Kapitulo 17

Pagpadayag pinaagi sa Espiritu Santo

Ang pagpadayag… mao gayud ang pondasyon sa atong relihiyon.¹

Gikan sa Kinabuhi ni John Taylor

Si Presidente John Taylor miingon: “Ako nahinumdom kaayo sa gisulti ni Jospeh Smith ngari kanako. … Siya miingon, ‘Elder Taylor, ikaw nabunyagan, ikaw napandongan sa mga kamot diha sa imong ulo aron pagdawat sa Espirtu Santo, ug ikaw naorden ngadto sa balaang priesthood. Karon, kon ikaw mopadayon sa pagsunod sa mga pag-aghat niana nga espiritu, kini kanunayng modala kanimo sa husto. Usahay kini mahimong supak sa imong paghukom, ibalewala kana, sunda ang mga pagdiktar niini; ug kon ikaw magmatinuoron sa mga paghunghong niini sa hustong panahon mahimo diha kanimo nga usa ka baragunan sa pagpadayag aron ikaw masayud sa tanang mga butang’.”²

Si John Taylor misunod sa tambag ni Joseph Smith ug misalig sa pagpadayag pinaagi sa Espirtu Santo alang sa paggiya sa iyang personal nga kinabuhi ug sa iyang balaang tawag ingon nga propeta, manalagna, ug tigpadayag. Si Presidente Heber J. Grant, ang ikapito nga Presidente sa Simbahan, mikomentaryo sa pag-kasensitibo ni Presidente Taylor ngadto sa mga pag-aghat sa Espirtu: “Ako gitawag ngadto sa Konseho sa Napulog Duha ka mga Apostoles pinaagi sa pagpadayag sa Ginoo ngadto ni Presidente John Taylor. Gikan sa panahon nga ako misulod sa Konseho sa Napulog Duha, duha ka mga tuig gikan nga si Presidente John Taylor nahimong Presidente sa Simbahan, hangtud sa adlaw sa iyang kamatayon, ako nakigkita kaniya, matag semana, …ug ako nasayud nga siya sulugoon sa buhing Dios. Ako nasayud nga ang inspirasyon sa Ginoo miabut diha kaniya; ug ako nasayud nga sa tanang mga okasyon, bisan kanus-a siya moingon: ‘Kini mao ang gitinguha sa Ginoo,’ ug ang iyang mga kauban sa konseho sa mga apostoles mipaluyo sa iyang baruganan, sa matag higayon siya napamatud-an nga husto ug nga ang inspirasyon sa Ginoo ngadto kaniya nagpakita nga ang iyang kaalam pinaagi sa gahum sa Dios labaw kaayo ngadto sa kaalam sa ubang tawo. …

“Ako makasaysay og mga kahimtang diin ang mga apostoles gipadala aron pagpatuman og piho nga mga buluhaton ubos sa inspirasyon sa Ginoo ngadto ni John Taylor, samtang sila naghunahuna nga sila dili makahimo sa mga buluhaton. Sila mipauli ug nakahatag og pagpamatuod nga pinaagi ug uban sa tabang sa Ginoo sila nakahimo sa paghimo sa buluhaton nga gihatag kanila ni Presidente Taylor, ang propeta sa Ginoo.”³

Mga Pagtulun-an ni John Taylor

Adunay kalainan tali sa Espiritu nga mogiya sa mga tawo sa paghimo og matarung ug sa gasa sa Espiritu Santo.

Kalabut sa pagdumala sa Espiritu diha sa tawo, tuguti nga ako modala sa inyong atensyon ngadto sa usa ka kamatuoran nga sa kadaghanan nasabtan sa tanang may panghunahuna nga mga tawo, ug nga kana mao, bisan unsa tingali ka dautan sa usa ka tawo, unsa ka dugay siya mahimong nagpalayo gikan sa hustong dalan, ang maong tawo sa kasagaran modayeg ug morespeto sa usa ka maayong tawo, sa usa ka dungganon nga tawo; ug sa usa ka mahiyason nga tawo, ug ang maong tawo sa kanunay moingon; “Ako nangandoy nga ako makahimo sama sa gihimo nianang tawhana, apan ako dili makahimo: Ako nangandoy nga ako makasubay og husto nga dalan, apan ako nabuntog sa dautan.” Sila dili makalikay nga morespeto sa buotan ug dungganon, bisan sila wala madumala sa mga baruganan sa dungog ug hiyas diha sa ilang mga kaugalingon. Kining sama nga espiritu diin gihatag sa matag tawo nga wala sa ebanghelyo gipakita sa lainlaing mga panahon sa kalibutan. …

Apan adunay dako kaayo nga kalainan tali niini nga espiritu ug sa pagbati nga mogiya sa mga tawo sa pagbuhat og matarung, nga hugot nga gituohan nga kabahin sa Espiritu sa Dios, nga gihatag sa matag tawo alang sa ilang kaayohan, ug gitawag diha sa mga kasulatan nga gasa sa Espiritu Santo.⁴

Anaa ug kanunay nga anaa sa kalibutan ang usa ka espirtu nga tinuoray nga kabahin sa Espiritu sa Dios, nga nagtudlo sa katawhan, sa daghang mga higayon, aron pag-ila tali sa maayo ug dautan, ug tali sa matarung ug sayop. Sila adunay konsyensya nga moakusar o mouyon sa ilang mga lihok; ug bisan nga ang kalibutan sa katawhan hilabihan ka dautan ug hilabihan ka dunot, sa gihapon nasayran nga hapit tanan sa katawhan, bisan sila malagmit dili maayo sa ilang mga kaugalingon, modayeg sa maayong mga lihok sa uban.

Ang mga kasulatan nag-ingon nga ang Dios “mao ang nagbuhat sa tanang mga nasud sa katawhan gikan sa usa ka tawo, aron papuy- on sa tanang dapit sa yuta, tapus niya maandam ang mga gitagal nga kapanahonan ug ang mga utlanan sa mga dapit nga ilang pagapuy-an; aron sila mangita sa Dios, bisan sa pag-ila siyang mahikapan ug makaplagan, bisan tuod nga siya dili ra halayo gikan sa matag-usa kanato.” ( Mga Buhat 17:26–27.) Ang kasulatan midugang sa pag-ingon, siya mihatag ngadto kanila og kabahin sa iyang espiritu alang sa ilang kaayohan [tan-awa sa 1 Mga Taga-Corinto 12:7]. Apan ingon og adunay dako-dako nga kalainan sa posisyon nga gibarugan niining mga tawhana ug sa atong gibarugan. Kita adunay gibatunan nga mas labaw pa kay sa nianang kabahin sa Espiritu sa Dios nga gihatag ngadto sa matag tawo, ug kini gitawag nga gasa sa Espiritu Santo, nga madawat pinaagi sa pagkamasulundon ngadto sa unang mga baruganan sa ebanghelyo ni Kristo, pinaagi sa pagpandong sa mga kamot sa mga sulugoon sa Dios.⁵

Pinaagi sa gasa sa Espiritu Santo, kita mahimong masayud sa mga butang sa Dios.

Sa dihang ang Ebanghelyo gisangyaw diha sa mga katawhan sa unang mga panahon tali sa mga tawo sila gisultihan sa paghinulsol sa ilang mga sala; nga magpabunyag pinaagi sa ngalan ni Jesus alang sa kapasayloan sa ilang mga sala, ug dayon aron adunay mga kamot nga ipandong diha kanila aron sa pagdawat sa Espiritu Santo [tan-awa sa Mga Buhat 2:37–38]. Gawas pa sila gisultihan, og labaw pa, unsa ang mabuhat niining Espiritu Santo; nga kini modala sa butang sa Dios ug mopakita ngadto kanila; nga kini mopadamgo sa ilang mga tigulang nga mga lalaki ug sa ilang mga batan-on nga makakita og mga panan-awon; ug nga kini mopuyo diha sa mga sulugoong lalaki ug mga babaye sa Dios ug sila managna [tan-awa sa Mga Buhat 2:16–18; tan-awa usab sa Joel 2:28–29].

Kini mao ang mga pamaagi niana nga Espiritu nga nagpuyo uban sa Dios, nga Amahan, ug sa Dios, nga Anak, nga gitawag og Espiritu Santo. Kini mao ang Espiritu nga modala kanato ngadto sa pakigrelasyon sa Dios, ug kini lahi nga butang kay sa tipik sa espiritu nga gihatag ngadto sa tanang mga tawo alang sa ilang kaayohan… .

Ang iyang katuyoan mao ang pagdala kanato ngadto sa tanang kamatuoran, ug pagdala sa atong mga panumduman sa mga butang nga milabay, karon ug sa umaabut. Kini mamalandong sa umaabut ug mopadayag sa mga butang nga wala pa nato hunahunaa sa una, ug kini nga mga butang sa hilabihan ka piho gihulagway diha sa Biblia, diha sa Basahon ni Mormon, ug diha sa Basahon sa Doktrina ug mga Pakigsaad. Dinhi nagpabilin ang kalainan tali kanato ug sa uban, ug kini mao gihapon sa bisan unsang mga panahon.⁶

Kami nagtuo nga gikinahanglan alang sa tawo nga adunay komunikasyon sa Dios, nga siya kinahanglan adunay pagpadayag gikan kaniya, ug nga gawas kon siya mahimutang ubos sa impluwensya sa inspirasyon sa Espiritu Santo, siya walay mahibaloan kalabut sa mga butang sa Dios. Ako dili magsapayan unsa ka maalamon ang usa ka tawo, o unsa ka layo ang iyang naadtoan. Ako dili magsapayan unsa ang iyang talento, kahibalo, o ka-genius, unsa nga kolehiyo siya nagtuon, kon unsa ka malukpanon ang iyang mga panglantaw o unsa ang iyang hukom ngadto sa ubang mga matang, siya dili makasabut sa pihong mga butang kon wala ang Espiritu sa Dios, ug kana sa mahinungdanong paagi ang pagpaila sa baruganan nga akong gipasabut sa unahan—ang panginahanglan sa pagpadayag. Dili ang pagpadayag sa unang mga panahon, apan karon ug ang dihadiha dayon nga pagpadayag, nga modala ug mogiya niadtong kinsa nag-angkon niini sa tanang mga dalan sa kinabuhi dinhi, ug sa kinabuhing dayon human dinhi.⁷

Mapadayonon nga pagpadayag mao ang pondasyon sa atong relihiyon.

Kita wala makadawat sa atong mga ideya gikan sa bisan kinsa nga teyologo gikan sa batid sa syensya, gikan sa bisan kinsang tawo nga inila sa kalibutan, o gikan sa bisan kinsa nga pundok o sekretong tigum sa relihiyonista, apan gikan sa Makagagahum ug ngadto Kaniya kita nakautang sa tanang kinabuhi, tanang kamatuoran, ug tanang kahibalo kalabut sa nahitabo na, kalabut sa karon, o kalabut sa nangagi. Mao nga kita mobati sa atong pagsalig diha Kaniya…

Walay tawo nga nahibalo sa mga butang nga iya sa Dios gawas kon pinaagi sa Espiritu sa Dios [tan-awa sa 1 Mga Taga-Corinto 2:11]; ug kon ang Amahan wala pa mopadayag niini kita sa tinuoray ignorante gayud .…Kay gipadayag man ang Iyang kabubuton sa tawo, ngadto ni Joseph Smith, sama sa Iyang gibuhat sa laing mga tawo sa unang mga panahon, gikinahanglan nga kana nga kabubut-on mahibaloan ngadto sa tanang mga kanasuran, mga kaliwatan, mga pinulongan ug mga katawhan, nga ang mga tawo mahimong mapahibalo sa mga butang nga Iyang gipadayag alang sa kaluwasan ug kahimayaan sa katawhan. Busa ang Napulog Duha gigahin. Alang sa unsang katuyoan? Nga sila unta mopahibalo sa Ebanghelyo ngadto sa mga nasud sa yuta ug mosangyaw sa mga baruganan sa kinabuhi nga naggikan sa Dios…

Ang ilang pagpamatuod ngadto sa mga tawo mao nga ang Dios makigsulti, nga ang Ebanghelyo gipahiuli; sila nagpasabut unsa ang Ebanghelyo; sila miawhag sa mga tawo sa paghinulsol ug sa pagpabunyag pinaagi sa ngalan ni Jesus alang sa kapasayloan sa mga sala, nagsaad nga ang masulundon makadawat sa Espiritu Santo… Ug kay mga umaambit man niana nga espiritu, adunay komunikasyon nga bukas tali kanila ug sa ilang Langitnong Amahan pinaagi sa atong Ginoong Jesukristo, ug kay nadasig man niana nga espiritu, ang ilang mga pag-ampo mokayab ngadto sa Dios sa tibuok yuta, sila makat-on sa pagbutang sa ilang pagsalig diha Kaniya ug sa pagsunod sa Iyang mga balaod.⁸

Ang Biblia maayo. … Ang Basahon ni Mormon maayo, ug ang Doktrina ug mga Pakigsaad, isip husto nga dalan. Apan ang marinero nga nagapanaw didto sa kadagatan nagkinahanglan og dugang nga pihong mga kahibalo ug pagsabut. Siya kinahanglan nga makasinati sa langitnong mga butang, ug mohimo sa iyang mga pagpaniid gikan kanila, aron sa pagmaneho sa iyang lantsa [o barko] sa husto. Kadto nga mga basahon mga maayo alang sa ehemplo, mapanag-ingnan, ug pakisusi, ug aron pagpalambo sa pihong mga balaod ug mga baruganan. Apan kini dili makahimo, kini dili gayud, makagunit sa matag hitabo nga gikinahanglan nga mahimong mahukman ug mahan-ay.

Kita nagkinahanglan og buhing kahoy—usa ka buhing tuburan— buhing kahibalo, nga nagagikan sa buhing priesthood sa langit, pinaagi sa buhing priesthood sa yuta. … Ug gikan sa panahon nga si Adan nakadawat og komunikasyon gikan sa Dios, ngadto sa panahon nga si Juan, diha sa Isla sa Patmos, nakadawat sa iyang komunikasyon, o si Jospeh Smith nga ang mga langit naabli alang kaniya, kini sa kanunay nagkinahanglan og bag-o nga mga pagpadayag, gisagop sa mga talagsaon nga mga kahimtang diin ang mga simbahan o mga tawo nahimutang.

Ang pagpadayag ni Adan wala magtudlo ni Noe sa paghimo og arka; ni ang kang Noe nga pagpadayag misulti ni Lot sa pagbiya sa Sodom; ni walay usa kanila ang naghisgot sa pagbiya sa mga anak sa Isarel gikan sa Ehipto. Kining tanan adunay mga pagpadayag alang sa ilang mga kaugalingon, ug ingon man ni Isaias, Jeremias, Ezekiel, Jesus, Pedro, Pablo, Juan, ug Joseph. Ug kita kinahanglan mao usab, o kita mahisalaag.⁹

Daghang maayong mga tawo, ug kadtong miangkon nga mga Kristyano, magbugalbugal pag-ayo sa ideya sa pagpadayag karon. Kinsa kaha ang nakadungog og tinuod nga relihiyon nga walay komunikasyon sa Dios? Alang kanako kana nga ideya maoy labing bakak nga mahanduraw sa tawhanong hunahuna. Ako dili matingala, kon ang mga tawo sa kasagaran mosalikway sa baruganan sa pagpadayag karon, kana nga pagduhaduha ug pagkawalay pagtuo mipatigbabaw sa hilabihan ka makapalisang nga pagkatap. Ako wala matingala nga daghang mga tawo nga mitagad sa relihiyon uban sa pagtamay, ug mitagad niini ingon sa usa ka butang nga dili takus sa atensyon sa maalamon nga mga linalang, kay kon walay pagpadayag ang relihiyon usa ka pagbugalbugal ug pagtiawtiaw. Kon ako dili makaangkon og relihiyon nga modala kanako ngadto sa Dios, ug mobutang kanako nga adunay maayong panag-uyon uban kaniya, ug moabli sa akong hunahuna sa mga baruganan sa imortalidad ug kinabuhing dayon, ako dili buot nga manghilabot niini.

Ang baruganan sa pagpadayag karon, mao ang gayud ang pondasyon sa atong relihiyon. … Ako dili lamang mosiksik sa mga kasulatan nga ania kanato karon, apan ako mosiksik usab sa matag pagpadayag nga gihatag sa Dios, nga ihatag, o ihatag pa alang sa paggiya ug direksyon sa iyang mga tawo, ug unya ako motahud sa Maghahatag, ug kadtong kinsa usab iyang gigamit isip iyang pinasidunggan nga mga instrumento sa pagsangyaw ug pagpahayag sa mga baruganan; ug ako mosiksik nga pagadumalahon sa mga baruganan nga nahilakip nianang sagradong pulong.¹⁰

Matag usa kanato nanginahanglan og pagpadayag aron makasabut ug makatuman sa atong mga responsibilidad.

Walay katungdanan nga atong mahuptan sa kinabuhi, bisan isip mga amahan, mga inahan, mga anak, mga agalon, mga sulugoon, o isip mga elder sa Israel nga naghupot sa balaang priesthood uban sa iyang tanang mga pagsangasanga, apan unsa ang atong gikinahanglan kanunay mao ang kaalam nga naggikan sa Ginoo ug kahibalo nga pahayag gikan kaniya, nga kita masayud unsaon pagpahigayon sa hustong paagi ang nagkalainlaing mga katungdanan ug mga kaakohan sa kinabuhi, ug sa pagtuman sa nagkalainlaing mga kaakohan nga anaa kanato. Ug mao ang panginahanglan sa tibuok adlaw, ug matag adlaw ug matag semana, bulan, ug tuig, ug ubos sa tanang mga kahimtang, sa mga tawo nga nagsalig sa Ginoo ug nga magiyahan niana nga Espiritu nga nagdagayday gikan kaniya, nga kita unta dili masayop—nga kita unta dili mohimo og bisan unsa nga sayop, mosulti og bisan unsa nga sayop, ni mohunahuna og bisan unsa nga sayop, ug sa tanang panahon makapabilin niana nga Espiritu, diin mahimo lamang nga matipigan pinaagi sa pagkaputli, pagkabalaan, ug pagkamahiyason, ug magpuyo nga makanunayon nga masulundon sa mga balaod ug mga sugo sa Dios.¹¹

Karon pangutan-a ang inyong mga kaugalingon, kon kamo nagpuyo ba nga takus sa inyong mga kahigayunan, ug ang Espiritu sa Dios nakatandog ba sa inyong mga hunahuna, ug ang inyong mga kalag nalamdagan uban sa lamparahan ni Jehovah, uban sa kaalam sa langit, ug kamo ba naglakaw sumala sa kahayag sa mahangturong kamatuoran, kon niini nga mga higayon wala ninyo batia nga kanunay nga andam sa pagtuman sa bisan unsang mga katungdanan nga gikinahanglan gikan kaninyo, ug kon wala ba ninyo buhata sa kanunay ang inyong mga katungdanan uban sa kahimuot ug katagbawan sa inyong mga kaugalingon. Apan kon ang atong mga hunahuna nadala sa mga butang niining kalibutan, kon kita nawad-an og panglantaw sa gingharian sa Dios ug sa iyang tinguha niini, sa himaya niini, sa kalipay ug kaayohan sa tawhanong pamilya, ug sa mga panghitabo nga atong gipaabot nga mahitabo dinhi sa yuta, ug sa atong bahin nga himoon niining panahona, kon kita mawad-an og panglantaw sa atong lainlaing mga katungdanan isip mga amahan, mga inahan, mga bana, mga asawa, mga anak…, ug madala sa atong kaugalingong mga hunahuna, mga ideya ug kahakog, ug kita mahiapil sa dinautan, mao nga kini lisud alang kanato ang pagsabut sa mga butang sa Dios.¹²

Ang Ginoo mihatag kanato og mga pagpadayag kalabut sa atong temporal ug espirituhanong mga buluhaton. Siya nagsugod sa pagpatindog sa Zion, ug sa pagtukod sa iyang gingharian, ug siya mopadayon sa iyang mga katuyoan, ug motuman sa mga pulong sa mga propeta, ug ang iyang buhat magpadayon hangtud ang mga plano sa Dios matuman.¹³

Mga Sugyot alang sa Pagtuon ug Panaghisgutan

Unsa ang kalainan tali sa Espiritu sa Dios nga mogiya kanato sa pagbuhat og matarung ug sa gasa sa Espiritu Santo? (Tanawa usab sa D&P 93:2; Juan 14:26.)
Unsa ang inyong mga kasinatian diin ang pagpadayag sa Espiritu nakatabang kaninyo sa pagsabut sa mga butang sa Dios? Unsaon nato pag-ila ang personal nga pagpadayag gikan sa Ginoo?
Sa unsang paagi nga ang pagtinguha sa kalibutanong mga butang makapakgang sa pagdawat og pagpadayag? Unsa ang atong buhaton aron makaandam sa atong mga kaugalingon sa pagdawat og pagpadayag?
Sa unsang paagi nga ang pagpadayag nga gihatag kanato pinaagi sa atong buhing propeta labaw nga makatabang gani kaysa mga kasulatan? Ngano nga mahinungdanon nga kita aduna sa mga kasulatan ug mapadayonon nga pagpadayag?
Unsa ang mga ehemplo nga inyong mahunahuna sa dihang ang Espiritu Santo mitabang kaninyo sa inyong pamilya, diha sa trabaho o sa tulunghaan, o diha sa Simbahan?
Ngano nga kita usahay mapakyas sa paggamit sa hingpit sa Espiritu Santo? Sa unsang paagi nga kita hingpit nga mahatagan og kaayohan gikan niini nga gasa?
Ngano nga ang gasa sa Espiritu Santo usa ka maanindot nga panalangin ngari kanato sa kalibutan karon? Unsa ang inyong buhaton aron makapakita og pagpasalamat alang niini nga gasa? Sa unsang paagi nga kita makatudlo sa mga anak ug kabatan- onan kalabut sa gasa sa Espiritu Santo?

May kalabutan nga mga Kasulatan: 1 Mga Taga-Corinto 12:3; Jacob 4:8; Alma 5:46–48; D&P 45:56–57, 76:5–10; Mga Artikulo sa Hugot nga Pagtuo 1:9