Mga Young Adult
Nagpaabut Tubag nga walay Pagduha-duha
Ang pag-ani sa mga panalangin sa Ginoo nagkinahanglan og pailub, apan sama sa nahibaloan natong tanan, ang pagpaabut dili gayud lalim.
Sa dihang batan-on pa ko, dili ko ganahan magpaabut sa buntag. Maghinam-hinam kaayo ko ug dili kapaabut kabahin sa unsay anaa sa sunod adlaw nga sa gabii mag-alindasay ko diha sa higdaanan, mag-mata-mata ug perming mobangon og moadto sa bintana, manghupaw sa matag higayon nga makita nako nga ngitngit pa gihapon sa gawas. Para nako, ang kabuntagon dugay kaayong moabut.
Usahay sa tungang gabii, mangutana ko sa akong mga ginikanan kon unsa nang orasa. Ila kong pasaligan nga ang kabuntagon moabut ra. Sa kanunay mas maayo na akong tulog human niana.
Ang magpaabut sa gisaad nga mga panalangin usahay ingon niana ang pamation. Mohalad kita og sinsero nga pag-ampo, magbasa sa kasulatan, ug mobati niadtong mainit nga pagbati sa kasiguroan. Apan kon ang atong mga kahimtang dili mausab diha-diha dayon—kon ang mga tubag o mga panalangin dili dayon moabut—magsugod na kita sa pagduha-duha nga kini dili na gayud.
Pagduha-duha Nga ang mga Tubag Moabut
Gikan sa kasinatian, nakat-on ko nga ang pagduhaduha kanunayng maggikan sa pagtutok sa mga kahimtang imbis diha sa Manluluwas ug sa Iyang gugma alang kanato.
Kon mas gitutukan nato ang atong kahimtang ug ang atong kawalay paglaum kabahin sa unsay wala pay misalir alang kanato, mas mominus ang atong pagkaamgo nga ang Manluluwas nagmahal kanato ug nag-uban kanato samtang kita mohimo sa matag lakang nga mopadayon. Si Satanas nasayud niini, nga maoy hinungdan kon nganong mitisok siya og gamayng pagduhaduha diha sa atong mga hunahuna aron kita mokwestyon sa gugma sa Manluluwas alang kanato, sa atong mahangturon nga bili, ug kon unsa kita ka importante ngadto sa Langitnong Amahan.
Nagpaabut nga walay Pagduhaduha
Ang pagpaabut maoy kabahin sa atong kinabuhi. Ug ang magpaabut sa mga tubag ug mga panalangin ug mga saad sa Ginoo usahay makapabati nga dili maagwanta. Apan adunay pipila ka mga butang nga atong mahimo aron makapaabut sa mga panalangin nga dili na magpadala sa mga pagduhaduha:
Una, kita makahandom niadtong mga higayon sa dihang kita midawat og mga tubag o mga impresyon. Hinumdumi kadtong mga pagbati sa kainit ug kalipay nga mihunghong og kalinaw sa inyong kasingkasing ug hunahuna. Kadtong mga pagbati ug mga tubag nga naggikan sa Dios. Ang paglabay sa panahon dili mausab niadtong mga kamatuoran ug mga saad. Kita makasunod sa apostolikanhong tambag sa “paghangop sa sagrado ninyong mga panumduman. Tuohi kini. Isulat kini. … Saligi nga miabut kini kaninyo gikan sa inyong Langitnong Amahan ug sa Iyang Hinigugma nga Anak. Tuguti nga magdala kini og pailub sa inyong mga pagduhaduha ug panabut sa inyong mga kalisdanan.1 Pinaagi sa pagtutok diha sa Espiritu ug niadtong mga butang nga atong nahibaloan nga tinuod, ang atong mga pagduhaduha mahanaw ra sa atong panan-aw. Ug kita makaangkon sa pagsalig nga atong gikinahanglan sa pagpadayon sa unahan inubanan sa paglaum.
Ikaduha, kinahanglan natong hinumduman nga aron makadawat og personal nga pagpadayag, kinahanglan kitang andam nga mopadayon gamit ang mata sa hugot nga pagtuo bisan og dili pa hingpit sa kahibalo. Sama sa akong kanunayng pagpaabut sa kabuntagon nga moabut, makaamgo kita nga bisan sa atong pagpaabut sa gisaad nga mga panalangin, adunay pagpangandam nga buhaton, ginagmay nga mga lakang nga pagahimoon, ug ang kahibalo sa pag-angkon sa kasamtangan. Samtang nagpaabut kita, makapadayon kita sa pagkat-on ug pagpaningkamot nga mahimong takus sa mga panalangin nga giandam alang kanato.
Sa katapusan, makahupot kita og mahangturong panglantaw, maghunahuna nga “ang ubang panalangin moabut diha dayon, ang uban dugay, ug ang uban dili moabut hangtud didto sa langit; apan alang niadtong kinsa mohangup sa ebanghelyo ni Jesukristo, kini moabut,” sama sa gitudlo ni Elder Jeffrey R. Holland sa Korum sa Napulog Duha ka mga Apostoles.2 “Ang Dios naglaum nga kamo adunay igong pagtuo ug determinasyon ug igong pagsalig diha Kaniya sa pagpadayon, pagpabilin nga magpakabuhi, pagpabilin nga magmaya.”3 Ang mga panalangin sa Ginoo kanunayng moabut, sama sa pagsubang sa adlaw matag buntag. Magpukos sa kahangturan imbis ugma.
Pagkat-on gikan sa Pagpaabut
Sa panahon sa pagduhaduha kon mobati kita nga mura og anaa kita sa mangitngit nga kwarto nga walay kahayag sa langit, atong hinumduman nga ang mga bukton sa Manluluwas kanunayng gituyhad ngari kanato, matinguhaong nagpaabut kanato nga modangop ngadto Kaniya. Siya mopasalig kanato sa Iyang gugma alang kanato, sama sa gibuhat sa akong mga ginikanan sa higayon nga nabalaka ko nga ang kabuntagon dili na gayud moabut.
Samtang atong himoon nga ang Manluluwas ang atong nag-unang tutukan, ang pagpaabut alang sa gisaad nga mga panalangin ug mga tubag dili kaayo makapalisud. Ang pagpaabut mahimong usa ka mapuslanong higayon sa pagkat-on ug pagpangandam. Makakat-on kita unsaon sa pag-focus sa kabubut-on sa Langitnong Amahan ug dili ang atong kaugalingon. Atong mahibaloan uban sa kasiguroan nga Siya nagmahal kanato ug motuman sa gisaad alang kanato sa tanang higayon. Ug kana nga kasiguroan molupig sa tanang pagduhaduha ug kangitngit. Ang kabuntagon kanunayng moabut, ug ingon man ang Iyang mga saad.