Kapitulo 6

Pagpaluyo Niadtong Kinsa Gipaluyohan sa Ginoo

Ang atong mga lider gipili sa Ginoo, ug Siya nagdahum kanato sa pagpaluyo kanila diha sa pulong ug sa buhat.

Gikan sa Kinabuhi ni George Albert Smith

Si George Albert Smith gipaluyohan isip Presidente sa Simbahan sa kinatibuk-ang komperensya pagka Oktubre 1945. Sa hapit na mahuman ang komperensya, si Presidente Smith mipadayag og pasalamat alang sa mapaluyuhong pagboto sa mga Santos: “Nagpasalamat ko kaninyo alang sa pagsalig nga gipakita, akong mga kaigsoonan, sa paglaum nga ako molampus, ug sa pagsaad sama sa gihimo sa pipila kaninyo, nga kamo motabang kanako nga molampus, tungod kay ako usa lamang ka tawo, usa sa pinakaubos diha kaninyo, apan gitawag ako ngadto niini nga serbisyo—ug wala unta ako dinhi kon wala pa ako masayud nga ako gitawag—pinaagi sa awtoridad sa atong Langitnong Amahan.”

Siya midugang dayon niini nga hangyo: “Magkinahanglan ko sa tabang sa matag lalaki ug matag babaye ug matag bata, dili alang sa akong panalangin, apan alang sa inyong panalangin, ug alang sa panalangin sa katawhan bisan asa man sila. Dili kana akong responsibilidad, kana atong responsibilidad.”¹

Sama sa gipakita sa mga pagtulun-an niini nga kapitulo, si George Albert Smith nakasabut sa kabug-at sa mga palas-anon nga gidala sa Unang Kapangulohan, bisan sa wala pa siya mahimong Presidente sa Simbahan. Mitudlo siya sa mga Santos nga ang ilang pagkamaunungon ug pagkamatinud-anon makatabang nga magaan kadto nga mga palas-anon, ug siya mipakita og ehemplo niini nga baruganan atol sa iyang pagserbisyo sa Korum sa Napulog Duha ka mga Apostoles.

Pagka 1946, samtang nag-conduct sa sesyon sa kinatibuk-ang komperensya, si Presidente Smith mipasiugda sa pagpaluyo sa mga opisyales sa Simbahan pinaagi sa pagpasabut nga kini mas labaw pa kay sa buhat sa pag-uyon: “Kita karon aduna nay usa ka han-ay sa kalihokan nga kanunay nga himoon niining mga Komperensya; kana mao, ang pagpresentar sa mga Authority sa Simbahan nga paluyohan pinaagi sa pagboto sa mga tawo. Manghinaut ko nga kamo mahibalo, kamong tanan, nga kini usa ka sagrado nga pribilehiyo. … Dili lamang kini usa ka simbolo apan kini usa ka pagpakita nga, uban sa tabang sa Ginoo, kamo molihok sa inyong bahin sa buhat.”² [Tan-awa sa sugyot 1 sa pahina 77.]

Mga Pagtulun-an ni George Albert Smith

Kadtong kinsa mangulo sa Simbahan giandam, gipili, ug gidasig sa Ginoo.

Kining dako nga Simbahan gipangulohan sa mga kalalakin-an kinsa espesyal nga giandam, espesyal nga gitudloan, espesyal nga gisangkapan alang nianang taas nga dungog nga gihatag sa matag usa ingon nga siya midawat sa iyang dapit. Ang atong Langitnong Amahan sa iyang kaalam mipalibut niining mga lider sa Israel og lain kinsa sama sa ilang kaugalingon adunay hugot nga pagtuo ug kinsa dili moyukbo ngadto sa indibidwal tungod sa iyang personalidad o pagkatawo isip presidente sa Simbahan, apan kinsa moila kaniya isip tigpama-ba sa atong Langitnong Amahan ug mopaluyo kaniya ug mosuporta kaniya ug mag-ampo alang kaniya, ug mohigugma kaniya, aron nga sila, usab, mahimong makadawat sa mga panalangin sa atong Langitnong Amahan.

Walay laing organisasyon nga sama niini dinhi sa kalibutan. Walay laing mga tawo [kinsa] gidumala ingon sa pagdumala niini nga mga tawo. Tinuod gayud kini nga pagkasulti nga kadtong kinsa nangulo mga matarung nga mga tawo. Pinaagi kini kanila nga ang atong Langitnong Amahan mopahigayon sa iyang buhat. Pinaagi kini kanila nga ang ebanghelyo kinahanglan gayud nga itudlo. … Ang tawo kinsa nangulo kanato karon wala magdumala tungod sa iyang nadak-an nga kaugalingong abilidad. Siya wala magdumala tungod kay siya anak nga lalaki sa usa ka bantugang lider, apan siya anaa sa posisyon nga iyang nahimutangan tungod kay ang atong Amahan sa langit nasayud sa kaligdong sa iyang kalag. Nahibalo sa determinasyon nga anaa kaniya sa pagdala niini nga mensahe ngadto sa tanang kanasuran sa yuta, siya miandam kaniya alang sa taas nga calling nga gihatag nganha kaniya. Siya nangulo isip usa ka representante sa atong Langitnong Amahan.³

Naghunahuna ko karon mahitungod sa mapaubsanon apan bantugan nga mga lalaki kinsa nangulo niini nga Simbahan gikan sa pag-organisar niini. … Nakaila kaayo ko sa [kadaghanan sa] mga Presidente [sa Simbahan] ug nagtuo nga silang tanan mga tawo sa Dios. Dili kini katuohan nga ang atong Langitnong Amahan mopili og lain pa nga matang aron mangulo sa iyang Simbahan.⁴

Unsay nahitabo sa dihang [si Joseph Smith] namatay? … [Ang mga Santos] wala magpahigayon og panagtigum, mopili og usa ka chairman ug mopili og bag-ong lider. Ang lider gipili na sa Ginoo. Siya mao ang senior nga sakop sa Korum sa Napulog Duha, si Brigham Young. … Ang Simbahan isip usa ka pundok sa tanan niini nga mga sesyon mipaluyo kaniya isip Presidente. Sa dihang siya namatay, ang iyang mga magtatambag wala moingon nga sila ang Presidente, apan ang Korum sa Napulog Duha ang nangulo sulod sa dugay nga panahon, ug dayon ang ilang senior nga sakop gipaluyohan isip Presidente sa Simbahan. Ang hingpit nga pagkahan-ay mipatigbabaw. …

Akong gisubay ang pipila niini nga mga butang aron nga walay mahimong sayop. Si Joseph Smith wala mopili sa iyang kaugalingon nga mahimong Presidente sa Simbahan. Ni ang bisan kinsa nga misunod kaniya. … Ang tawag nagagikan sa atong Langitnong Amahan pinaagi sa Iyang pagdasig, ug ang mga kalalakin-an makadawat sa tanan nga gahum nga moabut sa usa ka tawag.⁵

Pagkamapasalamaton gayud nato nga masayud nga kini nga buhat dili buhat sa tawo, apan kini buhat sa Ginoo; nga kini nga Simbahan, nga nagdala sa pangalan ni Jesukristo, gidumala kaniya, ug dili siya motugot sa tawo o grupo sa mga tawo sa paglaglag niini. Dili siya motugot sa mga kalalakin-an kinsa nangulo sa iyang Simbahan sa pagdala sa iyang mga tawo ngadto sa sayop, apan siya mopaluyo kanila uban sa iyang dakong gahum. Siya mopalambo kanila diha sa panan-aw sa maayo ug buotan nga mga lalaki ug mga babaye. Siya mopanalangin sa ilang pangalagad ug kini mapuno sa kalampusan. Kadtong kinsa mosupak ug mangita og sayop dili makakaplag og kalipay sa ilang pagsupak. Kadtong kinsa mosaway ug magtinguha sa paglaglag sa impluwensya sa mga lider sa Simbahan mag-antus sa resulta sa ilang sayop nga binuhatan.⁶

Kinahanglan kita nga magbaton og pasalamat sa atong mga kasingkasing nga kita gidumala sa balaan nga kalalakin-an kinsa dinasig sa atong Amahan sa langit sa pagtudlo kanato matag adlaw.⁷ [Tan-awa sa sugyot 2 sa pahina 77.]

Pinaagi sa Iyang mga sulugoon, ang Ginoo nagtudlo kanato sa dalan sa kalipay ug kaluwasan.

Sukad pa sa panahon sa Amahan nga si Adan hangtud karon ang Ginoo mipahimangno sa mga tawo pinaagi sa iyang mga sulugoon. Siya midasig kanila og mas maayo nga pagpuyo kon sila maminaw kaniya, ug sa matag kapanahonan, kon gikinahanglan sa iyang mga anak, siya mipadala og balaan nga mga tawo nganhi sa kalibutan, aron sa paghatag sa panudlo nga maghatag og kalipay, midasig kanila sa pagtudlo sa mahimayaon nga mga kamatuoran nga makapahalangdon ug makapalambo sa katawhan.⁸

Ako walay nahibaloan nga butang nga adunay dakong importansya nga nahitabo sa kalibutan nga ang Ginoo pinaagi sa iyang mga propeta wala motambag daan sa mga tawo, aron dili sila magpabilin diha sa pagka-ignorante sa unsay mahitabo, kondili makaplano sa ilang kinabuhi, kon ilang gustohon, alang sa ilang kaayohan. …

Ang sitwasyon ni Noe pananglitan. Gimandoan siya sa Ginoo sa pagbuhat og usa ka arka diin ang mga matarung maluwas unta sa lunop nga moabut. Si Noe mibuhat og arka ug misangyaw og paghinulsol ngadto sa iyang henerasyon sulod sa usa ka gatus ug baynte ka tuig, sa ingon hingpit sila nga mapasidan-an. Ang mga tawo, hinoon, hilabihan ang kadautan nga napakyas sila sa pagpatalinghug sa pasidaan. Kay sila adunay kabubut-on, gipili nila ang dautan kay sa pagkamatarung. Mibundak ang ulan, ug ang lunop miabut, ug si Noe lamang ug ang iyang pamilya nga may walo ka mga sakop mao ang naluwas. Ang tanan hingpit nga napasidan-an, apan tungod sa ilang pagkasupakan ug sa ilang pagbalibad sa paghinulsol sila nangalumos. [Tan-awa sa Moises 8:13–30.]⁹

Ang Ginoo gusto nga kita magmalipayon. Mao nga siya mihatag kanato sa ebanghelyo ni Jesukristo. Mao nga iyang gihatag ang priesthood ngari kanato. Siya gusto nga kita makabaton og hingpit nga kalipay. Mao nga iyang gi-organisar kini nga simbahan ug gipahimutang niini ang nagkalainlaing mga katungdanan, ug kini nga mga butang anaa sa kahan-ay. … Kon kamo mosunod sa pagpangulo sa Ginoo, ug niadtong kinsa gipaluyohan sa Ginoo, dili kamo mangawala ngadto sa kangitngit, mawad-an sa kahayag, makalapas sa mga balaod sa Dios, ug mawagtang ang inyong mga pribilehiyo nga siya hilabihan nga nagtinguha nga kitang tanan kinahanglang makatagamtam.¹⁰

Adunay usa lamang ka dalan nga luwas alang kanako niining panahona ug mao kana ang pagsunod niadtong kinsa gitawag sa Ginoo aron mangulo. Ako mahimong adunay akong kaugalingon nga mga ideya ug mga opinyon, ako mahimong mopahimutang sa akong kaugalingong paghukom kalabut sa mga butang, apan nasayud ko nga kon ang akong paghukom sukwahi sa mga pagtulun-an niadtong gihatag sa Ginoo kanato nga motudlo sa dalan, kinahanglan nakong usbon ang akong padulngan. Kon nagtinguha ko og kaluwasan mosunod ko sa mga lider nga gihatag sa atong Langitnong Amahan kanato, hangtud nga siya nagpaluyo pa kanila.¹¹ [Tan-awa sa sugyot 3 sa pahina 77.]

Kadtong kinsa mapaubsanon ug matinud-anon mopaluyo ug manalipod sa mga sulugoon sa Ginoo.

Nakaila ko og liboan ka mga miyembro niining dako nga Simbahan, mga lalaki ug mga babaye sa daghang kanasuran kinsa diha sa kamapaubsanon ug kamatinud-anon midawat sa ebanghelyo aron mahilakip sa Simbahan ni Jesukristo sa mga Santos sa Ulahing mga Adlaw. … [Sila] nag-ampo ug nagpaluyo sa ilang mga lider … , ug sa panahon sa akong kasinatian sa Simbahan wala pa koy nailhan nga usa ka tawo kinsa nagsunod sa mga sugo sa Ginoo kinsa mipataas sa iyang tingog batok niadtong kinsa gitawag sa pagpangulo niini nga Simbahan. Talagsaon gayud kana. …

Usa sa labing mahinungdanong mga pagpamatuod alang kanako mahitungod sa kabalaan niini nga buhat mao nga ang hugpong sa katawhan … nga adunay oportunidad diha sa Komperensya sa Stake … sa pagpahayag sa ilang kaugalingon pinaagi man sa pagboto sa pagpaluyo o sa pagbalibad sa pagpaluyo niadtong kinsa mangulo kanila (matag usa naggamit sa kagawasan sa pagpili) nagpadayon sa pagsuporta sa ilang mga lider. Sigurado gayud nga ang Espiritu sa Ginoo nag-aghat sa mga matinud-anon, mapaubsanon nga mga tawo sa pagpaluyo sa iyang pinili nga mga sulugoon.¹²

Sa dihang si Moises midala sa Israel gikan sa Ehipto agi sa kamingawan ug ngadto sa gisaad nga yuta, si Amalek miataki sa Israel didto sa Rephidim. Si Moises mimando kang Josue sa pagpili og mga tawo nga manggugubat aron panalipdan ang Israel. Sila si Moises, Aaron, ug Hur miadto sa kinatumyan sa usa ka bungtod nga naglantaw sa natad sa panggubatan. Samtang si Moises mipataas sa sungkod sa Dios ibabaw sa iyang ulo, ang Israel midaug, apan kon iyang ipaubos ang iyang mga kamot tungod sa kakapoy, si Amalek midaug. Usa ka lingkuranan nga bato ang gihatag ug sila si Aaron ug Hur mipataas sa iyang mga kamot aron ang mga panalangin sa Dios makadagayday ngadto sa Israel nga ang ilang mga manggugubat makadaug ug ang gubat nadaug. Ang gahum sa Dios anaa kang Moises ug nagpabilin kaniya hangtud nga siya nakahuman sa iyang buluhaton. [Tan-awa sa Exodo 17:8–13.] Sa dihang siya adunay suporta sa mga tawo sila usab napanalanginan, ug ingon usab niana sa matag sulugoon sa Ginoo kinsa nangulo sa Israel. …

… Hangtud nga [ang Presidente] mangulo pa niini nga Simbahan, dili igsapayan kon pila pa kini ka tuig, ang atong Langitnong Amahan mohatag kaniya og kalig-on, gahum, kaalam, paghukom, ug inspirasyon sa pagsulti ngadto sa Israel ingon nga sila kinahanglan nga sultihan. Kita, sa pagsunod sa iyang pagpangulo, kinahanglan gayud nga mahisama nila ni Aaron ug Hur sa karaang panahon; kinahanglang atong ipataas ang iyang mga kamot, nga pinaagi kaniya ang Ginoo motugot sa mga panalangin sa langit nga manaog ngari kanato ug niini nga mga tawo.¹³

Ako nasayud nga kining mga tawhana [ang mga General Authority] mga sulugoon sa Ginoo, ug ako nasayud nga sila nagtinguha sa pagpanalangin sa katawhan. Manghinaut ko nga walay bisan kinsa kaninyo … ang mapakyas sa pagpaluyo kanila, dili lamang pinaagi sa inyong hugot nga pagtuo ug mga pag-ampo apan kon adunay mosulti og bakak batok kanila ug mosulti og bakak batok sa ilang kinaiya, nga kamo unta andam ug matinguhaon sa pagpanalipod kanila, kon gikinahanglan, tungod kay adunay panahon nga moabut nga sila magkinahanglan sa inyong pagpanalipod. Ang Yawa wala makalimot kanila, ug ang usa sa mga ebidensya alang kanako sa kabalaan sa calling niining mga tawhana mao nga ang dautan nga mga tawo mosulti og dautan mahitungod kanila, ug ang maayo nga mga lalaki ug maayo nga mga babaye mosulti og maayo mahitungod kanila.¹⁴ [Tan-awa sa sugyot 4 sa pahina 77.]

Kon kita mosaway sa atong mga lider o mobaliwala sa ilang tambag, kita nagtugot sa yawa nga mopahisalaag kanato.

Adunay mga tawo taliwala kanato … kinsa nabutaan sa mga pilosopiya ug kabuang sa mga tawo. Adunay mga tawo kinsa mibaliwala sa tambag sa tawo nga gibutang sa Dios aron mangulo niini nga Simbahan. …

Ang mga tawo nga wala kaayoy daghan og impormasyon kalit lang nga moabut nga may maayong ideya, ug sila mosugyot nga “mao kini ang paagi” o “mao kana ang paagi,” ug bisan tuod nga kini sukwahi sa tambag sa Ginoo ang uban naagni sa pagsulay niini. Ang Ginoo mihatag og luwas nga tambag ug mitudlo sa Presidente niini nga Simbahan sa paghubad niana nga tambag. Kon atong ibaliwala ang unsay iyang itambag, isip Presidente sa Simbahan, mahimong atong madiskobrehan nga nakahimo kita og grabe nga sayop.¹⁵

Ang Kapangulohan sa Simbahan … mao ang mga representante sa atong Langitnong Amahan, dili lamang ngadto niini nga katawhan, apan sila nagrepresentar kaniya ngadto sa tanang katawhan sa yuta. Makahimo kita og maayo kon kita mopalambo ug motahud niini nga mga tawo nga iyang gibutang aron mangulo kanato. Sila mga tawo nga adunay tawhanong mga kahuyang, sila makahimo og mga sayop, apan kon kita mahimong ingon ka masinabtunon sa mga sayop nga ilang mahimo sama sa atong kaugalingong mga kapakyasan ug mga sayop, atong makita ang ilang mga hiyas sama sa atong pagkakita niini sa atong kaugalingon.

Nagbarug ako dinhi aron mangaliyupo kaninyo, akong mga kaigsoonan, nga dili motugot sa mga pulong sa pagpanaway o sa pagkadili mabination nga mogawas sa inyong mga ngabil kalabut niadtong kinsa gitawag sa Ginoo aron mangulo kanato. Ayaw pagpakig-uban niadtong kinsa mopakaubos kanila o mopahuyang sa ilang impluwensya diha sa katawhan. Kon inyong buhaton, ako magaingon kaninyo nga inyong makaplagan ang inyong mga kaugalingon diha sa gahum sa kaaway. Kamo maimpluwensyahan kaniya sa pagpahilayo kutob sa mahimo gikan sa dalan sa kamatuoran, ug kon kamo dili maghinulsol mahimo ninyong mabantayan nga ulahi na kaayo nga nawala kaninyo ang “perlas nga labing bililhon.” Tungod sa inyong pagkahakog ug sa inyong pagkabuta nahisalaag kamo, ug ang inyong mga minahal sa kinabuhi … magmasulub-on sa laing kalibutan tungod sa inyong kahuyang ug sa inyong sayop.¹⁶ [Tan-awa sa sugyot 5 sa pahina 78.]

Ang kaaway wala matulog. Naglingla siya sa daghan ug nagdala kanila ngadto sa pagpakasala. … Adunay uban nga nagtudlo og sayop nga doktrina; ug ang uban nagtinguha sa pagdani sa kalalakin-an ug kababayen-an sa pagsupak sa mga sugo sa atong Langitnong Amahan. … Kon ang mga miyembro niini nga Simbahan mangita og sayop sa mga lider sa Simbahan ug mosaway niadtong kinsa naghatag sa ila mismong mga kinabuhi sa pagpanalangin ug paghatag og kaayohan kanato mohunong og igong gidugayon aron mangutana sa mainampoong paagi, “Hain niining mga magtutudlo ang luwas nga sundon?” sila dili magkalisud sa pagpangita sa ilang husto nga padulngan ug mopaluyo niadtong kinsa gipaluyohan sa Ginoo.¹⁷

Kon kita mopaluyo sa atong mga lider, kita mopasalig sa pagsunod sa ilang tambag ug mopalambo sa atong kaugalingong mga calling.

Kini usa gayud ka tinubdan sa kalig-on sa Presidente niini nga Simbahan nga motan-aw sa mga panagway sa liboan ka matinuoron nga kalalakin-an ug kababayen-an ug mag-obserbar kanila nga mopataas sa ilang kamot sa pagpakigsaad uban sa atong Amahan sa langit, ug mopaluyo kaniya sa katungdanan diin siya gitawag isip presidente niining dako nga Simbahan. Ang obligasyon nga atong gihimo sa dihang atong gipataas ang atong mga kamot ubos sa ingon nga mga kahimtang, usa gayud ka sagrado nga butang. Kini wala magpasabut nga magpakahilum lang kita ug mosanong lang nga ang propeta sa Ginoo mao ang mangulo niini nga buhat, apan kini nangahulugan,—kon ako nakasabut sa obligasyon nga akong gidawat sa dihang mipataas ko sa akong kamot—nga kita mobarug sa iyang kiliran; kita mag-ampo alang kaniya; kita manalipod sa iyang maayong pangalan, ug kita maningkamot sa pagtuman sa iyang mga panudlo ingon nga ang Ginoo momando kaniya nga ihatag kini kanato samtang anaa pa siya niana nga posisyon.¹⁸

Kon maghunahuna ko sa mga palas-anon nga gidala sa Presidente niini nga Simbahan ug sa iyang mga magtatambag, ug maamgohan ang mga responsibilidad nga gibutang sa ilang mga abaga, sa tibuok nakong kasingkasing ako magtinguha sa pagtabang kanila, nga ako dili mahimong pabug-at, apan niana nga posisyon diin ako gitawag, uban kaninyo, akong mga kaigsoonan, kita mahimong mobarug sa atong nahimutangan ug mopas-an sa atong bahin sa palas-anon ug mopalambo sa atong calling alang sa dungog ug himaya sa Dios.¹⁹ [Tan-awa sa sugyot 4 sa pahina 77.]

Ang Dios nagtugot nga kita kinsa gipanalanginan sa hilabihan ka abunda unta mopataas sa mga kamot sa sulugoon sa Ginoo kinsa nangulo kanato; nga kita unta motabang kaniya dili lamang pinaagi sa atong hugot nga pagtuo ug mga pag-ampo apan pinaagi sa atong mahigugmaong pagkamabination kon itanyag sa kahigayunan; nga kita unta magmartsa ubos sa bandila nga iyang gigunitan samtang ang Dios nagpadayon sa pagpaluyo kaniya isip Presidente sa Simbahan, isip propeta sa Ginoo niining ulahing mga adlaw.²⁰

Atong paluyohan kining mga tawhana kinsa gitawag sa Dios nga mangulo kanato. Panalanginan nato sila, dili lamang pinaagi sa atong mga ngabil, kondili pinaagi sa pagtabang kutob sa mahimo sa pagpas-an niining palas-anon nga bug-at kaayong nahimutang sa ilang mga abaga. … I-ampo ug panalangini sila ug tabangi sila.²¹

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Basaha ang katapusang paragraph sa “Gikan sa Kinabuhi ni George Albert Smith” (pahina 68). Unsa man ang “imong bahin sa buhat”? Samtang ikaw nagtuon niini nga kapitulo, paghunahuna og mga paagi nga ikaw makapakita pinaagi sa imong mga pulong ug mga buhat nga ikaw nagpaluyo sa mga lider sa Simbahan.
Ribyuha ang unang seksyon sa mga pagtulun-an (mga pahina 68–70), ilabi na ang ikaduha ug ikaupat nga mga paragraph. Sa unsang paagi nga ang pamaagi sa Ginoo sa pagpili og mga lider lahi sa pamaagi sa kalibutan? Unsa ang mga kasinatian nga imong nasinati nga nakapalig-on sa imong pagtuo nga ang atong mga lider pinili sa Ginoo?
Tun-i ang seksyon nga nagsugod sa pahina 70 ug basaha ang Doktrina ug mga Pakigsaad 21:4–7. Unsa ang piho nga tambag nga gihatag sa Ginoo pinaagi sa Presidente sa Simbahan karon? pinaagi sa imong presidente sa stake o district? pinaagi sa imong bishop o presidente sa branch? Unsa nga mga panalangin ang imong nadawat samtang imong gisunod kini nga tambag?
Ribyuha ang seksyon nga nagsugod sa pahina 71 ug basaha ang unang duha ka tibuok nga mga paragraph sa pahina 76. Unsa man ang kahulugan niini kanimo nga mopaluyo sa mga lider sa Simbahan? Sa unsang paagi nga ang pagpaluyo sa mga lider sa Simbahan nakapalig-on sa atong mga pamilya ug mga panimalay?
Basaha ang katapusang tibuok nga paragraph sa pahina 74. Nganong makuyaw man ang pagsaway sa mga lider sa Simbahan? Unsa ang tukma nga paagi sa pagtubag kon ang usa ka tawo mosulti og sayop sa usa sa imong lokal nga mga lider?

May Kalabutan nga mga Kasulatan: Amos 3:7; Mga Taga-Efeso 4:11–14; Mga Hebreohanon 5:4; Doktrina ug mga Pakigsaad 84:109–10; 107:22; 112:20

Tabang sa pagtudlo: Usa ka paagi sa pag-awhag og makugihon nga pagkat-on mao ang pagpaminaw og maayo kon ang usa ka tawo mangutana o mokomentaryo. “Ang pagpaminaw usa ka pagpakita sa gugma. Sa kasagaran nagkinahanglan kini og sakripisyo. Kon tinud-anay kitang maminaw sa uban, kasagaran dili kita mosulti sa atong gustong isulti aron sila makapadayag sa ilang mga kaugalingon” (Pagtudlo, Walay Labaw ka Mahinungdanon nga Tawag, 66).

“Ako usa lamang ka tawo, usa sa pinakaubos diha kaninyo, apan gitawag ako ngadto niini nga serbisyo … pinaagi sa awtoridad sa atong Langitnong Amahan.”

“Kita … kinahanglan gayud nga mahisama nila ni Aaron ug Hur sa karaang panahon; kinahanglang atong ipataas ang mga kamot [sa propeta].”

Kita nagpaluyo sa atong mga lider kon kita “mopas-an sa atong bahin sa palas-anon ug mopalambo sa atong calling alang sa dungog ug himaya sa Dios.”