Pasiuna

Ang Unang Kapangulohan ug ang Korum sa Napulog Duha ka mga Apostoles mi-establisar sa han-ay sa Mga Pagtulun-an sa mga Presidente sa Simbahan aron sa pagtabang kanimo nga madugangan ang imong pagsabut sa gipahiuli nga ebanghelyo ug mas mapaduol ngadto sa Ginoo pinaagi sa mga pagtulun-an sa mga propeta sa ulahing mga adlaw. Samtang ang Simbahan magdugang og mga basahon dinhi niini nga han-ay, makakolekta ka og mga basahon sa pakisayran sa ebanghelyo diha sa imong balay. Ang mga basahon niini nga han-ay gihimo aron gamiton alang sa personal nga pagtuon ug alang sa Dominggo nga pagpanudlo. Kini makatabang usab kanimo sa pagpangandam sa uban nga mga leksyon o mga pakigpulong ug sa pagtubag sa mga pangutana mahitungod sa doktrina sa Simbahan.

Kini nga basahon naghulagway sa mga pagtulun-an ni Presidente George Albert Smith, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan niadtong Mayo 21, 1945, hangtud pagka Abril 4, 1951.

Personal nga Pagtuon

Samtang ikaw magtuon sa mga pagtulun-an ni Presidente George Albert Smith, tinguhaa ang inspirasyon sa Espiritu sa mainampoong paagi. Ang mga pangutana diha sa katapusan sa matag kapitulo motabang kanimo nga makasabut sa mga pagtulun-an ni Presidente Smith ug magamit kini diha sa imong kinabuhi. Samtang ikaw magtuon niini nga mga pagtulun-an, mahimo usab ikaw nga maghunahuna kon sa unsang paagi nga ikaw makatudlo niini ngadto sa mga sakop sa pamilya ug mga higala. Kini mopalig-on sa imong pagsabut sa unsay imong gibasa.

Pagtudlo gikan Niini nga Basahon

Ikaw makagamit niini nga basahon sa pagtudlo diha sa panimalay o diha sa simbahan. Ang mosunod nga mga lagda makatabang kanimo.

Pangandam sa Pagtudlo

Tinguhaa ang giya sa Espiritu Santo samtang ikaw nangandam sa pagtudlo. Tun-i sa mainampoong paagi ang kapitulo aron mahimong masaligon diha sa imong pagsabut sa mga pagtulun-an ni Presidente Smith. Makatudlo ikaw uban sa mas labaw nga sinseridad ug gahum kon ang iyang mga pulong nakaimpluwensya kanimo mismo (tan-awa sa D&P 11:21).

Kon ikaw nagtudlo og usa ka leksyon sa Melchizedek Priesthood o Relief Society, kinahanglan nga ikaw dili mohiklin niini nga basahon o mag-andam og mga leksyon gikan sa uban nga mga materyal. Pagpili sa mainampoong paagi gikan niini nga kapitulo kadtong mga pagtulun-an nga imong gibati nga labing makatabang niadtong imong gitudloan. Ang pipila ka mga kapitulo naglangkob og mas daghan nga materyal kay sa imong mahimo nga hisgutan atol sa oras sa klase. Ipadayon ang maayo nga mga panaghisgutan kay sa maningkamot nga mahuman ang tanang mga pagtulun-an.

Awhaga ang mga partisipante sa pagtuon sa kapitulo sa dili pa ang leksyon ug sa pagdala sa libro. Kon sila mohimo sa ingon, sila mas mahimong andam sa pag-apil diha sa panaghisgut ug makahatag og kaayohan sa usag usa.

Ipaila ang Kapitulo

Samtang ikaw nagpaila sa kapitulo, ug sa tibuok nga leksyon, paningkamot sa pagmugna og usa ka kahimtang diin ang Espiritu makatandog sa mga kasingkasing ug mga hunahuna niadtong imong gitudloan. Sa pagsugod sa leksyon, tabangi kadtong imong gitudloan nga mo-focus diha sa mga pagtulun-an sa kapitulo. Sa pagbuhat niini, ikaw makahimo sa:

Pagbasa ug paghisgut sa seksyon nga giulohan og “Gikan sa Kinabuhi ni George Albert Smith” diha sa sinugdanan sa kapitulo.
Paghisgut og usa ka litrato o kasulatan gikan sa kapitulo.
Pagkanta og may kalabutan nga himno.
Pagpakigbahin sa daklit og usa ka personal nga kasinatian mahitungod niini nga hilisgutan.

Pagdumala og Panaghisgut kabahin sa mga Pagtulun-an ni Presidente Smith

Samtang ikaw nagtudlo gikan niini nga basahon, dapita ang uban sa pagpakigbahin sa ilang mga hunahuna, sa pagpangutana, ug sa pagtudlo sa usag usa. Sila labing makakat-on kon sila aktibo nga moapil. Kini usa usab ka maayo nga paagi sa pagtabang kanila nga madawat ang personal nga pagpadayag. Sa pag-awhag og panaghisgut, gamita ang mga pangutana diha sa katapusan sa kapitulo. Kini nga mga pangutana mao ang pakisayran diha sa nagkalainlaing mga dapit sa kapitulo aron sa pagpakita kon hain nga seksyon sa mga pagtulun-an ang gipasabut niini. Makahimo usab ikaw og imong kaugalingong mga pangutana alang gayud niadtong imong gitudloan. Pananglitan, makapangutana ka sa mga partisipante kon sa unsang paagi nga magamit nila ang mga pagtulun-an ni Presidente Smith diha sa ilang mga responsibilidad isip mga ginikanan o isip mga home teacher o mga visiting teacher.

Ang mosunod nga mga opsyon mahimong makahatag kanimo og dugang nga mga ideya:

Hangyoa ang mga partisipante sa pagpakigbahin sa unsay ilang nakat-unan gikan sa ilang personal nga pagtuon sa kapitulo. Kini tingali makatabang sa pagkontak og pipila ka mga partisipante atol sa semana ug sa paghangyo kanila sa pag-anha sa klase nga andam nga mopakigbahin sa unsay ilang nakat-unan.
Sanguni ang mga partisipante sa pagbasa og pinili nga mga pangutana gikan sa katapusan sa kapitulo (mahimong tinagsa o diha sa ginagmay nga mga grupo). Hangyoa sila sa pagpangita sa mga pagtulun-an diha sa kapitulo nga may kalabutan sa mga pangutana. Dayon dapita sila sa pagpakigbahin sa ilang mga hunahuna ug mga panglantaw ngadto sa uban nga mga grupo.
Basaha og dungan ang pinili nga mga pamahayag ni Presidente Smith gikan sa kapitulo. Hangyoa ang mga partisipante sa pagpakigbahin og mga ehemplo gikan sa mga kasulatan ug gikan sa ilang kaugalingon nga kasinatian nga naghulagway sa unsay gitudlo ni Presidente Smith.
Hangyoa ang mga partisipante sa pagpili og usa ka seksyon nga ilang ganahan ug ipabasa kini sa hilum. Dapita sila sa pagpundok diha sa mga grupo sa duha o tulo ka mga tawo kinsa mipili sa sama nga seksyon ug hisguti unsay ilang nakat-unan.

Tapusa ang Panaghisgut

I-summarize og daklit ang leksyon o paghangyo og usa o duha ka partisipante sa paghimo sa ingon. Awhaga kadtong imong gitudloan nga ipakigbahin ngadto sa uban ang unsay ilang nakat-unan gikan sa mga pagtulun-an ni Presidente Smith. Ipamatuod ang mga pagtulun-an nga imong gihisgutan. Mahimo usab ikaw nga modapit sa uban sa pagpakigbahin sa ilang mga pagpamatuod.

Impormasyon mahitungod sa mga Tinubdan nga Gikutloan Niini nga Basahon

Ang mga pagtulun-an ni Presidente Smith niini nga basahon direkta nga mga kinutlo gikan sa nagkalainlain nga mga tinubdan. Kini nga mga kinutlo mipabilin sa punctuation, spelling, capitalization, ug paragraphing sa orihinal nga mga tinubdan gawas kon ang editoryal o tipograpikal nga mga kausaban gikinahanglan aron sayon basahon. Tungod niini nga katarungan, makamatikod ka og ginagmay nga kausaban diha sa teksto. Pananglitan, ang pulong ebanghelyo anaa sa gamay nga letra diha sa pipila ka mga kinutlo ug anaa sa dagko nga letra sa uban.

Si Presidente Smith usab kasagaran mogamit og mga termino sama sa mga tawo, tawo, o katawhan nga nagpasabut ngadto sa tanang mga tawo, lalaki ug babaye. Kanunay siya nga mogamit sa mga pronoun siya, iya, ug kaniya nga nagpasabut sa lalaki ug babaye. Komon kini sa pinulongan sa iyang panahon. Bisan pa sa kalainan tali niining maong pinulongan ug sa bag-o nga paggamit, ang mga pagtulun-an ni Presidente Smith magamit sa mga babaye ug mga lalaki.