Kapitulo 11

Ang Pagpangita sa Hingpit nga Kalipay sa Kinabuhi

Ang [mga Santos] kinahanglan gayud nga maningkamot sa pag-angkon sa tanang butang nga maayo, ug mohimo sa pagpauswag sa kalipay sa tawhanong pamilya.¹

Gikan sa Kinabuhi ni John Taylor

Niadtong hinapus sa Hunyo sa 1847, usa ka dakong grupo sa mga Santos nga gipasiugdahan ni Elder John Taylor ug ni Elder Parley P. Pratt mibiya sa Winter Quarters aron sa pagpanaw ngadto sa kasadpan. Nianang Septyembre 1847 sila miabot sa silangang bahin sa Rocky Mountains, mga 483-694 ka mga kilometro ang gilay-on gikan sa Salt Lake. Nianang unang semana sa Septyembre, nagkabaga na ang snow nga natagak, ug kadaghanan sa mga Santos nawad-an og kadasig. Niining higayona, si Presidente Brigham Young ug pipila ka mga sakop sa Napulog Duha nakauli gikan sa Walog sa Salt Lake ngadto sa Winter Quarters ug nakahimamat sa pundok ni Elder Taylor. Taliwala sa snow ug sa nagkadugang nga kabalaka niadtong kinsa nanagpanaw paingon sa Walog sa Salt Lake, si Elder Taylor miawhag sa matag usa nga magmaya ug magtigum diha sa konseho uban ni Presidente Young, sa kaubang mga sakop sa Napulog Duha, ug sa ubang nangulo nga mga kaigsoonan diha sa pundok.

Samtang ang mga kaigsoonan nagmiting, ang mga panganud miiway ug ang adlaw sa wala madugay mitunaw sa snow. Sa walay pagpahibalo sa ubang pundok, daghan sa mga kauban nga mga igsoong babaye miadto sa hilit nga kasagbutan nga giliyokan og mga kahoykahoy. Didto sila misugod paghimo og inayum-ayum nga mga lamesa nga gidayandayanan og puti nga hapin ug maanindot nga mga pinggan. Usa ka makasaysayon nga asoy natala nga “ ‘ang nating baka nga gipatambok’ giihaw; daghang mga hayop ug isda giandam; mga prutas, mga dyeli ug mga lamian nga gigahin alang sa espesyal nga mga okasyon gipagawas hangtud nga sa tinuoray kadto usa ka harianong pista.”

Sa dihang ang miting sa konseho nahuman, ang mga kaigsoonan kinsa mitambong sa miting ug ang kapin sa 100 pa ka mga sakop sa pundok gidala ngadto sa surprisa nga panagtigum, diin sila nabusog sa maayong pagkaon. Ang asoy mitala sa mosunod: “Sa dihang natapos ug nahipus na ang panihapon, nagsugod na og andam alang sa sayawan; ug sa wala madugay nadugang ngadto sa panaghudyaka ug alegring panag-istorya ang makalingaw nga sonata sa byulin. … Ang panagsayaw giubanan og mga awit ug mga balak. ‘Kami mibati og susamang pagbayaw ug pagpanalangin,’ sulat si Elder Taylor, ‘kami midayeg sa Ginoo ug mipanalangin sa usag usa.’”²

Ang mga Santos sa Ulahing mga Adlaw kanunay gayud nga nagtuo sa pagpangita og kalipay sa kinabuhi, mahimong pinaagi kini sa pagkalingaw sa kaanindot ug kadaghan sa kinaiyahan, panagpundok alang sa maayo nga mga kalihokan nga sosyal, o pagpamalandong sa mga kamatuoran sa ebanghelyo. Si John Taylor mitudlo, “Ang ‘kinabuhi ug ang pagpangitag kalipay’ nga mao ang angay nga mookupar sa atensyon sa tanang intelehente nga mga binuhat.” Samtang siya mituo nga kita makasinati og dakong kalipay dinhi niini nga kinabuhi, siya usab mitudlo nga “ang labing mahinungdanong kalipay nga atong makab-ot makit- an lamang diha sa pagkadawat sa pag-uyon sa atong Langitnong Amahan, diha sa pagkamahadlokon sa Dios, diha sa pagsinati sa iyang mga balaod—uban sa mga baruganan sa mahangturong kamatuoran, ug sa mga butang nga atong gituohan nga mao gayud ang mopauswag dili lamang sa atong temporal, apan sa atong mahangturong kalipay.”³

Mga Pagtulun-an ni John Taylor

Ang Dios buot nga kita malipay sa kinabuhi.

Kita buot og kalipay dinhi. Tinuod kana. Ang Dios nagplano nga kita kinahanglan maglipay sa atong mga kaugalingon. Ako wala magtuo sa usa ka relihiyon nga maghimo sa mga katawhan nga masulub-on, magul-anon, miserable ug walay lingawlingaw. … Ako dili gayud motuo nga adunay maanindot o maayo kabahin niana, samtang ang tanan sa palibot, ang mga kahoy, mga langgam, mga bulak ug berde nga mga umahan, makapahimuot kaayo, ang mga insekto ug mga buyog nga nanaghudyong ug nagkapakapa, ang mga nating karnero nga naghamag ug nagduladula. Samtang ang uban naglingawlingaw sa kinabuhi, nganong kita dili man usab? Apan kita buot mobuhat niini sa sakto nga paagi ug dili motuis sa bisan hain niini nga mga baruganan nga gihatag sa Dios sa tawhanong pamilya.⁴

Aduna bay bisan unsang makapasubo sa mga buhat nga gihimo sa Dios? Bisan asa kita molingi, atong makita ang kaangayan, katahum, kamalipayon, ug kanindot.

Ang mga panalangin gikan sa Dios gihimo alang sa tawo, ug sa iyang kalingawan; siya gibutang isip pangulo sa nilalang. Alang kaniya ang yuta puno sa pinakabuhong nga kaabunda; sa bulawanong lugas, sa matam-is nga mga prutas, sa piniling mga ubas; alang kaniya, ang mga tanum, ug mga bulak nagdayandayan sa yuta, nangalimyon sa ilang kahumot, ug nagpakita sa ilang masilakong kaanyag;… Alang kaniya, ang labung nga sagbut ug ubas namulak ug nanlimbukad, ug ang kinaiyahan nagsul-ob sa iyang labing nindot nga sapot; ang nagdaganas nga gamayng sapa, ang putli nga tuburan, ang sapa nga tin-aw kaayo ang tubig mo-agos alang kaniya, ang tanang kinaiyahan nagpakita sa iyang katahum ug nagdapit sa tawo sa pag-ambit sa iyang kalipay, kaanindot, ug kainosente, ug sa pagsimba sa iyang Dios.

Kabahin sa kasubo diha sa kahadlok sa Dios, ug diha sa iyang pangalagad! Ang kadautan sa kalibutan, maoy nakapahimo sa katawhan nga dili malipayon; ug ang kadautan sa tinuohan maoy nakapahimo niini nga masulub-on: mao kini ang mga kaalaotan nga hinimo sa katawhan, dili kini mga panalangin sa Dios. Ug kabahin sa kasubo! Aduna bay kasubo diha sa pag-awit sa mga langgam, diha sa lumpayat sa kabayo, diha sa pagkamadulaon sa karnero, o sa nating kanding; diha sa kaanindot sa mga bulak, sa bisan unsa sa maanindot nga mga butang sa kinaiyahan, o diha sa Dios, nga maoy naghimo niini, o diha sa iyang pangalagad?⁵

Ang sosyal nga kalingawan mamahimong angay sa tinuod nga relihiyon.

Ngano, nga adunay uban nga mga tawo kinsa nagtuo nga ang biyulin, pananglit lang, usa ka instrumento sa yawa ug nga sayop gamiton. Para nako dili kini tinuod, ako nagtuo nga kini usa ka maanindot nga butang nga masayawan. Apan ang uban naghunahuna nga kita dili angay nga mosayaw. Oo, kita maglingawlingaw gayud sa kinabuhi sa bisan unsang paagi nga atong mahimo. Ang ubang mga tawo supak sa musika. Ngano, ang musika nagpatigbabaw sa mga kalangitan, ug taliwala sa mga kalanggaman! Ang Dios mihatag kanila niini. Wala nay mas labaw nga makapahimuot ug makalingaw kay sa pag-adto ngadto sa kakahoyan o taliwala sa mga sagbut sayo sa buntag ug maminaw sa huni ug nindot kaayo nga awit sa mga langgam, ug kini tukma gayud sa atong kinaiyanhon nga mga kasarang ang pagpasalamat niini nga mga butang.

Kita dili makatugkad sa kabililhon sa musika nga atong maangkon didto sa langit. Mahimong ikasulti mahitungod niana ang gikaingon sa usa sa mga Apostoles nga nagsulti mahitungod sa laing butang—“Wala makita sa mata, ni madungog sa dalunggan, ni mosantop sa kasingkasing sa tawo, ang gikatagana sa Dios alang kanila nga nahigugma kaniya.” [Tan-awa sa 1 Mga Taga-Corinto 2:9.] Kita walay ideya sa kabililhon, kanindot, kamahunihon sa musika didto sa kalangitan.

Ang atong tumong mao ang pagkuha ug paghupot sa tanan nga maayo, ug sa pagsalikway sa tanan nga dautan. Usa ka rason nga ang relihiyoso nga mga tawo sa kalibutan supak sa musika ug mga pasundayag tungod sa kadautan nga nasagol niini. Ang dautan ug hiwi nga mga tawo nakig-abin sa ilang mga kaugalingon niining mga butanga, ug nagpahimo niini nga ubos sa panan-aw sa uban; apan kini ba ang hinungdan nga ang mga Santos dili maglingawlingaw sa mga gasa sa Dios? Kini sakto ba nga baruganan? Sa pagkatinuod dili. Ang mga Santos kinahanglan gayud maningkamot sa pag-angkon sa tanang butang nga maayo, ug mohimo sa pagpauswag sa kalipay sa tawhanong pamilya. …

Sa tanan natong mga kalingawan kinahanglan atong tan-awon nga ang atong gipanghimo, ug kita kinahanglan nga dili malimot sa pagtinarong isip mga babaye ug mga lalaki, ug kita kinahanglan maglikay sa pagkangil-ad [o pagkamasinupakon] ug pagbaliwala sa uban, ug motratar sa tanan uban sa kalooy, maayong pamatasan ug pagtahud.⁶

Ang sosyal nga paglingawlingaw ug mga kalingawan dili sukwahi sa sakto nga gawi ug sa tinuod nga relihiyon. Imbis idili ang mga pasundayag (mga dula) ug wad-on ang katungod niini, maoy tumong sa mga Santos sa Ulahing mga Adlaw ang pagkontrol niini ug paghimo niini nga luwas gikan sa dili limpyo nga mga impluwensya, ug padayunon kini isip usa ka lugar diin ang tanan magkatigum alang sa katuyoan sa limpyo nga kalingawan. Ang atong nangulo nga mga lalaki, tungod niana, nakaadto na niini nga mga dapit sa tuyo nga, sa ilang pagtambong, sa pagpugong sa tanang binuhatan ug mga impluwensya nga makadaot ngadto sa mga batan-on ug sa nagtubo nga mga kaliwatan. Kita dili makapasalig nga ang kagawasan sa pagpadayag dili mahimong pagpadayag sa kahugaw o kalaw-ay, ug nga dili ibaylo kadtong makahatag og kalingawan ug yano nga kalipay ngadto sa usa ka paagi nga makahatag og hugaw nga kahinam o makadaut sa mga moral. … Ang mga tawo sa komite ug mga opisyal kinahanglan nga mosiguro nga ang mga sayaw sa tanang klase ipahigayon sa ligdong ug sa pamaagi nga walay pamatasan nga tugutan nga mosangpot ngadto sa kadautan o makadaut sa moral o espirituhanong paagi.⁷

Ang pagkahiusa diha sa ebanghelyo makahatag og hingpit nga kalipay.

Kini maayo kaayo alang sa mga Santos sa Dios ang pagpamalandong sa mga baruganan sa mahangturong kamatuoran, nga natudlo na ngadto kanila. Kon adunay bisan unsa nga may kalabutan sa kalipay ug sa katawhan, kon adunay bisan unsa nga giplano sa pagpadako sa mga hunahuna ug mga pagbati sa tawhanong pamilya, sa pagpataas sa atong mga paglaum ug mga pangandoy, ug sa paghatag og kalinaw, hingpit nga kalipay, ug pagsalig, kini mao ang hunahuna nga gipadayag sa Dios ngari kanato ang mga lagda sa mahangturon nga kamatuoran; nga Siya mitanom niini sa atong mga dughan ug mihatag ngari kanato og usa ka kasiguroan kabahin niadtong mga butang nga atong gituohan, ug sa tinuod nahibaloan.⁸

Ako walay mahunahunaan nga bisan unsa nga labaw kamaanindot ug kalangitnon kay sa usa ka nagkahiusa nga kaigsoonan, na-organisar diha sa sumbanan nga gilatid sa Doktrina ug mga Pakigsaad; kon ang tanan molihok alang sa kaayohan sa tanan— kon samtang kita mohigugma sa Dios sa bug-os tang kasingkasing kita naghigugma sa atong silingan sama sa atong kaugalingon; diin ang atong panahon, ang atong katigayunan, ang atong mga talento, ang atong mental ug lawasnon nga mga gahum tanan gigamit alang sa kaayohan sa tanan; diin walay tawo nga mokuha o mopahimulos sa lain; diin adunay usa ka komon nga kaikag, usa ka kapanguhaan sa salapi, usa ka komon nga pundo; diin, ingon nga ilang gibuhat dinhi niini nga kayutaan, ginaingon na sa tanan nga “silang tanan mitagad nga makiangayon sa usag usa,” ug ang tanan milihok alang sa kaayohan sa kinatibuk-an, “kon ang matag tawo sa matag dapit makahimamat og usa ka igsoon ug usa ka higala,” kon ang tanan nga manggihatagon ug buotan nga mga impluwensya ug mga pagbati sa atong kinaiyahan mapatuman, ug ang kamasinahon, kahambog, kalagot, ug garbo, ug matag dautan mabuntog ug magpaubos sa kabubut-on ug Espiritu sa Dios. Kini nga mga baruganan maanindot kaayo ug makapabayaw sa espirituhanon ug emosyonal nga paagi alang sa usa ka komunidad, usa ka teritoryo, usa ka estado, nasud, o sa kalibutan.⁹

Ako mibati og hingpit nga kalipay diha sa Ginoo, ug ako mopanalangin sa ngalan sa Dios sa Israel nga ako nahisakop sa iyang simbahan ug gingharian dinhi sa yuta. Kini nga mga pagbati akong gipanghinaut nga sa tanang higayon panggaon dinhi sa akong dughan ug lihukon sa akong kinabuhi; ug ako nagtuo nga adunay gatusan, kon dili liboan, sa akong atubangan karong adlawa, kinsa adunay susama nga diwa ug pagbati, ug susama nga mga tinguha. …

Unsa may makahimo kanato nga madasigon kaayo ug hingpit nga malipayon sa panahon nga ingon niini?… Kini tungod kay adunay usa ka panaghiusa sa maayo nga mga pagbati, maayo nga mga tinguha ug mga pangandoy ug ang usa ka diwa nagdasig sa tanan, nagporma og usa ka lig-on nga kahiusahan [o naorganisar na nga kapunongan] sa gahum, sa hugot nga pagtuo, ug sa Espiritu sa Ginoo. Ang usa ka kandila mohatag og kahayag, ug kini maayong sud-ongon, apan kaliboan sa sama nga kahayag mohimo og kinatibuk-an nga pag-iwag. Alang kanato, kini usa ka higayon sa panaghiusa, sa kahayag, sa kinabuhi, sa salabutan, sa Espiritu sa buhi nga Dios; ang atong mga pagbati usa ra, ang atong hugot nga pagtuo usa ra, ug ang usa ka dakong pundok sa katawhan nga nag-angkon niining pagkahiusa naghimo og usa ka hut-ong sa gahum nga walay gahum dinhi sa yuta o sa impyerno nga makasugakod, o makabuntog. …

Kita nagtuo nga kita isip usa ka pundok sa katawhan, nga naghupot sa tanang nagkalainlaing mga korum niini nga simbahan ug gingharian may kalabutan niining usa ka mahinundanon nga buluhaton; ug mao nga adunay pagbati sa hugot nga pagtuo, pagkahiusa, ug kakusog, o gahum, kon imong itugot, sa Espiritu sa buhi nga Dios, nga nagpalihok ug naghatag og kinabuhi sa hunahuna, naghatag og kalagsik sa lawas, ug hingpit nga kalipay sa kalag. Niini kitang tanan buot nga moapil. Ang Ginoo ania pinaagi sa iyang Espiritu ug gahum, ug ang atong mga kasingkasing malipayon.¹⁰

Ang Pagsabot sa mga baruganan sa kamatuoran magdala og himaya ug hingpit nga kalipay.

Kon kita motan-aw sa atong mga kaugalingon sa minaayo— kon kita makasabot sa mga baruganan sa kamatuoran sa husto— unsa pa may anaa nga dili nato ikahatag alang sa kaluwasan? Sa dihang ang Espiritu nakatandog sa mga kasingkasing sa mga santos— Sa dihang ang kahayag ug salabutan sa langit mipakita sa iyang kaugalingon—Sa dihang ang Ginoo [midan-ag] diha sa mga kalag sa mga santos sa panahon nga sila nagkapundok, unsa man ang ilang gibati? nga sila gibulahan sa Ginoo. Makapila kon sila magpundok sa espesyal nga mga okasyon aron makadawat og piho nga mga panalangin gikan sa mga kamot sa Dios, nga ang espiritu sa pagpadayag miabut diha kanila, ug ang kaugmaon giablihan sa ilang panan-aw sa tanan niini nga kaanindot, kahimaya, kabuhong, ug kamaayo; ug kon ang ilang mga kasingkasing gidasig niana nga espiritu, gibati nila ang dakong pagmaya! Ilang gitan-aw pag-ayo ang mga butang niini nga kalibutan, ug ang paglaum nga nagpaabot kanila! ang ilang mga katungod isip mga santos sa Labing Halangdon nga Dios; ug ngadto sa kahimayaan nga ilang maangkon kon sila matinud-anon hangtud sa katapusan!

Ikaw tingali nakasinati sa pagbati nga sagad lang moabut sa kasingkasing sa tawo tungod niini nga matang sa panghunahuna ug mga panglantaw. Ngano kaha nga lahi man ang atong bation sa bisan unsang panahon? Kini tungod kay kita makalimot sa pag-ampo ug pagsangpit sa Dios, ug paghatag sa atong mga kaugalingon ngadto kaniya, o tungod kay kita makasala, makahimo og kadautan, ug nawad-an sa Espiritu sa Dios, ug nalimot sa mahimayaong paglaum sa atong mga balaang tawag; apan kon kita sa kanunay makakita ug makaamgo ug makasabot sa atong tinuod nga pagkabutang sa atubangan sa Dios, ang atong mga hunahuna mahimong kanunay nga mangita sa mga butang sa Dios, ug kita kinahanglan nga mangita aron mahibalo sa adlawng tanan, unsay atong mahimo aron sa pagpalambo sa kalipay ug kaluwasan sa kalibutan, unsay atong mahimo aron sa pagpasidungog sa atong balaang tawag—aron pagpasidungog sa priesthood sa Anak sa Dios, ug unsay buhaton aron sa pagpasidungog sa atong Dios, ug pagpausbaw sa nahibiling panahon nga ania kanato dinhi sa yuta, ug sa mga kusog sa atong mga lawas alang sa pagpatuman sa iyang mga katuyoan, ug alang sa pagpadayon sa iyang gingharian—alang sa kalamboan sa iyang mga plano, nga kon kita mobarug sa iyang atubangan, siya makaingon ngari kanato, “maayong pagkabuhat, maayo ug kasaligan nga ulipon; sa dyutay kasaligan ka diay, sa daghan pagapiyalan ko ikaw; dumuyog ka sa kalipay sa imong agalon.” [Tan-awa sa Mateo 25:21.]¹¹

Sigun sa akong personal nga kalabutan, ako ania dinhi isip kandidato alang sa kahangturan, alang sa langit ug alang sa kalipay. Ako buot maniguro pinaagi sa akong mga lihok nga makaangkon og kalinaw sa laing kalibutan nga maoy makahatag niana nga kalipay ug kahimayaan nga akong gipangita.¹²

Mga Sugyot alang sa Pagtuon ug Panaghisgutan

Si Presidentee Taylor mitudlo nga ang Dios milalang sa yuta ug sa kaanindot niini alang sa atong ikalipay. Unsay imong mga kasinatian diin ikaw nakakita og hingpit nga kalipay sa kaanindot sa yuta ug mibati og kasuod ngadto sa Ginoo?
Sa unsang paagi nga ang musika, mga balak, drama, o ubang paagi sa paglingawlingaw makahatag kanato og hingpit nga kalipay? Unsa man ang atong mahimo aron sa pagdala sa gahum ug hingpit nga kalipay sa makapabayaw nga musika ngadto sa atong mga kinabuhi ug sa mga kinabuhi sa mga sakop sa atong pamilya? Unsaon man nato pagsuporta ug pagpalambo og maayo nga paglingawlingaw?
Ngano sa imong hunahuna nga ang musika ingon man ka mahinungdanong bahin sa atong relihiyosong pagsimba? Sa unsang paagi nga ang mga himno sa Simbahan makahupay o makalig- on kanimo sa mga panahon sa pagsulay?
Sa unsang paagi nga ang imong pagpakigdait sa ubang mga Santos nakahatag kanimo og hingpit nga kalipay? Unsay imong mahimo aron pag-awhag og mas lig-on nga panaghiusa tali sa mga sakop sa imong ward o branch?
Unsay kahulugan niini diha kanimo nga mobati og “hingpit nga kalipay diha sa Ginoo”? Unsa ang ubang mga doktrina sa ebanghelyo nga nakahatag kanimo og hingpit nga kalipay? Sa atong pagpangita og hingpit nga kalipay dinhi niini nga kinabuhi, ngano nga mahinungdanon man usab ang paghunahuna sa kahangturan?
Unsa ang ubang mga hitabo sa inyong kinabuhi nga nakahatag kaninyo og hingpit nga kalipay? Unsa ang atong mahimo aron sa paghupot og diwa sa hingpit nga kalipay sa atong mga kinabuhi bisan pa man sa atong mga pagsulay? Unsa ang atong mahimo aron pagtabang sa atong mga anak sa pagpangita og hingpit nga kalipay sa ilang mga kinabuhi?

May Kalabutan nga mga Kasulatan:Salmo 118:24; Isaias 12:2–3; Mateo 25:21; 2 Nephi 2:25; Mosiah 2:41; Mga Artikulo sa Hugot nga Pagtuo 1:13

pioneers dancing — “Ang Dios nagplano nga kita kinahanglan maglipay sa atong mga kaugalingon. Ako wala magtuo sa usa ka relihiyon nga maghimo sa mga katawhan nga masulub-on, magul-anon, [o] miserable.”