Kapitulo 2

“Higugmaa ang Imong Silingan sama sa Imong Kaugalingon”

Ang pagtabang sa uban diha sa gugma ug kalooy mahinungdanon sa ebanghelyo ni Jesukristo.

Gikan sa Kinabuhi ni George Albert Smith

Si George Albert Smith nailhan sa iyang kapasidad sa paghigugma sa uban. Si Presidente J. Reuben Clark Jr., usa sa iyang mga magtatambag sa Unang Kapangulohan, miingon mahitungod kaniya: “Ang iyang tinuod nga pangalan mao ang Gugma. … Iyang gihatag ang iyang gugma ngadto sa tanan nga iyang nahimamat. Iyang gihatag ang iyang gugma ngadto sa tanan nga wala pa niya mahimamat.”¹

Ang gugma ni Presidente Smith alang sa uban mitubo gikan sa iyang sinsero nga kombiksyon nga kitang tanan managsoon, mga anak sa samang Langitnong Amahan. Sa hapit na sa katapusan sa iyang kinabuhi, siya miingon sa mga Santos:

“Ako walay kaaway nga akong nahibaloan, ug walay usa ka tawo sa kalibutan nga akong gikasilagan. Tanan nga mga lalaki ug tanan nga mga babaye mga anak sa akong Amahan, ug nagtinguha ko panahon sa akong kinabuhi sa pagsunod sa maalamon nga giya sa Manunubos sa katawhan —sa paghigugma sa akong silingan sama sa akong kaugalingon. … Wala gayud kamo masayud kon unsa ko kamo ka mahal. Ako walay mga pulong sa pagpahayag niini. Ug gusto ko nga mobati niana nga paagi ngadto sa matag anak nga lalaki ug matag anak nga babaye sa akong Langitnong Amahan.”²

Si Presidente Smith mipakita sa iyang gugma alang sa uban pinaagi sa dili maihap nga mga buhat sa kalooy. Ang usa nga nakaobserbar nahinumdom: “Kinaiya kini ni Presidente Smith nga moadto aron sa paghatag og personal nga paghupay ug pagpanalangin ngadto sa daghan kinsa nasakit, kinsa masulub-on, ug kinsa nahimong mapasalamaton tungod sa iyang madasigon nga pag-awhag. Sagad makita siya, sa dili pa ug human sa mga oras sa opisina, naglakaw sa mga agianan sulod sa ospital, nagbisita sa usa ka lawak ngadto sa laing lawak, naghatag og panalangin, nagdasig, ug naghupay uban sa iyang wala damha nga mga pagbisita niadto nga mga dapit diin ang iyang makahupay ug makadasig nga presensya mapasalamaton kaayong gidawat. … Kini iyang kinaiya nga moadto bisan asa nga iyang bation nga siya makahatag og tabang ug pagdasig.”³

Si Presidente Thomas S. Monson mipakigbahin og usa ka piho nga ehemplo mahitungod ni Presidente Smith nga moadto aron sa pagpakita og gugma alang sa usa ka tawo nga nanginahanglan:

“Sa usa ka bugnaw nga kabuntagon sa tingtugnaw, ang mga tiglimpyo sa dalan [sa Siyudad sa Salt Lake] mikuha sa dagkong mga ice gikan sa mga gutter sa dalan. Ang regular nga mga tiglimpyo gitabangan sa temporaryo nga mga trabahante kinsa nanginahanglan kaayo og trabaho. Ang usa niini nagsul-ob lamang og nipis nga sweater ug nag-antus sa katugnaw. Usa ka niwangon nga lalaki nga adunay maayong pagkagalam nga bungot mihunong duol sa trabahante ug nangutana sa trabahante, ‘Nagkinahanglan ka og labaw pa niana nga sweater sa kabuntagon nga sama niini. Asa man ang imong coat?’ Ang lalaki mitubag nga wala siyay coat. Ang bisita mitangtang dayon sa iyang gisul-ob nga coat, mihatag niini ngadto sa tawo ug miingon, ‘Imoha na kining coat. Baga kini ug mopainit kanimo. Anaa ra ko nagtrabaho sa atbang.’ Ang dalan mao ang South Temple. Ang buotan nga Samarianhon kinsa naglakaw paingon sa Church Administration Building sa iyang inadlaw-adlaw nga trabaho ug walay gisul-ob nga coat mao si Presidente George Albert Smith sa Ang Simbahan ni Jesukristo sa mga Santos sa Ulahing mga Adlaw. Ang iyang dili hinakog nga buhat sa pagkamanggihatagon mipakita sa iyang malumo nga kasingkasing. Siya usa gayud ka magbalantay sa iyang igsoon.”⁴ [Tan-awa sa sugyot 1 sa pahina 22.]

Mga Pagtulun-an ni George Albert Smith

Ang tanang mga tawo atong mga igsoon, mga anak sa atong Langitnong Amahan.

Kita nagtan-aw sa tanang kalalakin-an isip atong igsoon nga mga lalaki, sa tanang kababayen-an isip atong igsoon nga mga babaye; kita nagtan-aw sa nawong sa matag binuhat nga anaa sa kalibutan isip anak sa atong Amahan, ug nagtuo nga ingon nga ang matag usa anaa sa panagway sa Amahan, busa ang matag usa usab nakaangkon og tipik sa pagkabalaan nga kon mapalambo moandam kanato sa pagbalik ngadto sa Iyang presensya. …

Mao kana ang atong pagsabut mahitungod sa katuyoan sa atong pagpakabuhi dinhi sa kalibutan, ug nagpasabut sa atong interes diha sa atong isigkatawo. Daghan ang nagtuo nga kita dili mag-apil-apil sa uban, ug ang uban nagtuo nga mamili kita og kagrupo. Ang tinuod mao, kita nagtan-aw sa matag bata nga natawo dinhi sa kalibutan, isip anak nga lalaki o anak nga babaye sa Dios, isip atong igsoon nga lalaki o atong igsoon nga babaye, ug kita mobati nga ang atong kalipay dili mahingpit diha sa gingharian sa langit gawas kon atong matagamtaman ang pagpakig-uban sa atong mga pamilya ug niadtong atong mga higala ug mga kaubanan kinsa atong mga nasuod ug kansang mga interes atong gigahinan og maayo sa atong panahon dinhi sa yuta.⁵

Samtang naghunahuna ko sa akong pagtamud ug sa akong pagmahal alang sa pamilya sa akong Amahan, ang tawhanong pamilya, akong nahinumduman ang usa ka butang nga gisulti sa akong yutan-ong amahan, ug sa akong hunahuna tingali napanunod ko kana nga bahin gikan kaniya. Miingon siya, “Wala ko sukad makakita og usa ka anak sa Dios nga anaa sa ingon ka ubos og kahimtang nga ako wala magtinguha sa pagyuko ug pagbitad kaniya pataas ug sa pagbutang kaniya nga makabarug sa iyang mga tiil ug tabangan siya nga makasugod pag-usab sa iyang kinabuhi.” Gusto ko nga mosulti nga wala ko sukad makakita og usa sa mga anak sa akong Amahan diha sa akong kinabuhi nga ako wala maghunahuna nga siya akong igsoon ug nga ang Dios nahigugma sa matag usa sa iyang mga anak.⁶

Unsa ka malipayon ang kalibutan kon ang mga tawo bisan asang dapita miila sa ilang isigkatawo isip igsoon nga mga lalaki ug igsoon nga mga babaye, ug dayon pagasundan kana sa paghigugma sa ilang mga silingan sama sa ilang kaugalingon.⁷ [Tan-awa sa sugyot 2 sa pahina 22.]

Ang ebanghelyo ni Jesukristo nagtudlo kanato sa paghigugma sa tanan nga mga anak sa Dios.

Ang ebanghelyo nagtudlo kanato sa pagbaton og gugmang putli alang sa tanan ug sa paghigugma sa atong isigkatawo. Ang Manluluwas miingon:

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, mao kana ang dako ug unang sugo.

“Ug ang ikaduha sulosama ra, nga mao kini, Higugmaa ang imong silingan sama sa imong kaugalingon. “Niining duha ka mga sugo nagasukad ang tibuok kasugoan ug ang mga propeta.” [Mateo 22:37–40.]

Mga kaigsoonan, kon ang ebanghelyo ni Jesukristo, ingon sa gihatag nganha kaninyo, wala makatisok niana nga pagbati sa paghigugma diha sa inyong mga kasingkasing alang sa inyong isigkatawo, nan gusto kong moingon nga kamo wala makatagamtam sa hingpit nga katumanan nianang talagsaon nga gasa nga miabut sa yuta sa dihang kini nga Simbahan gi-organisar.⁸ [Tan-awa sa sugyot 3 sa pahina 22.]

Ang atong pagpangalagad mao ang mahitungod sa paghigugma. Ang atong pagserbisyo mao ang usa nga makapalambo sa atong mga kinabuhi. … Kon kita nagpakabuhi sumala sa gusto sa Dios nga kita kinahanglang magpakabuhi, kon kita nangalagad sama sa iyang tinguha nga kita kinahanglan nga mangalagad, ang matag adlaw sa atong kinabuhi mapalambo pinaagi sa impluwensya sa iyang Espiritu, ang atong gugma sa atong isigkatawo motubo ug ang atong mga kalag modako hangtud nga atong mabati nga makahimo na kita sa pagsapupo sa tanan nga mga anak sa Dios, uban sa tinguha sa pagpanalangin kanila ug sa pagdala kanila ngadto sa pagsabut sa kamatuoran.⁹

Isip mga miyembro sa Simbahan ni Kristo, kinahanglan nga atong sundon ang Iyang mga sugo ug maghigugmaay sa usag usa. Dayon ang atong gugma molapas pa sa mga utlanan sa Simbahan nga atong giapilan, ug motabang sa katawhan.¹⁰

Atong ipakita pinaagi sa atong pamatasan, pinaagi sa atong kalumo, pinaagi sa atong gugma, pinaagi sa atong hugot nga pagtuo, nga kita nagsunod gayud nianang dakong sugo nga giingon sa Manluluwas nga susama sa unang dakong sugo, “Higugmaa ang imong silingan sama sa imong kaugalingon.”¹¹

Atong mapalambo ang gugmang putli pinaagi sa pagtabang niadtong kinsa nagkinahanglan og tabang ug pagdasig.

Ang pagsukod sa resulta kon unsay mahatag sa gugma ug sa gugmang putli dinhi sa kalibutan imposible. Ang oportunidad gitanyag diha sa matag branch ug ward ug sa mission field sa pag-adto aron lukpon ang kalibutan sa kahayag, pagpalambo sa kalipay ug pagbayaw niadtong kinsa nawad-an sa kadasig, ug pagdala og hingpit nga kalipay ug kahupayan niadtong kinsa anaa sa kasakit.¹²

Ang Ginoo nag-ingon niini:

“Tan-awa nga kamo maghigugmaay sa usag usa; hunong sa pagkamaibugon; pagtuon sa paghatag ngadto sa usag usa sumala sa gikinahanglan sa ebanghelyo. …

“Ug labaw sa tanan nga mga butang, sul-ubi ang inyong mga kaugalingon uban sa higot sa gugma nga putli, ingon sa usa ka kupo, nga mao ang higot sa kahingpitan ug kalinaw.” [D&P 88:123, 125.] …

… Nagsunod ba kamo sa iyang tambag kalabut sa gugmang putli? Gusto ko nga mosulti nga niining piho nga panahon sa atong kinabuhi kinahanglan natong palamboon ang gugmang putli, dili lamang sa pagpakigbahin sa atong kabtangan niadtong kinsa nanginahanglan, apan kinahanglan nga kita adunay gugmang putli alang sa mga kahuyang ug mga kapakyasan ug mga kasaypanan sa mga anak sa atong Amahan.¹³

Kon kita makakita og usa ka lalaki o usa ka babaye nga wala molampus sa kinabuhi, usa ka tawo kinsa nagkahuyang sa iyang pagtuo, dili nato siya talikdan; atong himoon kini nga atong responsibilidad ang pagbisita kaniya, ug moadto kaniya diha sa pagkamabination ug paghigugma, ug modasig kaniya sa pagbiya sa sayop niya nga pamaagi. Ang oportunidad sa paghimo og tinagsa nga buhat taliwala kanato isip usa ka katawhan anaa bisan asa; ug adunay pipila ka mga lalaki ug pipila ka mga babaye niini nga Simbahan kinsa dili makahimo, kon gustohon nila, sa pagtabang palayo og diyutay gikan sa grupo diin ilang giapilan, ug sa pagsulti og usa ka mabination nga pulong, o sa pagtudlo sa kamatuoran ngadto sa pipila sa mga anak sa atong Amahan. … Buhat kini sa atong Amahan. Mao kini ang labing importante nga butang nga kita maapil niini nga kinabuhi.¹⁴

Ako adunay pakigdait lamang sa akong kasingkasing alang sa katawhan. Ako walay kaligutgot sa akong kasingkasing ngadto ni bisan kinsa nga tawo. Nakaila ko og pipila nga nangandoy nga mas magbinuotan pa og gamay sa ilang kaugalingon kay sa ilang gibuhat, apan kana nga pagka-alkansi ila ra , dili akoa. Kon ako makasagup kanila sa akong mga bukton ug makatabang kanila pabalik sa dalan sa kalipay pinaagi sa pagtudlo kanila sa ebanghelyo ni Jesukristo, ang akong kalipay motubo agig resulta. … Dili kamo makapugos sa mga tawo sa pagbuhat sa mga butang nga matarung, apan kamo makahigugma kanila ngadto sa pagbuhat niini, kon ang inyong ehemplo sama sa ingon nga kinaiya nga sila makakita nga inyong gituman ang unsay inyong gisulti.¹⁵ [Tan-awa sa sugyot 4 sa pahina 22.]

Ang tinuod nga kalipay moabut gikan sa paghigugma ug pagserbisyo sa uban.

Ayaw kalimot bisan pa kon pila ang salapi nga inyong gihatag, bisan pa kon sa unsa nga paagi kamo nagtinguha sa mga butang sa kalibutan aron sa paghimo sa inyong kaugalingon nga malipayon, ang inyong kalipay motugbang sumala sa inyong gugma nga putli ug sa inyong pagkamabination ug sa inyong gugma niadtong kinsa inyong gikauban dinhi sa yuta. Ang atong Langitnong Amahan miingon sa yano kaayo nga mga pulong nga siya kinsa moingon nga siya nahigugma sa Dios ug dili mahigugma sa iyang igsoon dili matinuoron [tan-awa sa 1 Juan 4:20].¹⁶

Dili lamang ang unsay atong madawat ang makapalipay kanato; kondili ang unsay atong ihatag, ug sa pagsige og hatag nianang makapabayaw ug makapalambo ngadto sa mga anak sa atong Amahan, mas ganahan kita nga mohatag. Motubo kini sama sa usa ka dakong tuburan sa kinabuhi ug mosugwak ngadto sa mahangturong kalipay.¹⁷

Kon ang atong kinabuhi dinhi mahuman na ug kita mopauli na, atong masayran nga mahatagan kita og pasidungog sa matag maayo nga buhat nga atong napahigayon, matag pagkamabination nga atong nabuhat, matag paningkamot nga atong gihatag alang sa kaayohan sa atong isigkatawo. …

… Atong ipakita ang atong pasalamat sa unsay gihatag sa Ginoo kanato pinaagi sa pagserbisyo Kaniya, ug kita nagserbisyo Kaniya kon kita nagbuhat og maayo ngadto sa Iyang mga anak. Nakadawat kita nga walay bayad, busa panghatag nga walay bayad [tan-awa sa Mateo 10:8]. Uban sa mga kasingkasing nga gipainit sa gugma ug pagkamabination alang sa atong isigkatawo, mopadayon kita nga makanunayon hangtud nga ang katapusan moabut, ug atong makita ang atong rekord sa kinabuhi. Dayon, kon atong napalambo ang atong mga talento, kon kita nagmatinuoron, matinud-anon, putli, manggiloloy-on, ug mahigugmaon, ug nagtinguha sa pagbayaw sa matag kalag nga atong gikahimamat, kon atong gikinabuhi ang kahayag nga atong nadawat, ug gisabwag kana nga kahayag kon gitugot sa higayon, unsa kaha kita ka malipayon ug unsa kaha ka puno sa pasalamat ang atong mga kasingkasing kon kita makadawat gikan sa Tiglalang sa langit ug sa yuta kanang maabiabihon nga pagdawat: “Maayong pagkabuhat, maayo ug kasaligan nga ulipon; sa diyutay kasaligan ka diay; sa daghan pagapiyalan ko ikaw; dumuyog ka sa kalipay sa imong Agalon.” [Mateo 25:21.]¹⁸ [Tan-awa sa sugyot 5 sa pahina 22.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Paghunahuna og mga paagi nga ikaw makapakita og gugma sama sa gibuhat ni Presidente Smith (tan-awa sa mga pahina 13–15). Pananglitan, sa unsang paagi nga kita makapakita og gugma sa pagtuman sa atong mga assignment sa home ug visiting teaching?
Samtang imong tun-an ang unang seksyon sa mga pagtulun-an (mga pahina 16–17), paghunahuna kon sa unsang paagi nga ang paggamit niining mga pagtulun-an mahimong mopalambo sa imong relasyon ngadto sa imong mga silingan, mga kauban sa trabaho, mga sakop sa pamilya, ug uban pa.
Basaha ang tanang ikatulo nga paragraph sa pahina 18. Unsa ang pipila ka mga pagtulun-an o mga istorya diha sa mga kasulatan nga nakapadasig kanimo sa paghigugma ug pagserbisyo sa uban?
Tun-i ang seksyon nga nagsugod sa pahina 19, ilabi na ang katapusang duha ka mga paragraph. Paghunahuna og usa ka tawo kinsa tingali anaa sa gawas “sa grupo diin [ikaw] miapil.” Unsa man ang piho nga butang nga imong mahimo aron sa pagtabang niana nga tawo?
Pamalandongi ang mga pagtulun-an ni Presidente Smith sa mga pahina 21–22. Unsa nga mga kasinatian ang imong nasinati nga nakatudlo kanimo nga ang tinuod nga kalipay moabut tungod sa paghatag og kalipay sa uban?

May Kalabutan nga mga Kasulatan: Mateo 5:43–44; 25:34–40; Lucas 10:25–37; Juan 13:34–35; 1 Juan 4:7–8; 1 Nephi 11:16–25; Moroni 7:44–48

Tabang sa pagtudlo: “Tipik sa pagtudlo nga gihimo sa Simbahan gihimo sa estrikto nga paagi, mao ang lektyur. Dili kaayo kita ganahan og mga lektyur sulod sa mga klasehanan. Gibuhat nato kini sa sakrament miting ug sa mga komperensya, apan ang pagtudlo mahimong magtubag-tubag aron makapangutana kamo. Sayon ka nga makadasig og mga pangutana sulod sa klase” (Boyd K. Packer, “Mga Baruganan sa Pagtudlo ug Pagkat-on,” Ensign, Hunyo 2007, 87).

“Ang ebanghelyo nagtudlo kanato sa pagbaton og gugmang putli alang sa tanan ug sa paghigugma sa atong isigkatawo.”

“Atong ipakita pinaagi sa atong pamatasan … nga kita nagsunod gayud nianang dakong sugo … , ‘Higugmaa ang imong silingan sama sa imong kaugalingon.’”

“Pag-adto aron lukpon ang kalibutan sa kahayag, pagpalambo sa kalipay ug pagbayaw niadtong kinsa nawad-an sa kadasig, ug pagdala og hingpit nga kalipay ug kahupayan niadtong kinsa anaa sa kasakit.”