Kapitulo 20

Temporal nga Kaluwasan alang sa Atong Kaugalingon ug sa Uban

Kon atong sundon ang tambag sa Ginoo, mas makahimo kita sa pagtubag sa atong kaugalingong temporal nga mga panginahanglan ug makatabang niadtong nanginahanglan nga anaa sa atong palibut.

Gikan sa Kinabuhi ni George Albert Smith

Si George Albert Smith nahimong Presidente sa Simbahan samtang hapit na mahuman ang Ikaduhang Gubat sa Kalibutan. Ang gubat nagbilin og kadaut sa daghang kanasuran, ug liboan sa mga tawo walay mga pagkaon ug uban nga mga kinahanglanon. Sa usa ka pakigpulong sa kinatibuk-ang komperensya, si Presidente Smith mihulagway sa ilang kalisud ug miawhag sa mga Santos sa pagtabang nga mahupay ang ilang pag-antus: “Silang tanan mga anak sa [Dios]. Sila nagkinahanglan kanato; sila nagkinahanglan dili lamang sa atong moral nga suporta ug sa pagtulun-an sa atong relihiyon, apan sila nagkinahanglan og pagkaon ug sinina ug hapin sa kama ug tabang sa tanang mga matang tungod kay, sa daghang mga sitwasyon, wala nay bisan unsa nga nahabilin kanila. Kon mabasa pa lang ninyo ang pipila ka mga sulat nga miabut sa among opisina gikan sa pipila ka kabus nga mga tawo didto, maguol kamo niini. Ang mga tawo nga gikuha gikan sa ilang mga panimalay sa pagtuo nga sila pagatugutan nga mopuyo sa laing lugar, ug sa kalit lang gibiyaan, ug sa dihang sila mibalik sa ilang mga panimalay, nakita kini nga gikawatan sa unsay anaa kanila—tanang butang—ug gibiyaan nga wala nay mahimo, nga walay dapit nga kaadtoan.”¹

Tungod kay naandan na sa Simbahan ang pagtipig og mga pagkaon sulod sa daghang katuigan, andam kini nga motabang sa ingon niini nga mga kahimtang. Ang mga paningkamot sa paghatag og ingon nga tabang nagsugod sa hinapos sa 1945, sa dihang si Presidente Smith miadto sa Washington, D.C., sa paghimo og mga pakigsabut sa presidente sa Estados Unidos, si Harry S Truman, sa pagpadala og mga pagkaon ug mga sinina ngadto sa Europe. Atol sa ilang paghimamat si Presidente Truman miingon, “Ikalipay namo ang pagtabang kaninyo sa bisan unsa nga paagi nga among mahimo. … Kanus-a ninyo kini maandam?”

Si Presidente Smith misurprisa kaniya sa pagtubag og: “Andam na kini. … Kami naghimo [na] og mga building nga katipigan og mga lugas ug nagpuno niini og lugas, ug nagdugang sa among mga kahayopan, ug karon unsa ang among gikinahanglan mao ang makargahan nga mga sakyanan ug mga barko aron magpadala og igo-igong pagkaon, sinina ug mga hapin sa kama ngadto sa mga tawo sa Europe kinsa anaa sa kasakit. Kami adunay organisasyon sa Simbahan [ang Relief Society] nga adunay duha ka libo nga hinimo na nga mga quilt nga andam na.”

Si Presidente Smith mireport ngadto sa mga Santos nga agig resulta niini nga mga pagpadala, “daghang mga tawo ang nakadawat og mga sinina ug mga hapin sa kama ug mga pagkaon sa walay paglangan. Ingon ka paspas nga kita makakuha og makargahan nga mga sakyanan ug mga barko, aduna kita sa unsay gikinahanglan nga ipadala ngadto sa Europe.”²

Hapit 15 ka tuig ang milabay, si Elder Smith, nga nianang higayuna usa ka sakop sa Korum sa Napulog Duha ka mga Apostoles, namulong sa Relief Society atol sa laing panahon sa labihan nga panginahanglan—ang Grabe nga Kalisud [Great Depression]. Siya naghunahuna nga ang pagtabang niadtong nanginahanglan labaw pa sa pagsangkap sa temporal nga tabang; nagkinahanglan usab kini og tinuoray nga pagkamabination ug gugmang putli:

“Walay panahon sukad, sa akong paghukom, nga ang pagkamabination mas gikinahanglan kay sa karon. Kini ang mga panahon nga ang mga kalag sa mga tawo gisulayan, ug nga sila gisulayan sa emosyonal nga paagi. Kini ang mga panahon nga daghan ang nag-atubang og kagutom ug kasakit bisan diha taliwala sa mga Santos sa Ulahing mga Adlaw. …

“… Ako nagtuo nga ang atong Langitnong Amahan naghatag kanato sa atong oportunidad alang sa paglambo. … Atong madiskubrihan karon kon ang gugma nga giingon sa Manluluwas nga kinahanglang anaa sa atong mga kasingkasing anaa ba kanato.”³ [Tan-awa sa sugyot 1 sa pahina 261.]

Mga Pagtulun-an ni George Albert Smith

Kon kita maalamon sa atong mga kinitaan, kita mahimong andam sa lisud nga mga panahon.

Mao kini ang tambag [sa] nag-una nga mga pioneer ubos kang Presidente [Brigham] Young sa pagtipig og usa ka tuig nga pagkaon, aron kon adunay mawad-an sa iyang mga pananum, makalahutay pa siya hangtud sa sunod nga panahon. …

Kita mahimong adunay lisud nga mga panahon, mga kaigsoonan, apan makapangandam kita alang niini, kon kita maghunahuna sa pito ka tuig nga kaabunda ug pito ka tuig nga kagutom sa mga panahon sa Paraon ug magplano sama sa ilang gihimo [tan-awa sa Genesis 41]. Ang ingon nga mga kahimtang mahimong mobalik pag-usab. Kita wala masayud, apan kita nasayud nga sa sayo nga mga panahon sa Simbahan ang Kapangulohan ug ang mga lider sa Simbahan mitambag sa mga tawo sa pagtipig og igong mga pagkaon nga makatubag og emerhensya. Ang resulta mao nga sukad nga ang mga tawo napahimutang gayud og maayo dinhi ug ang mga umahan aduna nay mga produkto, ug ang kahayopan nagkadaghan, dili na kinahanglan nga adunay tawo nga maglisud sa pagpangita og pagkaon.⁴

Kita nagpuyo sa makalilisang nga mga panahon. Ang mga kasulatan natuman, ug sama sa akong nakita mao kini ang piho nga panahon nga, kon posible, ang labing pinili malingla. Makapatingala kini kon unsa ka sayon alang niadtong kinsa nagtinguha sa pagpalambo sa ilang pinansyal nga mga tinguha dinhi sa kalibutan sa pagpangita og rason sa pagbaliwala sa yano nga mga pagtulun-an sa Ginoo kalabut sa atong kinabuhi. Ug lahi kini alang kanako kon pila na ka mga tawo ang nahulog ngadto sa kinaiya sa pagpaminaw niadtong kinsa nagsulti og mga butang nga sukwahi sa gipadayag nga kabubut-on sa atong Langitnong Amahan. …

… Kini nga mga tawo gitambagan sa pagtipig sa ilang mga enerhiya ug mga kinitaan. Kita gitudloan pinaagi niadtong kinsa gitawag sa Ginoo sa pagtudlo kanato nga kita kinahanglang magpuyo nga sulod ra sa atong kinitaan, nga kita kinahanglang dili mosunod sa mga hilig sa kalibutan ug mogasto og ingon ka paspas ug gani sa mas paspas pa kay sa atong pagpangita og kwarta nga moabut sa atong mga kamot, aron maatiman ang atong kaugalingon ug ang atong mga pamilya.

Nahadlok ko nga ang mga Santos sa Ulahing mga Adlaw, sa daghang mga sitwasyon, mabutaan sa ilang kaugalingong garbo, sa ilang tinguha nga mamahimo kon unsa ang kalibutan; ug kita gisultihan sa ingon ka yano nga pinulongan pinaagi sa atong Langitnong Amahan nga kita dili makapuyo sama sa pagpuyo sa kalibutan ug matagamtaman ang iyang Espiritu.⁵

Ang pipila ka mga indibidwal … mihurot og gamit sa ilang mga kabtangan ug migasto sa ilang kwarta sa walay kapuslanan nga mga butang, ug kon moabut ang lisud nga mga panahon, ilang makita ang ilang kaugalingon nga dili na makatubag sa ilang mga obligasyon.

Kita mahimong makat-on og leksyon gikan sa hulmigas. Siya maghakot sa iyang mga pagkaon kon kini anaa ug tipigan kini aron iandam alang sa panahon nga dili mahimo nga manguha niini. Ang resulta mao nga ang iyang punduhanan puno kaayo. Ang lukton, usa ka insekto nga mas dako, wala maghimo niana nga paagi. Dili siya magtipig alang sa lisud nga mga panahon, apan nagsalig sa unsay anaa aron pagsangkap sa unsay iyang mga gikinahanglan, ug ang resulta mao nga ang kadaghanan sa mga lukton mamatay sa kagutom.

Nahadlok ko nga ang pipila ka mga tawo sama sa lukton ug dili mopahimulos sa mga oportunidad nga ilaha sa mapuslanon nga paagi. Kon sila nakat-on sa leksyon gikan sa hulmigas, sila magtipig og pagkaon nga ilang gikinahanglan ug sa kanunay adunay magamit.⁶ [Tan-awa sa sugyot 2 sa pahina 261.]

Ang Ginoo mimando kanato sa pagtrabaho aron adunay kaugalingong panginabuhian.

Ang mismong kamatuoran nga daghan kaayong kwarta ang mahimong magamit ngadto sa kadaghanan sa mga tawo naghatag sa mga kabatan-onan og pagbati sa pipila ka mga higayon nga tungod kay ang kwarta daw dali ra kaayong moabut, ang pagtrabaho og maayo dili na kinahanglanon o angayang tinguhaon. Ug bisan pa man nalipay ko nga walay tawo nga nagpuyo sa kalibutan sukad kinsa, kay napakyas sa pagpangita sa ilang panginabuhi pinaagi sa kaligdong ug kakugi, nga wala malaglag.

Kon ang atong mga anak magdako sa katapulan, kita nasayud nga kini dili ikahimuot sa Ginoo.⁷

Unsa kita ka mas haruhay kon kita mapuno sa pipila ka mapuslanon nga buhat.⁸

Ang atong Langitnong Amahan … miingon nga sa dugay nang panahon adunay mga tapulan sa Zion, … ug siya miingon, “Siya nga tapulan dili makakaon sa tinapay ni makasul-ob sa mga saput sa mamumuo.” [D&P 42:42.] Sa akong hunahuna wala siya magpasabut niadtong kinsa wala makakita og trabaho, ug kinsa sa makatarunganong paagi naningkamot sa pag-atiman sa ilang kaugalingon. Sa akong hunahuna siya nagpasabut ngadto sa kinaiya sa pipila ka mga tawo nga nagsalig sa ilang silingan. … Akong gibati nga walay pangatarungan ang gihatag ngadto ni bisan kinsa nga tawo dinhi sa kalibutan nga siya mahimong magsalig sa laing tawo aron mohatag kaniya og panginabuhian. Ako wala mobati sa dihang bata pa ko nga ang ubang tawo mapugos sa paghatag kanako og kapanginabuhian. Ang Ginoo mihatag kanako og salabutan. Siya mimando nga ako kinahanglan nga motrabaho, ug misugod ko sa pagtrabaho sa dihang nag-edad ko og dose anyos, ug nalipay ko niini, ug ako adunay akong kinitaan ug mitabang sa uban panahon sa sobra sa singkwenta ka tuig.

Nagpasalamat ko sa Dios alang sa trabaho, alang sa kalipay nga nagagikan sa paghimo sa mga butang dinhi sa kalibutan. Wala ko magpasabut og bisan unsa nga matang sa trabaho basta kini matarung lang. Apan ang Ginoo mipasabut nga kita kinahanglan nga magmakugihon. Sa karaang panahon siya miingon nga kita kinahanglang mangita og panginabuhian pinaagi sa singot sa atong nawong [tan-awa sa Genesis 3:19].⁹ [Tan-awa sa sugyot 3 sa pahina 261.]

Walay adunahan ni kabus ang mopahimutang sa ilang mga kasingkasing diha sa mga katigayunan.

“Alaot ngadto kaninyo nga mga tawo nga adunahan, nga dili mohatag sa inyong kabtangan ngadto sa kabus, kay ang inyong mga katigayunan mokutkot sa inyong mga kalag; ug kini mao ang inyong pagdangoyngoy diha sa adlaw sa pagduaw, ug sa paghukom, ug sa kaligutgut: Ang pag-ani milabay, ang ting-init natapos na, ug ang akong kalag wala maluwas!” (D&P 56:16.)

Mao kana ang unsay gisulti sa Ginoo mahitungod sa adunahan nga mga tawo kinsa mibalibad sa paghatag sa ilang kabtangan ngadto niadtong kinsa mga kabus. Apan siya nagsulti og usa ka butang nga ingon ka grabe ngadto sa kabus nga tawo kinsa wala mohimo sa iyang labing maayo. Siya nag-ingon:

“Alaot ngadto kaninyo mga tawo nga kabus, kansang mga kasingkasing dili masulub-on, kansang mga espiritu dili mahinulsulon, ug kansang mga tiyan wala matagbaw, ug kansang mga kamot wala magpabilin gikan sa paggunit sa uban nga mga butang sa mga tawo, kansang mga mata puno sa kahakog, ug kinsa dili maghago uban sa ilang kaugalingon nga mga kamot!” (D&P 56:17.) …

… Dayon midugang siya sa pag-ingon, “Apan bulahan ang mga kabus kinsa mga putli og kasingkasing.” Adunay kalainan dinhi, “… bulahan ang mga kabus kinsa mga putli og kasingkasing, kansang mga kasingkasing masulub-on, ug kansang mga espiritu mahinulsulon, kay sila makakita sa gingharian sa Dios nga moabut diha sa gahum ug dako nga himaya ngadto sa ilang kaluwasan; kay ang kabuhong sa yuta maila.” (D&P 56:18.)

Sila mao kadtong kinsa wala makabaton sa katigayunan sa kalibutan apan sa gihapon adunay kinabuhi ug pagkatawo ug salabutan, ug kinsa matinguhaon sa pagbuhat sa butang nga gusto sa Ginoo nga ilang buhaton. …

Karon, akong mga kaigsoonan, kita adunay mga adunahan ug mga kabus diha sa atong mga organisasyon. Kon kita kabus, kita mahimo nga takus sama sa gipasabut sa Ginoo dinhi. Kita mahimo nga putli sa kasingkasing ug makahimo sa atong labing maayo, ug dili siya motugot niadtong kinsa naghimo sa ilang labing maayo nga mag-antus alang sa mga panginahanglan sa kinabuhi taliwala sa mga tawo kinsa anaa sa Simbahan ni Jesukristo sa mga Santos sa Ulahing mga Adlaw. …

Ako manghinaut nga kita dili mahimong mapintas tungod kay ang ubang mga lalaki ug mga babaye mga adunahan. Kon kita adunahan, manghinaut ko nga dili kita mahimong hakog ug walay pagpakabana sa mga panginahanglan sa uban nga mga anak sa atong Amahan. Kon kita mas adunahan kay kanila, kita kinahanglan nga mahimong tinuod nga mga igsoong lalaki ug igsoong mga babaye, dili magpakaaron-ingnon. Ang atong mga tinguha kinahanglan mao ang pagpalambo dinhi niini nga kalibutan og ingon niana nga organisasyon nga ang uban, kon makakita sa atong maayo nga mga buhat madasig sa paghimaya sa pangalan sa atong Langitnong Amahan. …

Kita kinahanglan gayud nga dili magbaton og bati nga mga kinaiya sa ubang mga tawo. Dili gayud nato batasanon nga atong angkonon ang unsay anaa sa ubang tawo. Tan-aw og balik ngadto sa napulo ka mga sugo, ug inyong makita ang usa ka mubo nga paragraph, “Dili ka maibug.” [Exodo 20:17.] …

Dili gayud nato kana batasanon. Ang uban mahimong naghimo niana, apan kon kita aduna sa diwa sa ebanghelyo ni Jesukristo diha sa atong mga kasingkasing, dili kita malingla kalabut niana.

Gisultihan kita nga dili kita makaalagad sa Dios ug sa lain pa nga agalon [tan-awa sa Mateo 6:24]. Kinahanglan kita nga mohimo sa atong pagpili, ug kon kita gusto nga mahimong mga sulugoon sa Dios ug mga sulugoon sa atong Langitnong Amahan ug makaangkon sa iyang mga panalangin, kinahanglan gayud nga kita mohimo niini pinaagi sa pagtahud kaniya ug pinaagi sa pagsunod sa iyang mga sugo. Ang atong mga pagbati, ug ang atong gugma, kon ako pagamiton niana nga ekspresyon, kinahanglan nga mapahayag ngadto sa tibuok kalibutan kutob nga sila modawat niini.¹⁰ [Tan-awa sa sugyot 4 sa pahina 261.]

Pinaagi sa ikapulo ug uban nga mga halad, kita nagtabang sa buhat sa Simbahan ug nagpanalangin niadtong nanginahanglan.

Ang Ginoo mihatag kanato og pribilehiyo sa paghatag sa ikanapulo nga bahin sa atong kinitaan, alang sa Iyang Simbahan, aron mapalambo ang Iyang buhat dinhi sa kalibutan. Kadtong kinsa nagbayad sa ilang ikapulo makadawat sa ilang panalangin. … Dili kita makapaabut nga makadawat og mga panalangin nga walay igong paningkamot. Kita gikinahanglan nga mohimo sa unsay alang sa uban mga sakripisyo. Sa akong paminaw lagmit ang mga tawo naghunahuna nga kon sila mobayad sa ilang ikapulo sila nagsakripisyo, apan wala sila magsakripisyo; sila naghimo og tinuod nga pagtigum nga mohatag og balik sa mahangturon nga ginansya. Ang atong Langitnong Amahan naghatag sa tanan nga anaa kanato. Gihatag niya ang tanan diha sa atong mga kamot, nagtugot kanato nga ipabilin ang nubenta porsyento niini alang sa atong kaugalingong paggamit, ug dayon Siya mihangyo nga atong ibutang ang Iyang ikanapulo sa dapit nga Iyang gimando, diin Siya nasayud nga kini makahimo og dakong kaayohan sa pagpalambo sa Iyang Simbahan.

Sa dihang atong nadungog ang report niining buntaga niining dako nga Simbahan [atol sa usa ka sesyon sa kinatibuk-an nga komperensya], ang report sa pinansyal nakapahimuot kaayo kanako—nga masayud nga ang dako nga organisasyon sama niini, uban sa daghan kaayo nga mga tawo niini, naglihok sa daghan kaayo nga mga paagi, taliwala sa kasamok ug kalisdanan sa kalibutan anaa sa usa ka kahimtang nga ang usa sa Kapangulohan sa Simbahan makabarug dinhi ug tinuoray nga moingon ngari kanato nga kini nga Simbahan wala nay utang. Samtang ang kanasuran ug kadaghanan sa katawhan adunay utang, apan ang Simbahan maayo kaayo ang pagkadala nga wala na kini utang. Hunahunaon nato kini. Atong paluyohan ang Simbahan. Atong sundon ang aktibo nga mga lider sa Simbahan. Magpuyo kita nga sa ingon ang Ginoo makapanalangin kanato sama sa Iyang pagpanalangin sa Simbahan.¹¹

Kon kamo nagbayad og matinuoron nga ikapulo, ako moingon sa walay pagpanagana nga ang nubenta porsyento nahimong mas dako nga panalangin ngadto niadtong kinsa mibayad kay sa usa ka gatus nga porsyento niadtong kinsa wala mobayad. Buhat kini sa Ginoo. … Ang mga tawo dili makahimo niini. Sa tanan ninyong pagkamanggihatagon ug sa tanan ninyong paghatag, sa tanan ninyong misyonaryo nga buhat, sa inyong pag-atiman sa mga kabus, … sa tanan nga inyong gihatag isip ordinaryo nga mga tawo, ako mopamatuod nga kon unsa ang nahabilin kaninyo maghatag kaninyo og dugang nga kalipay, dugang nga kalinaw, dugang nga kahupayan ug dugang nga kasiguroan sa kinabuhing dayon kay sa natagamtaman sa uban nga mga tawo sa kalibutan karon.¹²

Ako sigurado nga ang Ginoo nahigugma niadtong mga mapaubsanon, matinud-anon nga mga kalag kinsa andam sa pagtabang ug pagtandog niadtong kinsa nanginahanglan pagkaon man kini o sinina o hapin sa kama o pagkamabination tungod kay kabahin kana sa ebanghelyo ni Jesukristo.¹³ [Tan-awa sa sugyot 5 sa pahina 262.]

Kon kita manggihatagon sa mga butang nga anaa kanato, wala nay usa ka tawo nga magkinahanglan.

Wala nay lalaki, babaye, o bata diha sa Simbahan ni Jesukristo sa mga Santos sa Ulahing mga Adlaw nga magkinahanglan, kay ang Simbahan gi-organisar aron sa pagtabang niadtong kinsa nagkulang sa mga panginahanglan sa kinabuhi. Adunay daghan kaayo alang sa tanan, ug may sobra pa. … Ang Dios mitugot sa mga tawo nga maadunahan, kon kini nabatunan nila sa tukmang paagi, mailaha kini, ug siya mopanalangin kanila sa paggamit niini kon sila mogamit niini sa tukmang paagi.¹⁴

Kita nahimong hilabihan nga naka-focus sa kalibutan nga nalimtan nato ang mga tawo nga nag-antus nga mahimo natong tabangan, sa daghang mga sitwasyon.¹⁵

Hunahunaa ang mga lalaki nga nawad-an og trabaho ug ang mga babaye usab. … Hunahunaa ang gidaghanon sa mga anak sa atong Amahan nga iyang gihigugma ingon gayud sa iyang paghigugma kanato kinsa anaa sa kasakit. Hunahunaa kon unsa kaha ang mamahimong pag-antus kon kita nga mas bulahan dili manggihatagon sa kabtangan nga hinatag sa Dios sa atong mga kamot—dili lamang kabtangan, apan kon atong pugngan ang pulong nga makadasig sa iyang mga anak ug pagkamatinabangon ug mapakyas sa pagbisita sa mga panimalay diin adunay daghan kaayo ang anaa sa panginahanglan ug mohatag sa unsay mahimo nga mahatag sa matag usa kanato. Mga kaigsoonan, ang tanan niini nga mga oportunidad gihatag ngari kanato aron mapalambo ang atong kaugalingon ug mapaugmad ang atong mga kinaiya ug nga kita makatigum sa atong bahandi didto sa langit diin walay tangkob ni taya nga magakutkot, ug diin walay mga kawatan nga magapanasaka ug magapangawat [tan-awa sa Mateo 6:20]. Kini nga mga oportunidad gitanyag ngari kanato sa usa ka Amahan nga maalamon sa tanan kinsa nasayud sa katapusan gikan sa sinugdanan nag-ingon: “Kini mao ang dalan, lumakaw kamo diha niana.”

Himoon nato nga … motan-aw sa atong palibut diha sa atong kasilinganan—dili mosangun lang niini ngadto sa Bishop ug sa Relief Society, apan himoon sa matag usa kanato nga mahimong tigpangalagad sa mahigugmaon nga pagkamabination niadtong kinsa nagkinahanglan gayud kanato sa hilabihan. Ug bisan unsa man ang atong buhaton dili nato himoon kadtong kinsa nagkinahanglan sa atong tabang nga mobati sama sa mga makililimos. Atong ihatag ang unsay atong ihatag nga ingon og kini ilaha. Ang Dios mipahulam niini ngari kanato. Usahay kita kinsa nakatigum og mga butang [molihok] nga ingon og kita naghunahuna nga kini atoa. Ang tanan nga anaa kanato, ang atong pagkaon, atong sinina, atong kapasilongan, atong mga panimalay ug atong mga oportunidad ang tanan gihatag ngari kanato isip mga tinugyanan diha sa Simbahan ug sa gingharian sa atong Langitnong Amahan, ug kon kita … mohatag sa atong kabtangan bisan kon kini mao na lamang ang katapusan, atong madawat gikan kaniya kinsa nagpuyo sa kahitas-an ang mga panalangin nga atong gikinahanglan sa atong panahon dinhi sa yuta, ug kon ang panahon moabut nga kita moadto na didto sa sunod nga kinabuhi atong makaplagan nga naghulat kanato ang mga panalangin sa usa ka mahigugmaon nga Amahan kinsa nakadayeg sa mga paningkamot nga atong gihimo.¹⁶

Kon kita nagtinguha nga maapil sa gingharian sa atong Ginoo, ang celestial nga gingharian, mao kini ang atong oportunidad sa pagpangandam,—uban sa tiunay nga gugma, uban sa kakugi, uban sa pagdaginot, uban sa pagkamalahutayon, uban sa usa ka tinguha sa pagbuhat sa tanan kutob sa atong mahimo aron sa pagpanalangin sa uban, sa paghatag—dili mobati kanunay nga kinahanglan gayud kita nga makadawat, apan magtinguha sa paghatag, kay ako moingon kaninyo: “Labi pang bulahan ang paghatag kay sa pagdawat.” [Mga Buhat 20:35.] Ang Ebanghelyo ni Jesukristo mao ang ebanghelyo sa paghatag, dili lamang sa atong kabtangan apan sa atong kaugalingon, ug ako nagpasalamat sa akong Langitnong Amahan nga ako nahisakop sa ingon nga organisasyon nga natudloan gayud og maayo.¹⁷ [Tan-awa sa sugyot 6 sa pahina 262.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Si George Albert Smith misulti sa mga Santos atol sa Grabe nga Kalisud [Great Depression], “Ako nagtuo nga ang atong Langitnong Amahan naghatag kanato sa atong oportunidad alang sa paglambo” (pahina 252). Unsa man ang ipasabut niini alang kanimo? Sa unsang mga paagi nga kita “molambo” samtang kita moserbisyo niadtong nanginahanglan?
Samtang ikaw nagbasa sa unang seksyon sa mga pagtulun-an (mga pahina 252–54), hunahunaa ang mga butang nga mahimo nimong buhaton aron sa pagsugod o pagpadaghan sa imong mga tinipigan nga mga pagkaon ug mga kapanguhaan. Unsa ang pipila ka mga ehemplo sa mga emerhensya o mga kahimtang nga kinahanglan nimong pangandaman? Unsa man ang buhaton sa mga korum sa priesthood ug sa mga Relief Society aron matabangan ang mga miyembro sa pagpangandam alang niini nga mga emerhensya?
Ribyuha ang seksyon nga nagsugod sa pahina 254 ug basaha ang Doktrina ug mga Pakigsaad 68:31. Ngano sa imong hunahuna nga ang Ginoo nagkinahanglan kanato sa pagtrabaho alang sa atong panginabuhian? Unsa ang pipila ka epektibo nga mga paagi sa pagtudlo sa mga bata sa kaimportante sa trabaho?
Basaha ang mga pasidaan ni Presidente Smith ngadto sa adunahan ug sa kabus diha sa mga pahina 255–57. Unsa ang mga sangputanan sa pagpahimutang sa atong mga kasingkasing nganha sa mga katigayunan? Unsa man ang atong mabuhat aron malikayan kini?
Basaha ang seksyon nga nagsugod sa pahina 258, diin si Presidente Smith naghisgut sa mga panalangin sa pagbayad og ikapulo ug uban nga mga halad. Unsa ang pipila ka epektibo nga mga paagi sa pagtudlo sa mga batan-on o bag-o nga mga miyembro kalabut niini nga mga panalangin?
Samtang ikaw nagtuon sa katapusang seksyon sa mga pagtulun-an (mga pahina 259–61), paghunahuna og usa ka butang nga piho nga imong mabuhat aron sa pagtabang sa bishop ug sa uban nga mga lider sa ward nga matubag ang mga panginahanglan sa mga tawo sa inyong ward o komunidad. Unsa man ang ipasabut nganha kanimo nga mohatag “dili lamang sa atong kabtangan apan sa atong kaugalingon”?

May Kalabutan nga mga Kasulatan : Mga Taga-Efeso 4:28; Santiago 1:27; 2 Nephi 5:17; Jacob 2:17–19; Mosiah 4:22–25; Doktrina ug mga Pakigsaad 104:13–18

Tabang sa pagtudlo: “Bisan og nagtudlo ka og daghang mga tawo sa samang higayon, ikaw makatabang sa tagsa-tagsa. Sama pananglit, makatabang ka sa mga indibidwal kon imong abi-abihon og maayo ang matag tawo sa sinugdanan sa klase… . Makatabang usab ikaw kon imong himoon ang pagpaapil nga madanihon ug luwas” (Pagtudlo, Walay Labaw ka Mahinungdanon nga Tawag, 35).

Si George Albert Smith nagbisita sa balay tipiganan sa bishop kauban sa lain pa nga mga lider sa Simbahan. Tungod kay ang Simbahan nagtipig og mga pagkaon, andam na kini aron sa pagtabang niadtong nanginahanglan agi og sangputanan sa Ikaduhang Gubat sa Kalibutan.

“Kita mahimong adunay lisud nga mga panahon, mga kaigsoonan, apan makapangandam kita alang niini.”

“Ang Ginoo mihatag kanato og pribilehiyo sa paghatag sa ikanapulo nga bahin sa atong kinitaan, alang sa Iyang Simbahan, aron mapalambo ang Iyang buhat.”