Usa ka Mas Maayo nga Pagpili
Nasurprisa ko nga nakadawat og ingon ka direkta nga mensahe gikan sa Espiritu. Nasayud ko unsay buhaton ug wala magpanuko og usa ka segundo.
Litrato sa atubangan sa Vancouver British Columbia Temple gihatag sa tagsulat; ubang mga hulagway gikan sa Getty Images
Human mobiya ang akong bana alang sa trabaho, naanad ko nga humanon ang akong inadlaw nga buluhaton sa panimalay ug dayon mohigda ug mogahin og pipila ka oras sa Facebook, Messenger, ug Instagram. Migahin ko og hapit 15 ka oras matag semana sa social media. Daw dili ko makahunong sa pagpaambit og kataw-anan nga mga video ug mga hulagway, apan panagsa ra ko mipaambit og mga mensahe mahitungod sa Simbahan. Kasagaran sa tingkatulog, kinahanglan nga tabangan ko sa akong bana nga moundang sa social media aron makatulog ko.
Niining panahona, naghimo ko og tumong nga basahon ang Biblia gikan sa tanan nga paagi aron matabangan ko nga mas makasabut sa ebanghelyo ni Jesukristo. Matag adlaw gipahinungod nako ang akong kaugalingon sa pagbasa og mga tulo ka kapitulo. Sa mga adlaw nga ang social media mikuha og bahin sa akong oras, maningkamot ko nga pasobrahan pa og gamay ang pagbasa.
Usa ka gabii gibutang nako ang akong Biblia tupad kanako aron sa pagbasa og pipila ka kapitulo. Apan sa wala pa mobasa, gikuha nako ang akong cell phone ug migahin sa sunod nga oras ug tunga sa social media. Sa dihang nakaamgo ko kon unsang orasa na, gipadaplin nako ang akong cell phone ug miluhod aron mag-ampo. Ang akong pag-ampo wala gani milungtad og 10 ka segundo. Sa dihang mibarug ko, usa ka tingog ang misantup sa akong hunahuna, nga nag-ingon, “Gusto ko nga mogahin ka og panahon sa pag-ampo sama sa imong paggahin sa social media.”
Nasurprisa ko nga nakadawat og ingon ka direkta nga mensahe gikan sa Espiritu. Nasayud ko unsay buhaton ug wala magpanuko og usa ka segundo. Diha-diha dayon, akong gitangtang ang mga social media nga app sa akong cell phone ug misugod og usa ka social media nga puasa.
Usa ka semana ang milabay, natugahan ko sa balaan nga templo. Uban sa mga pakigsaad nga akong gihimo uban sa Ginoo, misaad ko Kaniya nga sa akong libre nga panahon magbasa ko mahitungod sa Simbahan ug mahitungod kang Propeta Joseph Smith ug magpadayon sa pagbasa sa Biblia.
Ang Langitnong Amahan hilabihan nga mipanalangin kanako alang sa pagdesisyon nga mohimo sa mas maayo nga pagpili pinaagi sa pagpalayo sa social media ug paggahin og dugang nga panahon sa pagkat-on mahitungod sa gipahiuli nga ebanghelyo ni Jesukristo.