Kapitulo 11

Pagpadayag gikan sa Dios ngadto sa Iyang mga Anak

Ang atong Langitnong Amahan naggiya kanato sa tinagsa-tagsa ug isip usa ka Simbahan pinaagi sa Espiritu Santo.

Gikan sa Kinabuhi ni George Albert Smith

Sa pagtudlo kabahin sa kaimportante sa pagpadayag aron sa paggiya sa Simbahan, si George Albert Smith misulti og usa ka kasinatian nga iyang nasinati diha sa usa ka biyahe sakay sa eroplano gikan sa Los Angeles, California, ngadto sa Siyudad sa Salt Lake, Utah:

“Duol na sa Milford, Utah, sa kalit lang kami nakaagi sa usa sa labing kuyaw nga mga gabon nga akong nakita sukad. Misulay ko sa pagtan-aw sa bintana sa eroplano apan wala koy makita tungod sa gabon. Wala gayuy makita nga butang sa bisan asa nga direksyon sa gawas sa eroplano.

“Nahibalo ko nga nagkaduol na kami sa mga bukid sa gibana-bana nga lima ka kilometro matag minuto, nga kami kinahanglan nga moagi sa ibabaw niini aron makaabut sa Salt Lake Valley. Nabalaka ko ug nangutana sa akong kaugalingon, ‘Giunsa man sa piloto sa pagkakita sa agianan nga wala man gani siyay makita?’ Siya adunay kompas apan ang eroplano mahimong mosimang sa padulngan niini. Siya adunay mga himan nga nagpahibalo sa among distansya ibabaw sa dagat apan siya walay paagi nga masayud kon unsa kami ka layo gikan sa yuta. Nagtuo ko nga mopataas siya og maayo ibabaw sa mga bukid taliwala kanamo ug sa Salt Lake Valley ug maningkamot nga makita ang katugpahan pinaagi sa mga kidlap sa banwag nga suga kon maduol na kami, apan nangurog ko sa dihang naghunahuna ko sa kakuyaw nga mawala sa among agianan ug dili makita ang mga suga ug ang tugpahanan [airport].

“Sa akong kabalaka miadto ko sa ibabaw ngadto sa nahimutangan sa piloto ug sa kauban nga piloto aron makita kon giunsa nila pagkahibalo kon asa kami padulong. Dili ko makasulti nga anaa kami sa traynta ka metros, tulo ka gatus ka metros o tulo ka libo ka metros ibabaw sa yuta ug wala ko masayud kon unsaon nila sa pagkahibalo, gawas sa pagbana-bana. Akong namatikdan nga ang piloto adunay gamayng himan nga gibutang sa iyang dunggan sama sa gamiton sa pagtawag sa mga operator sa mga opisina sa telepono. Nangutana ko sa kauban nga piloto kon unsaon nila sa pagkahibalo kon kami anaa ba sa sakto nga direksyon o masayud kon kami nasaag na. Mitubag siya, ‘Kon kami dili makakita giyahan kami sa radio beam.’

“‘Unsa man kana?’ nangutana ko. Iyang gipasabut nga ang beam mahimong ipahisama sa electric highway tali sa duha ka tumoy, ug sa among kahimtang ang mga tumoy mao ang Milford ug Siyudad sa Salt Lake. Miingon siya nga ang himan nga anaa sa dunggan sa piloto naglihok aron kon ang eroplano anaa sa beam usa ka hinay, dinaguok nga tingog padayon nga madungog, apan kon ang eroplano moliko sa tuo o sa wala ang tingog mausab ug ang piloto pasidan-an pinaagi sa bagting sama sa usa ka pagpindot sa telegraph. Kon siya … mobalik ngadto sa beam o highway, diha sa luwas nga agianan, mawala ang paghagtik ug ang dinaguok nga tingog mobalik. Kon magpadayon kita diha sa beam moabut kita sa atong padulngan nga luwas.

“Mibalik ko sa akong lingkuranan nga nahupay gayud kaayo nga nasayud nga bisan pa kami natabunan sa gabon ug sa kangitngit ug dili makakita ni makabati kon asa na kami, ang piloto kanunay nga nagdawat og impormasyon nga kami anaa sa highway ug siya nasayud nga sa dili madugay moabut na kami sa among padulngan. Pipila ka minutos ang milabay gibati nako nga ang eroplano mipaubos. Nakalabang na kami sa ibabaw sa tumoy sa kabukiran ug hapit na moabut sa tugpahanan . Sa dihang hapit na kami motugpa among nakita ang sulaw kaayo nga mga suga sa dakong hawan nga nagsinyas kon asa motugpa ug ang eroplano uban sa bililhon nga mga sakay niini hinay-hinay nga milanding sa yuta nga daw usa ka kanaway [seagull] nga mitugpa sa tubig, hinay-hinay hangtud mihunong ug migawas kami gikan sa among gisakyan ngadto sa yuta, malipayon nga nakapauli na usab. …

“Naghunahuna ko sa daghang mga higayon sa leksyon nga akong nakat-unan sa eroplano ug gigamit kini ngadto sa kasinatian diha sa Simbahan ni Jesukristo sa mga Santos sa Ulahing mga Adlaw. …

“Wala lamang ang Ginoo mihatag kanato og tambag nga narekord na diha sa mga kasulatan aron sa paggiya kanato apan mibutang siya og lider niini nga Simbahan, usa sa iyang mga anak nga lalaki kinsa gipili ug gi-ordinahan ug gi-set apart nga mahimong Presidente. Siya mao ang atong piloto ug siya pagagiyahan sa usa ka tingog nga makapahimo kaniya sa pagdala kanato kon asa kita moadto. Kon kita maalamon dili kita mohatag sa atong paghukom batok kaniya apan magmalipayon sa pagtahud kaniya sa iyang nahimutangan hangtud nga ang Ginoo nagpaluyo kaniya.”

Si Presidente Smith migamit usab sa iyang kasinatian sa eroplano aron sa pagtudlo nga ang matag usa kanato makadawat og pagpadayag sa paggiya sa atong kaugalingong kinabuhi kon kita takus:

“Kon kita nagpakabuhi sumala sa atong nasayran nga kita kinahanglang adunay katungod sa paghunghong sa usa ka hinay nga hinagawhaw nga tingog nga magtawag sa atong pagtagad panahon sa kakuyaw, nga mag-ingon nga kini mao ang luwas nga dalan, lumakaw kamo diha niana. … Kon kita masayop sa atong linihokan ang tingog mohunghong ngari kanato og ‘balik, nasayop ka; imong gibaliwala ang tambag sa imong Langitnong Amahan.’ Biyai ang sayop nga pamaagi samtang aduna pay panahon, kay kon malayo na kaayo kamo gikan sa sakto nga dalan dili na ninyo madungog ang tingog ug mahimong mawala na kamo sa hingpit. …

“Ang akong tambag kaninyo mao ang pag-angkon sa Espiritu sa Dios ug huptan kini ug ang bugtong paagi nga kita makapabilin niini mao ang pinaagi sa pagpakabuhi nga duol kaniya, pinaagi sa pagsunod sa iyang mga sugo. … Paminaw ngadto sa hinay nga hinagawhaw nga tingog nga kanunayng mogiya kaninyo kon kamo takus niini diha sa dalan nga nangahulugan og mahangturong kalipay.”¹ [Tan-awa sa sugyot 1 sa pahina 141.]

Mga Pagtulun-an ni George Albert Smith

Ang Dios nagpakita sa Iyang Kaugalingon ngadto sa Iyang mga anak sa atong panahon karon sama sa Iyang gihimo sa miaging mga kapanahonan.

Pagkanindot niini nga pribilehiyo nga magpuyo sa usa ka panahon sa kalibutan diin kita nasayud nga ang Dios buhi, diin kita nasayud nga si Jesukristo mao ang Manluluwas sa kalibutan ug ang atong Manunubos, ug diin kita nasayud nga ang Ginoo padayon sa pagpakita sa iyang kaugalingon ngadto sa iyang mga anak kinsa miandam sa ilang kaugalingon sa pagdawat sa iyang mga panalangin! Nagtan-aw ko sa mga nawong sa daghang mga tawo niining buntaga [atol sa sesyon sa kinatibuk-ang komperensya], kasagaran kanila nakatagamtam sa pagdasig sa Labawng Makagagahum, ug kon sila mag-ampo, sila mag-ampo ngadto sa ilang Amahan sa langit nga nasayud nga ang ilang mga pag-ampo pagatubagon uban sa dagko nga mga panalangin diha sa ilang mga ulo. … Nasayud kita nga adunay usa ka Dios sa langit, nga siya mao ang atong Amahan, nga siya interesado gayud sa atong mga kalihokan, ug gibuhat niya kana sukad pa sa sinugdanan sa kalibutan, sa dihang ang iyang unang mga anak gibutang dinhi sa yuta.²

Ang kalainan tali niining dakong Simbahan ug nianang sa uban nga mga simbahan gikan sa sinugdanan mao nga kita nagtuo sa balaan nga pagpadayag; kita nagtuo nga ang atong Amahan namulong ngadto sa tawo karon sama sa iyang gibuhat gikan sa panahon ni Adan. Nagtuo ug nasayud kita—nga labaw pa sa pagtuo lamang—nga ang atong Amahan mipahiluna sa iyang kamot niini nga kalibutan alang sa kaluwasan sa katawhan.³

Dili kini tungod lamang kay kita adunay hugot nga pagtuo niini nga mga basahon [ang Basahon ni Mormon, ang Doktrina ug mga Pakigsaad, ug ang Perlas nga Labing Bililhon] nga kita makonsiderar nga usa ka pinili nga katawhan apan tungod usab kay kita masaligon nga nagtuo nga ang atong Amahan sa langit namulong niini nga adlaw ug panahon. Gani, kita nasayud nga adunay komunikasyon tali sa kalangitan. Nagtuo kita nga si Jehova adunay sama nga pagbati ngari kanato, ang sama nga impluwensya ngari kanato nga anaa kaniya ug ngadto sa iyang mga anak nga nagpuyo niini nga kalibutan sa mga panahon nga nanglabay.

Sa dili tumutuo, ang mga miyembro sa Simbahan ni Jesukristo sa tanang kapanahonan sa kalibutan giisip nga lahi nga katawhan. Sa dihang ang Ginoo namulong pinaagi sa iyang mga sulugoon, sa nagkalainlaing yugto sa mga panahon adunay daghang mga tawo sa yuta kinsa nag-ingon, “Dili ko motuo og pagpadayag.” Kini nga panahon dili ingon nga walay labut sa balaod. Ang liboan, oo, ang minilyon, sa mga anak sa atong Amahan nga nagpuyo sa yuta nagbalik-balik lamang sa kasaysayan sa nanglabay nga panahon kon sila molimud nga ang Dios mipadayag pag-usab sa iyang kabubut-on ngadto sa katawhan, ug moingon nga wala sila magkinahanglan og dugang nga pagpadayag.⁴

Wala kita motuo nga ang kalangitan gisirad-an ibabaw sa atong mga ulo, apan ang sama nga Amahan kinsa nahigugma ug nagpangga sa mga anak sa Israel nahigugma ug nagpangga kanato. Kita nagtuo nga kita ingon gayud ka nagkinahanglan sa panabang sa atong Langitnong Amahan sa paggiya sa atong kinabuhi sama kanila. Nasayud kita nga sa adlaw ug panahon diin kita nagpuyo ang silyo natangtang, ug ang Dios namulong na usab gikan sa kalangitan.⁵ [Tan-awa sa sugyot 2 sa pahina 141.]

Ang Ginoo naggiya sa Iyang katawhan pinaagi sa pagpadayag ngadto sa Presidente sa Simbahan.

Ang Simbahan ni Jesukristo sa mga Santos sa Ulahing mga Adlaw gi-organisar pinaagi sa direkta nga sugo gikan sa atong Langitnong Amahan. Ibabaw sa bato sa pagpadayag kini nga Simbahan gitukod ug pinaagi sa pagpadayag kini gigiyahan.⁶

Talagsaon kini niining mga adlawa nga mahisakop sa usa ka simbahan, diin kadtong mga miyembro nagtuo nga ang Ginoo namulong pinaagi sa ilang mga lider. Kon kita gitudloan pinaagi sa Presidente niini nga Simbahan, kita nagtuo nga siya nagsulti kanato sa unsay gusto sa Ginoo nga atong buhaton. Alang kanato kini usa ka butang nga labaw pa sa tambag sa tawo. Kita nagtuo niana, ug kini mosiksik sa atong mga kalag, ug kita aghaton sa pagbag-o sa atong determinasyon nga mamahimo sa unsay gusto sa Dios nga kita mamahimo.⁷

Kita adunay dili maalamon nga mga kalag diha sa Simbahan kinsa, sa ilang kaignorante, mibatok sa tambag sa [Presidente sa Simbahan], wala makamatikod sa kamatuoran nga sila mibatok sa Ginoo ug sila nangahulog ngadto sa kangitngit ug kasubo, ug gawas kon sila maghinulsol dili sila makakaplag og luna didto sa celestial nga gingharian.

Atong hinumduman nga ang Presidente niini nga Simbahan opisyal nga gisangunan isip ang piloto sa Simbahan dinhi sa pagkamortal aron sa pagrepresentar sa Tiglalang sa langit ug yuta.⁸

Kon ang mga tawo, sama sa ilang gibuhat usahay aron sa pagkab-ot sa ilang kalampusan sa pipila ka paningkamot, moadto sa usa ka tawo o mga tawo ug moingon, “Ako aduna niini nga damgo ug mao kini ang unsay gusto sa Ginoo nga atong buhaton,” unta kamo masayud nga dili sila habig sa Ginoo. Ang mga damgo ug mga panan-awon ug mga pagpadayag sa Dios ngadto sa katawhan sa kanunay moabut pinaagi sa iyang gipili nga sulugoon. Mahimo nga kamo adunay mga damgo ug mga pagpakita alang sa inyong kaugalingong kahupayan o alang sa inyong kaugalingong katagbawan, apan dili kamo makabaton niini alang sa Simbahan. … Kinahanglan nga kita dili magpalingla.⁹

Ang akong kalag napuno sa pasalamat niining adlawa nga masayud nga samtang kita magpadayon sa atong pagkamiyembro sa Simbahan kita adunay piloto kinsa nasayud sa agianan, ug kon kita mosunod sa iyang paggiya … dili nato masugatan ang espirituhanon nga mga katalagman nga nasugatan sa kalibutan apan kita moadto sa paghimo og mga kaayohan, sa pagpanalangin sa katawhan, ug sa pagmaya sa pakig-uban niadtong atong gimahal.¹⁰ [Tan-awa sa sugyot 3 sa pahina 142.]

Matag usa kanato adunay katungod sa personal nga inspirasyon gikan sa Espiritu Santo kon kita mosunod sa mga sugo.

Ako adunay pagsalig kaninyo, akong mga kaigsoonan. … Kamo adunay katungod sa sama nga kahibalo nianang tawo nga nangulo sa Simbahan. Kamo adunay katungod sa sama nga inspirasyon nga moagi niadtong kinsa gipa-ordinahan sa Dios isip Iyang mga lider. Kamo adunay katungod sa inspirasyon sa Espiritu, ug sa kahibalo nga Siya mao ang inyong Amahan, ug kon ako moingon og “kamo” ako namulong sa tanan nga nagsunod sa mga sugo sa atong Amahan, ug nakaambit sa matam-is nga impluwensya sa Espiritu sa Ginoo diha sa Simbahan ni Kristo. … Matag usa kanato adunay katungod sa inspirasyon sa Ginoo sumala sa pamaagi diin kita nagpuyo og usa ka diosnon nga kinabuhi.¹¹

Bisan asa man kamo moadto, kamo dili makakaplag og laing grupo sama niini, nga ang matag usa kanila adunay hugot nga pagtuo sa Dios; ug kon kami mangutana kon pila kaninyo ang adunay pagpamatuod, dili usa ka pagtuo tungod kay ang laing tawo nagsulti niini, apan pila kaninyo ang adunay kasiguroan nga kini buhat sa Dios, nga si Jesus mao ang Kristo, nga kita nagpuyo og mahangturong kinabuhi, nga si Joseph Smith usa ka propeta sa Buhi nga Dios, kamo motubag nga kamo aduna niini nga pagpamatuod nga nakapadasig kaninyo ug nakapalig-on kaninyo ug nakahatag kaninyo og katagbawan samtang kamo nagpadayon dinhi sa kalibutan. …

… Akong nakat-unan sa dihang usa pa ako ka bata nga kini buhat sa Ginoo. Akong nakat-unan nga adunay mga propeta nga nagpuyo sa yuta. Akong nakat-unan nga ang inspirasyon sa Labawng Makagagahum moimpluwensya niadtong kinsa nagpuyo nga takus aron makapahimulos niini, busa kita wala magdepende sa usa o duha o tunga sa dosena nga mga indibidwal. Adunay liboan ka mga miyembro niini nga Simbahan kinsa nasayud—dili lamang kini ilang imahinasyon—sila nasayud nga ang Dios buhi ug nga si Jesus mao ang Kristo ug nga kita mga anak sa Dios.¹²

Wala lamang kamo magdepende sa kasaysayan, ni sa mga pagtulun-an ni bisan kinsa nga tawo, aron masayud nga kini buhat sa Ginoo, tungod kay kamo aduna niini nga nagdilaab diha sa inyong mga kalag pinaagi sa gasa sa Espiritu Santo. Walay pagduhaduha diha sa inyong hunahuna mahitungod sa inyong gigikanan, ni mahitungod sa dapit nga inyong adtoan kon kini nga kinabuhi matapos na, kon kamo matinud-anon ngadto sa pagsalig nga gibutang nganha kaninyo.¹³

Ang usa ka pagpamatuod dili mahimong ihatag ngari kanato sa laing tawo. Ang kombiksyon nagagikan sa atong Langitnong Amahan.¹⁴

Nagbarug ako karon dinhi nga hilabihan ka mapasalamaton alang sa kahibalo nga miabut kanako. Mapasalamaton ko nga wala ko magdepende ni bisan kinsa nga indibidwal alang sa pagpamatuod nga akong naangkon. Siyempre, mapasalamaton ko alang sa pag-awhag nga akong nadawat gikan sa uban nga nakaangkon og kahayag ug kamatuoran, ug kinsa nakahatag og pag-awhag pinaagi sa pagpakabuhi nga matarung, apan wala ko magdepende ni bisan kinsa kanila alang sa kahibalo nga ang Dios buhi, nga si Jesukristo mao ang Manunubos sa katawhan ug si Joseph Smith usa ka propeta sa Ginoo. Kining mga butanga akong nasayran sa akong kaugalingon.

… Malipayon ko nga mopamatuod nga ako nasayud nga ang ebanghelyo tinuod, ug sa tibuok nakong kalag ako nagpasalamat sa akong Langitnong Amahan nga siya mipadayag niini ngari kanako.¹⁵

Sa tanan nga mga panalangin nga miabut sa akong kinabuhi ang labing bililhon mao ang kahibalo nga ang Dios buhi ug nga kini iyang buhat, tungod kay kana naglangkob sa tanang mga panalangin nga akong gilauman nga unta akong matagamtaman niini nga kinabuhi o sa kinabuhi nga moabut.¹⁶ [Tan-awa sa sugyot 4 sa pahina 142.]

Ang Espiritu Santo usa ka luwas nga giya diha sa dalan sa mortal nga kinabuhi.

Ang pakig-uban sa Espiritu sa [Dios] … usa ka luwas nga giya diha sa dalan sa mortal nga kinabuhi ug usa ka sigurado nga pagpangandam alang sa usa ka panimalay didto sa iyang celestial nga gingharian.¹⁷

Atong mabasa diha sa Job nga adunay espiritu diha sa tawo, ug ang inspirasyon sa Makagagahum nagahatag kanila og salabutan [tan-awa sa Job 32:8]. Kon kita mosunod sa mga sugo sa Dios kita adunay katungod niana nga inspirasyon, ug kon kita magpakabuhi sigun sa paagi nga ang mga anak sa Dios kinahanglan nga magpakabuhi, kita makabaton niana nga inspirasyon, ug walay tawo nga makababag niini, ug ang resulta mao ang atong kaugalingong pisikal ug mental ug moral nga kalamboan dinhi sa pagkamortal, ug padayon nga kalamboan sa tanang kapanahonan sa kahangturan.¹⁸

Ang pagpakig-uban sa espiritu sa Ginoo mao ang tambal alang sa kakapoy, … alang sa kahadlok ug sa tanan niadtong mga butang nga usahay mosapaw sa atong kinabuhi.¹⁹

Sa dihang ang mga disipulo sa Manluluwas kauban pa niya sila midayeg kaniya nga wala lang masayud kon unsa gayud siya ka halangdon, apan wala kini mahitabo hangtud nga ang gahum sa Espiritu Santo miabut kanila, wala kini mahitabo hangtud nga sila nabunyagan sa kalayo nga sila nakasugakod sa pag-atubang sa mga problema ug nakalahutay sa mga pagpanglutos nga nakahimo sa kinabuhi nga lisud latason. Sa dihang ang inspirasyon sa Labawng Makagagahum nakahatag kanila og panabut sila nasayud nga sila nagpuyo og [usa ka] mahangturong kinabuhi, ug kon mapamatud-an sila nga matinud-anon nasayud sila nga kon ipahimutang na ang ilang mga lawas diha sa kamatayon sila pagabangunon gikan sa lubnganan ngadto sa himaya ug pagka-imortal.

Mao kana ang resulta sa inspirasyon sa Espiritu sa Dios nga miabut kanila, ang inspirasyon sa Labawng Makagagahum nga mihatag kanila og panabut. …

Ako nag-ampo nga ang Espiritu nga nagtabang kanato nga magpabilin diha sa dalan sa kamatuoran ug pagkamatarung unta magauban kanato, ug ako nag-ampo nga kana nga tinguha nga nagagikan sa inspirasyon sa atong Langitnong Amahan unta mogiya kanato diha niana nga dalan sa kinabuhi.²⁰

Kon ang buluhaton sa kinabuhi mahuman na unta kita mahibalo nga kita naminaw sa paghunghong nianang hinay nga hinagawhaw nga tingog nga kanunayng naggiya kanato diha sa dalan sa pagkamatarung, ug masayud nga kini nangahulugan kanato nga pag-abli sa pultahan sa Celestial nga gingharian, alang sa atong kaugalingon ug niadtong atong gihigugma, sa pagpadayon sa tibuok kapanahonan, … malipayon hangtud sa kahangturan.²¹ [Tan-awa sa sugyot 5 sa pahina 142.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Samtang ikaw nagbasa sa “Gikan sa Kinabuhi ni George Albert Smith” (mga pahina 131–34), ikonsiderar kon sa unsang paagi nga ang analohiya ni Presidente Smith magamit sa atong panaw sa pagkamortal. Unsa man ang girepresentar sa gabon, sa radio beam, ug sa bagting nga tingog? Sa unsang paagi nga ang Ginoo mipasidaan kanimo sa kakuyaw ug mitabang kanimo sa pagpabilin diha sa dalan padulong sa kinabuhing dayon?
Sa mga pahina 135–36, si Presidente Smith namahayag nga ang pagpadayag ingon ka mahinungdanon karon sama kaniadto sa biblikanhong panahon. Unsaon man nimo pagtubag ngadto sa usa ka tawo kinsa moingon nga ang mga pagpadayag diha sa mga kasulatan igo na alang sa atong panahon karon? Unsa nga mga kasinatian ang nakatudlo kanimo nga ang Langitnong Amahan “interesado gayud sa atong mga kalihokan”?
Ribyuha ang seksyon nga nagsugod sa pahina 136. Giunsa man nimo pagkasayud nga ang tambag sa propeta nagagikan sa Ginoo ug “labaw pa sa tambag sa tawo”? (pahina 136). Sa unsang paagi nga ang personal nga pagpadayag nakatabang kanimo sa pagdawat ug paggamit sa pagpadayag nga gihatag pinaagi sa propeta?
Samtang ikaw nagtuon sa seksyon nga nagsugod sa pahina 138, hunahunaa kon sa unsang paagi nga ikaw nakabaton og pagpamatuod sa ebanghelyo. Sa unsang paagi nga ang mga pagpamatuod sa uban nakatabang kanimo? Unsa man ang imong gihimo aron masayud sa kamatuoran alang sa imong kaugalingon?
Diha sa katapusan nga seksyon sa mga pagtulun-an (mga pahina 140–41), pangitaa ang mga pulong ug mga hugpong sa mga pulong nga naghulagway og mga paagi nga ang Espiritu Santo makatabang kanato. Hunahunaa kon unsa ang imong mabuhat aron mahimong takus sa pagpakig-uban sa Espiritu Santo sa kanunay diha sa imong kinabuhi.

May Kalabutan nga mga Kasulatan: Juan 15:26; 1 Nephi 10:17–19; 2 Nephi 32:5; Moroni 10:3–5; Doktrina ug mga Pakigsaad 1:38; 42:61; 76:5–10; Mga Artikulo sa Hugot nga Pagtuo 1:9

Tabang sa pagtudlo: “Ayaw kabalaka kon ang mga estudyante naghilom sa pipila ka segundo human ka makapangutana. Ayaw tubaga ang imong kaugalingong pangutana; hatagi og panahon ang mga estudyante sa paghunahuna sa mga tubag. Hinoon, ang taas nga kahilom mahimong magpasabut nga sila wala makasabut sa pangutana ug nga kinahanglan nga imong usbon ang pangutana” (Pagtudlo, Walay Labaw ka Mahinungdanon nga Tawag, 69).

Si George Albert Smith ug ang iyang asawa, si Lucy. Si Presidente Smith migamit og usa ka kasinatian nga iyang nasinati sa eroplano aron sa pagtudlo kabahin sa kaimportante sa pagpadayag.

“Matag usa kanato adunay katungod sa inspirasyon sa Ginoo sumala sa pamaagi diin kita nagpuyo og usa ka diosnon nga kinabuhi.”