Kapitulo 18

Ang Pag-alagad diha sa Simbahan

Kitang tanan interesado sa mahinungdanong buluhaton sa Dios sa ulahing mga adlaw, ug kitang tanan kinahanglan nga mahimong kauban nianang buhata.¹

Gikan sa Kinabuhi ni John Taylor

Gikan sa higayon sa iyang pagkakabig, si John Taylor mipasalig sa paghatag sa iyang tanan ngadto sa buluhaton sa Ginoo. Nagpalandong sa iyang balaang tawag niadtong 1837 nga mahimong Apostol, siya mipaambit niini nga mga hunahuna: “Ang buluhaton ingon og dako, ang mga katungdanan malisud ug may kapangakohan. Akong gibati ang akong kaugalingon nga kahuyang ug kagamay; apan akong gibati ang pagkadeterminado, nga ang Ginoo mao ang akong magtatabang, sa pagpaningkamot sa pagpalambo niini. Sa dihang ako unang misulod sa Mormonismo, ako nasayud unsay akong gibuhat. Akong gitimbangtimbang ang tanang gikinahanglan gikan kanako. Ako mitan-aw niini isip tibuok kinabuhi nga paghago, ug naghunahuna nga ako wala lamang malista sa gamay nga panahon, apan alang usab sa kahangturan, ug nga wala mangandoy nga motalikod karon, bisan kon akong gibati ang akong pagka dili angay.”²

Kining “paghago sa tibuok kinabuhi” nga iyang gipaabut nga natinuod. Pinaagi sa iyang pag-serbisyo sa daghang mga dekada, si John Taylor mibutang sa iyang pagsalig sa Ginoo, nasayud nga kon siya moalagad nga matinud-anon, ang Ginoo mopaluyo kaniya ug motabang kaniya nga makatuman sa Iyang kabubut-on. Usa ka ehemplo kon giunsa sa Ginoo pagpaluyo niadtong kinsa moalagad Kaniya nahitabo sa dihang si Elder Taylor nagsangyaw sa ebanghelyo didto sa Isle of Man, usa ka isla duol sa Inglatera. Siya nakigsabot alang sa pag-imprinta og pipila sa iyang mga pamphlet agi og tubag ngadto sa bakak nga mga pag-akusar batok sa Simbahan ug ni Propeta Joseph Smith. Bisan pa niana, ang tig-imprinta nagdumili sa paghatod sa mga pamphlet hangtud siya makabayad sa tanan. Matinguhaon ang pag-apod-apud sa mga pamphlet sa labing madali, si Elder Taylor nag-ampo ngadto sa Ginoo alang sa panabang, nga gihatag dayon.

“Pipila ka mga minuto human sa iyang pag-ampo usa ka batanon nga lalaki miabut, ug sa dihang gipasulod mitunol ni Elder Taylor og usa ka sobre ug milakaw. Ang batan-ong lalaki dili niya kaila. Ang sobre adunay sulod nga kwarta ug mubong sulat nga mabasa: ‘Ang mamumuo takus sa iyang suhol.’ Ug walay pirma nga gibutang didto. Pagkataud-taud sa wala madugay usa ka kabus nga babaye nga naninda og isda miadto sa balay ug mitanyag og gamayng salapi aron pagtabang sa iyang ministeryal nga mga paghago. Siya misulti ngadto kaniya nga daghang kwarta sa kalibutan ug wala siya mangandoy sa pagkuha sa iyang kwarta. Siya miinsister nga ang Ginoo manalangin kaniya og dugang ug siya labawng magmalipayon kon siya modawat niini, tungod niana iyang gidawat ang tanyag, ug sa iyang katingala ang gamay kwarta sa kabus nga babaye, gidugang sa gihatag sa batan-ong lalaki ngadto kaniya, nahimong ensakto kaayo sa kantidad nga igong makabayad sa balanse ngadto sa tig-imprinta.”³

Mga Pagtulun-an ni John Taylor

Matag usa kanato adunay katungdanan sa pagserbisyo diha sa Simbahan ug sa pagpalambo sa atong balaang mga tawag.

Dili husto ang pag-ingon nga ang tibuok katungdanan sa pagdumala niining gingharian nga gisangon sa napulog duha o sa Unang Kapangulohan, ingon nga mahimong mahitabo, o diha sa mga stake president, o diha sa mga high priest, o diha sa mga seventy, o diha sa mga bishop, o diha sa bisan kinsa nga opisyal sa simbahan ug gingharian sa Dios; sukwahi niana, ang tanan kanato adunay lainlaing mga katungdanan nga pagahimoon. Ug mopadayon ko sa paghisgot kalabut sa mga katungdanan sa mga tawo, ug kalabut usab niadtong mga babaye, ang tanan adunay ilang mga katungdanan nga pagahimoon sa atubangan sa Dios. Ang pag-organisar niini nga simbahan ug gingharian gihimo alang sa tataw nga katuyoan sa pagbutang sa matag tawo diha sa iyang dapit, ug dayon gipaabot nga ang matag tawo niana nga dapit mopalambo sa iyang buhatan ug balaang tawag.⁴

Kon kamo dili mopalambo sa inyong balaang mga tawag, ang Dios mohimo kaninyo nga responsable alang niadtong kinsa mahimong inyo untang maluwas kon kamo naghimo pa sa inyong katungdanan.⁵

Unsa ang gipasabut nga mahimong usa ka Santos? Ug hain na ako karon, ug hain na kamo sa pagtuman sa inyong mga obligasyon nga gisangon kanato isip mga Santos sa Dios, isip mga Anciano sa Israel, isip mga amahan sa mga pamilya ug mga inahan sa mga pamilya? Atong pangutan-on ang atong mga kaugalingon niini nga mga pangutana. Kita ba naghimo sa atong lainlaing mga katungdanan sa pagtukod sa gingharian sa Dios, sa pagpadayon sa iyang buluhaton dinhi sa yuta? Ug unsa ang atong gihimo sa pagpahinabo sa kahimayaan sa ulahing adlaw? Hain sa atong mga lihok ang nagpaluyo niini? Usa ba niini, o tanan ba niini? Ug unsa man ang tinuod natong baruganan? Kini ang mga butang nga maayo natong timbang-timbangon, hunahunaa ug pangitaa ang tinuod nga mga responsibilidad nga gisangon ngari kanato.⁶

Kini dili igo. … nga kita gibunyagan ug nga kita gipandongan sa mga kamot alang sa gasa sa Espiritu Santo. Dili pa gani igo nga kita mopadayon sa labaw pa niini ug modawat sa atong [mga ordinansa sa templo], apan nga kita sa matag adlaw ug sa matag oras ug sa tanang panahon magpuyo sumala sa atong relihiyon, mopalambo sa Espirtu sa Dios ug nga kini mapadayon ngari kanato sama sa usa ka tubod sa tubig nga naghatag og kinabuhing dayon,’ [tan-awa sa Juan 4:14] nag-abli, nagpalambo, nagpakita sa mga katuyoan ug mga plano sa Dios ngari kanato, nga kita unta magalakaw nga takus sa halangdon nga buluhaton diin kita gitawag, isip mga anak sa Dios …Malisud gayud kaayo alang sa bisan kinsang linalang kon walay tabang gikan sa Dios sa pagbuhat og matarung, sa paghunahuna og matarung, sa pagsulti og matarung, ug sa pagtuman sa kabubut-on ug sa balaod sa Dios dinhi sa yuta, ug mao kana ang gikinahanglan ang pag-organisar sa simbahan ug sa gingharian sa Dios dinhi sa yuta, sa maayong pagkaorganisar nga priesthood, sa husto nga paagi, mga pagpugong, mga limitasyon, mga balaod ug mga panggobyerno nga gipaila sa Makagagahum ngadto sa iyang simbahan ug gingharian, alang sa paggiya, panudlo, panalipod, kaayohan, pagtukod ug pagpalambo og dugang pag-uswag sa iyang simbahan ug gingharian dinhi sa yuta. …

… Kini nahisama sa mga sanga sa kahoy, ug sa gamot ug sa punoan sa kahoy. Ang mga sanga milambo sa himsog nga punoan, ug usa ka gamay nga sanga sa gawas, nga adunay pipila ka berde nga mga dahon niini ug gamay nga bunga, hilabihan ka mabungahon, maanindot ug makapahimuot tan-awon, apan kini usa lamang ka bahin sa kahoy, kini dili mao ang tibuok kahoy. Diin ba kini mokuha sa iyang kahimsog? Gikan sa gamot ug sa punoang sanga o gamayng sanga, ug pinaagi sa daghang mga sanga nga anaa sa kahoy. …

Isip usa ka Santos kamo moingon, “Sa akong paminaw nakasabut ko sa akong katungdanan ug ako nagbuhat sa maayo kaayo.” Mahimong tinuod kana. Kamo nakakita sa gagmayng salingsing, kini berde, kini nagtubo ug mao ang hingpit nga hulagway sa kinabuhi, kini nagtuman sa iyang kalabutan ug kabahin sa kahoy, ug kini gidugtong gikan sa punoang sanga, mga sanga ug gamot; apan ang kahoy mabuhi ba nga wala kini? Oo, mahimo. Wala kinahanglana nga kini manghambog sa iyang kaugalingon ug magpataas, ug moingon “berde kaayo ko, labong kaayo ko, ug himsog kaayo ang akong kahimtang karon, maayo kaayo ako karon ug anaa ko sa maayong pagkabutang ug ako nagbuhat sa husto.” Apan ikaw mabuhi ba kon walay gamot? Dili, buhata ang inyong tukma nga bahin ug katungdanan diha sa kahoy. Ingon usab niini ang mga tawo. …

Kini usa ka hingpit nga pagkasama sa simbahan ug sa gingharian sa Dios. Kita gibugkos aron maghiusa, gihiusa sa mga bugkos sa usa ka komon nga pakigsaad. Kita mahinungdanon nga bahin ug tipik sa simbahan ug gingharian sa Dios nga gitanom sa yuta sa katapusang mga adlaw alang sa pagpatuman sa iyang katuyoan sa iyang gingharian, ug sa pagpahinabo sa tanang mga butang nga gipamulong pinaagi sa ba-ba sa tanang balaan nga mga propeta sukad sa sinugdanan sa kalibutan. Kitang tanan nagbarug sa atong husto nga dapit.

Samtang kita magpalambo sa atong balaang mga tawag kita nagpasidungog sa atong Dios. Samtang kita nagpalambo sa atong tawag kita naghupot sa kabahin sa Espritu sa Dios; samtang kita magpalambo sa atong balaang mga tawag kitang tanan naglangkob sa kahoy, samtang kita magpalambo sa atong balaang tawag ang Espritu sa Dios modagayday pinaaagi sa husto nga agianan ug pinaagi niini kita makadawat sa husto nga pag-amuma, ug kita gitudloan sa mga butang kalabut sa atong kaayohan, kalipay ug kaikag kalabut niini nga kalibutan ug sa kalibutan nga moabut.⁷

Ang buluhaton sa Dios nag-uswag ug nagkadugang, ug kini magpadayon sa ingon hangtud nga ang mga pulong sa propeta matuman kinsa miingon, “Ang usa mahimong usa ka libo, ug ang usa nga gamay mahimo nga usa ka kusganon nga nasud: ako, si Jehovah, magapadali niini sa iyang panahon” [Isaias 60:22] apan Siya nagsalig sa matag tawo nga anaa sa iyang dapit nga magpalambo sa iyang balaang tawag ug sa mopasidungog sa iyang Dios. Ug samtang adunay mga dautan …,adunay daghang maayo, sa hiyas, sa paglimod sa kaugalingon, o pagpugong sa kaugalingon ug usa ka dakong tinguha sa pagbuhat sa kabubut-on sa Dios ug pagtuman sa Iyang mga katuyoan. Ug kini anaa ra sa matag lalaki ug matag babaye sa pagbuhat sa iyang bahin.⁸

Samtang kita mag-alagad sa Simbahan, kita kinahanglan mahiuyon ngadto sa pulong, sa kabubut-on, ug sa balaod sa Dios.

Kita ania dinhi ingon nga si Jesus dinhi, dili sa pagbuhat sa atong kaugalingon nga kabubut-on, apan sa kabubut-on sa atong Amahan kinsa mipadala kanato [tan-awa sa Juan 5:30]. Siya mibutang kanato dinhi; kita adunay buluhaton nga pagahimoon sa atong panahon ug kaliwatan; ug walay mahinungdanon nga butang nga may kalabutan ni bisan kinsa kanato gawas lang kon kita makig-uban sa Dios ug sa Iyang buluhaton, kini man ang Presidente sa Simbahan, ang Napulog Duha, ang mga Stake President, ang mga Bishop, o bisan kinsa, ug kita mahimo lamang nga anaa sa bisan unsa nga pag-alagad pinaagi sa pagbutang sa atong mga kaugalingon diha sa posisyon sa pagbuhat sumala sa pagdiktar sa Dios ngari kanato; samtang Siya mopahiangay ug mopahiluna sa mga buluhaton sa Iyang Simbahan alang sa kaayohan sa katawhan, sa ngalan sa mga buhi ug sa mga patay, sa ngalan sa kalibutan diin kita nagpuyo, ug sa ngalan niadtong kinsa nagpuyo sa wala pa kita ug kinsa magpuyo human kanato. Kita makabuhat lamang samtang kita tabangan, giyahan ug tudloan sa Ginoo. …

…Kita kinahanglan nga magmata ug mopahimutang sa kahusay sa atong mga panimalay sa ug ang atong mga kasingkasing, kita kinahanglan nga mahiuyon ngadto sa pulong, sa kabubuton, ug sa balaod sa Dios; kita kinahanglan motugot nga ang Dios momando sa Zion, motugot nga ang Iyang balaod mahisulat diha sa atong mga kasingkasing, ug mobati sa responsibilidad sa mahinungdanong buluhaton nga kita gitawag sa pagpahigayon. Kita kinahanglan mosusi nga ang atong mga lawas ug ang atong mga espiritu putli, ug nga sila gawasnon gikan sa hugaw sa matag matang. Kita ania aron pagtukod sa Zion sa Dios, ug niini nga katuyoan kita kinahanglan nga motugyan sa atong mga lawas ug atong mga espiritu ngadto sa balaod, sa pulong, ug sa kabubuton sa Dios. Kay ania man kita Zion kita buot nga makakita nga manghitabo kanang butang nga gisulti ni Jesus sa Iyang mga tinun-an nga pangayoon pinaagi sa pag-ampo. “Umanhi ang imong gingharian. Pagabuhaton ang imong kabubut-on dinhi sa yuta, maingon sa langit” [Tan-awa sa Mateo 6:10.] Giunsa kini paghimo sa langit? Ang Dios namulong ug ang mga kalibutan nabuhat sumala sa Iyang pulong. Ang Dios miingon ato kining buhaton, ug kana ug ang lain, ug kini nahitabo. Aduna bay usa sa langit nga nipakgang ug miingon, “Wala ka ba maghunahuna nga mas maayo ang paghunong og makadiyot. Dili ba kini mas maayo nga paagi?” Oo, ang yawa miingon niana, ug mao gihapon ang iyang gisulti karon, ug siya gipaminaw usahay sa mga makasasala ug usahay sa mga Santos; tungod kay kita mahimong mga su lugoon niadtong kang kinsa atong gipili nga sundon [tana-awa sa D&P 29:45]. …

… Ang balaod sa Dios hingpit nga nagapabag-o sa kalag [tanawa sa Salmo 19:7], ug kita kinahanglan nga dumalaon niana nga balaod ug mopatuman niini, o kinahangalan manubag ngadto sa atong Ginoo nga atong Dios sa dalan nga atong gisunod, o sa pagbaliwala sa paghimo sa atong mga katungdanan. Mao kana ang akong pagtan-aw niining mga butanga, ug kon kana dili maoy tinuod, nganong kini nga mga balaod gihatag man kanato. Kini ba mga balaod sa Dios? Kita nakasabut pag-ayo niini. Busa atong himoon ang atong mga katungdanan ug maningkamot sa pagpalambo sa atong balaang mga tawag nga kita unta uyonan ug dawaton sa Ginoo. …

Busa, barug! kamo nga mga Elder sa Israel—kamo nga mga Priest, mga Teacher ug mga Deacon, kamo nga mga Stake President, mga Bishop ug High Councilors, kamo nga mga Apostoles ug Unang Kapangulohan, ug kitang tanan—Barug! ug kita moadto ug mobuhat uban sa kasibot sa pagbuhat sa kabubut-on sa Dios dinhi sa yuta maingon nga kini gibuhat sa langit; tungod kay kon ugaling kana mahitabo, asa man kini magsugod, sa imong pagtuo, kon kini wala ba magsugod dinhi kanato? Ang Dios nagpaabut niini gikan kanato. Kita puno sa mga kahuyang ug mga pagkadili hingpit, matag usa kanato; apan kita buot nga makat-on sa pulong, sa kabubut-on, ug sa balaod sa Dios, ug nga mopahiuyon niana nga pulong ug kabubut-on ug balaod. Tuguti kana nga balaod nga mahisulat diha sa atong mga kasingkasing. Maninguha kita sa pagpalambo sa atong balaang mga tawag ug motahud sa atong Dios, ug ang Ginoo maoy moatiman sa nakulang. … Kita… mobutang sa atong pagsalig diha sa buhing Dios, ug mopadayon sa dalan nga maalamon, mabinantayon ug masinabtanon. Kita dili mohimaya sa atong mga kaugalingon, apan diha sa Ginoo sa mga Panon.⁹

Kita nagkinahanglan sa maabagon nga kamot sa Makakagahum samtang kita mag-alagad.

Ang panglantaw sa Dios dili sama sa tawo; ang iyang pagpangatarungan dili sama sa tawo. Bisan kon kita nakasabut og tipik lamang sa atong tinagsa nga mga katungdanan, kita dili makasabut unsaon sa pagpadagan sa simbahan sa Dios. Kini nagkinahanglan sa naandan nga orgnisasyon ug sa Espiritu nga maoy modumala pinaagi sa husto nga mga paagi.¹⁰

Kita naglihok sumala kabubut-on sa Makagagahum, uban sa mga apostoles ug mga propeta ug mga tawo sa Dios kinsa nagpuyo sa lainlaing mga panahon sa kalibutan, aron pagtuman sa mahinungdanong programa nga anaa sa hunahuna sa Dios kalabut sa tawhanong pamilya sa wala pa ang kalibutan, ug sigura dong mahitabo ingon nga ang Dios buhi. Atong gibati, sa susamang panahon, nga kita gilibutan sa mga kaluya, mga kahuyang, ug dili hingpit ug mga kahuyang sa tawhanong kinaiyahan, ug sa daghang mga higayon kita nasayop sa paghukom, ug kita sa kanunay nagkinahanglan sa maabagon nga kamot sa Makagagahum; sa paggiya ug pagdumala sa Iyang Balaang Espiritu, ug sa tambag sa iyang priesthood nga kita mahimong madala ug magpabilin diha sa dalan nga mopadulong sa kinabuhi nga dayon.¹¹

Kita moingon nga kita mga Santos sa Dios, busa kita mao. … Kita nagtuo ug motuo nga ang Dios nisulti, nga ang mga anghel mipakita ug nga ang Dios miabli og komunikasyon tali sa mga langit ug sa yuta. Kini kabahin sa atong pagtuo ug tinuohan. Kita nagtuo nga ang Dios mousab sa hingpit sa yuta, aron paghinlo niini gikan sa kadautan sa tanang matang ug sa pagpaila sa katarung sa tanang matang, hangtud nga ang mahinungdanon nga kaliboan sa hingpit mapaila. Kita nagtuo usab, nga ang Dios sanglit nagsugod na sa iyang buluhaton, siya magpadayon sa pagpadayag ug magpakita sa iyang kabubut-on ngadto sa iyang priesthood, ngadto sa iyang simbahan ug gingharian sa yuta, ug nga taliwala niining mao nga katawhan adunay mga pagpakita sa hiyas, sa kamaturoan, sa pagkabalaan, sa kaligdong, sa kamaunongon, sa kaalam ug sa kahibalo sa Dios.¹²

Akong gibati nga ako nalista alang sa gubat, ug kini mohangtud sa kapanahonan, ug sa tibuok kahangturan, ug kon ako sulugoon sa Dios, ako ubos sa direksyon niadtong mga sulugoon sa Dios, kinsa iyang gitudlo sa paggiya ug pagtambag kanako pinaagi sa pagpadayag gikan kaniya, ilang katungod ang pagdiktar ug pagkontrol kanako taliwala sa mga buluhaton niadtong mga kauban sa gingharian sa Dios; ug ako usab mibati nga ang tanan bisan kon kini espirituhanon o temporal, kalabut sa panahon, o sa kahangturan may kalabutan sa gingharian sa Dios. Ang pagbati sa ingon niana nakahimo og gamay ra kaayo nga kalainan ngari kanako kon unsay mga nanghitabo; dili kaayo mahinungdanon kon sila moagi niana nga dalan, kini nga dalan, o ang laing dalan, kon ang dalan ba lisud o sayon, kini molungtad lamang sa mubong panahon, ug ako molahutay lamang og mubong panahon; apan ang labing mahinungdanon kanako mao, kon unsaon sa pagpadayon sa akong pagtuo, ug magpabilin sa akong kaligdong, ug motahud sa akong balaang tawag, ug mosiguro niini, nga ako makit-an nga kasaligan diha sa kaulahian dili lamang niini nga kinabuhi, apan sa mga kalibutan nga walay katapusan; ug mopadayon sa pag-uswag sa tanang salabutan, kahibalo, pagtuo, paglahutay, gahum ug kahimayaan.¹³

Kita kinahanglan nga mopaluyo sa ubang mga sakop sa Simbahan sa ilang balaang mga tawag.

Ang tanang mga opisyal sa Simbahan unang gitawag pinaagi sa pagpadayag, o niadtong adunay awtoridad, sumala sa kinaiyahan sa kahimtang, ug dayon pagabutohan sa mga tawo nga ilang dumalahon. Ang matag tawo naghupot og gahum sumala sa iyang katungdanan nga iyang gihuptan; ug gipaabot nga ang tanang mga tawo nga hingtungdan gilauman nga motahud sa iyang hukom ug desisyon.¹⁴

Kita mopataas sa atong tuong kamot samtang moboto agi og timaan sa atubangan sa Dios nga kita mopaluyo niadtong kinsa atong gibotohan. Ug kon kita mobati nga kita dili makapaluyo kanila, kita kinahanglan dili mopataas sa atong mga kamot, tungod kay ang pagbuhat niini mao ang paghimo sa buhat sa mga tigpakaaron-ingnon.

Unsa ang gipasabot sa pagpaluyo sa usa ka tawo? Kita nakasabut ba niini? Kini yano kaayo nga butang alang kanako, ako wala mahibalo unsa kini alang kaninyo. Sama pananglit, kon ang usa ka tawo magtutudlo, ug ako moboto nga mopaluyo kaniya sa iyang katungdanan, kon siya mobisita kanako sa opisyal nga kapasidad ako moabiabi kaniya ug motagad kaniya uban sa pagsabut, kamaayo, ug respeto. Kon ako manginahanglan og tambag, ako mohangyo kaniya niini, ug ako mobuhat sa tanan kutob sa akong mahimo sa pagpaluyo kaniya. Kana mao ang husto ug usa ka baruganan sa pagkamatarung. Ako dili mosulti og bisan unsa nga makadaut sa iyang pagkatawo. Kon kana dili husto, ako kinahanglang magkat-on pa. Ug kon adunay bisag kinsa diha sa akong atubangan mohunghong og usa ka butang kalabut kaniya, nagtamay sa iyang reputasyon, ako moingon, tan-aw ngari! Ikaw ba usa ka Santos? Oo. Mipataas ka ba sa imong kamot aron pagpaluyo kaniya? Oo. Unya nganong dili kana nimo buhaton? Karon, akong tawgon kanang buhata nga usa ka pagpaluyo kaniya. Kon adunay bisan kinsa nga tawo nga mohimo og pag-atake sa iyang reputasyon—kay ang reputasyon sa tanang tawo mahinungdanon kanila—ako manalipod kaniya sa ingon niana nga paagi.

Kon kita moboto sa mga tawo diha sa ligdong paagi nga maoy atong ginabuhat, kita ba motuman sa atong mga pakigsaad? O kita ba mosupak niini? Kon kita mosupak niini, kita mahimong mga malapason sa pakigsaad. Atong gidaot ang atong pagtuo sa atubangan sa Dios ug sa atong mga kaigsoonan, kabahin sa mga lihok sa mga tawo nga atong gipakigsaaran.

Apan kon pananglit siya nakabuhat og usa ka butang nga sayop, pananglit siya makit-an nga namakak o nanikas, o nangilad og usa ka tawo, o nangawat o bisag unsa, o gani nahimong dili limpyo ang iyang mga binuhatan? Kamo ba mopaluyo gihapon kaniya? Kini akong katungdanan ang pagpakigsulti kaniya sama sa akong buhaton ni bisan kinsa, ug mosulti kaniya nga ako nakasabut nga ang mga nanghitabo ingon niana ug nga ubos niini nga kahimtang ako dili makapaluyo kaniya. Kon ako makahibalo nga ako gisultihan sa dili husto, ako mobakwi sa pasangil, apan kon dili, nianang higayona akong katungdanan ang pagtan-aw nga ang kaangayan mahatag ngadto kaniya, nga siya madala sa atubangan sa hustong hukmanan aron manubag sa mga butang nga iyang nabuhat; ug gawas niana ako walay katungod sa pagsulti kabahin niya.¹⁵

Pag-ampo alang niadtong gibutang sa Dios diha sa lainlaing nga katungdanan niini nga simbahan nga sila mahimong makabuhat sa ilang lainlaing mga katungdanan. Ang Ginoo mopaluyo sa iyang mga sulugoon ug mohatag kanila sa iyang Balaang Espiritu ug sa kahayag sa pagpadayag, kon sila mosiksik kaniya sa paagi nga iyang gitudlo, ug siya motultol kanila ug motultol kanimo sa dalan nga matarung. Kini mao ang paagi sa gingharian sa Dios, sumala sa akong pagsabut niini. … Ug atong responsibilidad ang pagkat-on niana nga paagi ug magmasulundon ngadto niini.¹⁶

Mga Sugyot alang sa Pagtuon ug Panaghisgutan

Kamo ba nakadawat og balaang tawag diin kamo gibati nga dili andam? Giunsa ninyo pag-atubang sa maong hagit? (Tan-awa usab sa 1 Nephi 17:50.) Sa unsang paagi nga kita makaandam sa atong mga kaugalingon sa pag-alagad sa Ginoo sa bisan unsang kapasidad?
Si Presidente Taylor mipasabut nga kitang tanan adunay mga katungdanan nga angay lihokon diha sa Simbahan. Ngano nga mahinungdanon alang sa matag usa kanato sa pag-alagad?
Sa unsang mga paagi nga ang inyong balaang mga tawag sa Simbahan nakahatag og kaayohan sa inyong kinabuhi? Sa unsang paagi nga kamo makaalagad sa mas hingpit nga paagi?
Sa unsang paagi nga kamo o ang inyong pamilya napanalanginan sa usa ka sakop sa Simbahan kinsa mipalambo sa iyang balaang tawag? Unsa nga mga pagbati ang miabut sa inyong kasingkasing alang niadtong kinsa makugihon nga mialagad kaninyo o sa inyong pamilya?
Unsa nga mga kasinatian ang inyong nasulayan diin ang Ginoo mitabang kaninyo samtang kamo nag-alagad? Unsa ang inyong buhaton aron makadawat kanunay sa Iyang paggiya nga samtang kamo mag-alagad? Ngano nga mahinungdanon, samtang kita nag-alagad, nga dili mohimaya sa atong mga kaugalingon, apan mohimaya sa Ginoo?
Sa unsang paagi nga kita madasigon nga makapaluyo sa uban sa ilang balaang mga tawag? Sa unsang paagi nga kini makapalig-on ang Simbahan kon kita mopakita sa atong suporta alang sa usag usa? Unsa ang atong mahimo sulod sa atong mga panimalay aron pagtabang sa atong mga pamilya sa pagpaluyo sa mga lider sa simbahan?

May Kalabutan nga mga Kasulatan: Mga Proverbio 3:5–6; Mosiah 2:17; D&P 4:2–7; 24:7; 64:33–34; 76:5

trees — Si Presidente Taylor mitandi sa atong tinagsa nga pagkasakop ug pag-alagad ngadto sa mga bahin sa kahoy, nagtudlo nga “ kita gibugkos aron maghiusa, gihiusa sa mga bugkos sa usa ka komon nga pakigsaad.

sustaining — “Kita mopataas sa atong tuong kamot kon magboto agi og timaan sa atubangan sa Dios nga kita mopaluyo alang niadtong kinsa atong gibotohan.”