Pagtagamtam sa mga Tuig sa Katigulangon

Ni Scott Edgar

Ang pagkatigulang mahimong usa ka maanindot nga panahon sa kauswagan ug paglambo.

Imahe

illustration of hands holding an apple

Mga imahe gikan sa Getty Images

Uban sa “katigulangon” nga moabut, nakaamgo ko nga ang akong kinabuhi nagkausab. Samtang gusto gihapon ko nga dunay kalambigitan sa akong pamilya ug sa Simbahan, dili na ko sama ka aktibo sa panglawas sama sa una, ug ang tanang butang ingon og maayo ra ang dagan maanaa man ko o wala.

Apan aniay laing butang nga akong nakat-unan: kining panahona sa kinabuhi dili ra bati. Sigurado, adunay mga balatian ug mga kasakit ug ubang mga hagit, apan kining pagka-edaran maoy kabahin sa natural nga dagan sa kinabuhi, ug kining panahona nagdala og bag-o ug magantihon nga mga oportunidad. Nahupay ko nga nasayud nga ako gimahal sa pamilya ug mga higala. Misalig ko nga gihatagan gihapon ko og bili sa simbahan. Ug, ang labing mahinungdanon, nasayud ko nga labaw sa tanan nga ang ebanghelyo ni Jesukristo tinuod.

Pagdawat sa Kausaban

Klaro kaayo, nga ang kinabuhi wala nag-urong. Naglihok kini. Busa samtang kita lagmit dili ganahan sa atong mga kahimtang o mga relasyon nga mausab, ang kausaban ma hitabo. Sumala sa larinong pagkasulti sa mga kasulatan:

“Adunay panahon alang sa tanang butang, ug panahon alang sa tagsatagsa ka tuyo ilalum sa langit:

“Panahon sa pagkatawo, ug panahon sa pagkamatay; panahon sa pagtanum, ug panahon sa pag-ibut niadtong natanum na; …

“Gihimo [sa Dios] ang tanang butang nga matahum sa iyang panahon” (Ecclesiastes 3:1–2, 11).

Kita tingali nahimong komportable na sa dagan sa mga panghitabo, ug OK ra nga dunay wala nahimo sa nanglabay nga panahon. Apan kita usab makaangkon og pagtuo nga aduna pa gihapon dugang nga makat-unan samtang kita mopadayon sa paglakaw subay niining dalan sa kalipay. Kon sa unsang paagi kita nagpahiuyon ug nagsagubang sa kausaban motino sa atong paglambo niining ulahing mga katuigan. Pinaagi sa pagdawat sa mga kausaban imbis nga pakigbatukan kini, atong gilingkawas ang atong kaugalingon aron mamatikdan ang bag-ong mga oportunidad ug masabtan ang bag-ong mga butang.

Akong namatikdan nga samtang nagpadayon ko sa pagsunod ni Jesukristo, mas nagkaduol ko Niya sa mga paagi nga wala kaniadto nga mas batan-on pa. Gikan sa Iyang kaugalingong panahon dinhi sa yuta, si Kristo nakasabut kon unsay bation sa nagkaduol sa paghinapos sa mortal nga kinabuhi (tan-awa sa Mateo 16:21). Ug sa usa ka paagi nga dili nato hingpit nga masabtan, Siya hingpit nga nakahibalo unsa ang atong piho nga mga pagbati tungod sa Iyang Pag-ula. Makahangyo kita Kaniya sa pagtabang kanato nga mahimong unsay gusto Niya nga kita mamahimo sa bisan unsang panahon nga nahabilin kanato (tan-awa sa Moroni 7:48).

Pagpadayon sa Pagserbisyo

Bisan unsa pa atong pangidaron, makapangita pa gihapon kita og mga oportunidad sa pagserbisyo sa kada adlaw aron matabangan kita nga maandam alang sa pagserbisyo human niining kinabuhia. Si Presidente George Albert Smith (1870–1951) sa makausa nagtudlo, “Wala kita dinhi aron lang usikan ang atong panahon niining kinabuhia ug dayon moadto sa kahimtang sa kahimayaan; apan ania kita dinhi aron mohimo sa atong kaugalingon nga takus sa matag adlaw alang sa mga katungdanan nga gilauman sa atong Amahan nga atong buhaton human dinhi.”¹

Samtang kita magkatigulang, kining mga kasinatian nga “mopasarang” mahimong lahi gikan sa unsa kini kaniadto. Nagtan-aw ko samtang ang mas batan-on nga mga kalalakin-an mibanos sa paghimo sa ilang mga katungdanan ug nagtuman sa daghang mga tahas nga kanhi nakong gihimo. Ang akong mga anak adunay kaugalingon ilang nagkapuliki nga mga kinabuhi ug mga hagit sa pamilya, ug ako wala na kaayo naapil. Apan misalig ko nga kon ako motuman sa pagtabang sa uban sa bisan unsang mga paagi nga ako makahimo, kini nga mga kasinatian magpadayon sa pagtudlo ug paglimpyo kanako sumala sa plano sa Dios.

Mga Panalangin ug mga Pangutana

Unsa nga mga panalangin ang inyong namatikdan kon magkatigulang na? Sa ubos, akong gilista ang pipila nga akong namatikdan. Naglista usab ko og pipila ka mga pangutana alang kanatong mga tigulang nga hunahunaon, bisan og tingali kini magamit ngadto ni bisan kinsa.

Ako mopamatuod nga ang matag usa kanato makapili sa pagtutok sa unsay labing importante samtang kita mosunod ni Jesukristo sa tibuok natong magantihon nga bulawanong katuigan.

Ang pagka-edaran nakapanalangin kanako sa:

Mas dakong kahibalo sa unsay naglibut kanako.
Mas hilum nga panahon sa pagbasa sa mga kasulatan, sa pagpamalandong, ug sa pag-ampo.
Pagkasensitibo ngadto sa mga pag-aghat sa Espiritu.
Panagsa nga mga pagbisita sa pamilya nga maoy nindot kaayo.
Mas mabination nga mga pagbati ngadto sa ubang mga tawo ug sa mga hayop.
Kaikag diha sa family history ug buhat sa templo.
Mas minus nga tintasyon sa pagsupak sa mga sugo.

Pangutan-a ang imong kaugalingon, “Unsaon nako sa…”

Pagserbisyo sa akong simbahan ug sa pamilya sa makahuluganong paagi?
Pagpaduol sa Langitnong Amahan ug kang Jesukristo?
Pag-impluwensya sa uban alang sa kaayohan?
Pagbarug nga walay lama sa atubangan sa Dios kon ako makakita na Kaniya pag-usab?