Pasiuna
Ang matag kapitulo niini nga libro naglakip sa upat ka mga seksyon: (1) usa ka pagsugod nga kinutlo nga mubong nagpaila sa pokus sa kapitulo, (2) “Gikan sa Kinabuhi ni John Taylor,” nga naghulagway sa mga mensahe sa kapitulo uban sa usa ka sugilanon o tambag gikan kang Presidente Taylor, (3) “Mga Pagtulun-an ni John Taylor,” nga nagtudlo og importanteng mga doktrina gikan sa iyang daghang mga mensahe ug mga sermon, ug (4) “Mga sugyot alang sa Pagtuon ug Panaghisgutan,” nga nagawhag og personal nga pagribyu ug pagpakisayud, dugang nga panaghisgutan, ug kagamitan niini sa atong mga kinabuhi karon pinaagi sa mga pangutana.
Unsaon sa Paggamit Niini nga Libro
Alang sa personal o pamilya nga pagtuon. Kini nga libro gihimo aron madugangan ang pagsabut sa matag sakop sa mga baruganan sa ebanghelyo nga gitudlo ni Presidente John Taylor. Pinaagi sa mainampoon nga pagbasa ug mahinuktukong pagtuon, ang matag sakop mahimong makadawat og personal nga saksi niining mga kamatuoran. Kini nga libro makadugang usab sa librarya sa ebanghelyo sa matag sakop ug mahimong importanteng kapanguhaan alang sa panudlo sa pamilya ug alang sa pagtuon diha sa panimalay.
Alang sa panaghisgutan sa mga miting sa Domingo. Kini nga libro mao ang teksto alang sa mga miting sa Domingo sa korum sa Melchizedek Priesthood ug Relief Society. Si Elder Dallin H. Oaks mitudlo nga ang mga libro nga naghan-ay sa mga Pagtulunan sa mga Presidente sa Simbahan “naglakip sa mga doktrina ug mga baruganan.” Kini buhong ug may kalabutan sa mga panginahanglan sa atong panahon, ug kini maayo kaayo alang sa pagtudlo ug panaghisgutan.”1 Ang mga magtutudlo kinahanglang mopokus sa sulod sa teksto ug sa kalabut nga mga kasulatan ug kinahanglang mogamit niining mga pagtulun-an sa mga kahimtang nga sinati sa mga sakop sa klase.
Ang mga magtutudlo kinahanglang mogamit sa mga pangutana sa katapusan sa kapitulo aron makaawhag og panaghisgot diha sa klase. Ang pagribyu sa mga pangutana sa dili pa magtuon sa mga pulong ni Presidente Taylor makahatag og dugang nga panabut sa iyang mga pagtulun-an.
Ang mga miting sa Domingo kinahanglang magpokus sa mga baruganan sa ebanghelyo, personal nga mga ehemplo nga nagtudlo niining mga baruganan, ug mga pagpamatuod sa kamatuoran. Kon ang mga magtutudlo mapainubsanong magtinguha sa Espiritu sa pag-andam ug pagtudlo sa leksyon, ang tanang moapil malig-on sa ilang kahibalo sa kamatuoran. Ang mga lider ug mga magtutudlo kinahanglang moawhag sa mga sakop sa klase sa pagbasa sa mga kapitulo sa dili pa kini hisgutan diha sa mga miting sa Domingo. Pahinumduman gayud nila ang mga sakop sa klase sa pagdala sa ilang mga libro diha sa ilang mga miting ug kinahanglan nga modayeg sa pagpangandam sa mga sakop sa klase pinaagi sa pagtudlo sa mga pulong ni Presidente John Taylor. Kon ang mga sakop sa klase nakabasa pag-una sa kapitulo, sila andam nga motudlo ug mohatag og kaayohan sa usag usa.
Wala kinahanglana o girekomen nga ang mga sakop mopalit og dugang nga mga komentaryo o nga pakisayran nga mga teksto sa pagsuporta sa materyal diha sa teksto. Giawhag ang mga sakop sa pagtan-aw sa mga kasulatan nga gisugyot alang sa dugang nga pagtuon sa doktrina.
Tungod kay gihimo kining teksto alang sa personal nga pagtuon ug pakisayran sa ebanghelyo, daghang mga kapitulo naglakip og daghang mga materyal nga magamit sa mga miting sa Domingo. Busa, ang pagtuon diha sa panimalay mahinungdanon aron gayud makaangkon og daghang kaayohan gikan sa mga pagtulun-an ni Presidente Taylor.
Mga Tinubdan nga Gikutlo Niini nga Libro
Ang mga pagtulun-an ni Presidente Taylor niini nga libro mao ang direkta nga mga kinutlo gikan sa nagkalain-laing mga tinubdan. Gawas kon gikinahanglan ang editoryal nga mga kausaban aron sayon mabasa, ang mga kinutlo mipabilin sa mga panuldok, panitik, ug pagkapital sa orihinal nga mga tinubdan. Tungod niini nga katarungan, ang mga magbabasa mahimong makakita og ginagmay nga pagkausab-usab sa mga pulong diha sa teksto.
Si John Taylor gi-orden nga usa ka Apostol niadtong 1838 ug gipaluyohan isip ikatulo nga Presidente sa Simbahan niadtong 1880.