Usa ka Tipik sa Langit sa Misyonaryo
Ang tagsulat nagpuyo sa Utah, USA.
Sa dihang nanuktok kami sa pultahan sa pamilyang Bautista, wala kami masayud sa mga panalangin nga among makita sa mosunod nga mga tuig.
Mga paghulagway pinaagi ni Dilleen Marsh
Usa ka ulanon nga gabii sa hinapos sa Nobyembre 1973, ang akong kompanyon ug ako nag-tracting sa Manila, sa Pilipinas, ug kami mituktok sa pultahan ni Romeo ug Naty Bautista. Gipasulod mi nila ug matinahurong naminaw sa among mubo nga mensahe. Si Naty dili makasulti og Iningles (ug mitudlo lamang kami sa Iningles niadtong panahona), apan si Romeo makasulti og Iningles ug interesado nga pabalikon kami. Miingon usab siya nga ang iyang manghud nga babaye, si Avelia, kinsa nagpuyo uban kanila samtang nag-eskwela sa kolehiyo sa Manila, basin mainteresado.
Ingon ka madasigon kaayo sama sa batan-ong mga misyonaryo mahitungod sa bag-ong mga investigator, mahinamon kaming naghulat alang sa gikasabutang pagbalik human sa pipila ka adlaw. Nindot kaayo ang dagan sa leksyon nga hapit dili kami makatuo niini. Si Romeo ug Avelia naminaw pag-ayo ug dunay mga pangutana. Naminaw si Naty apan wala makasabut sa kadaghanan sa unsay among gisulti. Silang tanan andam nga modawat gikan sa sinugdanan—usa ka pangandoy sa misyonaryo!
Human kami mobiya sa matag leksyon, si Romeo motudlo sa leksyon ngadto sa iyang asawa sa Tagalog. Dungan nilang gibasa ang Basahon ni Mormon sa Iningles, hinay-hinay. Sila adunay duha ka gagmay pa nga mga anak nga babaye niadtong higayona: si Ruth, usa ka gamayng bata, ug si Namie, usa ka bag-ong masuso.
Pagka Disyembre 1973, bulahan kong nakabunyag ug nakakumpirma ni Romeo ug sa iyang igsoong babaye nga si Avelia. Ang akong kompanyon ug ako nadasig sa hugot nga pagtuo ug interes sa pamilya sa ebanghelyo, apan wala gayud namo matagna ang mahangturong epekto sa ilang desisyon ug sa dili maihap nga mga kinabuhi nga mapanalanginan diha-diha dayon ug sa katuigan nga muabot.
Si Romeo ug Avelia nahimong matinud-anon ug lig-on nga mga miyembro sa Makati Branch gikan sa sinugdanan. Sa wala madugay pagkahuman sa ilang bunyag, mipauli ko sa Siyudad sa Salt Lake, Utah. Sa akong kahinam nga mopauli, wala gani nako nakuha ang address ni Romeo aron makapadala og sulat. Walay internet o mga cell phone niadtong panahona.
Sa wala madugay nahimamat nako si Susan, ang akong mahangturong hinigugma. Gitudloan, gibunyagan, ug gipakasalan nako siya niadtong 1975, ug nasilyo kami sa Templo sa Salt Lake pagka-1976. Kami adunay tulo ka anak ug midawat sa nagkalain-laing mga katungdanan sa Simbahan. Gikinahanglan usab kaayo ko sa among negosyo sa pamilya. Kanunay kong naghunahuna mahitungod sa pamilya Bautista ug kumusta na sila, apan wala ko kahibalo og bisan unsa nga paagi sa pagkontak kanila.
Dayon usa ka espesyal nga adlaw niadtong 1997, nakadawat ko og sulat gikan ni Mrs. Avelia Wijtenberg, nga gimarkahan sa koreyo [postmarked] gikan sa Mackay, Queensland, Australia! Ako walay nailhan nga bisan kinsang tawo didto, apan sa dihang nabasa nako ang sulat, akong nahibaloan nga ang igsoong babaye ni Romeo nga si Avelia nakailaila ug naminyo sa usa ka Dutch-Australian nga lalaki ug nagpuyo sa Queensland sulod na sa pipila ka tuig. Nakit-an niya ang akong karaan nga address nga padad-an og sulat sa iyang notebook usa ka adlaw samtang hingpit nga nanglimpyo.
Si Avelia ug ako misugod sa pagsulat ngadto usag usa, nga mahinamong masayud kon unsay nahitabo sa usag usa sa milabayng pipila ka dekada. Nakahatag usab siya kanako og address sa padad-an og sulat alang kang Romeo, kinsa mibalhin sa Tiwi, diha sa habagatang bahin sa Isla sa Luzon sa Pilipinas.
Nianang tuiga, samtang si Romeo ug ako nagsinulatay sa usag usa, human sa 24 ka tuig nga walay kontak, ang among karaan nga relasyon napukaw. Miingon si Romeo nga siya ug si Naty karon adunay lima na ka anak. Si Naty ug ang tibuok pamilya nabunyagan pila ka tuig human ako mipauli. Ang ilang kamagulangan, si Ruth, nakaserbisyo og misyon sa Philippines Davao Mission, ug ang ikaduha ug ikatulong anak nga mga babaye, si Namie ug si Joan, nagserbisyo og mga misyon sa amihanang Luzon ug sa Guam, sa samang han-ay. Sila adunay ikaupat nga anak nga babaye, si Lyn, kinsa sa wala madugay miserbisyo sa Philippines Baguio Mission, ug sa katapusan, usa ka anak nga lalaki, si John, kinsa sa wala madugay miserbisyo sa Philippines Cagayan de Oro Mission.
Ang akong asawa ug ako mihangyo sa mga address ni Namie ug Joan ug misulat ngadto kanila sa ilang mga misyon. Kami wala gayud makahimamat kanila ug wala gayud makaila kanila apan mibati og diha-diha dayon nga kasuod nga lisud ihulagway sa mga pulong. Daw sama kadto nga sila ang among kaugalingong mga anak nga babaye! Pinaagi sa among mga sulat, among nabag-o ang usa ka gugma alang sa pamilya Bautista ug ilabi na kang Namie ug Joan—kinsa puno sa Espiritu, nga nagtrabaho pag-ayo isip full-time nga mga misyonaryo. Sa usa ka sulat, mihangyo si Namie kon mahimong manawag siya namo sa Adlaw sa Pasko, tungod kay ang iyang mga ginikanan walay telepono nianang higayuna. Uban sa pagtugot sa iyang presidente sa misyon, mitawag siya sa Adlaw sa Pasko niadtong 1997, ug kaming duha mihilak gayud sulod sa pipila ka minuto. Dayon mipahinumdom ko kaniya nga ang usa ka internasyonal nga long-distance nga collect call mahal ra kaayo nga usikan lang sa paghinilakay. Nangatawa kami ug nalingaw sa panag-istoryahanay, bisan sa iyang limitado nga mga kahanas sa Iningles. Gidapit kami niya nga moadto sa Pilipinas sa sunod nga ting-init alang sa iyang pakigpulong sa pagpauli.
Sa ting-init niadtong 1998, samtang si Namie mipauli gikan sa iyang misyon, mihimo ko og mga plano uban sa akong 16 anyos nga anak nga babaye sa pag-adto sa Pilipinas. Miabut kami sa Manila ug nahimamat si Ruth. Magkauban kaming mitambong sa Manila Philippines Temple. Dayon misakay kami og eroplano padulong sa habagatan ngadto sa panimalay sa iyang pamilya sa Tiwi. Imposible nga mahulagway ang kalipay sa pagkakita pag-usab kang Romeo ug sa iyang pamilya. Ang lawom nga kasuod sa panag-igsoonay nabag-o diha-diha dayon. Nag-istoryahanay kami ug migakos ug mihinumdom; dungan kami nga nangaon ug nagbasa sa mga kasulatan uban sa iyang pamilya sa matag gabii nga anaa kami didto. Sila lig-on kaayo nga mga ehemplo sa pagpamatuod sa ilang gamay nga branch. Mitambong kami sa miting sa sakramento sa Tiwi Branch ug naminaw kang Namie nga mireport sa iyang misyon. Nindot kaayo kadto. Ingon og celestial kadto. Sa tinuoray kini usa ka langit sa misyonaryo.
Nianang higayuna, nagserbisyo si Romeo isip presidente sa Tiwi Branch. Nahimo siya nga instrumento sa pagdala sa ebanghelyo ngadto sa iyang mga paryente diha sa amihanang Luzon. Gidala ni Romeo ang iyang pamilya ngadto sa templo, diin si Naty ug ang ilang mga anak nasilyo. Karon ang tanang lima ka anak nangaminyo na ug nasilyo sa Templo sa Manila. Ang pipila naminyo og nauli na nga mga misyonaryo. Si Joan mao ang instrumento sa pagkabig sa iyang uyab. Naghulat siya uban kaniya sulod sa usa ka tuig human sa iyang bunyag ug dayon naminyo kaniya sa Templo sa Manila. Kalit nga namatay si Naty niadtong 2007, apan ang pamilya nagpabilin nga lig-on nga nakagamut sa ebanghelyo. Mapasalamaton sila alang sa pagsilyo nga pakigsaad ug nasayud nga makakita sila pag-usab sa ilang matahum nga asawa ug inahan kon sila magmatinud-anon.
Karon adunay sobra sa 70 ka miyembro sa pamilya Bautista nga aktibo sa Simbahan. Ang pamilya ug ang mga paryente nakatala og 17 ka full-time nga misyon ug 14 ka pagminyo sa templo. Ang mga sakop sa pamilya nakaserbisyo usab isip mga bishop ug mga presidente sa branch; mga presidente sa stake ug district; ug mga presidente ug mga magtatambag sa Relief Society, Young Women ug Primary! Ang anak nga lalaki ni Romeo, si John, usa ka bishop sa dapit sa Siyudad sa Quezon. Ang bana ni Ruth usa ka high councilor niana nga stake. Ang bana ni Lyn usa usab ka presidente sa branch sa Tiwi. Ang pamilya Bautista siguradong nagtukod og lig-on nga kabilin sa pagserbisyo ug kalig-on sa Pilipinas.
Ang akong asawa ug ako miserbisyo og senior nga misyon sa Philippines San Pablo Mission gikan sa 2008 hangtud 2010. Usa ka adlaw didto sa templo sa Manila, kadaghanan sa pamilya Bautista nagpundok alang sa kaminyoon ni John Bautista (anak nga lalaki ni Romeo) ngadto kang Sister Victorino, usa sa mga sister nga misyonaryo gikan sa among Misyon sa San Pablo kinsa nakahuman sa iyang misyon ug bag-ohay lang mipauli.
Ang among presidente sa misyon nangutana kon gusto ba namong motambong niana nga malipayong panghitabo, ug diha-diha dayon mihimo kami og mga plano nga makatambong. Ang akong asawa nasayud sa akong relasyon sa pamilya Bautista apan hingpit nga nahingangha kon pila ka sakop sa pamilya ang anaa didto ug kon unsa ka dako ang ilang paghigugma kaniya. Siya nakabaton og 70 ka bag-ong higala sa tibuok kinabuhi.
Kanunay kong maghunahuna sa Doktrina ug mga Pakigsaad 18:15: “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” Sama sa ginagmayng balud sa usa ka lim-aw, ang impluwensya sa usa ka kalag, si Romeo, mipadala og mga dagkong balud sa lig-on nga mga pagpamatuod ug pagserbisyo sa Simbahan sa Pilipinas.
Bulahan ko nga nakatabang sa pag-itsa sa gamay nga bato ngadto sa lim-aw upat ka dekada na ang milabay sa pagbunyag ni Romeo ug Avelia. Nakasinati ko sa dili mahulagway nga kalipay sa akong relasyon uban niining maayo kaayo nga pamilya, karon anaa na sa ilang ikatulo nga henerasyon sa pagsunod sa ebanghelyo. Kini mao gayud ang nagpadayon nga kabilin ug kalipay sa misyonaryo nga buhat. Kini mao ang usa ka tipik sa langit sa misyonaryo!