Kapitulo 13

Priesthood, ang Pangagamhanan sa Dios

Ang priesthood… mao ang buhing gahum.¹

Gikan sa Kinabuhi ni John Taylor

Ngadto ni John Taylor, ang priesthood, agi og dugang ngadto sa awtoridad sa paglihok sa ngalan sa Dios, usa usab ka gamhanang kusog diin ang dagkong mga butang mahimo. Siya mitudlo nga ang mga naghupot sa priesthood kinahanglan nga aktibo sa paggamit sa priesthood sa pag-alagad sa uban ug pagpahinabo sa matarung nga mga katuyoan sa Dios. Siya miawhag sa tanang naghupot sa priesthood sa pag-atiman sa ilang mga katungdanan ug sa pagpalambo sa ilang balaang mga tawag, diha sa pag-ingon nga “ang teacher o deacon kinsa mituman sa iyang mga katungdanan labaw pa nga madungganon kay sa usa ka presidente o ni bisan kinsa sa napulog duha nga wala.”²

Si Presidente Taylor usab miila ug mipasalamat sa awtoridad niadtong kinsa migamit sa ilang priesthood aron pag-alagad kaniya ug sa iyang pamilya. Ang iyang mapaubsanong pagrespeto sa awtoridad sa priesthood gihulagway pinaagi sa usa ka istorya nga giasoy kaniadto sa iyang anak nga lalaki nga si Moses W. Taylor kabahin sa usa ka gabii didto sa panimalay sa mga Taylor sa dihang ang pamilya gibisitaan sa mga home teacher. “Ang usa nila, usa ka batang lalaki nga nag-edad og desisais,” ang manghud nga Taylor mihinumdom, “ug nianang gabhiona iya kadtong turno sa pagdumala. Si Papa mitawag sa pamilya sa pagpundok ug mipahibalo sa mga home teacher nga kaming tanan anaa ug miingon: ‘Kami anaa sa inyong mga kamot ug naghulat sa inyong mga panudlo.’”

Ang batang lalaki dayon nangutana ni Presidente Taylor kon sila nag-ampo ba isip usa ka pamilya ug diha sa pribado, kon sila mitagad ba sa ilang mga silingan sa minaayo, nagtambong ba sa simbahan kanunay, ug nag-abag ba sa mga awtoridad sa Simbahan. “Kini nga mga pangutana gitubag og tagsatagsa sa akong amahan ingon ka mapaubsanon kon ang kinamanghuran sa pamilya motubag kanila. Human ang mga home teacher mitapos sa ilang buluhaton, sila dayon mihangyo sa akong amahan sa paghatag kanila og mga panudlo.

“Siya miingon kanila nga siya nahimuot kanila sa ilang kamatinud- anon ug mipasalamat kanila sa pagbisita ug miawhag kanila nga ilang kanunayon ang pagbisita sa pamilya tungod kay siya nakahibalo sa dakong kaayohan nga mahimo sa usa ka tawo nga naghupot sa priesthood—nga mao ang gahum sa Dios—makahimo ngadto sa iyang pamilya, ug miingon kanila nga walay katungdanan sa simbahan diin mas labaw pa nga kaayo ang mahimo gawas sa teacher. Siya miingon kanila nga hatagan og igong pagtagad ang iyang mga anak ug motambag kanila isip usa ka amahan.

“‘Ako wala kasagaran sa balay,’ miingon siya, ‘tungod sa tawag sa akong mga katungdanan sa simbahan kanunayng modala kanako sa halayong dapit ug ako nahadlok nga kon ang akong mga anak dili kanunayng makakuha og maayo nga pagtambag, sila lagmit mahisalaag.’”³

Mga Pagtulun-an ni John Taylor

Ang Priesthood mao ang gahum sa Dios.

Unsa man ang priesthood?… Akong tubagon sa minubo nga kini mao ang pangagamhanan sa Dios, mahimong diha sa yuta o diha sa kalangitan, kay pinaagi niana nga gahum, kabubut-on, o baruganan nga ang tanan nga mga butang gidumala sa yuta ug sa mga kalangitan, ug pinaagi niana nga gahum nga ang tanan nga mga butang giabagan ug gipaluyohan. Kini nagmando sa tanang mga butang—kini nagpadagan sa tanang mga butang—kini nagpaluyo sa tanang mga butang—ug may kalabutan sa tanang mga butang diin ang Dios ug ang kamatuoran mahiusa. Kini mao ang gahum sa Dios nga gihatag ngadto sa mga espiritu nga binuhat sa mga kalangitan ug ngadto sa mga katawhan sa yuta; ug kon kita moabut sa celestial nga gingharian sa Dios, atong makita ang pinakahingpit nga han-ay ug panag-uyon nga anaa, tungod kay anaa ang hingpit nga sundanan, ang pinakahingpit nga han-ay sa pangagamhanan gipatuman, ug kon kanus-a o asa kana nga mga baruganan mapalambo sa yuta, sigun sa kakusgon sa pagkatap ug pagsunod niini, sa kakusgon nga kini nakapadangat og mga panalangin ug kaluwasan ngadto sa tawhanong pamilya. Ug kon ang pangagamhanan sa Dios madawat na gayud, ug kon ang pag-ampo ni Jesus, nga iyang gitudlo sa iyang mga tinun-an, matubag, ug ang gingharian sa Dios moabut sa yuta, ug ang iyang kabubut-on matuman dinhi ingon man usab sa langit [tan-awa sa Mateo 6:10], unya, ug human lang niana, nga ang tibuok kalibutan nga paghigugmaay, kalinaw, panag-uyon, ug panaghiusa mopatigbabaw.⁴

[Ang priesthood] mao ang… baruganan ug gahum diin ang [Dios] mopahiangay, mokontrol, modiktar ug modumala sa Iyang mga buhat, Iyang mga kalibutan, Iyang mga gingharian, Iyang mga kayutaan, Iyang mga gahum, Iyang mga binuhat, ug ang tanang mga butang nga anaa ubos Kaniya ug ibabaw Kaniya, ug diin Siya adunay kalabutan.⁵

Ang gahum nga gipakita sa priesthood mao lamang ang gahum sa Dios, tungod kay siya ang pangulo sa priesthood…; ug dinhi niini nga baruganan nga ang tanan nga mga buhat sa Dios nahimo, ma dinhi man sa yuta o sa kalangitan; ug ang bisan unsa nga pagpakita og gahum pinaagi sa priesthood dinhi sa yuta usa lamang ka gitugyan nga gahum gikan sa priesthood sa kalangitan, ug kon ang priesthood dinhi sa yuta mahimong sama ug ubos sa priesthood sa kalangitan mas labaw pa nga gahum nga atong maangkon.⁶

Ang buhi nga priesthood sa yuta gidumala sa langit.

Ang Dios miorganisar sa priesthood, ug kana nga priesthood modumala sa tanang mga butang kabahin sa yuta ug sa kalangitan; usa ka bahin niini anaa sa kalangitan, ang laing bahin anaa sa yuta; kining duha nagkahiusa alang sa pagtukod sa Zion, sa pagtubos sa patay ug sa buhi, ug sa pagpahinabo sa “panahon sa pagpahiuli na sa tanang butang;” [tan-awa sa Mga Buhat 3:21] ug kon kini nagkahiusa pag-ayo, kini gikinahanglan nga adunay komunikasyon tali sa usa ug sa lain, ug nga kadtong anaa sa yuta kinahanglang makadawat og mga panudlo gikan niadtong anaa sa kalangitan kinsa nasinati sa yutan-on ingon man usab sa langitnong mga butang, nga adunay kasinatian sa duha, sanglit kini sa makausa nangatundanan sa samang priesthood dinhi sa yuta.⁷

Ang pagkausa ug kumunikasyon sa priesthood sa langit, ang makahatag og gahum, kinabuhi, ug kahanas ngadto sa buhi nga priesthood dinhi sa yuta, ug kon wala kini sama ra sa patay ug laya nga mga sanga: ug kon aduna may tawo nga may kinabuhi, o gahum, kini mao ang gahum ug kinabuhi sa priesthood, ang gasa ug gahum sa Dios nga gihatag pinasubay sa naandan nga mga paghatag sa katungod sa priesthood, sa langit ug sa yuta; ug ang pagpangita niini sa gawas, sama lang sa usa ka sapa nga nangita nga mahatagan og tubig bisan ang tinubdan niini uga na, o sama sa usa ka sanga nga naningkamot nga mabuhi sa dihang ang punoan sa kahoy giluka: ug ang paghisgot og usa ka simbahan nga wala niini nga priesthood mao ang paghisgot sa butang nga walay pulos—usa ka naughan nga tinubdan, usa ka patay ug laya nga kahoy.⁸

Walay tawo [nga makahimo] sa paggiya niini nga gingharian. Siya dili makahimo gawas kon ang Dios magauban kaniya ug anaa sa kiliran sa mga elder sa Israel. Apan uban kaniya sa ilang kiliran, ang tanang butang magpadayon nga sakto, ug ang kahibalo ug ang pagpadayag sa Dios igabubo. Ang iyang balaod mahibaloan ug ang mga baruganan sa kamatuoran molambo; o kon dili gani, kini dili mao ang gingharian sa Dios. Ug kitang tanan kinahanglan nga magpaubos sa atong mga kaugalingon atubangan sa Dios, ug mangita sa giya sa Makagagahum. …

Adunay usa ka baruganan nga may kalabutan sa gingharian sa Dios nga nag-ila sa Dios sa tanang mga butang, ug nag-ila sa priesthood sa tanang butang, ug kadtong kinsa wala nagbuhat niini maayo unta kon maghinulsol o sila dili mouswag; ako mosulti niana kanimo sa ngalan sa Ginoo. Ayaw hunahunaa nga ikaw maalamon ug nga ikaw makahimo ug makasuon sa priesthood, kay ikaw dili makahimo niini. Ang Dios kinahanglan nga maoy modumala, mohusay, modiktar, ug mangulo, ug ang matag tawo sa ilang lugar. Ang arka sa Dios dili kinahanglang gunitan [2 Samuel 6:3, 6–7], ilabi na sa dili takus nga mga tawo nga walay pagpadayag ug walay kahibalo sa gingharian sa Dios ug sa mga balaod niini. Kini usa ka dakong buluhaton nga atong giapilan, ug kita kinahanglan nga mangandam sa atong mga kaugalingon alang sa buhat nga anaa sa atong atubangan, ug sa pagpasalamat sa Dios, sa iyang awtoridad, sa iyang balaod ug sa iyang priesthood sa tanang butang.⁹

Kita buot nga moalagad sa Dios karon ug hangtud sa kahangturan nga umaabot. Kita nagsugod na karon, ug kita maninguha pinaagi sa tabang sa Dios ug sa kahayag sa Iyang Balaang Espiritu, ug sa mga pagpadayag nga Iyang ihatag kanato matag karon ug unya—kita maninguha ug molihok ug makigbulig uban sa Priesthood ngadto sa mahangturong mga kalibutan mahimong dinhi sa yuta o sa kalangitan. Kita molihok hangtud nga ang buhat nga giplano sa Dios kabahin niini nga yuta mapatuman, ug ang buhi ug ang patay maluwas kon sila mahimo pa nga maluwas sumala sa mahangturong mga balaod nga anaa sa kalangitan, ug sumala sa mga sugo sa Makagagahum. …

Ako padayon nga, “O Dios, giyahi ako sa sakto nga agianan: O Dios, ilikay ako gikan sa tanang sayop; O Dios, ako kabus, huyang, luya, masalaypon nga binuhat, gilibotan sa mga kahuyang ug mga tintasyon. Ako nagkinahanglan sa Imong tabang sa tibuok adlaw. O Dios, tabangi ako.” Mao kana ang akong pagbati, ug ang pagbati sa akong mga kaigsoonan sa Unang Kapangulohan, ug sa Napulog Duha ug sa uban. Kita mibati nga atong gikinahanglan ang tabang sa Makagagahum. Kita maninguha ug magpaubos, ug magmatinud-anon ug motuman sa atong mga pakigsaad. Ug kon kita maminaw sa tambag ug motuman sa mga balaod sa Dios, ug mobuhat sa mga butang nga Iyang ipabuhat sa atong mga kamot, Siya motabang kanato ug mopanalangin kanato, ug Siya mopanalangin sa Zion ug mopatunhay sa Israel.¹⁰

Ang Priesthood gihatag aron kita makatukod sa Zion.

Alang sa unsa man kini nga priesthood nga gihatag kanato? Aron kita makahimo sa pagtukod sa Zion sa Dios. Alang sa unsa? Aron sa paghunong sa sayop ug dautan, kahigal, pagkabakakon, pagkakawatan, pagkadili matinuoron, ug pagkamasinahon, tanang matang sa dautan, ug usab aron pag-awhag og hugot nga pagtuo, maaghup, kalooy, kaputli, inigsoon nga kaayo, matinuoron, matarung, matinud-anon, ug tanan nga giplano aron sa paghimaya ug pahamili sa katawhan, aron kita magmatinud-anon ug angay nga mga representante sa Dios atong Amahan dinhi sa yuta, aron kita makat-on sa pagsuta sa iyang kabubut-on ug mobuhat niini; nga ang iyang pagbuot matuman dinhi sa yuta maingon sa langit.¹¹

Aron makab-ot kining gitinguha nga katuyoan—aron mahiuli ang paglalang ngadto sa orihinal nga kaputli ug kanindot ug pagpatuman sa tumong sa paglalang—aron sa pagtubos, pagluwas, pagbayaw, ug paghimaya sa tawo—aron sa pagluwas ug pagtubos sa patay ug sa buhi, ug sa tanan nga mabuhi sumala sa mga balaod niini, mao ang plano ug tumong sa pagtukod sa priesthood dinhi sa yuta sa katapusang mga adlaw. Alang kini sa katuyoan nga matuman ang unsay wala pa mahimo—nga ang mga buhat sa Dios mahingpit—aron ang mga panahon sa pagpahiuli sa tanang butang mapahinabo, ug nga, agi og sumpay sa mahangturong priesthood sa kalangitan (kinsa kon wala kita, o kita kon wala sila, dili mahimo nga hingpit), kita makapahinabo sa tanang butang nga anaa na sa hunahuna sa Dios, o gisulti pinaagi sa Espiritu sa Dios, sa mga ba-ba sa tanang balaan nga mga propeta sukad pa sa pagsugod sa kalibutan. …

Ang priesthood sa kalangitan nakighiusa ngari kanato aron sa pagpahinabo niining mga katuyoan, ug ingon nga sila gimandoan pinaagi sa samang baruganan, ang atong mga buhat magkatakdo— aron adunay langitnong tabang, ug nga ang kabubut-on sa Dios (nga ingon nga alang kanato) matuman gayud dinhi sa yuta maingon sa langit. Mao kini ang angayan natong makatonan, ug kini ang kinahanglan nga buhaton aron mapatuman ang atong balaang tawag, ug ang atong mga buhat madawat sa mata sa Dios ug sa balaang mga anghel, ug usab sa mata sa atong mga kaigsoonan, kinsa atong nakauban sa priesthood dinhi sa gingharian sa Dios sa yuta.¹²

Ang priesthood gibutang sa simbahan alang niining katuyoan, sa pagkalot, sa pagtanom, sa pag-alima, sa pagtudlo og sakto nga mga baruganan, ug sa pagpalambo sa kapunongan sa gingharian sa Dios, sa pagpakigbatok sa mga dautan, ug pagpabilin ug pagabag sa mga awtoridad sa simbahan ni Kristo dinhi sa yuta. Katungdanan natong tanan ang pagtinabangay sa paghimo og dako nga yunit—dako nga nagkahiusang hugpong sa katawhan [o na-organisar nga pundok], kinsa nakigsaad nga magmatinudanon sa gingharian sa Dios; dayon ang tanan mopadayon sa hilom, sa kalinaw, ug sa kasayon, ug unya dunay gamay lang kaayo nga kasamok.¹³

Ang Priesthood gihatag alang sa panalangin sa tawhanong pamilya.

Ang Priesthood sa kanunay gihatag alang sa panalangin sa tawhanong pamilya. Ang mga tawo maghisgut bahin niini ingon nga kini alang sa espesyal nga kaayohan sa mga indibidwal. Unsa man ang gisulti kang Abraham? “Diha kanimo ug sa imong binhi”—unsa? Ako mopanalangin kanimo. O, sakto na kon kutob ra diha. Apan “diha kanimo ug diha sa imong binhi mahimo nga ang tanan nga mga banay sa yuta pagapanalanginan.” [Tan-awa sa Abraham 2:11.] Maghatag kita og abag, ug kon kita mga kaliwatan man ni Abraham, maglakaw kita sa iyang mga tunob ug atong himoon ang atong mga kaugalingon nga takus sa mga saad, magtinguha kita sa pagtabang sa buhi ug sa patay, ug mangita aron sa pagpanalangin ug sa kaayohan, pagbayaw ug pagpahamili sa tanan nga naglibot kanato; aron kitang tanan maghiusa sa paghudyaka ug mahimaya sa samang mga baruganan nga napadayag na alang sa kaayohan sa tanang katawhan…

Kon ako usa ka Bishop—ako wala masayud unsay akong mahimo, apan ako nasayud unsay kinahanglan nakong buhaton. Labing siguro moingon ko, Amahan, imong gitugot ang daghan kaayong mga kalag nga akong atimanon; tabangi ako nga akong mabantayan ang ilang temporal nga mga panginahanglan ug usab mapalambo ang ilang espirituhanong kaayohan, ug masiguro nga sila maayong pagkatudlo sa mga balaod sa kinabuhi: tabangi usab ako sa pagtudlo sa mga magtutudlo nga naglakaw taliwala sa mga katawhan, nga sila maglakaw nga puno sa Balaang Espiritu nga maoy mopanalangin ug mohatag og kaayohan sa katawhan, nga sa tabang sa akong mga kaigsoonan ako mamahimong usa ka Manluluwas taliwala kanila. Mao kana ang angay kong bation ug angay kong buhaton kon ako usa ka Bishop; ug mao kana ang paagi nga kamong mga Bishop angay nga mobati ug molihok, ug mobuhat niini diha sa pagpaubos uban ang tinguha sa pagbuhat og maayo. Ug unya, kon ako usa ka Priest, Teacher o Deacon, ug nagsuroysuroy isip usa ka magtutudlo taliwala sa mga katawhan, ako buot moatiman sa ilang kaayohan.¹⁴

[Si Jesus miingon], “Simon, anak ni Juan, gihigugma mo ba ako labaw pa niini? Siya miingon kaniya, oo, Ginoo; nasayud ka nga gihigugma ko ikaw.” Kon ikaw nahigugma kanako, kon ikaw akong higala ug akong tinun-an, “Pakan-a ang akong mga nating karnero.” Dili kana lisud kaayo nga buhaton; siya gitawag alang niana nga katuyoan. “Siya miingon kaniya sa ikaduha, Simon, anak ni Juan, gihigugma mo ba ako? Siya miingon kaniya, oo Ginoo, nasayud ka nga gihigugma ko ikaw. Siya miingon kaniya, Tagda ang akong mga karnero.” Ug sa ikatulo nga higayon ang Manluluwas mihimo sa samang pangutana ngadto ni Pedro, ug sa dihang si Pedro mitubag sa samang tubag, siya miingon kaniya, “Pakan-a ang akong mga karnero.” [Tan-awa sa Juan 21:15–17.] Unsa man ang katungdanan sa mga Apostoles; sa mga Presidente sa mga Stake, mga High Priest, sa mga Kapitoan, ilabi na niadtong mga nagdumala sa kinatibuk-an? Kon si Jesus ania pa dinhi, siya moingon kaninyo sa pagsalikway sa inyong walay hinungdan, inyong mga binuang ug mga kahuyang, ug mobuhat nga labaw pa ka sama sa mga tawo ug mga Santos ug motrabaho ug “Mopakaon sa akong mga Karnero.”¹⁵

Ang Dios naghatag og gahum niadtong kinsa mopalambo sa priesthood.

Kon kita nakasabot sa atong mga kaugalingon ug sa atong gibarugan, ang atong unahon mao, ang gingharian sa Dios una sa tanan ug ang atong mga kaugalingon human niana. Kon kita magkat-on sa pagbuhat sa gamayng butang, ang Ginoo tingali moingon ngari kanato sa pagbuhat og dakodako nga butang, tungod kay kita andam sa pagbuhat niini. … Kon kita mga tawo sa Dios, ug siya nagsalig kanato sa pagbuhat niining mahinungdanong mga katuyoan, kinahanglan nga kita mobuhat labaw pa kay sa atong naandan, ug kinahanglan nga kita magmauyunon ug masundanon sa diktar sa Espiritu sa Ginoo ug sa iyang mga sulugoon kinsa iyang gitawag aron modumala kanato. Kon kita mobuhat niini, matag buhat nga atong buhaton mahimong malipayon ug makapahimuot ngari kanato, ang kalinaw magpatigbabaw sa atong mga dughan ug ang kalinaw sa Dios magapuyo sa atong mga panimalay; ang Espiritu sa Ginoo magpandong kanato, ug kita mapuno sa hingpit nga kalipay ug magdayeg sa tibuok nga adlaw, ug kini hangtud sa katapusan. Ako nasayud nga walay laing paagi sa paghimo niining tanang buluhaton, gawas lang kon tudloan sa Ginoo, ug tungod niana nga katuyoan siya mi-organisar sa iyang balaang priesthood.¹⁶

Adunay daghang kapangakohan diha sa mga priest, sa mga teacher, ug sa mga deacon, ug sa niadtong ubos nga priesthood sama sa anaa ni bisan kinsa nga sakop sa simbahan. Kon sila dili magbuhat sa ilang mga katungdanan, unsa man ang resulta? Ang mga tawo moadto sa napulog duha, o ngadto sa Unang Kapangulohan; ilang labyan ang labing duol nga mga awtoridad; ug anaay kalibug ug kasamok; ug ang bililhong oras mausik lang sa walay kapuslanan; … ug ang tanan niini tungod sa gusto sa mga tawo nga masayud sa ilang mga katungdanan ug magbuhat niini.

Apan samtang kita nakigbisog sa gagmayng mga butang unsa man ang mahitabo kanato? Kita mawad-an ug pagtagad sa atong mga balaang tawag; kita malimot nga kini nga gingharian gitukod dinhi sa yuta alang sa katuyoan sa pagpaila sa pagkamatarung ug sa mga balaod sa langit dinhi sa yuta, ug sa pagpanalangin sa katawhan ug sa pagluwas sa buhi ug sa patay. Kita malimot unsay atong katuyoan dinhi, ug nganong gitukod man ang gingharian sa Dios. Kini dili alang kanimo o alang kanako o bisan kinsa lamang; kini alang sa kaayohan sa kalibutan ug sa kaluwasan sa katawhan. Kita gilauman, matag usa kanato, sa pagbuhat sa nagkalainlaing mga katungdanan ug mga kapangakohan nga naglibot kanato. Kon kita dili magtagad niini, dili ba kita sad-an atubangan sa Dios? Nganong moabot man ang mga kalisdanan sa atong palibot? Tungod sa akong naingon na sa makadaghang higayon nga ang naghupot sa priesthood wala magbuhat sa ilang mga katungdanan, dili mabinantayon ug matinud-anon.¹⁷

Akong namatikdan ang uban sa akong mga pagpanaw, kadto, kinsa, sama sa mga tinun-an ni Jesus sa karaan, nagpakita og dako nga tinguha alang sa gahum, ug nagpakita og dako kaayo nga tinguha aron masayud kinsa kanila ang labing dako. Kini binuang, tungod kay ang dungog wala magagikan sa katungdanan, apan gikan sa usa ka tawo nga nagbuhat sa iyang katungdanan ug balaang tawag. Kon kita adunay bisan unsa nga dungog gikan sa o pinaagi sa priesthood, kini gikan sa Dios, ug kita mabaw ra kaayo og hunahuna sa pagpasigarbo sa usa ka gasa kon kita walay gihimo alang niana nga gasa, gawas sa pagdawat lamang. Kon kini gikan sa Dios, siya ang kinahanglan nga makadawat sa himaya ug dili kita, ug ang atong pagbuhat sa atong balaang tawag mao lamang ang paagi nga kita makabaton og dungog o impluwensya.¹⁸

Mga Sugyot alang sa Pagtuon ug Panaghisgutan

Unsa man ang priesthood sa Dios? Unsa nga mga panalangin ang anaa nga atong maangkon pinaagi sa priesthood? Unsay inyong gibati sa inyong paghunahuna nga ang Dios ang mihatag sa tawo sa gahum sa priesthood?
Unsa man ang mahimo sa matag sakop sa pamilya aron mapalig- on sa gahum sa priesthood diha sa panimalay?
Ngano nga mahinungdanon man nga ang mga naghupot sa priesthood nga makadawat og makanunayong giya gikan sa Ginoo?
Unsaon pagtabang sa priesthood sa “pagtubos, pagluwas, pagbayaw, ug paghimaya sa tawo”?
Sa unsang paagi nga ikaw ug ang inyong mga minahal napanalanginan pinaagi sa matarung nga paggamit sa priesthood? bang sa paglig-on sa mga panimalay diin walay naghupot sa priesthood?
Unsa man ang ubang mga kahigayunan alang sa pagpahigayon og pagpangalagad sa priesthood sa inyong dapit? Unsa man ang mahimo sa mga naghupot sa priesthood aron makatabang sa paglig-on sa mga panimalay diin walay naghupot sa priesthood?
Basaha ang D&P 84:33–34. Unsa man ang gipasabot sa pagpalambo sa balaang tawag sa priesthood? Unsa man ang buot ipasabot sa pagpalambo sa bisan unsa nga balaang tawag sa Simbahan? Sa unsang paagi kita makatabang niadtong anaa sa atong ward o branch kinsa naninguha sa pagpalambo sa ilang balaang mga tawag?

May Kalabutan nga mga Kasulatan: 1 Mga Taga-Corinto 4:20; 1 Timoteo 4:12–16; Jacob 1:18–19; D&P 58:26–28; 84:18–21, 26–27, 33–34; 107:99–100

Jesus bestowing priesthood — Ang mga naghupot sa priesthood kinahanglang mahinumdom sa gigikanan sa tanang gahum sa priesthood. Ingon sa gitudlo ni President Taylor, “Kon kita adunay bisan unsang dungog gumikan sa o pinaagi sa priesthood, kini nagagikan sa Dios.”