Kapitulo 9

Si Joseph Smith, ang Propeta sa Pagpahiuli

Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo niini.¹

Gikan sa Kinabuhi ni John Taylor

Niadtong Marso 1837, si John Taylor miadto sa Kirtland, Ohio, ug nakahigayon sa pagpakigtagbo ni Propeta Joseph Smith sa unang higayon ug nakat-on og labaw pa mahitungod sa mga baruganan sa bag-o pa lamang nga gipahiuli nga ebanghelyo. Sa panahon sa pagbisita ni John Taylor sa Kirtland, daghan ang mga sakop sa Simbahan ang wala mouyon ni Propeta Joseph. Bisan ang pipila ka mga sakop sa Korum sa Napulog Duha miapil niining masupakon nga espiritu, lakip ni Parley P. Pratt, kinsa sa sinugdanan mitudlo ni John Taylor sa ebanghelyo. Sa diha nga si Elder Pratt miduol kaniya ug mipakigbahin sa iyang mga pagduda mahitungod sa Propeta, si Brother Taylor mitubag:

“Ako nakalitan sa pagkadungog kanimo nga nagsulti sa ingon, Brother Parley. Sa wala pa ikaw mobiya sa Canada ikaw mihatag og lig-on nga pagpamatuod mahitungod ni Joseph Smith nga usa ka Propeta sa Dios, ug sa kamatuoran sa buhat nga iyang gipasiugdahan; ug ikaw miingon nga ikaw nasayud niini nga mga butang pinaagi sa pagpadayag, ug sa gasa sa Espiritu Santo. Ikaw mihatag kanako og usa ka higpit nga panudlo nga nagsulti nga bisan ikaw o usa ka anghel gikan sa langit magpahayag og lain nga mga butang dili ako motuo niini. Karon Brother Parley, dili tawo ang akong gisunod apan ang Ginoo. Ang mga baruganan nga imong gitudlo kanako midala kanako ngadto Kaniya, ug ako karon adunay sama nga pagpamatuod nga diha kanimo nianang higayona. Kon ang buhat tinuod unom ka mga bulan kaniadto, tinuod kini karon; kon si Joseph Smith usa ka propeta kaniadto, siya propeta karon.”² Tungod sa pasalig ni Elder Pratt, siya wala madugay naghinulsol sa iyang mga gibati batok kang Propeta Joseph Smith ug mipadayon nga usa ka maisug nga sulugoon sa Ginoo.

Si John Taylor nagpabilin nga maunungon ngadto kang Propeta Joseph Smith gikan sa adlaw nga iya siyang gikahimamat, ug sila nanag-uban sa diha nga ang Propeta gimartir. Sa pakigpulong nga gihatag hapit 20 ka mga tuig human sa kamatayon ni Propeta Joseph, si Elder Taylor miingon, “Bisan walay lain nga tawo ubos sa mga langit nga nahibalo nga si Joseph usa ka propeta sa Dios ako nahibalo, ug ako mohatag sa pagpamatuod niini ngadto sa Dios, mga anghel ug mga tawo.”³ Sa tibuok pangalagad ni Elder Taylor, siya nakakita og hingpit nga kalipay sa pagtudlo nga “Ang Dios mipahiuli sa iyang karaan nga Ebanghelyo ngadto ni Joseph Smith, naghatag kaniya og pagpadayag, nag-abli sa mga langit ngadto kaniya, ug naghimo kaniya nga sinati sa iyang plano sa kaluwasan ug kahimayaan sa mga anak sa mga tawo.”⁴

Mga Pagtulun-an ni John Taylor

Si Joseph Smith gi-orden nang daan nga mahimong propeta sa Pagpahiuli.

Walay nakalahi ni [Joseph Smith], siya usa ka tawo nga sama sa kasagaran kanato. Apan ang Ginoo, alang sa piho nga mga katuyoan sa iyang kaugalingon, sa akong pagtuo, mipili kaniya aron mahimo nga iyang tigpama-ba ngadto sa mga nasud niini nga mga katuigan sa kalibutan. Tingali si Joseph, ingon man usab sa daghan pa nga uban, gigahin sa usa ka piho nga katungdanan sa wala pa ang kalibutan. Si Kristo mao ang Kordero nga gipatay sa wala pa ang katukuran sa kalibutan. Si Abraham gigahin ngadto sa iyang katungdanan, ug daghan pa nga uban sa sama nga paagi; ug si Joseph Smith miabut aron sa paghimo sa iyang buhat.⁵

Kitang tanan miila kang Joseph Smith ingon nga propeta sa Dios. Ang Dios mitawag kaniya sa pagkupot sa katungdanan nga iyang gihuptan. Unsa kadto ka dugay? Mga kaliboan ka mga tuig nga milabay sa wala pa kining kalibutan maporma. Ang mga propeta nanagna mahitungod sa iyang pag-abut, nga usa ka tawo matawo kansang ngalan kinahanglan nga Joseph, ug nga ang ngalan sa iyang amahan kinahanglan nga Joseph, ug usab kinahanglan nga siya usa ka kaliwat niana nga Joseph kinsa gibaligya ngadto sa Ehipto. Kini nga panagna inyong makita nga natala diha sa Basahon ni Mormon [tan-awa sa 2 Nephi 3:15]. Siya adunay mahinungdanon kaayo ug bililhon nga mga saad nga gihimo kaniya sa Ginoo.⁶

Ang Ginoo mipahiuli sa kahingpitan sa Iyang ebanghelyo pinaagi ni Propeta Joseph Smith.

Unsay kahimtang sa kalibutan sa wala pa itudlo ang ebanghelyo nga atong gisangyaw karon?… Asa kita makakita og bisan unsa nga butang nga sama niana nga gitudlo ni Jesus? Walay dapit diha sa ibabaw sa lapad nga yuta. Mga apostoles, mga propeta, mga pastor, mga magtutudlo ugbp., dili makita bisan diin. Nahibalo ba ako niini? Ako nahibalo niini, kay ako nagpuyo diha sa kalibutan niana nga panahon! Ako nahibalo kon unsa ang nanghitabo. Ako nalakip uban sa ilang mga magtutudlo ug nakasinati pag-ayo sa nagkalainlaing mga katilingban ug mga kapunongan. Diha ba kanila ang ebanghelyo ingon sa nahisulat diha sa mga kasulatan? Wala.⁷

Wala ako makahibalo nga kinahanglan nga mabunyagan alang sa kapasayloan sa mga sala hangtud nga ang ebanghelyo mitudlo niini kanako, gani ako nasayud sa Biblia gikan sa A ngadto sa Z. Ako makabasa og daghang mahinungdanon nga mga butang diha sa mga panagna, ug makahimo og mga pagbanabana mahitungod sa melinyum ug sa pagpundok sa Israel, apan wala masayud sa unang mga baruganan sa ebanghelyo ni Kristo; ug walay usa ka tawo dinhi nga nasayud niini. Ako nakabiyahi sa daghang mga dapit sa kalibutan ug wala gayud makasugat og usa ka pari, o batid sa syensya nga tawo nga nasayud sa unang mga baruganan sa ebanghelyo ni Kristo sa bisan diin nga nasud.

Unsa ang mahimo sa Ginoo sa ingon nga pundok sa ignorante nga mga buang nga ingon kanamo? Dihay usa ka tawo nga adunay gamay kaayo nga salabutan ug usa ka gamay nga pagtuo sa mga saad sa Dios, ug mao kana si Joseph Smith usa ka wala kaayoy hibangkaagan nga tawo. Siya mituo sa usa ka piho nga bahin sa Kasulatan nga nag-ingon“Ug kon aduna man kaninyoy nakulangan og kaalam, papangayoa siya sa Dios nga nagapanghatag ngadto sa tanang mga tawo sa madagayaon gayud ug sa walay pagpamoyboy.” [Tan-awa sa Santiago 1:5.] Siya adunay igo nga kabuang diha sa mata sa kalibutan, ug adunay igo nga kaalam diha sa mata sa Dios ug mga anghel, ug sa matuod nga mga salabutan, sa pagsulod sa tago nga dapit aron sa pagpangayo sa Dios alang sa kaalam, nagtuo nga ang Dios maminaw kaniya. Ang Ginoo nakadungog gayud kaniya, ug misulti kaniya kon unsa ang buhaton.⁸

Usa ka mensahe ang gipahayag kanato ni Joseph Smith ang Propeta, isip pagpadayag gikan sa Dios diin siya mipahayag nga balaang mga anghel nagpakita kaniya ug mipadayag sa walay katapusan nga Ebanghelyo ingon nga kini diha sa nangagi nga mga katuigan; ug nga ang Dios nga Amahan ug Dios nga Anak mipakita usab kaniya: ang Amahan nga nagtudlo ngadto sa Anak miingon, “Kini mao ang Akong Hinigugmang Anak, Paminaw Kaniya.” [Tan-awa sa Joseph SmithKasaysayan 1:17.] Si Moroni, usa ka propeta nga nakapuyo niini nga yuta, mipadayag ngadto kaniya sa mga palid nga naglangkub sa Basahon ni Mormon, ug pinaagi sa gasa ug gahum sa Dios si Joseph nakahimo sa paghubad niini ngadto sa unsa ang naila nga Basahon ni Mormon. …

…Ang Amahan nga nakapaila sa Iyang Anak ngadto ni Joseph Smith, ug misugo kaniya sa pagpaminaw Kaniya, si Joseph masulundon ngadto sa langitnong tawag, ug naminaw sa nagkalainlain nga mga panagsinultihay nga gihimo sa mga tawo nga naghupot sa Balaan nga Priesthood diha sa nagkalainlain nga mga katuigan ubos sa pagdumala sa Bugtong Anak. Siya ug si Oliver Cowdery gisugo sa pagbunyag sa usag usa, nga ilang gihimo. Si Juan Bautista miabut ug mitugyan diha kanila sa Aaronic Priesthood. Dayon si Pedro, Santiago ug Juan, diin kinsa gitugyan sa panahon sa Manluluwas, ang mga yawe sa Melchizedek Priesthood miabut ug gitugyan ang Melchizedek Prieshood diha kanila. Dayon si Adan, Noe, Abraham, Moises, Elijah, Elias ug daghang mga nag-una nga mga tawo nga gihisgutan diha sa mga Kasulatan, kinsa mialagad diha sa nagkalainlaing mga dispensasyon, miabut ug mitugyan diha ni Joseph sa nagkalainlain nga mga yawe, mga gahum, mga katungod, mga kahigayunan ug mga panalipod nga ilang gipahimuslan sa ilang mga panahon.

Pag-usab, si Joseph gisugo sa pagsangyaw niini nga Ebanghelyo ug sa paghatag niini nga pagpamatuod ngadto sa kalibutan. Siya gitudloan sa sama nga mga baruganan nga gitudlo ngadto ni Adan, ang sama nga mga baruganan nga gitudlo ngadto ni Noe, ni Enoch, ni Abraham, ni Moises, ngadto sa mga Propeta, ug ngadto ni Elijah: ang sama nga mga baruganan nga gitudlo ni Jesukristo ug sa mga Apostoles sa nangagi nga mga panahon…, giubanan sa sama nga Priesthood ug sa sama nga kapunongan, lamang labaw pa ka hingpit, tungod kay ang karon nga dispensasyon mao ang gilangkuban sa nagkalainlain nga mga dispensasyon nga diha sa nagkalainlain nga mga katuigan sa kalibutan, ug nga ginganlan diha sa mga Kasulatan isip ang dispensasyon sa kahingpitan sa mga panahon, diin ang Dios mopundok sa tanang mga butang ngadto sa usa ka pundok, bisan kon kini mga butang man sa langit o mga butang sa yuta. Busa, bisan unsa nga kahibalo, sa salabutan, og Priesthood, sa mga gahum, sa mga pagpadayag ang gitugyan ngadto niadtong mga tawo sa nagkalainlain nga mga katuigan, gipahiuli pag-usab ngadto sa yuta pinaagi sa pangalagad ug pinaagi sa paninguha niadtong kinsa naghupot sa balaan nga Priesthood sa Dios diha sa nagkalainlaing mga dispensasyon diin sila nagpuyo.⁹

Si Joseph Smith gitudloan sa Ginoo.

Kinsa si Joseph Smith? Walay edukasyon nga batan-on. Makahimo ba siya og bisan unsa nga butang aron sa pagtuman [sa pagtukod sa gingharian sa Dios]? Dili gawas kon ang Dios mipadayag niini ngadto kaniya. Siya nangayo og kaalam sa Dios ug nakadawat niini. Sukad niana nga panahon siya walay labaw nga kasayuran mahitungod niini nga mga butang kay kaninyo o kanako. Ang Dios ug ang Dios lamang ang mihimo niini nga mga butang. “Gipili sa Dios ang timawa ug tinamay ning kalibutan, bisan ang mga butang nga wala magalungtad, aron sa pagwagtang sa mga butang nga nagalungtad, aron sa ingon niana walay tawo nga makapasigarbo diha sa atubangan sa Dios.” [Tan-awa sa 1 Mga Taga-Corinto 1:28-29.] Siya mikuha kang Joseph. Ngano? Tungod kay ang panahon miabut na sa pagsugod sa usa ka buhat, diin ang tanan nga naghupot sa balaan nga Priesthood sa Dios nga nakapuyo sa nangaging mga katuigan nalakip. Si Joseph mao ang pinasidunggan nga himan nga gipili aron sa pagsugod sa buhat sa pagpahiuli sa ebanghelyo.¹⁰

Si Joseph Smith dili edukado nga tawo. Siya wala maedukar sa diha nga siya gamay pa nga bata. Siya gipadako didto sa Berde nga mga Kabukiran sa Vermont, ug wala siyay bisan unsa nga mga kahigayunan sa atong gitawag nga edukasyon. Ang Ginoo midala kaniya ngadto sa Iyang tulunghaan, ug Siya mitudlo kaniya sa mga butang nga akong nakit-an nga nakalibug sa daghang maalamong mga syentipiko, mga taas kaayo og kahibalo, ug sa labing maalamong mga tawo nga akong gikahimamat niini nga kalibutan. Ngano? Tungod kay siya gitudloan sa Dios. Unsa ang gipasabut niadto nga mga baruganan? Sa yuta nga atong gipuy-an; ngadto sa sukaranan nga mga elemento diin kini naglangkub; sa mga langit ibabaw kanato; sa mga Dios nga atua sa mahangturong mga kalibutan; sa mga baruganan diin ang yuta gitukod, gipatunhay, gihuptan ug gidumala, ug ang relasyon niini ngadto sa ubang mga planeta ug mga sistema; ug sa paghisgot og mga pangagamhanan, mga balaod ug mga baruganan, siya nagbaton og labaw pa nga salabutan kay sa nubyenta nuebe ka porsyento sa mga katawhan karong adlaw. Ug siya nagtinguha sa pagtudlo sa uban.¹¹

Si Joseph Smith usa ka dungganan ug mahiyason nga tawo kinsa gigukod tungod sa mga baruganan nga iyang gitudlo.

Ako nakasinati ni Joseph Smith sa daghang mga katuigan. Ako nagbiyahe uban kaniya; ako uban kaniya sa pribado ug sa publiko; ako nakig-uban kaniya diha sa mga konseho sa tanang mga matang; ako nakapaminaw og gatusan ka mga higayon sa iyang mga pagtudlo sa publiko, ug sa iyang tambag ngadto sa iyang mga higala ug mga kauban sa ka pribado kaayo nga kahimtang. Ako didto sa iyang balay ug nakakita sa iyang gawi ngadto sa iyang pamilya. Ako nakakita kaniya nga gihusay sa atubangan sa mga hukmanan sa iyang nasud, ug nakakita kaniya nga dungganong naabswelto, ug naluwas gikan sa makadaot nga huyop sa pagpakaulaw, ug sa mga pagkunsabo ug mga pamakak sa makasasala ug dautan nga mga tawo. Ako uban kaniya nga nagpakabuhi, ug uban kaniya sa diha nga siya namatay, sa diha nga siya gipatay didto sa bilanggoan sa Carthage sa mabangis nga manggugubot nga panon. …

Ako nakakita kaniya, kaniadto, ubos niining nagkalainlaing mga kahimtang, ug ako mopamatuod sa atubangan sa Dios, sa mga anghel, ug sa mga tawo, nga siya usa ka maayo, dungganan, mahiyason nga tawo nga ang iyang mga doktrina maayo, subay sa kasulatan ug makaayo nga ang iyang mga lagda talagsaon aron mahimong usa ka tawo sa Dios nga ang iyang kinaiya sa pribado ug sa publiko dili masaway ug siya nabuhi ug namatay isip usa tawo sa Dios ug usa ka buotan nga tawo. Kini akong pagpamatuod. Kon kini lalison, padalhi ako og usa ka tawo nga gitugotan sa pagtala og affidavit, ug ako mobuhat og usa ngadto niini nga katuyoan. Busa ako magpamatuod sa mga butang nga akong nasayran ug sa mga butang nga akong nakita.¹²

Sa dihang ako naghunahuna mahitungod sa kamatuoran nga ang atong dungganan nga pangulo, ang Propeta sa buhi nga Dios, namatay, ug nga ako nakakita sa iyang igsoong lalaki sa diha nga siya patay na, ingon og adunay dako nga kahaw-ang sa kalibutan alang kanako, ug usa ka mangiub awaaw nga kahaw-ang nga gibilin sa gingharian, ug nga kita nabiyaan nga nag-inusara. O, unsa ka mamingawon kana nga pagbati! Unsa ka tugnaw, dili mapuslanon, ug biniyaan! Taliwala sa mga kalisdanan sa kanunay siya ang una nga mobuhat; diha sa mahinungdanon nga mga kahimtang ang iyang tambag sa kanunay gipangita. Isip atong propeta siya nangamuyo ngadto sa Dios, ug nakaangkon alang kanato sa iyang kabubut-on; apan karon ang atong propeta, atong magtatambag, atong heneral, atong pangulo, wala na, ug taliwala sa mga kalisdanan nga atong pagasagubangon, kita gibiyaan nga wala ang iyang panabang, ug isip atong umaabut nga giya alang sa mga butang nga espirituhanon o temporal, ug sa tanang mga butang nga kabahin niini nga kalibutan, o sa sunod, siya misulti sa katapusang higayon dinhi sa yuta.

Kini nga mga panghunahuna ug sa ubang liboan pa misantop diha sa akong hunahuna. Ako naghunahuna, ngano nga kinahanglan gayud ang mga dungganan nga tawo sa Dios, ang asin sa yuta, ang labing nahimaya sa tawhanong pamilya, ug ang labing hingpit nga mga panig-ingnan sa tanan nga pagkamaayo, nahimong biktima sa mabangis, linuog nga kayugot sa yawan-on nga mga tawo?¹³

Si Joseph Smith usa ka mahiyason, halangdon, og panghunahuna, dungganon nga tawo, usa ka buotan nga tawo ug usa ka Kristiyano. Apan siya mipaila sa mga baruganan nga misupak sa labing sukaran nga bahin sa mga sistema sa pagkadautan sa mga tawo. Ang baruganan nga iyang gipaila adunay epekto sa ilang gihunahuna nang daan nga mga pagsupak, ug mga kalihokan; ug kay sila dili makalumpag sa iyang mga baruganan, sila misaway sa iyang pagkatawo. Ug kana mao ang usa ka katarungan ngano nga daghan kaayo kita og mga libro nga gisulat batok sa iyang pagkatawo, sa walay pagtandog sa iyang mga baruganan, ug usab ngano nga kita nakaangkon og daghan kaayo nga pagbatok. Apan ang kamatuoran, mahangturon nga kamatuoran, dili matarug. Kini dili mapukan, apan sama sa trono ni Jehova, kini molahutay sa tanang mga panaway sa mga tawo, ug mabuhi sa kahangturan.¹⁴

Ang pagkamartir ni Propeta Joseph dili makahunong sa paglambo sa gingharian sa Dios.

Ako nakahinumdom pag-ayo sa diha nga si Joseph Smith namatay…. Apan kini nga mga butang mga hitabo nga, bisan og mahinungdanon kaayo alang kanato, apan mahitungod niana nga kini walay dako kaayo nga kalabutan sa pagtukod sa Simbahan ug gingharian sa Dios dinhi sa yuta, ug sa Iyang buhat nga gihimo natong tanan.

Sa diha nga ang Ginoo mipadayag sa walay katapusan nga Ebanghelyo ngadto ni Joseph Smith, siya mipakita ngadto kaniya sa iyang mga katuyoan ug mga plano sa kalibutan atong gipuyan, ug mihatag ngadto kaniya og kahibalo sa iyang balaod ug sa mga ordinansa sa Ebanghelyo ug sa doktrina niini. Kini dili alang lamang sa katuyoan sa paghimo kaniya nga superyor isip usa ka tawo, apan kini gihimo alang sa kaayohan sa katilingban, sa kaayohan sa kalibutan, ug sa kaayohan sa mga buhi ug sa mga patay, sumala sa mga balaod ug mga plano ni Jehova nga iyang gihanay sa wala pa mabuhat ang kalibutan, o ang tanang mga anak sa Dios nagkaduyog pagsinggit sa kalipay.

Ang Ginoo mihimo sa iyang mga plano kabahin sa yuta ug sa mga lumulupyo niini, ug niining katapusang mga adlaw siya nakakita nga angay na aron sa pagpadayag ug pagpahiuli, pinaagi sa iyang sulugoon nga si Joseph Smith, nga gitawag nato nga ang bag-o ug walay katapusan nga Ebanghelyo; bag-o ngadto sa kalibutan sa pagkakaron, tungod sa ilang mga tradisyon, sa ilang mga kabuang ug mga kahuyang, ug sa ilang mga tinuohan, mga hunahuna ug mga panan-aw, apan walay katapusan tungod kay kini anaa uban sa Dios, ug tungod kay diha kini uban kaniya sa wala pa ang kalibutan, ug magpadayon bisan human sa daghang mga kausaban niini nga yuta, ug kon ang yuta matubos ug ang tanang mga butang nahimong bag-o, ug samtang ang kinabuhi ug hunahuna ug ang pagka-anaa magpadayon, ug ang pagkaimortal molahutay.

Busa, bisan kon ang Ebanghelyo bag-o pa sa kalibutan, kini walay katapusan. Ug kini gipaila, ingon sa akong gipamulong, alang sa kaayohan sa mga katawhan sa atong mga amahan, sa karaan nga mga Propeta ug mga Apostoles, ug sa mga tawo sa Dios kinsa nakapuyo diha sa nagkalainlaing mga katuigan sa kalibutan, kinsa nangalagad diha sa balaan nga Priesthood samtang sila nagpuyo dinhi sa yuta, ug karon kinsa nangalagad sa mga kalangitan, ug kinsa nakatabang sa pagpaila niini nga buhat, kauban sa Dios nga atong langitnong Amahan, ug ni Jesus ang Tigpataliwala sa Bag-o nga Pakigsaad; ug karon sila mibati nga maikagon sa pagkaylap niini nga buhat, ug sa paghuman niini nga mga katuyoan nga giplano sa Dios sa wala pa ang katukuran sa kalibutan. Ug ngadto sa Dios ug sa iyang Anak, ug ngadto niini nga mga tawo, nga kita nakautang alang sa kahayag ug sa kahibalo nga gihatag ngari kanato, ug ngadto kanila kita nakautang sa tanan nga panahon alang sa sama nga matang sa kasayuran ug salabutan nga mopaluyo ug modumala kanato. ¹⁵

Ang hunahuna nga ang Simbahan magkaguliyang ug mabungkag tungod kay ang Propeta ug ang patriarch gipamatay dili makatarunganon. Kini nga Simbahan adunay mahinungdanon nga mga pagtulun-an sa pagkaimortal diha sa taliwala niini. Ang Simbahan dili alang sa tawo, ni pinaagi sa tawo ang Simbahan mao ang kaliwat sa Dios. Kini gitukod sunod sa sumbanan sa langitnong mga butang, pinaagi sa mga baruganan sa pagpadayag; pinaagi sa pag-abli sa mga langit; pinaagi sa pangalagad sa mga anghel, ug sa pagpadayag ni Jehova. Kini dili maapektuhan sa kamatayon sa usa o duha, o singkwenta ka mga tawo. Ang Simbahan adunay priesthood sunod sa kapunongan ni Melchizedek, nga nagbaton og gahum sa walay katapusan nga kinabuhi, “walay sinugdan sa adlaw o katapusan sa mga tuig.” [D&P 84:17.] Kini gitukod alang sa katuyoan sa kaluwasan niini nga mga kaliwatan, ug sa kaliwatan nga nanglabay. Kini ania karon ug molungtad diha sa kahangturan. Mapakyas ba kini nga simbahan? Dili! Mga panahon ug mga kapanahonan mahimo nga mausab, mahimo nga adunay daghan nga mga rebolusyon; mga trono mahimong mapukan; ug mga imperyo mawagtang; mga linog mahimo nga mopikas sa yuta gikan sa sentro ngadto sa palibut; mga bukid mahimo nga masalibay gikan sa ilang mga nahimutangan, ug ang dakong dagat mairog gikan sa iyang nahimutangan, apan taliwala sa pagka-usab ug kalaglagan sa mga kalibutan ug mga butang, ang kamatuoran, mahangturon nga kamatuoran, magpabilin nga dili mausab, ug kadtong mga baruganan nga napadayag sa Dios ngadto sa iyang mga santos magpabilin nga dili maapektuhan taliwala sa naggubat nga mga elemento, ug magpabilin ingon nga dili matarug sama sa trono ni Jehova.¹⁶

Mga Sugyot alang sa Pagtuon ug Panaghisgutan

Unsa ang nakadani kaninyo mahitungod sa mga pagbati ni John Taylor kang Propeta Joseph Smith? Sa unsa nga mga paagi kita makasunod sa iyang ehemplo sa pagpanalipod kang Propeta Joseph?
Ngano nga mahinungdanon alang kaninyo nga mahibalo nga si Joseph Smith gi-orden nang daan sa pag-alagad isip usa ka propeta? (Tan-awa usab sa D&P 138:53–56.)
Ngano nga mahinungdanon ang pagbaton og pagpamatuod nga si Joseph Smith usa ka propeta sa Dios? Giunsa ninyo pagbaton sa inyong pagpamatuod niini nga kamatuoran?
Unsaon ninyo sa pagtabang niadtong kinsa nakigbisog sa pagbaton o paglig-on sa ilang pagpamatuod kang Propeta Joseph? Unsa nga mga panalangin ang inyong nasinati gikan sa paghatag og pagpamatuod bahin ni Propeta Joseph Smith?
Ngano nga atong tagal sa panahon gihulagway ingon nga “dispensasyon sa kahingpitan sa mga panahon”?
Sa unsa nga paagi kamo ug ang inyong pamilya napanalanginan sa mga kamatuoran ug mga gahum nga gipahiuli pinaagi ni Joseph Smith?
Ngano nga dili mahinungdanon alang kang Joseph Smith nga makaeskwela? (Tan-awa usab sa D&P 1:24–28; 136:32–33.) Unsa nga mga hiyas ang anaa ni Joseph nga nakatabang sa pagandam kaniya sa pagtuman sa iyang balaan nga tawag? Sa unsa nga paagi nga ang iyang panig-ingnan makatabang kanato sa pagtuman sa atong balaan nga mga tawag?
Unsa ang kahulugan niini kanimo sa pagkahibalo nga ang Simbahan nagpadayon sa pagtubo bisan pa sa kamatayon ni Propeta Joseph Smith?

May kalabutan nga mga Kasulatan: D&P 1:29–30, 38; 21:1–8; 65:2; 128:19–23; 135; Joseph Smith Kasaysayan 1:175