Kapitulo 24

Ang Gingharian sa Dios

Kita nagpahimutang sa pondasyon sa usa ka gingharian nga mohangtud sa kahangturan;—nga motubo karon ug mahingpit sa kahangturan. Kita anaa sa usa ka mas mahinungdanon nga buhat kaysa sukad nakaokupar sa atensyon sa mga mortal.¹

Gikan sa Kinabuhi ni John Taylor

Si John Taylor hugot nga mituo nga ang gingharian sa Dios matukod dinhi sa yuta. Siya nakasabut nga kini nga paningkamot wala mag-agad ni Propeta Joseph Smith o ni bisan kinsang tawo, apan nga kini gigiyahan gayud sa Ginoo. Ug siya andam sa pagpanalipod niini nga paningkamot sa iyang kinabuhi.

Niadtong 1838, sa wala madugay human sa iyang tawag sa Korum sa Napulog Duha, si John Taylor mibiyahe ngadto sa Far West, Missouri, aron sa pagpakig-uban sa mga Santos. Sa pagpaingon didto, siya nakatakda sa pagpamulong ngadto sa usa ka grupo duol sa Columbus, Ohio. Sa hapit na ang gitakdang oras, pipila ka mga kaigsoonan nagdala og balita nga pipila ka mga tawo nagpundok didto sa tigumanan nga dapit ug nagplano sa pagbutang og alketran ug balahibo ngadto ni Elder Taylor. Ang mga kaigsoonan mitambag kaniya sa pagkanselar sa miting tungod kay sila gamay ra ug dili makapanalipod kaniya. Bisan pa niana, si Elder Taylor miinsister nga siya moadto ug mosangyaw ingon sa giplano ug mopadayon bisan og siya lamang ang moadto.

Sa dihang miabut siya sa dakong pundok nga nagtapok aron maminaw kaniya, siya mipadayon sa pagpamulong og una mahitungod sa iyang bag-ong pag-abut gikan sa mga nasud nga gimandoan sa mga monarka. Siya misulti kanila bahin sa dungog nga iyang gibati nga nagbarug sa gawasnong yuta. Sa paghisgot kon giunsa pagkab-ot kana nga kagawasan, siya miingon: “Mga ginoo, ako karon nagbarug taliwala sa mga tawo kansang mga amahan nakig-away ug nakaangkon sa usa sa labing dako nga mga panalangin nga sukad gihatag sa tawhanong pamilya—ang katungod sa paghunahuna, sa pagsulti, sa pagsulat; sa katungod sa pagsulti kinsa ang modumala kanila, ug sa katungod sa pagsimba sa Dios sumala sa mga pagmando sa ilang kaugalingong mga tanlag—kining tanan sagrado, tawhanong mga katungod, ug karon gihatag sa Batakang Balaod sa Amerika. Akong nakita sa akong palibot ang mga anak niadtong halangdong mga amahan, kinsa, kay sa pagyukbo ngadto sa mga pagmando sa mga malupigon, pagtahan sa ilang mga kinabuhi, mga katigayunan ug sagrado nga mga dungog sa pagguba sa mga posas, aron makatagamtam og kagawasan sa ilang mga kaugalingon, sa pagtugyan niini ngadto sa ilang kaliwat, o mamatay sa pagpanglimbasog.”

Si Elder Taylor dayon mipadayon: “Usab, ako mosulti kaninyo, nga ako gipahibalo nga kamo buot nga mobutang kanako og alketran ug balahibo, tungod sa akong relihiyoso nga mga opinyon. Mao ba kini ang grasya nga inyong napanunod gikan sa inyong mga amahan? Mao ba kini ang panalangin nga ilang gipalit sa ilang mahal nga dugo sa kasingkasing—kining inyong kalingkawasan? Kon mao, kamo karon aduna nay usa ka biktima, ug kita aduna nay halad ngadto sa diosa sa kalingkawasan.”

Sa pagkasulti niana, iyang gigisi ang iyang saliko ug misinggit: “Mga ginoo duol uban sa inyong alketran ug mga balahibo, ang inyong biktima andam na; ug kamong mga espiritu sa halangdong mga bayani, tan-awa ang mga binuhatan sa inyong alaot nga mga anak! Duol, mga ginoo! Duol, ako miingon, nga ako andam!” Si Elder Taylor mihunong sulod sa pipila ka mga minuto, apan walay usa nga milihok o misulti. Siya dayon mipadayon sa iyang mga pakigpulong ug misangyaw ngadto sa pundok uban ang kaisug ug gahum sulod sa tulo ka mga oras.²

Sama sa giingon ni Elder Matthias F. Cowley sa Korum sa Napulog Duha daghan nang mga tuig ang nanglabay human sa kamatayon ni Presidente Taylor, “Siya nagpakabuhi, naghago ug namatay nga hingpit naghulagway sa iyang paborito nga motto, ‘Ang Gingharian sa Dios o wala.’ ”³

Mga Pagtulun-an ni John Taylor

Ang yuta iya sa Ginoo ug Siya ang may katungod nga tigmando, maghuhukom, ug hari.

Kinsa ang mihimo niini nga yuta? Ang Ginoo. Kinsa ang mipatunhay niini? Ang Ginoo. Kinsa ang mipakaon ug misinina sa minilyon sa tawhanong pamilya nga anaa niini, santos ug makasasala? Ang Ginoo. Kinsa ang nagtuboy sa tanan diha sa kalibutan? Ang Ginoo. … Kinsa ang mihatag og panabut sa tawo? Ang Ginoo. Kinsa ang mihatag sa hentil nga pilosoper, makinista, ugbp, matag tipik sa salabutan nga ilang naangkon bahin sa elektrik nga telegrapo, sa kusog ug kagamitan sa inalisngaw ngadto sa gusto sa tawhanong pamilya ug sa matag matang sa inbensyon nga migawas sa miaging siglo? Ang Ginoo. … Kinsa ang adunay katungod sa pagmando sa mga nasud, sa pagkontrol sa mga gingharian ug sa pagdumala sa tanang mga katawhan sa yuta?⁴

Kini nga yuta mao ang tukma nga puy-anan nga dapit, ug angay nga kabilin sa mga Santos. Tungod kay kini iya ni Jesukristo, kini usab iya sa iyang mga sulugoon ug mga sumusunod, kay kita gisultihan, “Iya sa Ginoo ang yuta ug ang pagkapuno niini,” [Mga Salmo 24:1] ug nga, sa diha nga ang mga butang anaa sa ilang tukma nga dapit, “ang mga balaan sa Labing Halangdon modawat sa gingharian, ug moangkon sa gingharian ilalum ug sa pagkadako sa gingharain sa tibuok langit, igahatag ngadto sa katawhan sa mga balaan sa Labing Halangdon.” [Tan-awa sa Daniel 7:18, 27.] Busa kini mao ang ilang angay nga kabilin.⁵

Ang mga Kasulatan … nagrepresentar ni Kristo ingon nga mao ang angay nga manununod, ug tigpanunod niini nga kalibutan; sila nagrepresentar kaniya ingon nga nakaanhi na sa makausa sa pag-ula alang sa mga sala sa kalibutan; apan nga siya moanhi pagkahuman isip tigmando, maghuhukom, ug hari niini.⁶

Ang Simbahan nagrepresentar sa pagsugod sa gingharian sa Dios sa yuta.

Ang gingharian sa Dios nagpasabut sa panggobyerno sa Dios. Kana nagpasabut, nga gahum, awtoridad, pagmando, dominyon, ug katawhan nga pagamandoan. Apan kana nga baruganan dili matuman, dili sa hingpit matuman, hangtud, ingon nga gisulti kanato sa mga kasulatan, ang mga gingharian niini nga kalibutan mahimong mga gingharian sa atong Ginoo ug sa iyang Kristo, ug siya momando kanila [tan-awa sa Pinadayag 11:15], ug ngadto kaniya ang matag tuhod moluhod ug ang matag dila mokumpisal nga siya mao ang Kristo [tan-awa sa D&P 88:104], ngadto sa himaya sa Dios, ang Amahan. Kana nga panahon wala pa moabut, apan adunay pipila ka mga baruganan nga may kalabutan niana nga miabut na; sa ato pa, ang pagsugod niana nga gingharian, ug ang pagsugod niana nga gingharian mahimo lamang pinaagi niana nga Binuhat kinsa mao ang Hari ug Tigmando, ug ang Pangulo niana nga panggobyerno, una misulti sa iyang mga ideya, sa iyang mga baruganan, sa iyang mga balaod, sa iyang panggobyerno ngadto sa mga tawo. Kon wala pa kita dili masayud unsa ang iyang mga balaod.⁷

Unsa ang unang butang gikinahanglan alang sa pagtukod sa iyang gingharian? Kini mao ang magapatindog og usa ka propeta ug siya mopahayag sa kabubut-on sa Dios; ang sunod nga butang mao ang pagbaton og katawhan nga magmasulundon ngadto sa kamot sa Ginoo pinaagi niana nga propeta. Kon kamo dili makabaton niini, kamo dili gayud makatukod sa gingharian sa Dios dinhi sa yuta.⁸

Ang Dios matinguhaon sa pagsugod sa iyang gingharian dinhi sa yuta, ug siya mihimo sa unang bahin, sa pagtukod sa iyang simbahan, sa pag-organisar sa mga tawo nga iyang gikatag sa mga nasud ug sa pagpundok kanila, nga aron adunay usa ka panon ug usa ka magbalantay [Juan 10:16], ug usa ka Ginoo, usa ka pagtuo, ug usa ka bunyag, ug usa ka Dios, nga ibabaw sa tanan ug anaa sa tanan [tan-awa sa Mga Taga-Efeso 4:5–6], ug sa maong paagi ang tanan pagamandoan. Sa pagpahigayon niining katuyoan siya maorganisar sa iyang balaang pagkapari ingon nga kini didto na sa langit.⁹

Kita naghisgot usahay mahitungod sa simbahan sa Dios, ug ngano? Kita naghisgot bahin sa gingharian sa Dios, ug ngano? Tungod kay, sa dili pa nga adunay gingharian sa Dios, kinahanglan nga adunay usa ka simbahan sa Dios, ug mao nga ang unang mga baruganan sa ebanghelyo gikinahanglan nga isangyaw ngadto sa tanang mga nasud, ingon sa kaniadto sa dihang ang Ginoo nga si Jesukristo ug ang uban mihimo sa ilang pagpakita dinhi sa yuta. Ug ngano kini? Tungod kay dili mahimo ang pagtudlo sa balaod sa Dios diha sa mga katawhan kinsa dili magpaubos ug magpagiya pinaagi sa espiritu sa pagpadayag.¹⁰

Ang Dios dili makatukod og usa ka gingharian dinhi sa yuta gawas kon siya adunay simbahan ug katawhan kinsa mosunod sa iyang balaod ug andam sa pagsunod niini; ug uban sa pag-organisar sa mao nga katawhan, gipundok gikan sa mga nasud sa yuta ubos sa direksyon sa usa ka tawo nga dinasig sa Dios, ang tigpama-ba ni Jehovah ngadto sa iyang mga katawhan; ako moingon nga, uban sa mao nga organisasyon, adunay higayon alang sa Ginoong Dios nga mapadayag, adunay kahigayunan alang sa mga balaod sa kinabuhi nga mapakita, adunay higayon alang sa Dios sa pagtudlo sa mga baruganan sa langit dinhi sa yuta ug alang sa kabubut-on sa Dios nga mahimo dinhi sa yuta ingon nga kini gihimo sa langit.¹¹

Si Jesukristo motukod pa sa hingpit sa Iyang gingharian ug momando dinhi sa yuta.

“Paanhia ang imong gingharian.” [Mateo 6:10.] … Kini gitudlo ni Jesus ngadto sa iyang mga tinun-an sa dihang sila miduol ngadto kaniya, nga nag-ingon, tudloi kami sa pag-ampo. … Ang imong gingharian moabut. Unsa nga gingharian? Unsa ang kahulugan sa “imong gingharian moabut”? Kini nagpasabut sa pagmando sa Dios. Kini nagpasabut sa balaod sa Dios. Kini nagpasabut sa gobyerno sa Dios. Kini nagpasabut sa mga katawhan kinsa naminaw ug kinsa andam sa pagpaminaw ug sa pagsunod sa mga sugo ni Jehovah. Ug kini nagpasabut nga adunay Dios kinsa andam sa paggiya ug pagtultol ug pagpaluyo sa iyang mga katawhan. Paanhia ang imong gingharian, aron ang imong gobyerno matukod, ug ang mga baruganan sa mahangturong kamatuoran ingon nga sila didto sa mga kalangitan mahimong ikahatag ngadto sa mga tawo; ug nga, kon kini gihatag ngadto sa mga tawo, kadtong mga tawo mahimong ubos niadtong mga balaod ug ngadto niana nga gobyerno, ug magpuyo diha sa kahadlok sa Dios, magsunod sa iyang mga sugo ug nga ubos sa iyang direksyon. Ang imong gingharian moabut, aron nga ang kalibog, ang dautan, ug pagkadautan, ang pagbuno ug pagpaagas sa dugo nga karon ania taliwala sa katawhan mawala, ug ang mga baruganan sa kamatuoran ug matarung, ang mga baruganan sa pagkamabination, gugma nga putli, ug gugma ingon nga kini anaa sa dughan sa mga Dios, mahimong magpuyo uban kanato.¹²

Akong gipakitau … nga ang gingharian sa Dios sa literal motukod sa yuta. Kini dili usa ka aparisyon, sumala sa pipila ka mga tighanduraw, apan usa ka mahinungdanong kamatuoran. Kini pagatukuron, ingon sa gisulti kaniadto, sa literal nga yuta, ug pagalangkuban sa literal nga mga lalaki, mga babaye, ug mga bata; sa buhi nga mga santos kinsa nagsunod sa mga sugo sa Dios, ug sa nabanhaw nga mga lawas kinsa aktwal nga mobangon gikan sa ilang mga lubnganan, ug magpuyo sa yuta. Ang Ginoo mamahimong hari sa tibuok yuta, ug ang tanang katawhan sa literal ubos sa iyang kaharian, ug sa matag nasud ubos sa mga kalangitan kinahanglan nga moila sa iyang awtoridad, ug moyukbo ngadto sa iyang gahum. Kadtong kinsa mialagad kaniya diha sa pagkamatarung adunay komunikasyon uban sa Dios, ug uban ni Jesus; makaangkon sa pagpangalagad sa mga anghel, ug makahibalo sa nanglabay, karon, ug sa umaabot; ug ang ubang mga tawo, kinsa dili mosunod sa hingpit sa iyang mga balaod, ni hingpit nga matudloan sa iyang mga pakigsaad, mahimo nga bisan pa niana, mosunod sa hingpit sa iyang gobyerno. Kay kini mao ang paghari sa Dios dinhi sa yuta, ug siya mopatuman sa iyang mga balaod, ug misugo niana nga pagkamasulundon gikan sa mga nasud sa kalibutan nga mao gayud ang iyang katungod. Si Satanas dili tugutan sa pagkontrol sa mga lumulupyo niini, kay ang Ginoong Dios mao ang mamahimong hari sa tibuok yuta, ug ang gingharian ug ang kahalangdon sa gingharian ubos sa tibuok langit ihatag ngadto sa mga santos.¹³

Unsa ang mga epekto sa pagkatukod sa gingharian ni Kristo, o sa paghari sa Dios dinhi sa yuta? … Kini mao ang pagpaundang sa gubat, pagpaagas sa dugo, kaalautan, sakit, sala, ug sa pagpahiluna sa usa ka gingharian sa kalinaw, pagkamatarung, hustisya, kalipay, ug kauswagan. Kini mao ang pagpahiuli sa yuta ug sa tawo sa ilang kanhing himaya ug sa gigikanan nga kamaayo; gani, ang pagpahiuli sa tanang mga butang nga gipamulong pinaagi sa tanang mga propeta sukad magsugod ang kalibutan [tan-awa sa Mga Buhat 3:21].¹⁴

Ang Ginoo mitawag sa Iyang mga Santos sa pagtabang sa pagtukod sa Iyang gingharian.

Usa ka lalaki sa France nagsugod sa pagpakigsulti ngari kanako, ug buot masayud kon kita naghunahuna ba sa paghimo og dako nga butang sa kalibutan? Gisultihan ko siya nga kita miabut aron sa pagsangyaw sa ebanghelyo ngadto sa tibuok kalibutan; ug nga kini miabut na sa mga kinatumyan sa yuta. Dili kini mao ang usa ka buhat nga mahimo lamang diha sa gamay nga lugar, apan kini moabut sa tibuok panahon ngadto sa kahangturan. Kini mobalik ngadto sa kahangturan, ug mahinumdom niadtong kinsa namatay liboan na ka mga tuig ang milabay, ug modala kanila ngadto sa gingharian sa Dios. Kini mobu-bu og mga panalangin sa mga kaliwatan nga moabut, ug sa katapusan mohiusa sa langit ug yuta, ug kini atong tumanon pinaagi sa ngalan sa Dios sa Israel. Ang mga gahum sa langit mihatag kanato sa ilang panabang, ug ang atong mga amahan sa mahangturong kalibutan nagkahiusa uban kanato; kay kita adunay saad sa kinabuhi nga mao karon, ug usab niana nga moabut.

Nagsugod pa lamang kita sa atong mahimayaon nga buluhaton. Sa pagpanglabay sa panahon kita makatuman sa tanan nga gisulti sa karaang mga propeta. … Kita mopadayon mga kaigsoonan, ug dili maghimo sa atong kaugalingong tinguha, apan unsaon sa pagpahinabo sa katumanan sa mahimayaon nga mga katuyoan sa Dios. … Ang gahum sa kamatuoran kinahanglan nga magpadayon, ang mga kadena sa kangitngit kinahanglan nga maputol, ug ang gingharian sa Dios kinahanglan nga matukod, ug walay gahum nga makapugong niini.¹⁵

Kita naghisgot sulod sa mga katuigan bahin sa lagda ug panggobyerno sa gingharian sa Dios ug sa katapusang pagkatukod niini dinhi sa yuta, sa kalinaw ug sa pagkamatarung; ug usab bahin sa panahon nga ang matag nilalang nga atua sa mga langit ug ania sa yuta, ug ilalom sa yuta, ug ang anaa sa dagat, ug ang tanan diha niini madunggan nga mag-ingon, “Ang mga pagdalayeg, ug ang kadungganan, ug ang himaya, ug ang gahum, ngadto kaniya nga nagalingkod sa trono, ug ngadto sa Kordero hangtud sa kahangturan.” (Pinadayag 5:13.) Kita naghisgot bahin niining mga butanga, apan adunay daghan pang buhatunon sa nahibiling panahon karon ug sa dili matugkad nga panahon sa umaabot. Kini dili lamang kabahin sa hugot nga pagtuo, apan adunay gikinahanglan nga lihok; kini mao ang butang nga kinahanglan nga atong buhaton sa atong mga kaugalingon, sa tagsa-tagsa ug sa tanan isip katawhan, ug kini ang butang nga hilabihan ka mahinungdanon.¹⁶

Kita adunay dakong misyon nga himoon—kita kinahanglan nga maningkamot sa pagdumala sa atong mga kaugalingon sumala sa mga balaod sa gingharian sa Dios, ug atong mamatikdan nga usa sa labing lisud nga mga buluhaton nga atong buhaton, sa pagkat-on sa pagdumala sa atong mga kaugalingon, sa atong mga gana, sa atong mga disposisyon, sa atong mga kinaiya, sa atong mga pagbati, sa atong mga kinabuhi, sa atong mga espiritu, sa atong paghukom, ug sa pagdala sa atong tanang mga tinguha ubos sa balaod sa gingharian sa Dios ug ngadto sa espiritu sa kamatuoran. Importante kaayo nga butang ang pag-apil sa pagtukod sa gingharian sa Dios—usa ka sinugdanan ang ania kanato dinhi.¹⁷

Kahadloki ang Dios; buhata ang mga buhat sa pagkamatarung; pagpuyo sumala sa inyong relihiyon; sunod sa mga sugo ug ipaubos ang inyong mga kaugalingon sa iyang atubangan; paghiusa, ug pakighiusa uban sa balaan nga pagkapari ug sa usag usa, ug ako mosulti kaninyo sa ngalan sa Dios nga ang Zion mobarug ug mohayag ug ang gahum sa Dios maanaa niini, ug ang iyang himaya ipakita, ug kita magmaya diha sa kahingpitan sa mga panalangin sa ebanghelyo sa kalinaw; ug ang buhat sa Dios magpadayon ug magkadugang hangtud ang mga gingharian niini nga kalibutan mahimong mga gingharian sa atong Dios ug sa iyang Kristo [tan-awa sa Pinadayag 11:15], ug ang matag nilalang sa kalangitan ug sa yuta ug ilalom sa yuta makadungog nga moingon, Panalangin, ug himaya, ug dungog ug pagdayeg ug gahum, kusog ug kagamhanan ug dominyon ihatag ngadto kaniya nga naglingkod sa trono ug ngadto sa Kordero hangtud sa kahangturan [tan-awa sa Pinadayag 5:13].¹⁸

Mga Sugyot alang sa Pagtuon ug Panaghisgutan

Ngano nga si Jesukristo ang angay nga manununod ug tigmando sa yuta? Sa unsa nga paagi nga kini nga kahibalo makaimpluwensya sa inyong relasyon uban Kaniya?
Ngano nga ang Pagpahiuli sa Simbahan gikinahanglan aron sa pagtukod sa gingharian sa Ginoo dinhi sa yuta? Unsa ang inyong nakat-unan isip sakop sa Simbahan bahin sa pagpangandam sa pagpuyo uban sa Ginoo? Sa unsa nga mga paagi nga ang atong pag-alagad sa Simbahan makatabang sa pagtukod sa gingharian sa Ginoo?
Unsay inyong naobserbahan sa pagtubo ug paglambo sa Simbahan nga mas labaw nga makatukod sa gingharian sa Dios dinhi sa yuta? Unsa ang inyong mabuhat sa tinagsa ug uban sa inyong pamilya aron sa pagtabang sa pagtukod sa gingharian sa Dios dinhi sa yuta?
Si Presidente Taylor naghisgot sa daghang mga panalangin nga atong matagamtam sa higayon nga ang Manluluwas mobalik aron sa paghari sa Iyang gingharian sa Milenyum. Unsa ang matang sa kinabuhi sa yuta sa panahon sa Milenyum? (Tan-awa usab sa D&P 29:11; 43:29–32; 101:22–35; Mga Artikulo sa Hugot nga Pagtuo 1:10.)
Ang motto ni Presidente Taylor mao ang “Ang gingharian sa Dios o wala. Unsa nga mga ehemplo ang inyong nakita sa mga tawo kinsa adunay sama nga konbiksyon? Unsa ang kahulugan niini nga motto nganha kaninyo? Unsa sa inyong hunahuna ang mga sangputanan kon kita isip mga sakop sa Simbahan mosagop niini nga motto sa atong kaugalingon?

May Kalabutan nga mga Kasulatan:Daniel 2:26–45; Mateo 6:33; D&P 45:1; 65; 104:58–59

John Taylor and men — Bisan pa sa atubangan sa pakigbatok, si John Taylor maisugong mipamatuod sa kamatuoran ug nagtrabaho sa walay hunong alang sa pagkatukod sa gingharian sa Dios.

Jesus Christ — Sa panahon nga si Kristo mobalik aron sa pagtukod sa Iyang gingharian sa yuta, Siya mopahiluna sa “usa ka gingharian sa kalinaw, pagkamatarung, hustisya, kalipay, ug kauswagan.”