Mga Kababayen-an ug ang Gahum sa Pakigsaad

Ni Presidente Jean B. Bingham

Kinatibuk-ang Presidente sa Relief Society

Mahimo kitang magmaya sa mga pribilehiyo ug gahum nga naa nato pinaagi sa pagkapari.

Si Presidente Russell M. Nelson nagtudlo nga ang kalangitan abli ngadto sa mga babaye kinsa natugahan sa gahum sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.

“Ako nag-ampo nga ang kamatuoran masabtan sa inyong matag kasingkasing tungod kay ako nagtuo nga makausab kini sa inyong kinabuhi. “Gusto ko nga mobilin ninyo og panalangin, nga kamo makasabut sa gahum sa pagkapari nga gituga diha kaninyo ug nga kamo modugang niana nga gahum pinaagi sa pagpakita sa inyong pagtuo sa Ginoo ug sa Iyang gahum.”

Si Presidente Nelson midapit sa kababayen-an sa Simbahan sa “pagtuon sa mainampoong paagi” kabahin sa gahum sa pagkapari ug sa “pagdiskobre sa unsay gitudlo sa Espiritu Santo” kanato. Ganahan ko nga ang atong buhi nga propeta midapit sa matag usa kanato, sa pagkat-on ug sa pagdawat og pagpadayag ug sa mas maayo nga “pagkat-on, pagsabut ug paggamit sa gahum diin [kita] gitugahan.”¹

Daghang higayon sa tibuok nakong kinabuhi, nga akong nasinati ang gisaad nga mga panalangin nga moabut gikan sa pagsunod sa tambag sa mga propeta. Kini nga pagdapit dili lahi. Sa paghunahuna mahitungod sa imbitasyon ni Presidente Nelson, ang akong hunahuna napunting dayon ngadto sa templo—ang dapit diin ako natugahan gamit ang gahum sa pagkapari—ug ang gahum niana nga gasa anaa sa akong tibuok kinabuhi. Milungtad pa og katuigan aron sa maila kon sa unsang paagi kana nga gahum gipakita sa akong kinabuhi.

Ang gahum sa pagkapari, managsama kaayo sa gasa sa Espiritu Santo, nga moabut gikan sa atong mahigugmaong Amahan sa Langit ug sa atong personal nga pagkamatarung. Sa pagtuman sa atong mga pakigsaad sa Ginoo, kita adunay oportunidad sa pagdawat og pagpadayag mahitungod sa atong kinabuhi, sa atong mga pamilya, sa trabaho, eskwelahan—sa tanang butang nga kita magtinguha sa giya. Walay butang nga importante kanato nga dili importante ngadto sa Ginoo. Ug kon kita modapit sa Espiritu nga mag-uban kanato, makaangkon kita og mas dakong panabut sa gahum sa pagkapari pinaagi sa giya sa Espiritu Santo.

Kon magkadako ang akong nakat-unan sa gahum sa pagkapari pinaagi sa pagtuon sa kasulatan ug kasinatian, mas makasabut ko kon sa unsa kini ka may kalabutan sa tanang bahin sa atong mga kinabuhi. Ang gahum sa pagkapari makatabang kanato sa pagdawat og pagpadayag alang sa atong inadlaw nga mga hagit.

Sa akong mga calling, tungod kay nagserbisyo ko gamit ang awtoridad sa pagkapari nga gihatag kanako sa usa kinsa adunay mga yawe, dihay daghang higayon sa dihang aduna koy mga hunahuna o mga pulong ngari kanako nga ang usa ka batan-ong babaye o mga sister sa Relief Society o sa bata sa Primary kinahanglang makadungog. Nasayud ko nga kadtong mga pulong miabut tungod sa awtoridad sa pagkapari nga nahatag kanako sa dihang ako gi-set apart alang niana nga calling.

Sa kaminyoon, ingon man sa bisan unsa nga relasyon, ang mga tawo moagi og mga hugna sa pagkat-on ug paglambo. Akong nakat-unan nga kon akong mahinumduman kon si kinsa ang akong bana, kinsa ako, ug unsay angay namong buhaton isip mga anak sa Dios, kini nakapausab sa akong kasingkasing. Isip nasilyo pinaagi sa awtoridad sa pagkapari nakahatag ug nakadasig kini kanamo nga mas mahiusa. Sa dihang ang Manluluwas miingon, “Kon kamo dili magkahiusa kamo dili akò” (Doktrina ug mga Pakigsaad 38:27), Dili lang Siya basta nagpasabut sa kahimtang sa Simbahan. Nagpasabut usab Siya sa mga relasyon sa atong pamilya.

Ug isip usa ka inahan, nakahinumdom ko nga nabalaka mahitungod sa usa ka young adult nga bata kinsa naghimo og mga butang nga nasayud ko nga dili makapahimo sa bata nga malipayon. Nagkasabut mi nga maghisgut sa problema ug mitakda ang oras aron mag-istorya. Sa wala pa ang gitakda nga oras alang sa among tawag sa telepono, giandam na nako ang akong lektyur; nakahibalo nako unsay eksaktong butang nga akong isulti. Nag-ampo ko nga ang Espiritu maga-uban kanako. Ang migawas sa akong ba-ba gikan sa sinugdanan sa among panag-istoryahanay ug hangtud sa tibuok tawag lahi kaayo kay sa unsay akong giplano nga isulti. Apan mao kadto ang eksaktong gikinahanglan sa bata. Ang gasa sa Espiritu Santo ang nakapahimo niining posible sa kasingkasing nga mahumok ug matumbok ang mas maayo nga solusyon. Mao kadto ang pagpakita kon sa unsang paagi ang gahum sa pagkapari maglihok sa atong kinabuhi.

Kasagaran, ang kababayen-an motandi sa ilang kaugalingon sa uban. Apan walay usa kanato mobati og maayo kon atong itandi ang atong kaugalingon ngadto sa uban. Matag babaye adunay usa ka lahi nga gisagol nga mga abilidad ug mga talento, ug ang tanan hinatag sa Dios nga mga gasa. Tungod kay kamo ug ako kinahanglan dili managsama—o bisan unsang gidaghanon sa mga kababayen-an dili parehas—wala naghimo kanato nga mas minus o mas labaw. Kinahanglan natong makaplagan ang atong mga gasa ug palamboon kini, mohinumdom kon si kinsa ang naghatag niini ngari kanato, ug dayon gamiton kini alang sa Iyang katuyoan. Samtang mopaambit kita sa atong mga gasa sa pagpanalangin sa uban, kita makasinati sa gahum sa pagkapari diha sa atong mga kinabuhi.

Duna koy kahigayunan nga makahimamat ang daghang mga inila nga kababayen-an kinsa nagpakita og hugot nga pagtuo ug gahum pinaagi sa ilang mga buhat. Kababayen-an nga naghatag sa ilang mga talento ug mga abilidad sa dili katuohan ug lainlaing paagi. Sila nakahimo og dako kaayong kalainan sa mga kinabuhi niadtong naglibut kanila—sa ilang mga pamilya, ilang mga dapit sa trabaho, simbahan, eskwelahan, o bisan asa man sila migahin sa ilang panahon.

Ang usa sa mga butang nga akong nakat-unan mahitungod sa pagkapari mao nagbuhat kita sa atong labing maayo kon kita nagsinaligay sa usag usa. Mao kana ang pagkadesinyo sa Ginoo niini; nga mao ang balaan nga sundanan. Dili kinahanglan nga makig-indigay tungod kay ang tanan niadtong managlahi nga mga gasa ug mga talento ug mga abilidad gikinahanglan—gikan sa mga lalaki ug mga babaye. Ang Ginoo nangulo kanato sa inanay nga paagi subay niana nga dalan aron kitang tanan makabaton og mas maayong panabut kon sa unsang paagi nga magtambayayong ug sa unsang paagi mohatag og bili sa kontribusyon sa usag usa. Kini mao gayud ang tinuod nga labing maayo nga paagi sa pagtuman sa Iyang buhat.

Ang kababayen-an wala nagkinahanglan nga magpaabut sa usa ka tawo nga mosulti kanila kon unsay buhaton sa ilang mga gasa, mga talento, ug gahum. Kita adunay abilidad sa pagdawat og pagpadayag alang sa atong mga kaugalingon. Dili kita magpaabut nga pagaaghaton; nagkinahanglan kita og kaisug sa paglihok sa pagpadayag nga atong nadawat Ang pagpangita sa inspirasyon ug pagbuhat sa espirituhanong giya mao ang ibidensya nga maanaa kanato ang gahum sa pagkapari nga gisaad kon kita magbuhat sa atong mga pakigsaad sa Dios.

Sama sa gitudlo ni Presidente Nelson, “Unsa pay posible nga mas makadasig kay sa pagpaningkamot uban sa Espiritu aron makasabut sa gahum sa Dios—gahum sa pagkapari?” Siya misaad nga, “Samtang magtubo ang inyong pagsabut ug samtang magpakita kamo og pagtuo sa Ginoo ug sa iyang gahum sa pagkapari, ang inyong abilidad sa pag-angkon niining espiritwal nga bahandi nga giandam sa Ginoo kaninyo magkadako.”² Ug ako nasayud nga kining mga saad gikan sa atong buhing propeta sigurado.