Kapitulo 17

Ang Makapalig-on nga Gahum sa Hugot nga Pagtuo

Ang hugot nga pagtuo usa ka gasa gikan sa Ginoo diin ang mga matarung pagahatagan og gahum sa paghimo og talagsaon nga mga butang.

Gikan sa Kinabuhi ni George Albert Smith

Niadtong 1919 si George Albert Smith, nga nianang higayuna usa ka sakop sa Korum sa Napulog Duha ka mga Apostoles, gitawag isip presidente sa European Mission. Sa usa ka mensahe ngadto sa lokal nga mga Santos wala madugay human sa iyang pag-abut, si Presidente Smith nahinumdom sa lisud nga mga kahimtang didto sa Europe, nga padayon pa gihapon sa pagpahimutang og balik gikan sa mga kadaut sa Unang Gubat sa Kalibutan: “Akong naamgohan nga kita nagpuyo sa usa ka importante nga panahon sa kasaysayan sa kalibutan. Uban sa bag-o, makuyaw nga mga kahimtang nga giatubang sa kanasuran, ug ang diwa sa kagubot nagpasulabi sa hapit bisan asang dapit, taliwala sa mga tawo, busa, ako, mibati og dakong responsibilidad nga kinahanglan ko nga makighimamat kanila, ug labing nagtinguha sa balaan nga giya sa pagtuman sa akong mga katungdanan.” Si Presidente Smith adunay hugot nga pagtuo nga bisan pa man sa kalisud sa mga panahon nga ilang giatubang, ang mga paningkamot sa mga miyembro ug mga misyonaryo gantihan og kalampusan: “Gitabangan sa mga maayo, makahimo nga mga kauban sa headquarter sa [misyon], ug sa matinud-anon nga mga lalaki ug mga babaye sa natad sa misyon, nagtan-aw ko uban sa maanindot nga pagpaabut alang sa mabungahon nga pag-ani sa matinuoron nga mga kalag.”¹

Usa sa labing mahinungdanon nga mga katungdanan ni Presidente Smith isip presidente sa misyon mao ang pagdugang sa gidaghanon sa mga misyonaryo sa Europe. Ang Simbahan mipadala og diyutay ra kaayo nga mga misyonaryo ngadto sa Europe atol sa gubat, ug karon ang kakulang sa mga pagkaon ug uban pa nga mga problema sa ekonomiya ang nakapahimo sa mga opisyales sa gobyerno sa Europe nga dili andam nga mohatag og mga visa sa mga langyaw. Ang lisud nga buluhaton ni Presidente Smith mao ang pag-agni niini nga mga opisyales nga tugutan ang mga misyonaryo ngadto sa ilang mga nasud. Diha sa usa ka sulat ngadto sa iyang anak nga babaye nga si Emily, si Presidente Smith misaysay kabahin sa usa ka biyahe ngadto sa London alang niini nga katuyoan.

“Ang atong Amerikanong Ambasador buotan kaayo ug milampus sa paggahin og interbyu alang kanamo uban ni Sir Robert Horne, ang Minister of Labour sa Great Britain. Sa dihang among gipresentar ang among kaugalingon didto sa iyang opisina, among gihatag ang among sulat gikan sa Ambasador ngadto sa sekretarya ni Sir Robert, kinsa nangutana kanamo kon ang among tuyo mahimo ba nga unya na lang tungod kay ang iyang amo mobiyahe sa pipila na lamang ka minuto paingon ngadto sa Scotland nga moadto didto sulod sa tulo ka semana. Gipaniguro nako niya nga dako kaayo ang among kalipay kon hatagan og lima ka minuto sa iyang oras karon tungod kay wala kami magpuyo sa London ug ang among tuyo importante kaayo. Ang sekretarya misulod ngadto ni Sir Robert ug wala madugay mibalik nga nagpahibalo nga iya na lang i-uswag ang iyang biyahe ug makigkita kanamo inig alas kwatro nianang adlawa. Nag-ampo ko og maayo nianang pagkabuntag nga ang among dalan unta ablihan ug sa dihang gidapit kami nga pabalikon gibati nako ang labing kamapasalamaton ngadto sa atong Langitnong Amahan.”

Sa gitakda nga oras, si Presidente Smith ug ang iyang mga kauban gidapit sa pagsulod ngadto sa pribado nga opisina ni Sir Robert Horne. “Naningkamot kami sa pagsulti kaniya kon unsa ang among gikinahanglan ug mipaniguro kaniya nga ang Great Britain nagkinahanglan sa unsay among gihangyo. Sulod sa hapit usa ka oras ug tunga interesado kaayo siya nga naminaw sa bahin sa kasaysayan sa Simbahan ug sa atong pagtuo, ubp.

“Sa dihang nahuman na ko nangutana siya pag-usab kon unsay tuyo namo niya ug sa dihang kami misulti kaniya nga kami nagkinahanglan og pribilehiyo sa pagdugang sa pwersa sa among mga misyonaryo ngadto sa dosyentos singkwenta, sama sa wala pa ang gubat, siya miingon nga iyang kalipay nga mohatag og mga instruksyon sa iyang departamento aron sa pagtugot niana nga gidaghanon nga makasulod sa nasud inig abut gayud nila. Siyempre kami nalipay kaayo ug mibiya kaniya uban sa kasiguroan nga iyang gikuha ang usa ka palas-anon gikan sa among mga hunahuna.

“Gibati nako ang kasigurado nga among nahigala ang usa sa labing gamhanan nga mga tawo sa England ug dili ko magduhaduha sa pagduol kaniya bisan unsang orasa kon gikinahanglan.”²

Si James Gunn McKay, usa sa mga misyonaryo ni Presidente Smith nga anaa didto sa pagpakigkita ni Sir Robert Horne, sa kaulahian miingon: “Tan-awa ang talagsaon nga buhat nga iyang nahimo. Adunay pipila lamang ka mga elder ang anaa didto [sa misyon]. Ang dalan daw gibabagan, ug sa bisan paman miabut siya nga puno sa inspirasyon sa Ginoo, ug nakahimo sa pagpanuktok sa mga pultahan sa mga opisyales, aron maangkon ang ilang pagsalig; ug sa katapusan naangkon namo ang mga pribilehiyo nga among gipangita, nga ang mga elder moabut aron sa pagsugod sa ilang buhat ug sa pagtuman sa ilang mga misyon nga ipadayon ang katuyoan sa Dios ug tumanon ang iyang buhat, ug niana nga paagi siya mao ang nakahimo nga kami makabaton og pagpamatuod nga ang Dios mao ang nangulo niana nga buhat.”³ Si Elder McKay miila sa kalampusan ni Presidente Smith tungod sa iyang “hugot nga pagtuo ug debosyon ug gugmang putli ngadto sa tanan nga iyang nahimamat.” “Nagtrabaho ko uban kaniya,” miingon siya. “Nakigtambag ako kaniya; nag-ampo ako uban kaniya, ug ako nasayud nga ang iyang hugot nga pagtuo ug pagkamaunungon ingon ka lawom sama sa kinabuhi mismo.”⁴ [Tan-awa sa sugyot 1 sa pahina 222.]

Mga Pagtulun-an ni George Albert Smith

Ang gahum sa hugot nga pagtuo makita diha sa mga kasulatan.

Kita gipahibalo nga kon walay hugot nga pagtuo kita dili makapahimuot sa Dios [tan-awa sa Mga Hebreohanon 11:6]. Kini mao ang makapadasig nga hinungdan sa tanang lihok, ug ang Kasulatan puno sa mga ebidensya sa gahum sa hugot nga pagtuo. Tungod kadto sa hugot nga pagtuo ni Noe nga nakapahimo kaniya sa pagbuhat og arka, ug isip resulta sa pagkamasulundon sa mga sugo sa Dios siya ug ang iyang panimalay naluwas, samtang kadtong kinsa kulangan og hugot nga pagtuo nalumos sa dakong lunop [tan-awa sa Genesis 6:13–22; 7:1–24].

Pinaagi kadto sa hugot nga pagtuo nga si Lot ug ang mga sakop sa iyang pamilya naluwas sa dihang ang kalayo gikan sa langit misunog sa mga siyudad sa Sodoma ug Gomorra, ug milaglag sa mga lumulupyo kinsa walay hugot nga pagtuo [tan-awa sa Genesis 19:12–25].⁵

Pinaagi sa hugot nga pagtuo si Moises nangulo sa mga anak sa Israel gikan sa pagkaulipon, mitabok sa Pulang dagat ingon nga nauga nga yuta, nga, ang naggukod nga mga panon sa mga Ehiptohanon nga misulay sa paghimo, nangalumos. Ang pundok sa mga tawo gipakaon og tinapay gikan sa langit. Sa dihang si Moises mitugsok sa bato sa Horeb, ang tubig miagas sa pagtagbaw sa ilang kauhaw; ug, mitadlas agi sa kamingawan, sila gigiyahan ngadto sa gisaad nga yuta. [Tan-awa sa Exodo 14:21–31; 16:14–15; 17:5–6.]⁶

Sa dihang si Daniel mipadayon sa dayag nga pag-ampo ngadto sa Dios sa Israel, nga sukwahi sa balaod nga tinuyong gihimo sa iyang mga kaaway aron sa paglaglag kaniya, gilabay siya ngadto sa langub sa mga leon ug gibiyaan didto sa tibuok gabii. Nasayud siya nga ang iyang Langitnong Amahan makaluwas kaniya ug ang iyang pagsalig dili matarug. Pagkasunod buntag ang hari miadto og sayo sa langub ug nakita si Daniel nga buhi. Ang iyang hugot nga pagtuo ang nakapakalma sa ihalas nga hayop ug naangkon niya ang pagsalig sa hari. [Tan-awa sa Daniel 6:4–28.]

Ang tulo ka mga Hebreohanon, sila si Sadrach, Mesach, ug Abed-nego, kinsa mibalibad sa pagsimba sa larawan nga bulawan nga gipahimo ni Nabucodonosor, gihulog ngadto sa nagdilaab nga hudno nga gipainit sa pito ka pilo labaw sa naandan nga kainit. Misalig sila sa buhi nga Dios ug ang ilang hugot nga pagtuo gigantihan og kaluwasan sa ilang kinabuhi. [Tan-awa sa Daniel 3:8–28.]

Pinaagi sa hugot nga pagtuo, si Propeta Elias [Elijah] mipakanaog sa kalayo gikan sa langit aron sunugon ang iyang halad, ug ang hari ug ang mga tawo nakumbinsir nga ang Dios sa Israel mao ang Dios ug dili si Baal [tan-awa sa 1 Mga Hari 18:36–40].

Pinaagi kadto sa hugot nga pagtuo nga ang igsoon nga lalaki ni Jared ug ang iyang mga sumusunod napabilin ang pinulongan sa ilang mga amahan sa panahon nga ang mga sinultihan didto sa Tore sa Babel gilibog, ug gidala ngadto sa Kasadpang Bahin sa Kalibutan [tan-awa sa Ether 1:33–43]. … Kadtong sama nga hugot nga pagtuo ang nakahimo ni Lehi sa pagdala sa iyang pamilya tabok sa dagat ug nakapatunob sa ilang mga tiil niini nga yuta, pinili nga labaw pa sa uban nga mga yuta.

Tungod kadto sa hugot nga pagtuo nga nakahimo sa mga disipulo ni Jesus sa paglahutay sa pagpanglutos kanila, ug bisan pa sa pagsupak sa mga Judeo, aron maestablisar ang ebanghelyo nga gihatag sa Manluluwas ngadto kanila.⁷

Pinaagi kadto sa hugot nga pagtuo nga ang tanang mga milagro nahinabo pinaagi sa Manunubos sa kalibutan, ug pinaagi niadtong kinsa Iyang nakauban. Gikan sa sinugdanan sa panahon hangtud karon ang matinud-anon nga tawo lamang ang aduna sa gahum sa Dios.⁸ [Tan-awa sa sugyot 2 sa pahina 222.]

Ang gahum sa hugot nga pagtuo makita diha sa kinabuhi sa matarung nga mga Santos niini nga dispensasyon.

Niining ulahi nga dispensasyon tungod kadto sa iyang dili matukib nga hugot nga pagtuo sa Dios nga ang batang lalaki nga propeta [si Joseph Smith] miadto sa kakahoyan ug miluhod ug nag-ampo, ug nadawat ang labing una nga mahinungdanong langitnong pagpakita nga miabut kaniya, diin ang kinaiyahan sa Dios nga Kapangulohan nasayran pag-usab sa katawhan. Pinaagi kadto sa hugot nga pagtuo nga siya nakahimo sa pag-adto sa bungtod sa Cumorah ug nadawat gikan sa mga kamot sa anghel kadtong sagrado nga mga rekord nga sa wala madugay iyang gihubad pinaagi sa gasa ug gahum sa Dios. Pinaagi kadto sa hugot nga pagtuo nga siya nangulo sa iyang katawhan gikan sa Kirtland ngadto sa yuta sa Missouri ug balik ngadto sa Illinois, ug bisan kon balik-balik nga gikawatan ug gipalayas gikan sa ilang mga panimalay, ang hugot nga pagtuo nga nakatisok sa ilang mga kasingkasing nagpabilin kanila, ug sila nasayud nga ang Ginoo mahunahunaon kanila. Pinaagi kadto sa hugot nga pagtuo nga ang dakong siyudad sa Nauvoo natukod, ubos sa mando ni Propeta Joseph Smith; ug pinaagi sa hugot nga pagtuo nga ang mahimayaon nga mga kamatuoran nga anaa sa Doktrina ug mga Pakigsaad iyang nadawat.

Pinaagi kadto sa hugot nga pagtuo nga si Brigham Young nangulo sa mga tawo dinhi niining habagatan nga yuta [ang Salt Lake Valley]; ug, sa iyang pag-abut sa kinatumyan sa bukid ug naglantaw sa walog, ang Dios mihatag kaniya og usa ka pagsaksi nga kini mao ang dapit diin ang Israel ipahimutang. … Pinaagi kadto sa hugot nga pagtuo nga ang mga tawo mipahimutang sa tukuran nga bato niining maanindot nga Templo [ang Templo sa Salt Lake], diha sa ilang kahuyang ug sa ilang kakabus, nagtuo nga ang Dios moandam og paagi ug mohatag og mga pamaagi nga ang istraktura mahuman. Pinaagi kadto sa hugot nga pagtuo nga ang kalooy sa atong Langitnong Amahan midangat ngadto sa mga tawo, nga, diha sa ilang kasakit, ilang nakita ang ilang mga tanom nga gikaon sa mga dulon, nga walay paagi sa pagsugpo niini, ug, sa balaang pagpanginlabut sa Dios, ang ilang mga pag-ampo nadungog, ug nakadawat sila og pagsaksi kabahin niini sa pag-abut sa mga kanaway aron sa pagpanalipod sa ilang anihonon ug sa pagluwas kanila gikan sa kagutom. …

… Pinaagi kadto sa hugot nga pagtuo nga ang mga kalalakin-an kinsa nangulo niini nga buhat gidasig, sa matag karon ug unya, sa paghatag og mga panudlo nga atong gikinahanglan. Pinaagi kini sa hugot nga pagtuo nga kita nahatagan og kaayohan … pinaagi niadtong kinsa nangalagad sa pangalan sa Ginoo, ug ang Maghuhupay nagdugang sa ilang salabutan, nagpahinumdom sa mga butang nga nangagi ug nagpakita kanila sa mga butang nga moabut; sa ingon nagpakita sa diwa sa pagpadayag.⁹

Pinaagi kadto sa hugot nga pagtuo nga ang mga elder sa Israel milakaw, mibiya sa panimalay ug sa mga minahal, ug milahutay sa pagsaway sa kalibutan, aron mosaksi nga ang Dios buhi ug nga si Jesus mao ang Kristo, ug nga si Joseph Smith usa ka propeta sa Ginoo. Pinaagi sa hugot nga pagtuo ang inyong masakiton naayo, ang inyong mga patay nabuhi og balik. Kon anaa ang mga rekord nga naghulagway sa mga milagro nga nahinabo taliwala niini nga katawhan … , kini usa ka pagpamatuod sa gahum sa Dios, pinaagi sa hugot nga pagtuo, nga dili hitupngan sa bisan unsa nga panahon sa kalibutan.

Mao kini nga baruganan, akong mga kaigsoonan, nga nagpunting kanato paingon sa langit, nga naghatag kanato og paglaum diha sa gubat sa kinabuhi. Kon kita maglibog, ug makita ang atong kaugalingon nga nakigharong sa mga babag, nga daw dili nato mabuntog, kay nagbaton og hugot nga pagtuo sa Manunubos sa kalibutan, kita mahimong moduol Kaniya ug masayud nga ang atong mga pag-ampo tubagon alang sa atong kaayohan.¹⁰ [Tan-awa sa sugyot 3 sa pahina 222.]

Ang pangutana nga kanunayng gipangutana: Posible ba nga ang batang mga lalaki ug batang mga babaye, batan-ong mga lalaki ug batan-ong mga babaye nga gipadako niining henerasyon sa Simbahan andam nga moantus sa mga kalisdanan, mga kakabus ug mga pagsulay nga gilahutay sa ilang mga amahan ug mga inahan alang sa ebanghelyo? Mobiya ba sila sa ilang komportable nga mga panimalay ngadto sa mga tawo sa usa ka bag-o nga nasud alang sa ilang tinuohan?

Ako moingon nganha kaninyo nga kon adunay natisok sa ilang mga kasingkasing nga kahibalo sa kabalaan niini nga buhat sama sa pagkasayud nato niini, kon ang hugot nga pagtuo nahatag ngadto kanila tungod sa atong pagsunod sa mga sugo sa Ginoo, kon sila natudloan nga masayud nga si Jesus mao ang Kristo ug nga si Joseph Smith usa ka propeta sa Ginoo, nan ako moingon kaninyo, Oo! sila mobuhat sa unsay gibuhat sa ilang mga amahan ug mga inahan, motuman sa ilang mga buluhaton taliwala sa Israel sa ulahing mga adlaw.

Kon ang paghimo niini maoy hinungdan sa kakabus, kon ang paghimo niini maoy hinungdan sa sakit ug kalisdanan, o bisan pagpapahawa gikan sa panimalay, adunay gatusan ug liboan sa atong anak nga mga lalaki ug anak nga mga babaye kinsa, nasayud nga kini mao ang ebanghelyo ni Kristo, kon gikinahanglan, mosilyo sa ilang pagpamatuod sa ilang kinabuhi.¹¹ [Tan-awa sa sugyot 2 sa pahina 222.]

Ang Ginoo moabli sa dalan alang kanato aron sa pagbuhat sa unsay Iyang gihangyo kon kita mopakita og hugot nga pagtuo.

Akong nahinumduman usa ka adlaw niana nadasig ko sa pagsulti ngadto sa usa ka misyonaryo kinsa moadto sa piho nga lungsod diin dili sila motugot kanamo nga mopahigayon og mga panagpundok diha sa dalan:

“Karon hinumdumi, hatagi og higayon ang Ginoo. Mangayo ka og pabor. Hatagi og higayon ang Ginoo. Hangyoa siya sa pag-abli sa dalan.”

Ang batan-ong lalaki miadto niana nga siyudad, misulod sa opisina sa mayor, ug mihangyo kon mahimo ba siya nga makigkita kaniya. Mohangyo siya kon mahimo ba nilang usbon ang balaod.

Sa dihang siya miabut didto, iyang nasayran nga ang mayor mibiyahe sa gawas sa lungsod. Ang batan-ong lalaki migawas sa opisina, mitan-aw sa agianan ug nakita ang pultahan sa tumoy sa agianan, “Opisina sa Hepe sa Kapulisan.” Nagduhaduha siya sa makadiyot, ug adunay misulti kaniya: “Hatagi og higayon ang Ginoo.” Miadto siya sa opisina sa hepe sa kapulisan ug misulti kaniya kon unsa ang iyang tuyo. Sa dihang nahuman na siya ang lalaki miingon:

“Unsa nga dalan ang inyong gusto?”

Siya miingon: “Dili kaayo ko suhito niini nga siyudad sama sa imong nahibaloan. Dili ko mohangyo og usa ka dalan nga dili nindot, o diin makaali kami sa trapiko. Mahimo ba nga mokuyog ka kanamo sa pagpili og dalan?”

Hunahunaa lang nga ang usa ka misyonaryo mihangyo sa usa ka hepe sa kapulisan sa pagpili og dalan aron didto isangyaw ang ebanghelyo!

Ang hepe miingon:

“Sige, mokuyog ko ninyo.”

Sulod sa kinse minutos sila aduna na sa usa sa labing maanindot nga mga dalan sa lungsod, uban sa pagtugot nga isangyaw ang ebanghelyo ni Jesukristo diin wala pa gayud masangyaw sa kadalanan sukad sa wala pa ang gubat [Unang Gubat sa Kalibutan]. …

Ang Ginoo adunay pamaagi sa pagtuman sa mga butang nga dili nato mahimo, ug dili gayud mohangyo kanato sa paghimo sa bisan unsa nga butang nga siya dili mohimo sa paagi nga posible. Mao kana ang iyang gisulti kanato pinaagi kang Nephi. Dili siya mohangyo og bisan unsa nga butang nga dili moandam og paagi.

“Ug nahinabo nga ako, si Nephi, miingon ngadto sa akong amahan: Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila.” [1 Nephi 3:7.]

Kon kamo adunay butang nga gihangyo sa Ginoo o gilauman nga inyong buhaton ug kamo wala masayud kon unsaon gayud sa pagtuman, buhata ang inyong labing maayo. Adto sa dapit nga kamo kinahanglan nga moadto; salig sa Ginoo, hatagi siya og higayon, ug dili gayud siya mopakyas kaninyo.¹²

Unsa kaanindot nga butang kini nga masayud nga kita makahimo, kon gustohon nato, sa paggunit sa kamot sa atong Langitnong Amahan ug pagagiyahan niya. Walay laing mga tawo sa kalibutan ang adunay kasiguroan nga anaa niini nga grupo sa mga tawo.¹³ [Tan-awa sa sugyot 4 sa pahina 223.]

Ang Dios mohatag og hugot nga pagtuo isip usa ka gasa ngadto sa mga matarung.

Ang atong hugot nga pagtuo gibase sa atong matarung nga kinabuhi. Dili kita mahimong magpuyo sa dili tukmang paagi ug mabatunan ang hugot nga pagtuo ingon nga kita kinahanglan, apan kon kita motuman sa mga sugo sa Ginoo, makabaton kita og hugot nga pagtuo, ug kini motubo ug molambo samtang ang atong pagkamatarung naglambo.¹⁴

Kon aduna kanato kinsa nakulangan sa hugot nga pagtuo niini nga buhat kini tungod kay kita wala motuman sa mga sugo sa Dios. Kon aduna kanato kinsa wala masayud nga kini mao ang buhat sa atong Amahan, kini tungod kay wala nila buhata ang ilang katungdanan. Ako nasayud ingon nga ako nasayud nga ako buhi nga kini mao ang buhat sa Ginoo, ug kana nga kahibalo moabut isip resulta sa pagtuman sa Iyang mga sugo.¹⁵

Kita nasayud nga ang hugot nga pagtuo usa ka gasa sa Dios; kini ang bunga sa matarung nga pagpuyo. Dili kini moabut kanato pinaagi sa atong pagmando, apan mao ang resulta sa paghimo sa kabubut-on sa atong Langitnong Amahan. Kon kita nakulangan og hugot nga pagtuo atong susihon ang atong kaugalingon aron masuta kon nagtuman ba kita sa Iyang mga sugo, ug maghinulsol sa walay paglangan kon kita wala motuman. … Unta ang Ginoo modugang sa atong pagtuo, ug unta magpuyo kita nga mahimong takus niini.¹⁶

Ako nanghinaut nga kadtong kinsa nakadawat niining talagsaon nga gasa sa hugot nga pagtuo magpakabuhi aron mapabilin kini.¹⁷ [Tan-awa sa sugyot 5 sa pahina 223.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Pangitaa ang mga ebidensya sa hugot nga pagtuo ni George Albert Smith diha sa istorya sa mga pahina 211–14. Usa sa mga misyonaryo ni Presidente Smith miingon nga ang iyang mga nabuhat “nakahimo nga kami makabaton og pagpamatuod nga ang Dios mao ang nangulo niana nga buhat” (pahina 214). Sa unsang paagi nga ikaw naimpluwensya sa hugot nga pagtuo sa uban, sama sa sakop sa pamilya o suod nga higala?
Ribyuha ang mga ehemplo sa hugot nga pagtuo diha sa mga pahina 214–19. Unsa ang laing mga ehemplo sa hugot nga pagtuo ang labing makahuluganon alang kanimo? Sa unsang paagi nga ikaw makagamit niini nga mga ehemplo aron sa pagtabang sa usa ka tawo kinsa nagpakita og hugot nga pagtuo apan wala pa makadawat sa mga panalangin nga iyang gitinguha?
Sa unsang paagi nga ang imong hugot nga pagtuo nakahatag kanimo og “paglaum diha sa gubat sa kinabuhi”? Sa unsang paagi nga ang hugot nga pagtuo makatabang kanato nga mabuntog ang kahadlok o ubang “mga babag, nga daw dili nato mabuntog”? (pahina 219).
Basaha ang istorya nga nagsugod sa pahina 220, ug itandi kini sa istorya diha sa “Gikan sa Kinabuhi ni George Albert Smith.” Unsa nga mga kasinatian ang imong nasinati nga susama niini? Unsa sa imong hunahuna ang ipasabut niini nga “hatagan og higayon ang Ginoo”?
Si Presidente Smith mitudlo nga “ang hugot nga pagtuo usa ka gasa sa Dios” nga “dili kini moabut kanato pinaagi sa atong pagmando” (pahina 222). Sa unsang paagi nga kini nga baruganan nakaimpluwensya sa paagi sa imong pagpaningkamot sa pagpalambo sa imong pagtuo ug pagdasig og pagtuo diha sa uban? Unsa ang pipila ka piho nga mga butang nga atong buhaton aron “mapabilin” ang gasa sa hugot nga pagtuo? (tan-awa sa Alma 32:35–43).

May Kalabutan nga mga Kasulatan: Mga Hebreohanon 11:1–11, 17–34; Santiago 2:17–24; Alma 32:26–43; Ether 12:6–22; Moroni 7:27–39; Doktrina ug mga Pakigsaad 136:42

Tabang sa pagtudlo: “Aron sa pagtabang sa mga estudyante sa pagpangandam sa pagtubag sa mga pangutana, mahimong sultihan nimo sila sa dili pa mobasa o ipahayag nga mangayo ka sa ilang tubag… . Sama pananglit mahimo kang moingon, ‘Paminaw samtang akong basahon kini nga tudling aron kamo makapaambit unsay mas nakapaikag kaninyo’ o ‘Samtang basahon kini nga kasulatan, paminawa kon masabtan ba ninyo unsa ang gisulti sa Ginoo mahitungod sa pagtuo’” (Pagtudlo, Walay Labaw ka Mahinungdanon nga Tawag, 69).

“Ang kasulatan puno sa mga ebidensya sa gahum sa hugot nga pagtuo… . Pinaagi sa hugot nga pagtuo, si Propeta Elias [Elijah] mipakanaog sa kalayo gikan sa langit aron sunugon ang iyang halad.”

“Pinaagi sa hugot nga pagtuo si Moises nangulo sa mga anak sa Israel gikan sa pagkaulipon, mitabok sa Pulang dagat ingon nga nauga nga yuta.”

“Pinaagi kadto sa hugot nga pagtuo nga si Brigham Young nangulo sa mga tawo ngadto [sa Salt Lake Valley].”