Kapitulo 6

Ang Gahum sa Pag-ula Personal nga alang Kanato

Pinaagi sa mahinungdanon nga pag-ula, ang matubsanon [o maulaon] nga sakripisyo sa Anak sa Dios, mihimo nga posible nga ang tawo mahimo nga matubos, mapahiuli mabanhaw ug mabayaw ngadto sa taas nga katungdanan nga giplano alang kaniya diha sa paglalang.¹

Gikan sa Kinabuhi ni John Taylor

Si Presidente John Taylor sa kasagaran mitudlo sa mga epekto sa Pag-ula ni Jesukristo sa tanang mga katawhan. Siya usab misulti sa hingpit nga kalipay nga personal niyang nadawat samtang siya namalandong sa mga kalooy sa Pag-ula. “Ako nagmaya nga kita adunay usa ka Manluluwas kinsa adunay gugma alang kanato sa pag-anhi ug pagtubos kanato,” siya miingon, “ug ako nagmaya nga kita adunay usa ka Manluluwas nga gani nagtan-aw sa unahan sa pagtubos sa mga katawhan sa kalibutan.”²

Sa wala pa ang iyang kamatayon, si Presidente Taylor misulat sa mosunod ngadto sa mga sakop sa iyang pamilya, nagpahayag sa paglaum nga diha kaniya pinaagi sa Pag-ula:

“Ako nag-ampo sa Dios ang Amahan sa Kahangturan nga kon kitang tanan makahuman sa atong pagsulay dinhi, kita unta iatubang ngadto sa Ginoo nga walay lama o buling, isip putli ug dungganan nga mga representante sa Simbahan ug gingharian sa Dios sa yuta, ug dayon manununod og usa ka celestial nga himaya sa gingharian sa atong Dios, ug makapahimulos sa walay katapusan nga kalipay uban niadtong kinsa putli ug matarung sa gingharian nga walay katapusang kahayag, pinaagi sa mga kaayo ug pag-ula ni Ginoong Jesukristo, ang atong Manluluwas ug Manunubos, didto sa mga kalibutan nga walay katapusan.”³

Mga Pagtulun-an ni John Taylor

Pinaagi sa Pag-ula ni Jesukristo, ang tanang katawhan mabanhaw.

Nahimo kini karon nga atong katungdanan ang pagpangutana… unsa ang natuman pinaagi sa pag-ula.

Una, ang Pagkabanhaw. Ang silot sa gilapas nga balaod sa panahon ni Adan mao ang kamatayon; ug ang kamatayon naangkon sa tanan. Ang pulong sa Ginoo mao, “Kay sa adlaw nga mokaon ka niini, mamatay ka gayud.” [Genesis 2:17; tan-awa usab sa Moises 3:17.] Ang pag-ula nga gihimo ni Jesukristo mipadangat sa pagkabanhaw gikan sa mga patay, ug mipahiuli sa kinabuhi. Ug gumikan niana si Jesus miingon: “Ako mao ang pagkabanhaw, ug ang kinabuhi; ang mosalig kanako bisan siya mamatay, mabuhi siya;” [Juan 11:25] ug si Jesus sa Iyang kaugalingon nahimo nga unang nabanhaw niadtong mga namatay.

Ang sunod nga pangutana nga mitunga mao, hangtud asa kutob kini nga baruganan ug ngadto kang kinsa kini magamit? Kini moabut ngadto sa tanang tawhanong pamilya; sa tanang mga tawo sa matag nasud.⁴

Ang tanan kinahanglan gayud nga mobangon gikan sa lubnganan, sa moabut nga panahon o sa lain, diha sa samang mga lawas nga ilang naangkon samtang nagpuyo sa yuta. Maingon kini sama gayud sa gihulagway ni Ezequiel bukog ngadto sa iyang bukog, ug unod ug ugat motabon sa mga bukog, ug sa mando sa Ginoo ang gininhawa mosulod sa lawas, ug kita makita, daghan kanato, usa ka katingala sa atong mga kaugalingon [tan-awa sa Ezequiel 37:1–14].

Ako nakadungog nga miingon si Joseph Smith, sa panahon nga siya naghimo og lubnganan didto sa Nauvoo, nga siya nagpaabut, kon ang panahon moabut nga ang mga patay mobangon gikan sa ilang mga lubnganan, nga siya mobangon ug mogakos sa iyang amahan ug inahan, ug molamano sa iyang mga higala. Mao kadto ang iyang sinulat nga hangyo nga kon siya mamatay, pipila ka mabination nga mga higala mosiguro nga siya ilubong duol sa iyang labing minahal nga mga higala, aron kon siya ug si la mobangon sa buntag sa unang pagkabanhaw, siya makagakus kanila, mag-ingon, “Akong amahan! Akong inahan!”

Makahupay kaayo kini niadtong kinsa nagbangutan sa pagkawala sa ilang minahal nga mga higala tungod sa kamatayon, sa pagkasayud nga kita magkauban pag-usab uban kanila! Makadasig kaayo ngadto sa tanan kinsa nagpuyo sumala sa gipadayag nga mga baruganan sa kamatuoran, tingali mas labaw pa niadtong kansang mga kinabuhi gigamit sa katarung, kinsa nagantus ug milahutay sa katapusan, masayud nga sa dili madugay kita mobangon gikan sa lubnganan, ug mogawas nga buhi ug imortal nga mga kalag, aron sa pagpahimulos sa panag-uban sa atong nasulayan ug kasaligan nga mga higala, dili na gayud magantus sa kamatayon, ug sa paghuman sa buhat nga gihatag sa Amahan nga atong buhaton!⁵

Ang Pag-ula nakahimo sa matinud-anon sa pagbuntog sa espirituhanong kamatayon ug pag-angkon sa kahimayaan.

Ang plano sa Dios nga may kalabutan sa tawo mao nga siya kinahanglan nga mapukan, ug napukan ug nakabaton og kahibalo sa maayo ug dautan, (diin nga kahibalo dili unta niya maangkon kon wala ibutang ang iyang kaugalingon niana nga kahimtang), dayon gikinahanglan nga siya mahibalo gayud mahitungod sa pag-ula ug pagtubos nga mahinabo pinaagi sa pagpataliwala ni Jesukristo.⁶

Unsaon, ug sa unsa nga paagi ang mga tawo makapahimulos sa pag-ula ug sa pagkabanhaw? Niini nga paagi, nga ang pag-ula nakapahiuli sa tawo ngadto sa iyang naandan nga kahimtang sa atubangan sa Ginoo, kini mibutang kaniya sa kahimtang ug nakahimo niini nga posible alang kaniya sa pagbaton niana nga kahimayaan ug himaya nga dili unta kini posible alang kaniya sa pagdawat kon wala kini; bisan ang pagkahimo nga anak sa Dios pinaagi sa pagsagop; ug kay usa ka anak nan usa ka manununod sa Dios, ug usa ka kauban nga isigka manununod uban kang Jesukristo [tan-awa sa Mga Taga-Roma 8:16–17]; ug sa ingon, nga si Kristo mibuntog, Siya mihimo niini nga posible, ug mibutang niini sulod sa gahum sa mga nanagtuo diha Kaniya, sa pagbun- tog usab; ug ingon nga Siya gitugotan sa pagpanunod sa himaya sa Iyang Amahan nga Iyang naangkon uban Kaniya sa wala pa ang kalibutan, uban sa Iyang nabanhaw nga lawas, busa pinaagi sa pagsagop, unta kita makabuntog ug molingkod uban Kaniya diha sa Iyang trono, maingon nga siya mibuntog ug nakalingkod diha sa trono sa Iyang Amahan. …

…Pinaagi sa Iyang pag-ula, ang mga tumutuo diha ni Kristo, ug kadtong kinsa nagsunod sa Iyang balaod, miambit sa Iyang himaya ug kahimayaan, ug mga manununod sa Dios nga Kapangulohan; samtang kadtong wala magsunod sa Iyang balaod bisan nabanhaw dili makapanunod niining kahimayaan; sila gibanhaw gikan sa mga patay, apan dili makapanunod sa celestial nga himaya kon dili masulundon sa celestial nga balaod. … Si Jesus miingon, “Sa ingon niini nahisulat, nga ang Kristo kinahanglan gayud nga magaantus, ug sa ikatulo ka adlaw mabanhaw siya gikan sa mga patay: ug nga sa iyang ngalan ang paghinulsol ug ang pagpasaylo sa mga sala kinahanglan igawali ngadto sa tanang kanasuran, sugod sa Jerusalem.” [Lucas 24:46–47.]⁷

Ang Pag-ula nagtubos sa gagmay nga mga bata ug niadtong mga katawhan kinsa nangamatay nga walay kahibalo sa ebanghelyo.

Ang Manunubos sa Iyang kaugalingon, sa diha nga nagpuyo pa dinhi sa yuta, miingon ngadto sa Iyang mga tinun-an … , “Paduola kanako ang mga bata ug ayaw ninyo sila pagpugngi, kay ang gingharian sa Dios ila sa mga sama kanila. Sa pagkatinuod, magaingon ako kaninyo, nga bisan kinsa nga dili modawat sa gingharian sa Dios maingon sa dinawatan sa gamayng bata, siya dili makasulod niini.” [Lucas 18:16–17.] Ug human sa Iyang pagkalansang sa krus ug pagkabanhaw miusab Siya niining sama nga pahimangno ngadto sa Iyang mga tinun-an nga Nephite: “Ug usab Ako moingon nganha kaninyo, kamo kinahanglan maghinulsol, ug magpabunyag pinaagi sa akong ngalan, ug mahisama sa usa ka gamay nga bata, o kamo dili gayud makapanunod sa gingharian sa Dios.” [3 Nephi 11:38.]

Kon wala ang kalapasan ni Adan kadtong mga bata dili unta mabuhi; pinaagi sa pag-ula sila nahimutang diha sa kahimtang sa kaluwasan nga wala nay buhaton sa ilang kaugalingon. Kini nga mga bata sumala sa hunahuna sa mga batid sa estadistika, lakip sa labaw sa katunga sa tawhanong pamilya, kinsa makapahinungod sa ilang kaluwasan sa pagpataliwala ug pag-ula lamang sa Manluluwas. Busa, maingon sa gipamahayag sa laing dapit, diha sa ubang misteryoso, dili matugkad nga paagi, si Jesus miangkon sa responsibilidad nga natural unta nga responsibilidad ni Adan; apan diin mahimo lamang nga matuman pinaagi sa pagpataliwala sa Iyang kaugalingon, ug sa pag-angkon diha sa Iyang kaugalingon sa ilang mga kasub-anan, nag-angkon sa ilang mga rsponsibilidad, ug nagpas-an sa ilang mga kalapasan o mga sala.

Sa usa ka paagi alang kanato nga dili masabut ug dili maasoy, siya mipas-an sa kabug-at sa mga sala sa tibuok kalibutan; dili lamang sa kang Adan, apan sa iyang mga kaliwatan; ug sa pagbuhat niana, miabli sa gingharian sa langit, dili lamang ngadto sa mga tumutuo ug sa tanang misunod sa balaod sa Dios, apan ngadto sa labaw sa katunga sa tawhanong pamilya kinsa nangamatay sa wala pa sila moabut sa mga tuig sa pagkahingkod, ingon man usab ngadto sa mga hentil, kinsa, nangamatay nga walay balaod, pinaagi sa Iyang pagpataliwala, mabanhaw nga walay balaod, ug pagahukman nga walay balaod, ug sa ingon makaapil, sumala sa ilang kapasidad, sa mga buhat ug katakus, diha sa mga panalangin sa Iyang pag-ula.⁸

Tungod kay ang Manluluwas “mobati sa pagkalooy kanato sa atong mga kaluyahon,” siya sa hingpit nga makasabut sa atong mga pagsulay.

Gikinahanglan nga sa dihang ang Manluluwas dinhi pa sa yuta, nga siya kinahanglan nga pagatintalon diha sa tanan nga mga paagi, sama ngari kanato, ug “mobati sa pagkalooy kanato sa atong mga kaluyahon,” [Mga Hebreohanon 4:15] aron makasabut sa mga kahuyang ug kalig-on, sa mga kahingpitan ug mga pagka dili hingpit sa makalolooyng napukan nga tawhanong kinaiya. Ug sa pagkatuman sa butang nga iyang gianhi sa kalibutan aron buhaton; sa panginahanglan nga makigbisog sa pagpakaaron ingnon, pagkadautan, kahuyang, ug kabuang sa tawo; nakigbatok sa pagtintal ug pagsulay diha sa tanang nagkalainlain nga mga nga mga matang, ug nakabuntog; siya nahimong “kasaligan nga halangdong pari” [Mga Hebreohanon 2:17] aron sa pagpangamuyo alang kanato didto sa walay katapusan nga gingharian sa iyang Amahan.

Siya nahibalo kon unsaon sa pagbanabana ug pagbutang sa angay nga bili diha sa tawhanon nga kinaiya, kay siya, human mabutang sa sama nga kahimtang maingon kanato, nahibalo kon unsaon sa pagdala sa atong mga kahuyang ug mga kakulangan, ug hingpit nga makasabut sa kalalom, gahum, ug kalig-on sa mga kasakit ug mga pagsulay nga kinahanglan sagubangon sa mga tawo sulod niining kalibutana. Ug sa ingon sa masinabuton nga paagi ug pinaagi sa kasinatian, siya makaantus niini. ⁹

Ang unang mga baruganan ug mga ordinansa sa ebanghelyo atong gikinahanglan aron makadawat sa hingpit nga mga panalangin sa Pag-ula.

Kay nakahibalo sa mahinungdanong mga panalangin, mga kahigayunan, mga gahum, ug mga kahimayaan nga gibutang nga maabut sa tawo, pinaagi sa pag-ula ni Jesukristo, kini nahimong atong katungdanan sa pagsusi kon unsa ang gikinahanglan sa tawo aron pagbutang kaniya nga makaangkon niini. …

Ang mga kahimtang nga gikinahanglan sa tawhanong pamilya aron makabaton sila sa taas nga kahimayaan diin ang pag-ula makahimo niini nga posible alang kanila sa pagdawat, mao ang: Una, Hugot nga pagtuo diha sa Dios isip atong Amahan ug halangdon Labing Gamhanang Tigmando sa mga kalibutan; kansang mga kamot mao ang mga kapalaran sa tawhanong pamilya; kang kinsa kita nangabuhi ug nagalihok ug nagalungtad. Ug sa Iyang Anak nga si Jesukristo, isip ang Kordero nga gipatay sa wala pa ang katukuran sa kalibutan, isip halangdon nga Tigpataliwala ug mahinungdanon nga maulaong sakripisyo nga gihatag sa Amahan sa wala pa ang paglalang, ug nahingpit pinaagi sa paghalad sa Iyang kaugalingon diha sa krus. Kay “gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.” [Juan 3:16.] O, sa paggamit sa mga pulong ni Haring Benjamin sa mga Nephite:

“Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug tanan nga gahum, sa langit ug sa yuta; tuo nga ang tawo dili makasabut sa tanan nga mga butang diin ang Ginoo mahimo nga makasabut.” [Mosiah 4:9.]

O maingon sa gisulat ni Pablo; “Kay bisan kinsa nga magaduol sa Dios kinahanglan nga magatuo sa iyang pagkaanaa, ug nga siya magabalos ra sa mga magapangita kaniya.” [Mga Hebreohanon 11:6.]

Ang ikaduha nga baruganan sa Ebanghelyo sa kaluwasan, mao ang paghinulsol. Kini usa ka kinasingkasing ug diosnon nga kasubo ug sa pagbiya sa sala, giubanan sa hingpit nga katuyoan sa kasingkasing aron pagsunod sa mga kasugoan sa Dios. Ingon sa gisulat ni Propeta Isaias: “Pabiyai sa dautan ang iyang dalan, ug sa tawo nga dili matarung ang iyang mga hunahuna; ug pabalika siya sa Ginoo, ug siya malooy kaniya; ug sa atong Dios, kay siya mopasaylo sa madagayaon gayud.” [Isaias 55:7.] Ug sa pagkutlo gikan sa Basahon ni Mormon:

“Ug usab, tuo nga kamo kinahanglan gayud maghinulsol sa inyong mga sala ug mobiya kanila, ug magpaubos sa inyong mga kaugalingon sa atubangan sa Dios; ug mangutana sa kinasingkasing nga siya mopasaylo kaninyo; ug karon, kon kamo motuo sa tanan niini nga mga butang tan-awa nga kamo mobuhat kanila.” [Mosiah 4:10.]

Ang ikatulo, Bunyag alang sa kapasayloan sa mga sala, sa atong personal nga mga kalapasan, diin, pinaagi niini nga paagi, nga gihatag sa balaanon nga kalooy, mao, nga pinaagi sa pag-ula, mapala. Sa paggamit sa mga pulong ni Pablo: “Busa, pinaagi sa bautismo gilubong kita uban kaniya ngadto sa kamatayon, aron nga maingon nga si Kristo gibanhaw gikan sa mga patay pinaagi sa himaya sa Amahan, kita usab managgawi diha sa kabag-o sa kinabuhi. Kay kon kita nahiusa man ngadto kaniya diha sa usa ka kamatayon nga sama sa iya, nan, mahiusa gayud usab kita ngadto kaniya diha sa pagkabanhaw nga sama sa iya.” [Mga Taga-Roma 6:45.]

Sunod, ang pagdawat sa Espiritu Santo pinaagi sa pagpandong sa mga kamot niadtong kinsa nakadawat sa Balaan nga Priesthood, ug takus nga gitugotan, gi-orden, ug gihatagan og gahum aron sa pagpakigbahin niini nga panalangin: Sa ingon si Pedro nagsangyaw diha sa adlaw sa Pagkunsad:

“Paghinulsol kamo, ug pabautismo kamo ang matag-usa kaninyo sa ngalan ni Jesukristo tungod sa kapasayloan sa inyong mga sala; ug madawat ninyo ang gasa sa Espiritu Santo. Kay ang saad alang kaninyo ug sa inyong mga anak, ug sa tanan nga atua sa halayo, sa matag-usa nga pagatawgon sa Ginoo nga atong Dios.” [Mga Buhat 2:38–39.]

Kini mao ang pasiuna o unang mga baruganan sa walay katapusan, walay pagkausab nga Ebanghelyo sa atong Ginoo ug Manluluwas nga si Jesukristo, nga mao ug sama sa gihapon ngadto sa tanang mga tawo, taliwala sa tanang mga nasud, sa tanan nga mga katuigan, bisan kanus-a, o bisan diin nga gitudlo sa pagtugot sa langit. Tungod niana atong mabasa: Kini “gisugdan sa pagsangyaw, gikan sa sinugdanan, ingon nga gipadayag sa balaan nga mga anghel nga gipadala gikan sa atubangan sa Dios, ug pinaagi sa iyang kaugalingon nga tingog, ug pinaagi sa gasa sa Espiritu Santo. Ug sa ingon ang tanan nga mga butang gipamatud- an ngadto kang Adan, pinaagi sa usa ka balaan nga ordinansa, ug ang Ebanghelyo gisangyaw, ug usa ka balaod ang gipadala, aron kini maanaa sa kalibutan, hangtud sa katapusan niini.” [Tanawa sa Moises 5:58–59.]¹⁰

Kita moambit sa sakramento agi og handumanan sa Pag-ula sa Manluluwas.

Mga sakripisyo, nga gihalad gikan sa mga adlaw ni Adan … , mao ang [nagpaila] sa mahinungdanon nga maulaon nga sakripisyo diin iyang gihimo pinaagi sa pagsakripisyo sa Iyang kaugalingon. Daghan kaayo niini nga mga sumbanan ug mga pagkasama ug mga matang diin Siya ang orihinal nga ehemplo—ang kahulugan, ang pagkatinuod gihulagway ug gitimaan nang daan pinaagi sa ubang mga sakripisyo nga gihalad gikan pa sa sinugdanan. …

Apan sa wala pa ang pagsakripisyo sa Iyang kaugalingon, isip mahinungdanon nga maulaon nga sakripisyo, nakatuman sa balaod ug nakahimo niini nga dungganan, ug kay nakapaila na sa Ebanghelyo, Siya nakigkita sa Iyang mga tinun-an…aron sa pag-pangaon sa Pagpalabay, Siya dayon misulti kanila, “Ginatinguha ko sa hilabihan gayud pagkaon niining pasko uban kaninyo sa dili pa ako magaantus.” [Lucas 22:15.] Sa pagkaon sa unsa uban kaninyo? Sa Pagpalabay. Sa pagkaon sa unsa uban kaninyo? Ang Sakramento sa Panihapon sa Ginoo. … Ang duha ka seremonyas nasentro diha Kaniya, Siya mao ang kalangkuban sa duha, Siya ang Binuhat nga gihatag sa wala pa ang katukuran sa yuta, ug gipanagna sa mga tawo sa Dios sa tibuok nag-unang mga katuigan; ug usab diha sa asoy sa kang kinsa ang mga sakripisyo gihalad sa tanang mga sulugoon sa Ginoo, gikan sa pagkapukan ni Adan ngadto niana nga panahon; ug sa tanang nagkalainlain nga [mga sakripisyo] nga kaniadto gihalad nagtudlo Kaniya, alang kang kinsa kining tanan gihimo ug kang kinsa kining tanan gisentro. Sa lain nga bahin, Siya mao ang mipaila sa labaw pa ka hingpit nga balaod, ug naghalad sa Iyang kaugalingon sa makausa alang sa kaayohan sa tanan, usa ka walay kinutuban nga pag-ula, Siya, pinaagi niining sakripisyo, mituman niana nga giplano sa Makagagahum sa wala pa ang kalibutan, ug diin ang dugo sa mga toro, sa mga kanding ug mga karnero mao lamang ang simbolo.

Mahitungod sa unsay hapit na gayud mahitabo, Siya mipasiugda sa sakramento sa Panihapon sa Ginoo agi og handumanan niining mahinungdanon nga katapusang buhat sa pagtubos. Diha sa lamesa, “Siya mikuha sa tinapay, ug sa nakapasalamat na siya, kini iyang gipikaspikas ug kanila gihatag niya nga nag-ingon, Kini mao ang akong lawas nga gihatag alang kaninyo: buhata ninyo kini sa paghandom kanako;” [Lucas 22:19] human niana, “Gikuha niya ang kopa, ug sa nakapasalamat na siya, kanila gihatag kini niya nga nagingon, Uminom kamo niini, kamong tanan; kay kini mao ang akong dugo sa pakigsaad, nga igaula alang sa daghan sa kapasayloan sa mga sala.” [Mateo 26:27–28.] …

Maingon nga gikan sa sinugdanan sa kalibutan ngadto sa panahon sa diha nga ang Pagpalabay gisugdan, mga sakripisyo gihalad isip handumanan o simbolo sa sakripisyo sa Anak sa Dios; busa gikan sa panahon sa Pagpalabay hangtud niana nga panahon sa dihang Siya miabut aron sa paghalad sa Iyang kaugalingon, kini nga mga sakripisyo ug mga sumbanan ug mga pagkasama sa mainampingon nga paagi gihimo sa mga Propeta ug mga Patriarch; sumala sa sugo nga gihatag ngadto ni Moises ug ubang mga sumusunod sa Ginoo. Ingon man usab Siya mihimo sa Iyang kaugalingon nagtuman niini nga kinahanglanon, ug nagsunod sa Pagpalabay sama sa gibuhat sa uban; ug karon kita, human ang mahinungdanon nga sakripisyo nahalad, miambit sa Sakramento sa Panihapon sa Ginoo agi og handumanan niana. Sa ingon kini nga buhat mao ang mahinungdanong sumpay tali sa milabay ug sa umaabut; sa ingon Siya mituman sa balaod, nakatagbaw sa mga gipangayo sa kaangayan, ug mituman sa mga gikinahanglan sa Iyang Langitnong Amahan.¹¹

Mga Sugyot alang sa Pagtuon ug Panaghisgutan

Unsa ang natuman pinaagi sa Pag-ula ni Jesukristo?
Sa unsa nga mga paagi nga ang doktrina sa pagkabanhaw nakahatag kaninyo og kahupayan?
Sa unsa nga paagi nga ang Pag-ula nakaapekto kaninyo sa personal nga paagi? Sa unsa nga paagi kini nakatabang kaninyo nga mahibalo nga ang Manluluwas “makahimo sa hingpit nga pagsabut sa kalalom, gahum ug kalig-on sa [inyong] mga kasakit ug mga pagsulay”? Unsa nga mga kasinatian ang anaa kaninyo nga nakapalig-on sa inyong mga pagpamatuod sa Pag-ula?
Unsa ang ipasabut nga mahimong usa ka anak nga lalaki o usa ka anak nga babaye ni Kristo pinaagi sa “pagsagup”? (Tan-awa usab sa Mosiah 5:19, 15; D&P 25:1.)
Unsa ang atong gikinahanglan kanato aron kita makadawat sa “mahinungdanong mga panalangin, mga kahigayunan, mga gahum ug mga kahimayaan” nga maanaa kanato pinaagi sa Pagula? (Tan-awa usab sa Mga Artikulo sa Hugot nga Pagtuo 1:34.)
Unsa ang relasyon tali sa sakramento ug sa Pag-ula?

May Kalabutan nga mga Kasulatan: Mateo 26:26–28; Mosiah 15:22–25; Alma 34:13–15; 3 Nephi 18:1–12; Moroni 10:32–33; Moises 5:48

Jesus Christ — “Ingon nga si Kristo mibuntog, Siya mihimo niini,nga posible, ug mibutang niini sulod sa gahum sa mga tumutuo diha Kaniya sa pagbuntog usab”