Kapitulo 13

Paghimo sa Atong Bahin sa Pagpakigbahin sa Ebanghelyo

Adunay daghang mga pamaagi nga kita makaapil sa mahinungdanon nga buhat sa pagpakigbahin sa gipahiuli nga ebanghelyo ni Jesukristo.

Gikan sa Kinabuhi ni George Albert Smith

Agig dugang sa pagserbisyo sa hapit 48 ka tuig isip General Authority, si George Albert Smith miserbisyo og tulo ka full-time nga mga misyon alang sa Simbahan, lakip sa duha ka tuig isip presidente sa European Mission. Giawhag niya ang mga miyembro sa Simbahan sa pagpangandam sa espirituhanong paagi alang sa full-time nga misyonaryo nga serbisyo ug sa pagdawat og ingon nga mga tawag kon kini moabut. Apan siya mitudlo usab kanila nga dili kinahanglan nga sila makadawat og pormal nga mission call aron mosangyaw sa ebanghelyo. Si George Albert Smith usa ka misyonaryo sa tibuok niyang kinabuhi, ug kanunay niyang gipahinumduman ang mga miyembro sa Simbahan mahitungod sa ilang daghang mga oportunidad sa pagpakigbahin sa ebanghelyo ngadto sa ilang mga silingan ug mga higala ug nag-awhag kanila nga mahimong maayo nga mga ehemplo nga mga disipulo ni Kristo.

Ang pagserbisyo ni Presidente Smith sa European Mission nagsugod wala madugay pagkahuman sa Unang Gubat sa Kalibutan. Tungod sa gubat, ang gidaghanon sa mga misyonaryo nga nagmisyon grabe nga mikunhod, ug ang mga paningkamot sa pagpatubo niana nga gidaghanon napugngan tungod kay ang mga misyonaryo wala hatagi og mga visa. Agi og dugang, ang mga kaaway sa Simbahan mipakatap og bakak nga mga istorya kalabut sa mga Santos sa Ulahing mga Adlaw, nagmugna og mga pagdaot nga lisud buntugon. Bisan pa niini nga mga limitasyon, si Presidente Smith masaligon nga ang buhat magpadayon tungod sa mga ehemplo nga gipakita sa matinud-anon nga mga Santos sa Ulahing mga Adlaw. Siya mipasabut nga samtang ang Simbahan mahimong mas inila, “ang mga miyembro niini tahuron tungod sa ilang mga hiyas,” ug ang mga kritiko “mawad-an dayon sa ilang dili makiangayon nga mga pagdaut, pinaagi sa pagkasuod mismo ngadto sa mga Santos sa Ulahing mga Adlaw sa ilang matag adlaw nga kinabuhi. … Dayon sila mohukom kanato pinaagi sa atong mga bunga, gikan sa personal nga obserbasyon, ug ang ingon nga impormasyon, samtang ila kining itaho, adunay usa lamang ka epekto, ug kana sa kasagaran pabor kanato.”¹

Wala madugay human sa pagsugod sa iyang pagserbisyo isip presidente sa misyon, siya misulat ngadto sa mga miyembro sa Simbahan sa Europe, nagpahinumdom kanila sa ilang mga responsibilidad sa pagpakigbahin sa ebanghelyo ug sa pagtabang sa buhat nga mouswag:

“Uban sa hingpit nga pagsalig nga ang Ginoo modani sa mga kasingkasing sa tanang takus nga mga tawo ngadto sa ebanghelyo kon sila makasabut niini, maghiusa kita sa pag-angkon sa oportunidad sa pagtrabaho samtang may panahon pa. Atong isangyaw ang mga pagtulun-an sa Manluluwas alang sa kaluwasan, sa temporal ug sa espiritwal, sa maayo nga mga tawo sa Great Britain ug sa ubang mga nasud sa European mission.”²

Pipila ka bulan ang milabay misulat siya: “Matag miyembro sa Simbahan kinahanglang magmalipayon sa pagtudlo sa kamatuoran. Matag usa kanato kinahanglang adunay buhaton matag adlaw sa pagdala sa kahayag ngadto sa atong isigkatawo. Ang tanan bililhon sa panan-aw sa atong Langitnong Amahan, ug siya mopanalangin gayud kanato tungod sa paglamdag kanila. Ang atong responsibilidad dili mahimong ibalhin ngadto sa laing mga abaga.”³

Human sa pagbalik gikan sa Europe niadtong 1921, si George Albert Smith mireport sa kinatibuk-ang komperensya, “Ang pagdaut nga mitumaw batok kanato sa miagi nahanaw gayud ug ang gatusan ug liboan ka mga lalaki ug mga babaye nakahibalo na hinoon sa buluhaton nga atong gihimo.” Dayon siya miawhag sa mga Santos nga mopadayon sa pagpangita og mga pamaagi sa pagpakigbahin sa ebanghelyo ngadto sa uban: “Ang atong problema mao ang pagpangita og pamaagi diin kita mahimong mopresentar sa ebanghelyo sa atong Ginoo ngadto sa tanang mga tawo. Kini ang atong problema, ug uban sa balaan nga tabang kita makakita og pamaagi sa pagsulbad niini. Kita gikinahanglan nga motino kon wala bay pipila ka mga pamaagi diin kita makahimo og labaw pa kay sa atong nahimo na, aron atong matuman ang mga gikinahanglan sa atong Langitnong Amahan.”⁴ [Tan-awa sa sugyot 1 sa pahina 171.]

Mga Pagtulun-an ni George Albert Smith

Ang matag miyembro sa Simbahan adunay responsibilidad sa pagpakigbahin sa ebanghelyo.

Gibati nako nga mapasalamaton kaayo alang sa akong mga pribilehiyo sa Simbahan ni Jesukristo, sa akong pagpakig-uban sa mga lalaki ug mga babaye niini nga Simbahan ug sa uban nga mga simbahan. Mapasalamaton ako nga adunay daghang mga higala sa nagkalainlaing mga simbahan sa kalibutan, nga anaa sa nagkalainlaing mga dapit. Mapasalamaton ako niadto nga mga panaghigalaay, apan dili ako matagbaw hangtud nga ako makapakigbahin kanila sa pipila ka mga butang nga wala pa nila madawat.⁵

Nagpadala kita og mga misyonaryo ngadto sa kanasuran sa yuta aron sa pagsangyaw sa Ebanghelyo ingon sa gipadayag niining ulahing mga adlaw. Apan dili lamang kana ang atong katungdanan. Sa atong palibut, gatusan ug liboan ang gidaghanon, anaa ang pinili nga anak nga mga lalaki ug anak nga mga babaye sa atong Langitnong Amahan. Sila nagpuyo taliwala kanato, kita nahimong managhigala, apan napakyas kita sa pagtudlo kanila ingon nga maoy kinahanglan gayud natong buhaton, kalabut sa Ebanghelyo nga atong nahibaloan nga mao ang gahum sa Dios alang sa kaluwasan. Ang Kapangulohan sa Simbahan mihimo sa tanan nilang gahum; ilang gigahin ang ilang panahon sa adlaw, ug kasagaran hangtud sa lawom na nga kagabhion, alang sa kaayohan sa Simbahan. Ang mga kaigsoonan nga kauban nila libre nga madagayaong mihatag sa ilang panahon, sa pagbiyahe ug pagtudlo sa mga Santos sa Ulahing mga Adlaw ug sa pagdala sa Ebanghelyo ngadto sa mga anak sa atong Amahan. Ang mga presidente sa mga stake, mga high councilor, mga bishop sa mga ward, ug ang ilang mga assistant, walay hunong sa pagtrabaho aron sa pagpanalangin sa mga tawo, ug ang ilang ganti sigurado. Apan kitang tanan naghimo ba sa tanang kinahanglan natong himoon, aron kon kita mobarug atubangan sa hukmanan sa atong Langitnong Amahan Siya moingon nga atong nahimo ang atong tanang katungdanan alang sa atong isigkatawo, nga Iyang mga anak?⁶

Usa sa labing una nga mga pagpadayag … diha sa Doktrina ug mga Pakigsaad, mabasa sama sa mosunod:

“Karon tan-awa, usa ka kahibulongan nga buhat hapit na moabut diha sa mga katawhan; …

“Busa, kon kamo adunay tinguha sa pag-alagad sa Ginoo, kamo gitawag ngadto sa buhat.” [D&P 4:1, 3.]

Dili kini kinahanglan nga kamo pagatawgon ngadto sa natad sa misyon aron isangyaw ang kamatuoran. Sugdi diha sa tawo nga nagpuyo duol sa inyong balay pinaagi sa pagdasig og pagsalig diha kaniya, pinaagi sa pagdasig sa gugma diha kaniya alang kaninyo tungod sa inyong pagkamatarung, ug ang inyong misyonaryo nga buhat nagsugod na,

“Kay tan-awa ang umahan puti ug andam na sa pag-ani.” [D&P 4:4.]⁷

Ang pagsangyaw sa kamatuoran dili responsibilidad sa laing tawo, apan kini inyo ug akong responsibilidad sa pagsiguro nga ang ebanghelyo ni Jesukristo sa kaputli niini matudlo ngadto sa katawhan. Wala ba kini makahimo kaninyo nga mapasalamaton?⁸

Adunay dakong oportunidad alang sa matag usa kanato. Gusto nakong ipasabut og maayo ang indibidwal nga misyonaryo nga buhat sa matag usa kanato taliwala sa atong mga silingan. Masurprisa kita, kon atong himoon ang atong pinakamaayo, kon pila ang mainteresado, ug dili lamang sila magpasalamat kanato tungod sa atong pagdala kanila sa kamatuoran, ug sa pag-abli sa ilang mga mata ngadto sa mga himaya ug mga panalangin nga giandam sa atong Langitnong Amahan, apan sila mahigugma kanato ug mapasalamaton kanato hangtud sa mga kapanahonan sa kahangturan.

Adunay daghan kaayong mga butang nga gihatag sa Ginoo ngari kanato nga wala pa madawat sa ubang mga tawo. Sigurado gayud nga dili kita maghinakog. Kinahanglan nga anaa sa atong mga kasingkasing ang tinguha nga ipakigbahin ngadto sa matag kalag kutob sa atong mahimo ang makapalipay nga mga kamatuoran sa ebanghelyo ni Jesukristo.⁹

Busa, samtang kita magpadayon, matag usa kanato, kay ang matag usa adunay impluwensya sa atong mga silingan ug sa atong mga higala, dili kita magmaulawon kaayo. Dili kita kinahanglan nga mopasuko sa mga tawo, apan atong ipabati kanila ug ipasabut nga kita interesado, dili aron mamiyembro lamang sila sa Simbahan, apan sa pagdala kanila ngadto sa Simbahan aron ilang matagamtaman ang sama nga mga panalangin nga atong natagamtaman.¹⁰ [Tan-awa sa sugyot 2 sa pahina 171.]

Kon kita nagpuyo og sulundon nga kinabuhi, ang atong impluwensya makaawhag sa uban sa pagkat-on mahitungod sa ebanghelyo.

Hinumdumi, kitang tanan adunay mga responsibilidad. Tingali dili kita tawagon ngadto sa piho nga katungdanan, apan sa matag kasilinganan adunay oportunidad alang sa matag usa kanato sa pagsabwag sa diwa sa kalinaw ug gugma ug kalipay aron ang mga tawo mahimong makasabut sa ebanghelyo ug mapundok ngadto sa panon.¹¹

Pipila lamang ka adlaw ang milabay, usa sa atong mga sister, sa pagbisita ngadto sa silangan, nakig-istoryahanay sa usa ka edukado nga tawo, giingnan sa tawo, “Dili ko makahimo sa pagtuo sama sa imong gihimo apan nanghinaut ko nga unta ako makahimo. Maanindot kini.” Ug ingon usab niana sa kadaghanan sa mga anak sa atong Amahan, kinsa, nag-obserbar sa kinaiya niini nga buhat, nagbantay sa mga karakter sa mga lalaki ug mga babaye kinsa mihangup sa kamatuoran, napuno sila sa katingala sa unsay nahimo, ug sa kalinaw ug kalipay nga nagsunod sa tinuoray nga tumutuo, ug nangandoy nga sila usab unta adunay bahin niini; ug makahimo gayud sila kon sila adunay hugot nga pagtuo.¹²

Kanunay nakong naobserbahan, ug sa akong hunahuna kadaghanan ninyo kinsa adunay misyonaryo nga kasinatian mouyon kanako, nga walay buotan nga lalaki o babaye ang makaanhi ubos sa impluwensya sa matinud-anon nga mga miyembro sa Simbahan ni Jesukristo sa mga Santos sa Ulahing mga Adlaw, ug mopugong sa ilang mga pagdayeg sa unsay ilang naobserbahan samtang anaa uban kanato. Kon sila mobiya kanato, usahay lahi kini, apan samtang anaa sila ubos niana nga impluwensya nga nagagikan sa Ginoo, naangkon pinaagi sa Iyang mga sulugoon, kinsa nagserbisyo kaniya, sila kasagaran mahimout sa pagdayeg sa unsay ilang nakita ug nabati.¹³

Ang kaaway migamit sa iyang kinalig-unan nga mga paningkamot aron mapugngan ang pagkatap sa mga kamatuoran sa ebanghelyo. Ug kini mao ang inyo ug akong katungdanan, pinaagi sa panabut ug inigsoon nga paghigugma ug hugot nga pagtuo, aron sa pagbuntog sa pagdaut nga gitanom sa kaaway nganha sa mga kasingkasing sa mga anak sa atong Amahan, aron sa pagwagtang sa mga sayop nga pagtuo nga anaa sa pipila ka mga panghitabo bisan diha sa mga hunahuna sa buotan nga mga lalaki ug buotan nga mga babaye, ug aron sa pagtudlo kanila sa ebanghelyo sa atong Ginoo, nga kini mao ang gahum sa Dios alang sa kaluwasan sa tanan niadtong kinsa motuo ug mosunod niini.¹⁴

Sa akong hunahuna kining dakong organisasyon diin kita nahisakop kinahanglan gayud nga mopakita og ingon nga ehemplo nga ang mga tawo sa atong mga kasilinganan, nga dili mga miyembro sa Simbahan, makakita sa atong maayo nga mga buhat, madasig sa paghimaya sa pangalan sa atong Langitnong Amahan. Mao kana ang akong gibati kalabut niana. Ang kinahanglan lamang natong buhaton mao ang pagpakita og ehemplo, magmahimong buotan nga mga lalaki ug buotan nga babaye, ug maobserbahan nila kini. Dayon basin motugot na sila kanato sa oportunidad nga motudlo kanila sa mga butang nga wala nila mahibaloi.¹⁵

Kon kita, isip mga miyembro sa Simbahan, nagsunod sa mga sugo sa Dios, kon atong gihatagan og bili ang kamatuoran kutob sa atong mahimo, kon ang atong kinabuhi nahisubay sa katahum sa mga pagtulun-an niini, aron ang atong mga silingan, nga nag-obserbar sa atong pamatasan, madasig sa pagpangita sa kamatuoran, naghimo na kita og talagsaong misyonaryo nga buhat.¹⁶ [Tan-awa sa sugyot 3 sa pahina 171.]

Moapil kita sa misyonaryo nga buhat pinaagi sa pagtabang og andam sa umaabut nga mga misyonaryo ug pinaagi sa pagsuporta kanila sa ilang mga misyon.

Dili lamang atong misyon ang pagtudlo sa Ebanghelyo ni Jesukristo ug sa pagsunod niini, apan kini atong misyon nga ipadala ngadto sa kalibutan ang atong anak nga mga lalaki ug anak nga mga babaye ingon nga sila pagatawgon matag karon ug unya aron sa pagtrabaho diha sa pangalagad sa Simbahan. Sa ilang pag-adto kinahanglan nga sila nabansay og maayo aron lig-on sila batok sa mga pagtintal sa kaaway; kinahanglan nga sila ingon kaputli ug kamahiyason ug kamatarung sa ilang kinabuhi kutob sa ilang mahimo, ug dayon ang impluwensya sa ilang presensya mismo bation niadtong ilang mahimamat. Ang Espiritu sa Dios dili mopuyo sa mahugaw nga mga tabernakulo, apan ang iyang Espiritu mopuyo niadtong kinsa nagpabilin sa ilang kaugalingon nga limpyo ug malumo.

Busa, atong [padak-on] ang atong batang mga lalaki ug batang mga babaye ubos sa impluwensya sa Espiritu sa Dios.¹⁷

Ayaw tuguti nga ang inyong mga anak magtubo nga dili matudlo kanila ang mga baruganan sa ebanghelyo ni Jesukristo. Ayaw hulata nga ipadala sila ngadto sa natad sa misyon aron makat-on kon unsay kahulugan sa ebanghelyo. Akong nahinumduman sa dihang didto ko sa Habagatan [isip usa ka misyonaryo] singkwenta y singko o saysenta ka tuig na ang milabay, usa ka tawo nga nagagikan sa dakong pamilya miingon, “Wala ko masayud unsay isulti. Wala ko masayud unsa ang isulti niini nga mga tawo.”

“Ngano man,” usa sa mga igsoon miingon, “tudloan sila sa Biblia. Lakaw ug kuhaa ang imong Biblia ug basaha ang Genesis.” Miingon siya, “Wala ko kahibalo kon asa ang Genesis diha sa Biblia,” ug gani nagagikan siya sa usa ka … panimalay sa mga Santos sa Ulahing mga Adlaw aron dad-on ang mensahe mahitungod sa kinabuhi ug kaluwasan niadtong mga tawo sa Habagatan. Hinoon, dili kaayo kadto dugay human niana hangtud ang iyang hunahuna nausab. Nakadawat siya og pagpamatuod sa kamatuoran pinaagi sa pagtuon ug pag-ampo, ug siya nasayud nga ang ebanghelyo ania, ug nakahimo siya sa pagbarug sa iyang kaugalingong mga tiil ug gawasnon sa pagpamatuod nga ang ebanghelyo ni Jesukristo mao ang kamatuoran.¹⁸

Nakadayeg ko sa kaimportante sa pagpangandam alang sa buhat. Dili igo nga ang usa ka batang lalaki mopakita lang sa iyang tinguha, tungod sa iyang pagsalig sa iyang mga ginikanan, sa pagbuhat sa unsay gusto nila nga iyang buhaton, sa pag-adto ngadto sa kalibutan ug pagsangyaw sa ebanghelyo; dili igo nga siya motubag sa tawag nga gihimo sa atong Langitnong Amahan matag karon ug unya pinaagi sa iyang mga sulugoon alang sa pagserbisyo og misyon; apan mahinungdanon usab kini nga siya makasarang alang sa buhat, mosiksik sa mga kasulatan, ug mokat-on sa unsay gusto sa Ginoo nga iyang makat-unan. Importante kini nga ang atong anak nga mga lalaki ug anak nga mga babaye mahimong lig-on sa ilang pagtuo ug masayud sama sa nasayran sa ilang mga ginikanan, nga kini mao ang buhat sa atong Amahan. …

Ang usa ka dosena nga mga lalaki nga makasarang alang sa buhat mas bililhon diha sa natad sa misyon kay sa gatusan kinsa mga ignorante sa kamatuoran ug kinsa sila mismo kinahanglan pa nga tudloan sa dili pa sila makapasabut niini ngadto sa uban.

Kini mao ang buhat sa atong Amahan ug dili matiaw-tiawan. Bililhon kaayo kini alang kanato. Kita … maningkamot sa pag-establisar og hugot nga pagtuo diha sa atong mga anak, aron mahimo silang andam sa pagtubag sa matag tawag, ug mobati sa kahiladman sa ilang mga kalag nga moingon, “Andam na ko nga moadto bisan asa nga ang akong Langitnong Amahan gusto nga ako moadto.”¹⁹ [Tan-awa sa sugyot 4 sa pahina 171.]

Usa ka pangaliyupo gihimo… nga atong ipadala ang atong anak nga mga lalaki ug anak nga mga babaye ngadto sa natad sa misyon. … Kini akong kalipay nga makita ang mga lalaki ug mga babaye nga nagtigum og kwarta ug nagplano aron ang ilang mga anak makaadto sa kalibutan. Sulod sa miaging pipila ka semana usa ka batan-ong lalaki … mibiya aron moadto sa natad sa misyon, ug ang iyang duha ka igsoong mga babaye … mipadala kaniya og bahin sa ilang gamay nga sweldo aron siya makatagamtam sa panalangin sa pagmisyon. Siya mao ang una sa mga anak sa dakong pamilya nga moadto sa natad sa misyon aron isangyaw ang kamatuoran. … Nasayud ko sa kalipay nga moabut ngadto sa mga kasingkasing niadtong duha ka buotan nga mga babaye nga adunay hugot nga pagtuo sa paghatag sa ilang sweldo ngadto sa ilang igsoong lalaki aron makaserbisyo siya sa Ginoo sa misyon. Sila makadawat sa mga panalangin nga moabut gikan sa pagtudlo sa Ebanghelyo, ingon nga kini posible nga madawat nga dili personal nga moserbisyo.²⁰

Naghunahuna ko … sa atong mga representante diha sa natad sa misyon, nga anaa sa tanang mga bahin niini nga nasud ug sa pipila ka layo nga mga dapit. Pag-ampo alang kanila, mga kaigsoonan. Nagkinahanglan sila sa tabang sa Ginoo ug nagkinahanglan sila sa atong hugot nga pagtuo ug mga pag-ampo. Sulati sila ug dasiga sila, nga kon makadawat sila og sulat gikan sa panimalay ilang masayran nga sila gihandum sa tanang panahon.²¹

Kita moapil sa misyonaryo nga buhat pinaagi sa pag-andam sa atong kaugalingon sa pagserbisyo og mga misyon.

Dili dangtan og dugay hangtud mahimo nang kinahanglanon ang mga sarang nga mga lalaki ug mga babaye niini nga Simbahan sa pagtudlo sa kamatuoran sa mga bahin sa yuta diin kaniadto kita wala mahilakip: ug kon kita gusto nga makaangkon og mahangturong kalipay didto sa gingharian sa atong Amahan kauban niadtong iyang gipanalangin nga makauban nato dinhi, dili kita maghinakog sa atong kinabuhi: mangandam kita alang sa buhat, ug moadto sa kalibutan ug isangyaw ang kamatuoran, kon ang oportunidad moabut, ug mahimong paagi diha sa mga kamot sa atong Amahan sa pagpabalik sa iyang mga anak ngadto kaniya pinaagi sa pagtudlo kanila sa katahum sa ebanghelyo.²²

Pipila lamang ka tuig ang milabay daghan sa akong mga higala mga adunahan, sila aduna sa mga panginahanglan sa kinabuhi, ug daghan sa mga luho, ug sa dihang gisugyot nga sila moadto sa natad sa misyon ang uban kanila moingon: “Dili ko makabiya sa akong negosyo, dili ko mabuhi kon molakaw ko ug biyaan ang unsay anaa kanako.” Apan ang ilang negosyo nahanaw ug mibiya kanila. Ang mga butang nga ilang gihunahuna nga dili sila mabuhi kon wala kini nahanaw kanila, ug daghan gayud niini nga mga tawo karon malipay kon mahimo pa lang nga ibalik ang miaging napulo ka tuig, ug kon sila nianang higayuna tawagon sa pagserbisyo sa Ginoo, makaingon sila: “I-adjust lang nako ang akong mga kalihokan, malipayon ko sa oportunidad nga gitanyag kanako nga mamahimong tigpangalagad mahitungod sa kinabuhi ug kaluwasan.”

… Hunahunaa ang atong mga oportunidad ug mga pribilehiyo, nga makalingkod sa mga panimalay sa halangdon nga mga tawo sa kalibutan ug makatudlo kanila sa Ebanghelyo ni Jesukristo; hunahunaa kon unsa kaha ang ipasabut nga molingkod uban sa mga tawo nga wala makaangkon og balaan nga awtoridad, ug motudlo kanila sa plano sa kaluwasan ug mopasabut kanila sa pamaagi diin sila usab mahimong makatagamtam sa mga panalangin sa balaan nga awtoridad nga inyong natagamtaman.

Gibati nako nga ang uban kanato mga hakog. Malipayon kaayo kita sa pagtagamtam sa atong mga panalangin, malipayon kaayo kita nga gilibutan sa kaharuhay sa kinabuhi ug sa pagpakig-uban sa labing maayo nga mga lalaki ug mga babaye nga makita diha sa kalibutan, nga atong nakalimtan ang atong katungdanan ngadto sa uban. Unsa kita ka malipayon kon kita maningkamot nga mamahimong mas lig-on alang sa kaayohan diha sa kalibutan pinaagi sa pagpangalagad niadtong kinsa wala pa makasabut sa Ebanghelyo sa atong Ginoo.

Daghan kanato ang milabay na sa tunga-tunga sa kinabuhi, daghan kanato ang mahuman na sa atong buhat. Ang Simbahan nagkinahanglan og mga misyonaryo sa natad sa misyon. Mga tawo nga nakasabut sa Ebanghelyo ug andam nga mohatag sa ilang kinabuhi alang niini kon gikinahanglan, ug kon ako moingon nga kita nanginahanglan og mga misyonaryo ako nagpasabut nga ang kalibutan nagkinahanglan kanila.²³

Ang atong natad sa misyon anaa sa atong atubangan. Ang anak nga mga lalaki ug anak nga mga babaye sa atong Amahan nagkinahanglan kanato. … Niini nga Simbahan adunay liboan ka mga lalaki ug mga babaye kinsa makahimo sa pagtudlo sa ebanghelyo ug kinsa mamahimong mas makahimo pinaagi sa pagbuhat sa ilang katungdanan didto sa natad sa misyon. Sila panalanginan og mga pamaagi, igo nga makapahimo kanila sa pagpahigayon sa buhat nga gusto sa Ginoo nga atong ipahigayon.²⁴

Karon ang panahon duol na nga ang mga ali tangtangon ug ang mga babag kuhaon nga maoy nakababag sa pagsangyaw sa ebanghelyo, nga ang tingog sa Ginoo moabut nganha kaninyo, pinaagi sa iyang mga sulugoon, “Pangandam sa pag-adto sa kalibutan ug isangyaw ang ebanghelyo,” ayaw buhata ang gibuhat ni Jonas, ayaw sulayi nga motago o molikay sa inyong katungdanan; ayaw paghimo og mga pangatarungan nga wala kamo sa gikinahanglan nga mga butang aron moadto; ayaw ipahimutang ang mga butang nga walay kapuslanan nga moali sa inyong panan-aw nga makapugong kaninyo sa pagkakita sa kinabuhing dayon diha sa presensya sa atong Langitnong Amahan, nga moabut lamang pinaagi sa hugot nga pagtuo ug pagkamaunungon sa iyang buhat. Himoa nga ang matag tawo mopahimutang sa iyang panimalay diha sa kahapsay; himoa nga ang matag lalaki nga naghupot sa priesthood, mopahimutang sa iyang kaugalingon diha sa kahapsay, ug kon ang tawag moabut gikan sa mga sulugoon sa Ginoo, nga mosulti kaniya sa pag-adto sa kalibutan aron itudlo ang kamatuoran, aron sa pagpasidaan sa mga katawhan, ingon sa gimando sa atong Amahan nga sila pasidan-an, himoa nga walay tawo nga motago sa pipila ka butang nga walay kapuslanan, aron pagatukbon, kon dili man sa dakong isda, sa mga butang sa kalibutan nga walay kapuslanan. [Tan-awa sa Jonas 1:1–17.]²⁵

Dili kini sayon nga buluhaton; dili kini maanindot nga butang, tingali, nga tawagon ngadto sa kalibutan, mobiya sa atong mga minahal, apan ako moingon kaninyo nga kini mobugti og kalinaw ug kalipay lapas pa sa panabut niadtong kinsa matinud-anon, niadtong kinsa motuman niana nga obligasyon ingon sa gikinahanglan nilang buhaton, ug moandam kanila nga, sa saktong panahon, kon ang buluhaton sa kinabuhi mahuman na, mobarug sila sa atubangan sa ilang Tiglalang, nga dawaton Niya tungod sa unsay ilang nahimo.²⁶

Ako nag-ampo nga ang iyang Espiritu maanaa unta sa tibuok [Simbahan], nga ang paghigugma sa mga anak sa atong Amahan maanaa unta sa atong mga kasingkasing, nga mabati unta nato ang kaimportante sa atong misyon sa kalibutan, samtang kita nagtinguha sa mga butang nga dili atoa, nga gipahulaman lamang kanato isip mga tinugyanan, nga dili unta nato makalimtan ang bililhon nga gasa, ang bililhon nga pribilehiyo, nga makab-ot ra nato, sa pagtudlo sa ebanghelyo ug pagluwas sa mga kalag sa katawhan.²⁷ [Tan-awa sa sugyot 5 sa sunod pahina.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Pamalandongi ang mga pulong ni Presidente Smith diha sa “Gikan sa Kinabuhi ni George Albert Smith” (mga pahina 159–61). Sa imong hunahuna nganong malaumon man kaayo siya mahitungod sa misyonaryo nga buhat didto sa Europe bisan sa pagsupak nga iyang giatubang? Sa unsang paagi nga ang iyang ehemplo makatabang kanimo kon ang imong mga sakop sa pamilya o mga higala dili modawat sa imong pagdapit nga magkat-on kabahin sa ebanghelyo?
Ribyuha ang unang seksyon sa mga pagtulun-an (sa mga pahina 161–63). Unsa nga mga pamaagi ang imong nakit-an nga labing epektibo sa imong mga paningkamot sa pagpakigbahin sa ebanghelyo ngadto sa mga silingan ug mga higala?
Samtang ikaw nagbasa sa seksyon nga nagsugod sa pahina 163, paghunahuna og higayon nga imong nahibaloan nga ang ehemplo sa usa ka miyembro sa Simbahan nakadala sa usa ka tawo nga magkat-on pa mahitungod sa Simbahan. Unsa ang pipila ka laing mga rason nga ang pagsunod sa mga sumbanan sa Simbahan mahinungdanon kaayo sa misyonaryo nga buhat?
Sa mga pahina 165–68, pangitaa ang mga butang nga kinahanglang buhaton sa umaabut nga mga misyonaryo aron sa pagpangandam sa espirituhanong paagi alang sa ilang mga misyon (tan-awa usab sa D&P 4). Unsa man ang mahimong buhaton sa mga ginikanan aron matabangan ang ilang anak nga mga lalaki ug anak nga mga babaye sa pagpangandam? Sa unsang paagi nga ang mga korum sa priesthood ug ang mga sister sa Relief Society makatabang?
Ribyuha ang katapusang seksyon sa mga pagtulun-an (mga pahina 168–70). Unsa man ang pipila sa “mga butang nga walay kapuslanan” nga makapugong kanato sa pagserbisyo og misyon? Unsa ang pipila ka mga panalangin nga moabut pinaagi sa pagserbisyo sa senior nga mga misyonaryo? Pamalandonga kon unsa ang kinahanglan nimong buhaton aron sa pag-andam sa imong kaugalingon alang sa pagserbisyo og misyon.

May Kalabutan nga mga Kasulatan: Mateo 5:14–16; Marcos 16:15–16; 1 Timoteo 4:12; Alma 17:2–3; Doktrina ug mga Pakigsaad 31:1–8; 38:40–41

Tabang sa pagtudlo: “Kon mogamit ka og lainlaing mga kalihokan sa pagkat-on, ang mga estudyante mas makasabut sa mga baruganan sa ebanghelyo ug mas daghan ang mahinumduman. Ang gipili pag-ayo nga pamaagi mas makapaklaro sa usa ka baruganan, mas maanindot, ug mas mahinumduman” (Pagtudlo, Walay Labaw ka Mahinungdanon nga Tawag, 89).

Si George Albert Smith nagserbisyo isip presidente sa European Mission gikan niadtong 1919 hangtud pagka 1921.

“Sa matag kasilinganan adunay oportunidad alang sa matag usa kanato sa pagsabwag sa diwa sa kalinaw ug gugma ug kalipay.”

“Niini nga Simbahan adunay liboan ka mga lalaki ug mga babaye kinsa makahimo sa pagtudlo sa ebanghelyo ug kinsa mamahimong mas makahimo pinaagi sa pagbuhat sa ilang katungdanan didto sa natad sa misyon.”