Kapitulo 1

Ang Gigikanan ug Kapalaran sa Tawo

Kita mga anak sa Dios, ug ang Dios niining katapusang mga adlaw nakakita nga angay nga kita adunay komunikasyon uban kaniya. Siya naglihok, pinaagi sa mga pagpadayag sa iyang kaugalingon ug sa iyang Anak nga si Jesukristo, pinaagi sa pagpangalagad sa balaang mga anghel ug pinaagi sa pagpahiuli sa balaan nga priesthood nga nagagikan sa Dios, ug pinaagi niini siya mismo gidumala, mibutang kanato diin kita makatuman sa tumong sa atong pagkalalang. ¹

Gikan sa Kinabuhi ni John Taylor

Sa usa sa pakigpulong nga iyang gihatag isip Presidente sa Korum sa Napulog Duha, si Presidente Taylor nahinumdom sa espirituhanong mga pangandoy nga iyang gibati isip usa ka bata nga makasabut sa katuyoan sa kinabuhi ug sa iyang relasyon ngadto sa Dios. Siya miingon: “Sa dihang ako bata pa mangutana ako sa akong kaugalingon, Kinsa ako? Diin ako gikan? Unsay akong gibuhat dinhi? Ug nganong ania ako dinhi? Kining mga butanga nakapahibulong pa gihapon kanato, daghan kanila ang nahibulong, apan kini ang mga hunahuna nga dili nato mapugngan nga palandungon. Atong makita ang mga bata nga matawo sa kalibutan, ug atong makita ang tingpamulak ug ting-init, tinglaglag ug tingtugnaw magsunod sa naandan nga han-ay, ug kita mangutana sa atong mga kaugalingon, Sa unsang gahum kining mga butanga nahimo? Nganong ania kita dinhi ug unsa ang tumong niining tanang mga butang nga atong nakita sa atong palibut?”²

Ang mga pagtulun-an ni Presidente Taylor nagpakita sa hingpit nga kalipay nga iyang nakaplagan diha sa mga doktrina sa ebanghelyo nga nakatabang kaniya nga makasabut sa iyang balaan nga gigikanan ug kapalaran isip usa ka anak sa Dios. Siya mipahayag nga “kon ang santos sa Dios mohunahuna, ug ang mga panan-awon sa kahangturan mabukas ngadto sa iyang panan-aw ug ang dili mausab nga mga katuyoan sa Dios molambo diha sa iyang hunahuna—kon siya mamalandong sa iyang tinuod nga pagkabutang sa atubangan sa Dios, sa mga anghel, ug sa mga tawo, dayon siya mopataas sa tanang mga butang sa panahon ug mobati ug mobugto sa mga pisi nga naggapos kaniya sa yutanong mga butang. Siya mamalandong sa Dios ug sa iyang kaugalingong kapalaran sa mahangturong plano sa Dios ug magmaya diha sa usa ka malamboong paglaum sa imortal nga himaya.”³

Mga Pagtulun-an ni John Taylor

Kita mga anak sa atong Langitnong Amahan ug adunay potensyal nga mahimong sama Kaniya.

“Unsa ba ang tawo, nga ikaw matinagdanon man kaniya? Ug ang anak sa tawo, nga ikaw nagdu-aw man kaniya?” (Salmo 8:4.)

Sa usa ka punto, ang tawo makita nga pobre kaayo, huyang, ug hungog, ug wala kaayoy hinungdan: sa laing punto, siya makita nga maalamon, intelehente, lig-on, madungganon, ug nahimaya. Kini anaa lamang sa inyong pagtan-aw sa usa ka tawo nga mao ang nakapahimo sa inyong opinyon bahin kaniya. Sa laing bahin, siya makita, ingnon tang, sama sa sagbot sa uma, nga karon mao, ug ugma ilabay ngadto sa hurnohan. Siya mausabon sa iyang mga opinyon, sa iyang mga hunahuna, mga pamalandong, ug mga linihokan. Siya tapulan, walay kapuslanan, ug mahandurawon, nga wala madumala sa bisan unsang husto nga baruganan. Siya nabuhi, ingnon tang, sama sa kaba-kaba, magkapa-kapa sa makadiyot, mamatay, ug wala na.

Sa laing punto, kita motan-aw kaniya nga nagagikan sa mga Dios—usa ka tawo nga potensyal nga mahimong Dios—ingon nga usa ka mahangturong binuhat kinsa nagpakabuhi sa wala pa siya moanhi dinhi, ug kinsa magpakabuhi human ang iyang mortal nga lawas mosagol ug makig-uban sa abug, diin siya gikan, ug gikan niini siya mabanhaw ug moambit niana nga kalipay diin mao ang iyang paingnan, o modawat sa ganti sa iyang dautang mga binuhatan, sumala sa mga kahigayunanu….

….Unsa ang [tawo]? Siya nanimuyo na sa mahangturong mga kalibutan; siya natawo na sa wala pa siya moanhi. Dili lamang siya anak sa tawo, apan siya usab mao ang anak sa Dios. Siya usa ka tawo nga potensyal nga mahimong Dios, ug anaa kaniya ang kidlap nianang mahangturong dilaab nga naigo gikan sa siga sa mahangturong kalayo sa Dios sa mahangturong kalibutan, ug gibutang dinhi sa yuta aron siya makaangkon sa tinuod nga kaalam, tinuod nga kahayag, tinuod nga kahibalo—aron siya makaila sa iyang kaugalingon—aron siya makaila sa Dios—aron siya masayud sa pipila ka butang kon unsa siya sa wala pa siya moanhi—aron siya masayud kon unsa ang iyang matagamtaman didto sa mahangturong mga kalibutan.⁴

Kon atong tan-awon ang tawo, siya giingon nga gihimo sa dagway sa Dios, alang sa yano nga katarungan nga siya usa ka anak sa Dios, ug sa iyang pagkaanak, siya gayud, dayag lang, iyang anak, nga nagagikan sa Dios, kansang hitsura, kita gisultihan, nga siya gibuhat. Wala siya magagikan sa usa ka gubot nga masa sa materya, nga naglihok o wala maglihok, apan natawo, sa sinugdanan nga kahimtang, aduna sa tanang mga galamhan ug mga gahum sa usa ka Dios. Ug kon siya mahingpit na, ug mouswag ngadto sa pagkahingkod, siya mahisama sa iyang Amahan— usa ka Dios, nga sa pagkatinuod Iyang anak. Ingon nga ang kabayo, ang toro, ang karnero, ug ang matag buhi nga nilalang, lakip sa tawo, mopasanay sa ilang kaugalingong mga kaliwat ug makapadayon sa ilang kaugalingong matang, mao usab ang Dios mopadayon sa iyaha.⁵

Ang [tawo] tisar nga nagbarug dinhi sa yuta sa hitsura sa iyang halangdong Tiglalang; maanindot nga pagkabuhat ang tanang niyang mga bahin, may usa ka lawas nga hitsas sa tanang kagamitan alang sa panginahanglan sa tawo; nagbarug, dili lamang pinaagi sa katungod, apan pinaagi sa pagpaigo, katahum, pagkabagay ug himaya, nag-una sa tanang nilalang; nag-angkon usab og mental nga mga gahum ug kapasidad sa paghanduraw sa nangagi, uban sa mga kapasidad sa pagpangatarungan diha sa hinungdan ug epekto, ug pinaagi sa nagpahimutang nga mga gahum sa iyang hunahuna, pinaagi sa pagdasig sa Makagagahum, sa pagsabut sa talagsaong mga balaod sa kinaiyahan ingon nga gipakita diha sa mga buhat sa paglalang; uban usab sa kapasidad sa paggamit sa mga elemento ug mga kusog sa kinaiyahan, ug sa pagsagop niini ngadto sa iyang kaugalingong espesyal nga kaayohan; ug pinaagi sa iyang mga gahum nga motuhop ngadto sa kinahiladman, nagkayab ngadto sa kalangitan, naghaguros sa tumang kakusog sa tibuok yuta, naggamit sa linain o hiniusang mga kusog sa kinaiyahan diin siya giliyokan ug nag-ulipon kanila ngadto sa iyang kabubut-on; sa ingon usab, pinaagi sa iyang kaalam, siya adunay dominyon sa mga isda sa dagat, sa mga langgam sa kalangitan, ug sa tanang mga kahayopan. ⁶

Kita nagkinahanglan ni Jesukristo aron makab-ot ang atong balaang potensyal.

Ang [tawo] nagbarug nga mapagarbuhon ingon nga pangulo sa tanang nilalang ug ang representante sa Dios dinhi sa yuta. Apan samtang siya nag-okupar niining nahimaya nga katungdanan, ug pareha sa dagway sa Dios, apan siya nakaangkon lamang, isip usa ka tawo, sa mga gahum nga angay sa tawo lamang; ug ubos sa kahuyang, balatian, sakit ug kamatayon. Ug kon siya mamatay, kon walay dakong tabang kalabut sa umaabot, kanang halangdong lawas magpabiling hilom ug walay mahimo, ang mga bahin sa lawas, nga kaniadto aktibo, madasigon ug malagsik, karon walay timik, dili aktibo ug walay gahum. Ug unsa sa hunahuna, nga sa wala pa mobalik ngadto sa kahangturan ug magpadayon sa kahangturan? Ug unsa ang mga gahum niini? O unsa ang bahin niana nga espiritu, nga, uban sa iyang mga enerhiya nga sama sa Dios, ang iyang panglantaw niini [o unang pagkahibalo] ug gahum, makatugkad sa walay katapusan? Unsay anaa niini ug asa kini? …

Kon… adunay espiritu ang tawo nga moabut ngadto sa umaabot, nga makatugkad sa mahangturong kauswagan, mahangturong mga katagbawan, ug mahangturong mga kahimayaan, dayon kadtong mga himaya, kadtong mga kahimayaan, kadtong mga kapabilidad ug kadtong mga gahum, mga gasa gayud sa usa ka gamhanan nga binuhat, gahum, o awtoridad niana nga anaa sa tawo…. Pinaagi niini nga gasa nga kita karon namulong. Kini sa usa ka baruganan nga nagagikan sa Dios, nga gigikanan sa gamhanan nga kaalam, kansang mga plano, ug mga gahum, ug mga kapabilidad nahimaya labaw niadtong mortal nga tawo, ingon nga ang mga langit ibabaw sa yuta, o ingon nga ang harianong mga buhat sa Halangdong Tiglalang sa kinatibuk-ang walay katapusang wanang nga mas labaw pa ngadto sa luyang mga paningkamot sa mga anak sa pagka-mortal.

Alang kini sa kahimayaan sa tawo niining kahimtang sa labaw pa nga salabutan ug sa Dios nga Kapangulohan nga ang pagpataliwala ug pag-ula ni Jesukristo gitukod, ug nga ang halangdong binuhat, ang tawo, nga hinimo sa dagway sa Dios, nga wala lamang buhata nga mahimong usa ka anak sa tawo, apan usa ka anak usab sa Dios,… ug gibuhat nga mahimong usa ka Dios, nanag- iya sa gahum, sa kaharianon, sa kahimayaan ug sa katungdanan sa usa ka Dios. Ingon nga kini nahisulat, “Mga hinigugma, kita karon mga anak sa Dios, kon maunsa unya kita kini wala pa ipakita, apan kita nasayud nga sa igapadayag na siya, kita mahisama kaniya, kay kita magasud-ong man unya kaniya sa iyang pagkamao.” [1 Juan 3:2.]

Isip usa ka tawo pinaagi sa mga gahum sa iyang lawas siya makakab- ot sa kaligdong ug pagkakompleto sa pagkatawo, apan dili makapadayon; isip usa ka tawo siya matawo, isip usa ka tawo siya mabuhi, ug isip usa ka tawo siya mamatay, apan pinaagi sa lintunganay ug gahum sa Dios nga Kapangulohan, nga anaa kaniya, nga mikunsad diha kaniya isip gasa sa Dios gikan sa iyang langitnong Amahan, siya makalabaw gikan sa higpit nga mga limitasyon sa pagkatawo ngadto sa kahalangdon sa usa ka Dios, ug sa ingon pinaagi sa pag-ula ni Jesukristo… . siya makahimo sa mahangturong kahimayaan, mahangturong mga kinabuhi ug mahangturong kauswagan. Apan kini nga transisyon gikan sa iyang pagkatawo ngadto sa pagka-Dios nga Kapangulohan mahimo lamang pinaagi sa usa ka gahum nga labaw sa tawo—walay katapusang gahum, usa ka mahangturong gahum, bisan ang gahum sa Dios nga Kapangulohan: kay tungod ni Adan ang tanan namatay, busa kang Kristo lamang nga ang tanan mabuhi [tan-awa sa 1 Mga Taga-Corinto 15:22].

Pinaagi ni [Kristo] ang katawhan gidala ngadto sa pagpakigdait ug pagpakigsulti sa Dios; pinaagi sa Iyang pag-ula sila makahimo, sama nga Siya, mibuntog sa kamatayon; pinaagi niana nga pag-ula ug sa gahum sa Priesthood nga nag-uban niana, sila mahimong manununod sa Dios ug kaubang manununod ni Jesukristo, ug mga tigpanunod sa mga trono, mga gahum, mga kayutaan ug mga kamandoan sa mahangturong mga kalibutan. Ug imbis ubos sa kamatayon, kon kanang katapusang kaaway malaglag, ug ang kamatayon gilamoy diha sa kadaugan, pinaagi nianang pag-ula sila mahimong mga amahan ug mga inahan sa mga kinabuhi, ug makahimo sa makanunayon ug mahangturong kauswagan. ⁷

Ang Simbahan ni Jesukristo motabang kanato nga makatuman sa atong balaang potensyal.

Ang Dios mi-orden diha kaninyo og mga presidente, mga apostoles, mga propeta, mga high priest, mga seventy, mga bishop ug ubang mga awtoridad; sila iyang gitudlo, gihatagan og gahum ug iyang gigiyahan, ubos sa iyang impluwensya, nagtudlo sa iyang balaod, nagbutyag sa mga baruganan sa kinabuhi, ug gi-organisar ug gi-orden sa tinuyo aron sa paggiya sa mga katawhan sa dalan sa kahimayaan ug mahangturong himaya. ⁸

Kita pareha sa ubang mga tawo nga anaa sa kangitngit mahitungod sa mga baruganan sa kaluwasan, ug sa atong relasyon ngadto sa Dios ug sa usag usa, hangtud nga kining mga butanga gipahibalo ngari kanato ni pinaagi Joseph Smith. ⁹

Kita mga anak sa Dios, ug ang Dios niining katapusang mga adlaw nakakita nga angay kita nga adunay komunikasyon uban kaniya. Siya naglihok, pinaagi sa mga pagpadayag sa iyang kaugalingon ug sa iyang Anak nga si Jesukristo, pinaagi sa pagpangalagad sa balaang mga anghel ug pinaagi sa pagpahiuli sa balaang priesthood nga nagagikan sa Dios, ug pinaagi niini siya mismo gidumala, mibutang kanato diin kita makatuman sa tumong sa atong pagkalalang. ¹⁰

Kita buot nga makahibalo ug makatamud sa katungdanan nga atong naangkon sa atubangan sa Dios ug sa daghang mga panalangin ug mga kahigayunan nga ania sa atong duol. Bag-o lang kitang nagsugod, ingon sa sinugdan, niining mahinungdanong buhat…. Dili kita makasabut kanunay niining mga butanga, ug tungod niini kita naghago ubos sa mga kalisud kalabut niining butanga, tungod kay kita wala makakita, wala kita makasabut sa katungdanan ug relasyon nga nagpadayon tali kanato ug sa atong Dios.

Ang Dios mao ang atong Amahan; kita iyang mga anak. Siya midala kanato ngadto sa iyang pakigsaad, ug ato kining kahigayunan sa pagpadayon gikan sa kaalam ngadto sa laing kaalam, gikan sa salabutan ngadto sa laing salabutan, gikan sa pagsabut sa usa ka baruganan ngadto sa laing baruganan, sa pagpadayon ug sa pag-uswag diha sa kalamboan sa kamatuoran hangtud makasabut kita sa Dios. Kay kita iyang mga anak, kita iyang mga anak nga lalaki ug mga anak nga babaye, ug siya ang atong amahan. Iyang gi-organisar kining iyang Simbahan aron nga kita ma-edukar sa mga baruganan sa kinabuhi, aron makasabut niadtong mga baruganan nga anaa sa dughan sa Dios, aron matudloan ang atong mga anak sa husto nga mga baruganan, aron nga kita mabutang sa usa ka katungdanan diin kita mahisama sa hitsura sa atong langitnong Amahan. ¹¹

Kita kinahanglan nga “maningkamot nga makugihon” sa pagtuman sa atong balaan nga potensyal.

Ang Ginoo mipadayag kanato og daghang mga panalangin, ug ako usahay maghunahuna nga kita wala kaayo magtamud sa kahayag sa kamatuoran nga napalambo, sa himaya nga nagsumpay sa ebanghelyo nga gipahiuli, sa kahayag sa pagpadayag nga gikasulti, sa katungdanan nga atong giangkon kalabut ngadto sa Dios, sa mga anghel, sa atong umaabot nga kaliwat ug sa atong mga ginikanan; sa paglaum nga ang ebanghelyo natisok diha sa dughan sa matag matinud-anong Santos sa Ulahing Adlaw, nga molambo uban sa pagka-imortal ug kinabuhing dayon….

Kita makalimot usahay sa atong mga pag-ampo, mga responsibilidad, mga katungdanan ug mga pakigsaad, ug sa daghang mga higayon kita magpadala sa mga butang nga sa kalagmitan makapalubog sa hunahuna, makapalibog sa panabut, makapahuyang sa atong pagtuo ug makapahikaw kanato sa Espiritu sa Dios. Nakalimot kita sa lungag diin kita gikalot, ug sa bato diin kita gipikas, ug gikinahanglan nga kita maghunahuna sa katungdanan nga atong naangkon, sa relasyon nga atong gipaluyohan ngadto sa Dios, sa usag usa ug sa atong mga pamilya, aron ang atong mga hunahuna makabalik pag-usab ngadto sa Dios kinsa mihimo kanato—ang atong Amahan nga tua sa mga kalangitan, kinsa naminaw sa atong mga pag-ampo, ug kinsa andam sa tanang higayon sa paghatag sa mga gusto sa iyang matinud-anong mga Santos. Ug kini usahay gikinahanglan nga kita maghunahuna sa katungdanan nga atong gihuptan kalabut sa yuta nga atong gipuy-an, sa pagkatawo nato kaniadto sa wala pa kita moanhi ug sa mga kahangturan nga moabut.

Kinahanglan nga kita dili magtinapulan ug maghinayhinay ug magdanghag ug walay pagpakabana; apan sama sa karaang mga Santos nga giawhag, mao nga tuguti kami nga moawhag kaninyo karon—paningkamot nga makugihon alang sa pagtuo nga sa makausa gihatag ngadto sa mga Santos [tan-awa sa Judas 1:3]….

….Kita, isip mahangturong mga binuhat, nakig-uban sa usa ka mahangturong Dios, nga adunay relihiyon nga nagtudlo ngadto niana nga Dios, matinguhaon, sama sa karaan, nga masayud sa pipila ka butang mahitungod kaniya, nga dad-on ngadto sa pagpakigsulti kaniya, sa pagtuman sa katuyoan sa atong pagkalalang ug sa atong kapalaran sa yuta, ug sa pagtabang sa Ginoo sa pagpahinabo niadtong mga butang nga iyang gihimo sa wala pa ang katukuran sa kalibutan, bahin sa tawhanong pamilya…. Ang Makagagahum dili gayud mousab sa iyang katuyoan, dili gayud mousab sa iyang plano ni mobakwi sa iyang mga balaod…. Ang iyang tunong usa ka mahangturong paglibot. Siya adunay usa ka tumong sa hunahuna, ug kana nga tumong mao ang pagtuman kabahin sa tawo ug sa yuta nga iyang gipuy-an.

Ang bugtong pangutana kanato mao kon kita makabulig ba sa Dios, o tagsa-tagsa ba kitang motrabaho sa atong kaugalingong kaluwasan o dili; motuman ba kita tagsa-tagsa sa nagkalain-laing mga kapangakohan nga gitugyan kanato o dili; kon kita ba mosunod sa mga ordinansa nga gihatag sa Dios o dili, nga aron masugdan sa atong mga kaugalingon, alang sa atong mga pamilya, alang sa mga buhi ug alang sa mga patay. Kon kita mobulig ba sa pagtukod og mga templo ug sa pagpangalagad niini; kon kita ba makighiusa uban sa Makagagahum, ubos sa direksyon sa iyang balaan nga priesthood, sa pagpahinabo sa mga butang nga gipamulong sa balaan nga mga propeta sukad pa sa sinugdanan sa kalibutan, kon kita ba maningkamot nga makugihon alang sa pagtuo nga sa makausa gihatag ngadto sa mga Santos. Kining mga butanga atong responsibilidad kutob sa mahimo….

….Siya nagtinguha nga ang iyang mga katawhan maningkamot nga makugihon alang sa pagtuo nga sa makausa gihatag ngadto sa mga Santos, nga isip imortal nga mga binuhat sila mahimong makigtambayayong uban sa Makagagahum, nga sila mahimong madasig pinaagi sa baruganan sa pagpadayag; nga sila kinahanglang makasabut sa butang sa ilang kaligdong ug pagkatawo; sa ilang relasyon sa kahangturan, sa kalibutan nga atong gipuy- an karon ug sa umaabot, ug sa mga kalibutan nga moabut….

Ang espiritu sa tawo, nga nanag-iya og lawas, pinaagi sa pamaagi sa walay katapusang ebanghelyo, mahimaya; ug kanang tawhana, kon siya magmatinud-anon, sa ngadto-ngadto makauban sa mga Dios sa mahangturong mga kalibutan; ug samtang kita nagtanom ug nagpugas ug nag-ani, ug nagpadayon sa naandang mga buluhaton sa kinabuhi, sama sa gibuhat sa ubang mga tawo, ang atong nag-unang tumong mao ang kinabuhing dayon ug mga kahimayaan; ang atong nag-unang tumong mao ang pagandam sa atong mga kaugalingon, sa atong umaabot nga kaliwat ug sa atong mga ginikanan alang sa mga trono, mga kayutaan ug sa mga gahum sa mahangturong mga kalibutan.

Kini mao ang atong tuyo, ug ang tuyo sa karaang mga Santos. Kini mao ang tuyo ni Adan, Noe, Enoch, Abraham ug sa mga propeta, nga sila unta makatuman sa ilang kapalaran dinhi sa yuta, ug, sama sa giingon sa usa ka karaang propeta, “motindog sa ilang bahin sa katapusang mga adlaw” [tan-awa sa Daniel 12:13] kon ang mga libro pagaablihan, kon ang dakong puti nga trono magpakita ug siya nga naglingkod niini, sa atubangan kansang nawong ang mga kalangitan ug ang yuta mipahilayo, nga kita ug sila, ug sila ug kita makapangandam, makatuman sa katuyoan sa atong pagkalalang dinhi sa yuta, sa pagpakig-uban sa espiritu nga mga binuhat nga didto sa mahangturong mga kalibutan; pagadawaton pag-usab ngadto sa atubangan sa atong Amahan, diin kita gikan, ug moapil niadtong mahangturong mga kamatuoran nga ang mga tawo, kon wala ang pagpadayag dili gayud masayud niini. Ania kita dinhi alang niana nga katuyoan;… nagtukod kita og mga templo alang niana nga katuyoan; midawat kita og mga endowment alang niana nga katuyoan; naghimo kita og mga pakigsaad alang niana nga katuyoan; nangalagad kita alang sa buhi ug sa mga patay alang niana nga katuyoan, ug sa tanang natong mga tumong, ug sa tanan natong mga katuyoan, sama sa tumong ug katuyoan sa dinasig nga mga tawo sa kanhiay nga mga adlaw, ang tanan may kalabutan ngadto sa mahangturong mga kamatuoran ingon man usab sa panahon….

Kini mao ang atong tuyo, ug kita makakab-ot niini, ug walay tawo nga makapugong niini, walay organisasyon, walay gahum, walay awtoridad, kay ang Dios mao ang nangulo, ug ang iyang gingharian magauswag, magauswag, magauswag ug kini magpadayon, ug motubo ug magkadaghan hangtud ang gingharian niini nga kalibutan mahimong mga gingharian sa atong Dios ug sa iyang Kristo. ¹²

Mga Sugyot alang sa Pagtuon ug Panaghisgutan

Sa unsang paagi nga kini nakatabang kaninyo nga masayud nga kamo usa ka anak sa Dios? Sa unsa nga paagi nga kini nga kahibalo nakaimpluwensya sa inyong mga pagbati mahitungod sa inyong kaugalingong potensyal? Sa unsa nga paagi nga kining kahibalo nakaimpluwensya sa inyong mga pag-ampo?
Sa unsa nga paagi nga ang kamatuoran nga ang tanang mga katawhan mga anak sa Dios nakaapekto sa inyong pagtan-aw sa uban? Sa unsa nga paagi nga kini nga kahibalo makaapekto sa atong relasyon sa atong mga banay?
Ngano nga mahinungdanon nga kita magpuyo sa mortal nga kahimtang? (Tan-awa usab sa 2 Nephi 2:11–13, 24–27; Moises 5:9–11.) Unsay papel ni Jesukristo sa pagtabang kanato sa pagtuman sa atong balaan nga potensyal?
Sa unsa nga paagi nga ang mga doktrina sa Simbahan nakatabang kaninyo nga makasabut sa inyong gigikanan ug kapalaran? Sa unsa nga mga pamaagi nga ang Simbahan makatabang kanato nga makatuman sa atong mahangturong kapalaran?
Unsa ang kahulugan niini nganha kaninyo “maningkamot nga makugihon” sa pagtuman sa inyong balaan nga potensyal? Unsa nga mga ehemplo ang inyong nakita sa mga tawo kinsa mihimo niini? Sa unsa nga paagi nga kita “makabulig sa Dios” sa pagkab-ot niini nga tumong?
Si Presidente Taylor mitudlo nga “ang atong nag-unang tumong mao ang pag-andam sa atong mga kaugalingon, sa atong umaabot nga kaliwatan ug sa atong mga ginikanan alang sa mga trono, kayutaan ug sa mga gahum sa mahangturong mga kalibutan.” Sa unsa nga paagi nga kita magpabiling magpokus niini nga tumong samtang kita moagi sa pagkamortal?

May kalabutan nga mga Kasulatan:Genesis 1:26; Salmo 82:6–7; Mga Taga-Roma 8:16–17; D&P 76:22–24, 50–70