. Diha sa telepono, makig-istorya ko sa akong mga anak mahitungod sa mga video sa Basahon ni Mormon, ug ang akong asawa ug ako maghisgot og mga ideya alang sa family home evening.
Gusto nga motabang sa akong mga anak sa Kabataan ug Kabatan-onan, nagtakda ko og akong kaugalingong mga tumong ug nagpadala ngadto sa mga bata og sinulat nga mga note matag semana nga nagpaambit sa akong pag-uswag ug sa pagpangutana kanila mahitungod sa ilang mga tumong. Pinaagi sa regular nga mga tawag sa telepono, makaapil pa gani ko usahay sa pag-ampo sa pamilya.
Atol sa akong pagkabulag gikan sa akong pamilya, dali nakong nakita ang mga panalangin sa pagsunod sa giya sa propeta. Nakita usab nako nga ang pagmugna og panimalay sa pagkat-on sa ebanghelyo posible bisan og anaa ko sa pikas bahin sa kalibutan!