Kapitulo 16

Pagpalig-on sa Atong Relasyon sa Dios

Akong palabihon nga ang Dios maoy akong higala kay sa tanang ubang mga impluwensya ug mga gahum nga dili iya sa Dios.¹

Gikan sa Kinabuhi ni John Taylor

Si John Taylor adunay dako ug personal nga gugma alang sa atong Langitnong Amahan. Siya naghisgot Kaniya ingon nga “atong amahan, higala ug maghahatag.” Siya miingon, “Kita mosalig diha sa iyang bukton,” ug kita masayud nga siya mogiya ug motultol, moimpluwensya ug mokontrol sa mga buluhaton sa iyang mga tawo, busa kita mosalig diha kaniya.”²

Naghatag og pagpamatuod sa gugma ug sa pagpakabana sa Dios alang sa Iyang mga anak, si Presidente Taylor misaysay: “Walay usa ka tawo ibabaw sa yuta nga mibutang sa iyang pagsalig diha sa Dios, ako dili magsapayan unsang bahin sa kalibutan siya maana, kinsa ang makaingon nga ang Ginoo wala motabang kaniya. Ako nasayud nga kana ang nahitabo kanako, igo na alang kanako. Ako natagbaw nga sa layo nga mga yuta ug sa langyaw nga mga nasud, diin ako walay laing maduol gawas sa Makagagahum, nga siya diha sa akong kiliran, ug ako nasayud nga siya mitubag sa akong mga pag-ampo.”³

Kini nga pagsalig sa Dios napamatud-an niadtong 1839, sa dihang si Elder Taylor mibiya uban ni Elder Wilford Woodruff alang sa usa ka misyon sa British Isles. Si Elder Taylor nasakit og grabe kaayo tungod sa pagbiyahe gikan sa Nauvoo ngadto sa New York, diin sila mosakay og barko paingon sa Inglatera. Si Elder Woodruff nag-una sa New York ug naghulat ni Elder Taylor, kinsa nalangan sa iyang pagbiyahe tungod sa iyang sakit.

Sa dihang si Elder Taylor miabut sa New York, si Elder Woodruff matinguhaon nga makalarga ug dihadiha dayon nagkuha sa iyang kaugalingong tiket paingon sa Inglatera. Bisag si Elder Taylor walay kwarta, siya misulti ni Elder Woodruff, “Nan, Brother Woodruff, kon ikaw naghunahuna nga labing maayo alang kanako nga moadto, ako mouban nimo.” Si Elder Woodruff nangutana kon unsaon ni Elder Taylor nga makakuha og kwarta alang sa biyahe, diin si Elder Taylor mitubag: “O, walay lisud bahin niana. Lakaw ug pagkuha og tiket alang kanako sa imong gisakyan, ug ako mohatag kanimo sa gikinahanglang kwarta.”

Sa pagkadungog sa panagsultihanay tali ni Elder Taylor ug ni Elder Woodruff, usa ka Brother Theodore Turley mipadayag og tinguha sa pagkuyog sa mga Apostoles sa ilang pagbiyahe ug mitanyag sa pagluto alang kanila, bisan siya walay kwarta. Agig tubag sa kang Brother Turley nga tinguha nga moapil sa buluhaton, si Elder Taylor misulti ni Elder Woodruff sa pagkuha usab og tiket alang ni Brother Turley.

Sa hamubong panahon, ang Ginoo misangkap sa mga pamaagi alang sa biyahe. Si Elder B.H. Roberts sa Kapitoan mitala: “Nianang panahon sa paghimo niining mga kasabutan si Elder Taylor walay kwarta, apan ang Espiritu mihunghong (ngadto) kaniya nga kana nga mga pamaagi taliabot, ug kanang ligdong, hinay nga tingog wala gayud mopakyas kaniya! Niana nga tingog siya misalig, ug ang iyang pagsalig wala mapakyas. Bisag siya wala mangayo og kwarta ni bisan kinsa, gikan sa lainlaing mga tawo sa boluntaryong mga donasyon siya nakadawat og igong salapi aron makabayad sa iyang mga pasalig alang sa tiket sa iyang kaugalingon ug ni Brother Turley, apan walay sobra.”⁴

Mga Pagtulun-an ni John Taylor

Ang Dios atong Amahan ug Siya naghambin og amahanon nga pagtagad alang kanato.

Ang atong relihiyonu2026 wala maghulagway sa Dios sama sa estrikto nga linalang nga dili maduol, apan kini nagsulti kanato nga siya atong Amahan, ug nga kita iyang mga anak, ug nga siya naghambin sa iyang dughan og usa ka amahanong pagtagad alang kanato: ug kita nakasinati sa sama nga mga pagbati nga anaa tali sa amahan ug sa iyang anak nga lalaki, inahan ug anak nga babaye, mga ginikanan ug mga anak.⁵

Unsa ang gibati sa Dios ngadto sa tawhananong pamilya? Iyang gibati nga sila iyang mga anak. Unsa, ang tanan? Oo, ang puti, ang itom, ang pula, ang Judeo, ang hentil, ang pagano, ang Kristyano, ug ang tanang mga matang ug mga pundok sa katawhan. Siya interesado sa tanan. Siya mibuhat niini gikan sa sinugdanan ug mopadayon sa pagbuhat sa ingon hangtud sa katapusan. Siya mobuhat sa tanan nga anaa sa iyang gahum alang sa kaayohan, panalangin, ug sa kahimayaan sa tawhanong pamilya, karon ug sa kahangturan.⁶

Kitang tanan mga anak sa Dios. Siya atong Amahan ug adunay katungod sa pagdumala kanato, dili lamang kita, apan adunay hingpit nga katungod sa pagdumala ug pagkontrol sa mga buluhaton sa tanang tawhanong pamilya nga anaa ibabaw sa yuta tungod kay silang tanan iyang kaliwat.⁷

Ang tumong nga anaa sa iyang hunahuna sa Dios mao ang paghatag og kaayohan sa katawhan kutob mahimo sa Iyang gahum. Kita magsultihanay usahay kalabut sa pag-irog sa langit ug yuta apan ang Dios miirog sa langit ug yuta alang sa pagkab-ot niana nga tumong. … Ang Dios nagtinguha sa atong kaayohan, ug Siya mihatag og mga lagda alang niana nga katuyoan. Siya mipasiugda sa walay katapusang Ebanghelyo alang niana nga katuyoan; ug Siya mipahiuli sa Balaang Priesthood nga diha sa karaan pa, uban sa tanang mga baruganan, mga panalangin, mga gahum, mga tulumanon, mga ordinansa, ug mga kahigayunan nga diha na sa yuta gikan sa pagsugod sa panahon.⁸

Kon kita nakasabut sa atong mga kaugalingon sa husto nga paagi, kita kinahanglang motan-aw sa atong mga kaugalingon isip walay katapusang mga linalang, ug sa Dios nga atong Amahan, kay kita gitudloan kon kita mag-ampo sa pag-ingon, “Amahan namo, nga anaa ka sa langit, pagabalaanon unta ang imong ngalan.” [Tan-awa sa Mateo 6:9.]” Kita adunay yutan-ong mga amahan, ug sila atong gipanagtahud, dili ba nga sa labi pa hinoon mapapailalum kita sa Amahan sa mga Espiritu, ug mabuhi.” [Tan-awa sa Mga Hebreohanon 12:9.] Ako dili kinahanglan nga motanyag og pagpamatuod mahitungod niini, kay kini nasabtan og maayo sa mga santos nga ang Dios mao ang amahan sa atong mga espiritu, ug nga kon kita mobalik ngadto sa iyang atubangan, kita makaila kaniya, sama sa atong pagkaila sa atong yutan-ong mga ginikanan. Kita gitudloan sa pagduol kaniya sama sa atong pagduol sa atong yutan-ong ginikanan sa pagpangayo kaniya sa mga panalangin nga atong gikinahanglan; ug siya miingon “kon ang anak mangayo og tinapay gikan sa iyang amahan iya bang pagahatagan siya og bato, o kon siya mangayo og isda mohatag ba siya og usa ka tanga. Busa kon kamo, nga dautan mahibalong mohatag og maayong mga gasa sa inyong mga anak, unsa pa gayud ka labaw sa inyong Amahan, nga atua sa langit, nga mohatag sa iyang balaang espiritu ngadto sa mga nagapangayo kaniya.” [Tan-awa sa Mateo 7:911.]⁹

Ang Atong Langitnong Amahan mopanalangin kanato kon kita magtinguha Kaniya sa mapaubsanon nga pag-ampo.

Kita kinahanglang mobati gayud nga ang atong Dios mao ang atong Amahan ug nga kita iyang mga anak, ug nga siya misaad sa pagpaminaw sa atong mga pag-ampo, ug nga kita giawhag nga magmasululondon sa iyang kabubut-on ug sa pagtuman sa iyang mga plano. Ug dayon kita kinahanglan, aron ang atong mga pagampo makahatag og resulta, mobuhat sa lainlaing mga katungdanan nga gisangon kanato, sama sa gipasabut, ug kita kinahanglang magmatiunoron ug dungganon sa atong mga pagtagad sa usag usa. Kon kita mosulay sa paglingla sa atong igsoon, makapaabot ba kita nga panalanginan sa Dios, kay ang [atong igsoon] usa ka anak sa atong Langitnong Amahan ingon man nga kita mao usab. Ang [Dios] interesado sa iyang kaayohan, ug kon kita mosulay sa pagpanlimbong sa atong kaigsoonan; sa inyong hunahuna [ang Ginoo] mahimuot ba kanato?¹⁰

Ako nahinumdum sa akong pagkabata. “Sa akong pagkabatanon nakat-on ako sa pagduol sa Dios. “Daghang mga higayon nga miadto ako sa uma ug mitago sa mga kahoy-kahoy, miyukbo sa atubangan sa Ginoo ug mitawag Kaniya sa paggiya ug sa pagtud lo kanako. Ug naminaw Siya sa akong pag-ampo. Usahay ako midapit sa ubang mga bata sa pagkuyog kanako. Kini dili makadaut kaninyo, mga batang lalaki ug mga babaye, sa pagtawag sa Ginoo sa inyong sekreto nga mga dapit sama sa akong gibuhat. Kana mao ang espiritu nga diha kanako samtang ako gamay pa nga bata. Ug ang Dios miagak kanako gikan sa usa ka butang ngadto sa lain nga butang. … Ang akong espiritu giganoy paingon ngadto sa Dios; ug susama gihapon ang akong gibati karon.

Ako mosulti kaninyo sa unang butang nga sagad akong buhaton samtang ako nagsangyaw, ilabi na sa [bag-o] nga dapit—ug kana mao ang pag-adto sa usa ka dapit, bisag asa ako moabut, sa umahan, sa kamalig, sa mga kakahoyan, o sa akong lawak tipiganan, ug mohangyo sa Dios sa pagpanalangin kanako ug sa paghatag kanako og kaalam sa pag-atubang sa tanang mga kahimtang diin ako malagmit makigbisog; ug ang Ginoo mihatag kanako sa kaalam nga akong gikinahanglan ug nakapalahutay kanako. Kon kamo mopadayon sa dalan sa ingon niini nga matang, siya usab manalangin kaninyo. Ayaw pagsalig sa inyong kaugalingon, apan pagtuon sa labing maayong mga basahon—ang Biblia ug ang Basahon ni Mormon—ug kuhaa ang tanang mga impormasyon nga imong makuha, ug dayon pagmatinud-anon ngadto sa Dios ug magpabilin sa inyong mga kaugalingon nga gawasnon gikan sa kadautan ug kahugawan sa matag matang, ug ang mga panalangin sa Hataas Uyamut magauban kaninyo.

Ayaw kalimot sa pagtawag sa Ginoo sa inyong panagpundok diha sa pamilya, mopahinungod sa inyong mga kaugalinon ug sa tanan nga anaa kaninyo ngadto sa Dios sa tanang adlaw sa inyong mga kinabuhi; ug magtinguha sa paghimo og matarung, ug moamuma sa espiritu sa panaghiusa ug gugma, ug ang kalinaw ug panalangin sa Buhing Dios magauban kanato, ug Siya mogiya kanato sa mga dalan sa kinabuhi; ug kita pagapaluyohan ug ituboy sa tanang balaang mga anghel ug sa mga patriyarka sa karaan ug mga tawo sa Dios, ug ang tabil mahimong magkanipis tali kanato ug sa atong Dios, ug kita magkaduol ngadto kaniya, ug ang atong mga kalag mohimaya sa Ginoo sa mga panon.¹³

Kita kinahanglan mosalig ug magbaton og pagtuo sa Dios.

Ako dili motuo sa usa ka relihiyon nga dili makakuha sa tanan nakong mga pagbati, apan ako motuo sa usa ka relihiyon nga akong mahimong pagapuy-an, o pakamatyan. Ako wala magsulti bahin sa mga butang nga ako wala makasabut; ako nakigbisog batok sa kamatayon, ug ang yawa nagtinguha sa paglaglag kanako, ug ako wala magtagad niini. Hikawi ako niini nga paglaum ug ang akong relihiyon kawang. … Anaa ra kanato ang pagbuhat sumala sa baruganan nga atong nasugdan; sa pagsalig ug pagbaton og hugot nga patuo sa Dios; nga mopahimo niini nga kini moimpluwensya kanato sa atong mga lihok ngadto sa matag usa.¹⁴

Kon kita mohimo sa atong bahin, ang Ginoo dili mopakyas sa pagbuhat sa Iyang bahin. Tungod kay ang uban mohimo og binuang kita dili makaako sa pagsunod kanila. Kita miangkon nga mao ang Zion sa Dios, ang putli og kasingkasing. Kita miangkon nga mga lalaki ug mga babaye sa kaligdong, sa kamatuoran ug sa hiyas, ug nga nagbaton og hugot nga pagtuo sa Dios. Kini dili lamang maoy atong giangkon nga relihiyosong pagtuo, apan maoy atong naandan; kita kinahanglan nga mobuhat ug motuman sa pulong ug sa kabubut-on ug balaod sa Dios.¹⁵

Ang pagtuo nga walay mga binuhatan patay [tan-awa sa Santiago 2:17, 26], tataw nga ang buhing pagtuo ug nga kanang mahimong madawat sa Dios, mao kana ang dili lamang magtuo sa Dios, apan magbuhat sumala niana nga pagtuo. Kini dili lamang ang hinungdan sa paglihok, apan naglakip sa hinungdan ug sa paglihok. O sa laing mga pulong kini mao ang pagtuo o hugot nga pagtuo nga gihimong hingpit pinaagi sa mga buhat.¹⁶

Kita kinahanglan gayud nga mobutang sa atong pagsalig sa Dios, pasagdi lang kon unsay sangputanan niini. Ug samtang kita nagabuhat niini, ug samtang kita nagahupot sa balaang mga pakigsaad nga atong gihimo uban kaniya ug sa usag usa, ang Zion magmadaugon. …

Apan ako mosulti kaninyo unsa ang atong kinahanglang buhaton, akong mga kaigsoonan, kita kinahanglan mahadlok sa Dios diha sa atong mga kasingkasing; kita kinahanglan mosalik way sa atong pagkamasinahon ug sa atong pagkamasupilon, sa atong kagahi og alimpatakan ug mga binuang sa tanang matang. … Kita kinahanglan magmapainubsanon sa atong mga kaugalingon sa atubangan sa Ginoo, maghinulsol sa atong mga sala, ug sukad karon maningkamot nga ang atong mga lawas ug mga espiritu mahimong putli, nga kita mahimong takus nga mga puy-anan alang sa Espiritu sa buhing Dios, ug nga mahimong magiyahan niya sa tanang natong mga paghago alang sa buhi ug sa patay. Ang atong mga tinguha kinahanglan alang sa Dios ug sa iyang pagkamatarung, hangtud kita makasinggit uban sa usa ka tawo nga karaan: O Dios, susiha ako, ug sulayi ako, ug tan-awa kon kanako aduna bay dalan sa pagkadautan, mandoi kini sa pagpalayo [tan-awa sa Salmo 139:23–24]. Atong responsibilidad, isip mga amahan ug mga inahan, ang pagduol sa atubangan sa Ginoo uban sa tumang pagpaubos ug motawag kaniya nga ang iyang kalinaw mahimong maana sa atong mga kasingkasing; ug kon kita nakahimo og sayop, mokumpisal niana nga sayop ug motarung niini kutob sa atong posibling mahimo; ug niining paagiha himoa nga ang matag lalaki ug babaye sa Israel magsugod sa pagpahimutang sa han-ay sa ilang mga panimalay, ug sa kahangturan moamuma sa espiritu sa kalinaw, ang espiritu sa panaghiusa ug gugma.

Ug kon ang mga banay sa Israel mobuhat niini sa tibuok yuta sa Zion, ang tanan may kahadlok sa Dios ug mobuhat sa pagkamatarung, maghambin sa espiritu sa pagpapubos ug kaaghup, ug mohatag sa atong tanang pagsalig diha kaniya, walay gahum nga makapasakit kanato.¹⁷

Ang Kalinaw mao ang gasa sa Dios ngadto niadtong kinsa maglakaw sumala sa Iyang kahayag.

Ang kalinaw mao ang gasa sa Dios. Kamo ba gusto og kalinaw? Dangup sa Dios. Kamo ba gusto og kalinaw sa inyong mga pamilya? Dangup sa Dios. Kamo ba gusto nga ang kalinaw manalipod sa inyong mga pamilya? Kon kamo gusto, pagpuyo sumala sa inyong relihiyon, ug ang mismong kalinaw sa Dios mopuyo ug mouban kaninyo, tungod kay diha naggikan ang kalinaw ug kini [dili] mopuyo bisan asa. … Ang kalinaw maayo, ug ako moingon pangitaa kini, paghambin niini sa inyong mga dughan, sa inyong mga kasilinganan, ug bisan asa kamo moadto taliwala sa inyong mga higala ug mga kauban. Kon kita makakuha lamang nianang kalinaw nga nagpuyo diha sa dughan sa Dios, ang tanan maayo ra. …

Ang uban, sa pagsultihanay sa gubat ug mga kasamok, moingon, wala ba kamo mahadlok? Wala, ako usa ka sulugoon sa Dios, ug kini igo na, tungod kay ang Amahan mao ang nagkontrol. Kini alang kanako mahimong sama sa yuta nga kolonon diha sa mga kamot sa magkokolon, nga mahimong mauyonon ug maglakaw diha sa kahayag sa panagway sa Espiritu sa Ginoo, ug dayon dili magsapayan unsa pa ang mahitabo. Tuguti nga ang mga kilat mokidlat ug ang mga linog modahunog, ang Dios ang nagkontrol, ug ako gustong mosulti gamay ra kaayo, tungod kay ang Ginoong Dios nga Makagagahum naghari ug magpadayon sa iyang buhat hangtud ikabutang na niya ang tanang mga kaaway ilawom sa iyang mga tiil, ug ang iyang gingharian molahos gikan sa mga suba hangtud sa kinatumyan sa kayutaan.

Ang tanan natong buhaton mao ang pagpuyo sa atong relihiyon, pagsunod sa tambag sa atong Presidente, magmapainubsanon ug magmatinud-anon ug dili mobayaw sa atong kaugalingong kusog, apan mangayo og kaalam sa Dios ug tan-awa nga kita adunay pakigdait uban sa Dios, uban sa atong mga banay, sa usag usa, aron ang kalinaw mahimong mohari diha sa atong mga dughan ug diha sa katilingban.¹⁹

Kon kita magpuyo sumala sa atong relihiyon, kon kita maglakaw sumala sa kahayag sa Espiritu sa Dios, kon kita maglimpyo sa atong mga kaugalingon [sa] kahugaw ug kadautan, ug ang tam-is nga paghunghong sa Espiritu sa Ginoo mobubu og kahibalo sa atong mga dughan, manalipod kanato, nga maoy hinungdan nga ang kalinaw ug hingpit nga kalipay mouban kanato, kita dayon adunay, kapin o kulang, usa ka hanap nga pag-aninag niadtong mga butang nga gitagana alang sa matinud-anon, ug dayon atong bation nga daw kita ug ang tanan nga atong naangkon anaa sa mga kamot sa Ginoo ug nga kita andam nga motanyag sa atong mga kaugalinon [isip] usa ka sakripisyo alang sa pagkab-ot sa iyang mga katuyoan ibabaw sa yuta.²⁰

Ang kalinaw usa ka tilinguhaon nga butang, kini mao ang gasa sa Dios, ug ang labing mahinundanong ikahatag sa Dios diha sa mga mortal. Unsa ang labaw nga tilinguhaon kaysa kalinaw? Kalinaw sa mga nasud, kalinaw sa mga siyudad, kalinaw sa mga pamilya. Sama sa hinay nga kinanaas sa zephr [o kasadpang hangin], ang iyang makahupay nga impluwensya mopahupay sa kabalaka, mopauga sa mata nga magul-anon, ug mohingilin sa kasamok gikan sa dughan: ug himoa nga kini masinati sa tibuok kalibutan, ug kini mohingilin sa kagul-anan gikan sa kalibutan, ug mohimo niining yuta nga usa ka paraiso. Apan ang kalinaw mao ang gasa sa Dios.²¹

Mga Sugyot alang sa Pagtuon ug Panaghisgutan

Unsa ang pipila ka mga paagi nga ang Dios mopakita sa Iyang amahanong gugma alang kanato? Sa unsang paagi nga ang kahibalo nga Siya adunay maamumahan Amahanong pagtagad alang kanato motabang kanato sa mga panahon sa espirituhanon ug pisikal nga panginahanglan?
Ngano nga kita usahay mapakyas sa pagbaton og makahuluganon, makanunayon nga pag-ampo? Unsa ang atong buhaton aron paghimo sa atong mga pag-ampo nga labawng makahuluganon?
Unsa ang atong makat-unan gikan sa mga kasinatian ni John Taylor bahin sa pag-ampo? Unsaon nato pagtudlo ang mga bata sa pagduol sa Dios diha sa pag-ampo sama sa gihimo ni John Taylor?
Unsaon nato paglig-on sa atong pagsalig sa Dios? Sa unsa nga kamo napanalanginan samtang kamo mipakita sa inyong pagsalig sa Dios?
Unsa ang gipasabut nga mamahimong andam sa “paglakaw sumala sa kahayag sa Espiritu sa Dios”? Unsa ang pipila ka piho nga mga paagi diin kamo makapakita sa inyong pagtuo pinaagi sa paglihok?
Sa unsang mga paagi nga kamo nakasinati og kalinaw isip gasa gikan sa Dios? Sa unsang paagi nga kini nga kalinaw nakaimpluwensya sa inyong gugma alang Kaniya?
Unsaon ninyo pagpalambo ang matang sa kalinaw sa inyong pamilya?

May kalabutan nga mga Kasulatan: Mga Proverbio 3:5–6; Mga Taga-Filipo 4:6–7; 2 Nephi 32:8–9; Mosiah 4:9; D&P 19:23: 20:17–18; 59:23–24

Pinaagi sa makanunayong personal nga pag-ampo, kita makapalig-on sa atong relasyon uban sa atong Langitnong Amahan.