Kapitulo 3

Ang Atong Pagpamatuod ni Jesukristo

Ang gipahiuli nga ebanghelyo nakahatag sa mga Santos sa Ulahing mga Adlaw og dugang nga mga pagsaksi nga si Jesukristo mao ang Anak sa Dios.

Gikan sa Kinabuhi ni George Albert Smith

Sa iyang mga pagbiyahe isip usa ka General Authority, si George Albert Smith usahay nakasugat niadtong kinsa nagtuo nga ang mga Santos sa Ulahing mga Adlaw wala motuo ni Jesukristo. Kining sayop nga pagtuo nakapahingangha ug nakapabalaka ni Presidente Smith, ug naningkamot siya sa pagkorihir niini pinaagi sa pagpakigbahin sa iyang personal nga pagsaksi sa Manluluwas.

Usa ka higayon namulong siya sa miting sa Simbahan didto sa Cardston, Canada, mahitungod sa kinabuhi ug misyon ni Kristo. Pagkasunod buntag miadto siya sa estasyon sa tren aron mopalit og tiket. Samtang naghulat siya diha sa naglinya, nakadungog siya og panagsultihanay tali sa usa ka babaye ug sa tighatag sa tiket. Ang babaye mihisgut nga sa miaging gabii nakahukom siya nga motambong og usa ka kalihokan sa pagsimba sa mga Santos sa Ulahing mga Adlaw.

Ang tighatag sa tiket nahingangha. “Pastilan,” miingon siya. “Pasabut ba nimo nga misimba ka didto.”

“Oo, miadto ko,” mitubag ang babaye. “Ngano dili man?”

Ang tighatag sa tiket miingon, “Dili man gani na sila motuo ni Jesukristo.”

Dayon ang babaye mitubag, “Kagabii lang nako nadunggan ang usa sa mga elder sa Simbahan nga namulong mahitungod sa kinabuhi ni Jesus sa Nazaret, ug wala ko makadungog sukad ni bisan kinsa nga daw mas hilabihan nga nagdayeg uban sa kahibalo nga si Jesus mao gayud ang Kristo, kay sa mamumulong nianang higayuna.”¹ [Tan-awa sa sugyot 1 sa pahina 36.]

Si George Albert Smith nakabaton og kalig-on gikan sa iyang pagpamatuod kang Jesukristo, ug siya nalipay sa pagpakigbahin niini ngadto sa uban. Sa edad nga 44, nga nakaserbisyo sa iyang calling sa pagka-apostol sulod sa 11 ka tuig, siya miingon:

“Ako gidasig ug, sa ingon, mihimo pang mas maayo sa akong kaugalingon ug gihatagan og gahum nga dili akong kaugalingon aron sa pagtudlo sa mahimayaon nga mga kamatuoran nga gisangyaw sa Manunubos sa kalibutan. Wala ako makakita Kaniya nawong sa nawong apan akong natagamtaman ang pagpakig-uban sa Iyang espiritu ug nabati ang Iyang presensya sa pamaagi nga dili masaypan. Nasayud ko nga ang akong Manunubos buhi ug malipayon nga motugyan sa akong mapaubsanon nga mga paningkamot aron sa pag-establisar sa Iyang mga pagtulun-an. … Ang tibuok nakong kalag nangurog sa kahibalo nga Siya buhi ug sa umaabut nga adlaw ang tanang mga tawo masayud niini.

“Ang Manluluwas namatay aron kita mabuhi. Nabuntog Niya ang kamatayon ug ang lubnganan ug mohatag og paglaum sa mahimayaon nga pagkabanhaw ngadto sa tanan kinsa mosunod sa Iyang mga pagtulun-an. … Ako nasayud nga buhat kini sa Ginoo, nga si Jesus mao gayud ang atong Manluluwas.”²

Si Presidente Smith namatay sa iyang ika-81 nga adlawng natawhan, Abril 4, 1951. Atol sa katapusang mga gutlo sa iyang kinabuhi, uban sa iyang pamilya sa tupad, ang iyang anak nga lalaki nangutana, “Papa, aduna ka bay gustong isulti sa pamilya—usa ka butang nga espesyal?”

Uban sa usa ka pahiyum, iyang gibalik og pamatuod ang pagpamatuod nga iya nang nahatag sa makadaghang higayon sa tibuok niyang kinabuhi: “Oo, kini lang: Ako nasayud nga ang akong Manunubos buhi; Ako nasayud nga ang akong Manunubos buhi.”³

Mga Pagtulun-an ni George Albert Smith

Si Jesukristo mao ang Anak sa Dios, ug Siya buhi karon isip atong nabanhaw nga Manluluwas.

Akong nahibaloan nga daghan dinhi sa kalibutan ang wala masayud nga kita nagtuo sa balaan nga misyon sa atong Ginoo, ug ako gigiyahan sa pagsulti sa sobra sa usa ka higayon nga walay laing mga tawo sa kalibutan sama sa mga Santos sa Ulahing mga Adlaw kinsa nakasabut og maayo sa balaan nga misyon ni Jesukristo, kinsa nagtuo gayud kaniya nga mao ang Anak sa Dios, kinsa masaligon kaayo nga sa pagkakaron naglingkod siya sa trono diha sa himaya sa tuo nga kamot sa iyang Amahan.⁴

Ako nasayud sama sa akong pagkasayud nga ako buhi nga siya mao ang anak sa Dios, nga pinaagi kaniya ug pinaagi lamang kaniya nga kita makabaton og kahimayaan sa celestial nga gingharian ug tanan niadtong kinsa nagsunod sa iyang mga lakang ug nagpuyo sumala sa mga pagtulun-an nga iyang gihatag, magmalipayon niining kinabuhia ug mag-andam alang sa ilang kaugalingon og usa ka mansyon didto sa celestial nga gingharian, diin sila mopuyo uban kaniya sa kahangturan.⁵

Ang Manunubos sa katawhan labaw pa sa usa ka maayong tawo kinsa mianhi sa kalibutan aron sa pagtudlo kanato og maayong pamatasan. Ang Manunubos sa katawhan adunay labaw pa sa ordinaryo nga salabutan. Siya mao gayud ang Anak sa Dios, ang bugtong anak sa Dios diha sa unod. … Siya mianhi aron sa pagtawag sa mga tawo sa paghinulsol, sa pagpabiya kanila gikan sa ilang sayop nga dalan. Siya mianha taliwala kanila nga mirepresentar sa Dios ang Mahangturong Amahan, nagsangyaw nga siya susama sa panagway sa iyang Amahan, ug kadtong kinsa nakakita kaniya nakakita sa Amahan, ug misulti kanila nga siya gipadala aron sa pagbuhat sa kabubut-on sa iyang Amahan, ug mitawag sa tanang mga tawo sa pagbiya gikan sa sayop nga mikanap taliwala kanila, sa paghinulsol sa ilang mga sala ug magpabunyag.⁶

Sa panahon sa Manluluwas ang yawa mihunghong ngadto [sa] mga tawo, nga siya dili ang Anak sa Dios, sigurado gayud nga kamo dili modawat kaniya, usa lamang siya ka ordinaryo nga tawo, anak lamang siya ni Maria ug ni Jose ug dili gayud siya Anak sa Dios sama kaninyo, ug ang mga tawo naminaw nianang maliputon, dautan nga binuhat ug milansang sa Manunubos sa katawhan.⁷

Siya mao gayud ang Anak sa Dios. Siya nagtrabaho taliwala [sa mga tawo] sa gugma ug pagkamabination; apan sila mibugalbugal sa Iyang pangalan nga nanag-ingon nga Siya dautan. … Siya mao ang Anak sa Dios, ug Siya aduna gayuy katungod sa pagpamulong sa pangalan sa Amahan. Ang mga kamatuoran nga Iyang gidala sa yuta nagagikan sa Amahan; ug bisan sila milansang Kaniya sa krus, bisan kon sila mipurongpurong Kaniya og mga sampinit, ug mabiaybiayon nga mipakupot sa Iyang mga kamot og baston nga bagakay, bisan og sila mipaagas sa Iyang dugo pinaagi sa mabangis nga espada, apan ang pulong nga Iyang gihatag ngadto kanila mao ang pulong sa Ginoo, ug Siya mao gayud ang Anak sa Dios.⁸

Wala lamang kita nagtuo nga si Jesus sa Nazaret mipuyo sa yuta, apan kita nagtuo nga siya buhi gihapon, dili isip usa ka diwa, dili isip butang nga walay lawas o dili makita, apan kita nagtuo kaniya isip usa ka nahimaya nga tawo; kay siya mibangon uban sa sama nga lawas nga gilubong sa lubnganan ni Jose sa Arimathaea, ang samang lawas nga nangalagad ngadto niadtong kinsa nahigugma kaniya. Ang sama nga Jesukristo kinsa mibangon gikan sa lubnganan, midala uban kaniya niana nga lawas nga naputli ug nalimpyohan, … ug siya mikuha niini uban kaniya sa dihang nawala siya sa mga panan-aw sa katawhan sa Jerusalem sa dihang ang duha ka lalaki nga nagsul-ob og puti miingon: “Siya mobalik ra unya sa paagi nga sama sa inyong nakita sa iyang pagsaka sa langit.” [Tan-awa sa Mga Buhat 1:10–11.]

Mao kini si Jesus sa Nazaret nga gituohan sa mga Santos sa Ulahing mga Adlaw. Nagtuo usab kita nga ang mga saad nga gihimo kalabut sa katawhan matuman, nga sa tukmang panahon, kon ang ebanghelyo masangyaw na ngadto sa tibuok yuta, ngadto sa matag nasud, kaliwat, pinulongan ug katawhan, kon ang mga tawo dili na makapangatarungan kalabut niini, kita nagtuo nga pinaagi sa gahum sa atong Langitnong Amahan ang katawhan makadawat nianang maanindot nga panalangin sa pagkabanhaw gikan sa mga patay, ug nga ang Manunubos sa katawhan moabut diha sa mga panganod sa langit uban sa gahum ug himaya aron mopuyo ibabaw niini nga yuta. Kita nagtuo nga si Jesus sa Nazaret moanhi aron mopuyo uban niadtong kinsa takus sa celestial nga himaya.⁹ [Tan-awa sa sugyot 2 sa pahina 36.]

Atong gidawat ang pagpamatuod sa Biblia mahitungod sa balaan nga misyon ni Jesukristo.

Si Jesus sa Nazaret mikanaog ngadto sa tubig ug gibunyagan ni Juan, ug sa iyang paghaw-as gikan sa tubig, ang Espiritu Santo mikunsad nga ingon og salampati ug mipahiluna ibabaw niya. Ug usa ka tingog gikan sa langit nag-ingon, “Kini mao ang akong Anak nga pinalangga, kaniya may kalipay ako.” [Tan-awa sa Mateo 3:13–17.]

Aduna pa bay mas klaro pa niana? Ang atong talagsaon nga Biblia naglangkob sa tanan niana nga impormasyon ug daghan pa, siyempre. Kon ang mga tawo moingon o magtuo nga wala kita motuo sa balaan nga misyon ni Jesukristo, pahibaloa sila nga kita nagtuo sa tanan nga gitudlo sa Biblia kalabut kaniya. Kita nagtuo sa istorya kon sa unsang paagi nga siya mi-organisar sa iyang katawhan ug mitudlo kanila, ug kon sa unsang paagi nga sa katapusan, … siya gilansang.¹⁰

Atong gidawat sa walay pagduhaduha ang pagpamatuod sa tanan nga mga tigsulat sa unang upat ka mga basahon nga anaa sa Bag-ong Tugon kalabut sa pagkabanhaw sa Manunubos sa katawhan. Yano kaayo kini nga alang kanako walay mahunahunaon nga tawo ang mapakyas sa pagsabut niini. Ang kamatuoran mao nga human ang Manluluwas gilansang ug gipahimutang sa lubnganan siya nabuhi og balik, ug sulod sa kwarenta ka adlaw nakig-uban siya sa iyang mga disipulo, mikaon siya og isda ug dugos uban kanila, ilang nahikap ang mga agi sa mga lansang diha sa iyang mga kamot ug ang marka sa espada diha sa iyang kilid. Siya namahayag ngadto kanila samtang siya nagtindog taliwala kanila, “Tan-awa ninyo ang akong mga kamot ug mga tiil nga mao gayud ako: hikapa ninyo ako ug tan-awa kay ang espiritu walay unod ug mga bukog ingon sa inyong nakita nga ania kanako.” [Tan-awa sa Lucas 24:39–43.] Sa pagkatinuod kini dili malalis nga ebidensya ug bisan pa man daghan pa gihapon sa mga anak sa atong Amahan kinsa wala makasabut niini.¹¹ [Tan-awa sa sugyot 3 sa pahina 36.]

Ang Basahon ni Mormon ug ang pagpamatuod ni Joseph Smith nakahatag kanato og dugang nga ebidensya sa kabalaan ni Kristo.

Napangutana na kana sa karaang panahon nga dili balaan ang gigikanan ni Jesus, tungod kay Siya natawo isip usa ka gamayng bata, gipahimutang sa pasungan, ang Iyang inahan mao si Maria ug ang iyang nailhan nga amahan mao si Jose ang panday. Daghan ang midawat nga Siya usa ka buotan ug maayo nga tawo, apan nagtinguha sila sa pagkuha Kaniya sa kabalaan sa Iyang pagkatawo.

Maayo na lang, gani, alang sa mga Santos sa Ulahing mga Adlaw, kita nakadawat og pagsaksi nga kini nga mga butang tinuod; ug agig dugang niana, kita nakadawat sa pagpamatuod nga Siya miadto [sa] kasadpang dapit sa kalibutan, sama sa nahisulat diha sa Basahon ni Mormon, ug nangalagad ngadto sa mga Nephite dinhi niini nga kontinente. Wala siya miabut niining higayuna isip usa ka gamayng bata, apan Siya miabut diha sa mga panganod sa langit; ug ang Iyang pag-abut gipamahayag pinaagi sa usa ka tingog nga midulot sa kinahiladman sa matag tawo nga nagpuyo sa yuta. Siya miabut niining higayuna isip usa ka tawo gikan sa langit, ug sila nakakita sa Iyang pag-abut. Sila nasayud nga Siya mao ang Kristo, kay ang Iyang pag-abut gipanagna na sa ilang mga propeta. Siya mihatag kanila sa sama nga organisasyon nga anaa nang daan diha sa Simbahan sa Jerusalem. Siya mitudlo kanila nga sila kinahanglan gayud nga magpabunyag, sama Kaniya, pinaagi niadtong adunay awtoridad sa pagpahigayon niana nga ordinansa. [Tan-awa sa 3 Nephi 11:1–27.] Dili kini usa ka pulong sa ordinaryo nga tawo; kini pulong sa Anak sa Dios, kinsa mikayab ngadto sa Iyang Amahan, ug kinsa mibalik pag-usab, nga ang katawhan makabaton unta og laing pagpamatuod nga idugang ngadto sa gidaghanon nga gihatag na kanila.¹²

Unsa pa man ang mas direkta nga ebidensya sa pagkabanhaw gikan sa mga patay ang maanaa kay sa niana nga siya, diha sa iyang nabanhaw nga lawas, miadto taliwala [sa mga Nephite] ug mitudlo kanila sa sama nga Ebanghelyo nga iyang gitudlo sa Jerusalem? Ug karon iyang gituman ang saad nga iyang gihimo didto sa Jerusalem sa dihang siya miingon, “Ug ako adunay ubang mga karnero nga dili sakop niining torila; kinahanglan nga pagamandoan ko usab sila ug sila magapatalinghug sa akong tingog; ug usa ra unya ang panon ug usa ang magbalantay.” [Juan 10:16.] Miabut siya diha sa iyang nabanhaw nga lawas aron sa pagdala ngadto kanila sa kasayuran nga iyang gipanagna nga kinahanglang ihatag ngadto niadtong sa pagkakaron iyang gipangalagaran.

Usa kadto ka talagsaon nga kasinatian alang niadto nga mga tawo. Human sa iyang pagtudlo kanila sa tibuok adlaw … siya miayo sa ilang mga masakiton ug mipanalangin sa ilang mga anak ug mipadayon sa pagpanudlo kanila sa katahum sa iyang Ebanghelyo. Walay pagduhaduha diha sa ilang mga hunahuna nga siya mao ang Manluluwas sa kalibutan. Sila nakakita kaniya nga mianhi gikan sa langit ug nakasaksi sa iyang kahibulongan nga gahum. … Siya mianhi diha sa himaya. Ang mga anghel nanaog gikan sa langit nga ingon og diha sa taliwala sa kalayo ug gialirongan ang gagmay nga mga bata aron sila mapalibutan sa kalayo. Ug ang mga anghel nangalagad ngadto kanila. [Tan-awa sa 3 Nephi 17:6–24.]

Kadto dili sa mga hunahuna lamang, apan mga kasinatian sa ingon ka talagsaon nga kinaiyahan nga hinumduman sa kahangturan niadtong kinsa nakasinati niini. Isip mga Santos sa Ulahing mga Adlaw atong gidawat kini nga rekord isip ebidensya sa pagkabanhaw ni Jesukristo ang atong Ginoo.¹³

Dayon sa adlaw ug panahon diin kita nagpuyo adunay mitumaw nga laing indibidwal. … Si [Joseph Smith] adunay dili lamang pagsaksi sa Biblia nga si Jesus mao ang Kristo, apan siya nakakita sa Dios nga Amahan nga nagbarug sa mga panganod sa langit, gisul-uban sa himaya, ug kang Jesukristo, ang Manunubos sa kalibutan, nahimaya diha sa Iyang tuo nga kamot, ug siya nakadungog sa tingog sa Ginoo, nga nag-ingon, “Kini mao ang Akong Hinigugmang Anak, paminaw Kaniya.” [Tan-awa sa Joseph Smith—Kasaysayan 1:16–17.] Siya mipamatuod mahitungod niining mahimayaon nga panan-awon ngadto niadtong kinsa iyang mga gikauban. Ang uban nakadawat usab og pagsaksi gikan sa kahitas-an. Ang ilang pagpamatuod sa kabalaan sa misyon sa Manluluwas mitubo ug nalig-on, nga sa ingon kini dili na usa ka butang sa karaan nga kasaysayan nga ang Dios buhi ug nga si Jesus mao ang Kristo; sila nasayud niini sa ilang kaugalingon, tungod kay sila mismo nakadawat og pagpamatuod.¹⁴

Sa akong hunahuna ang usa sa labing lig-on nga mga pagpamatuod mahitungod sa kinabuhi sa atong Manluluwas mao ang pagpamatuod ni Joseph Smith kinsa mitugyan sa iyang kinabuhi isip usa ka saksi sa kamatuoran sa ebanghelyo ni Jesukristo.¹⁵ [Tan-awa sa sugyot 3 sa pahina 36.]

Matag usa kanato mahimong makabaton og personal nga pagpamatuod nga si Jesus mao ang Kristo.

Kita adunay laing pagpamatuod, laing ebidensya nga mas hingpit ug mas lig-on kay sa uban, tungod kay kini mao ang pagpamatuod nga moabut ngadto sa usa ka indibidwal kon siya makatuman sa mga gikinahanglan sa atong Amahan sa Langit. Kini mao ang pagpamatuod nga nagdilaab sa atong mga kalag pinaagi sa gahum sa Espiritu Santo, kon atong gihimo ang buhat nga giingon sa Ginoo nga kinahanglang pagahimoon kon kita gustong masayud nga ang doktrina iya ba sa Dios o iya ba sa tawo.¹⁶

Siya Mismo miingon, “Ang gitudlo ko dili akong kaugalingon, kondili iya sa nagpadala kanako. Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an.” (Juan 7:16–17) Mao kana ang Iyang kaugalingon nga saad. Kita isip mga Kristiyano sa tibuok [nga] kalibutan modawat niana nga saad ug kinahanglan nga maningkamot sa pagmatuod niini aron makita kon kini balido ba o dili. Adunay daghan kinsa nakahimo niini. Akong nahibaloan nga adunay … daghan kinsa misulay niini, daghan kinsa nasayud nga ang Dios buhi ug nga si Jesus mao ang Kristo, nga Siya mao ang Manluluwas sa kalibutan.¹⁷

Busa, dili lamang nga kita adunay ebidensya sa mga rekord … , dili lamang nga kita adunay pagpamatuod sa maayo nga mga tawo kinsa nabuhi dinhi sa yuta sa atong panahon, apan kon kita nakatuman sa mga gikinahanglan sa atong Langitnong Amahan, kon kita nakabaton og hugot nga pagtuo sa Dios, kon kita nakahinulsol sa atong mga sala, kon kita nakadawat sa bunyag pinaagi sa pagpaunlod, kon kita nakadawat sa Espiritu Santo ubos sa mga kamot sa awtorisado nga mga sulugoon sa Ginoo, ako moingon, kon kita nakabuhat sa tanan niini nga mga butang nan anaa sa matag kalag ang usa ka kahibalo nga dili gayud ikalimud nga ang Dios buhi ug nga si Jesukristo mao ang Manunubos sa katawhan. …

… Isip usa sa mapaubsanon nga mga miyembro niini nga Simbahan ako mohatag sa akong pagsaksi nga ako nasayud nga siya buhi ingon nga ako nasayud nga ako buhi. … Si Jesus mao ang Kristo, ug ako nasayud nga ang katawhan kinahanglan gayud nga makaangkon niana nga kahibalo, nga sila kinahanglan gayud nga modawat niini, ug sa iyang pinulongan kinsa anaa sa langit, “matag tuhod moluhod ug matag dila mokumpisal nga si Jesus mao ang Kristo.” [Tan-awa sa D&P 88:104.]¹⁸ [Tan-awa sa sugyot 4 sa pahina 36.]

Ang atong misyon mao ang pagpakigbahin ngadto sa tanang mga tawo sa unsay atong nasayran mahitungod ni Jesukristo.

Ako moingon nganha kaninyo mga Santos sa Ulahing mga Adlaw, walay laing katawhan sa tibuok kalibutan kinsa aduna sa tanan nga kasayuran nga anaa kanato kalabut sa kabalaan sa Manluluwas; ug kon kita wala motuo Kaniya anaa kita ubos sa mas dakong tunglo kay sa uban nga wala gayud niana nga kasayuran. Ug busa kita makasulti ngadto sa kalibutan sa walay pagduhaduha nga kita nagtuo niini nga mga butang. …

Ako mopasidungog kaninyo nga miabut sa inyong kinabuhi kini nga pribilehiyo ug kini nga panalangin. Ug karon ako naghangyo kaninyo isip inyong igsoon, nangamuyo kaninyo isip usa sa labing mapaubsanon taliwala kaninyo, ayaw itago ang inyong kahayag ilawom sa gantangan. Ayaw itago sa inyong isigkatawo ang kahibalo nga gihatag sa Dios kaninyo.

Ayaw sila palaguta, apan ayaw paghinanggaw nga itago gikan nila ang ebanghelyo ni Jesukristo. Mao lamang kana ang gahum sa Dios alang sa kaluwasan didto sa celestial nga gingharian.¹⁹

Ang labing malipayon nga mga lalaki ug labing malipayon nga mga babaye nga inyong nailhan sa kalibutan mao kadtong kinsa mipahiangay sa ilang kinabuhi ngadto sa mga pagtulun-an sa ebanghelyo ni Jesukristo. Sila mao kadtong kinsa aduna sa kasigurohan sa kinabuhing dayon; sila mao kadtong kinsa nakasabut sa katuyoan sa atong pagkatawo. … Sa akong biyahe ngadto-ngari sa kalibutan nga nagdala niini nga mensahe, ang akong kalag napuno sa kalipay, ug ang akong mga mata mihanap tungod sa mga luha, sa dihang akong nakita kon sa unsang paagi nga ang kinabuhi sa mga tawo mahimong hingpit nga mausab pinaagi sa ebanghelyo ni Jesukristo. Ako nakakita niadtong kinsa nawad-an sa kadasig, niadtong kinsa anaa sa kangitngit, niadtong kinsa mikwestyon sa katuyoan sa ilang pagkatawo, ug sa dihang natudlo ngadto kanila ang mahimayaon nga mga kamatuoran sa ebanghelyo ni Jesukristo, sila nausab, sila nakat-on nga magmalipayon, nga makontento, nga matagbaw, nga magmadasigon sa pagtuo ug pagtudlo sa ebanghelyo nga gisangyaw ni Jesukristo sa dihang siya mipuyo pa dinhi sa yuta ug mibiyahe sa Galilea.

Mga kaigsoonan, ang kalibutan wala makasabut niana, apan mao kini ang atong misyon sa pagtabang kanila nga masabtan kini, ug kini nga mensahe ihatag dili uban sa kahakog, dili uban sa kaarogante, apan uban sa gugmang putli alang sa tanan, uban sa mahigugmaong kalumo. …

Isip usa sa labing mapaubsanon taliwala kaninyo, nagpasalamat ko kaniya sa tibuok nakong kasingkasing alang sa kasigurohan nga miabut sa akong kinabuhi. … Labaw sa tanan, ako nagpasalamat kaniya alang sa kahibalo nga nagdilaab sa akong kalag; ako nasayud nga ang akong Langitnong Amahan buhi, ako nasayud nga si Jesukristo mao ang Manluluwas sa katawhan, ug nga walay laing pangalan ubos sa langit diin ang mga lalaki ug mga babaye mahimong mahimaya, kondili ang pangalan ni Jesukristo, ang atong Ginoo. Ako nasayud gayud nga siya mianhi sa kalibutan niining ulahing adlaw, nga siya mihatag og balaan nga awtoridad ngadto sa usa ka mapaubsanon nga batang lalaki kinsa nangita sa kamatuoran, ug ang resulta niana mao ang pagka-organisar sa Simbahan nga atong giapilan; ug anaa niini ang gahum sa Dios alang sa kaluwasan sa tanan niadtong kinsa motuo.²⁰

Ako nag-ampo nga unta kita magpakabuhi sa ingon aron mamahimong takus nga mga ehemplo sa Iyang katuyoan. Ako nag-ampo nga ang atong kinabuhi mahisama sa ingon nga kita unta makita pinaagi niini nga kita tinuod gayud nga mga tumutuo ni Ginoong Jesukristo.²¹ [Tan-awa sa sugyot 5 sa pahina 37.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Basaha ang istorya sa pahina 25. Unsaon man nimo sa pagtubag ngadto sa usa ka tawo kinsa nag-ingon nga ang mga Santos sa Ulahing mga Adlaw wala motuo ni Jesukristo?
Si Presidente Smith mitudlo, “Wala lamang kita nagtuo nga si Jesus sa Nazaret mipuyo sa yuta, apan kita nagtuo nga siya buhi gihapon” (pahina 28). Unsa nga mga rason ang anaa sa mga Santos sa Ulahing mga Adlaw nga motuo nga si Jesukristo buhi karon? Unsa nga mga rason ang anaa mismo kanimo nga motuo niini?
Ribyuha og daklit ang mga pahina 29–31. Unsa man ang pipila ka mga istorya o mga tudling gikan sa mga kasulatan nga nakapalig-on sa imong pagpamatuod nga si Jesukristo mao ang Anak sa Dios? Basaha ang 1 Nephi 10:17 ug paghunahuna og mga paagi nga ikaw makapalambo sa imong pagsabut sa misyon sa Manluluwas.
Samtang ikaw nagbasa sa pahina 33, hunahunaa kon sa unsang paagi nga ang pagkamasulundon sa mga baruganan ug mga ordinansa sa ebanghelyo nakapalig-on sa imong pagpamatuod kang Jesukristo. Unsa man ang mahimong buhaton sa mga ginikanan aron sa pagtabang sa ilang mga anak nga makabaton niini nga pagpamatuod?
Unsa nga mga hunahuna o mga pagbati ang anaa kanimo samtang nagbasa ka sa pagpamatuod ni Presidente Smith diha sa mga pahina 34–36? Hunahunaa ang mga higayon sa dihang ikaw nakakita sa kinabuhi sa mga tawo nga nausab tungod sa ebanghelyo ni Jesukristo. Sa unsang paagi nga ang ebanghelyo nakapausab sa imong kinabuhi?

May Kalabutan nga mga Kasulatan: Mateo 16:15–17; 17:1–5; 2 Nephi 25:26; Alma 5:45–48; Doktrina ug mga Pakigsaad 76:22–24; 110:1–4

Tabang sa pagtudlo: “[Likayi] ang tintasyon sa pagtudlo og daghang materyal…. Nagtudlo kita sa mga tawo, dili ang hilisgutan; ug … matag leksyon nga gilatid nga sukad akong nakita adunay daghang ikatudlo kay sa atong mapaambit sa gihatag nga oras” (Jeffrey R. Holland, “Pagtudlo ug Pagkat-on sa Simbahan,” Ensign, Hunyo 2007, 91).

“Nasayud ko nga ang Manunubos buhi ug malipayon nga motugyan sa akong mapaubsanon nga mga paningkamot aron sa pag-establisar sa Iyang mga pagtulun-an.”

“Atong gidawat sa walay pagduhaduha ang pagpamatuod … nga anaa sa Bag-ong Tugon kalabut sa pagkabanhaw sa Manunubos sa katawhan.”

Sa dihang ang nabanhaw nga Manluluwas mibisita sa mga Nephite, “ang mga anghel nanaog gikan sa langit nga ingon og diha sa taliwala sa kalayo ug gialirongan ang gagmay nga mga bata.”