Usa ka Bag-o nga Publikasyon alang sa Tibuok Kalibutan nga Simbahan

Among minahal nga kaigsoonan,

Ang mga miyembro sa Ang Simbahan ni Jesukristo sa mga Santos sa Ulahing mga Adlaw makaplagan sa mga nasud sa tibuok kalibutan. Bisan kon mamulong kita og daghang mga pinulongan, nagkahiusa kita sa atong mga paningkamot sa pagsunod sa Manluluwas ug nagmaya sa pagkasayud nga kitang tanan mga anak sa Dios.

Gikan sa nag-unang mga adlaw sa gipahiuli nga Simbahan, ang mga publikasyon sama sa mga magasin sa Simbahan nagsuporta sa mga miyembro sa ilang mga paningkamot sa pagkat-on, pagpakabuhi, ug pagpaambit sa ebanghelyo. Ang makadasig nga mga mensahe nakatabang sa mga miyembro sa pagpakigdait sa mga lider sa Simbahan ug sa usag usa. Uban sa tinguha sa paghatag niini nga mga panalangin ngadto sa mas daghan nga mga anak sa Dios, nalipay kami nga ipaambit kining unang isyu sa bag-ong Liahona nganha kaninyo.

Ang ubang mga kausaban sa mga magasin sa Simbahan naglakip og bag-o nga mga publikasyon alang sa kabataan ug kabatan-onan sa tibuok kalibutan. Matag usa sa mga magasin—ang Liahona, Alang sa Kalig-on sa mga Kabatan-onan, ug Higala—makigtambayayong sa Dali, Sunod Kanako nga mga kapanguhaan sa pagtuon sa kasulatan nga nagsuporta sa pagkat-on sa ebanghelyo diha sa inyong panimalay. Kini nga mga magasin mahimo usab nga mas maanaa sa digital nga mga channel.

Ang katuyoan sa mga magasin sa Simbahan nagpabiling mao gihapon: aron matabangan ang mga anak sa Dios nga mahimong mas makabig ngadto sa ilang Manluluwas, si Jesukristo. Mapasalamaton kami alang sa inyong tinguha sa pagkat-on ug pagsunod sa ebanghelyo, ug hibaloi nga kini nga mga magasin motabang kaninyo niadto nga mga paningkamot.

Matinuoron,

Ang Unang Kapangulohan