Minubo nga Kasaysayan

Kini nga libro dili usa ka kasaysayan, apan usa ka koleksyon sa mga baruganan sa ebanghelyo nga gitudlo ni Presidente John Taylor. Hinoon, aron mabutang ang iyang mga pagtulun-an sa dugukan sa kasaysayan, ang mosunod nga kronolohiya gihatag. Kining minubo milaktaw og daghang importanteng mga hitabo sa iyang kinabuhi, lakip sa iyang mga kaminyoon ug sa pagkatawo ug pagkamatay sa iyang mga anak, nga iyang gihatagan og debosyon.

1808, Nobyembre 1	Natawo sa Milnthorpe, Westmoreland, England, ang ikaduha sa 10 ka mga anak ni James ug Agnes Taylor.
1819	Mibalhin uban sa iyang pamilya ngadto sa Hale (duol sa Milnthrope), diin mitabang siya sa pagtrabaho diha sa usa ka gamay nga uma nga gibilin sa usa sa uyoan ngadto sa iyang amahan. (11; mga numero sa parentisis nagpakita sa edad ni John Taylor).
1822	Nag-aprentis isip usa ka tighimo og baril sa Liverpool. Sulod sa usa ka tuig ang negosyo sa iyang agalon nabangkaruta ug siya mipauli (14).
1824	Mibiya sa Simbahan sa England ug nahimong usa ka Methodist. Migahin sa iyang libre nga panahon sa pagtuon sa Biblia, pagbasa sa mga buhat sa teyolohikanhon, ug nag-ampo (16).
1825	Nahimong usa ka “tig-awhag” sa Methodist, o tigsangyaw nga wala maorden. Nakadawat og kusog nga impresyon nga siya moadto sa Amerika aron sa pagsangyaw sa ebanghelyo (17).
1830	Ang mga ginikanan ug ang uban sa pamilya mibalhin ngadto sa Toronto, Canada, mibiya kaniya sa England aron moatiman sa negosyo sa pamilya (21 o 22).
1832	Mibiya sa England padulong sa Siyudad sa New York. Nagsugod sa pagsangyaw didto sa Canada (23 o 24).
1833–36	Nag-alagad isip usa ka tigsangyaw sa Simbahan sa Methodist sa Toronto. Nagpadayon sa pagtuon ug pagsiksik sa mga kasulatan (24–27).
1836, Tingpamulak	Si Elder Parley P. Pratt miabut sa Toronto aron sa pagsangyaw sa gipahiuli nga ebanghelyo (27). Si Elder Pratt gitawag ngadto sa Korum sa Napulog Duha ka mga Apostoles niadtong 1835.
1836, Mayo 9	Gibunyagan ni Parley P. Pratt (27).
1836–37	Nag-alagad isip tigdumalang opisyal sa Simbahan didto sa Canada (27–28).
1837, Marso	Miadto sa Kirtland aron makigkita ni Propeta Joseph (28).
1838	Na-orden nga usa ka Apostol sa Far West, Missouri, sa 19 sa Disyembre, pinaagi ni Brigham Young ug Heber C. Kimball, ubos sa direksyon ni Joseph Smith, kinsa didto sa Bilanggoan sa Liberty (30).
1840	Miabut sa Great Britain isip usa ka misyonaryo. Mao ang unang misyonaryo nga misangyaw sa gipahiuli nga ebanghelyo didto sa Ireland ug sa Isle of Man. Miatiman sa pagpangandam ug pag-imprinta sa unang edisyon sa Basahon ni Mormon nga gimantala sa gawas sa Estados Unidos; mitabang usab sa pag-andam sa libro sa himno ug mimantala og daghang misyonaryo nga mga pampleta (31).
1841	Mibalik ngadto sa Estados Unidos uban sa pipila ka laing mga Apostoles (32).
1842	Gitudlo ni Joseph Smith sa pag-edit sa Times and Seasons,[Mga Higayon ug mga Panahon] usa ka gimantala sa Simbahan. Mi-edit usab sa Wasp [Lampinig] (1842–43) ug dayon sa misunod niini, ang Nauvoo Neighbor [Silingan sa Nauvoo] (1843–45), ang duha ka mga pamantalaan sa Nauvoo.
1842	Napili nga mahimong sakop sa Konseho sa Siyudad sa Nauvoo, usa ka lider sa Unibersidad sa Nauvoo, ug Maghuhukom- Manlalaban sa Lehiyon sa Nauvoo (33).
1844, Hunyo 27	Nakasaksi sa pagkamartir ni Joseph ug Hyrum Smith sa Bilanggoan sa Carthage ug grabe nga nasamdan sa panahon sa pag-ataki (35).
1846	Mitabang sa pag-organisar sa Mormon Batalyon didto sa Council Bluffs. Miadto sa Great Britain sa ikaduhang misyon uban kang Parley P. Pratt ug Orson Hyde (37).
1847	Mibalik ngadto sa Winter Quarters gikan sa England. Nangulo sa dako nga pundok sa mga Santos ngadto sa Utah, miabut sa Oktubre (38).
1850–51	Nag-alagad didto sa France isip misyonaryo. Duol sa Boulogne mihalad og pag-ampo nagpahinungod sa nasud alang sa pagsangyaw sa ebanghelyo. Mitukod ug miedit sa unang peryodiko sa Simbahan didto sa France, Etoile du Deseret (Star of Deseret). Mitabang sa paghubad sa Basahon ni Mormon ngadto sa French. Mimantala sa unang peryodiko sa Simbahan sa Germany, usa ka binulan nga pamantalaan nga ginganlan og Zion’s Panier (Bandila sa Zion). Ubos sa iyang direksyon ang Basahon ni Mormon unang gimantala sa German. Misulat sa The Government of God [Ang Pangagamhanan sa Dios] (41–42).
1854	Napili nga magbabalaod alang sa Teritoryo sa Utah (45).
1854–56	Mialagad og usa ka misyon sa New York, diin midumala siya sa mga kalihokan sa Simbahan sa silangang mga estado. Mimantala sa pamantalaan nga giulohan og The Mormon [Ang Mormon] (46–48).
1857	Mibalik ngadto sa Utah. Napili nga Speaker sa Kongreso sa Balaoranan sa Teritoryo sa Utah, usa ka responsibilidad nga iyang gihimo sulod sa daghang mga tuig—dugang sa iyang mga katungdanan sa Simbahan (49).
1868–70	Nag-alagad isip Tigpamatuod nga Maghuhukom sa Lalawigan sa Utah (59–61).
1877, Agosto 29	Si Brigham Young namatay. Sulod sa misunod nga tulo ka mga tuig, si John Taylor nangulo sa Simbahan isip Presidente sa Korum sa Napulog Duha (68–71).
1878	Organisasyon sa Primarya natukod (69).
1880, Oktubre	Gipaluyohan isip Presidente sa Simbahan, uban ni George Q. Cannon ug Joseph F. Smith isip mga magtatambag (71).
1882	Ang Kongreso sa Estados Unidos mipasar sa Edmunds bill, mihimo sa dinaghan nga kaminyoon nga usa ka dakong salaod ug nagdili sa adunay daghang mga asawa sa pagbotar, paghupot og katungdanan sa publiko, o sa paghimo sa katungdanan sa usa ka maghuhukom (73).
1882	Mimantala sa The Mediation and Atonement [Ang Pagpataliwala ug Pag-ula] (73).
1884, May	Mipahinungod sa Templo sa Logan Utah (75).
1885	Nakadawat og taho sa dihang mibisita sa California nga ang mga opisyal sa gobyerno misugo nga ipadakop siya tungod sa pagpangasawa og daghan. Mibalik ngadto sa Salt Lake sa pagka-27 sa Enero. Niadtong 1 sa Pebrero, miwali sa iyang katapusang sermon nga pangpubliko ug, naglaum nga mohinay ang pagpanggukod sa mga awtoridad sa gobyerno batok sa Simbahan, siya nagtago-tago (76).
1887, Hulyo 25	Sa edad nga 78, namatay sa panimalay ni Thomas Roueche sa Kaysville, Utah. Sa panahon sa iyang administrasyon, ang mga sakop sa Simbahan miabut og kapin sa 150,000.