Deneto Forde

Saint Catherine, Jamaica

Wala kaayo ko nakaeskwela, mao nga dili ko makamao mobasa o mosulat usab. Ang ako lang mahimo mao ang pagsulat sa akong ngalan. Usa ka higala nga lalaki nga akong katrabaho mihatag nako og numero sa telepono ug miingon nga kinahanglan kong manawag. Mitawag ko ug usa kadto ka dalaga nga magtutudlo sa high school. Gidapit ko niya ngadto sa usa ka klase sa pagbasa. Sa kadugayan, gidapit ko niya ngadto sa simbahan ug sa mga kalihokan.

Miadto ko sa simbahan usa ka adlaw niana ug nahimamat ang mga misyonaryo. Miingon sila nga gusto silang motudlo kanako sa ebanghelyo. Usa ka butang nga nakakuha sa akong atensyon mao ang plano sa kaluwasan. Dihay kahaw-ang sa akong kahiladman tungod kay kanunay kong moingon sa akong kaugalingon nga kinahanglan aduna pa gayud untay dugang pa sa kinabuhi kay sa unsay akong nakita.

Aduna koy mga pangutana. “Diin man tanan kini nagsugod?” “Diin man ko gikan?” Ang mga misyonaryo miingon nako, “Ikaw nabuhi na sa wala pa niining kinabuhia. Nagpuyo ka uban sa imong Amahan sa Langit. Mianhi ka dinhi isip usa ka pagsulay aron buhaton kon unsa ang gikinahanglan aron makabalik ka sa pagpuyo uban Kaniya.” Natubag niini ang akong mga pangutana!

Ang mga misyonaryo mitudlo usab nako nga ang ebanghelyo ni Jesukristo gipahiuli. Wala koy nahibaloang bisan unsang butang mahitungod niana. Ang bugtong butang nga akong nahibaloan mao nga si Jesukristo namatay alang kanako. Human sa usa ka bulan, nabunyagan ko sa edad nga 25.

Gusto kong moserbisyo og misyon. Usa ka tuig human sa akong bunyag, miadto ko sa Dominican Republic aron matugahan sa Templo sa Santo Domingo Dominican Republic tungod kay walay templo sa Jamaica. Kon ang templo duol pa lang kanako sa Jamaica, moadto ko kada adlaw kon mahimo nako.

Mitambong ko sa missionary training center sa Dominican Republic ug nakakat-on kon unsay buhaton aron mahimong mas maayo nga misyonaryo. Mibalik ko sa Jamaica ug miserbisyo sulod sa duha ka tuig. Kon makaserbisyo ko pag-usab, akong buhaton tungod kay maanindot kadto. Adunay mga maayo ug dili maayong panahon sa misyon ug adunay daghang angay makat-unan, apan ako nalingaw niini.

Sa dihang miadto ko sa misyon, naglisud ko sa pagbasa sa Basahon ni Mormon o sa Biblia. Panahon sa pagtuon sa managkompanyon, mohangyo ko sa akong kompanyon sa pagtabang kanako sa pagbasa og kasulatan nga wala nako masabti. Motabang siya nako nga makat-on unsa ang gipasabut niini. Sa paglabay sa panahon, nakakat-on ko ug dugang pa. Sa katapusan sa akong misyon, nakabasa na ko sa Basahon in Mormon, sa Bag-ong Tugon, pipila sa Daang Tugon ug sa Isangyaw ang Akong Ebanghelyo. Karon makabasa na ko og bisan unsa nga ihatag ni bisan kinsa. Makatabang ko sa akong kaugalingon ug mopadayon sa pagkat-on og dugang mahitungod sa ebanghelyo. Nasayud ko nga kana ang usa ka panalangin alang kanako sa pagserbisyo og misyon.

Ang ebanghelyo naghatag kanako og rason sa pagpadayon ug pagpangita og mas maayong mga adlaw.

Nindot kaayo ang pagpaambit niini. Usahay makahimamat ko og tawo nga dili maayo ang adlaw o tawo nga nabalaka mahitungod sa kinabuhi. Tingali ilang lola, ilang amahan, o usa ka tawo nga suod nila namatay. Makigsulti ko kanila mahitungod sa Pagpahiuli ug ipaila ang plano sa kaluwasan ngadto kanila. Tungod sa Pagpahiuli nga kita nasayud mahitungod sa plano sa kaluwasan.