Kapitulo 23

Mahangturong Kamatuoran

Walay laing mas bililhon ngari kanako kay sa mga baruganan sa mahangturang kamatuoran.¹

Gikan sa Kinabuhi ni John Taylor

Usa sa labing maayo nga mga hiyas ni John Taylor mao ang iyang debosyon sa kamatuoran, bisan unsa pay opinyon sa uban. “Ang pagdayeg o pagsaway sa kalibutan gamay ra og impluwensya sa hunahuna ni John Taylor kon bahin na sa kamatuoran,” sulat ni Elder B. H. Roberts. “Kon magkadaghan ang mga tawo nga mosaway sa [kamatuoran], mas modako ang iyang debosyon.”² Ang mga panghitabo nga naglibut sa pagkakabig ni John Taylor ngadto sa ebanghelyo nahimong usa sa labing unang mga ehemplo sa iyang gugma sa kamatuoran.

Si John Taylor gitudloan sa ebanghelyo ni Parley P. Pratt didto sa Canada. Ang mga pagtudlo ni Elder Pratt nakapahimuot ni John Taylor ug sa iyang relihiyoso nga mga higala, kinsa adunay susama nga mga pagtuo mahitungod sa mga ordinansa sama sa bunyag pinaagi sa pagpaunlod ug sa pagpandong sa mga kamot alang sa gasa sa Espiritu Santo. Bisan pa niana, sa dihang si Elder Pratt misulti kanila bahin ni Joseph Smith ug sa Basahon ni Mormon, kadaghanan sa mga higala ni John Taylor nagduha-duha sa pagkat-on og dugang, ug ang pipila gani nagdumili sa pagsusi sa Basahon ni Mormon ug sa mga pagtulun-an niini. Uban sa kaisug, si John Taylor namulong sa grupo ingon sa mosunod:

“Kita ania dinhi, ingon sa makita nga nangita sa kamatuoran. Hangtud karon kita hingpit nga misusi sa ubang mga tinuohan ug mga doktrina ug nakapamatuod niini nga bakak. Nganong mahadlok kita sa pagsusi sa Mormonismo? Kining tawhana, si Mr. Pratt, mihatag kanato og daghang mga doktrina nga nakatubag sa atong mga kaugalingong pagtuo. … Kita nag-ampo ngad- to sa Dios sa pagpadala kanato og mensahero, kon Siya adunay tinuod nga Simbahan sa yuta. Si Mr. Pratt mianhi kanato… nga walay puyo o puntil, sama sa pagbiyahe sa karaang mga apostoles; ug walay usa kanato ang makahimo sa pagsupak sa iyang doktrina pinaagi sa kasulatan o pangatarungan. Ako nagtinguha sa pagsusi sa iyang mga doktrina ug mga pag-angkon nga adunay awtoridad. … Kon akong mahibaloan nga ang iyang relihiyon tinuod, ako modawat niini, bisan unsa pa ang mga sangputanan.” Ang bug-os nga pagsusi ni John Taylor miresulta sa iyang bunyag niadtong 9 sa Mayo 1836. Siya sa wala madugay mipahayag, “Ako wala gayud sukad magduhaduha sa bisan unsang baruganan sa Mormonismo.”³

Isip usa ka sakop ug lider sa Simbahan, si John Taylor kanunay nga masaligan sa pagtudlo ug sa pagpanalipod sa kamatuoran. “Siya mipahayag sa ebanghelyo sa daghang mga yuta; ug isip kampyon sa kamatuoran, mibarug nga andam sa pagpakig-atubang sa tanan kinsa moataki niini, ug bisan iyang gikaatubang ang iyang kaatbang diha sa miting publiko, sa atubangan sa pundok sa mga tawo nga hilabihang kapuno sa pagdaut kaniya, o sa mga kolum sa publikong pamantalaan, siya nagmalampuson sa pagbuntog kanila pinaagi sa iyang gamhanang mga pamahayag sa kamatuoran.”⁴

Mga Pagtulun-an ni John Taylor

Kadtong kinsa nahigugma sa kamatuoran gipanalanginan uban sa kahibalo ug gahum.

Nagbarug sa lapad nga plataporma niini, giliyokan sa kupo sa kamatuoran, ang tawo sa Dios, pinaagi sa hugot nga pagtuo, katumbas ngadto sa umaabot, mikuha sa mga kurtina sa kahangturan, mibutyag sa misteryo sa mga kalangitan, ug nakahimo sa pagtan-aw sa mga panghitabo sa tibuok kasaysayan sa yuta, nakakita sa mga katuyoan sa halangdong Elohim, samtang kini milabay diha sa ilang tanang kaharianon ug gahum ug himaya. Sa ingon ang pagpakabuhi sa mubo nga panahon, ug sa pagkakita sa nangagi, karon, ug sa umaabot, siya nakakita sa iyang kaugalingon nga usa ka mahangturong binuhat nag-angkon nga kabanay sa Dios, usa ka anak sa Dios, nga adunay pipi- la ka mga kinaiya sa Dios. Siya nagtan-aw sa kalibutan ug sa tawo, sa ilang tanang mga bahin, nasayud sa iyang tinuod nga mga tinguha, ug uban sa salabutan nga gihatag sa iyang Amahan nga Celestial, siya nakasabut sa ilang gigikanan ug kapalaran. …

Ang iyang salabutan, nga gihatag sa Dios ug kanunay nga gidan- agan, mahimong malukpanon sama sa kalibutan ug mokatap sa kawanangan; ang iyang balaod mao ang balaod sa gugma; ang iyang lagda, ang lagda sa katarung ngadto sa tanan. Siya nahigugma sa iyang silingan, ug siya mohimo og maayo kaniya; siya nahigugma sa iyang Dios ug busa misimba kaniya; siya nakakita sa gahum sa kamatuoran, nga sama sa kahayag sa Dios, mikatap sa tibuok kawanangan, molamdag sa tanang mga kalibutan, ug mosulod diin adunay mga tawo o mga anghel, Dios o mga kalibutan nailhan; siya naggunit niini. Ang kamatuoran mao ang iyang kalo nga puthaw, kalasag, taming, iyang bato, panalipod; iya ang tanan karon ug sa kahangturan. Ang mga tawo mitawag kaniya nga buang tungod kay siya dili magiyahan sa ilang kabuang, ni mosunod sa ilang walay tumong, makadaot nga ehemplo. Apan samtang sila nangita og butang nga wala diha, siya nakasabut niana nga adunay tinuod nga bili. Samtang sila kontento sa mahuyang, nagkatag nga relihiyon, uso nianang higayona, apan walay gihimo alang sa kahangturan, ug mopugong sa labing taas, labing halangdong mga baruganan sa tawo, siya nakigbisog sa pag-ila sa Dios; ug miila kaniya, siya nakigbisog sa pagsunod kaniya ug mikumpisal nianang hugot nga pagtuo nga gihatag sa Dios kaniya. Siya midawat sa tanang mga kamatuoran, tawhanon ug balaan. Siya walay personal nga pagtuo nga paluyohan o paborito nga tinuohan nga ituboy. Walay mawala kaniya gawas sa sayop, ug walay maangkon gawas sa kamatuoran. Siya nagkalot, naghago, ug nagpangita niini sama sa tinago nga bahandi; ug samtang ang uban nakontento sa sungo ug sa tipaka sa dagami, siya miilog sa liso, sa unod, sa uyok sa tanan niana nga maayo, ug mopadayon sa tanang makapatuboy ug makahimaya sa tawhanong pamilya. …

Ang karaang mga tawo ba sa Dios makakaplag og kalipay sa kamatuoran? Mao usab kita. Sila ba adunay mga pagpadayag ug mga panan-awon? Mao usab kita. Nanagna ba sila? Mao usab kita. Nakigsulti ba ang Dios kanila? Siya nakigsulti usab kanato. Nanagna ba sila sa “pagpahiuli sa tanang mga butang?” [Tan-awa sa Mga Buhat 3:21.] Kita moingon nga kini ania na kanato karon. Nanagna ba sila bahin sa gingharian sa Dios? Kita nagtabang sa pagtukod niini. Sila ba adunay pagpangalagad sa mga anghel? Aduna usab kita. Sila aduna bay mga propeta, mga apostoles, mga pastor, mga magtutudlo, ug mga ebanghelista? Aduna usab kita. Sila aduna bay espiritu sa pagpanagna ug pagpadayag? Aduna usab kita. Nagpaabut ba sila sa ikaduhang pag-anhi ug sa mahimayaong pagpakita sa atong Ginoo ug Manluluwas nga si Jesukristo? Mao usab kita. Nagpaabut ba sila nga ang Dios moputol sa mga dautan gikan sa yuta ug sugdan ang paghari sa pagkamatarung? Mao usab kita. Nagpaabut ba sila ni Jesus ug sa mga santos nga maghari sa yuta? Mao usab kita. Kita, sa pagkatinuod, nagpaabut sa tanang mga butang nga ilang gipaabut; nagtinguha nga masayud sa tanang mga butang nga ilang nasayran, ug sa pagpahinabo sa tanang mga butang nga ilang gipanagna, sa dakong katumanan nga mao ang pagpahiuli sa tanang mga butang; ug ang mga tawo mahimong mamakak ug magpataka og sulti ug mapagarbuhon; sila dili makapugong sa mga plano sa Dios, ni mopahunong sa kauswagan sa mahangturong kamatuoran sa makadiyot—ang tumong niini mao ang pag-uswag, PAG-USWAG, PAG-USWAG, ug kini mosalikway sa kaaway. …

Ang impluwensya sa Makagagahum sa tanan nga mahangturong kamatuoran mobarug nga dili maunsa sa panan-aw sa nagpundok nga mga panon, ug ang mga nasud masayud nga ang Dios nagmando sa mga kalangitan.⁵

Ang kamatuoran, mahangturong kamatuoran, mao ang pondasyon sa paglaum sa Kristiyano: kini mao lamang ang sigurado nga sukaranan diin siya makatukod. Ang pagbiya niana aron sa pagsuporta sa pipila ka paborito nga relihiyosong tinuohan, siya nahulog ngadto sa mga kalibog sa pagkawalay pagtuo, pagduhaduha, kasaypanan, ug paglimbong, ug anaa sa dalan padulong sa kalaglagan. Ang gahum sa Dios anaa kanunay niadtong kinsa nahigugma sa kamatuoran ug nagsunod niini.⁶

Ang ebanghelyo mogiya kanato gikan sa kamatuoran ngadto sa kamatuoran.

Ang ebanghelyo giplano aron sa paggiya kanato gikan sa kamatuoran ngadto sa kamatuoran ug gikan sa salabutan ngadto sa salabutan, hangtud kana nga kasulatan matuman nga nagpahayag nga kita makakita sama nga kita nakit-an ug mahibalo ingon nga kita nahibaloan [tan-awa sa D&P 76:94], hangtud nga ang usa ka tawo dili na mosulti ngadto sa lain, nakaila ba kamo sa Ginoo, apan silang tanan makaila Kaniya gikan sa labing diyutay kanila ngadto sa labing dako kanila [tan-awa sa Jeremias 31:34], hangtud nga ang kahayag ug ang salabutan sa Dios mohatag og kahayag sa tanan, ug ang tanan magpainit sa kahayag sa adlaw sa mahangturong kamatuoran.⁷

Kabahin sa atong relihiyon, ako moingon nga kini aduna sa matag baruganan sa kamatuoran ug salabutan kalabut nato isip moral, intelekwal, mortal ug imortal nga mga binuhat, kalabut niini nga kalibutan ug sa kalibutan nga moabut. Kita bukas sa kamatuoran sa matag matang, bisan asa pa kini gikan, diin kini magsugod, o kinsa ang nagtuo niini. Ang kamatuoran, kon unhan sa gamay nga pulong nga “tanan,” naglangkob sa tanang butang nga sukad diha na o nga moabut pa ug mahibaloan pinaagi niini ug sa mga tawo karon ug hangtud sa walay katapusang mga panahon sa kahangturan. Ug katungdanan kini sa tanang intelehente nga mga binuhat kinsa mao ang responsable ug may tulubagon ngadto sa Dios alang sa ilang mga binuhatan, sa pagpangita sa kamatuoran, ug sa pagtugot niini sa pag-impluwensya kanila ug sa ilang mga binuhatan ug sa kinatibuk-ang dagan sa kinabuhi, gawasnon sa tanang pabor-pabor o gihunahuna nang daan nga mga pagtuo, bisan unsa pa kini ka tinuod tanawon ug angay nga tuhoan.

Kita, isip mga Santos sa Ulahing mga Adlaw, nagtuo, una, sa ebanghelyo, ug kana importante kaayo nga isulti, kay ang ebanghelyo naglakip sa mga baruganan nga motugkad sa kahiladman, mokatap, ug mouswag pa kay sa bisan unsang butang nga atong mahanduraw. Ang ebanghelyo nagtudlo kanato bahin sa pagkatawo ug mga hiyas sa Dios. Kini usab nagtudlo kanato sa atong relasyon ngadto niana nga Dios ug sa nagkalain-laing mga res- ponsibilidad nga ania kanato ngadto kaniya isip iyang mga anak. Kini nagtudlo kanato sa nagkalain-laing mga katungdanan ug mga responsibilidad nga ania kanato ngadto sa atong mga pamilya ug mga higala, ngadto sa katilingban, ngadto sa mga buhi ug sa mga patay. Kini nagpadayag ngari kanato sa mga baruganan kalabut sa umaabot. Gani, sumala sa panultihon sa usa sa daang mga tinun-an, kini “makahatag og kinabuhi ug pagkawalay kamatayon gidala ngadto sa kahayag,” [tan-awa sa 2 Timoteo 1:10], modala kanato ngadto sa pakigrelasyon sa Dios, ug moandam kanato alang sa kahimayaan sa mahangturong kalibutan.⁸

Ang Dios mipadayag ngari kanato sa mahinungdanon ug mahimayaon nga mga kamatuoran, ug Siya andam sa pagpadayag og dugang pa kon kita mobutang lamang sa atong mga kaugalingon ubos sa Iyang paggiya ug sa Iyang direksyon. Paningkamutan nato ang pagsunod sa baruganan nga gitudlo pagbalik-balik ni Jesus—ang pagbuhat sa kabubut-on sa atong Amahan kinsa atua sa langit, kinsa miingon, “Wala ko man tinguhaa ang pagbuhat sa akong kaugalingong kabubut-on kondili sa kabubut-on sa nagpadala kanako.” [Juan 5:30.] Kita ania dinhi sama nga Siya dinhi, ug ubos sa obligasyon sa dihang Siya gitawag sa pagbuhat sa kabubut- on sa atong Langitnong Amahan. Kita kinahanglang mobutang sa atong mga kaugalingon ubos sa balaod sa Dios, sa pulong sa Dios, ug sa kabubut-on sa Dios.⁹

Kita kinahanglan gayud nga dili mahadlok sa pagsakripisyo alang sa kamatuoran.

Ang kamatuoran kanunay nga gisupak sa mga anak sa mga tawo, kini nakatagbo sa hugaw nga mga kasingkasing ug sa dautan nga mga binuhatan. Ang mga Propeta kanunay nga gigukod; ug ngano? tungod kay sila maisugong mosulti sa pulong sa Ginoo ngadto sa mga katawhan. Si Esteban, sa paghisgot sa sama nga mga hilisgutan, miingon, “Kinsa ba sa mga Propeta ang wala lutosa sa inyong mga ginikanan kinsa nanagna mahitungod sa pag-anhi sa Matarung, kang kinsa kamo karon nahimong iyang magbubudhi ug mga mamumuno?” [Tan-awa sa Mga Buhat 7:52.] “Apan niining panahona” miingon ang mga katawhan, “kami nasayud nga sila mga dautan ug kami dili mobuhat niana.” Mao ang sulti sa mga Judeo ngadto ni Jesus, ug gani sila milansang kaniya sa krus. …

Ang Ginoo mipahiuli sa Ebanghelyo sama nga kini diha sa mga adlaw sa mga Apostoles. Kini nga Ebanghelyo dili uyon sa mga sistema sa mga tawo, nga nagkasumpaki ug nagkalain-lain; ug imbis moila, isip matinuorong mga tawo, sa mga kamatuoran nga anaa sa Biblia, nga ilang giingon nga ilang gituohan, apan, sa pagkatinuod wala, sila misulay sa pagtabon sa ilang walay klaro nga mga sistema ug dili subay sa kasulatan nga mga teyoriya, sa pagpanalipod sa ilang mga kaugalingon uban sa pagpakatarung sa kaugalingon. … Apan ang kamatuoran magpadayon; ang matinuoron sa kasingkasing mapukaw sa ilang pagkatulog; ang mga katuyoan sa Dios magpadayon; ang gingharian sa Dios matukod, ug …ang kamatuoran magbarug nga mapagarbuhon ug dili matarug, …ug walay gahum nga makababag sa pag-uswag niini.¹⁰

Ako mosulti kaninyo mahitungod sa akong ubang mga pagbati sa dihang ako unang misulod niini nga simbahan. Dugay nang panahon ang milabay. Sa dihang una nakong nadungog ang ebanghelyo, ako napugos sa pagdawat nga adunay butang nga makatarunganon mahitungod niini. Ako maglaum nga dili unta kini tinuod. “Kon kini tinuod,” ako miingon, “isip usa ka matinuoron nga tawo ako obligado sa pagsunod niini, o ako dili na makasalig sa akong kaugalingon.” Sa dihang akong gisusi ang hilisgutan, ug nakombinsir nga kini tinuod, ako miingon, “Ako motuo niini; kinahanglan nga ako modawat niini; ako dili makasalikway sa mga baruganan sa mahangturong kamatuoran.” Ug ako moingon, dugang pa, ako wala mahinumdom og panahon sa akong kinabuhi sa diha nga, kon si bisan kinsa ang tudloan sa kamatuoran nga dili malalis, apan ako andam kaniadto sa pagsunod niini ug ako andam karon.

Kon si bisan kinsang tawo sa relihiyoso nga kalibutan, o sa politikanhon nga kalibutan, o sa syentipikanhon nga kalibutan, motudlo kanako og usa ka baruganan nga tinuod, ako andam sa pagdawat niini, bisan diin pa kini gikan. Nan, miingon ang usa ka tawo, nagtuo ba ikaw sa Biblia? Oo. Nagtuo ba ikaw sa Basahon ni Mormon? Oo. Nagtuo ba ikaw sa Basahon sa Doktrina ug mga Pakigsaad? Oo. Ako nagtuo sa tanan nga gisulat o gipamulong sa Dios, ang tanan nga kita adunay rekord, ug ako andam sa pagtuo sa tanan nga siya makigsulti ngadto sa tawhanong pamilya. Kita nagpahayag nga mituo sa tanang kamatuoran, ug nga gidumala sa tanang kamatuoran.¹¹

Ako nagpaabut sa dihang ako nagpasakop niini nga simbahan, nga ako gukuron ug isalikway. Ako nagpaabut nga ang mga tawo pagagukuron. Apan ako nagtuo nga ang Dios namulong, nga ang mahangturong mga baruganan sa kamatuoran gipadayag, ug nga ang Dios adunay buhat nga ipatuman nga supak ngadto sa mga ideya, mga panan-aw, ug mga pagsabut sa mga tawo, ug ako wala masayud apan kini nagkinahanglan sa akong kinabuhi sa dili pa ako makapadayon. … Kon sila mipatay ni Jesus sa unang mga panahon, dili ba ang samang pagbati ug impluwensya mosangpot sa samang mga sangputanan niining mga panahona? Akong giihap ang bili sa dihang una akong nagsugod, ug nagbarug nga andam sa pag-atubang niini.¹²

Ang Ginoo, pinaagi sa yano nga mga paagi, makahimo sa pagatiman ug pagluwas sa iyang mga katawhan, apan sila kinahanglan nga mohatag og walay pagduha-duha nga pagtuo ug pagsalig kaniya; ug kon sila mabutang sa malisud nga sitwasyon sila kinahanglan gayud nga dili mahadlok sa paghimo og sakripisyo alang sa pagpadayon sa kamatuoran, ug ang tanan maayo ra kanato buhi man o himatyon, karon o sa kahangturan.¹³

Kita kinahanglan gayud nga magpadayon sa pagpangita ug pagdawat sa kamatuoran.

Kita nagtinguha sa kamatuoran. Kita nagsugod sa pagpangita niini, ug kita sa kanunay nangita niini, ug kutob sa atong makaplagan nga bisan unsang tinuod nga baruganan nga gipadayag pinaagi ni bisan kinsa nga tawo, pinaagi sa Dios, o pinaagi sa balaang mga anghel, kita modawat niini ug mohimo niini nga kabahin sa atong relihiyoso nga mga pagtuo.¹⁴

Ang usa ka tawo nga nangita sa kamatuoran walay lahi nga sistema nga gisaligan, walay lahi nga tinuohan nga panalipdan o teyoriya nga gibarugan. Siya modawat sa tanang kamatuoran, ug kana nga kamatuoran, sama sa adlaw sa kalangitan, mohayag ug mosangkad sa iyang masilaw nga mga sidlak sa tibuok nilalang. Kon ang mga tawo mokuha sa ilang mga kaugalingon sa pagpabor- pabor ug paghukom, ug sa mainampoon ug makugihong paagi mangita sa kamatuoran, sila makakita niini bisan asa sila padulong.¹⁵

Usa ka dakong katarungan ngano nga ang mga tawo mapakyas kanunay sa ilang daghang mga pagpangita sa pilosopikanhong kamatuoran mao nga sila nagtinguha niini pinaagi sa ilang kaugalingong kaalam, ug mihimaya sa ilang kaugalingong salabutan, ug wala mangita ngadto sa Dios alang niana nga kaalam nga mipuno ug midumala sa kalibutan ug mihan-ay sa tanang mga butang. Kana mao ang usa sa labing lisud sa mga pilosoper sa kalibutan, ingon nga kini ania karon, nga ang tawo nagangkon ngadto sa iyang kaugalingon nga maoy nag-imbento sa tanang butang nga iyang madiskobrehan. Bisan unsang bagong balaod ug baruganan nga sulagma niyang nadiskobrehan iyang giangkon sa iyang kaugalingon imbis mohatag og himaya ngadto sa Dios.¹⁶

Walay laing mas bililhon ngari kanako kay sa mga baruganan sa mahangturong kamatuoran; kay sa mga baruganan sa mga kinabuhing dayon; mahangturong kaluwasan, ug mahangturong mga kahimayaan didto sa gingharian sa Dios. Apan anaa ra nato ang pagsabut niini, kay kon kita dili makasabut niini, bisan unsa pa ka mahinungdanon ang mga kamatuoran, kini dili makahatag kanato og kaayohan.¹⁷

Kita nagdawat sa tanang kamatuoran, sa bisan unsang matang tingali kini, ug matinguhaon sa pag-angkon ug pagbaton niini, sa pagpangita niini sama sa atong pagpangita sa tinago nga mga bahandi; ug sa paggamit sa tanang kahibalo nga gihatag sa Dios kanato aron sa pag-angkon sa tanang salabutan sa atong mga kaugalingon nga iyang gihatag ngadto sa uban; ug sa pagpangayo gikan sa iyang mga kamot sa pagpadayag ngari kanato sa iyang kabubut-on, bahin sa mga butang nga giplano pag-ayo sa pagpasiugda sa kalipay ug pagkatawo sa tawhanong katilingban.

Kon adunay bisan unsang maayong mga baruganan, bisan unsang moral nga pilosopiya nga wala pa nato maangkon, kita matinguhaon nga makat-on niini. Kon adunay bisan unsa nga butang sa syentipiko nga kalibutan nga wala pa nato masabti, kita nagtinguha nga makahibalo niini. Kon adunay bisan unsang sanga sa pilosopiya nga giplano sa pagpasiugda sa tawhanong pagkatawo, nga wala pa nato maangkon, kita buot nga makaangkon niini sa atong mga kaugalingon. Kon adunay bisan unsang butang kalabut sa lagda ug sa gobyerno sa mga nasud, o sa mga pangagamhanan, sa laing mga pulong, nga wala masinati, kita nagtinguha sa pag-angkon niini. Kon adunay relihiyoso nga mga ideya, bisan unsang teyolohikanhong mga kamatuoran, bisan unsang mga baruganan kalabut sa Dios, nga wala nato makat-uni, kita mohangyo sa katawhan, ug kita mag-ampo sa Dios, ang atong Langitnong Amahan, sa paglamdag sa atong mga hunahuna nga kita unta makasabut, makaamgo, makadawat, ug magsunod niini isip kabahin sa atong relihiyosong pagtuo. Sa ingon ang atong mga ideya ug mga hunahuna modako sama ka dako sa lapad nga kalibutan, modawat sa tanan kalabut sa kahayag, kinabuhi, o pagpuyo kalabut niini nga kalibutan o sa kalibutan nga moabut. … Kini mangita sa salabutan sa mga Dios nga nagpuyo sa mahangturong mga kalibutan. Ilang huptan ang tanang maayo ug halangdon ug bililhon ug makalipay ug giplano aron sa pagpatunhay sa kahimtang sa tawhanong pamilya.

Walay tawo o hut-ong sa mga tawo kinsa nakatudlo sa dalan nga atong subayon, kon kabahin niining mga butanga. Walay mga tinuohan ni mga teyoriya nga ania sa kalibutan nga atong giingon nga atong paminawon, gawas kon kini mapamatud-an pinaagi sa mga baruganan sa mahangturong kamatuoran. Atong matan-aw pag-ayo, maimbestigar, matuki, ug masusi ang tanan nga nagpresentar niini sa atong panabut, ug hangtud nga kita makasabut sa bisan unsang mga kamatuoran nga ania, malipayon kitang motamud niini isip kabahin ug porsyon sa sistema diin kita nakahibalo.¹⁸

Kon adunay bisan unsang kamatuoran sa langit, yuta, o impyerno, ako buot modawat niini; dili ko igsapayan sa unsang porma kini moabut kanako, kinsa ang nagdala niini, o kinsa ang nagtuo niini; mainila man o dili, kamatuoran, ang mahangturong kamatuoran, nga buot ko nga moliyok kanako ug akong matagamtaman.¹⁹

Mga Sugyot alang sa Pagtuon ug Panaghisgutan

Unsa nga mga tinubdan sa mahangturong kamatuoran ang ania kanato? Sa unsa nga paagi nga kamo makapauswag sa mga pamaagi sa inyong paggamit niini nga mga tinubdan?
Sa unsa nga paagi nga ang ebanghelyo mogiya kanato “gikan sa kamatuoran ngadto sa kamatuoran”? Unsa nga mga kausaban ang inyong namatikdan sa inyong kinabuhi samtang kamo nagkat-on ug nagdawat og bag-ong mga kamatuoran?
Unsa nga mga sakripisyo ang nahimo ninyo o sa uban nga inyong nailhan alang sa kamatuoran? Unsa nga mga panalangin ang miabut tungod niini?
Kadaghanan sa mga katawhan sa Dios namatay tungod sa kamatuoran. Sa unsa nga paagi nga kita makapuyo alang sa kamatuoran uban sa sama nga paghalad ug debosyon?
Ngano sa inyong hunahuna nga ang mahangturong kamatuoran kanunay nga gisupak sa kinatibuk-an sa kalibutan? Unsa ang atong mahimo sa pagtabang sa mga bata nga moila ug modawat sa kamatuoran? Unsa ang atong mahimo isip mga pamilya sa paglig-on sa atong pasalig sa kamatuoran?
Ngano nga importante sa pagpadayon sa pagdugang sa atong pagsabut sa kamatuoran? Sa unsa nga mga paagi nga kita makasunod sa tambag ni Presidente Taylor sa pagpadayon sa pagpangita alang sa kamatuoran? Unsaon nato sa pag-ila sa kamatuoran gikan sa sayop?
Unsa ang pipila ka mga kamatuoran sa ebanghelyo nga inyong nakita nga labing makadasig ug makalig-on? Sa unsa nga paagi nga kamo isip usa ka sakop sa Simbahan makatabang sa uban nga makasabut ug modawat sa kamatuoran?

May Kalabutan nga mga Kasulatan: Mga Taga-Filipos 4:8; 1 Mga Taga-Tesalonica 5:21; Alma 32:28–29; Moroni 10:4–5; D&P 45:57; 93:24; Mga Artikulo sa Hugot nga Pagtuo 1:13

wheat — “Samtang ang uban nakontento sa sungo ug sa tipaka, …[ang tawo sa Dios] miilog sa liso, sa unod, sa uyok sa tanan niana nga maayo.”