Kapitulo 15

Kabubut-on ug Pagkamay-tulubagon

Atong kahigayunan ang pagtino sa atong kaugalingong kahimayaan o pagkunhod; atong kahigayunan ang pagtino sa atong kaugalingong kalipay o kasubo sa kalibutan nga umaabot.¹

Gikan sa Kinabuhi ni John Taylor

“Kita maghisgot usahay bahin sa kaugalingong kabubut-on,” namatikdan si Presidente John Taylor. “Mao ba kana ang sakto nga baruganan? Oo. Ug kini usa ka baruganan nga sa kanunay anaa, ug nagagikan sa Dios, ang atong Langitnong Amahan.”² Si Presidente Taylor nagpangga sa baruganan sa moral nga kagawasan—ang gahum sa Langitnong Amahan nga gihatag sa Iyang mga anak aron sa pagpili og maayo o dautan ug sa pagbuhat alang sa ilang mga kaugalingon. Bisan pa niana, siya usab mitudlo nga ang indibidwal may tulubagon ngadto sa Dios alang sa ilang mga buhat. Siya mipasabut, “ang Dios wala gayud maghatag sa tawo og walay kinutuban nga pagkontrol sa mga kalihokan niini nga kalibutan; apan kanunay nga nagsulti ang tawo anaa ubos sa iyang paggiya, nagpuyo sa iyang teritoryo, ug may kapangakohan ngadto kaniya alang sa iyang mga binuhatan.”³

Aron sa paghatag og gibug-aton sa relasyon tali sa kabubut-on ug pagkamay-tulubagon, si Presidente Taylor mipakigbahin sa mosunod nga istorya: “Usa ka tawo miabang og usa ka ubasan o umahan, ang tawo nga nagpuyo niini gihatagan og gahum sa pagbuhat sumala sa iyang kabubut-on ug kagustuhan, apan kanunay nga nag-agad sa mga kondisyon nga gihatag sa tag-iya sa yuta. Mao nga ang Dios mihimo og pakigsaad kang Noe, Abraham, ang mga Anak sa Israel, ug sa kanhiay nga mga santos. Ang paghimo og usa ka pakigsaad nagpasabot lamang og duha ka mga indibidwal: sa mao nga mga hitabo, ang Dios usa niini, ang mga katawhan ang lain. Kon ang mga katawhan mobuhat sa ilang pakigsaad, ang Ginoo mapugos sa pagtuman sa iyang gisaad; apan kon ang tawo makasala nan ang Ginoo dili mobuhat sa iyang bahin sa pakigsaad. … Ang tawo, diay, molihok sumala sa iyang kaugalingong kabubut-on, sa pagpalambo sa mga panalangin nga gibutang Dios diha sa iyang gahum, o dili, sigon sa iyang gusto.”⁴

Sa panahon ni Presidente Taylor, ang ubang mga tawo miangkon nga ang ebanghelyo ug ang priesthood gigamit aron sa “pagdala sa mga katawhan ngadto sa pagkaulipon o sa pagdaogdaog sa mga konsensya sa mga katawhan.” Siya supak kaayo niini nga ideya, namahayag nga ang mga katuyoan sa ebanghelyo mao ang “paghimo sa tanang katawhan nga gawasnon ingon nga ang Dios gawasnon; aron sila moinom sa mga sapa ‘nga makapahimuot sa siyudad sa Dios’;[Salmo 46:4] aron sila mabayaw ug dili mapaubos; aron sila mahimong putli ug dili dautan; aron sila makat-on sa mga balaod sa kinabuhi ug maglakaw niini, ug dili magsubay sa mga agianan sa kadautan ug manaog ngadto sa kamatayon.”⁵

Mga Pagtulun-an ni John Taylor

Gikan sa sinugdanan, ang Dios mihatag kanato sa gasa sa kabubut-on.

Ang Amahan… mihimo og usa ka mando… nga ang mga lu-mulupyo sa langit ug ang mga lumulupyo sa yuta kinahanglan nga adunay ilang kaugalingong kabubut-on. Mao kini ang hinungdan nga si Lucifer misukol; ug siya dili unta makasupak sa plano o sugo nga wala pa mahatag; tungod kay ang pagsukol nagpaila sa paglapas sa balaod, sugo, o pagtugot; ug siya gipalayas sa langit tungod niini nga pagsukol. Kini nga pagsukol wala unta kon walay kaugalingong kabubut-on; kay kon walay kaugalingong kabubut-on silang tanan unta mapugos sa pagbuhat sa kabubut-on sa Amahan. Apan kay anaay kaugalingong kabubuton, ila kining gigamit; ug si Lucifer ug ang ikatulo nga bahin sa mga anghel gipalayas tungod kay sila misukol ug migamit niini nga kabubut-on sa pagsupak sa ilang langitnong Amahan. Ug dili lamang kay sila misukol, apan tungod kay, ingon sa nahisulat, “sila nagtinguha sa paglaglag sa kabubu-on sa tawo;” [tan-awa sa Moises 4:3] ug ang ilang kabubut-on magamit lang unta sa pagsupak sa mga kaikag, kalipay ug mahangturong kahimayaan sa katawhan, nga gitanyag nga pagahimoon pinaagi sa pag-ula ug pagtubos nga gipahigayon ni Jesukristo.⁶

[Ang Dios] mihatag kanato og abilidad sa pagpili sa maayo ug pagbalibad sa dautan. Kita makahimo og kadautan o pagkamatarung, sumala sa atong gusto; ug ang Yawa nakapahimulos niini, ug misulay sa pagpalibut sa mga hunahuna sa katawhan niini nga mga impluwensya nga maoy makaguba kanila, aron pagdala kanila nga ulipon sa iyang pagbuot. Ang Ginoo wala maghigot kanila, ni mipugong kanila; apan ang resulta sa ilang mga binuhatan iyang gikontrol, matag higayon nga sila mobuhat og butang nga makapadaut sa iyang katawhan.

Ang Ginoo… motugot sa mga katawhan sa pagpangita og kalipay sa ilang kaugalingong paagi, ug sumala sa ilang tinguha siya mopainom sa kopa sa ilang kaugalingong kadautan sa ilang kaugalingong paagi. Sa laing bahin, siya nagpakita sa iyang kaayo ug mopadayon sa pagbuhat niini ngadto sa tanan niyang mga anak. Unsa man ang iyang giplano nga himoon? Ang pagtukod niini nga gingharian sa yuta, ang pagtukod sa katarung, ang pagabug sa kaaway ug ang pagpapas sa [Yawa] gikan sa yuta. Pinaagi niini, ang mga baruganan sa kamatuoran mapadayon sa tibuok yuta, ug ang tanan moyukbo ngadto sa Dios ug sa iyang Kristo, ug ang mga pinili modumala sa mga ordinansa sa iyang balay hangtud sa hangtud. Ang Makagagahum nagplano niini dugay na kaayo.⁷

Ang Dios mihatag kanato og giya, apan Siya dili mopugos sa tawhanong hunahuna.

Atong nadawat ang ebanghelyo. Duna bay usa nga gipugos sa pagsunod niini? Aduna bay pagpamugos sa bisan unsang paagi nga gipakita kanato? Wala akoy nahibaloan. Si Oliver Cowdery, kinsa mao ang ikaduha nga elder sa simbahan, gipugos ba sa pagdawat niini nga ebanghelyo? Wala, siya wala pugsa. Si Hyrum Smith gipugos ba sa pagdawat niini? Wala, siya wala pugsa. Aduna ba sa mga saksi sa Basahon ni Mormon—ang mga Whitmer ug uban pa? Wala. Ug human sila nagpasakop niini nga simbahan, gipugos ba sila sa pagpabilin niini? Wala. Aduna ba sa mga sakop sa korum sa napulog duha, sa mga kapitoan, sa mga high priest, o sa mga sakop sa high council, o mga presidente sa mga kapitoan, o bisan unsa nga pundok sa mga tawo niini nga simbahan, ang gipugos sa pagdawat sa katungdanan diin sila gitawag? Wala koy nahibaloan bisan usa, ikaw naa ba? Ako nasayud nga walay pagpugos nga gigamit kanako labaw sa kusog sa kamatuoran nga nagpasalig sa iyang kaugalingon ngari sa akong hunahuna; ni diha kanimo, labaw sa gahum sa kamatuoran nga naglihok sa inyong mga hunahuna.⁸

Ako dili mangandoy sa pagkontrol sa tawhanong hunahuna. Ako dili mokontrol sa mga lihok sa mga tawo. Ang Dios wala magbuhat niini, iya silang pasagdan sa ilang kaugalingong kabubut-on sa pagpakigbatok sa mga pagsulay, mga pagtintal, mga kalisdanan, ug mga dautan sa matag matang nga ania sa kalibutan, nga gibutang, mahimong masugatan. Siya hinoon, mipahigayon og piho nga, mga baruganan nga ilang magamit ug siya buot nga modala kanila ngadto kaniya kon sila magpadala. Kon dili, siya mobuhat sa pinakamaayo kanila kutob sa iyang mahimo.⁹

Ang tawo adunay moral nga kagawasan; nagbuhat ubos sa Ginoo, ug, busa, responsabli ngadto kaniya sa iyang mga binuhatan, ug sumala sa iyang kaugalingong kabubut-on. Apan iya ba kining gipasagdan nga mag-inusara ug wala tabangi sa pagpatuman sa iyang mga plano? Wala. Nagsud-ong sa tawo isip iyang anak, siya sa matag karon ug unya mitanyag sa iyang mga pag-alagad ug mga pagtudlo, isip usa ka amahan. Siya mihatag og mga pagpadayag, nagtudlo ug nagpasidaan sa iyang mga katawhan. Siya mihatag og mga saad ngadto sa mga masulundon, ug mipasidaan sa dili mga masulundon. Siya mitudlo sa mga hari, mga magmamando, ug mga propeta. Siya usab mipanalipod sa matarung, ug misilot, pinaagi sa mga paghukom, sa dautan. Siya misaad og mga kayutaan ngadto ni Abraham ug sa uban. Siya mihatag og mga saad sa kinabuhing dayon ngadto sa mga matinudanon; apan wala gayud manghilabut o mipugos sa tawhanong hunahuna.¹⁰

Ang Dios mohimo kanato nga manubag sa atong paggamit sa kaugalingon kabubut-on ug moganti kanato sumala sa atong mga desisyon.

Dili ba kita ang tighimo sa atong kaugalingong kapalaran? Dili ba kita ang mga tigdesisyon sa atong kaugmaon?… Atong kahigayunan ang pagtino sa atong kaugalingong kahimayaan o pagkunhod; atong kahigayunan ang pagtino sa atong kaugalingong kalipay o kasubo sa kalibutan nga umaabot.¹¹

Pinaagi sa maampingon nga pagsusi sa mga Kasulatan, atong makaplagan nga ang tawo adunay piho nga mga gahum nga gibutang sa iyang mga kamot, diin siya ubos sa pagkontrol ug paggiya sa Ginoo; ug nga kon siya mobuhat nga walay tambag, giya, o pagtudlo sa Dios, siya milapas na sa unsay gipabuhat kaniya sa Ginoo, ug mahisama ka sad-an sa [usa ka opisyal sa gobyerno] kinsa makalapas og kalapasan sa iyang mga panudlo; o sama sa usa ka tawo nga nag-atiman og umahan, o ubasan, nga inabangan, kon iyang i-bale wala ang mga kondisyon niana nga abang, ug modaut sa umahan, o ubasan; kay ang yuta iya sa Ginoo, ug ang tawo gibutang dinha sa Ginoo. Kini dili iya sa tawo, ingon nga siya naghupot lamang niini gikan sa Dios. … Kon ang tawo gibutang isip usa ka sinaligan sa pagbuhat alang sa Ginoo, ug usab alang sa iyang kaugalingon, ug unya mopasagad sa Ginoo, siya gayud mahimong manubag ngadto sa iyang Tiglalang.¹²

Ibalik ang imong panumduman, ug ikaw makahinumdom sa panahon diin ikaw mihimo og maayong buhat, ikaw makahinumdom sa panahon diin ikaw mihimo og dili maayong buhat; ang buhat gitago sa imong panumduman ug ikaw makahinumdom niini ug mopalandong niini kon kanus-a nimo gusto. … Kon ikaw nakatuon og pinulongan ikaw ganahan nga makahinumdum niana nga pinulongan, ikaw makahibalo dayon sa kalainan tali sa nagkalainlaing bahin sa pagsulti. Kon ikaw nakatuon og pagkamekaniko ang imong hunahuna moadto sa dapit diin ikaw nakakita og makina, ug ikaw motrabaho ug mohimo og sama niini. Kon ikaw nakaadto og mga siyudad imong masulti unsa nga mga matang ang mga balay, ug mga dalan, naglangkob sa nagkalainlaing mga siyudad nga imong nalabyan, ug sa kinaiya sa mga tawo nga imong nakauban; ug ikaw makahinumdom kanila, ug mamalandong kanila sa buntag o sa gabii kon ikaw maghunahuna pag-ayo, ug mohinumdom sa mga butang nga imong nabuhat ug nakit-an. Asa ka man makabasa niining tanan? Sa imong kaugalingong basahon sa panumduman, ikaw dili moadto sa laing basahon, kini nahisulat sa imong kaugalingong talaan, ug diha ikaw mobasa. Mituhop na kini sa imong mga mata ug mga dunggan, ug ang imong mga kamot nakahikap na niini, ug unya ang imong paghukom, ingon sa maoy tawag niini, mibuhat na niini—ang imong mga gahum.

Karon, kon ikaw nakaangkon nianang matang sa espiritu o sa pagkamaalamon, diin ikaw makabasa sa imong kaugalingon nga binuhatan, wala ba ikaw maghunahuna nga kana nga binuhat kinsa nagbutang niana nga espiritu ug niana nga kaalam nga anaa kanimo naghupot sa mga yawe niana nga espiritu, ug makabasa niini kon kanus-a iyang gusto? Dili ba kini pilosopikan hon, makatarunganon ug sa kasulatan? Tingali mao kini. …

Ang tawo mahikatulog sa paghikatulog sa kamatayon apan ang espiritu buhi diin ang tala-an sa iyang mga binuhatan gihipos— kana dili mamatay—ang tawo dili makapatay niini, dili kini madugta, ug kini mapabilin ra gihapon sa tanang kadasig, ang panumduman sa nanglabay sa wala pa ang panagbulag pinaagi sa kamatayon, sa lawas ug sa kanunay nga buhi nga espiritu.¹³

Kita mga katawhan sa Dios, ug siya mapugos sa pagbuhat sa tanang butang nga gitakda sa tawo o sa Dios. Siya adunay katungdanan sa pag-amuma sa iyang katawhan, kon sila moamuma sa ilang mga kaugalingon; kon sila mopasidungog sa ilang balaang tawag ug sa priesthood; kon sila mopalambo ug mopasidungog sa gahum ug pagtugot nga gihatag kanila; kon sila dili motipas gikan sa sakto nga mga baruganan, ang Dios adunay katungdanan sa pagpatuman sa tanang butang sumala sa mga obligasyon nga iyang gisudlan; usa niini mao ang pag-atiman sa mga kinahanglanon sa iyang mga Santos. … Kinsa nakahibalo sa Dios nga mopalayo gikan sa sakto nga mga baruganan?… Ako wala gayud, ug ako kontento kaayo nga ikaw wala usab.¹⁴

Mga Sugyot alang sa Pagtuon ug Panaghisgutan

Ngano man nga ang kabubut-on sa tawo mahinungdanon sa atong kahimayaan? Unsay kalabutan sa kabubut-on ug sa Pagula ni Jesukristo?
Sa unsa nga mga paagi nga si Satanas mopadayon sa pagsulay sa pag-impluwensya sa atong kaugalingong kabubut-on? Unsaon man nato paglikay niana nga mga pagsulay?
Unsa nga matang sa giya ang gihatag sa Ginoo kanato aron pagtabang kanato sa paggamit sa atong kabubut-on sa matarung nga paagi? Unsaon man Niya pagganti sa atong matarung nga paggamit sa kabubut-on?
Ngano nga mahinungdanon man alang sa mga indibidwal nga adunay kahigayunan sa paghimo sa ilang kaugalingong mga desisyon? Unsaon man nato pagpasidungog sa atong kabubuton sa mga sakop sa pamilya ug sa samang higayon pag-awhag kanila sa paghimo og sakto nga mga desisyon? Unsaon man nimo pagtabang sa mga sakop sa pamilya nga makasabot sa mga sangputanan sa ilang mga desisyon?
Bisan tuod og kita gawasnon sa paghimo og mga desisyon, ngano man nga ang dili matarung nga mga desisyon makapugong sa atong kagawasan? Sa unsa nga paagi nga ikaw mibati nga ang imong kagawasan mitubo pinaagi sa matarung nga mga desisyon?

May Kalabutan nga mga Kasulatan: Josue 24:15; Mga Taga-Galacia 6:7; 2 Nephi 2:14–16, 26–27; Helaman 14:30–31; D&P 58:26–28; 101:78; Moises 4:1–4; 6:33