Kapitulo 14

Ang mga Responsibilidad ug Kapunongan sa Priesthood

Ang organisasyon sa simbahan … sumala sa mga baruganan nga gipadayag sa Dios .¹

Gikan sa Kinabuhi ni John Taylor

Si President Taylor hugot nga nagtuo sa kamahinungdanon sa kapunongan ug organisasyon sulod sa priesthood, nagtudlo nga ang priesthood “usa ka sumbanan sa mga butang sa kalangitan” ug mao ang paagi “diin ang mga panalangin sa Dios mokanap ngadto sa iyang katawhan dinhi sa yuta.”² Siya ang misugod sa paghimo og senemana nga mga miting sa priesthood sa mga ward, uban sa binulan nga mga tigum sa priesthood sa stake ug matag tulo ka bulan nga mga komperensya sa stake, aron pagawhag sa mga naghupot sa priesthood sa pagkat-on ug pagpatuman sa ilang mga katungdanan.

Sa pagkamatay ni Brigham Young niadtong Agosto 1877, ang Unang Kapangulohan giwagtang ug ang Korum sa Napulog Duha ka mga Apostoles, uban ni John Taylor isip ilang Presidente, nahimong tigdumalang pundok sa Simbahan. Bisan tuod og si President Taylor nasayud nga sa mao nga mga higayon ang Napulog Duha isip usa ka korum susama og awtoridad sa Unang Kapangulohan (tan-awa sa D&P 107:22–24), siya usab nasayud nga ang saktong kapunongan sa priesthood nalatid nga ang Simbahan pagadumalahon sa usa ka Presidente ug sa iyang duha ka mga magtatambag. Sa samang higayon, siya mapaubsanong naninguha sa pagbuhat lamang sa kabubut-on sa Ginoo ug dili magpahiluna sa iyang kaugalingon.

Kapin sa tulo ka tuig human sa kamatayon ni Brigham Young, ang Unang Kapangulohan naorganisar pag-usab. Sa 10 sa Oktubre 1880, si President John Taylor gipaluyohan isip Presidente sa Simbahan, uban ni George Q. Cannon ug Joseph F. Smith isip mga magtatambag. Namulong nianang adlaw sa pagpaluyo, si Presidente Taylor miingon: “Kon dili lang atong katungdanan ang pagsiguro nga ang simbahan maorganisar sa hingpit ug mahitsas sa tanan nga departamento niini, mas pilion unta nako nga magpadayon kauban sa mga kaigsoonan sa napulog duha, nagsulti niini isip kinaugalingon lamang nga pagbati. Apan adunay mga pangutana bahin niining mga butanga nga wala kitay katungod sa pagmandar kon unsay angay nga buhaton, o kon sa unsa nga paagi ang angay sundon. Sa dihang ang Dios mihatag kanatog kamandoan ug mitukod sa organisasyon sa iyang simbahan, uban sa nagkalainlaing korum sa priesthood ingon sa gipakita ngari kanato nga gipadayag pinaagi ni Propeta Joseph Smith, dili ako motuo nga bisan ang Unang kapangulohan, ang napulog duha, ang mga high priest, ang mga kapitoan, ang mga bishop, o bisan kinsa, adunay katungod sa pag-ilis o pag-usab niana nga plano diin gipaila ug gitukod sa Ginoo.”

Siya dayon miingon nga sukad sa pagkamatay ni Brigham Young, ang priesthood na-organisar, gawas sa Unang Kapangulohan ug nga kinahanglan kaayo nga ang korum sa Unang Kapangulohan, ingon man usab ang tanang ubang mga korum, molingkod sa katungdanan nga gihatag niini sa Makagagahum.

Si President Taylor mipadayon: “Kini mao ang mga sugyot sa Espiritu sa Ginoo ngari kanako. Ako mipadayag sa akong mga pagbati ngadto sa napulog duha, kinsa miuyon kanako, ug sa pagkatinuod, kadaghanan kanila adunay mga pagbati sama sa akong mga gibati. Dili kita ang magbuot, o dili gayud angay, nga ibase usa ka dapit, posisyon, o dungog, bisan og usa kini ka dakong dungog nga mahimong usa ka sulugoon sa Dios. Dungganon kaayo ang maghupot sa priesthood sa Dios. Apan samtang dungganon kaayo ang mahimong mga sulugoon sa Dios, ang paghupot sa iyang priesthood, dili dungganon alang ni bisan kinsang tawo o bisan kinsang pundok sa tawo ang magpangita og posisyon diha sa balaang priesthood. Si Jesus miingon, Ikaw wala nagtawag kanako, apan ako ang nagtawag kanimo [tan-awa sa Juan 15:16]. Ug sa akong naingon na kaniadto, kon akong giisip pa ang akong ka- ugalingong personal nga mga pagbati, ako unta moingon, maayo ra ang tanan, hapsay ra kaayo, ug mauyonon; ug ako adunay daghang maayong mga kaila kinsa akong gitahud ug giila, isip akong kaigsoonan, ug ako nagmaya sa ilang mga tambag. Pasagdi nga ang mga butang magpabilin sa ingon lang gihapon. Apan dili ako ang pagsulti, dili imo ang pag-ingon unsay atong gusto, apan kitang mga naghupot sa priesthood maoy motan-aw nga ang tanan nga mga organisasyon niana nga priesthood giampingan ug nga ang tanan sa simbahan ug sa gingharian sa Dios gi-organisar sumala sa plano nga gipadayag. Busa among gipili ang pamaagi diin kamo gihangyo nga motuman niini karon.”³

Mga Pagtulun-an ni John Taylor

Adunay duha ka mga priesthood, ginganlan og Melchizedek ug Aaronic.

Una.—Atong nakita nga adunay duha ka mga priesthood, nga ginganlan, ang Melchizedek ug Aaronic. … Ikaduha—Nga kining duha hinatag sa Ginoo; nga ang duha mahangturon, ug nangalagad karon ug sa kahangturan. Ikatulo—Nga ang Melchizedek Priesthood naghupot sa katungod sa kapangulohan, ug adunay gahum ug pagtugot ibabaw sa tanan nga mga buhatan diha sa simbahan, sa tanan nga kapanahonan sa kalibutan, sa pagtugyan sa mga espirituhanon nga mga butang. Ikaupat—Nga ang ikaduha nga priesthood gitawag og priesthood ni Aaron, tungod kay kini gitugyan ngadto ni Aaron ug sa iyang binhi sulod sa iyang tibuok nga mga kaliwatan. Ikalima—Nga ang ubos [o Aaronic] priesthood kadugtong sa labaw, o sa Melchizedek Priesthood ug adunay gahum sa pagpangalagad sa dayag nga mga ordinansa … Ikaunom—Nga adunay kapangulohan sa matag usa niining mga priesthood, ibabaw sa Melchizedek ug sa Aaronic.

Ikapito—Nga samtang ang gahum ug pagtugot sa labaw, o Melchizedek Priesthood, mao ang paghupot sa mga yawe sa tanan nga espirituhanon nga mga panalangin sa simbahan; aron makaangkon sa kahigayunan sa pagdawat sa mga misteryo sa gingharian sa langit, aron maabli ang kalangitan ngadto kanila, makahimamat sa kinatibuk-an nga pundok ug sa simbahan sa Unang Natawo, ug aron makasinati sa pakig-ambit ug sa pagtambong sa Dios nga Amahan, ug ni Jesus ang tigpataliwala sa bag-o nga pakigsaad, ug sa pagdumala sa tanan nga espirituhanon nga mga opisyal sa simbahan, gani ang kapangulohan sa halangdon nga priesthood, sunod sa kapunongan ni Melchizedek adunay katungod sa pagdumala sa tanan nga mga buhatan diha sa simbahan, sa espirituhanon ug temporal.

“Unya moabut ang Halangdong Priesthood, nga mao ang labaw sa tanan. Busa, gikinahanglan gayud nga adunay usa nga matudlo sa Halangdong Priesthood aron sa pagdumala ibabaw diha sa priesthood, ug siya pagatawgon nga Presidente sa Labaw nga Priesthood sa Simbahan; O, sa lain nga mga pulong, ang Tigdumala nga High Priest ibabaw sa Halangdong Priesthood sa Simbahan.” [D&P 107:64–66.]

Tataw kaayo nga kini nga priesthood nagdumala ibabaw sa tanang mga presidente, tanang mga bishop, lakip na sa nagdumala nga bishop; ibabaw sa tanang konseho, mga organisasyon, ug awtoridad sa tibuok Simbahan, sa tibuok kalibutan.

Nga ang bishopric mao ang kapangulohan sa Aaronic nga priesthood, nga mao ang sumpay sa labaw o Melchizedek priesthood [tan-awa sa D&P 107:14], ug nga walay tawo nga adunay legal nga katungod, sa paghupot sa mga yawe sa Aaronic priesthood, nga nagdumala ibabaw sa tanang mga bishop ug sa tanang ubos nga priesthood, gawas kon siya usa ka tinuod nga kaliwat ni Aaron. Apan, ingon nga usa ka high priest sa Melchizedek Priesthood may pagtugot sa pagdumala sa tanan nga ubos nga mga katungdanan, siya mahimo nga modumala sa buhatan sa usa ka bishop… kon gitawag, gigahin, ug giorden ngadto niini nga gahum pinaagi sa mga kamot sa kapangulohan sa Melchizedek priesthood, [Tan-awa sa D&P 107:17.]⁴

Kini nga labaw [o Melchizedek] priesthood, kita gisultian, naggunit sa katungod sa kapangulohan sa tanang kapanahonan sa kalibutan [tan-awa sa D&P 107:8]. Apan adunay kalainan tali sa kinatibuk- ang mga gahum sa priesthood, ug sa partikular nga katungdanan ug balaang tawag diin ang mga tawo gigahin. … Tungod ba ang usa ka tawo usa ka high priest, siya ba usa ka apostol? Dili. Tungod ba kay ang usa ka tawo usa ka high priest, siya ba ang presidente sa usa ka stake, o ang magtatambag ngadto sa presidente sa usa ka stake? Dili. Tungod ba kay siya usa ka high priest, siya ba usa ka bishop? Dili, dili sa bisan unsang paagi. Ug uban pa, sa tanang nagkalainlaing katungdanan. Ang labaw nga priesthood naghupot sa pagtugot sa pagpangalagad niadtong mga ordinansa, mga buhatan, ug mga dapit, kon sila gitawag pinaagi sa tinuod nga pagtugot, ug sa walay laing panahon; ug samtang sila gipaluyohan usab sa mga katawhan. … Kini dili tungod kay ang usa ka tawo naghupot og usa ka klase sa priesthood nga siya mangalagad sa tanang mga katungdanan niana nga priesthood. Siya mangalagad niini sa panahon lang nga siya gitawag ug gigahin alang niana nga katuyoan.⁵

Ang mga katungdnan sa buhatan sa Priesthood gihatag alang sa paghingpit sa mga Santos.

Ang Ginoo mibutang diha sa iyang simbahan og mga apostoles ug mga propeta, high priest, mga kapitoan, mga elder, ugbp. Alang sa unsa man? Alang sa paghingpit sa mga Santos. [Tan-awa sa Mga Taga-Efeso 4:11–12.] Kita bang tanan hingpit sa sugod? Dili. Kining nagkalainlaing mga opisyal gitawag alang sa paghingpit sa mga Santos. Sa unsa pa? Alang sa buhat sa pagpangalagad, aron ang mga tawo mamahimong kwalipikado ug mahibalo ug mapuno sa kahibalo, kaalam, ug kahayag, ug makat-on sa pagsangyaw sa mga baruganan sa mahangturong kamatuoran ug mokuha gikan sa panudlanan sa mga butang nga bag-o ug daan, mga butang nga giplano aron sa paghatag og kaayohan sa mga katawhan. Karon, dayon, kini nga mga buhatan nga gibutang sa simbahan, matag tawo angay nga respetohan sa iyang katungdanan.⁶

Ang Dios nakigsulti ngadto sa mga Santos sa Ulahing mga Adlaw sa mga baruganan nga ang mga tawo sa kalibutan ignorante, ug tungod kay ignorante niini sila wala mahibalo unsaon pagpasalamat sa atong mga pagbati. Sila nagtawag sa matarung nga dautan, sa kahayag nga kangitngit, sa sayop nga kamatuoran, ug sa kamatuoran nga sayop, tungod kay sila wala mahibalo sa kalainan tali sa usa ug sa lain. “Apan kamo maoy usa ka kaliwatan nga pinili, ang kahugpungan sa mga harianong sacerdote,” [tan-awa sa 1 Pedro 2:9] gikuha ug gigahin sa Makagagahum alang sa pagpatuman sa iyang mga katuyoan. Ang Dios miorden diha kaninyo og mga presidente, mga apostoles, mga propeta, high priest, mga kapitoan, mga bishop ug ubang mga awtoridad; sila iyang mga tinudlo, gihatagan og gahum ug iyang gidumala, ubos sa iyang impluwensya, nagtudlo sa iyang balaod, nagbutyag sa mga baruganan sa kinabuhi, ug giorganisar ug giorden aron mangulo sa mga katawhan sa agianan sa kahimayaan ug mahangturong himaya.⁷

O, kon kita makasabut lang sa himaya, sa dungog, sa gahum, sa kaharianon ug kagamhanan sa atong langitnong Amahan! Kon kita makapamalandong sa kahimayaan, sa himaya, sa kalipay nga naghulat sa matarung, ang putli ug ang mahiyason niadtong nahadlok sa Dios, bisan ang mga Santos sa Labing Halangdon! Kon kita makasabut lang sa dakong mga panalangin nga giandam sa Dios alang niadtong mga tawo nga mahadlok Kaniya ug motuman sa Iyang mga balaod ug mohupot sa Iyang mga sugo, lahi ra gayud kaayo ang atong bation sa atong gibuhat. Apan gani, kita wala nagbuhat niini. Ang Ginoo midala kanato gikan sa nagkalainlaing mga nasud, aron kita makat-on sa mga butang sa gingharian sa Dios. Iyang gitugyan sa Balaang Priesthood alang niana nga katuyoan. Ug ang mga organisasyon nga ania kanato, sa mga Stake ug mga Ward, uban sa ilang Kapangulohan ug mga Bishop, Halangdong mga Konseho, High Priest, mga Kapitoan, mga Elder, mga Priest, mga Teacher ug mga Deacon, ugbp, ug mibutang sa Simbahan pinaagi sa Makagagahum aron pag-edukar ug pagtuboy kanato.⁸

Kita na-organisar uban sa mga apostoles ug mga propeta: uban sa mga presidente ug sa ilang mga magtatambag, uban sa mga bishop ug sa ilang mga magtatambag, uban sa mga elder, mga priest, mga teacher ug mga deacon. Kita na-organisar sumala sa kapunongan sa Dios, ug kini nga mga baruganan nga ingon og gamay sa atong panan-aw nagagikan sa Dios. Kita adunay mga kapitoan ug high priest, ug kining tanang mga tawo naghupot og piho nga mga posisyon diin kini gilauman nga ilang buhaton ug palamboon, dinhi sa unod, alang sa ikaayo sa kamatuoran ug kamatarung; alang sa mga kaayohan sa gingharian sa Dios ug sa pagtukod sa sakto nga mga baruganan diha sa mga Santos sa labing Halangdon. Kita ania dinhi sa pagpakigbulig sa Dios sa kaluwasan sa buhi, sa pagtubos sa patay, sa pagpanalangin sa atong mga katigulangan, sa pagbu-bu og mga panalangin ngadto sa atong mga anak; kita ania alang sa katuyoan sa pagtubos ug pagbag-o sa kinabuhi sa kalag dinhi sa yuta alang niana nga katuyoan, aron ang mga tawo makat-on sa pagbuhat sa kabubut- on sa Dios dinhi sa yuta maingon sa langit. Mao kini ang katuyoan sa atong pagpakabuhi. Ug anaa ra kanato ang pagsabot sa kamahinungdanon sa atong mga tahas.⁹

Ang priesthood na-organisar sumala sa kapunongan sa Dios.

[Ang priesthood] usa ka kapunongan, ingon sa akong pagsabot niini, nga gipasiugdahan sa Makagagahum, ug pinaagi Kaniya lamang. Kini dili sa tawo, ni kini naggikan sa tawo; ug kay wala man kini naggikan sa tawo, ni kini makapadayon sa pag-uswag o mahingpit sa tawo nga walay paggiya sa Makagagahum. Bisan, sa tanan niining mga tabang, sa tanan niining tanang mga organisasyon, sa tanan niining mga baruganan, tungod sa kaluya ug mga kahuyang sa tawo, malisud alang kanato ang pagtipig sa kaputli niadtong sagrado nga mga institusyon nga gihatag sa Dios ngari kanato, ug kita kanunay nga nagkinahanglan sa labing dako nga pag-amuma, pagpaubos, paglimud sa kaugalingon, paglahutay, pagmabinantayon ug pagsalig sa Dios.¹⁰

Kon kita makadawat og bisan unsa nga katungdanan, o balaang tawag, o pagtugot, o bisan unsa nga gahum sa pagpahigayon sa bisan unsa nga mga ordinansa, kita nakadawat niana gikan sa kamot sa Dios, ug kita makabuhat lamang niini nga mga ordinansa sumala sa priesthood nga gitugot nga atong huptan. … Kon kita mobuhat sa atong mga katungdanan, matag usa kanato sa atong husto nga posisyon, ang Dios mohatag kanato og gahum aron mapatuman ang tumong nga anaa kanato, bisan unsa man kini, o unsa nga priesthood ang atong gihuptan, bisan pa man ang Presidente sa Simbahan, o ang Presidente sa stake, usa a Bishop, usa ka Halangdong Konseho, usa ka High Priest, usa ka Seventy, o usa ka Elder, Priest, Teacher o Deacon; bisan unsa kini, kon sila mobuhat sa mga katungdanan uban ang bug-os nga tinguha ngadto sa himaya sa Dios, siya mopaluyo kanila sa ilang mga buluhaton ug pangdumala.¹¹

Ikaw ug ako mahimong molapas sa atong mga pakigsaad; ikaw ug ako mahimong mobalewala sa mga baruganan sa Ebanghelyo ug molapas sa kapunungan sa Priesthood ug sa mga sugo sa Dios; apan diha sa mga panon sa Israel adunay kaliboan ug napulo ka kaliboan kinsa magmatinud-anon ngadto sa mga baruganan sa kamatuoran, ug ang Dios sa kalangitan, ang balaang mga anghel ug ang karaang Priesthood nga karon nagpuyo diin ang Dios nagpuyo ang tanan nagkahiusa alang sa pagpatuman niini nga katuyoan. Ang Ginoo mopasabwag sa Iyang mga katuyoan sa Iyang kaugalingong paagi ug sa Iyang kaugalingong panahon. Ug ingon nga na-organisar na, sumala sa akong nang gikaingon, dili kita makabuot sa pagbuhat sumala sa atong tagsa tagsa ka hunahuna, apan sumala sa gisulti sa Dios.

Kita adunay regular nga kapunongan sa Simbahan. Kamo mga kaigsoonan, kinsa naghupot sa balaang Priesthood, nakasabot ni- ini nga mga butang. Wala ba ang Dios maghatag og alamag sa Iyang Espiritu sa matag usa alang sa kaayohan sa tanan? Oo. Wala ba Siya magbuhat og mas daghan pa niini ngadto sa mga santos kinsa matinuoron ug matinud-anon? Wala ba Siya maghatag kanila sa gasa sa Espiritu Santo? Naghatag siya, ug sila nasayud niini ug nakadawat niini. Sila gidala ngadto sa panagdait sa usag usa, ug ngadto sa kaambitan sa Dios ug sa langitnong mga panon. Apan sa pag-angkon niini nga Espiritu nagkinahanglan ba kita sa uban aron mogiya kanato? Oo, sa tanang panahon. Ngano man? Tungod sa mga gahum sa kangitngit, sa impluwensya ni Satanas ug sa kahuyang sa tawhanong kinaiya. Kita nagkinahanglan og mga magbalantay sa mga tore sa Zion, kinsa maabtikon kaayo sa pagbantay sa mga tinguha sa Israel, ug sa pagtan-aw nga ang mga katawhan sa Dios dili mahisalaag. … Ang tanang mga opisyal nga gikinahanglan sa buhat sa pagpangalagad makit-an sa Simbahan, ug ang tanan na-organisar sumala sa kapunongan sa Dios.¹²

Ang priesthood kinahanglan nga ipahigayon sa pagkamabination, uban ang pagkamatinumanon sa Dios.

Kitang tanan kinahanglan nga adunay simpatiya sa usag usa, ug magmabination alang sa pinakaubos nga mga nilalang sa Dios, ug ilabi na sa mga Santos sa Dios, bisan unsa pa ang katungdanan nga ilang gihuptan. Kon adunay masayop, paninguha sa pagpatul-id kanila pinaagi sa kamabination; kon sila adunay dili maayo nga espiritu, ipakita kanila ang mas maayo; kon adunay wala magbuhat og maayo, pagbuhat og maayo sa imong kaugalingon ug moingon, “Dali, sunod kanako, ingon nga ako nagsunod kang Kristo.” Dili ba kana ang maayo nga buhaton? Ako nagtuo nga kini mao; mao kana ang akong pagsabot sa Ebanghelyo. Kita wala, bisan kinsa kanato, makahupot sa priesthood alang sa pagpauswag sa kaugalingon, o sa paggamit sa paglupig o pagpahimulos sa laing, o sa paggamit og dili angay nga sinultihan; apan kini gamiton sa tanang kamabination ug pagkamainantuson ug pagkamapailubon ug tiunay nga paghigugma. Ako mobasa gikan sa Doktrina ug mga Pakigsaad. …

“Tan-awa, adunay daghan nga gitawag, apan pila lamang ang gipili. Ug ngano nga wala sila magpili? Tungod kay ang ilang mga kasingkasing gipahimutang diha sa mga butang niini nga kalibutan, ug naninguha sa mga pasidungog sa mga tawo, nga sila wala makakat-on niining usa ka pagtulun-an—mao gayud ang akong gihisgutan—“Nga ang katungod sa priesthood dili mabulag gikan sa mga gahum sa langit, ug nga ang mga gahum sa langit dili madumala ni madala gawas lamang diha sa mga baruganan sa pagkamatarung.” Nagtuo ba ikaw nga ang Dios mohatag og gahum ngadto ni bisan kinsa aron lamang sa pagpatuman sa iyang kaugalingong may kinutuban o hinakog nga mga katuyoan? Ako moingon kanimo siya dili gayud, dili, dili. “Aron sila ikatugyan ngari kanato, tinuod kini; apan kon kita mosulay sa pagtabon sa atong mga sala, o sa pagtagbaw sa atong garbo, sa atong walay kapuslanan nga pangandoy, o sa paggamit sa gahum o kamandoan o pagpugos sa mga pagbati sa mga katawhan, bisan unsa nga matang sa pagkadili matarung, tan-awa, ang langit sa ilang mga kaugalingon mobiya; ang Espiritu sa Ginoo maguol; ug kon kini mobiya, Amen sa priesthood o sa pagtugot niana nga tawo.” [Tan-awa sa D&P 121:34–37.]

Kita usahay maghunahuna, nga kita nagbarug sa langitnong mga dapit ni Kristo Jesus; ug nga kita mao. Apan walay priesthood sa Anak sa Dios nga nagtugot sa usa ka tawo sa pagdaogdaog sa uban o paglapas sa mga katungod sa bisan unsang paagi. Wala kini; kini wala diha; ingon sa gikaingon na—“Tan-awa, sa dili pa siya masayud, siya gipasagdan ngadto sa iyang kaugalingon, sa pagpatid batok sa mga tunukon, sa pagpanggukod sa mga santos, ug pagpakig-away batok sa Dios.” [D&P 121:38.] ¹³

Walay pagtugot nga nahisama sa Balaang Priesthood gawas diha sa baruganan sa pagdani, ug walay tawo nga may katungod sa pagpasigarbo sa kaugalingon sa bisan unsa nga katungdanan nga iyang gidala dinhi niini nga Simbahan, tungod kay siya yano lang nga sulugoon sa Dios, ug ang sulugoon sa mga katawhan, ug kon adunay tawo nga mosulay sa paggamit og binuutbuot nga pagtugot ug mobuhat og bisan unsang matang sa pagkadili matarung ang Dios motan-aw niana nga tawo nga maoy manubag alang niana, ug kitang tanan pagahukman sumala sa mga binuhatan nga gihimo diha sa mortal nga lawas. Kita ania isip mga manluluwas sa mga katawhan, ug dili mga malupigon ug madaogdaogon. …

… Kini alang kanato kinsa naghupot sa Balaang Priesthood nga mahimong putli. “Panaghinlo kamo sa inyong kaugalingon, kamo nga nanagdala sa mga sudlanan ni Jehova.” [Tan-awa sa Isaias 52:11.] Kini alang sa matag usa kanato nga magmaputli, ug unya moingon ngadto sa uban, “sunod kanako, ingon nga ako nagsunod kang Jesus.” Kini alang kanato nga magpuyo sa atong relihiyon ug pagtuman sa mga balaod sa Dios, ug pagbuhat sa mga katungdanan nga ania kanato.¹⁴

Ako wala magtuo sa bisan unsang matang sa pagdaogdaog. Ako nagtuo sa pagkamainantuson, sa kalooy, sa pagkamabination, sa pagkamaaghop, ug sa paghigugma ug pagkahadlok sa Dios. Ako dili motuo nga ang Priesthood gihatag sa tawo aron sa paggamit sa gahum o kamandoan o pagpugos ug pagtugot sa mga kalag sa ubang mga tawo. Ang tanan angay nga buhaton uban sa pagkamabination ug kamainantuson, gani uban sa kamatinud- anon ngadto sa Dios.¹⁵

Mga Sugyot alang sa Pagtuon ug Panaghisgutan

Ngano nga mahinungdanon man nga adunay kapunongan sa priesthood? Sa unsa nga paagi nga kini nga kapunongan makaabag sa matag usa kanato aron maatiman ang mga panginahanglan niadtong kinsa kita adunay kapangakohan?
Ngano nga adunay nagkalainlaing katungdanan sa priesthood? (Tan-awa usab sa Mga Taga-Efeso 4:11–12.) Sa unsa nga paagi nga nakita ninyo ang nagkalainlaing katungdanan sa priesthood nakatabang sa “paghingpit sa mga Santos”?
Unsa nga mga kasinatian ang inyong naangkon diin ikaw napanalanginan tungod sa pagsunod sa tambag sa mga pangulo sa priesthood, bisan kon ikaw wala makasabot o miuyon sa tambag sa sinugdanan?
Sa paghisgot sa pagpangulo sama kang Kristo, si Presidente Taylor miawhag sa mga naghupot sa priesthood sa pagpuyo subay sa mga pulong “Dali, sunod kanako, ingon nga ako nagsunod kang Kristo.” Sa unsa nga paagi nga kini nga tambag makapanalangin sa atong relasyon sa atong mga pamilya ug sa uban? Sa unsa nga paagi nga ang pagtahud sa mga babaye makatabang sa mga lalaki sa pagtahud sa priesthood?
Ngano man nga ang garbo makapakunhod o makaguba sa gahum sa priesthood? Unsaon man nato pagpalambo sa kinaiya sa pagkamabination, pagkamainantuson, pagpugong sa kaugalingon ug tiunay nga paghigugma? Sa unsa nga mga paagi nga kita makapalambo niini nga mga kinaiya tali niadtong atong gialagaran sa Simbahan?
Sa unsa nga mga paagi ikaw makatabang sa mga naghupot sa AaronicPriesthood sa imong pamilya ug ward pag-andam alang sa kahigayunan sa paghupot sa Melchizedek Priesthood?

May Kalabutan nga mga Kasulatan: Mga Taga-Efeso 4:11–15; D&P 20:38–67; 84:18–32, 109–110; 107; 121:33–46

priesthood blessing — “Kon kita makadawat og bisan unsa nga katungdanan, o balaang tawag, o pagtugot, o bisan unsa nga gahum sa pagpahigayon sa bisan unsa sa mga ordinansa, kita nakadawat niana gikan sa kamot sa Dios.”

First Presidency 1887 — Ang Unang Kapangulohan sa Simbahan gikan sa 1880 ngadto sa 1887: si Presidente John Taylor (tunga) ug ang iyang mga magtatambag, si George Q. Cannon (wala) ug si Joseph F. Smith (tuo).