Mga Baruganan sa Pagpangalagad

Magpaduol ug Maglig-on sa Usag Usa

Sa Kinatibuk-ang Kapangulohan sa Relief Society

Kita mapanalanginan kon kita mangalagad o gipangalagaran.

Sa labing maayo, ang nangalagad ug ang gipangalagaran mapanalanginan. Kon kita mangalagad sa usa ka tawo, ang tanan nga naapil napanalanginan—ang atong mga kaugalingon, ang atong mga kauban, ug kadtong atong mga gipangalagaran. Kita napanalanginan pinaagi sa kalig-on sa usag usa. Kita napanalanginan samtang kita nagsuporta ug nagtabang sa usag usa sa atong mga hagit. Kita napanalanginan pinaagi sa mga relasyon nga namugna.

Kon magpasabut unsay buot ipasabut sa pagpangalagad sa uban, si Elder Jeffrey R. Holland sa Korum sa Napulog Duha ka mga Apostoles nagtudlo kanato nga “magpaduol ug maglig-on kanila” (Doktrina ug mga Pakigsaad 20:53).¹ Niini nga kasulatan, adunay duha ka mahinungdanong elemento nga makatabang nato sa pagpangalagad niadtong kita nagpakabana:

• Una, ang “magpaduol” kanila nagsugyot nga kini importante nga makaila og maayo niadtong atong gipangalagaran aron sa pag-ugmad og makahuluganong relasyon ug makamugna og kasuod sa pagsalig.

• Ikaduha, sa higayon nga sila masayud nga kita tinud-anay nga nagmahal ug nag-amuma kanila, makahisgut kita og mga paagi nga kita makasuporta ug “molig-on kanila.” Agig balos, kita malig-on usab.

Ang mga tawo dili mga proyekto; sila atong mga igsoon—isig ka byahero niining panaw sa kinabuhi. Gusto kita nga magdungan sa pagpanaw sa kinabuhi, pagtabang sa usag usa nga makaangkon og kalig-on sa pagbuntog sa mga babag diha sa dalan (tan-awa sa Mga Hebreohanon 12:10–13).

Ang pulong nga “maglig-on” nagpahayag nga kita magtinguha gayud—nga ang atong tabang makahatag og abag ug mga kahimanan aron ang matag indibidwal adunay mga kapanguhaan ug kalig-on sa pagpadayon ug sa pagbuntog sa mga hagit sa kinabuhi.

Daghan kanato mobati nga dili sarang sa pagtabang sa atong mga kaigsoonan sa ilang talagsaon nga mga kabalaka. Si Elder Holland mihatag niini nga pag-awhag: “Bisan pa sa unsay atong bation nga atong mga limitasyon ug mga kakulangan—ug kitang tanan adunay mga hagit—bisan pa man, hinaot nga maghago ta uban sa Ginoo sa ubasan, sa paghatag og tabang sa Dios ug Amahan natong tanan sa Iyang dako nga buluhaton sa pagtubag sa mga pag-ampo, paghatag og kahupayan, pagpahid sa mga luha, ug paglig-on sa huyang nga mga tuhod.”²

Niini nga tuig, kining Mga Baruganan sa Pagpangalagad nga mga artikulo mohatag og mga ideya ug mga kapanguhaan nga makatabang kanimo nga makasabut kon unsaon sa pagpaduol ug paglig-on sa uban samtang sila nag-atubang og mga hagit sa kinabuhi.

Mubo nga mga sulat

1. Jeffrey R. Holland, “Magpaduol ug Maglig-on Kanila,” Liahona, Mayo 2018, 102.

2. Jeffrey R. Holland, “Magpaduol ug Maglig-on Kanila,” 103.

Litrato sa tuo pinaagi sa Kaleidoscope Pictures

Mga sugyot alang sa Pagpaduol ug Paglig-on sa Uban

Magtinabangay sa pag ugmad og makahuluganong relasyon. Ang pagsinabtanay naggikan sa paggahin og panahon ug paningkamot nga magkailhanay sa usag usa. Hisguti kon sa unsang paagi nga ang matag usa kaninyo gustong mobuhat niana. Aduna bay usa ka kalingawan o interes nga imong ipaambit? Makatabang ba ang regular nga pagpakig-istorya? Makasuporta ba kamo sa usag usa diha sa mga calling sa Simbahan o sa pagsimba sa templo?

Pagtinambagay mahitungod sa mga panginahanglan. Walay usa nga kinahanglang mobuhat niini nga mag-inusara. Ang pagpakigtambag uban kanila makatabang kaninyo nga magkasinabut kon unsa man ang ilang mga panginahanglan, unsay ilang mabuhat, ug sa unsang paagi kamo makatabang.

Makatabang nga mga Kapanguhaan

Kini nga mga kapanguhaan makatabang sa inyong mga paningkamot sa pag-ugmad og makahuluganong mga relasyon.

• Pagkat-on og dugang mahitungod sa pagtukod og makahuluganong mga relasyon sa “Mga Baruganan sa Pagpangalagad: Pag-ugmad og Makahuluganong mga Relasyon,” Liahona, Ago. 2018.

• Palamboa ang inyong relasyon pinaagi sa pagpalambo sa inyong kahanas sa pagpaminaw. Basaha ang “Lima ka Butang nga Buhaton sa Maayong mga Tigpaminaw,” Liahona, Hunyo 2018.

• Pagkahimong mas mosimpatiya makahimo kaninyo nga mas maayong higala. Pagkat-on unsaon sa “Pagpalambo sa Empatiya [Empathy] aron Mangalagad,” Liahona, Peb. 2019.

• Aron makat-on og dugang kabahin sa pagtinambagay sa usag usa, basaha ang “Mga Baruganan sa Pagpangalagad: Makigtambag mahitungod sa Ilang mga Panginahanglan,” Liahona, Sept. 2018.

Ipaambit ang Inyong mga Hunahuna

Ipadala ang inyong mga kasinatian sa pagpangalagad sa [e-mail].