Kapitulo 4

Si Propeta Joseph Smith, Instrumento sa Dios sa Pagpahiuli sa Kamatuoran

Pinaagi ni Propeta Joseph Smith, ang Dios mipahiuli sa ebanghelyo ni Jesukristo sa kalunsay niini.

Gikan sa Kinabuhi ni George Albert Smith

Niadtong hapit na ang ika-100 nga anibersaryo sa adlawng natawhan ni Propeta Joseph Smith, si Elder George Albert Smith mibiyahe uban ni Presidente Joseph F. Smith ug uban pa aron mobisita sa mga dapit nga importante kaayo sa kinabuhi sa Propeta. Pagkabuntag sa Disyembre 23, 1905, usa ka monumento ni Joseph Smith ang gipahinungod didto sa dapit nga iyang natawhan sa Vermont. Usa kadto ka makapatandog nga kasinatian alang kang George Albert Smith ug niadtong iyang mga kauban nga maadto didto sa dapit nga mahinungdanon kaayo sa Pagpahiuli sa ebanghelyo. “Ang among mga luha miagas,” siya nahinumdom. “Ubos sa impluwensya sa Espiritu, ang matag kalag nahimong mapaubsanon, matag kasingkasing nalukmay, ug kami nagmaya sa mga panalangin sa atong Langitnong Amahan.”¹ Si George Albert Smith gihangyo sa paghatag sa panapos nga pag-ampo atol sa mga kalihokan sa pagpahinungod. Human sa pag-summarize sa panghitabo nianang adlawa sa iyang journal, siya misulat: “Sa ingon natapos ang usa sa labing maanindot nga panghitabo sa akong kinabuhi. Mapasalamaton ako nga nahimong usa sa pipila sa atong katawhan nga motabang sa buluhaton nga mao pa lang ang pagkahuman.”²

Dayon sa wala madugay miadto sila sa nahimutangan sa Unang Panan-awon, didto sa Palmyra, New York. Si Elder Smith nahinumdom: “Miadto kami sa kakahoyan diin si Joseph miluhod ug mihangyo sa Ginoo sa pagpahibalo kaniya kon hain sa mga simbahan ang angay niyang apilan. Nadasig kami sa pagkanta, nianang balaan nga dapit, sa matahum nga … himno, ‘Joseph Smith’s First Prayer.’”³

Human sa pagbisita sa Hill Cumorah, sa Templo sa Kirtland, ug sa uban nga mga dapit nga may kalabutan sa misyon sa Propeta, ang grupo gipapundok ni Presidente Joseph F. Smith sa katapusang gabii niana nga biyahe. “Human sa pagkanta sa pipila ka mga awit sa Zion, ang matag sakop sa grupo gitugutan sa pagpamatuod sa kamaayo ug kalooy sa atong Amahan ngari kanamo. Ang Espiritu sa Ginoo gibu-bu ngari kanamo, ug kami mihilak sa kamaya ug kalipay.”⁴ [Tan-awa sa sugyot 1 sa mga pahina 50–51.]

Pipila ka katuigan ang milabay, samtang si George Albert Smith nagserbisyo isip Presidente sa Simbahan, pipila ka mga basahon ang gimantala nga misulay sa pagpakaulaw ni Joseph Smith. Sa usa ka kinatibuk-ang komperensya sa Simbahan, si Presidente Smith maisugon nga midepensa sa Propeta, mihatag og pagpamatuod mahitungod sa iyang misyon niini nga mga pulong:

“Daghan sa mga kaayohan ug mga panalangin nga miabut kanako miabut tungod nianang tawhana kinsa mihatag sa iyang kinabuhi alang sa ebanghelyo ni Jesukristo. Adunay pipila kinsa mipakaminus kaniya, apan gusto kong mosulti nga kadtong kinsa mibuhat sa ingon makalimtan ug ang ilang lawas mobalik ngadto sa yuta, kon wala pa sila mamatay, ug ang resulta sa ilang kadautan dili mamatay, samtang ang himaya ug dungog ug kaligdong ug kaisug ug kamaunungon nga gipakita ni Propeta Joseph Smith motatak sa iyang pangalan sa kahangturan.”⁵

Si Elder Harold B. Lee, nga nianang higayuna usa ka sakop sa Korum sa Napulog Duha ka mga Apostoles, nadasig kaayo niini nga pamahayag nga iyang gitipigan ang usa ka kopya niini diha sa iyang pitaka ug kanunay nga mokutlo niini, sa tinguha nga ang mga pulong ni Presidente Smith “madungog ngadto sa tanang bahin sa yuta.”⁶

Mga Pagtulun-an ni George Albert Smith

Ang Unang Panan-awon ni Joseph Smith nagpakita nga ang kalangitan dili sirado.

Kita nagtuo nga ang atong Langitnong Amahan namulong sa atong panahon karon … , nga siya nakadungog sa mapaubsanon nga pag-ampo sa usa ka batan-on didto sa Palmyra, ug mitubag sa iyang pag-ampo ug mipanalangin kaniya og kahibalo sa iyang personalidad, nga ang tanang tawo unta makaila sa Ginoo, kon gusto nila.

Kadto natural lamang kaayo nga butang nga si Joseph Smith kinahanglang mangita sa Ginoo. Siya miabut sa … mga tawo kinsa mituo sa atong Langitnong Amahan, sa balaang misyon sa Manluluwas, sa kaepektibo sa pag-ampo, ug nga ang Dios maminaw ug motubag sa iyang mga tawo kon sila moduol sa iyang atubangan uban sa tukma nga espiritu. Sayon kadto alang niining batan-ong lalaki nga motuo, tungod kay siya natawo ug nagdako sa usa ka matuohon nga panimalay; ug sa dihang miadto siya sa kakahoyan agig pagtubag sa mando sa kasulatan (Santiago 1:5): “Kon aduna man kaninyoy nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud, ug sa walay pagpamoyboy; ug kini igahatag kaniya,” siya mituo nga ang iyang pag-ampo pagatubagon, ug ang atong Langitnong Amahan misaad sa iyang mga anak gikan sa sinugdanan, nga, “pinaagi sa hugot nga pagtuo kamo mahimong masayud sa tanan nga mga butang.”⁷

Ang iyang hugot nga pagtuo sa Dios migiya kaniya palayo sa gituohan, nga komon sa iyang panahon, nga ang Biblia naglangkob sa tanan nga pagpadayag nga mahimong madawat sa mga tawo, ug nga ang kalangitan sirado ibabaw sa iyang ulo. Nag-ampo siya sa Ginoo, ug ang iyang pag-ampo gitubag. Siya nakakita sa Amahan ug sa Anak nga mikanaog sa yuta nga gilibutan sa mahimayaon nga kahayag. Nakadawat siya og dili malalis nga kahibalo nga sila adunay pisikal nga mga lawas sama sa mga tawo, ug nga sila tinuod gayud nga mga personahe; sila nakig-istorya kaniya ug iyang nadungog ang ilang mga tingog.⁸

Ang resulta [sa pag-ampo ni Joseph] mao kadtong talagsaon nga pagpakita, dili gayud sama sa uban nga atong nadungog sa kasaysayan sa kalibutan. Kita nakadungog og mga panghitabo diin ang atong Langitnong Amahan mipakita sa iyang kaugalingon; nakabasa kita og mga panghitabo diin ang Manunubos sa katawhan mipakita sa iyang kaugalingon; apan wala gayud kita makabasa og bisan unsa nga panghitabo diin ang Amahan ug ang Anak mipakita kaniadto ni bisan kinsa nga binuhat ug nakig-istorya ngadto niana nga indibidwal.

Ang mga tawo sa kalibutan dili motuo niini. Ang mga lalaki ug mga babaye gitudloan nga ang kalangitan sirado … , ug sa dihang kini nga batan-on mipahayag nga sa atong panahon, sa panahon gayud nga kita labing nagkinahanglan sa kahayag, dihang ang mga lalaki ug mga babaye manalagan ngadto-nganhi aron sa pagpangita sa pulong sa Dios ug dili kini makaplagan, sama sa gipanagna sa karaan nga mga propeta [tan-awa sa Amos 8:11–12], ang Ginoo mipakita sa iyang kaugalingon, si [Joseph] gitamay. … Ang iyang pamahayag gisalikway, ug kadtong iya untang mga higala mitalikod kaniya ug gani miingon nga kini iya sa yawa. Unsa man ang pagpamatuod sa batang lalaki?

“… Ako sa tinuod nakakita og usa ka kahayag, ug sa taliwala niana nga kahayag ako nakakita sa duha ka mga personahe, ug sila sa kamatuoran namulong ngari kanako; ug bisan pa ako gikasilagan ug gigukod sa pag-ingon nga ako nakakita og usa ka panan-awon, apan kini tinuod; ug samtang sila naggukod kanako, nagbiay-biay kanako, ug namulong sa tanan nga matang sa dautan batok kanako sa bakak tungod sa pag-ingon, ako gitultulan sa pag-ingon sa akong kasingkasing: Ngano nga gigukod ako sa pagsulti sa kamatuoran? Ako tinuod gayud nga nakakita og usa ka panan-awon, ug kinsa ako nga makaharong sa Dios, o ngano nga ang kalibutan naglaraw sa paghimo kanako nga molimud kon unsa ang akong tinuod nga nakita? Kay ako nakakita og usa ka panan-awon; ako nasayud niini, ug ako dili makalimud niini, ni ako mangahas sa pagbuhat niini, gani ako nasayud nga ang pagbuhat sa ingon ako makasala sa Dios, ug mahimutang ubos sa kalaglagan.” [Tan-awa sa Joseph Smith—Kasaysayan 1:25.]⁹

Sa tuig 1830, sa dihang kini nga Simbahan gi-organisar, walay organisasyon sa simbahan ibabaw sa yuta nga mosulti nga sila mituo nga ang Dios mopakita sa iyang kaugalingon ngadto sa katawhan. Ang mga pagtulun-an sa mga simbahan tanan sukwahi niana, ug nakita sa atong Amahan ang kawalay pulos sa pagpaningkamot og luwas sa iyang anak nga mga lalaki ug anak nga mga babaye hangtud nga sila madasig sa pagduol ngadto kaniya uban sa pagtuo nga siya maminaw ug motubag sa ilang mga pag-ampo. Sa dihang ang batang lalaki nga propeta, didto sa kakahoyan sa Palmyra, nakakita sa Amahan ug sa Anak, ug nasayud nga sila mga personahe gayud, nga sila makapaminaw ug makatubag sa unsay iyang gisulti, kini misugod og usa ka bag-ong panahon niini nga kalibutan, ug mipahimutang og pundasyon sa hugot nga pagtuo sa katawhan. Makaampo na sila karon sa atong Amahan sa langit ug makaamgo nga siya makapaminaw ug makatubag sa ilang mga pag-ampo, nga adunay koneksyon tali sa kalangitan ug sa yuta.¹⁰ [Tan-awa sa sugyot 2 sa pahina 51.]

Bisan tuod og batan-on ug walay kasinatian, si Joseph Smith gitawag aron sa pagpahiuli sa tinuod nga Simbahan ni Jesukristo.

Ang hugot nga pagtuo mao ang nakapaawhag kang Joseph sa pagpangita sa Dios diha sa pag-ampo ug sa pagpangutana kon hain nga simbahan ang angay niyang apilan. Unsa man ang tubag? Miingon ba ang Ginoo, “Akong anak, maayo silang tanan, naningkamot silang tanan sa pagsunod sa akong mga sugo, ang mga lalaki kinsa mga lider sa tanan niini nga mga simbahan gitugutan nako, bisan unsa nga simbahan mahimo ra, kining tanan mogiya kanimo og balik ngadto sa presensya sa atong Langitnong Amahan?” Ang batang lalaki tingali nagdahum og ingon niana nga tubag gumikan sa mga kahimtang nga anaa na. Apan gusto siyang masayud kon unsa ang angayang buhaton, ug siya adunay dako nga pagtuo nga ang Ginoo mosulti kaniya. Busa sa dihang siya nag-ampo, nangutana siya kon hain sa mga simbahan ang angay niyang apilan, ug sa akong hunahuna nahingangha siya sa dihang [siya giingnan], “Dili gayud mopasakop bisan hain kanila; sila nagtudlo og mga doktrina nga mga sugo sa mga tawo; sila nagpaduol ngari kanako uban sa ilang mga ngabil apan ang ilang mga kasingkasing layo gikan kanako; sila adunay hulagway sa pagkadiosnon, apan sila nanghimakak sa gahum niana.” [Tan-awa sa Joseph Smith—Kasaysayan 1:19.] Hunahunaa ang usa ka batang lalaki nga nag-edad og katorse anyos nga mibarug gikan sa iyang pagluhod didto sa kakahoyan duol sa iyang panimalay ug mipahibalo sa kalibutan sa mensahe nga sama niana! Inyo bang mahunahuna nga ang usa ka batan-on mangahas sa pagbuhat sa ingon nga butang sama niana? Apan tungod sa pagsaksi nga gihatag ngadto kaniya sa iyang Langitnong Amahan, tungod nianang sugo nga gikan mismo sa Ginoo, siya aduna bay laing gibuhat nga bisan unsa pa nga butang gawas sa pagpahibalo nga ang Ginoo nakig-istorya kaniya?¹¹

Si Joseph Smith usa pa lamang ka bata sa dihang ang mga kamot nila ni Pedro, Santiago ug Juan gipatong sa iyang ulo ug gi-ordinahan siya ngadto sa Melchizedek Priesthood,—siya ug si Oliver Cowdery. Wala madugay si Joseph Smith gisugo sa pag-organisar og Simbahan. Usa pa lamang siya ka batan-on, apan siya mi-organisar niini ubos sa mando sa Manunubos sa katawhan. Ug kini gisunod sa Simbahan nga gi-organisar sa Manluluwas sa dihang dinhi pa siya sa yuta. Ako wala gayuy pagduhaduha nga adunay daghan kinsa nagtan-aw niining batan-ong lalaki isip usa ka tawo nga kabus nga mikalit lang og kasikat, ug naghunahuna nga dili makatarunganon nga ang usa ka tawo kinsa wala ma-edukar nga mahimong usa ka lider nangandoy nga mangulo. Apan sama siya sa uban nga mga sulugoon sa atong Langitnong Amahan nga nakapuyo sa yuta, kinsa gitawag sa Ginoo sa paghimo og espesyal nga buluhaton, ug ang kakulang sa kahibalo mahitungod sa mga butang niining kalibutana dili makapugong sa posibilidad sa paghatag sa Ginoo ngadto kaniya og kasayuran nga nakapahimo kaniyang pareho ug gani labaw pa sa daghang mga butang niadtong kinsa nakaangkon og daghang yutan-ong mga oportunidad nga wala kaniya.¹²

Bisan kon siya giabusaran ug gibakakan, gitamay niadtong kinsa iya untang mga higala, gisupak sa mga makinaadmanon ug edukado nga mga tawo nianang panahona, siya milampus sa pagpahiuli sa Ebanghelyo sa kinabuhi ug kaluwasan ug sa pag-establisar sa Simbahan ni Jesukristo sa mga Santos sa Ulahing mga Adlaw.

Samtang ang mga gahum sa dautan hilabihan ka kusog sa paglaglag kaniya, siya gipanalipdan sa Ginoo hangtud nga ang iyang buhat nahuman ug ang tanang mga yawe ug mga ordinansa nga gikinahanglan alang sa kaluwasan sa tawhanong pamilya nahibalik ngadto sa katawhan.¹³ [Tan-awa sa sugyot 3 sa pahina 51.]

Ang mga kamatuoran nga gipahiuli pinaagi ni Joseph Smith nagdala og kalinaw ug hingpit nga kalipay niadtong kinsa modawat niini.

Gikan nianang batang lalaki kinsa, sa edad nga katorse anyos, nakakita sa Amahan ug sa Anak, diha miabut kanang maanindot nga mensahe nga ang atong Amahan sa langit ug ang iyang Anak nga si Jesukristo mga nahimaya nga mga tawo; nga ang Manluluwas sa kalibutan nabanhaw gikan sa mga patay. Kana nga batan-on nakakita sa unsay nahibaloan sa kalibutan, apan tungod sa pipila ka rason nakalimtan, ug misugod siya sa paghatag og pagsaksi mahitungod niini ngadto sa katawhan.¹⁴

[Sa sayo sa mga 1800] adunay pipila ka mga tawo sa kalibutan kinsa mituo sa usa ka personal nga Dios nga may lawas. Apan ang usa ka pagpakita miabut nianang higayuna ngadto ni Propeta Joseph Smith, sa dihang siya usa pa lamang ka bata, wala pa mag-edad og kinse anyos, ug siya nakakita sa Amahan ug sa Anak ug sa ingon mipamatuod. Nakadawat usab siya og mga pagbisita gikan sa langitnong nga binuhat, ug ang Ginoo, pinaagi kanila mihatag kaniya og dugang nga kasayuran alang sa katawhan, ug siya, sa iyang kaugalingong paagi, mihatag kanato, o niadtong kinsa nag-una kanato sa Simbahan, og usa ka panabut mahitungod sa katuyoan sa kinabuhi. … Ang iyang paghulagway sa langit nakapadasig kanato uban sa tinguha nga magmahimong takus sa usa ka panimalay didto kon ang atong yutan-on nga kinabuhi matapos na. Ang literal nga pagkabanhaw ug ang paghulagway sa langit ug impyerno gihimong yano kaayo nga, sa paggamit sa kasulatan, “maglalakaw nga mga tawo, oo, ang mga hungog, dili mangasayup sa sulod niini.” [Tan-awa sa Isaias 35:8.]¹⁵

Pinaagi kaniya gipadayag ang pagtukod og mga templo, ang mahangturong pakigsaad sa kaminyoon, ug kaluwasan alang sa mga patay, nga nagdala og dili matukib nga kalipay ngadto sa liboan ka mga anak sa atong Amahan.

Ang mahangturong mga kamatuoran nga gipamulong pinaagi kaniya anaa na taliwala sa katawhan sa yuta, nagdala og kalinaw ug katagbawan niadtong kinsa modawat niini.¹⁶

Ang atong Langitnong Amahan nasayud kon unsa ang moabut sa dihang niining ulahing mga adlaw iyang gipahiuli ang ebanghelyo sa kalunsay niini. Nasayud siya sa apostasiya sa kalibutan taliwala sa iyang mga anak, ug nga sila mibiya gikan sa yano nga kamatuoran, ug sa iyang dakong kalooy, gipadayag niya kining buhat sa ulahing mga adlaw. Gikan sa nasud gipili niya ang usa ka batang lalaki taliwala sa mga tawo, ug midasig kaniya sa pagsugod sa buhat nga gisangon aron sa pag-usab sa relihiyoso nga kalibutan. Nasayud siya nga ang kalibutan nangapkap diha sa kangitngit, ug sa kalooy iyang gipahiuli ang kahayag. Walay laing paagi nga ang kalipay matagamtaman sa katawhan kondili pinaagi sa pagpakabuhi sa pagkamatarung, ug ang mga tawo dili makapuyo og matarung nga kinabuhi ug dili mahisubay sa kamatuoran. Adunay daghang kamatuoran sa kalibutan apan gisagulan og sayop nga ang Ginoo mismo miingon kang Propeta Joseph Smith nga ang mga tawo kinsa mga magtutudlo ug mga instruktor sa mga simbahan nagtudlo og mga doktrina nga mga sugo sa mga tawo, ug mipasidaan sa batang lalaki nga kinahanglang dili siya moapil kanila. Dayon iyang gipahiuli ang ebanghelyo, ang gahum sa Dios alang sa kaluwasan, ngadto sa tanan kinsa motuo ug mosunod niini.¹⁷

Ako mosulti ngadto sa tanang mga tawo bisan asa, susiha ang mga pagtulun-an sa Ebanghelyo sa atong Ginoo ingon sa gipadayag ngadto kang Propeta Joseph Smith, siksika kini sa mainampoong paagi, ug inyong makaplagan ang tambal alang sa mga sakit niining kalibutana, ug walay laing paagi nga kini madiskubrihan.¹⁸ [Tan-awa sa sugyot 4 sa pahina 51.]

Si Joseph Smith andam nga mohatag sa iyang kinabuhi alang sa iyang pagpamatuod.

Sama sa sitwasyon sa mga propeta kinsa gitawag sa Ginoo kaniadto, daw mahinungdanon niini nga sitwasyon nga ang pagpamatuod sa Iyang sulugoon pagasilyohan sa dugo sa iyang kinabuhi. Wala nay lain pa nga [makapatandog] nga pahina ang makaplagan sa kasaysayan sa kalibutan kay sa nianang diin nakaukit ang katapusang mga panultihon sa atong minahal nga si Propeta Joseph Smith. Nasayud siya nga ang iyang oras nga mamatay hapit na moabut; iyang naamgohan nga ang misyon sa iyang kinabuhi natuman na. … Ug sa dihang ang oras miabut na nga kinahanglan na siyang moatubang sa kamatayon, siya miingon, “Ako moadto sama sa usa ka karnero ngadto sa ihawanan; apan ako malinawon ingon sa kabuntagon sa ting-init. Ako adunay tanlag nga walay sala ngadto sa Dios ug ngadto sa tanan nga mga tawo. Kon sila mohunos sa akong kinabuhi, ako mamatay nga walay sala, ug ang akong dugo mangamuyo gikan sa yuta alang sa usa ka panimalos, ug kini ikasulti pa mahitungod kanako, ‘Siya gituyo pagbuno sa walay kalooy.’” [Tan-awa sa D&P 135:4.]

Wala siya mahadlok nga mobarug sa atubangan sa hukmanan … ug manubag alang sa mga binuhatan nga gihimo diha sa mortal nga lawas. Wala siya mahadlok sa pag-atubang sa pasangil nga gihimo batok kaniya, nga siya milingla sa mga tawo ug midumala kanila sa dili makiangayon nga paagi. Wala siya mahadlok sa resulta sa misyon sa iyang kinabuhi, ug sa katapusan nga kadaugan sa buhat diin siya nasayud nga balaan ang gigikanan, ug diin siya mihatag sa iyang kinabuhi. Apan ang mga tawo sa kalibutan, sama kaniadto, mihukom niini nga buhat pinaagi sa espiritu sa tawo. Wala kanila ang Espiritu sa Dios, nga motabang kanila nga makasabut nga nagagikan kini sa atong Amahan sa langit.¹⁹

Kini nga batan-on sigurado gayud kaayo sa pagpadayag nga iyang nadawat, ug nagtinguha gayud nga ang mga anak sa iyang Amahan, silang tanan, kinahanglan nga masayud sa kamatuoran, nga gikan sa higayon nga iyang nadawat ang mga palid sa Basahon ni Mormon gikan sa anghel nga si Moroni iyang gigahin ang iyang tibuok nga kinabuhi sa pag-organisar sa Simbahan ug pagpakatap sa kamatuoran. … Adunay nagdilaab sa iyang kalag nga usa ka kahibalo sama sa anaa kang Esteban [tan-awa sa Mga Buhat 7:54–60], sama sa anaa sa Manunubos, nga ang atong Langitnong Amahan mao ang nagkontrolar sa tanang mga butang, nga mao kini ang iyang buhat nga anaa sa yuta, nga kini iyang gahum nga maoy mokontrolar sa katapusan, nga kining kinabuhia tinipik lamang sa kahangturan. Andam siya sa paghatag sa tipik sa iyang kinabuhi sa yuta, kon gikinahanglan, aron unta matagamtaman niya sa kahangturan ang pagpakig-uban nga tinuoray gayud niyang gihambin, ug ang pagpakig-uban sa maayo nga mga lalaki ug mga babaye kinsa mipuyo ug nagpuyo sa yuta, ug mopuyo pag-usab sa yuta kon kini mahimo nang celestial nga gingharian.²⁰

Si Joseph Smith mitudlo nga siya nasayud nga adunay kinabuhi human sa kamatayon, ug nga siya nasayud nga ang Dios buhi, ug nga ang Dios nasayud nga siya nasayud nga ang Dios buhi. Andam siya nga mohatag sa iyang kinabuhi aron nga kamo, akong mga kaigsoonan, ang inyong pagtuo unta malig-on ug ang inyong pagsalig kaniya dili unta matay-og. Nasayud siya sa katuyoan niini nga kinabuhi. Nasayud siya nga ania kita dinhi aron sa pagpangandam alang sa umaabut ug sa mas mahimayaon nga pagpuyo. Ug andam siya, kon gikinahanglan, nga ihatag ang iyang kaugalingong kinabuhi, dili lamang aron siya mawad-an niini, alang sa atong kaayohan, apan tungod kay siya nasayud nga ang Amahan nagaingon nga siya kinsa buot magpatunhay sa iyang kinabuhi mawagtangan hinoon niini, apan siya kinsa nga magawagtang sa iyang kinabuhi tungod Kaniya makakaplag niini, gani ang kinabuhing dayon [tan-awa sa Mateo 16:25]. Kini nga kahibalo ang nakapahimong posible alang sa Propeta ug [sa] Patriarch sa Simbahan [si Hyrum Smith] sa nag-unang mga panahon [sa pagbiya] sa mga minahal, aron mabilanggo, ug sa paghatag sa tanan nga sila aduna niining kalibutana, nga ang mga tawo makahatag alang sa ilang kaigsoonan—sa ilang mortal nga kinabuhi.²¹

Sa tuig 1830, ang Simbahan gi-organisar nga may unom ka mga miyembro. Ang kaaway sa tanang pagkamatarung gikan nianang adlawa hangtud karon naningkamot sa pagpahunong sa kalamboan niini ug sa paglaglag niini. Naghunahuna ko kon kanang bantugan nga tawo, si Joseph Smith, kinsa mihatag sa iyang kinabuhi aron ang Simbahan ma-organisar ug mapadayon sama sa gusto sa Ginoo, nakakita ba kaha sa Simbahan ingon nga kini anaa karon, nga ang mga branch na-establisar sa tanang bahin sa kalibutan, ug nahibalo ba kaha nga matag adlaw sukad nga siya gimartir, sukad sa iyang paghatag sa iyang kinabuhi ug misilyo sa iyang pagpamatuod sa iyang dugo, ang Simbahan mas nagkalig-on kay sa kaniadto.²² [Tan-awa sa sugyot 5 sa pahina 51.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Hunahunaa ang mga kasinatian nga gihulagway ni Presidente Smith diha sa unang tulo ka mga paragraph sa “Gikan sa Kinabuhi ni George Albert Smith” (mga pahina 39–40). Unsa nga mga kasinatian sa imong kinabuhi ang nakapalig-on sa imong pagpamatuod mahitungod kang Propeta Joseph Smith? Samtang ikaw nagbasa niini nga kapitulo, pangitaa ang mga pamahayag gikan sa mga pagtulun-an ni Presidente Smith nga nakapalig-on sa imong pagpamatuod, ug ikonsiderar ang pagpakigbahin niini ngadto sa mga sakop sa imong pamilya, korum sa priesthood, o sa Relief Society.
Ribyuha ang unang seksyon sa mga pagtulun-an (mga pahina 41–44) ug ribyuha ang kaugalingon nga asoy ni Joseph Smith mahitungod sa Unang Panan-awon (tan-awa sa Joseph Smith—Kasaysayan 1:10–19). Sa unsang paagi nga ang Unang Panan-awon nakaimpluwensya sa imong hugot nga pagtuo sa Dios? Sa unsang paagi nga ikaw nakakita niini nga nakaimpluwensya sa hugot nga pagtuo sa uban?
Tun-i ang seksyon nga nagsugod sa pahina 44 ug basaha ang Doktrina ug mga Pakigsaad 1:17–19. Unsa man ang atong makat-unan mahitungod sa pagserbisyo sa Simbahan gikan sa ehemplo ni Joseph Smith? Paghunahuna og usa ka higayon nga ikaw gihatagan og buluhaton gikan sa Ginoo ug mibati nga dili sarang. Giunsa man pagtabang sa Ginoo kanimo?
Unsa ang pipila ka mga kamatuoran nga gipadayag sa Ginoo pinaagi ni Joseph Smith? (Alang sa pipila ka mga ehemplo niini nga mga kamatuoran, tan-awa ang seksyon nga nagsugod sa pahina 46.) Sa unsang paagi nga ang imong kinabuhi napanalanginan tungod kay ikaw nasayud niini nga mga kamatuoran?
Samtang imong pamalandongan ang katapusang paragraph sa mga pagtulun-an (pahina 50), hunahunaa kon unsa ang imong mahimo aron sa pagtabang sa Simbahan nga padayon nga mahimong mas lig-on.

May Kalabutan nga mga Kasulatan: Isaias 29:13–14; 1 Mga Taga-Corinto 1:26–27; 2 Nephi 3:5–9, 11–15; Doktrina ug mga Pakigsaad 135

Tabang sa pagtudlo: “Sa pag-awhag og panaghisgut, gamita ang mga pangutana sa katapusan sa kapitulo. … Makahimo usab ikaw og imong kaugalingon nga mga pangutana ilabi na alang niadtong imong gitudloan. Pananglitan, makapangutana ka sa mga partisipante kon unsaon nila sa paggamit ang mga pagtulun-an ni Presidente Smith sa ilang mga responsibilidad isip mga ginikanan o isip mga home teacher o mga visiting teacher” (gikan sa pahina ix niini nga basahon).

Niadtong Disyembre 23, 1905, si George Albert Smith miapil uban sa laing mga lider sa Simbahan sa pagpahinungod sa usa ka monumento didto sa dapit nga natawhan ni Propeta Joseph Smith.

Ang Unang Panan-awon ni Joseph Smith “misugod og usa ka bag-ong panahon niini nga kalibutan, ug mipahimutang og pundasyon sa hugot nga pagtuo sa katawhan.”

“Ako mosulti ngadto sa tanang mga tawo bisan asa, susiha ang mga pagtulun-an sa Ebanghelyo sa atong Ginoo ingon sa gipadayag ngadto kang Propeta Joseph Smith, siksika kini sa mainampoong paagi.”