Paglakip sa Tanan

Ni Tracy Browning

Sa General Board sa Relief Society

Sa unsang paagi kita makatabang nga ang pagtambong sa mga miting sa Simbahan dili kaayo ikabalaka ug mobati nga nag-inusara alang sa uban?

Imahe

young man

Isip mga disipulo ni Kristo, kadaghanan kanato mipili sa literal gayud nga “pagbarug sa balaan nga mga dapit” kada semana samtang kita nagtambong sa atong mga miting sa Dominggo (Doktrina ug mga Pakigsaad 45:32). Sa pagtambong aron makig-ambit sa Espiritu ug sa pakighalobilo sa usag usa, daghan ang nangita alang sa koneksyon, pagdawat, ug sa pagbati nga nahisakop. Matag usa kanato nagdala sa paglaum nga kita, “dili na mga langyaw ug mga dumuloong, kondili mga katagi-lungsod sa mga balaan ug mga sakop sa panimalay sa Dios” (Mga Taga-Efeso 2:19).

Apan alang sa uban, ang pagtambong sa mga miting sa Simbahan naglakip sa pagbati og kahuyang, kabalaka, o pag-inusara. Ang ilang mga kasinatian, mga reyalidad sa pamilya, o mga kahimtang tingali wala magpakita og gihunahuna nga “mithi.” Kini kasagaran mosangput ngadto sa pagbati nga daw dili sila apil sa grupo, bisan kon kana nga “mithi” wala nagrepresentar sa reyalidad alang ni bisan kinsa kanato.

Ang atong bili ngadto sa Dios dili maapektuhan sa atong mga kahimtang, ug sa kasagaran, kining dili kaayo maayo nga mga kahimtang maoy makaingon sa atong paglambo ug pagkat-on. Apan tungod niini nga mga kahimtang, adunay daghan kinsa mibati nga daw lisud makigbagay sa grupo o hingpit nga masabtan. Unsay atong mabuhat aron sa pagtangtang sa mga babag nga nagpugong sa uban sa pagbati nga nahisakop sila uban kanato, bisan kon tingali kita nakigbisog sa susama nga mga pagbati sa atong kaugalingon?

Imahe

mother and son

Litrato sa inahan ug anak nga lalaki gikan sa Getty Images

Ang Tawag sa Paglakip sa Tanan

Ang pagmugna og pagkahisakop alang sa tanan kabahin sa atong pagtuman sa pakigsaad. Atol sa bunyag, nagsaad kita nga dili kita motugot ni bisan kinsa nga mag-antus nga mag-inusara apan magbangutan kita uban kanila, mohupay kanila, ug makigtambayayong sa ilang mga alantuson (tan-awa sa Mosiah 18:8–10).

Ang pagmugna og pagkahisakop kabahin sa atong Simbahan. Kinahanglan nga ilakip nato ang tanan sa atong pagsimba sama nga ang Manluluwas naghangup sa tanan nga moambit sa Iyang kaluwasan (tan-awa sa 2 Nephi 26:24–28, 33.; 3 Nephi 18:22–23).

Ang pagmugna og pagkahisakop usa ka mahinungdanong bahin sa atong panaw nga mahisama sa Manluluwas. Ang paghigugma sa uban ug ang pag-abli sa atong personal nga mga grupo aron sa paglakip niadtong lahi kanato kabahin sa pagkahimong hingpit (tan-awa sa Mateo 5:43–47).

Sa katapusan, aron mahimong Iyaha, kinahanglan kitang mahiusa sa usag usa (tan-awa sa Doktrina ug mga Pakigsaad 38:27).

Imahe

mother and daughter

Walay Pakigbisog nga Makalimtan

Ang gugma sa Dios alang sa Iyang mga anak dili masalikwayon, apan hinoon para sa tanan. Siya nagdapit sa tanan sa “pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya” (2 Nephi 26:33).

Siya nakaila ug nagpangga:

Sa sister, nga bag-ohay lang nagdiborsyo, kinsa nasakitan atol sa mga panaghisgutan mahitungod sa kaminyoon.
Sa young adult nga nanglimbasug uban sa mga pangutana, nga nangamuyo alang sa mga tubag.
Sa sister nga nag-antus gumikan sa kabalaka, nga mibati og tumang kamingaw ug kahadlok.
Sa batan-ong igsoon nga lalaki nga itumon og pamanit, nga dili komportable samtang ang iyang klase naghisgot sa sayop nga mga panabut mahitungod sa kaliwat ug sa pagkapari.
Sa sister nga wala pa maminyo ug mibati nga kini nagpasabut nga siya walay bili.
Sa inahan sa usa ka bata nga may kakulangan, nga nabalaka nga ang iyang dili makontrolar nga mga lihok makabalda sa uban.
Sa igsoon nga lalaki nga nagsinati og pagkaibug sa sama og sekso, nga naghunahuna sa pagbiya sa Simbahan samtang nanlimbasog siya sa pagsabut sa iyang kaugmaon.
Sa sister nga nabalaka kon sa unsang paagi siya hukman sa uban samtang mapanagan-ong nagsugod siya sa pagbuhat sa mga butang nga mogiya kaniya nga mahimong mas aktibo sa mga kalihokan sa simbahan.

Walay kahimtang, walay sitwasyon, walay indibidwal ang nakalimtan. “Siya naghinumdom … ug ang tanan managsama ngadto sa Dios” (2 Nephi 26:33) tungod kay, sama sa Iyang nag-unang mga disipulo, kitang tanan “mga anak ni Kristo” (Marcos 9:41; tan-awa usab sa Mosiah 5:7).

Busa Unsa ang Atong Mabuhat?

Unsay atong mabuhat aron sa pagmugna og mga koneksyon ug sa paghangup sa mga kahuyang ingon man usab sa pagkakita sa mga kalig-on?

Mahimong magsugod kita pinaagi sa pagpamalandong sa mosunod nga mga pangutana:

Sa unsang paagi nga makahimo ko og mas dakong paningkamot sa pagtabang ug pag-ilaila niadtong wala nako mailhi sa akong ward o branch?
Unsa nga pagdapit ang mahatag nako ngadto sa usa ka tawo nga tingali nagkinahanglan og usa ka higala?
Sa unsang paagi nga mahimo kong ehemplo sa usa ka tawo nga naglakip ug naghigugma sa uban?
Kinsa ang akong sinserong matabangan ug mapangutana kon kumusta siya?
Unsay mosantup sa hunahuna kon mag-ampo ko alang sa inspirasyon aron masayud kon unsaon sa pagtabang sa uban?

Adunay daghan kaayo nga makat-onan gikan sa uban samtang ato silang mailaila.

Sa umaabot nga mga bulan, ipaambit namo ang mga istorya sa mga kaigsoonan kinsa nanlimbasug nga masayud nga sila nahisakop. Nanghinaut kami nga kini nga mga istorya modasig sa matag usa kanato nga mas hingpit nga mosunod sa duha ka dagkong sugo sa Dios: sa paghigugma Kaniya ug sa paghigugma sa tanan Niyang mga anak.