Kapitulo 2

Ang Walay Katapusang Ebanghelyo

Ang walay katapusang ebanghelyo. … wala mahibaloi hangtud ang Ginoo mipadayag niini gikan sa mga kalangitan pinaagi sa tingog sa iyang anghel, ug sa dihang atong nadawat kining mga baruganan ug kini magpabilin ngari kanato, kita makabaton dayon sa mga baruganan sa kinabuhing dayon.¹

Gikan sa Kinabuhi ni John Taylor

Niadtong 1836 sa Toronto, Canada, si John Taylor ug pipila sa laing mga tawo magmiting makadaghan sa usa ka semana aron sa pagtuon sa Biblia ug maningkamot nga makasabut sa kamatuoran. Lig-on silang nagtuo sa pagpundok sa Israel, sa mga gasa sa Espiritu, sa milinyal nga paghari sa Manluluwas, sa panginahanglan sa mga apostoles ug mga propeta, ug sa kamahinungdanon sa pagpahigayon sa mga ordinansa pinaagi sa tukma nga awtoridad gikan sa Dios. Bisan pa niana, nianang panahona sila wala makahibalo og bisan unsang simbahan nga nagtudlo niining mga butanga. Mahitungod sa ilang pagsiksik alang sa kamatuoran, si John Taylor miingon, “Kami nag-ampo sa Ginoo ug nagpuasa ug nag-ampo nga ang Dios motudlo kanamo sa tinuod nga mga baruganan, nga Iyang gipahiuli ang lunsay, karaan nga Ebanghelyo, ug nga kon adunay usa ka tinuod nga simbahan sa yuta nga siya mopadala ngari kanato og mensahero.”

Ang ilang mga pag-ampo sa wala madugay natubag sa pag-abut ni Elder Parley P. Pratt. Sa wala pa mobiya si Elder Pratt sa iyang misyon, si Elder Heber C. Kimball nanagna ngadto kaniya, “Kabubut-on kini sa Ginoo nga ikaw kinahanglang moadto sa Canada, adunay mga tawo didto kinsa makugihong nangita sa kamatuoran, ug daghan kanila motuo sa imong mga pulong, ug modawat sa Ebanghelyo.”

Si Elder Pratt nagsugod sa pagsangyaw didto sa Toronto, ug sa wala madugay gipaila ngadto ni John Taylor ug niadtong kinsa nagtuon uban kaniya. Unya si Presidente Taylor misulat: “Mibati kami og tumang kalipay sa iyang pagsangyaw; apan sa dihang mihatag siya sa iyang pagpamatuod mahitungod kang Joseph Smith ug sa Basahon ni Mormon kami wala masayud kon unsay among isulti. Akong gisulat ang walo sa unang mga sermon nga iyang gisangyaw ug mitandi niini uban sa mga kasulatan. Gisusi usab nako ang ebidensya mahitungod sa Basahon ni Mormon ug gibasa ang Doktrina ug mga Pakigsaad. Gihimo ko kini kanunay sulod sa tulo ka mga semana ug misunod ni [Brother] Parley gikan sa usa ka dapit ngadto sa laing dapit.”²

Sa wala madugay si John Taylor nakombinsir nga ang walay katapusang ebanghelyo gipahiuli na. Siya nabunyagan niadtong 9 sa Mayo 1836. Isip usa ka misyonaryo, isip usa ka Apostol, ug sa katapusan isip Presidente sa Simbahan, iyang gikalipay ang pagtudlo sa mahangturon, walay kausaban nga mga kamatuoran sa ebanghelyo.

Mga Pagtulun-an ni John Taylor

Ang ebanghelyo makatabang kanato nga makasabut sa mga hiyas sa Dios ug makaandam kanato sa pagdawat sa kahimayaan.

Kita, isip mga Santos sa Ulahing mga Adlaw, nagtuo, una, sa ebanghelyo, ug kana importante kaayo nga isulti, kay ang ebanghelyo naglakip sa mga baruganan nga motugkad sa kahiladman, mokatap, ug mouswag pa kay sa bisan unsang butang nga atong mahanduraw. Ang ebanghelyo nagtudlo kanato bahin sa pagkatawo ug mga hiyas sa Dios. Kini usab nagtudlo kanato sa atong relasyon ngadto niana nga Dios ug sa nagkalain-laing mga responsibilidad nga ania kanato ngadto kaniya isip iyang mga anak. Kini nagtudlo kanato sa nagkalain-laing mga katungdanan ug mga responsibilidad nga ania kanato ngadto sa atong mga pamilya ug mga higala, ngadto sa katilingban, ngadto sa mga buhi ug sa mga patay. Kini nagpadayag ngari kanato sa mga baruganan kalabut sa mga umaabot. Gani, sumala sa panultihon sa usa sa daang mga tinun-an, kini makahatag og kinabuhi ug pagkawalay kamatayon gidala niya ngadto sa kahayag,” [tan-awa sa 2 Timoteo 1:10] modala kanato ngadto sa pagpakigrelasyon uban sa Dios, ug moandam kanato alang sa kahimayaan sa mahangturong kalibutan.³

Kining Ebanghelyo makahatag og kahigayunan sa tawo diha sa pagpakigsulti sa Dios, ang iyang Langitnong Amahan, kining Ebanghelyo makatudlo bahin sa kinabuhi ug pagka-imortal; kining Ebanghelyo gipahayag alang sa kaayohan sa tanang mga tawo sa tanang mga bahin sa yuta. … Kini usa ka mensahe sa kaluwasan sa mga nasud sa yuta. … ang Dios nagpakabana sa kaayohan sa tibuok tawhanong pamilya, ug tungod niini nga katuyoan Siya mitukod sa mga baruganan dinhi sa yuta nga nahimo na didto sa mga kalangitan—usa ka Ebanghelyo nga nagpatigbabaw sa mga Dios didto sa mahangturong mga kalibutan, naglakip sa mga baruganan nga gibana-bana sa pagbayaw, pagtuboy ug paghimaya sa tawhanong pamilya.⁴

Ang ebanghelyo mahangturon ug walay kausaban.

Ang mahinungdanong mga baruganan sa kamatuoran nagkadaiya ug malukupon. … Kini diha na sa miaging panahon, ania kini karon, ug molungtad sa umaabot. Sa ebanghelyo ni Jesukristo nalakip ang tanang kamatuoran, kon bahin sa kaluwasan sa tawhanong pamilya, ug tungod niini kini gihisgutan diha sa mga kasulatan nga mao ang walay katapusang ebanghelyo. …

… Ang Dios, sama sa iyang Anak nga si Jesukristo, “sama ra kagahapon, sa karon, ug sa kahangturan.” [1 Nephi 10:18.] Managsama sa salabutan, managsama sa kaputli, managsama sa iyang mga proyekto, mga plano ug mga desenyo; siya sa laktud, walay kausaban. Ug ako nakahibalo nga kon ang mga Santos kinsa nakigsulti kaniya sa karaang mga adlaw magpakita dinhi sa yuta karon, sila makakaplag sa samang pamaagi sa pagpakigsulti, samang paagi sa paghatag og salabutan, ug ang susamang walay kausaban nga binuhat nga diha na mga 1,800, 4,000, o 6,000 ka mga tuig na ang milabay.

Tinuod nga ang tawo dili sa tanang higayon makahimo sa pagdawat ug pagtamud sa sama nga ang-ang sa kahayag, kamatuoran, ug salabutan nga ilang naangkon sa ubang mga panahon. Ang Dios sa pipila ka mga higayon mikuha sa kahayag sa iyang nawong— ang iyang Balaan nga Espiritu—ang kahayag ug salabutan nga nagagikan kaniya—sa piho nga bahin gikan sa tawhanong pamilya; apan ang iyang mga balaod walay kausaban ug siya mao ang sama nga mahangturon, walay kausaban nga binuhat.

Ang kamatuoran dili mausab. Unsa ang tinuod kaniadtong 1,800, 4,000, o 6,000 ka mga tuig na ang milabay tinuod karon, ug unsa ang bakak sa bisan unsang panahon sa kalibutan bakak usab karon. Ang kamatuoran, sama sa halangdong Elohim, mahangturon ug dili mausab, ug kini atong responsibilidad nga makat- on niining mga baruganan, aron masayud unsaon sa pagtamud niini, ug sa pagdumala sa atong mga kaugalingon sa husto nga paagi.

Ingon nga ang ebanghelyo usa ka baruganan nga nagagikan sa Dios, sama sa iyang tagsulat kini “sama kagahapon, sa karon, ug sa kahangturan,”—mahangturon ug walay kausaban. Ang Dios mi-orden niini sa wala pa ang mga bitoon sa kabuntagon nag-am-bahan sa pag-awit tungod sa kalipay, o sa wala pa kining kalibutan mabuhat, alang sa kaluwasan sa tawhanong kaliwatan. Diha kini sa hunahuna sa Dios, ug kon tan-awon pag-ayo kini makita ingon nga usa ka mahangturon, walay kausaban, makanunayong plano nga moluwas, mopanalangin, mohimaya ug mopasidungog sa tawo.⁵

Kining mao nga Ebanghelyo gisangyaw ngadto ni Seth, ug sa tanang mga tawo nga mga Patriyarka sa karaang panahon [sa wala pa ang lunop], ug sila nangalagad ubos niini nga awtoridad. Pinaagi sa gahum niini, nga gipakita na kanato, si Enoch ug ang iyang mga katawhan nahimaya. Bahin ni Noe gisulat: “Ug ang Ginoo mi-orden ni Noe sunod sa iyang kaugalingong kapunongan, ug misugo kaniya nga siya molakaw ug mosangyaw sa iyang ebanghelyo ngadto sa mga katawhan, gani ingon nga kini gihatag ngadto ni Enoch.” [Moises 8:19.] Ug dugang, pa nga gikutlo gikan sa pagpamatuod ni Noe sa wala pa ang lunop: Ug nahinabo nga si Noe mipadayon sa iyang pagsangyaw ngadto sa mga katawhan, nag-ingon, Paminaw, ug patalinghug sa akong mga pulong; tuo ug paghinulsol sa inyong mga sala ug pagpabunyag sa ngalan ni Jesukristo, ang Anak sa Dios, gani ingon sa atong mga amahan, ug kamo makadawat sa Espiritu Santo, nga kamo makaangkon sa tanan nga mga butang nga gipakita; ug kon kamo dili magbuhat niini, ang mga lunop moabut diha kaninyo.” [Tan-awa sa Moises 8:23–24.]

Gikan niini atong makat-unan nga ang mga baruganan sa Ebanghelyo sa unang mga panahon sa kalibutan pareha ra nianang gitudlo sa atong panahon.

Ang Ebanghelyo ug ang Balaan nga Priesthood nagpadayon gikan kang Noe ngadto ni Abraham. “Si Abraham nakadawat sa priesthood gikan ni Melchizedek, kinsa nakadawat niini pinaagi sa kaliwatan sa iyang mga amahan, gani gikan ni Noe.” [D&P 84:14] … Ang kahibalo ug paggamit sa Ebanghelyo gipadayon pinaagi ni Isaac, Jacob, Joseph ug sa ubang mga Patriyarka, hangtud sa panahon ni Moises. …

Kini mao ang samang Ebanghelyo nga gisugo sa gilansang sa krus nga Manunubos sa Iyang mga tinun-an nga isangyaw, sa dihang “siya miingon ngadto kanila, “Panglakaw kamo sa tibuok kalibutan ug iwali ninyo ang Maayong Balita ngadto sa tanang binuhat. Ang motuo ug magpabunyag maluwas; apan ang dili motuo pagahukman sa silot. Ug kanila nga motuo maganunot kining maong mga ilhanan: sa akong ngalan ilang pagulaon ang mga yawa; magasulti silag mga bag-ong sinultihan; makakupot silag mga bitin, ug kon makainom silag bisan unsa nga makahilo, dili sila mangadaut; ang mga masakiton pagapandongan nila sa ilang mga kamot, ug mangaayo sila.” [Marcos 16: 15–18] …

Tungod niini atong makita ang adlaw sa Pentecostes, si Pedro, ang senyor sa mga Apostoles, agig tubag sa singgit sa matuohon nga mga tawo, “Mga igsoon, unsa may among pagabuhaton?” sa pagtubag sa mga pulong nga gikutlo na: “Paghinulsol kamo, ug pagpabunyag, kamo matag-usa kaninyo sa ngalan ni Jesukristo tungod sa kapasayloan sa inyong mga sala; ug madawat ninyo ang gasa sa Espiritu Santo. Kay ang saad alang kaninyo ug sa inyong mga anak ug sa tanan nga atua sa halayo, sa matag-usa nga pagatawgon sa Ginoo nga atong Dios.” [Tan-awa sa Mga Buhat 2:37–39.]

Usab, mao kining walay katapusan, dili matuis walay kausaban nga Ebanghelyo kansang pagpahiuli niini sa yuta nga gipamulong ni Juan, ang Apostol, namulong ingon sa mosunod:

“Ug nakita ko ang laing anghel nga naglupad sa taliwala sa kalangitan, ug kini siya may gidalang walay katapusang ebanghelyo sa pagsangyaw ngadto sa mga nanagpuyo sa yuta, sa tanang kanasuran ug kaliwatan ug pinulongan ug katawhan, nag-ingon uban sa makusog nga tingog, “Kahadloki ninyo ang Dios ug kaniya ihatag ninyo ang himaya, kay nahiabut na ang takna sa iyang paghukom; ug simbaha ninyo siya nga maoy nagbuhat sa langit, ug sa yuta, sa dagat, ug sa mga tuburan sa tubig.” [Pinadayag 14:6–7.]

Gikan sa Biblia, moadto kita sa Basahon ni Mormon, ug sa iyang mga pahina madiskobrehan nga ang samang Ebanghelyo nga gisugo ni Jesus sa Iyang mga tinun-an nga isangyaw ngadto sa tibuok kalibutan, gisangyaw niini nga yuta, gikan sa unang mga panahon. Ang mga Jaredite nakasinati niini pinaagi sa mga pagpadayag nga gihatag ngadto sa igsoong lalaki ni Jared, nga sa usa niini si Jesus miingon kanila:

“Tan-awa, Ako mao siya kinsa giandam gikan sa katukuran sa kalibutan sa pagtubos sa akong mga katawhan. Tan-awa, Ako mao si Jesukristo. Ako mao ang Amahan ug ang Anak. Ngari kanako mahimo nga ang mga katawhan adunay kinabuhi, ug nga sa kahangturan, sila kinsa motuo sa akong ngalan; ug sila mahimo nga akong anak nga mga lalaki ug anak nga mga babaye.” [Ether 3:14.] …

Sa dihang si Jesukristo nagpakita sa Iyang kaugalingon ngadto sa mga Nephite, Siya misangyaw sa samang mga baruganan nga Iyang gitudlo kaniadto sa mga Judeo, magdugang matag karon ug unya og dugang mga kamatuoran, tungod sa hilabihang pagtuo sa unang ginganlan nga mga tawo; “Ug siya gayud mipatinaw sa tanan nga mga butang, bisan gikan sa sinugdanan hangtud sa panahon nga siya kinahanglan moanhi diha sa iyang himaya.” [Tan-awa sa 3 Nephi 26:3.] Uban sa laing mga butang Siya miingon: “Ug si bisan kinsa nga mopatalinghug sa akong mga pulong, ug maghinulsol ug magpabunyag, ang mao maluwas. Siksika ang mga propeta, kay adunay daghan nga magpamatuod niini nga mga butang.” [3 Nephi 23:5.]

Ug kini mao ang samang Ebanghelyo, giubanan sa samang gahum ug espiritu, gipanalanginan sa samang pagdasig, ug gigiyahan sa samang Priesthood, nga karon gisangyaw ngadto sa tibuok kalibutan alang sa usa ka saksi.⁶

Ang ebanghelyo naggiya kanato sa dalan sa kalipay, pagtubo, ug kagawasan.

Ang mga baruganan sa ebanghelyo, ngadto sa mga dili tumutuo, kini walay bili ni epekto. Apan alang kanato, kinsa mituo niini, kini naglakip sa tanang butang kalabut sa kaayohan sa tawo karon ug sa kahangturan. Kanato ang ebanghelyo mao ang alpa ug omega, ang sinugdanan ug ang katapusan. Kini gila-la uban sa atong mga tinguha, kalipay, ug kalingawan, dinhi sa kinabuhi o niana nga moabut.

Atong gihunahuna nga, sa dihang mipasakop kita niini nga simbahan ug midawat sa bag-o ug walay katapusang pakigsaad, tibuok nga kinabuhi kini nga pag-alagad ug makaapekto sa tanang mga relasyon karon ug sa kahangturan. Ug samtang kita mouswag, kini nga mga ideya nga, sa sinugdanan, may pagkalubog ug mangitngit, nahimong klaro, tinuod, may kinabuhi, mahikap ug tataw sa atong pagsabut, ug kita nakaamgo nga kita nagbarug sa yuta isip mga anak sa Dios, ang mga representante sa langit. Atong gibati nga ang Dios mipadayag ngari kanato sa walay katapusang ebanghelyo, ug nga may kalabutan niana mao ang walay katapusang mga pakigsaad ug mga relasyon.

Ang ebanghelyo, sa sinugdanan nga bahin sa iyang paglihok, nagsugod, sama sa gisulti sa propeta nga kini angay nga, “mopabalik sa mga kasingkasing sa mga amahan ngadto sa mga anak ug ang mga kasingkasing sa mga anak ngadto sa mga amahan.” [Tan-awa sa Malaquias 4:6.] Kita dili na mangutana, sama sa unang mga panahon, “Kinsa ako?” “Diin ako gikan?” “Unsa ang akong gibuhat dinhi?” o Unsa ang akong tumong sa akong pagpakabuhi?” Kay kita adunay kasiguroan bahin niining mga butanga. Gihimong yano kini ngari kanato pinaagi sa mga bunga sa ebanghelyo. … Ang kahibalo niining mga butanga ug sa daghang pang susamang matang nga naggiya kanato sa pagpadayon niana nga dalan nga atong gisubay. Niini lamang nga makapugong kanato sa pagyukbo ngadto sa mga pagsabut, mga kapritso, mga ideya ug sa mga binuang sa mga tawo.

Ingon nga nahayagan sa espiritu sa mahangturong kamatuoran, nga nakaambit sa Espiritu Santo, ug ang atong paglaum misulod ngadto sa tabil, ingon nga si Jesus, ang atong nag-una, nahisulod na, ug sa pagkasayud nga kita mga anak sa Dios ug nga kita naglihok diha sa tanang mga butang nga may kalabutan sa kahangturan, kita mopadayon bisan sa paglakaw sa atong agianan nga magbarug gikan sa mga pahiyom ug sa wala hunahunaa nga mga pagmug-ot sa mga tawo.⁷

Ang Dios mitugyan ngari kanato sa ebanghelyo ug sa halangdong priesthood, nga dili alang, ingon sa gidahum sa uban, sa pag-ulipon sa mga tawo o sa pagpanglupig sa mga tanlag sa mga tawo, apan sa paghimo sa tanang mga tawo nga gawasnon ingon nga ang Dios gawasnon; nga sila moinom sa mga sapa “diin molipay sa siyudad sa Dios,” [Salmo 46:4] aron sila mapataas ug dili mapaubos; nga sila mahimong putli ug dili mahugawan; nga sila makat-on sa mga balaod sa kinabuhi ug maglakaw diha kanila, ug dili maglakaw sa mga pamaagi sa dautan ug mamatay.⁸

Pinaagi sa ebanghelyo ni Jesukristo kita gidala ngadto sa pagpakigrelasyon sa Dios. Sama sa giingon sa usa sa karaang mga apostoles miingon: “Mga hinigugma, kita karon mga anak sa Dios; kon maunsa unya kita, kini wala pa ipakita, apan kita nasayud nga kon siya magpakita kita mahisama kaniya; kay kita magasud-ong man unya kaniya sa iyang pagkamao” [Tan-awa sa 1 Juan 3:2.] Ang Dios mao ang atong Amahan, ug ang usa ka pamaagi sa pagpakigsulti naabli tali sa Dios ug kanato, ug samtang kita magpuyo sa atong relihiyon kita makaandam sa tanang mga panahon sa pagdawat sa mga panalangin gikan sa iyang mga kamot, ug makat-on nga makasabut sa husto nga mga baruganan bahin sa atong kaluwasan isip tagsa-tagsa, ug sa kaluwasan sa tawhanong pamilya.⁹

Atong nadawat ang walay katapusang ebanghelyo, ang mao diha na sa mga adlaw ni Jesus; ug mao kini ang nakapalamdag sa atong mga hunahuna, nakapadako sa atong mga kapasidad, ug naghatag kanato og kahibalo sa nangagi ug sa umaabot, ug kini nakapadayag kanato sa mga katuyoan sa Dios, ug pinaagi sa kapunongan, ug sa organisasyon niini nga priesthood kita napanalanginan, naluwas, napanalipdan, ug natuboy niining adlawa.¹⁰

Mga Sugyot alang sa Pagtuon ug Panaghisgutan

Sa unsa nga paagi nga si Presidente Taylor mihulagway sa ebanghelyo? Sa unsa nga paagi nga ang inyong kinabuhi lahi kon wala makahibalo sa ebanghelyo? Unsang mga kasinatian nga inyong nasinati nga nagpakita kon sa unsa nga paagi nga ang mga baruganan sa ebanghelyo “mobayaw, motuboy ug mohimaya sa tawhanong pamilya”?
Sa unsa nga paagi nga ang ebanghelyo makatabang kanato nga makasabut sa mga hiyas sa Dios ug sa atong relasyon ngadto Kaniya? Ngano nga kining kahibalo gikinahanglan alang sa atong kaluwasan? (Tan-awa usab sa Juan 17:3.)
Sa unsa nga paagi nga kini makatabang kaninyo nga makahibalo nga ang ebanghelyo mahangturon ug walay kausaban? Sa unsa nga paagi nga kini nga kahibalo makaimpluwensya sa inyong mga pagtuo ug mga desisyon nga inyong himoon?
Si Presidente Taylor mitudlo nga ang ebanghelyo giplano “aron mahimong gawasnon ang tanang mga tawo.” Gikan sa unsa nga ang ebanghelyo nakapahimo kanato nga gawasnon? Unsay mahimo niini aron mahimo kita nga gawasnon? Unsaon nato nga makatabang sa uban nga makasabut nga ang ebanghelyo makahatag og kagawasan kay sa mga gidili?
Unsay inyong gihimo aron makadawat og pagpamatuod sa ebanghelyo? Unsa nga mga kasinatian ang nakapalig-on sa inyong pagpamatuod? Unsa ang atong mahimo aron sa pagtabang nga makasiguro nga ang mga baruganan sa ebanghelyo magpadayon nga “magpabilin ngari kanato”?
Sa unsa nga paagi nga ang ebanghelyo makadala kanato “sa pagpakigrelasyon ngadto sa Dios?”

May Kalabutan nga mga Kasulatan: Juan 8:31–32; 2 Timoteo 1:8–10; 1 Nephi 10:18–19; 3 Nephi 27:13–22; Mga Artikulo sa Hugot nga Pagtuo 1:4

Noah preaching — Si Presidente Taylor mitudlo nga ang ebanghelyo nga gisangyaw ni Noe ug sa tanang karaang mga propeta “pareha … nga karon gisangyaw ngadto sa tibuok kalibutan alang sa usa ka saksi.”