Kapitulo 12

Ang Igpapahulay Usa ka Balaan nga Adlaw

Kita gisugo sa paghinumdom sa Adlaw nga Igpapahulay aron sa pagbalaan niini.¹

Gikan sa Kinabuhi ni John Taylor

Ingon sa gihisgutan sa miaging kapitulo, nagsugod niadtong hinapus sa Hunyo 1847, sila si Elder John Taylor ug Parley P. Pratt mipasiugda og usa ka pundok nga kapin sa 1,500 ka mga Santos gikan sa Winter Quarters ngadto sa Walog sa Salt Lake. Naghulagway sa sinugdanan niini nga panaw, si Elder B. H. Roberts misulat:

“Atrasado na niadtong panahona ang pagsugod sa maong panaw. Ulahi na kaayo alang kanila nga makapananom pa og mga lagutmon niadtong panahona, bisan og sila mihunong og sayosayo sa silangang tiilan sa Rocky Mountains. Sila gamay na lang kaayo og pagkaon nga nahibilin aron makapalungtad kanila og usa ka tuig ug tunga, ug kon ang ilang unang pananom mangamatay, ang kagutom mosunod gayud, kay sila anaa sa mga 1600-2400 ka mga kilometro gikan sa kinadul-an nga dapit diin adunay pagkaon makit-an. …

“Sila misakripisyo sa ilang tanan, lakip na sa ilang mga asawa ug mga anak, kinsa kinahanglan nga moapil sa ilang kalisud ug sa ilang panimpalad. Sila wala mahibalo sa ilang destinasyon, sila mirisgo sa tanan diha sa usa ka pamasin, diin wala gayuy kahigayunan sa pagbalik. Kon sila mapakyas sa pagpangita og usa ka angay nga lugar ug makapananom sa unang panahon, wala gayuy makahatud og pagkaon alang kanila, ni sila makakuha og pagkaon. Sila kinahanglan nga molampos, o mamatay diha sa kamingawan diin sila nagsugod sa ilang panaw.”

Bisan pa man niining makuyaw nga pagkabutang ug sa panginahanglan nga makaabut sa Walog sa Salt Lake sa dili pa magsugod ang tingtugnaw, ang pagpanaw gihunong matag Domingo alang sa pagbalaan sa adlaw nga Igpapahulay. Si Elder Roberts mipadayon, “Ang Domingo gibalaan isip usa ka adlaw sa pagpahulay, relihiyosong mga pagpangalagad gihimo sa matag kampo, ug ang kahilom sa dakong kamingawan sa kasadpan nabuak tungod sa panagkanta sa mga Santos sa mga awit sa Zion.” Sa 5 sa Oktubre 1847, ang mga panon sa karomata nila ni Taylor ug Pratt luwas nga miabot sa Walog sa Salt Lake ug gisugdan ang gikinahanglang mga pagpangandam alang sa tingtugnaw.²

Alang ni Presidente John Taylor, ang Igpapahulay usa ka adlaw sa pagsimba, pagpahulay, ug mahunahunaon nga paghinumdum. Siya miawhag sa mga Santos sa “paghimo sa adlaw nga Igpapahulay nga balaan, igahin kini nga adlaw sa pagpahulay, adlaw sa pagtigum aron pagbuhat sa inyong mga sakramento ug pagpaminaw ngadto sa mga pulong sa kinabuhi, ug dayon makitan nga nagtuman sa mga sugo, ug nagpakita og maayo nga panig- ingnan atubangan sa inyong mga anak.”³

Mga Pagtulun-an ni John Taylor

Ang Igpapahulay usa ka adlaw sa pagsimba sa Dios sa tibuok natong mga kasingkasing.

Ang atong pinakamaayo dili pa igo; kitang tanan mahimong mas maayo pa, ug makabuhat og mas maayo ug mas malingaw sa kinabuhi, nga madugangan pa ang Espiritu sa Ginoo sa atong kaugalingong mga panimalay ug sa atong kaugalingong mga kasingkasing, ug mobuhat og labaw pa aron sa pagpalambo sa kaayohan sa tanan kinsa atong maabut ug maimpluwensya. Ang pag-alagad sa Ginoo mao ang usa sa dako nga mga katuyoan sa atong pagkaania; ug akong gipasalamatan isip dako nga pribilihiyo ang higayon nga atong gikalipay ang pagsimba sa Dios sa adlaw nga Igpapahulay. Ug kon kita mag-abut aron sa pagsimba sa Dios, ako buot makakita kanato nga nagsimba kaniya sa tibuok natong mga kasingkasing. Ako nagtuo nga wala sa lugar niining maong mga okasyon ang pagpaminaw sa mga tawo nga mosulti bahin sa kalibutanong mga butang; kini mga panahon, labaw sa tanan tingali, diin ang atong mga pagbati ug mga paghigugma kinahanglan nga magpadayon sa pagpaduol ngadto sa Dios. Kon kita mag-awit og mga pagdayeg ngadto sa Dios, ato kining buhaton sa sakto nga espiritu; kon kita mag-ampo, himoa ang matag kalag nga magbuhat sa pag-ampo, magbuhat niini uban sa atong tibuok nga mga kasingkasing, nga pinaagi sa atong panaghiusa ang atong mga espiritu magkahiusa, nga ang atong mga pag-ampo ug ang atong pagsimba mahimong magamit sa Dios, kansang Espiritu molukop sa tanang mga butang, ug nga kanunay nga maanaa sa mga panagpundok sa maayo ug matinud- anon nga mga Santos.

Ako mosulti kaninyo unsa ang akong bation sa buntag sa Igpapahulay. Ako nakaamgo nga mao kini ang adlaw nga gigahin aron sa pagsimba sa Makagagahum nga Dios: niini nga adlaw ako kinahanglan nga magsimba sa Dios, ug ako kinahanglan nga mobantay sa akong pamilya ug makahibalo kon sila nagbuhat ba sa samang butang o wala. Kay kita gisugo sa pagbalaan sa adlaw nga Igpapahulay ug sa pagpahulay gikan sa atong mga kahago, ingon nga ang Dios mibuhat sa dihang Siya mibuhat sa yuta nga atong gipuy- an. Siya mihatag kanato og unom ka adlaw aron sa pagbuhat sa nagkalainlaing buluhaton ug mga katungdanan sa kinabuhi, ug kon kita [mosulay] sa pagbalaan sa Igpapahulay, ato kining buhaton nga madawat sa Dios atong Amahan, atong ipahinungod ang atong mga kaugalingon ngadto kaniya bisan, nianang adlawa lang, ug ibutang ang atong mga pagbati ug paghigugma nganha kaniya. Ug unya, ang mga Elder sa Israel sa tibuok yuta nagbuhat niining adlawa sa pagsulay sa pagtudlo sa mga baruganan sa kaluwasan, ug akong gibati nga buot mag-ampo alang kanila, ug usab alang sa atong mga misyonaryo kinsa nagsuroy taliwala sa mga Santos dinhi niini nga yuta, ug ingon man usab niadtong kinsa mamulong, ug usab moampo alang niadto kinsa nagmando sa mga pundok sa mga Santos dinhi niini nga yuta ug sa uban nga mga yuta, kay ingon nga kini adlaw man nga gigahin alang sa pagsimba sa Dios, ang tanang Israel bisan asa mahimong maanaa sa impluwensya ug paggiya sa Espiritu sa buhi nga Dios, ug nga kadtong kinsa mamulong (sa Simbahan) maanaa unta ubos sa balaang impluwensya sa Espiritu Santo, ug nga sila mopakigbahin sa nagkalainlaing mga katiguman sa mga pulong sa kinabuhing dayon.⁴

Ang Igpapahulay usa ka adlaw sa pagtudlo ug pagkat-on pinaagi sa Espiritu.

Maayo kaayo alang sa mga Santos nga magpundok aron magkahimamat sa usag usa, aron maminaw sa mga pulong sa kinabuhi, aron mamalandong usab sa ilang pagkabutang ug relasyon ngadto sa Dios, ngadto sa Iyang Simbahan ug Gingharian, ingon man usab sa pag-eksamen sa ilang kaugalingong mga pagbati, ug, ubos sa paggiya sa Ginoo ug sa Iyang Balaang Espiritu, maninguha sa pagpangita unsa nga relasyon ang ilang gihuptan uban sa ilang Langitnong Amahan, ug kon sila nagbuhat ba sa nagkalainlaing mga katungdanan nga gihatag kanila ug nagtinguha sa pagsangyaw sa pulong, sa kabubut-on, ug sa balaod sa Dios.⁵

Kon kita… magkatigum kita maglaum nga makadawat og giya ug mga panalangin gikan sa Dios, gikan kang kinsa, ang mga Kasulatan nagpahibalo kanato, “ang tanang maayong hatag ug ang tanang hingpit nga gasa;” ug Kaniya, kita usab gipahibalo, “walay pagkausab ni anino gumikan sa pagkabalhin.” [Tan-awa sa Santiago 1:17.] Sa atong mga panagtigum ang namulong ug ang naminaw kinahanglan nga anaa ubos sa giya ug pagdumala sa Ginoo, ang Tinubdan sa Kahayag. Sa tanang mga tawo ubos sa kalangitan kita, mga Santos sa Ulahing mga Adlaw, kanunay gayud nga nakasabot sa kamahinungdanon sa pagsalig sa Dios; kay ako nagtuo nga, bisan unsa pa ang salabutan nga gipaambit, bisan unsa pa ka nindot ang pakigpulong ug unsa ka makapabayaw ang mga ideya nga gipaambit, kini dili makaayo sa naminaw gawas kon sila anaa ubos sa paggiya ug inspirasyon sa espiritu sa Dios.⁶

Walay tawo nga buhi, ug walay pa gayuy tawo nga nabuhi, kinsa makatudlo sa mga butang sa Dios gawas kon siya natudloan, gisugo ug gigiyahan sa espiritu sa pagpadayag gikan sa Makagagahum. Ug unya walay mga katawhan sarang nga makadawat sa tinuod nga salabutan ug makahimo og sakto nga paghukom kabahin sa sagrado nga mga baruganan sa kinabuhing dayon, gawas kon sila anaa ubos sa impluwensya sa samang espiritu, ug busa ang mga tigpamulong ug mga tigpaminaw tanan anaa sa mga kamot sa Makagagahum.⁷

Kita managtigum, isip intelehenting mga binuhat, matinguhaon nga makasabot og usa ka butang sa atong kinabuhi sa wala pa dinhi sa yuta, sa atong kinabuhi karon, ug sa atong kaugmaon. Kita managtigum aron masayud kalabut sa atong Langitnong Amahan, kabahin sa iyang balaang pagdala sa tawhanong pamilya, kabahin sa iyang kaalam ug mga plano bahin kanato, ug kabahin sa tumong sa atong paglalang; ug aron masayud sa usa ka butang, kon posible, kabahin niana nga kalibutan nga atua sa layo lapas pa sa atong nahimutangan karon. Kini mao ang ubang mga butang tali sa daghan nga atong gitinguha nga mahibaloan, nga masabtan, nga makit-an, kon posible.⁸

Ako walay nasayran nga laing paagi diin kita matudloan, masugo, ug mapasabot sa atong tinuod nga kahimtang, kon dili pinaagi lamang sa pagpaubos sa impluwensya sa Espiritu sa buhi nga Dios. Ang usa ka tawo mahimong makapamulong pinaagi sa Espiritu sa Dios, apan kini nagkinahanglan usab og gamayng bahin sa Espiritu ngadto sa naminaw, aron sila mapasabot og sakto sa kamahinungdanon sa mga butang nga gihatag ngadto kanila, ug mao kana ang kalisud nga kanunayng nasinati sa Ginoo ug sa iyang mga santos sa pagpasabot sa mga tawo sa mga butang nga alang gayud sa ilang mga kaayohan. Kitang tanan naghunahuna nga kon kita matudloan sa Dios maayo unta kaayo. Ako nagtuo nga ang kalibutan sa kinatibuk-an modawat niini nga usa ka dako nga panalangin. Dayon ang pangutana motunga sa ilang mga hunahuna, kon ang mga pagtulun-an nga ilang nadawat gikan ba sa Dios o dili. Unsaon man nila pagkahibalo niana? Ako walay nahibaloan nga laing paagi kay sa nianang gisulti sa mga kasulatan, “Apan anaay usa ka espiritu diha sa tawo, ug ang inspirasyon sa Makagagahum nagahatag kanila og salabutan.” (Job 32:8) Ug, usab, kita gisultihan diha sa Bag-ong Tugon, nga “Walay bisan usa nga makasabut sa mga hunahuna sa Dios gawas sa Espiritu sa Dios.” [Tan-awa sa 1 Mga Taga-Corinto 2:11.] Tungod niini ang tanan nga kaalam, ang tanan nga kahibalo, ang tanan nga pangatarungan, ang tanan nga pilosopiya ug ang tanan nga panaglalis nga moabut sa tawhanong hunahuna nga walay hinungdan gawas kon ang hunahuna sa tawo andam sa pagdawat niini nga pagtulun-an—giandam pinaagi sa Espiritu sa Ginoo, ang sama nga Espiritu nga naghatag sa kahibalo.⁹

Kita moambit sa sakramento sa Igpapahulay agi og handumanan ni Jesukristo.

Ingon og ang pag-anhi sa Manluluwas sa kalibutan, ang iyang pag-antus, kamatayon, pagkabanhaw, ug pagsaka ngadto sa posisyon nga iya karon sa mahangturon nga kalibutan atubangan sa iyang Langitnong Amahan adunay dako nga kalabutan sa atong mga kaikag ug kalipay; ug tungod niini kini nagpadayon nga paghandom nga atong giambitan matag Domingo. Kini nga sakramento mao ang katumanan sa hangyo ni Jesukristo ngadto sa iyang mga tinun-an. “Kay sa matag kaon ninyo niining tinapay ug matag inom ninyo niining kopa, ginasangyaw ninyo ang kamatayon sa Ginoo hangtud sa iyang pag-anhi.” (1 Mga Taga-Corinto 11:26.) Ang hugot nga pagtuo niini nga ordinansa nagkinahanglan sa pagsabot nga kita adunay hugot nga pagtuo ni Jesukristo, nga siya lamang ang Bugtong Anak sa Amahan, nga siya nagagikan sa kalangitan paingon dinhi sa yuta aron sa pagpatuman sa usa ka piho nga katuyoan nga giplano sa Dios—bisan sa pagkab-ot og kaluwasan ug kahimayaan sa tawhanong pamilya. Kining tanan adunay dakong buhat sa atong kaayohan ug kalipay dinhi ug sa umaabot. Ang kamatayon ni Jesukristo wala unta mahitabo kon wala pa kinahanglana. Nga kini nga seremonya kinahanglan nga matukod aron magpabilin kana nga hitabo diha sa mga hunahuna sa iyang katawhan, nagpamatuod sa kamahinungdanon niini.¹⁰

Kita nagtigum aron moambit sa sakramento sa panihapon sa Ginoo, ug kita kinahanglan nga maninguha sa pagpalayo sa atong pagbati gikan sa mga butang nga kalibutanon. Kay sa pagambit sa sakramento kita wala lamang maghandom sa kamatayon ug mga pag-antus sa atong Ginoo ug Manluluwas nga si Jesukristo, apan kita usab nagpaabot sa panahon nga siya moanhi pag-usab ug sa panahon nga kita magkita ug mokaon og pan uban kaniya diha sa gingharian sa Dios [tan-awa sa Lucas 14:15; Mateo 26:29]. Kon kita nanagtigum, kita magpaabot nga makadawat og giya ug mga panalangin gikan sa Dios.¹¹

Ang karaang mga tawo sa Dios, kansang mga kasingkasing nahayagan sa kayo sa inspirasyon, naglantaw ngadto niana nga mahandumong panghitabo sa dihang ang Kordero nga gipatay sa wala pa gani matukod ang kalibutan mohatag sa iyang kaugalingon mismo isip usa ka sakripisyo, samtang kita naghandom sa sama nga butang. Kita mopikas og pan ug mokaon, og moinom atubangan sa usag usa matag Domingo, ug kita mobuhat niini agi og handumanan sa lawas ug dugo sa atong Ginoo ug Manluluwas nga si Jesukristo; ug kini atong padayunon sa pagbuhat hangtud siya mobalik pag-usab. Kon siya moanhi na, ang mga Santos sa Ulahing mga Adlaw naglaum nga mahiapil niadtong napili nga pundok sa mga katawhan nga mokaon ug moinom uban kaniya sa iyang kaugalingong lamesa sa gingharian sa atong Amahan. Ako naghulat niini sama sa akong paghulat sa akong panihapon karong gabii.¹²

Kita kinahanglan nga mag-amping nga kita dili moambit niining mga simbolo [sa sakramento] ngadto sa atong kaalautan. Makig-away ba ikaw sa imong mga kaigsoonan, o nagbuhat sa ingon nga paagi nga adunay bug-at nga mga pagbati (ngadto sa laing tawo), ug tingali nakasulti og sakit nga mga pulong ngadto sa lain, ug sa laing paagi nagbuhat og sayop, ug unya managtigum sa pagyagayaga atubangan sa Dios ug mokaon sa tunglo sa inyong mga kalag? Kita buot nga magbantay bahin niini nga mga butang; ug busa kita kinahanglan nga mosabut nga kon kita modala sa atong gasa ngadto sa altar, ug didto mahinumdom nga kita adunay kayugot sa atong igsoon, kita kinahanglan una nga moadto ug makig-uli kaniya ug unya mobalik ug mohalad sa atong gasa [tan-awa sa Mateo 5:23–24]. Dili moduol sa bisan unsang matang sa pagpakaaron-ingnon, apan moduol nga may limpyo nga mga kamot ug putli nga mga kasingkasing, ug mobati sa pag-ingon “O Dios hilinga ako ug sulayi ako ug probahi ako, ug kon adunay bisan unsa nga kadautan diri kanako, ipalayo kini, ug himoa ako nga imong tinuod nga tinugyanan sa yuta, ug himoa nga ako makaambit sa espiritu nga anaa kang Kristo, ug mopuyo nga malingawon niana dinhi sa yuta; nga kon siya moabut pag-usab ako, uban sa akong mga kaigsoonan, motagbo kaniya uban sa limpyo nga mga kamot ug putli nga mga kasingkasing.”¹³

Aron makadawat sa mga panalangin sa Dios, kita kinahanglan nga mobuhat og mas labaw pa kay sa yano lang nga pagtambong sa atong mga tigum ug pag-ambit sa sakramento.

Daghan kanato mosunod lang sa mga opinyon sa kalibutan. Ang kalibutan makahatag ba kanimo sa kahayag nga imong nadawat, ug sa ebanghelyo ug sa mga paglaum sa langit nga imong nadawat, ug sa priesthood nga imong nadawat? Ug imo ba kining ilisan sa usa ka panaksan nga lugaw, ug maglunang diha sa kahugaw, kamalimbungon, kadautan, ug yawan-on nga maoy nagpatigbabaw sa kalibutan? Unsa may katuyoan sa atong pag-anhi dinhi? Ang pagsimba sa Dios ug paghupot sa iyang mga sugo. Ug unsa man kini kamahinungdanon sa kadaghanan kanato? Kita nalimot, sa daghang mga higayon, sa mahimayaong paglaum sa atong balaang tawag, ug atong gitugutan ang mga binuang, mga kasaypanan, kahuyang ug kadautan, ug kita gidumala kapin kon kulang sa pagkamasinahon, kahubog, paglapas sa Igpapahulay, ug mga kadautan sa nagkalainlaing matang. Ako usahay makakita og mga Elder sa Israel nga nag-andam og daghang mga kahoy ug daghang mga kumpay sa adlaw sa Igpapahulay. Ngano, kini usa ka hilabihang pagpakaulaw sa mga mata sa Dios, sa balaang mga anghel, ug sa tanang ubang intelehente nga mga binuhat… Unsay imong hunahuna bakakon nga Elder, usa ka himalikas nga High Priest, malapason sa Igpapahulay nga Kapitoan, ug masinahon nga Santos? Ang mga kalag sa ingon nga mga tawo kinahanglan unta nga madasig sa kahayag sa pagpadayag, ug sila kinahanglan unta nga maoy buhi nga mga saksi, mga ehemplo sa tanang katawhan bahin sa matarung nga pagpuyo! Nagtuo ka ba nga ikaw makapuyo sa imong relihiyon, makaangkon sa Espiritu sa Dios ug makakab-ot og mahangturong kinabuhi, ug mosunod niini nga mga butang? Ako mosulti kanimo dili.¹⁴

Nabatasan na kini sa mga tawo sa kalibutan, ang pagpakigpulong panahon sa Domingo bahin sa espirituhanong mga butang, kon sila nagsul-ob na sa ilang pang-Domingo nga sinina ug diha sa tigum, ug unya sa pagka-Lunes puston ang ilang relihiyon uban sa ilang sinina nga pang-Domingo sulod sa ilang kaban, wala nay buhaton niini hangtud sa sunod Domingo. … O, ang kabuang sa tawo sa dili pagsangpit sa Dios sa tanang butang, sa pagpadaplin sa Dios ug sa iyang relihiyon, ug pagsalig sa ilang kaugalingong paghukom ug kahibalo.¹⁵

Adunay pay butang nga labaw pa kay sa atong gihunahuna usahay; ug kana mao, nga samtang kita nagpaila nga mga sumusunod sa Ginoo, samtang kita nagpaila nga nakadawat sa Ebanghelyo ug gidumala niini, ang usa ka propesyon walay hinungdan gawas kon kita nakalaba sa atong mga saput ug gipaputi kini pinaagi sa dugo sa Kordero. Kini dili lang igo alang kanato nga makig-usa sa Zion sa Dios, tungod kay ang Zion sa Dios kinahanglan nga maglangkob sa mga tawo nga may putli nga kasingkasing ug putli nga kinabuhi ug walay lama atubangan sa Dios, bisan lamang unta mao kana ang katapusang tumong. Wala pa kita diha, apan kita kinahanglan nga moabut diha sa dili pa kita mamahimong andam sa pagpanag-iya sa himaya ug kahimayaan; busa usa ka hulagway sa pagkadiosnon gamay ra og kahulugan kanato, kay siya kinsa nasayud sa kabubut-on sa agalon ug wala nagbuhat sa ingon mahiagum sa hilabihan nga pagbunal [tan-awa sa Lucas 12:47]. Kini mao nga “dili ang tanang magaingon kanako, ‘Ginoo, Ginoo,’ makasulod sa gingharian sa langit, kondili ang nagatuman sa kabubut-on sa akong Amahan nga anaa sa langit.” [Mateo 7:21.] Kini mga doktrina sa Ebanghelyo sumala sa akong pagsabot niini. Ug kini dili igo nga kita mogakos sa Ebanghelyo ug magkapundok dinhi sa yuta sa Zion ug magkauban sa mga katawhan sa Dios, motambong sa mga tigum ug moambit sa Sakramento sa panihapon sa Ginoo, ug maningkamot sa paglihok nga walay daghang kasamok; kay bisan pa sa tanan niini, kon ang atong mga kasingkasing dili matarung, kon kita mahugaw atubangan sa Dios, kon kita walay putli nga mga kasingkasing ug limpyo nga konsensya, mahadlokon sa Dios ug maghupot sa Iyang mga sugo, kita dili, gawas kon kita maghinulsol, moapil niining mga panalangin nga akong gipamulong, ug diin ang mga Propeta nagpamatuod.¹⁶

Kini atong katungod nga mahimong mga Santos. Ug mamahimong takus niana nga kinaiya atong katungdanan ang pagsunod sa mga baruganan sa hiyas, kamatuoran, kaligdong, kabalaan, kaputli, ug pasidungog nga kita sa kanunay makakuha sa pagtugot sa Makagagahum nga Dios; nga ang Iyang mga panalangin maania kanato ug magpuyo sa atong mga dughan; nga ang kalinaw sa Dios modangat sa atong mga balay ug mga yuta; … ug nga kita, isip usa ka katawhan, mahimong maanaa ubos sa Iyang balaang panalipod.¹⁷

Mga Sugyot alang sa Pagtuon ug Panaghisgutan

Unsa ang ubang mga panalangin nga atong masinati gikan sa matinud-anong pagsunod sa Igpapahulay? (Tan-awa usab sa D&P 59:9–13.) Sa unsang pagi nga ikaw personal nga gipanalanginan tungod sa pagbalaan sa adlaw nga Igpapahulay?
Unsa ang inyong buhaton aron mamahimong mahingpit ang inyong pagsimba sa Dios sa adlawng Igpapahulay? Unsaon inyong pag-andam ang inyong kaugalingon aron mamahimong labaw nga angay sa Espiritu Santo sa dili pa magsugod ang mga tigum sa Simbahan?
Unsa ang mahimo sa mga ginikanan ug mga apohan aron makaimpluwensya sa ilang mga anak ug mga apo sa pagbalaan sa Igpapahulay? Unsaon nato paghimo sa Igpapahulay nga lahi kay sa ubang mga adlaw alang sa atong mga pamilya? Sa unsang paagi nga ang pagsunod sa Igpapahulay makapalig-on sa pamilya ug makapanalipod kanato gikan sa kalibutan?
Ngano nga mahinungdanon man ang pagkat-on pinaagi sa Espiritu panahon sa atong adlawng Igpapahulay? Unsay inyong mabuhat sa imong papel isip magtutudlo o tinun-an sa pagdapit sa impluwensya sa Espiritu Santo sa adlawng Igpapahulay?
Unsa nga mga pakigsaad ang atong himoon sa atong pag-ambit sa sakramento? (Tan-awa usab sa Moroni 4–5 o D&P 20:76–79.) Unsay kalabutan niini nga mga pakigsaad ngadto sa pagpasabot sa atong mga pakigsaad sa pagbunyag? (Tanawa usab sa Mosiah 18:7–10.)
Ngano nga mahinungdanon man ang kanunay nga moambit sa sakramento? Unsa man ang inyong mahimo aron maduol ngadto sa Ginoo sa inyong pag-ambit sa sakramento?
Unsa man ang kalainan tali sa pagtambong lang sa mga tigum ug sa tinud-anay nga pagbalaan sa adlawng Igpapahulay? Unsaon ninyo nga magpabilin ang espiritu sa Igpapahulay uban kaninyo sulod sa semana?

May Kalabutan nga mga Kasulatan Exodu 20:8–11; Isaias 58:13–14; Mateo 12:10–13; 3 Nephi 18:1–12; D&P 27:1–14; 59:9–20

taking the sacrament — “Sa pag-ambit sa sakramento kita wala lamang maghandom, sa kamatayon ug mga pag-antus sa atong Ginoo ug Manluluwas nga si Jesukristo, apan kita usab [nagpaabut] sa panahon nga siya moanhi pag-usab.”

people outside church — Usa ka nag-unang hulagway sa Pinto Ward, St. George Utah Stake. Si Presidente Taylor mitudlo nga ang Igpapahulay mao ang usa ka panahon sa pagpahulay gikan sa atong mga buhat ug paglig-on sa atong relasyon uban sa Dios.