Ang Kalig-unan sa Akong Kinabuhi ug Hugot nga Pagtuo
Magkadaghan ang akong mabasa sa Basahon ni Mormon, mas nagkadako ang akong pagtuo nga kini mao ang pulong sa Dios.
Imahe sa Basahon ni Mormon nga gihatag sa tagsulat; ubang mga imahe gikan sa Getty Images
Dili gyud ko malipayon sa bata pa ko, apan ang mga butang nausab sa dihang ang duha ka Amerikanong mga lalaki nanuktok sa among pultahan.
Isip usa ka 14 anyos, nakuryuso ko mahitungod niining duha ka Amerikano nga mosulti og Hinapon ug mipaila sa ilang mga kaugalingon isip mga misyonaryo. Human sila mibiya, gitunol sa akong amahan ang usa ka libro nga bag-ohay lang nilang gihatag kaniya nga gitawag og ang Basahon ni Mormon. Misugod ko sa pagbasa niini ug mibati og espesyal nga butang, apan wala ko kahibalo unsa kini. Paglabay sa usa ka bulan, nahuman nako kini ug gibutang kini sa akong butanganan sa mga libro.
Paglabay sa tulo ka tuig, nahimamat nako ang duha ka mga misyonaryo diha sa estasyonan sa tren didto sa Tokyo. Midapit sila nako sa pagpaminaw sa ilang mensahe. Gidala nako ang akong Basahon ni Mormon sa among sunod nga miting.
Gisugdan nila ang panag-istoryahanay pinaagi sa pag-ingon, “Kami gustong mopaambit og usa ka importanting basahon diha nimo.”
Gikuha nako ang Basahon ni Mormon gikan sa akong bag ug nangutana, “Mao ba kini nga basahon? “Nabasa na nako kini.”
Nakalitan sila. Sa katapusan, natudloan ko sa ebanghelyo, ug ang mga misyonaryo miawhag nako sa pagpangutana sa Dios uban sa sinsero nga kasingkasing kon ang Basahon ni Mormon tinuod (tan-awa sa Moroni 10:4–5).
Usa ka gabii naghunahuna ko mahitungod sa Dios, sa Simbahan, sa Basahon Mormon, ug unsaon nako nga magmalipayon ug mibati og kainit sa kahiladman. Dayon nakahukom ko nga magpabunyag.
Human sa pagpasakop sa Simbahan, mipadayon ko sa pagbasa sa Basahon ni Mormon. Usa ka adlaw samtang nagbasa, nakadawat ko og lahi nga hunahuna mahitungod sa tambal sa akong amahan alang sa alta presyon. Nakakat-on ko og dugang mahitungod niini ug nasuta nga ang laing epekto maoy hinungdan sa grabing depresyon. Sa akong sugyot, mihangyo ang akong amahan sa iyang doktor nga ilisan ang iyang tambal. Ang iyang depresyon nawala sukad niadto.
Magkadaghan ang akong mabasa, mas nagkadako ang akong pagtuo nga ang Basahon ni Mormon mao ang pulong sa Dios. Nahimo kong mas malipayon ug gustong mopaambit sa kamatuoran sa uban.
Misupak ang akong mga ginikanan sa akong pag-adto og misyon ug sa kadugayan gipapahawa ko sa ilang balay, apan determinado ko. Miserbisyo ko sa Tennessee, USA. Isip usa ka misyonaryo sa Santos sa Ulahing mga Adlaw nga gikan sa usa ka Buddhist nga nasud nga nagserbisyo diha sa Bible Belt nga anaa sa habagatang bahin sa Estados Unidos diin adunay daghang konsirbatibo nga evangelical nga mga protestante, kanunay kong gipangutana kon nganong nakatuo ko sa Basahon ni Mormon. Mipamatuod ko nga nag-ampo ko mahitungod sa katinuod niini ug nakadawat og tubag nga kini tinuod.
Human sa akong misyon, nakahuman ko sa pag-eskwela ug nakasulod og dakong kompanya sa Japan nga mibalhin kanako sa daghang mga dapit sa tibuok kalibutan, lakip sa Myanmar, England, ug Ireland. Bisan asa ko moadto, akong gipaambit ang akong pagpamatuod sa Basahon ni Mormon sa daghang mga tawo kutob sa mahimo, gikan sa drayber sa taxi ngadto sa usa ka ministro sa estado.
Ang Basahon ni Mormon mao na—ug nahimong sa kanunay—ang kalig-unan sa akong kinabuhi ug sa akong hugot nga pagtuo diha ni Jesukristo. Kon mabug-atan ko sa kalisdanan, mobasa ko sa Basahon ni Mormon ug mabuntog ang akong kalisdanan uban sa espirituhanong suporta gikan sa Langitnong Amahan ug sa atong Manluluwas. Ang Basahon ni Mormon nakapanalangin kanako sa matag adlaw sa akong kinabuhi.