Mga Propeta ug Pagpadayag

Imahe

illustration of Joseph Smith and Sidney Ridgon

Minahal nga mga Ginikanan,

Ang Doktrina ug mga Pakigsaad mao ang koleksyon sa mga pagpadayag gikan sa Ginoo. Ang pagtuon niini maghatag kanato og talagsaong oportunidad nga makaila sa tingog sa Manluluwas samtang Siya mamulong, dili lamang sa Iyang mga propeta, apan pinaagi kanila ngadto sa kasagaran nga mga miyembro sa Simbahan sama kanato.

Niining bulana, ang mga magasin maghatag kaninyo og lain-laing mga oportunidad sa pagpakig-istorya sa inyong mga anak, lakip na ang mahitungod sa pagpadayag, kon sa unsang paagi kini mahimo, ug nga ang Dios andam nga makigsulti ngadto kanila.

Mga Panaghisgutan sa Ebanghelyo

Kalinaw diha sa Iyang mga Saad (Doktrina ug mga Pakigsaad 6)

Ipakita ang poster sa pahina 2 ug basaha ang mga pulong sa Manluluwas gikan sa seksyon 6. Kini nga saad gihatag ngadto kang Joseph Smith ug Oliver Cowdery niadtong Abril 1829. Nianang higayuna, 23 anyos pa lamang si Joseph apan nakasinati na og pagsalikway ug pagpanggukod. Sa unsang paagi kaha nga kini nga mga pulong nakatabang ni Joseph ug Oliver? Sa unsang paagi kaha magamit kini nga mga pulong ngadto sa mga hagit sa inyong kinabuhi? Unsa ang atong mabuhat aron madawat kining gisaad nga mga panalangin?

Mga Propeta ug Personal nga Pagpadayag (Doktrina ug mga Pakigsaad 1)

Ang Ginoo indibidwal nga makigsulti kanato ug pinaagi sa mga propeta (tan-awa sa seksyon 1). Gamita ang “Mga Sukaranan sa Ebanghelyo” sa pahina 10 aron sa pagtabang sa inyong mga anak nga makakat-on og dugang mahitungod sa pagpadayag. Ikonsiderar ang pagbasa og dungan sa mensahe gikan ni Presidente Russell M. Nelson diha sa pahina 6. Unsa ang inyong gibati nga gisulti sa Dios kaninyo pinaagi sa Iyang propeta? Ang pagsunod sa iyang tambag mahimong mosangput ngadto sa pagtakda og mga tumong diha sa programa sa Kabataan ug Kabatan-onan. (Alang sa dugang nga impormasyon kabahin niini nga hilisgutan, mahimo usab ninyong tan-awon o basahon ang pakigpulong ni Presidente Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 93–96.)

Suporta sa Dali, Sunod Kanako

Ayaw palabya ang mga ideya sa pahina 26 nga nagsuporta sa inyong sinemana nga pagtuon sa Dali, Sunod Kanako.

Kalingawan sa Pagtuon sa Pamilya

Pagpangita kang Kristo

Si Presidente Ezra Taft Benson (1899–1994) mitudlo, “Sa pagkatinuod hapit matag pahina sa … Doktrina ug mga Pakigsaad … nagtudlo mahitungod sa Agalon.”¹

I-set ang timer og duha ka minuto.
Ang mga sakop sa pamilya paspas nga mangita sa sinugdanan sa Doktrina ug mga Pakigsaad aron sa pag-ihap sa gidaghanon sa mga pakisayran nga ilang makita kang Kristo. Pagsugod sa pasiuna ug undang sa seksyon 9.
Human matapos ang oras, paghatag og dugang nga panahon alang sa matag tawo aron sa pagpili og usa niini nga mga bersikulo nga labing makahuluganon ngadto kanila. Pagpuli-puli sa pagpaambit.

Panaghisgutan: Unsaon nato sa paghimo sa atong pagtuon sa Doktrina ug mga Pakigsaad niining tuiga nga nakasentro kang Kristo? Unsay atong mabuhat aron “mopatalinghug” ngadto sa tingog sa Ginoo?

1, 2, 3, Siya Makigsulti ngari Kanako

Ang Doktrina ug mga Pakigsaad nag-uban sa Biblia ug sa Basahon ni Mormon sa pagtudlo kanato kabahin ni Kristo ug sa Iyang mga pagpadayag ngari kanato. Ang pasiuna sa Doktrina ug mga Pakigsaad nagpasabut nga kita makadungog “sa malumo apan gamhanan nga tingog ni Ginoong Jesukristo” diha sa mga pagpadayag nga anaa niini nga basahon.

Sekreto nga i-assign ang matag sakop sa pamilya sa usa ka numero: (1) Biblia, (2) Basahon ni Mormon, o (3) Doktrina ug mga Pakigsaad.
Ang matag tawo mangita og usa ka makahuluganon nga bersikulo diha niana nga basahon diin anaa ang “malumo ug gamhanan nga tingog” sa Ginoo nga nagtudlo o nagpasabut og mga baruganan ngari kanato.
Pagpuli-puli sa kusog nga pagpaambit sa mga bersikulo nga dili ipahibalo ang mga pakisayran sa kasulatan. Ang uban mopataas og 1, 2, o 3 ka tudlo aron sa pagtag-an kon hain nga basahon sa kasulatan ang matag bersikulo naggikan.

Panaghisgutan: Sa unsang paagi ang mga kasulatan gikan sa karaang panahon magtinabangay uban sa modernong mga pagpadayag nga makita sa Doktrina ug mga Pakigsaad aron sa pagtabang kanato nga makakat-on og dugang kabahin kang Kristo ug makapaminaw sa Iyang tingog? Sa unsang paagi atong mapalambo ang atong abilidad sa pagpaminaw sa tingog sa Ginoo samtang magtuon kita sa Doktrina ug mga Pakigsaad niining tuiga?

Unsa ang Inyong Makita sa Alang sa Kalig-on sa mga Kabatan-onan nga magasin Karong Bulana

Ipaila ang 2021 nga Tema sa Kabatan-onan

Basaha ang mga mensahe gikan sa mga Kinatibuk-ang Kapangulohan sa Young Men ug Young Women mahitungod sa tema sa kabatan-onan gikan sa Doktrina ug mga Pakigsaad 64:33–34. Makita usab ninyo ang sheet music alang sa 2021 nga tema nga kanta ug usa ka lista sa mga kapanguhaan aron sa pagsuporta sa tema sa tibuok tuig.

Ania ang Doktrina ug mga Pakigsaad

Ipaila ang pagtuon sa Dali, Sunod Kanako niining tuiga uban sa usa ka biswal nga outline sa kasaysayan ug katuyoan sa Doktrina ug mga Pakigsaad.

“Joseph Smith: Akong Propeta”

Ang mga ehemplo niini nga artikulo nagtudlo kon ngano nga ang pagkahibalo nga si Joseph Smith mao ang propeta niini nga dispensasyon importante sa matag usa kanato sa personal nga paagi. Basaha ang artikulo isip usa ka pamilya, dayon hangyoa ang matag tawo sa pagpaambit sa ilang kaugalingong mga panabut.

Makalingaw nga Hununganan

Kini nga mga kalihokan makalingaw nga buhaton sa tagsa-tagsa o isip usa ka pamilya.

Unsa ang Inyong Makita sa Higala Karong Bulana

Tabang sa Dali, Sunod Kanako

Dasiga ang gugma sa inyong mga anak alang sa mga kasulatan uban sa usa ka tsart sa pagbasa sa Doktrina ug mga Pakigsaad nga gamiton sa tibuok 2021. Makita usab ninyo ang usa ka binulan nga istorya sa kasulatan ug koloranan nga pahina alang sa batan-on nga mga magbabasa.

Makalingaw nga Kasaysayan sa Simbahan

Guntinga ang makolekta nga mga kard sa kasaysayan sa Simbahan aron makatabang sa inyong mga anak nga makat-on sa istorya sa Pagpahiuli. Basaha usab ang istorya nga naghulagway sa usa ka modernong pioneer gikan sa laing nasud matag bulan.

Hagit sa Matinabangon nga mga Kamot

Basaha ang usa ka espesyal nga pagdapit gikan sa Kinatibuk-ang Kapangulohan sa Primary alang sa mga bata nga moserbisyo sama sa gibuhat ni Jesus. Basaha ang mahitungod sa mga bata sa tibuok kalibutan kinsa naghimo gayud niana, uban sa usa ka binulan nga pagdapit ug sugyot aron sa pagtabang sa inyong anak nga moapil!

Makalingaw nga Panahon sa Kasulatan

Sulayi kining sinemana nga mga kalihokan sa home evening uban sa inyong mga anak. Kining tanan motabang sa inyong pagtuon sa Dali, Sunod Kanako, ug mga ideya ilabi na sa gagmayng mga bata gilakip.