Mga Sukaranan sa Ebanghelyo

Ang Dios Namulong Kanato Karon

Gusto sa Langitnong Amahan nga motabang kanato. Naminaw ba kita Kaniya?

Duha ka gatus ka tuig ang milabay, ang Langitnong Amahan ug si Jesukristo mipakita ngadto sa usa ka batan-on nga ginganlan og Joseph Smith. Kining Unang Panan-awon nagtudlo kanato og importanting mga kamatuoran. Si Jesus sa makausa pa nangulo og Simbahan dinhi sa yuta. Anaa karon ang mga propeta sama sa karaang panahon. Ug ang Dios personal nga nakaila sa matag usa kanato ug naminaw sa atong mga pag-ampo. Kita mapanalanginan kon kita maningkamot sa pagpaminaw sa Iyang tingog matag adlaw.

Unsa ang Pagpadayag?

Kon ang Dios makigsulti sa Iyang mga anak, gitawag kini og “pagpadayag.” Adunay nagkalain-lain nga matang sa pagpadayag.

Ang personal nga pagpadayag mao ang higayon nga ang Dios makigsulti sa tagsa-tagsa kanato pinaagi sa Espiritu Santo. Siya makahupay ug makagiya kanato.

Makadawat usab kita og pagpadayag kon unsaon sa pagtabang niadtong mga tawo nga kita gitawag sa pagpangulo. Sama pananglit, ang mga ginikanan makadawat og pagpadayag mahitungod sa ilang mga pamilya, ug ang usa ka bishop makadawat og pagpadayag mahitungod sa iyang ward.

Ang propeta lamang ang makadawat og pagpadayag alang sa tibuok Simbahan, apan ang matag usa kanato mahimo nga mag-ampo aron masayud kon tinuod ba ang gitudlo sa atong mga lider.

Unsaon Nako Pagdapit og Pagpadayag?

Mahimo kitang makig-istorya ngadto sa usa ka mahigugmaon, makagagahum sa tanan, nasayud sa tanan nga Langitnong Amahan bisan kanus-a pinaagi sa pag-ampo. Gusto Niya nga magpasalamat kita Kaniya alang sa mga panalangin, makig-istorya Kaniya mahitungod sa atong mga kinabuhi, ug mangayo alang sa unsay atong gikinahanglan. Dayon kinahanglang bantayan nato ang mga hunahuna ug mga pagbati nga gikan sa Espiritu Santo, kinsa sama sa usa ka mensahero gikan sa atong Langitnong Amahan.

Unsay Sama nga Tingog sa Pagpadayag?

Walay bugtong nga paagi sa paghulagway sa pagpadayag. Ang Dios makigsulti sa matag usa kanato sa paagi nga atong masabtan (tan-awa sa Doktrina ug mga Pakigsaad 1:24). Ang mga tawo usahay makasinati og mga damgo ug mga panan-awon. Apan sa kasagaran, ang Dios makigsulti kanato pinaagi sa hilum nga mga pagbati gikan sa Espiritu Santo, sama sa kainit, kalinaw, ug kalipay.

Sa pagtuon sa Doktrina ug mga Pakigsaad niini nga bulan, mabasa nato ang mahitungod kang Oliver Cowdery, kinsa gitudloan nga ang pagpadayag moabut ngadto sa iyang hunahuna ug kasingkasing (tan-awa sa Doktrina ug mga Pakigsaad 8:2).

Unsa ang mga Ehemplo sa Pagpadayag diha sa Kasulatan?

Daghang mga istorya sa kasulatan ang naghulagway sa Dios nga namulong sa Iyang katawhan:

Ang Dios misulti ni Noe kon unsaon sa pagpabilin sa iyang pamilya nga luwas (tan-awa sa Genesis 6:17–18).
Ang Langitnong Amahan ug si Jesus mihupay sa usa ka disipulo nga ginganlan og Esteban (tan-awa sa Mga Buhat 7:55).
Ang pagpadayag nakatabang ni Nephi nga motuman sa mga sugo (tan-awa sa 1 Nephi 4:6).
Samtang ang ubang mga kasulatan naggikan sa karaang mga rekord, ang Doktrina ug mga Pakigsaad naglangkob sa moderno nga mga pagpadayag. Karong tuiga kita adunay espesyal nga oportunidad sa pagtuon sa usa ka basahon nga puno sa direkta nga mga pulong sa Ginoo.