Ang Gahum sa Personal nga Pagpadayag
Unsaon sa pagdawat og pagpadayag nga makapatunhay sa kinabuhi nga gipahaum alang kaninyo.
Paghulagway pinaagi ni Allen Garns
“Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—o, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balikbalikon kini nga proseso matag adlaw, matag bulan, matag tuig, kamo ‘molambo ngadto sa baruganan sa pagpadayag.’
“Ang Dios buot ba gayud makigsulti kaninyo? Oo!”
Presidente Russell M. Nelson, Presidente sa Ang Simbahan ni Jesukirsto sa mga Santos sa Ulahing mga Adlaw, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95.
“Makadawat ikaw og personal nga inspirasyon ug pagpadayag, nga uyon sa Iyang mga sugo, nga gipahaom alang kanimo. May lahi ka nga mga misyon ug tahas nga buhaton sa kinabuhi ug mahatagan og lahi nga giya sa pagtuman niini.
“Si Nephi, igsoon ni Jared, ug gani si Moises tanan dunay dagkong lawod nga labangon—ug matag usa mihimo niini sa managlahing paagi. Si Nephi milalik og “mga kahoy sa talagsaon nga pagkahimo.’ Ang igsoon ni Jared mihimo og mga kasko nga “hugot sama ngadto sa usa ka tadyaw,” Ug si Moises “nanagpanlakaw sa ibabaw sa mamala nga yuta sa taliwala sa dagat.”
“Matag usa kanila nakadawat og personal nga direksyon, gipahaom sa ilaha, ug ang matag usa misalig ug milihok.”
Michelle Craig, Unang Magtatambag sa Young Women General Presidency, “Espirituhanong Kapasidad,” Liahona, Nob. 2019, 21.
“Karon nasayud na ko nga ang tinuod nga magbusog sobra pa sa pagtagamtam og lamiang pagkaon. Kasinatian kini sa kalipay, pagpabaskog, selebrasyon, pagpakigbahin, pagpahayag og gugma ngadto sa mga pamilya ug mga hinigugma, pagpadangat sa atong pasalamat ngadto sa Dios, ug pagtukod og mga relasyon samtang makatagamtam og abunda, espesyal nga lamiang mga pagkaon. Nagtuo ko nga kon kita magbusog sa mga pulong ni Kristo, kinahanglan kitang maghunahuna sa samang matang sa kasinatian. …
“… Ang magbusog sa mga pulong ni Kristo makadalit og makapatunhay sa kinabuhi nga pagpadayag, mopamatuod sa atong tinuod nga pagkatawo ug bili sa atubangan sa Dios isip Iyang anak, ug modala sa atong mga higala ngadto kang Kristo ug sa kinabuhing walay katapusan.”
Elder Takashi Wada sa Seventy, “Magbusog sa mga Pulong ni Kristo,” Liahona, Mayo 2019, 38–39, 40.
“Ang sakramento mao usab ang panahon nga ang Langitnong Amahan motudlo kanato kabahin sa Pag-ula sa Iyang Pinalanggang Anak—ang atong Manluluwas, si Jesukristo—ug aron kita makadawat og pagpadayag mahitungod niini. Kini ang panahon sa ‘pagtuktok, ug kamo pagaablihan,’ sa paghangyo ug sa pagdawat niini nga kahibalo. Kini ang panahon aron kita matinahurong mohangyo sa Dios alang niini nga kahibalo. Ug kon atong buhaton, wala koy pagduha-duha nga atong madawat kini nga kahibalo, nga mopanalangin og maayo sa atong kinabuhi.”
Elder Claudio R. M. Costa sa Seventy, “Nga Sila sa Kanunay Mohinumdom Kaniya,” Liahona, Nob. 2015, 103.
“Magmasulundon, hinumdumi ang mga nangaging panahon dihang mibati kamo sa Espiritu, ug mangayo pinaagi sa pagtuo. Ang tubag para kaninyo moabut, ug kamo mobati sa gugma ug kalinaw sa Manluluwas. Mahimong dili dayon kini moabut o sa pamaagi nga gitinguha ninyo, apan ang tubag moabut. Ayaw og hunong! Ayaw gayud og hunong!”
Elder James B. Martino sa Seventy, “Dangup ngadto Kaniya ug ang mga Tubag Moabut,” Liahona, Nob. 2015, 59.
“Ang Ginoo balikbalik nga nagsulti kanato sa ‘pagpangita og kasayuran gani pinaagi sa pagtuon ug usab pinaagi sa hugot nga pagtuo.’ Makadawat kita og kahayag ug salabutan dili lang pinaagi sa makatarunganon nga panabut apan usab pinaagi sa giya ug inspirasyon sa Espiritu Santo. …
“Sa panahon unya nga kining duha ka mga panglantaw mahiusa diha sa atong mga kalag, usa ka kompleto nga hulagway magpakita sa katinuod sa mga butang kon unsa gayud sila.”
Elder Mathias Held sa Seventy, “Pagpangita og Kahibalo pinaagi sa Espiritu,” Liahona, Mayo 2019, 31, 33.