Kapitulo 12

Usa ka Madasigon nga Tinguha sa Pagpakigbahin sa Ebanghelyo

Ang atong mga kaigsoonan sa tibuok kalibutan nagkinahanglan sa mensahe sa gipahiuli nga ebanghelyo, ug kini atong pribilehiyo sa pagpakigbahin niini ngadto kanila.

Gikan sa Kinabuhi ni George Albert Smith

Usa ka suod nga higala ni George Albert Smith misulat: “Si Presidente George Albert Smith usa ka natural nga misyonaryo. Gikan sa iyang pagkabatan-on siya aduna nay madasigon nga tinguha sa pagpakigbahin sa mga pagtulun-an sa ebanghelyo ngadto sa iyang isigkatawo, aron masayran sa ‘anak nga mga lalaki ug anak nga mga babaye sa Dios,’ ang tanan iyang giisip nga iyang mga kaigsoonan, ang mga kamatuoran nga gipadayag ngadto ni Propeta Joseph Smith.

“Sa pipila ka mga higayon ako adunay pribilehiyo nga mobiyahe sakay sa tren uban ni Presidente Smith. Matag higayon akong naobserbahan nga kon ang tren nagsugod na sa pagdagan, mokuha siya og pipila ka gagmayng basahon kabahin sa ebanghelyo gikan sa iyang bag, isulod kini sa iyang bulsa, ug dayon moadto sa mga pasahero. Sa iyang mahigalaon, masinabuton nga kinaiya siya sa dili madugay magkasuod na sa isigka pasahero, ug dayon sa mubong panahon makadungog na ko kaniya nga mosaysay sa istorya mahitungod sa pagkatukod sa Simbahan pinaagi ni Propeta Joseph Smith o moasoy mahitungod sa paglalin sa mga Santos gikan sa Nauvoo ug sa ilang mga pagsulay ug mga kalisdanan sa pagtabok sa mga kapatagan paingon sa Utah o mopasabut sa pipila ka mga baruganan sa ebanghelyo ngadto sa iyang bag-ong nakaila nga higala. Ang panag-istoryahanay magpadayon sugod sa usa ka pasahero ngadto na sa lain hangtud mahuman ang biyahe. Sa akong tibuok nga pagpakigsuod ni Presidente Smith, nga milungtad og sobra sa kwarenta ka tuig, akong nakat-unan nga bisan asa siya, una ug labaw sa tanan siya usa ka misyonaryo sa Simbahan ni Jesukristo sa mga Santos sa Ulahing mga Adlaw.”¹

Kini gisulat usab mahitungod ni Presidente Smith: “Makig-istorya siya kabahin sa relihiyon ngadto sa usa ka tiglimpyo sa panghaw nga nagtrabaho sa iyang panimalay. Panagsa ra nga iyang mataligam-an ang oportunidad sa pagpasabut sa ‘mahangturon nga mga kamatuoran sa gipahiuli nga ebanghelyo’ ngadto sa higala o sa dili kaila. Sa iyang panglantaw, mao kini ang labing maayo nga paagi sa pagkamabination, kay ang mensahe ni Kristo mao ang labing mahinungdanon nga gasa nga iyang mahatag.”² [Tan-awa sa sugyot 1 sa pahina 156.]

Tungod kay ang pagpakigbahin sa ebanghelyo mao ang hilisgutan nga kanunayng gipamulong ni Presidente Smith diha sa iyang mga pagtulun-an, mao kini ang una sa tulo ka mga kapitulo kalabut sa hilisgutan niini nga basahon. Kini nga kapitulo nag-focus kabahin sa mga rason nga kita mopakigbahin sa ebanghelyo; ang kapitulo 13 nagpresentar og pipila ka mga paagi diin kita makaapil niining importante nga buhat; ug ang kapitulo 14 naghulagway kon sa unsang paagi nga kita mahimong labing epektibo diha sa atong mga paningkamot.

Mga Pagtulun-an ni George Albert Smith

Ang kalibutan nagkinahanglan sa unsay anaa kanato—ang ebanghelyo ni Jesukristo, nga gipahiuli sa kahingpitan niini.

Ang kalibutan anaa sa kasakit, sa kalisdanan, gikan sa usa ka tumoy ngadto sa lain. Ang mga lalaki ug mga babaye nagtan-aw dinhi ug didto, nangita kon asa sila moadto aron sa pagbuhat sa mga butang nga makahatag kanila og kalinaw. … Ang ebanghelyo ni Jesukristo gipahiuli na. Ang kamatuoran nga gipadayag gikan sa langit ania dinhi ug kana nga kamatuoran, kana nga ebanghelyo, nga, kon nahibalo pa lang ang kalibutan, mao ang tambal alang sa tanan nilang mga sakit. Mao lamang kini ang butang nga makahatag kanila og kalinaw samtang ania pa sila sa yuta.³

Adunay panginahanglan alang sa mga tawo niining kalibutana nga mosubay sa ilang mga lakang ug mobalik ngadto sa pundasyon nga gipahimutang sa Tiglalang sa langit ug yuta, ang pundasyon sa hugot nga pagtuo, paghinulsol ug bunyag pinaagi sa pagpaunlod alang sa kapasayloan sa mga sala, ug pagdawat sa Espiritu Santo ubos sa mga kamot niadtong naghupot sa balaan nga awtoridad. Mao kana ang gikinahanglan sa kalibutan. Mapasalamaton gayud ako nga daghan ang nagtan-aw niana nga dalan. Sila naglakaw nga dili makakita sa dalan nga paingon ngadto sa kasubo ug kasakit, apan adunay gibutang nga makab-ot ra nga usa ka tambal alang sa tanang mga sakit—ang ebanghelyo ni Jesukristo. Adunay gitagana nga mapa alang sa tanan aron makita kana nga dalan nga, bisan kon kini pig-ot, ug lisud sundon, modala balik ngadto sa Amahan natong tanan; ug walay laing dalan nga paingon ngadto.⁴

Ang mga simbahan sa kalibutan naningkamot, sa ilang paagi, sa paghatag og kalinaw ngadto sa mga kasingkasing sa mga tawo. Sila naghupot og daghang mga hiyas ug daghang mga kamatuoran, ug daghang nahimo nga mga kaayohan, apan dili sila awtorisado sa balaanon nga paagi. Ni ang ilang mga pari gisugo sa balaanon nga paagi.⁵

Ang mga Santos sa Ulahing mga Adlaw mao lamang ang katawhan nga naghupot sa awtoridad sa atong Langitnong Amahan sa pagdumala sa mga ordinansa sa Ebanghelyo. Ang kalibutan nagkinahanglan kanato.⁶

Adunay tinuod nga kagutom sa kalibutan alang sa mga pulong sa Ginoo, ug daghang matinuoron nga mga kalag ang tinuoray nga nagtinguha nga masayud kon unsa ang gusto sa Langitnong Amahan kanila. Nakahimamat ko og daghang mga lider sa mga simbahan sa kalibutan, ug nakakita taliwala kanila og maligdong nga mga kinaiya nga maunungon sa pagbuhat og maayo, apan talagsa ra ko nakakita taliwala kanila kinsa gitawag sa pagpangalagad sa nagkalainlaing mga organisasyon sa simbahan, mga tawo kinsa adunay panabut kabahin sa mga katuyoan sa ilang pagkatawo, o kinsa nasayud kon nganong ania kita dinhi sa kalibutan. Ang mga tawo dili makatudlo sa unsay wala nila mismo mahibaloi. Kining maayo nga mga tawo, nga managsamang wala makasabut sa ebanghelyo ug sa kamahinungdanon sa mga ordinansa, nalimitahan ang ilang mga pagtudlo sa kasagaran diha sa moral nga mga leksyon ug sa pagbasa sa mga salmo ngadto sa ilang mga kongregasyon. Ang gilain nga mga tudling sa kasulatan gipili isip mga pulong alang sa mga pagpamulong kalabut sa hiyas, kamatinuoron, ubp., ang tanan niini makatabang ug makabayaw, apan diyutay ra nga mga pagwali ang gisangyaw nga nagpasabut sa mga gikinahanglan nga buhaton sa matag kalag sa dili pa kita makasulod sa gingharian sa langit. Mao kini nga kasayuran ang labing gikinahanglan sa kalibutan. Pipila lamang ka mga ministro ang adunay mensahe alang sa ilang mga kongregasyon nga nagdasig diha kanila og pagtuo sa kabalaan ni Jesukristo ug sa kamahinungdanon sa pag-ambit sa mga ordinansa sa ebanghelyo nga iyang gimando.⁷ [Tan-awa sa sugyot 2 sa pahina 156.]

Adunay daghang mga tawo nga mohangup sa kamatuoran kon hatagan og oportunidad.

Ang mga anak sa atong Amahan sa tanang dapit nagtinguha nga masayud kon unsa ang ilang angayang buhaton, apan, tungod sa rason sa dautan nga mga impluwensya nga nagpatigbabaw sa yuta, sila nalingla; ang halangdon nga mga tawo sa yuta nabutaan sa kamatuoran. … Ang kaaway nagtrabaho, ug ang bugtong gahum nga makapahinay sa iyang impluwensya mao ang ebanghelyo ni Jesukristo.⁸

Ang mga tawo nahimong madudahon sa usag usa. Wala sila motuo sa unsay ilang nadungog, ug dili sila andam sa pagbuhat sama kang Felipe, usa sa mga disipulo sa Manluluwas, nga misulti kang Natanael kon kinsa ang mibisita kaniya. Si Felipe miingon, “Ang Ginoo miabut.”

Ug siya mihulagway kaniya ug nangutana si Natanael, “Diin man siya gikan?”

Ug si Felipe mitubag, “Gikan siya sa Nazaret.” Ug dayon ang maayo nga tawo miingon, “Aduna ba guy maayong butang gikan sa Nazaret?” Miingon si Felipe, “Umari ka ug tan-awa.” (Tan-awa sa Juan 1:43–46.)

Si Natanael natudloan nga walay maayong butang nga moabut gikan sa Nazaret, apan siya mao ang tawo nga gipasabut sa Manluluwas sa kaulahian nga tinuod gayud nga Israelita—usa ka maayo nga tawo, apan nalingla tungod sa mga istorya nga iyang nadungog.

Apan sa dihang siya nakahibalo, sa dihang iyang gidawat ang pagdapit sa mga disipulo nga nag-ingon “Umari ka ug tan-awa,” siya miadto ug mitan-aw.

Kita adunay dakong kalipay ubos sa impluwensya sa Iyang Espiritu. Gusto kita nga ang tanan makatagamtam niana nga panalangin, ug busa sa dihang sila nangutana, “Unsa nga matang sa mga tawo kining ania dinhi?” ang atong tubag mao, “Umari kamo ug tan-awa.”⁹

Ang akong Langitnong Amahan … mitawag kanako sa pag-adto sa daghang mga bahin sa yuta, ug sobra sa usa ka milyon ka kilometro ang nabiyahe sukad nga ako gitawag sa pagpangalagad. Nakabiyahe ko sa daghang mga yuta ug mga klima, ug bisan asa ko moadto makakita ko og maayo nga mga tawo, anak nga mga lalaki ug anak nga mga babaye sa buhi nga Dios kinsa naghulat sa ebanghelyo ni Jesukristo, ug adunay mga liboan, mga gatusan ka liboan, minilyon kanila, kinsa modawat sa kamatuoran kon nahibalo pa lamang sila sa unsay atong nahibaloan.¹⁰

Adunay daghang dagko nga mga organisasyon sa simbahan sa kalibutan, daghang relihiyoso nga mga lalaki ug mga babaye nga nagpakabuhi sumala sa kabubut-on sa atong Langitnong Amahan sigun sa ilang pagsabut niini. …

Ang tanang mga tawo nga magpuyo sa kahayag nga gitanyag sa Ginoo kanila ug mangita kaniya diha sa tinuoray nga pag-ampo ang ilang mga kasingkasing matandog, ang ilang mga hunahuna maimpluwensyahan, ug ang oportunidad itanyag ngadto kanila aron masayud nga ang Dios namulong pag-usab.¹¹ [Tan-awa sa sugyot 3 sa pahina 156.]

Kita madasigon mahitungod sa pagpakigbahin sa ebanghelyo tungod kay kita nahigugma sa atong mga silingan.

Tingali makita sa mga anaa sa gawas nga nag-obserbar nga adunay lahi nga kadasig diha sa mga Santos sa Ulahing mga Adlaw. Sama sa gisulti sa usa ka tawo bag-ohay lang: “Talagsaon alang kanako kon unsa kamo ka malipayon sa pagpalambo sa inyong buluhaton. Dili igsapayan kon ako namulong ngadto sa usa ka batan-on o ngadto sa usa ka hingkod nga tawo, ngadto sa usa ka hardinero o usa ka pulis taliwala sa inyong katawhan, silang tanan malipayon ug kontento ug masaligon nga ilang naangkon ang ebanghelyo ni Jesukristo.” …

… Ikahibulong ba nga adunay kadasig sa atong pagsimba, nga kita adunay kinaiya nga mahimong matinguhaon nga ipakigbahin kining mahimayaon nga mga kamatuoran ngadto sa atong mga silingan? Angay ba nga ikatingala, nga sa panahon nga ang atong anak nga mga lalaki tawagon ngadto sa natad sa misyon, o kita gihangyo sa paghiklin sa atong mga buluhaton ug moadto aron mahimong mga sulugoon sa buhi nga Dios, mahatagan og gahum gikan sa langit, makaangkon og awtoridad nga gihatag niining ulahing mga adlaw, aron atong mapakigbahin sa tanang mga tawo kining talagsaon nga kamatuoran nga nakapanindot gayud sa atong kinabuhi, … nga kita mosanong sa andam ug malipayon nga paagi?¹²

Ang Ebanghelyo ni Jesukristo mao ang atong gidala. Ang tinguha sa pagluwas sa mga kalag sa katawhan mao ang nagdilaab sa atong mga kasingkasing. Dili aron mapalambo ang atong kaugalingon ug mamahimong gamhanan nga mga tawo diha sa pinansyal nga paagi; dili aron nga ang atong mga pangalan mapasidunggan dinhi sa yuta tungod sa atong mga kalampusan; apan aron nga ang anak nga mga lalaki ug anak nga mga babaye sa Dios, bisan asa man sila, mahimong makadungog niini nga Ebanghelyo, nga mao ang gahum sa Dios alang sa kaluwasan sa tanan niadtong kinsa motuo ug mosunod sa mga pagtulun-an niini. Ug kadtong kinsa motuo mosunod sa sumbanan nga gihatag sa Manluluwas sa dihang Siya miingon sa Iyang mga disipulo, “Ang motuo ug magpabautismo maluwas; apan ang dili motuo pagahukman sa silot.” [Marcos 16:16.]¹³

Hunahunaa ang responsibilidad nga anaa kanato, kon sa kawalay pagtagad o kawalay pagpakabana kita nagpakabuhi, wala magtinguha sa pagpakigbahin sa kamatuoran niadtong kinsa gihigugma sa Ginoo sama sa iyang paghigugma kanato, ug kinsa bililhon sa iyang panan-aw. Akong gibati nga kinahanglan adunay paghigmata sa pipila sa mga miyembro niini nga Simbahan. Sa akong hunahuna ang mas dakong paningkamot kinahanglang pagahimoon aron makigtunga ngadto sa mga anak sa atong Amahan sa tanang kamatuoran nga anaa niini nga Simbahan.¹⁴

Kon ang usa ka tawo masakit, kon siya atong silingan, malipayon kita nga mangalagad kaniya; kon adunay mamatay sa iyang pamilya, maningkamot kita sa paghupay kaniya. Apan sulod sa katuigan kita nagtugot kaniya sa paglakaw diha sa mga dalan nga moguba sa iyang oportunidad alang sa kinabuhing dayon, giagian ra nato siya, nga daw siya usa ka butang nga walay bili.¹⁵

Nakaamgo ba kita nga ang matag lalaki anaa sa panagway sa Dios ug anak sa Dios, ug ang matag babaye iyang anak? Dili igsapayan kon asa man sila, sila iyang mga anak, ug siya nahigugma kanila ug nagtinguha sa ilang kaluwasan. Sigurado gayud isip mga miyembro niini nga Simbahan dili kita mahimong magtinapulan. Dili kita makadawat sa mahigugmaon nga kamaayo sa atong Langitnong Amahan nga gihatag ngari kanato, ang kahibalo kabahin sa kinabuhing dayon, ug sa hinakog nga paagi dili kini ipakigbahin, naghunahuna nga kita unta mapanalanginan sa ingon. Dili ang unsay atong nadawat ang makapalambo sa atong kinabuhi, kondili ang unsay atong gihatag.¹⁶

Magmatinguhaon gayud kita sa kaluwasan sa mga tawo sa pagpakita og balaang kadasig alang sa ilang pagkabig: nga kita unta makatagamtam sa ilang mahangturon nga pasalamat ug gugma, ug ang pasalamat sa atong Langitnong Amahan, tungod sa atong dili hinakog nga tinguha nganha sa Iyang mga anak.¹⁷

Ang atong misyon ngadto sa mga anak sa atong Amahan … mao ang misyon kabahin sa kalinaw, kabahin sa panagdait sa tanang katawhan. Kini usa ka lig-on ug madasigon nga tinguha nga ipakigbahin ngadto sa tanang mga anak sa atong Amahan ang maayo nga mga butang nga sa hilabihan ka madagayaon gihatag ngari kanato; ug inubanan kini sa paglaum nga unta sila makasabut, nga kita mopadayon sa atong pagluhod, matag adlaw, ug mag-ampo nga ang ilang mga kasingkasing unta matandog, nga ang espiritu sa Dios unta mosulod sa ilang mga kalag, nga unta sila makasabut sa kamatuoran ingon nga kini gihatag ngadto kanila.¹⁸

Akong tinguha nga kining dakong Simbahan, uban sa gahum nga gihatag sa Dios niini, mas paspas unta nga mosangyaw sa kamatuoran, ug moluwas sa mga nasud gikan sa pagkalaglag. Paspas ang atong pagdaghan, isip usa ka organisasyon, apan wala kaayo ko mahimuot sa pagtubo sa gidaghanon ingon sa akong kahimuot diha sa pagtuo nga ang impluwensya nga atong gisabwag sa uban nabati alang sa kaayohan ug nga ang mga anak sa atong Amahan, gikan sa amihanan ngadto sa habagatan, ug gikan sa silangan ngadto sa kasadpan, makapaminaw sa mensahe mahitungod sa kinabuhi ug kaluwasan, nga kon wala kini dili sila makapuyo sa presensya sa Manunubos sa katawhan.¹⁹ [Tan-awa sa sugyot 4 sa pahina 156.]

Kita ang manubag sa Ginoo sa atong mga paningkamot sa pagpakigbahin sa ebanghelyo.

Kita nakadawat sa maanindot nga gasa, apan niana nga gasa adunay dakong responsibilidad. Kita gipanalanginan sa Ginoo og kahibalo labaw pa nianang sa atong isigkatawo, ug niana nga kahibalo adunay gikinahanglan nga kita mopakigbahin niini ngadto sa Iyang mga anak bisan asa man sila.²⁰

Karon, dili ko makasabut nga kita nagserbisyo sa Ginoo sa tibuok natong kusog kon atong gisalikway ang iyang mga anak, o kon atong gigahin ang dako natong panahon sa hinakog nga pagpalambo sa atong mga kaugalingon, pagtigum sa mga butang niining kinabuhi, ug pasagdan ang iyang mga anak diha sa kangitngit, nga makahimo man unta kita sa pagdala kanila ngadto sa kahayag. Ang akong pagsabut mao nga ang labing importante nga misyon nga anaa kanako niining kinabuhia mao: una, ang pagsunod sa mga sugo sa Dios, ingon nga kini gitudlo ngari kanako; ug sunod, ang pagtudlo niini ngadto sa mga anak sa akong Amahan nga wala makasabut niini.²¹

Walay laing Ebanghelyo sa kaluwasan, ug kita, akong kaigsoonan kinsa naghupot sa balaan nga priesthood, adunay responsibilidad sa pagdala niana nga mensahe, dili lamang ngadto sa kanasuran sa yuta, apan sa pagpakita niini diha sa atong kinabuhi ug sa pagtudlo niini ngadto sa atong mga silingan, nga dili pareho nato og tinuohan. Ako mopasidaan kaninyo niining adlawa nga ang Ginoo naghimo kanato nga maoy responsable sa pagtawag sa Iyang mga anak sa paghinulsol ug sa pagpakatap sa Iyang kamatuoran. Kon kita mapakyas sa pagpahimulos sa atong mga oportunidad sa pagtudlo, niining Ebanghelyo sa atong Ginoo, ngadto sa anak nga mga lalaki ug anak nga mga babaye sa Dios, kinsa dili pareho nato og tinuohan, kinsa nagpuyo taliwala kanato, Siya maningil kanato didto sa laing kalibutan sa butang nga kita napakyas sa paghimo.²²

Sa dili madugay atong makita ang rekord sa atong mga binuhatan sa yuta, ug kon kita nagmatinud-anon, sigurado ko nga ang Amahan natong tanan sa kalibutan mopasalamat kanato ug mopanalangin kanato sa pagdala og daghan kaayo sa iyang anak nga mga lalaki ug anak nga mga babaye nga makasabut sa katuyoan sa kinabuhi ug kon sa unsang paagi nga kini matagamtaman ubos sa impluwensya sa iyang espiritu.²³

Kon anaa kanato ang diwa sa ebanghelyo ang atong tinguha mao nga kita unta makatudlo og ingon ka daghan nga mga anak sa atong Amahan kutob sa atong mahimo nga matabangan, sa mahimayaon nga mga kamatuoran nga mahinungdanon alang sa ilang kahimayaan; nga kon moabut ang panahon nga kita makabarug sa atubangan sa Manunubos sa katawhan, nga kita unta makasulti ngadto kaniya: “Nianang gahum nga imong gihatag kanako, nianang kaalam ug kahibalo nga imong gihatag kanako, ako nagtinguha uban sa kalumo ug tiunay nga paghigugma, ug uban sa determinasyon ug pagkamabination sa pagdala og ingon ka daghan sa imong mga anak ngadto sa kahibalo sa ebanghelyo kutob sa akong mahimo.”²⁴ [Tan-awa sa sugyot 5 sa pahina 157.]

Kon kita mopakigbahin sa ebanghelyo ngadto sa mga anak sa Dios, ang atong ganti mao ang hilabihan nga hingpit nga kalipay uban kanila didto sa celestial nga gingharian.

Kita naggahin sa kadaghanan sa atong panahon, kasagaran kanato, sa pagtinguha sa mga butang niini nga kinabuhi nga kita mapugos sa pagbilin kon kita mobiya na niini nga kinabuhi, apan adunay imortal nga mga kalag sa atong palibut kinsa, kon atong gustohon, kita makatudlo ug makadasig sa pagkat-on sa kamatuoran, ug makatisok sa ilang mga kasingkasing og kahibalo nga buhi ang Dios. Unsa nga bahandi sa tibuok kalibutan ang labing bililhon alang kanato, kay kita makabaton sa ilang pasalamat dinhi ug sa ilang walay katapusan ug mahangturon nga pasalamat didto sa kalibutan nga moabut. Kini ang labing importante nga misyon.²⁵

Hunahunaa kon unsa ang ipasabut niini, imbis maghinakog sa pagsulay og luwas lamang sa atong gamay nga pamilya, makaihap kita og dinosena ug gatusan ka mga lalaki ug mga babaye nga atong naimpluwensyahan sa pagdawat sa Ebanghelyo sa atong Ginoo. Dayon atong bation nga napanalanginan gayud ug makatagamtam sa ilang gugma ug pasalamat hangtud sa kahangturan.²⁶

Unsa kini ka hingpit nga kalipay didto sa laing kalibutan, nga makita kining maayo nga mga lalaki ug mga babaye nga nagpakabuhi sumala sa kahayag nga anaa kanila, naningkamot sa paghimo sa ilang katungdanan ngadto sa Dios, ug tungod sa atong pakighimamat, pinaagi sa atong kadasig ug kaandam sa pagpakigbahin ngadto kanila, ilang madawat ang ubang kasayuran mahitungod sa ebanghelyo sa atong Ginoo ug madawat ang mga ordinansa sa Iyang Balaan nga Balay ug maandam alang sa pagkamiyembro sa Celestial nga Gingharian. Unsa ka dako sa kalipay ang mahimo niini nganha kaninyo, kon kanang panahona moabut na, kon kamo mobarug atubangan sa halangdon nga Maghuhukom aron sa paghatag og asoy sa pipila ka katuigan sa kinabuhi nga naggahin sa pagkamortal, kon kining mga anak sa atong Amahan nga Iyang gihigugma sama sa Iyang paghigugma kanato, magbarug tupad kanato, moingon, “Langitnong Amahan, mao kini ang lalaki, mao kini ang babaye ang unang nagdala kanako sa kasayuran mahitungod sa Imong mahimayaon nga kamatuoran nga nakaawhag kanako og usa ka tinguha sa pagpangita Kanimo sa mas madasigong paagi kay sa akong gibuhat kaniadto. Mao kini ang lalaki o mao kini ang babaye nga mihimo niining bulahan nga butang alang kanako.” Ug dili kay kana ra.

Kon kana nga panahon moabut na, kon kamo mopaingon na ngadto sa mga kapanahonan sa kahangturan, kana taas kaayo nga panahon, inyong maangkon ang gugma ug pasalamat sa matag lalaki, babaye ug bata ngadto kinsa kamo nahimong instrumento sa pagdala og mahangturong kalipay. Dili ba kana bililhon? Mahimo nga kita mogahin sa atong kinabuhi dinhi ug moangkon og pipila ka gatusan o liboan ka dolyares, mahimo nga kita adunay mga kahayopan, mga balay ug mga yuta, apan dili nato kini madala ngadto sa laing kalibutan. Wala kini kinahanglana sa kinabuhing dayon, gikinahanglan lamang kini alang kanato dinhi, apan kon atong maangkon ang pasalamat ug gugma sa ubang mga anak sa Dios, kana mokuyog kanato hangtud sa kahangturan. Hunahunaa kon unsa ang ipasabut niana! Kon ang panahon moabut nga kining kalibutana pagalimpyohan ug hinloan pinaagi sa kalayo ug mamahimong celestial nga gingharian, ang tanang mahugaw, ug ang tanang mga butang nga dili maanindot mahanaw unsa ka makalipay kini nga makaplagan nga kita aduna sa pagpakig-uban niadtong atong giserbisyohan dinhi sa pagkamortal, mahimong isigka manununod, ug pagagiyahan ni Jesukristo ang atong Ginoo hangtud sa kahangturan—dili ba kini bililhon? Dili ba kini usa ka malipayon nga oportunidad?²⁷ [Tan-awa sa sugyot 6 sa pahina 157.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Ribyuha ang “Gikan sa Kinabuhi ni George Albert Smith” (mga pahina 145–46). Sa imong hunahuna ngano nga si Presidente Smith madasigon man kaayo mahitungod sa misyonaryo nga buhat? Unsa man ang ipasabut niini alang kanimo nga mamahimong “una ug labaw sa tanan usa ka misyonaryo sa Simbahan”?
Unsa man ang gitanyag sa gipahiuli nga ebanghelyo ngadto sa kalibutan agig dugang sa “mga leksyon sa moral” nga gitanyag sa kadaghanan sa mga relihiyon? (Alang sa pipila ka mga ehemplo, tan-awa sa mga pahina 146–48.)
Basaha ang seksyon nga nagsugod sa pahina 148 (tan-awa usab sa D&P 123:12). Unsa nga mga ehemplo ang imong nakita sa mga tawo nga nakabuntog sa mga sayop nga pagtuo kabahin sa Simbahan pinaagi sa pagdawat sa pagdapit nga nag-ingon “umari ka ug tan-awa”? Unsa ang pipila ka epektibo nga mga paagi sa paghatag sa ingon nga pagdapit?
Basaha ang tibuok nga ikatulong paragraph sa pahina 151. Sa imong hunahuna ngano nga kita usahay magpanagana sa pagpakigbahin sa ebanghelyo ngadto sa atong mga silingan? Samtang ikaw nagtuon sa mga pahina 150–52, paghunahuna kon unsa ang atong mabuhat aron mabuntog kana nga pagpanagana.
Samtang ikaw nagbasa sa seksyon nga nagsugod sa pahina 152, pamalandong kon nabuhat ba nimo ang unsay gipaabut sa Ginoo nga imong buhaton sa pagpakigbahin sa ebanghelyo. Mainampoong maghunahuna kon sa unsang paagi nga matuman nimo kini nga sugo sa mas hingpit nga paagi.
Ribyuha ang katapusang seksyon sa mga pagtulun-an (mga pahina 154–56) ug hunahunaa ang tawo nga unang mipahibalo kanimo o sa imong pamilya sa gipahiuli nga ebanghelyo ni Jesukristo. Unsa man ang imong mabuhat aron mapakita o mapahayag ang imong pasalamat niana nga tawo?

May Kalabutan nga mga Kasulatan: Amos 8:11–12; Mosiah 28:1–3; Alma 26:28–30; Doktrina ug mga Pakigsaad 4:4; 18:10–16

Tabang sa pagtudlo: “Mas maayo pa nga maghisgot og pipila ka maayong ideya ug adunay maayong panaghisgutan—ug maayongpagkat-on—kay sa magdali-dali, maningkamot sa pagtudlo sa matag pulong sa manwal. … Ang dili pagdali-dali importante kaayo kon kamo gusto nga ang Espiritu sa Ginoo maanaa sa inyong klase” (Jeffrey R. Holland, “Pagtudlo ug Pagkat-on sa Simbahan,” Ensign, Hunyo 2007, 91).

“Ang Ebanghelyo ni Jesukristo mao ang atong gidala. Ang tinguha sa pagluwas sa mga kalag sa katawhan mao ang nagdilaab sa atong mga kasingkasing.”

“Kadtong kinsa motuo mosunod sa sumbanan nga gihatag sa Manluluwas sa dihang Siya miingon sa Iyang mga disipulo, “Ang motuo ug magpabautismo maluwas.’”

“Kon anaa kanato ang diwa sa ebanghelyo ang atong tinguha mao nga kita unta makatudlo og ingon ka daghan nga mga anak sa atong Amahan kutob sa atong mahimo nga matabangan.”