Kapitulo 19

Temporal nga mga Panalangin ug ang Balaod sa Ikapulo

Kita gitudloan sa pagbayad sa atong ikapulo, nga kita unta moila sa Dios nga kita iyang mga tawo, ug nga kon siya mohatag sa tanan nga atong gipangayo, kita unta mohatag og ikapulo balik ngadto kaniya, ug pinaagi niana nga buhat miila sa iyang kamot.¹

Gikan sa Kinabuhi ni John Taylor

Si John Taylor nagtuo nga ang Dios mosangkap sa atong temporal nga mga panginahanglan agi og dugang sa atong espirituhanong mga panalangin. Busa siya nag-awhag sa mga Santos sa pagsiksik ug pag-ila sa kamot sa Dios sa temporal nga mga buluhaton, magtudlo nga “kita kinahanglan nga mobutang sa atong mga kaugalingon sa posisyon nga magiyahan ug madumala sa Ginoo sa temporal ingon man sa espirituhanong mga butang, o kita dili gayud makaangkon niana nga himaya diin daghan kanato ang nagpaabot.”²

Samtang nag-ila sa kamahinungdanon sa temporal nga mga butang alang sa paglahutay sa kinabuhi, si Presidente Taylor naghupot usab og husto nga panglantaw kalabut sa mga butang sa kalibutan. Kalabut sa panglantaw ni Presidente Taylor sa temporal nga mga katigayunan, si Elder B.H.Roberts sa Kapitoan misulat: “ Siya wala gayud mogugol sa iyang kaugalingon sa pag-angkon og katigayunan. … Apan ang kantidad sa kabtangan nga iyang natigum sa Nauvoo, ug nga iyang gisakripisyo aron sa pagadto sa kawanangan uban sa Simbahan ni Kristo, igo na kaayo nga mopamatuod nga siya adunay pinansyal nga kasarang. Apan ang iyang mga mata ug kasingkasing gipunting diha sa labawng maayong mga bahandi, kadtong mga butang diin ang mga bokbok ug taya dili makadaot, ni ang mga kawatan mopaguba ug magapangawat [tan-awa sa Mateo 6:19–20]. Kini nga mga butang mipuno sa iyang kalag, nakakuha sa iyang atensyon ug naghatag lang og gamay nga panahon alang kaniya sa paghigugma sa katigayunan niini nga kalibutan. Ang iyang motto mao—‘Ang salapi dili kaayo mahinungdanon kon kamatuoran ang hisgutan.’”³

Alang ni Presidente Taylor, ang pagtuman sa balaod sa ikapulo mahinungdanon nga bahin sa pagtuman sa iyang temporal nga mga responsibilidad ug sa pag-ila sa kamot sa Dios sa tanang mga panalangin. Sa panahon nga ang kasagaran sa ikapulo bayran pinaagi sa mga butang kaysa sa kwarta, siya mitudlo sa iyang mga anak sa kamahinungdanon sa paghatag lamang sa labing maayo ngadto sa Ginoo agi og pasalamat sa tanan nga ilang nadawat. “Samtang nagpundok sa prutas sa tinglaglag” ang iyang anak nga lalaki nga si Moses W. Taylor misulat, “si papa moanha ug mosusi sa mga basket ug magpili sa kinadak-an ug labing maayo nga prutas og moingon: ‘Pagkuha sa ikapulo gikan niini ug siguroha ug bayri kini sa hingpit.’”⁴

Mga Pagtulun-an ni John Taylor

Kita utangan sa Dios sa tanan nga ania kanato.

Kinsa ang nagbuhat kanato? Kinsa ang naghan-ay kanato, ug ang mga elemento nga naglibut kanato ug nga atong giginhawa? Kinsa ang naghan-ay sa sistema sa planeta nga atong nakita libot kanato? Kinsa ang nagsangkap sa pamahaw, paniudto ug panihapon alang sa mga minilyon nga nagpuyo dinhi sa yuta? Kinsa ang nagsinina kanila, sama sa iyang gibuhat sa mga lirio sa umahan? Kinsa ang naghatag ngadto sa tawo sa iyang gininhawa, kinabuhi, kahimsog, iyang mga gahum sa paglihok, sa hunahuna, ug sa tanang diosnong hiyas nga gituga kaniya? Diin sila gikan? Kinsa ang nagkontrol ug nagdumala sa mga buluhaton sa kalibutan gikan sa iyang pagkalalang hangtud karong panahona? Ang Halangdon nga Ako Mao, ang Halangdon nga Eloheim, ang Halangdon nga Dios kinsa mao ang atong Amahan.⁵

[Si Jesus miingon], “Palandonga ninyo ang mga lerio sa kapa-tagan, wala sila magbudlay ni magkalinyas, ug bisan si Solomon sa tibuok niyang himaya wala gani makabisti sama sa usa kanila.” [Tan-awa sa Mateo 6:28–29.] Usab, siya miingon, tan-awa ninyo ang mga langgam sa langit, wala sila magpugas, ni mag-ani, ni magtigum, ngadto sa mga kamalig; apan ginapakaon sila sa inyong Langitnong Amahan, ug siya dili ba usab mopakaon kaninyo, O kamo nga gamay ang hugot nga pagtuo? [Tan-awa sa Mateo 6:26.]…

Kon kita adunay kinabuhi, o kahimsog, o mga kabtangan; kon kita adunay mga anak, ug mga higala ug mga panimalay, kon kita adunay kahayag sa kamatuoran, mga panalangin sa walay katapusang ebanghelyo, pagpadayag sa Dios, balaang priesthood, uban sa tanan nga iyang mga panalangin ug panggobyerno ug lagda, kining tanan ug matag tinuod nga kalipay nga atong naangkon nagagikan sa Dios. Kita wala kanunay makaamgo niini, apan bisan pa niana kini tinuod nga ngadto sa Dios kita utangan alang sa matag maayo ug hingpit nga gasa [tan-awa sa Santiago 1:17]. Siya naghimo sa atong mga lawas nga anaa sa tanan nilang kahingpit, kabagay ug katahum. Siya, sama sa gipahayag sa magbabalak,

“Mihimo sa balili nga nagpatahum sa nga mga kabungturan,
Ug misangkap sa tanang gikinahanglan alang sa nagatubong mais sa kaumahan.
Ang mga hayop gihatagan og mga pagkaon,
Ug ang piso nga uwak hatagan usab kon siya gutumon.

Siya maloloy-on ug buotan ug mahigugmaon ngadto sa tanan niyang mga linalang, ug maayo alang kanato ang pagpamalandong usahay niining mga butanga, tungod niini kita makaamgo sa atong pag-agad sa Makagagahum.

Sa paghisgot sa mga buluhaton niini nga kalibutan, kanunay nga ipangutana sa kadaghanan—“Ngano, nga dili man nato kini atimanon? Dayag lang kinahanglan gayud. Kita wala ba maghisgot sa pagtukod sa Zion? Dayag na lang atong gihimo. Wala ba maghisgot sa pagtukod og mga siyudad ug sa paghimo og maanindot nga mga puluyanan, mga tanaman ug mga pruta-san, ug pagbutang sa atong mga kaugalingon sa ingon nga posisyon nga kita ug ang atong mga pamilya makatagamtam sa mga panalangin sa kinabuhi? Dayag na lang ato kining gihimo. Ang Dios mihatag kanato sa yuta ug sa tanang gikinahanglang mga elemento alang niini nga katuyoan, ug siya mihatag kanato og mga salabutan aron paggamit niini. Apan ang labing mahinungdanong butang nga anaa sa iyang panglantaw mao, nga samtang kita migamit sa salabutan nga iyang gihatag kanato alang sa pagtuman sa lainlaing mga katuyoan nga tilinguhaon alang sa atong kaayohan ug kalipay, kita kinahanglan dili malimot kaniya kinsa mao ang tinubdan sa tanang natong mga panalangin, kini man may kalabutan sa karon ug sa umaabot.⁶

Ang Dios mao ang atong Dios nga atong gihatagan sa atong pagsalig, kita walay ikapasigarbo sa atong mga kaugalingon. Kita ba adunay mga bahandi? Kinsa ang mihatag niini ngari kanato? Ang Ginoo. Kita ba adunay kabtangan. Kinsa ang nagbuot kanato sa pag-angkon niini? Ang Ginoo. Ang atong mga kabayo, mga baka ug karnero, ug mga panon, mga kahayupan ug mga kabtangan, iyang mga gasa. Ang bulawan ug ang pilak ug ang mahalon nga mga butang sa yuta, ug usab ang mga kabakahan nga anaa sa kaliboan ka mga bungtod iyaha, ug kita iyaha, ug anaa sa iyang mga kamot, ug ang tanang mga nasud anaa sa iyang mga kamot, ug siya mohimo ngari kanato ug ngadto ingon nga iyang gihunahuna nga maayo. Ug isip nga usa ka buotan, maalamon nga Amahan, siya magpakabana sa ilang mga kaayohan; ug kon ang panahon sa paghukom moabut, kini dili mapugngan. Kita kinahanglan nga sa kanunay mahinumdom nga ang atong kalig-on anaa sa Dios; kita wala gayuy ikapanghambog sa atong mga kaugalingon, kita walay salabutan kon ang Dios wala pa mohatag kanato, kita walay bisan unsa sa kinabuhi, o kabtangan, apan kadto lamang ang gihatag sa Ginoo kanato. Ang tanan nga atong naangkon kalabut sa karon ug sa kahangturan gihatag ngari kanato pinaagi kaniya.⁷

Ang tanan nga atong naangkon gasa sa Dios. Kita kinahanglan moila kaniya sa tanang mga butang. Kita usahay maghisgot sa mga tawo nga aduna niini nga katungod ug sa laing nga katungod. Kita walay mga katungod, gawas lamang sa gihatag sa Dios ngari kanato. Ug ako mosulti kaninyo unsa ang iyang ipakita ngadto sa mga Santos sa Ulahing mga Adlaw. Siya mopamatuod pa kanila nga ang bulawan ug ang pilak iyaha, ug ang mga kabakahan diha sa kaliboan ka mga bungtod, ug nga siya mohatag sa gusto niyang hatagan, ug siya magdumili sa paghatag sa tawo sigun sa iyang kagustohan. Siya mopakita pa kaninyo nga kini tinuod. Ang atong kahilwasan ug kalipay ug ang atong bahandi nag-agad sa atong pagkamasulundon ngadto sa Dios ug sa iyang mga balaod, ug ang atong kahimayaan sa karon ug sa kahangturan nag-agad diha sa susamang butang.⁸

Pagsabut sa atong temporal nga mga panalangin ug mga resposibilidad kabahin sa ebanghelyo.

Akong ikalipay ang paghisgot kalabut sa mga butang sa Gingharian sa Dios, ug usab kalabut sa ubang mga matang nga gituohan sa uban nga dili kaayo direkta nga may kalabutan sa Gingharian sa Dios, apan kini may kalabutan; tungod kay ang mga butang nga temporal ug ang tanang mga butang nga espirituhanon, ang tanang mga butang nga may kalabutan sa atong mga lawas ug uban sa atong mga espiritu, ang tanan nga giplano sa pagpalambo sa atong kalipay ug kaayohan diha sa yuta ug sa paghatag kanato og kahimayaan diha sa gingharian sa langit, mao ang mga butang nga may kalabutan sa Ebanghelyo ug kanang mga butanga atoa isip mga Santos sa Ulahing mga Adlaw.⁹

Ang tumong sa atong tigum dili lamang alang sa relihiyosong mga katuyoan, apan sa paghisgot sa tanang mga matang alang sa kaayohan sa simbahan ug sa gingharian sa Dios dinhi sa yuta… Kita magpundok usab aron paghisgot diha sa labing maayong dalan nga atong sundon nga may kalabutan sa temporal nga mga butang ingon man sa espirituhahonon nga mga butang, tungod kay kita adunay mga lawas ingon man mga espiritu, ug mabuhi pinaagi sa pagkaon, pag-inom, ug pagsinina, gikinahanglan nga ang temporal nga mga matang kinahanglan pagahunahunaon ug pagahisgutan sa atong mga komperensya, ug nga kita kinahanglan maghisgot sa tanang mga butang nga giandam alang sa kaayohan, pagpanalangin, ug paghimaya sa mga Santos sa Dios, mahimong kini nagpasabut sa atong espirituhanong mga buluhaton o sa atong mga trabaho ug mga katungdanan sa kinabuhi isip mga bana ug asawa, isip mga ginikanan ug mga anak, isip mga agalon ug mga sulugoon. … Ang ideya nga pulos lang relihiyosong mga pagbati ang ania kanato, ug walay lain, imposible, apan kita mobuhat sa tanang butang nga may kahadlok sa Dios. Ang atong relihiyon labaw ka tulukibon kay sa kalibutan; kini wala mag-tudlo sa iyang [mga sakop] sa pagtinguha nga maglingkod ug mag-awit hangtud ngadto sa walay katapusang himaya apan kini naglangkob sa tanang mga interes sa katawhan sa tanang mahanduraw nga ang-ang, ug ang tanang kamatuoran sa kalibutan nahilakip sa tumong niini.¹⁰

Ang Ginoo matinguhaon nga mobuhat og maayo kanato, sa paglamdag sa atong mga hunahuna, sa pagtudlo kanato sa paghukom nga maalamon, sa pagpapakita kanato sa Iyang kabubut-on, ug sa paglig-on kanato ug pag-andam kanato alang sa dakong mga hitabo nga kinahanglan mapahinabo niining katapusang mga adlaw. Siya matinguhaon sa pagpakita kanato sa unsang paagi kita makaluwas sa atong mga kaugalingon, sa unsang paagi makapanalangin sa atong mga kaugalingon sa temporal ug espirituhanon, sa panabut, sa moral, sa pisikal, sa politikal ug sa tanang posibling paagi nga Iyang mahimo sa paghatag sa Iyang mga panalangin sa napukan nga mga katawhan.¹¹

Pinaagi sa ikapulo, kita nag-ila sa Dios, nagpakita sa atong kamatinud-anon, ug nag-dam alang sa mas dako nga mga panalangin.

Kita isip mga tawo nag-ila nga ang balaod sa ikapulo nga nagagikan sa Ginoo; apan ngano nga kita kinahanglan man nga sultihan pa niini og kadaghan. Kon kita dili matinuoron sa atong mga kaugalingon, ug matinuoron sa atong Dios, unsa may kapuslanan sa atong pag-angkon nga kita mga representante sa Dios, sa pagka anciano sa Israel, sa pagka sinul-oban sa balaang pagkapari, sa pagka mga magtutudlo sa mga paagi sa kinabuhi. Ang karaang mga Judeo, ang karaang mga Pariseo, uban sa ilang tanang mga kadautan ug mga kahugawan, makapanghambog sa pagbayad sa mga ikapulo sa tanan nga ilang pinangitaan. Kita nag-angkon nga labaw ka maayo kaysa karaang mga Pariseo, apan daw lisud kaayo alang sa mga tawo taliwala kanato nga mahimong matinuoron sa atong mga kaugalingon ug sa ilang Dios kalabut sa usa ka yano kaayo nga baruganan nga sama niini. …

[Ang Ginoo] buot nga una sa tanan nga ang mga tawo moila sa Dios [diha sa] usa ka gamay nga yutan-ong baruganan, siya buot nga sila moila kaniya, pinaagi sa paghatag kaniya og usa gamay nga bahin, o sa ikapulo sa unsay iyang gihatag kanila aron pagsuta kon sila matinuoron ba niining gamayng butang, aron pagsuta kon sila molihok isip matarung nga mga tawo o dili, o sila ba mosulay sa paglimbong kaniya gikan niini. Kon kita mobuhat niini nga matinuoron ug sa dakong kakugi hangtud kita makatuman sa atong katungdanan, nan kita andam alang sa bisan unsa nga butang. Ang baruganan ug dili ang ikapulo nga atong gibayad ang gitamud sa Ginoo; siya wala magtagad sa atong ikapulo, apan siya nagtagad sa atong pagbuhat og matarung. Kon kita dili mahimong magmatinud-anon sa pipila ka mga butang, kita dili makapaabot nga mahimong mga magmamando ibabaw sa daghang mga butang [tan-awa sa Mateo 25: 21].¹²

[Ang balaod sa ikapulo] usa ka pagsulay ngadto sa mga tawo sa Dios, o alang kanato kinsa miangkon nga kita mao, nga kita masayud kon ang mga tawo motuman ba og sa piho nga balaod nga gihatag sa Makagagahum o dili, ug busa adunay kalig-unan sa ilang kamatinumanon ug pagkasulundon. Karon, kon kita motuman niini, ang tanan maayo ug husto; kon dili, kini nasulat, “Dili sila makita nga takus nga magpabilin uban kaninyo.” [D&P 119:5]. …

Kita naghisgot bahin sa pagtukod sa Zion. Dinhi niini kining butang makahatag og dakong kalambigitan ngari kanako ingon man kaninyo sa higayon nga kamo makasabut niini ug makakita niini pinaagi sa kahayag sa Espiritu sa Kamatuoran. Kay nahisulat: “Ug ako moingon nganha kaninyo, kon ang akong mga katawhan dili mosunod niini nga balaod, sa paghupot niini nga balaan, ug pinaagi niini nga balaod ibalaan ang yuta sa Zion ngari kanako, aron ang akong mga balaod ug ang akong mga paghukom masunod niini, aron kini mao ang labing balaan, tan-awa sa pagkatinuod Ako moingon nganha kaninyo, kini dili mahimo nga usa ka yuta sa Zion nganha kaninyo.” [D&P 119:6.] Nan, kita naghisgot kalabut sa pagtukod sa yuta sa Zion, nga mao ang usa sa mga hinungdan nga kita ania dinhi. Ug ang Dios miingon nga kon kita dili mosunod niini nga balaod, kini dili mahimo nga usa ka yuta sa Zion ngari kanato. …

Ang [ikapulo] maoy usa ka baruganan diin kita pagadumalahon. Ako wala moanhi, kamo wala moanhi, aron sa pagpatuman sa atong kaugalingong mga plano, ug mga pagbati, ug mga katuyoan. Ngano, si Jesus mismo wala moanhi aron paghimo niana. Sumala sa Iyang kaugalingong mga pulong, Siya moanhi dili aron mohimo sa iyang kaugalingong kabubut-on, apan sa kabubut-on sa Iyang amahan kinsa mipadala Kaniya [tan-awa sa Juan 5:30]. Ug kita mianhi dinhi dili aron mobuhat sa atong kaugalingong kabubut-on, apan sa kabubut-on sa Amahan kinsa usab mipadala kanato, ug kinsa mitawag kanato sa atong balaan ug nahimaya nga tawag. …

Kining temporal nga mga butang [ang uban] nagtuo nga dili kaayo importante, kini dili kaayo importante kon hukman gikan sa mga paagi nga atong gihagoan; apan kini importante kaayo kon timbangon sa timbangan sa kamatuoran, ang mga baruganan sa kinabuhing dayon diin ang Dios mipadayag mao ang labing mahinungdanon ngadto sa mga Santos, ngadto sa mga buhi ug sa mga patay, ngadto sa dili maihap nga katawhan nga nabuhi o nga mahimong mabuhi, kini nga mga butang importante kaayo. ….

Ako matinguhaon kaayo nga motan-aw sa mga tawo nga motuman niining balaod sa ikapulo tungod kay kini usa ka yano ug direkta nga sugo ngari kanato. Dili nga ako adunay personal nga kahingawa kon ang mga tawo mobayad ba sa ilang ikapulo o dili, ug ako wala maghunahuna nga ang Ginoo mismo magpakabana pag-ayo niana. Ang bulawan ug pilak Iyaha, ug mao man usab ang mga kabakahan diha sa liboan ka mga bungtod; ug kaniya anaa ang gahum sa pagmando sa tanang mga butang. Ug unsay atong naangkon niining kalibutan gihatag kanato alang sa atong maalamong paggamit, tungod kay kita dili makadala niini kon kita pagatawgon na unya. Atong katungdanan isip mga Santos sa Labing Halangdon nga Dios, nga kita magmatinuoron ug magmatarung ug mosubay sa hustong dalan, nga puno sa kaligdong ug magpabilin sa hustong mga baruganan bisag asa ug sa tanang higayon.¹³

Mga Sugyot alang sa Pagtuon ug Panaghisgutan

Unsa ang ubang temporal nga mga panalangin nga gihatag sa Dios kanato? Ngano nga mahinungdanon ang pag-ila nga ang tanan niini nga mga panalangin miabut isip mga gasa gikan sa Dios? Unsa ang nakapahimo sa ubang mga tawo sa pagkalimot nga ang Dios mao ang tinubdan niining mga panalangin?
Unsa ang relasyon tali sa atong paggamit sa yutan-ong mga kabtangan ug sa atong espirituhanon nga kaayohan? (Tan-awa usab sa D&P 104:13–18.) Sa unsang paagi nga kita mas makagamit pag-ayo sa mga panalangin nga gihatag sa Dios kanato?
Sa unsang paagi nga ang pagbayad sa ikapulo nagpakita sa atong gugma ug pasalamat ngadto sa Dios? Sa unsang paagi nga kita makaugmad og mapasalamaton nga pagbati kon kita mohatag og ikapulo ug mga halad?
Unsa ang inyong buhaton aron matudloan ang inyong mga anak ug mga apo sa pagbayad sa matinuoron nga ikapulo?
Ngano nga usahay usa ka hagit ang pagbayad sa ikapulo? Unsa ang atong buhaton aron pagbuntog niana nga hagit?
Ngano nga mahinungdanon ang pagbayad sa ikapulo bisan kon kita sa gihapon naglisud sa atong panalapi sa tibuok natong mga kinabuhi? Unsa ang espirituhanon ug temporal nga mga panalangin ang inyong nadawat gikan sa pagkamasulundon sa balaod sa ikapulo?

May Kalabutan nga mga Kasulatan: Leviticus 27:30; Isaias 45:12; Malaquias 3:8–12; Mosiah 2:20–22; D&P 59:21; 104:13–18; 119:1–7; 120

Ang Deseret Store, sikbit sa General Tithing Storehouse [Kinatibuk-ang Balay Tipiganan sa Ikapulo] Si Presidente Taylor mitudlo nga “ang tanang mga butang nga temporal ug tanang mga butang nga espirituhano… kauban sa Ebanghelyo.”

woman and daughter paying tithing — Kon kita mobayad sa ikapulo, kita miila sa mga panalangin sa Ginoo ngari kana-to ug mipakita sa atong pagkaandam sa paghupot sa Iyang mga sugo.