Kapitulo 20

Ang Templo, ang Ganghaan ngadto sa Kahimayaan

Kita ania dinhi aron pagpakigtambayayong sa Dios sa kaluwasan sa mga buhi [ug] sa katubsanan sa mga patay.¹

Gikan sa Kinabuhi ni John Taylor

Tungod sa nagkadugang nga pagpanggukod didto sa Nauvoo, si Propeta Joseph Smith nahadlok nga siya malagmit dili makakita sa pagkahuman sa Templo sa Nauvoo nga buhi. Buot nga makasiguro nga siya makatugyan sa gikinahanglan nga yawe ug kahibalo ngadto sa uban, siya miandam og lawak ibabaw sa tindahan sa Nauvoo diin siya makapangalagad sa mga ordinansa sa templo ngadto sa pipila ka pinili nga mga tawo.² Uban niadtong gipili mao si John Taylor, kinsa interesado kaayo sa mga ordinansa sa templo sukad sa panahon nga ang maong mga baruganan unang gipadayag sa Simbahan. Gikan niini ug sa ubang mga kasinatian, si Presidente Taylor nakapalambo og salabutan ug pasalamat alang sa templo ug sa mga ordinansa nga gipahigayon didto.

Samtang namulong diha sa pagpahinungod sa luna sa Templo sa Logan Utah, si Presidente Taylor mipakigbahin ngadto sa katiguman sa mga pagbati nga iyang nasinati sa dihang siya mibisita sa Templo sa St. George Utah, ang unang templo nga nahuman sa Teritoryo sa Utah.

“Sa dihang ako mibisita niana nga Templo, kinuyogan sa akong mga kaigsoonan kinsa uban kanako, kami nakasinati og sagrado nga kahinam sa hingpit nga kalipay ug solemno, matinahuron nga pagbati. Samtang kami misulod sa sagrado nga mga pultahan niini, among gibati nga kami nagbarug sa balaan nga yuta, ug nakasinati, sama sa karaan, ‘Sa tinuod kini balay sa Dios, ug ang ganghaan sa langit.’ [Tan-awa sa Genesis 28:17.] Kadto dili lamang mapasumbi-ngayon nga mga pagpahayag, apan tinuod, tungod kay diha niana nga Balay, ug mao usab sa Balay nga pagatukuron niini nga yuta, nga ang labing sagrado nga mga ordinansa sa Dios ipahigayon, nga may kalabutan sa kaayohan ug kalipay sa tawhanong pamilya, buhi ug patay. Ako mibati og hilabihang kalipay sa akong kasingkasing nga kami nagmalampuson sa pagtukod sa usa ka templo ngadto sa ngalan sa atong Amahan ug Dios.’’³

Agi og dugang sa pagsabut sa kamahinungdanon sa templo, si Presidente Taylor nasayud nga ang gidaghanon sa mga templo ug kadtong kinsa mangalagad diha niini magpadayon sa paglambo samtang ang mga plano sa Dios gipatuman. Samtang nagpakita sa luna alang sa konstrakyon sa Templo sa Salt Lake ngadto sa usa ka bisita gikan sa laing nasud, si Presidente Taylor nanagna nga modako ang pagtubo sa gidaghanon sa mga templo sa kalibutan: “Kami nagpaabot sa pagtukod og mga ginatos pa niini sa mga tuig nga umaabot, ug sa pagpangalagad diha niini sa pagpatuman sa buluhaton sa Dios.”⁴

Mga Pagtulun-an ni John Taylor

Ang Dios nagpakabana sa kahimayaan sa mga patay ingon man sa mga buhi.

Adunay dako ug malukpanon nga laraw nga giplano sa Makagagahum sa iyang kahanas ug sa maayong pagkatukod nga organisasyon, kalabut sa kaluwasan sa tawhanong pamilya kinsa iyang mga anak, kay siya ang Dios ug ang Amahan sa mga espiritu sa tanang tawo. Kini nagpasabut nga siya nagpakabana sa ilang kaayohan, sa ilang kalampusan, sa ilang kalipay, ug sa tanan nga may kalabutan sa ilang kahimayaan sa karon ug hangtud sa mga kahangturan nga moabut. Kay nagpakabana man, ug kay gamay ra kaayo ang napadayag mahitungod sa ebanghelyo sa lainlaing mga kapanahonan, ug hilabihan kaayo ang gahum sa kangitngit, ug kadautan ang mipatigbabaw taliwala sa mga tawo, kinahanglan nga adunay usa ka butang nga pagabuhaton alang sa mga patay ingon man sa mga buhi. Ang Dios nagpakabana sa mga patay ingon man sa mga buhi.⁵

Kita ania dinhi aron sa pagpakigtambayayong sa Dios sa kaluwasan sa mga buhi, diha sa katubsanan sa mga patay, sa mga pagpanalangin sa atong mga katigulangan, sa pagbu-bo sa mga panalangin diha sa atong mga anak; ania kita dinhi alang sa katuyoan sa pagtubos ug pagbag-o sa yuta nga kita nagpuyo, ug ang Dios mihatag sa iyang awtoridad ug sa iyang mga tambag dinhi ibabaw sa yuta alang niana nga katuyoan, aron ang mga tawo unta makat-on sa pagbuhat sa kabubut-on sa Dios dinhi sa yuta maingon man sa langit. Kini ang tumong sa atong pagpuyo; ug atong katungdanan ang pagsabut sa maong baruganan.⁶

Kita nagpuyo, ingon sa akong gisulti, sa usa ka mahinungdanon nga adlaw ug panahon sa kalibutan. … Ang [Dios] mitagana kanato sa ulahing mga adlaw, nga kita unta mopahigayon niana nga buluhaton diin Siya mimando gikan sa wala pa ang katukuran sa kalibutan. Kon adunay bisan unsa nga mga panalangin nga natagamtam sa mga tawo sa unang mga kapaigoan sa kalibutan, kini usab ihatag kaninyo, mga Santos sa Ulahing mga Adlaw, kon kamo mopuyo sa inyong relihiyon ug magmasulundon sa mga balaod sa Dios. Walay butang nga tinago nga dili ipadayag, miingon ang Ginoo. Siya andam sa pagbutyag sa tanang mga butang; tanang mga butang nga may kalabutan ngadto sa mga langit ug sa yuta, sa tanang mga butang nga may kalabutan ngadto sa mga tawo kinsa kanhi anaa, kinsa karon anaa ug maanaa, nga kita unta mapahimangnoan ug matudloan sa matag baruganan sa salabutan nga uban sa kalibutan diin kita nagpuyo o uban sa mga Dios sa mahangturong mga kalibutan.⁷

Kita nagtukod sa mga templo alang sa kahimayaan sa tanang katawhan.

Sa dihang si Elijah ang propeta mipakita ngadto ni Joseph Smith, siya mihatag kaniya sa mga yawe niini nga dispensasyon; ug busa kita naghago sa pagtukod og mga templo. … Adunay mga ordinansa nga giuban niini nga mga butang nga mobalik ngadto sa walay sinugdanan; ug mopadayon ngadto sa kahangturan; … nga gitagana alang sa kaayohan, sa kalipay, ug kahimayaan sa katawhan; alang niadtong kinsa mga buhi ug kadtong kinsa mga patay ug alang niadtong mopuyo sa umaabot nga may kalabutan sa atong mga kagikanan ug sa atong mga kaliwatan. Ug kana mao ang usa sa mga yawe nga gitugyan.⁸

Nganong kita nagtukod og mga templo? Tungod kay si Elijah mitugyan sa piho nga yawe nga iyang gihatag ni Joseph Smith. Ug sa dihang siya mipandong sa iyang mga kamot diha sa mga elder pagtugyan kanila sa balaang priesthood, sila midawat sa mga baruganan nga gipaambit ni Elias ngadto ni Joseph, diha kaninyo, ug ngadto sa uban. … Ug paglabay sa panahon samtang ang simbahan nagsugod sa pagpundok, kita nagsugod sa paghisgot mahitungod sa pagtukod og mga templo diin kita makadawat ug mangalagad sa mga ordinansa nga gipadayag ngadto ni Joseph Smith, nga may kalabutan ngadto sa kaayohan sa mga buhi ug mga patay ug gikinahanglan sa atong kaluwasan ug kahimayaan diha sa gingharian sa atong Dios, ingon man alang niadtong atong alagaran. Ug kita wala lamang maghisgot kabahin niini apan nakahimo na og daghan niana nga katuyoan.⁹

Nahuman na nato karon kining templo [sa Logan Utah], ug ang ubang mga tawo nangutana, alang sa unsa kini? Alang sa daghang mga butang: nga ang atong mga pagsilyo ug mga ordinansa mahimong mapahigayon sa matang nga madawat sa atubangan sa Dios ug sa balaang mga anghel; nga bisan unsa ang bugkuson dinhi sa yuta sumala sa mga balaod sa mahangturong priesthood pagabugkuson sa mga langit; nga aduna untay pangdugtong tali sa mga buhi ug sa mga patay, tali niadtong kinsa nakapuyo na, tanan niadtong karaang mga amahan nga akong giingon nga nagpakabana sa kaayohan sa ilang kaliwat; nga unta adunay harianong priesthood, balaang katawhan, putli nga katawhan, mahiyason nga mga tawo sa yuta aron mangatungdanan ug modumala alang sa kaayohan sa mga buhi ug sa mga patay; wala kaayo magtagad sa ilang mga kaugalingon, apan alang sa Dios, alang sa buluhaton sa Dios, ug alang sa paghuman sa mga butang nga giplano sa Dios nga ipatuman sa dispensasyon sa kahingpitan sa mga panahon [tan-awa sa D&P 128:18] nga ang tanang mga butang mahiusa, ug nga sila unta maandam sa pagdumala uban sa priesthood sa mga langit sa katubsanan sa mga lumulupyo niini nga kalibutan gikan sa panahon ni Adan hangtud niining panahona.¹⁰

Kita kinahanglang takus sa pagsulod sa balaang templo sa Dios.

Ang mga tawo nga matinguhaon sa pag-adto ug pagtambong sa mga ordinansa niini nga mga balay, kinahanglan adunay rekomendasyon gikan sa bishop, dayon human sila makadawat niini nga rekomendasyon gikan sa bishop, kini kinahanglan iduso sa stake president. … Kini malagmit lisud nga tulumanon alang sa daghang mga tawo. Alang sa mga lalaki ug mga babaye nga matarung, mahiyason, ug dungganon, kini [usa] ka yano kaayo nga butang; dili lisud bisan kanus-a. Apan niadtong nagpasagad sa ilang mga katungdanan, kinsa mipalayo gikan sa mga balaod sa Dios, ug kinsa miusab, o milapas sa mga ordinansa sa ebanghelyo— niini nga mga tawo kini malisud nga panahon.

Hinoon, adunay usa ka butang nga moabut pa nga labaw kalisud. Kana mao lamang ang pagsugod niini nga mga butang. Ang mga butang nga umaabot labawng lisud nga tumanon. Unsa kini? Ang panahon moabut nga kita dili lamang moagi niadtong mga opisyal kinsa akong gipasabut—ingnon ta, nga adunay pagduso ug pagtugot sa atong bishop [ug] sa stake president. … apan kita gisultihan niini nga basahon sa(Ang Doktrina ug mga Pakigsaad) nga kita moagi sa mga anghel ug mga Dios. Kita mahimong makalusot sa unang bahin, kita mhimong igo ra gayud nga makahimo niini, ug makalabang ug mahatagan, ug usahay “lisud-lisuron og gamay”. Apan unsa man kon kita mamatay, ug kita moagi sa mga anghel ug mga Dios sa dili pa kita makasulod sa atong kahimayaan? Kon kita dili makaagi, unsa man? Nan, dili gayud, diha ra kutob. Ug kon dili gayud, makasulod ba kita sa atong kahimayaan? Ako nagtuo nga dili.¹¹

Kamo mahimong molingla sa Bishop ug kamo mahimong molingla sa Stake President, ug kamo mahimong molingla sa Kinatibuk-ang mga awtoridad sa Simbahan, apan kamo dili makalingla sa Ginoong Jesukristo ni sa Espirtu Santo. Kamo nakaila sa inyong mga kaugalingon labaw pa kay ni bisan kinsa ug kon adunay usa ka butang nga sayup diha kanimo, karon mao ang panahon sa paghinulsol ug paghimo sa inyong mga kaugalingon nga matarung sa atubangan sa Ginoo; kamo dili maghinulsol, ang panahon moabut nga kamo ipaubos, ug kon unsa kataas ang inyong naabut mao usab ang gikusgon sa inyong pagkahulog.¹²

Kita adunay responsibilidad nga mahimong manluluwas sa Bukid sa Zion.

Kita ania dinhi aron sa pag-andam nga mabuhi, ug sa pagtudlo sa atong mga anak unsaon pagpakabuhi sama kanato, ug sa pagtudlo sa kalibutan sa samang leksyon kon sila modawat lamang niini. Kita nasayud nga ang atong mga espiritu nagpuyo uban sa Amahan sa wala pa kita moanhi. Kita nasayud nga kita mga imortal ingon man mga mortal nga mga linalang, ug nga kita adunay kasinatian sa laing kalibutan ingon man dinhi. Kita nasayud nga ang kalibutan napuno sa kadautan; apan atong katungdanan sa paglikay sa atong mga kaugalingon gikan niini, ug sa pag-uswag uban sa hiyas, kamatuoran, kaligdong ug kabalaan.

Kita mianhi dinhi aron mahimong mga manluluwas. “Unsa, mga manluluwas?” “Oo.” “Ngano, kita nagtuo nga adunay usa lamang ka Manluluwas.” “O, oo, adunay daghan kaayo. Unsa ang giingon sa mga kasulatan kalabut niini?” Usa sa karaang mga propeta, sa paghisgot niini nga mga butang, miingon nga ang mga manluluwas motungas sa Bukid sa Zion [tan-awa sa Abadias 1:21]. Mga manluluwas? Oo. Kinsa ang ilang luwason? Una ang ilang mga kaugalingon, dayon ang ilang mga pamilya, dayon ang ilang mga silingan, mga higala ug mga kauban, dayon ang ilang mga katigulangan, dayon mobubu sa mga panalangin ngadto sa ilang kaliwatan. Mao ba kana? Oo. …

Kita matinguhaon sa pagpanalangin sa atong kaliwat. Kita nakabasa mahitungod ni Abraham, Isaac ug Jacob, sa wala pa sila mobiya sa kalibutan, nagtawag sa ilang mga pamilya nga maghiusa, ug ubos sa inspirasyon sa espiritu sa panagna ug pagpadayag, nagbutang sa ilang mga kamot ibabaw sa ilang mga ulo ug nagsulti og piho nga mga panalangin diha kanila nga moabut sa ilang kaliwatan hangtud sa matag mosunod nga kapanahonan. Ania kanato ang mao gihapon nga ebanghelyo ug priesthood, ug ang samang kahayag ug salabutan, ug kita nagsiksik sa kaluwasan ug kahimayaan sa atong mga pamilya nga moabut human kanato, sama kanila kaniadto, ug kita magsiksik alang sa mga panalangin sa Dios nga ibubu diha sa ilang mga ulo sama kanila kaniadto. Ug kon ang atong mga amahan nangamatay nga wala masayud sa ebanghelyo, walay kahigayunan sa pagpaminaw niini, kita nabalaka alang kanila, ug kita moadto ug magpabunyag alang kanila, nga sila unta maluwas ug mahimaya diha sa gingharian sa Dios uban kanato.¹³

Sa pag-anhi ni Jesus, Siya mianhi aron pagbuhat sa buluhaton sa daghang mga paagi susama sa atong gihimo, ug sa dihang Siya nakahuman sa Iyang buluhaton dinhi, siya mibarug isip Manluluwas sa kalibutan, ug sa tawhanong pamilya. Siya mianhi aron pagwali sa Ebanghelyo sa mga kabus, aron pag-abli sa mga pultahan sa bilanggoan niadtong nabilanggo, aron paghatag kanila og kagawasan, ug sa pagsangyaw sa ikahimuot nga takna sa Ginoo, ugbp. Kini mao ang buluhaton nga bahin sa mga tawo nga nagpuyo sa panahon sa lunop ug nalaglag ug nagpabilin sa bilanggoan hangtud ang Ginoo motan-aw nga angay ang paghatag sa mga pagpakita sa Iyang kalooy ngadto kanila. Busa, sama sa atong mabasa, “Kay nag-antus usab si Kristo sa makausa tungod sa mga sala, ang matarung tungod sa mga dili matarung, aron kita pagadad-on niya ngadto sa Dios; nga gipatay diha sa unod apan gibanhaw diha sa espiritu; nga diha niana usab, miadto siya ug miwali sa mga espiritu didto sa bilanggoan: nga sa miaging panahon, nga dili masinugtanon, sa naghulat pa sa pagkamapailubon sa Dios, ingon sa mga adlaw ni Noe.” [Tan-awa sa 1 Pedro 3:18—20]. Siya nga nakahuman sa Iyang buluhaton dinhi sa yuta alang sa mga buhi, miadto ug mipahigayon og buluhaton alang sa mga patay, ingon nga kita giingnan, “Siya miadto ug miwali sa mga espriitu sa bilanggoan nga kaniadto mga dili masulundon sa mga adlaw ni Noe.”

Gitagana alang kanato ang pagbuhat sa buluhaton alang niadtong kinsa namatay nga wala magsunod o wala ang Ebanghelyo sa ilang tibuok kinabuhi. Kita ania dinhi aron pagbuhat sa buluhaton nga may kalabutan sa katubsanan sa mga patay. Sa dihang gisugo nga ang Templo pagatukuron sa Nauvoo, human ang Templo sa Kirtland natukod, ug human sa daghang mga yawe nga napahiuli ug human sa daghang mga pagpakita, mga pananawon, ug mga pagpangalagad nga nahimo, gani ginaingon nga walay dapit sa ibabaw sa yuta diin mapahigayon ang ordinansa sa bunyag alang sa patay ug si Joseph gisugo sa pagtukod og usa ka balay alang niana nga katuyoan.¹⁴

Daghan niadtong kinsa namatay na ang naghulat sa atong pagtuman sa atong mga katungdanan.

Ang buluhaton nga atong giatiman dako kaayo kay sa atong mahanduraw. Ang atong mga panglihok ug ang atong gihimo karon adunay kalabutan sa nangagi, sa karon ug sa umaabot. Si Napoleon, sa usa ka okasyon, miingon sa iyang mga sundalo samtang didto sila sa Ehipto, nga adunay kap-atan ka mga kaliwatan nga nagtan-aw kanila. Apan ang langitnong mga panon nagtan-aw kanato. Ang Priesthood nga nangalagad sa lainlaing mga kaliwatan ug ubos sa lainlaing mga dispensasyon, gikan sa pagsugod sa kalibutan, nagpunting sa ilang mga mata ngari kanato, sa atong mga kaigsoonan, nga atong nakauban dinhi sa ibabaw sa yuta ug kinsa nangamatay na, nagpunting sa ilang mga mata ngari kanato. Ang dili maihap nga mga patay nga natulog sa mahilum nga lubnganan nga walay kahibalo sa ebanghelyo anaa nagtan-aw ngari kanato, ug sila nagpaabot kanato sa pagtuman sa atong mga katungdanan ug mga responsibilidad nga gitugyan ngari kanato aron atimanon, diin sila interesado.

Ang tanang balaang mga priesthood—ang karaang mga patriyarka, mga propeta ug mga apostoles ug mga tawo sa Dios kinsa nagpuyo sa lainlaing mga kaliwatan nagtan-aw kanato ug nagpaabot kanato sa pagtuman sa dako ug mahinungdanon nga mga kinahanglanon ni Jehova kalabut sa kaayohan ug sa katubsan sa kalibutan: ang kaluwasan sa mga buhi ug mga patay. Ang Dios, ang atong Langitnong Amahan, ug ang iyang anak nga si Jesukristo, atong Manunubos, nagtan-aw usab kanato, ug nagpaabot kanato nga magmatinud-anon sa atong mga pakigsaad.¹⁵

Mga Sugyot alang sa Pagtuon ug Panaghisgutan

Unsa ang kahulugan alang kaninyo nga mahimong “makigtambayayong “sa Dios sa kaluwasan sa mga buhi [ug] sa katubsanan sa mga patay”? Unsa ang inyong bation samtang kamo mogamit sa kahigayunan sa pagpanalangin sa inyong kaugalingong mga kaliwatan pinaagi sa buluhaton sa templo?
Unsa ang katuyoan ni Elias sa dihang siya mipakita ngadto ni Propeta Joseph Smith didto sa Templo sa Kirtland? (Tan-awa sa D&P 110:13–16.) Unsa ang mga panalangin nga karon anaa kanato tungod sa mga yawe nga gipahiuli ni Elijah?
Nganong mahinungdanon ang pagkamatinuoron sa atong mga interbyu alang sa temple recommend? Unsa ang mga panalangin nga gisaad ngari kanato kon kita moadto didto sa templo nga takus? (Tan-awa usab sa D&P 97:15–17.) Sa unsang paagi nga kamo nakasinati niini nga mga panalangin? Unsa ang atong buhaton aron makaandam sa atong mga anak ug mga kabatan-onan nga mahimong takus sa pagsulod sa templo?
Sa unsang mga paagi nga kita mahimong “mga manluluwas sa Bukid sa Zion”? Ngano nga ang atong mga pag-alagad may dakong kalabutan ngadto sa kaluwasan niadtong kinsa nangamatay na?
Unsa ang inyong bation kon inyong mahunahuna nga “ang langitnong mga panon nagtan-aw kanato … nagpaabot kanato nga motuman sa [atong] mga katungdanan ug mga kaakohan”? Unsa ang atong mga katungdanan ug mga responsibilidad kalabut sa templo ug sa buhat sa family history? Unsaon nga kamo makapalambo sa inyong buluhaton sa templo ug sa family history?
Basaha ang D&P 135:3. Sa unsang paagi nga ang papel ni Joseph Smith sa pagpahiuli sa buhat sa templo makadugang sa inyong pagsabut niini nga bersikulo?
Ngano nga kita kinahanglan moadto sa templo kanunay? Unsa ang kahulugan sa templo sa inyong kaugalingong bahin? Sa unsang paagi nga kita makapauswag sa impluwensya sa templo sa atong kaugalingon nga mga kinabuhi ug sa mga kinabuhi sa atong mga pamilya?

May Kalabutan nga mga Kasulatan: D&P 109; 124:39–41; 128:15–25; 138

Logan Temple — Ang Templo sa Logan Utah, gipahinungod ni Presidente Taylor niadtong 1884. Sulod sa mga templo, “ang labing sagrado nga mga ordinansa sa Dios ipahigayon, nga may kalabutan sa kaayohan ug kalipay sa tawhanong pamilya.”