Kapitulo 16

“Mohalad sa Inyong mga Sakramento diha sa Akong Balaan nga Adlaw”

Ang pagbalaan sa Adlawng Igpapahulay ug ang takus nga pag-ambit sa sakrament nagdala kanato og dugang nga espirituhanong kalig-on.

Gikan sa Kinabuhi ni George Albert Smith

Isip usa ka gamayng bata, si George Albert Smith nakat-on kabahin sa kaimportante sa pagtamud sa adlawng Igpapahulay. Kasagaran kon ma-Dominggo ang grupo sa mga lalaki nga managsilingan moadto sa iyang balay human sa Sunday School aron modapit kaniya nga magdula og bola. “Sama ako sa batang mga lalaki,” miingon siya. “Naghunahuna ko nga makalingaw kaayo nga magdula og bola ug magdula og uban pa nga mga dula. Apan ako adunay talagsaon nga inahan. Wala siya moingon nga, ‘Dili ka mahimong mobuhat niini,’ apan miingon siya: ‘Anak, mas magmalipayon ka kon dili nimo kana buhaton. …’ Gusto ko nga mosulti kaninyo nga mapasalamaton ko nianang matang sa pagbansay diha sa panimalay.”¹ Ang epekto sa mga pagtudlo sa iyang inahan makita diha sa kanunay nga pagpahinumdom ni Presidente Smith sa mga Santos nga ang pagbalaan sa adlawng Igpapahulay nagdala og daghang mga panalangin.

Isip General Authority, si George Albert Smith adunay oportunidad nga makatambong og mga miting sa Dominggo sa Simbahan sa daghang mga dapit. Samtang nag-obserbar siya sa mga Santos nga nagdungan sa pagsimba sa Igpapahulay, nalipay siya sa ilang kinaiya nga adunay balaang pagtahud sa sakrament: “Gibati nako nga ang pagsabut sa kasagrado sa sakrament sa Panihapon sa Ginoo importante ngadto sa mga miyembro sa Simbahan. … Ako nagmaya sa dihang akong nakita ang atong mga kaigsoonan nga miadto sa simbahan ug miambit niini nga mga simbolo … sa takus nga paagi.”² [Tan-awa sa sugyot 1 sa pahina 208.]

Mga Pagtulun-an ni George Albert Smith

Ang sugo sa Dios nga atong ibalaan ang adlawng Igpapahulay dili usa ka palas-anon apan usa ka panalangin.

[Ang Ginoo] mitudlo kanato nga kita kinahanglan gayud nga mosunod sa pagbalaan sa Adlawng Igpapahulay. Iyang gigahin ang usa sa pito ka adlaw isip iyang adlaw, ug agig balos sa tanan niyang mga panalangin nga gihatag kanato sa laing mga adlaw kini alang kanako mora og kinahanglan gayud kita nga makaangkon og kalipay sa paghimo sa unsay iyang gihangyo nga atong buhaton sa iyang balaang adlaw, ug ako nagtuo nga gawas kon kini atong himoon dili kita makaangkon og kalipay. … Gusto niya nga kita malipay ug misulti kanato kon unsaon nato sa pag-angkon niana nga kalipay.³

Kinahanglan nga atong hunahunaon ang katuyoan sa adlaw sa [Ginoo] ug moambit sa impluwensya sa pagsimba. Pagkadako sa mahimo niini alang sa kalibutan kon tanang mga anak sa atong Langitnong Amahan—ug kitang tanan iyang mga anak—motahud sa iyang tinguha nga ang Igpapahulay kinahanglan mao ang adlaw sa pagsimba. Walay paagi sa pagbana-bana kon unsa ang makaayo nga kausaban ang mahitabo, dili lamang sa atong kaugalingong nasud, apan sa tanang kanasuran sa kalibutan kon kita motahud sa Adlawng Igpapahulay ug mobalaan niini.⁴

Ang Igpapahulay nahimong adlaw sa pagdula … —ang adlaw nga gigahin sa liboan aron sa pagsupak sa sugo nga gihatag sa Dios sa dugay na kaayong panahon, ug ako nakumbinsir nga daghan sa kasubo ug kasakit nga nagsamok ug padayon nga mosamok sa katawhan tungod sa kamatuoran nga gibaliwala nila ang iyang pag-awhag sa pagbalaan sa adlawng Igpapahulay.⁵ [Tan-awa sa sugyot 2 sa pahina 208.]

Usa sa unang mga wali nga gisangyaw dinhi niining walog [sa Salt Lake] mao kadtong kang Presidente Brigham Young, ug siya mipasidaan sa mga tawo sa pagtahud sa adlawng Igpapahulay ug sa pagbalaan niini, ug bisan unsa pa man ka lisud ang ilang mga kahimtang dili sila moadto ug motrabaho sa adlawng Igpapahulay. … Ang Simbahan ni Jesukristo sa mga Santos sa Ulahing mga Adlaw miawhag sa katawhan niini nga hinumduman ang pagbalaan sa adlawng Igpapahulay tungod kay kini makapahimuot sa atong Langitnong Amahan nga kita naghimo sa ingon.⁶

Atong tudloan kining batang mga lalaki ug batang mga babaye [sa Simbahan] samtang sila nagtubo sa pagbuhat sa mga butang nga gusto sa Ginoo nga ilang buhaton atol sa adlawng Igpapahulay, ug makapatingala ang impluwensya nga mahimo nila diha sa mga komunidad nga ilang gipuy-an. Gawas kon maghinulsol ang kalibutan sa pagkawalay pagmatngon ug pagkawalay pagpakabana niini, gawas kon kitang mga Santos sa Ulahing mga Adlaw, sa daghang mga sitwasyon, maghinulsol sa atong kinaiya sa pagkawalay pagpakabana sa balaang adlaw sa atong Langitnong Amahan, dili moabut kanato ang hingpit nga kamaya ug kalipay nga atong gitinguha nga matagamtaman dinhi, ug kini dili nato maangkon sa kahangturan.⁷

Ang ubang mga tawo daw naghunahuna nga kon sila nakatambong og espirituhanon nga mga miting o nakahimo og pipila ka bahin sa kalihokan nga gikinahanglan kanila sa Dominggo, gawasnon na sila sa pagpadayon sa mga kalingawan ug moapil sa mga kalihokan nga dili uyon sa diwa sa Igpapahulay ug matagamtaman gihapon ang suporta sa atong Amahan. Ako moingon kaninyo nga kon ang mga miyembro sa Simbahan, kinsa mas nasayud, magpadayon sa paglapas sa adlawng Igpapahulay sa pagpangita sa kalibutanon nga mga kalingawan, mawala kanila ang ilang hugot nga pagtuo; ug ang Espiritu sa atong Langitnong Amahan mopalayo gikan kanila.⁸

Dili kini butang nga walay bili ang paglapas sa adlawng Igpapahulay. Gusto kong moingon nga adunay mawala kaninyo sa matag higayon nga kamo molapas sa adlawng Igpapahulay, mas daghan ang mawala kaninyo kay sa inyong maginansya, dili igsapayan kon unsa pa man ang inyong gihunahuna nga inyong maginansya.⁹

Ang pagkalimot nga kini [ang adlawng Igpapahulay] mao ang adlaw sa Ginoo, ingon sa makita nga maoy gihimo sa uban kanato, nagpakita og pagkadili mapasalamaton. Siya migahin og usa sa pito ka adlaw, dili aron sa paghimo niini nga palas-anon, apan sa pagdala og hingpit nga kalipay sa atong kinabuhi ug sa paghimo nga ang atong mga panimalay unta mahimong pundukanan sa pamilya, nga ang mga ginikanan ug mga anak magkatapok isip pamilya nga nagpalambo sa atong gugma alang sa usag usa. …

Tahura ang adlawng Igpapahulay ug ibalaan kini, mga Santos sa Ulahing mga Adlaw, ug kini magdala nganha kaninyo og dakong kalipay ug ang atong Langitnong Amahan mohatag kaninyo og mga panalangin nga resulta gikan sa pagkamasulundon sa iyang tambag.¹⁰

Ang pagtambong sa simbahan usa ka importante nga bahin sa pagbalaan sa adlawng Igpapahulay.

Kon atong buhaton ang unsay gusto sa atong Langitnong Amahan nga ipabuhat kanato kita moadto sa iyang balaan nga balay sa adlawng Igpapahulay ug didto moambit sa sakrament agi og paghinumdom sa sakripisyo nga gihimo alang kanato sa Manunubos sa katawhan.¹¹

Kini [ang adlawng Igpapahulay] mao ang balaan nga adlaw sa Ginoo; kini mao ang adlaw nga iyang gigahin nga kita mosimba kaniya, ug niining ulahing mga adlaw siya mihatag og dugang nga sugo nga kita moadto sa balay alampoanan ug pagpuasa sa iyang balaan nga adlaw, ug didto moila sa atong mga sayop ug mohatag sa atong mga pagpamatuod diha sa atubangan sa usag usa [tan-awa sa D&P 59:9–12]. …

Niining talagsaon nga panahon nga ang mga tawo komportable nga makalingkod sa panimalay ug makadungog sa musika sa kalibutan ug maminaw sa mga pakigpulong sa publiko, ug mga wali, magpabilin sila sa ilang kaugalingong panimalay ug tingali mobati nga ilang nadawat ang tanan nga ilang madawat kon moadto sila sa dapit nga gikasabutan alang sa espirituhanon nga mga tulumanon.

Ang mga Santos sa Ulahing mga Adlaw kinahanglang dili malingla niining butanga. Dili lamang ang pulong nga atong madungog nga maoy mahinungdanon, apan ang impluwensya nga mopuno sa atong mga balay alampoanan nga nagagikan sa atong Langitnong Amahan mao ang mahinungdanon. Tingali kita adunay radyo sa atong panimalay, apan kita dili makakuha og kaayohan niini sa espirituhanong paagi, nga ingon ka dako kon kita moadto sa balay sa Ginoo sa iyang balaang adlaw, diin kita gitugutan sa pag-ambit sa Sakrament ug diin kita mag-ampo ug mangamuyo sa mga panalangin sa atong Langitnong Amahan ug modawat sa [usa ka] pagsaksi sa kamatuoran nga gitagana sa pagluwas sa katawhan.¹² [Tan-awa sa sugyot 3 sa pahina 209.]

Kini usa ka pribilehiyo nga moambit sa sakrament panahon sa adlawng Igpapahulay.

Sa akong hunahuna tingali kasagaran kanato nakaamgo kon unsa nga gasa ang miabut ngari kanato niadto nga mga okasyon sa dihang kita gitugutan sa pagpundok diha sa kamalinawon ug kahilum, nga magtigum ug moambit sa mga simbolo sa lawas ug sa gipaagas nga dugo sa Manluluwas. Kini kinahanglan, ug akong gilauman nga [kini] mao gayud, nga anaa sa mga hunahuna sa matag usa kanato ang usa ka labing sagrado ug balaan nga okasyon sa pagkaamgo nga kita nagbag-o sa atong mga pakigsaad ngadto kaniya kinsa mihatag kanato sa iyang kinabuhi aron kita mabanhaw ug mahimaya. Sa higayon nga kita moambit niini nga mga simbolo, sigurado ko nga kitang tanan nasayud nga ang sakrament, nga gi-establisar niya sa wala pa siya mamatay, kinahanglan nga alang kanato kini makabayaw ug makapadasig ug usa ka panalangin hangtud sa kahangturan.¹³

Ang sakrament mahinungdanon kaayo. Ang Ginoo Mismo mimando nga kita moambit niini nga mga simbolo. Adunay daghang mga tawo ang mituo nga kinahanglan nga mabunyagan, ug mapahigayon ang uban nga mga ordinansa sa Ebanghelyo alang kanila, ug sa gihapon sila wala magpakabana ug walay pagtagad kalabut sa sakrament sa Panihapon sa Ginoo. Kini gitamud sa atong Amahan sa Langit nga ingon ka importante nga, pinaagi sa Iyang pinalangga nga Anak, ug sa mga apostoles ug mga propeta, sama sa girekord diha sa mga kasulatan, ang mga Santos giawhag sa pag-ambit niini kanunay. Ang tulo ka mga ebanghelista [mga tigsulat sa Ebanghelyo] mipasabut niini [tan-awa sa Mateo 26:26–28; Marcos 14:22–24; Lucas 22:19–20], ug atong nasayran nga ang kasulatan, sa daghang mga dapit, nagtudlo sa kaimportante niini, ingon nga kini gitudlo sa Ginoo Mismo sa dihang Siya mipuyo diha sa unod. Ang atong Amahan sa Langit dili mohatag kanato og mga sugo o tambag nga dili importante. Siya nagtudlo kanato alang sa pagbayaw kanato, alang sa atong pagtubo ug paglambo, ug kon kita mosunod sa Iyang tambag kini moandam kanato sa pagbalik ngadto sa Iyang presensya. … Matag adlawng Igpapahulay kita gilauman nga magtigum ug moambit sa mga simbolo sa lawas ug dugo sa atong nabanhaw nga Manunubos. …

Makita usab nato ang pakisayran kalabut niini sa ika-18 nga kapitulo sa Ikatulong Nephi, diin ang Manluluwas nagtudlo sa mga tawo niini nga kontinente [sa Amerika], sama gayud sa Iyang gitudlo sa Iyang mga disipulo sa karaang kalibutan sa paghimo sa sakrament. Kini mabasa sama sa mosunod:

“Ug sa diha nga ang pundok sa mga katawhan nakakaon ug nabusog, Siya miingon ngadto sa mga tinun-an, tan-awa adunay usa nga i-orden taliwala kaninyo, ug ngadto kaniya Ako mohatag og gahum nga siya mopikas-pikas sa pan, ug mopanalangin niini, ug mohatag niini ngadto sa mga katawhan sa akong Simbahan, ngadto sa tanan niadto kinsa motuo ug mopabunyag diha sa akong ngalan.

“Ug kini kamo sa kanunay maninguha sa pagtuman, gani ingon nga Ako mibuhat, sa pagpikas-pikas sa pan, ug pagpanalangin niini, ug paghatag niini ngadto kaninyo.”

… Ang sunod nga bersikulo mabasa sama sa mosunod:

“Ug kini kamo mobuhat agi og handumanan sa akong lawas, nga Ako mipakita kaninyo. Ug kini mao ang usa ka pagpamatuod ngadto sa Amahan, nga kamo sa kanunay mahinumdom kanako. Ug kon kamo sa kanunay mahinumdom kanako, kamo makaangkon sa akong Espiritu uban kaninyo.” [3 Nephi 18:5–7.]

… Agi og dugang niana, atong nasayran nga sa atong kaugalingong panahon ang Ginoo mihatag kanato og pagpadayag kalabut niana nga hilisgutan. Diha sa seksyon 20 sa Doktrina ug mga Pakigsaad, ang Ginoo naghatag kanato og mga panudlo kalabut niana. Niana nga pagpadayag, sugod sa ika-75 nga bersikulo, Siya nag-ingon:

“Kini angay nga ang simbahan magtigum kanunay aron sa pag-ambit sa pan ug bino agi og handumanan sa Ginoong Jesus;

“Ug ang anciano ug ang pari mangalagad niini; ug niini nga paagi siya mangalagad niini—siya moluhod, uban sa katiguman … ug motawag diha sa Amahan sa maligdong nga pag-ampo, mag-ingon—”

Timan-i ang matahum nga pag-ampo nga mosunod … :

“O Dios ang Amahan sa Kahangturan, kami mangayo Kanimo, pinaagi sa ngalan sa Imong Anak, nga si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini, nga sila unta mokaon agi og handumanan sa lawas sa imong Anak, ug mosaksi nganha Kanimo, O Dios, ang Amahan sa kahangturan, nga sila andam sa pagdala nganha kanila sa ngalan sa Imong Anak, ug sa kanunay mohinumdom Kaniya ug maghupot sa Iyang mga sugo diin Siya mihatag kanila, nga sila unta sa kanunay makabaton sa Iyang Espiritu uban kanila. Amen.” [D&P 20:75–77.]

Ang pag-ampo ug ang pagpanalangin sa tubig ingon og managsama [tan-awa sa D&P 20:78–79].

Unsa ka sagrado, unsa gayud ka sagrado, ang mga pulong nga gipahayag diha sa pag-ampo sa sakrament. Ako moawhag kaninyo, akong kaigsoonan, nga kon kita modumala sa pagpahigayon sa sakrament, atong isulti … ang sakto nga mga pulong nga gihatag pinaagi sa pagpadayag, ug nga kita mohimo sa ingon uban sa Espiritu sa Ginoo. Kon kita mosulti niini nga mga pag-ampo, kinahanglan nga atong bation ang mga kahulugan nga gipahayag sa mga pulong nga atong gipamulong.¹⁴

Nabalaka ko usahay nga samtang ang sakrament gipahigayon sa pipila sa atong mga panagtigum walay kabalaan sa palibut nga unta kinahanglang maanaa. Kini usa gayud ka sagrado nga pribilehiyo. … Kadtong kinsa [moambit] sa sakrament kinahanglang anaa sa ilang mga hunahuna ang obligasyon nga gipasabut diha sa pag-ampo.¹⁵ [Tan-awa sa sugyot 4 sa pahina 209.]

Ang takus nga pag-ambit sa sakrament nagbag-o sa atong espirituhanong kalig-on.

Kita mokaon sa pisikal nga pagkaon—kana mao, kita mokaon sa pan ug tubig ubp., aron sa pagbusog sa atong pisikal nga lawas. Kini ingon gayud ka mahinungdanon nga kita moambit sa mga simbolo sa lawas ug dugo sa atong nabanhaw nga Ginoo aron sa pagdugang sa atong espirituhanong kalig-on. Naobserbahan kini nga ang mga lalaki ug mga babaye kinsa sa pipila ka tuig wala makaambit sa Panihapon sa Ginoo, hinay-hinay nga nawad-an sa Espiritu sa atong Langitnong Amahan; nawala kanila ang pagpakig-uban niini diin sila unta adunay oportunidad sa pag-apil niana nga panalangin, apan napakyas sa pagpahimulos niini. …

Akong gipakli ang usa ka tudling sa kasulatan diha sa ika-11 nga kapitulo sa Unang Mga Taga-Corinto, sugod sa ika-23 nga bersikulo, nga mabasa sama sa mosunod:

“Kay gikan sa Ginoo nadawat ko ang gikahatag ko usab kaninyo, Nga ang Ginoong Jesus, sa gabii sa pagbudhi kaniya, mikuhag tinapay:

“Ug sa nakapasalamat na Siya, kini Iyang gipikaspikas, ug miingon, Kini mao ang akong lawas nga gipikaspikas alang kaninyo; buhata ninyo kini sa paghandum kanako.

“Sa maong paagi usab, tapus sa panihapon, ang kopa gikuha niya, nga nag-ingon, Kining kopa mao ang bag-ong pakigsaad diha sa akong dugo: buhata ninyo kini, sa matag inom ninyo niini, sa paghandum kanako.

“Kay sa matag kaon ninyo niining tinapay, ug matag inom ninyo niining kopa, ginasangyaw ninyo ang kamatayon sa Ginoo hangtud sa iyang pag-anhi.

“Busa, bisan kinsa nga magakaon sa tinapay, ug magainom sa kopa sa Ginoo, sa paagi nga dili takus, makasala batok sa lawas ug dugo sa Ginoo.

“Apan ipasusi sa matag usa ka tawo ang iyang kaugalingon, ug unya pakan-a siya sa tinapay, ug paimna siya sa kopa.

“Kay bisan kinsa nga magakaon ug magainom sa walay pagpakaila sa lawas sa Ginoo, nagakaon ug nagainom siya sa hukom sa silot alang sa iyang kaugalingon.

“Mao kana ang hinungdan ngano nga daghan kaninyo mga maluya ug mga masakiton, ug ang uban nangamatay.” [1 Mga Taga-Corinto 11:23–30.]

… Gusto nakong kuhaon ang inyong pagtagad ngadto sa kamatuoran nga adunay kakuyaw kon kita mohimo niini [moambit sa sakrament] sa dili takus nga paagi. Sa dili pa moambit niini nga sakrament, ang atong kasingkasing kinahanglan nga putli; ang atong mga kamot kinahanglan nga limpyo; kinahanglan atong isalikway ang tanang dili maayo nga mga pagbati ngadto sa atong mga kaubanan; kinahanglan nga kita makig-uli sa atong isigkatawo; ug kinahanglan nga kita adunay tinguha diha sa atong mga kasingkasing sa pagbuhat sa kabubut-on sa atong Amahan ug sa pagsunod sa tanan Niya nga mga sugo. Kon kita mohimo niini, ang pag-ambit sa sakrament mahimong usa ka panalangin ngari kanato ug mobag-o sa atong espirituhanong kalig-on. …

… Kinahanglan nga atong hunahunaon og maayo ang mga pakigsaad nga atong gihimo sa atong Amahan. Atong hatagan og higpit nga pagtagad kadto nga mga pakigsaad, ug atong ipaniguro nga kita takus nga mokaon ug moinom, alang sa mga panalangin sa atong mga kalag ug alang sa pagdugang sa atong espirituhanon nga kalig-on. Kini nga mga panalangin alang kaninyo, akong mga kaigsoonan, kinsa mga sakop sa panimalay sa pagtuo. Atong pasalamatan kini, ug magpakabuhi nga takus niini, nga pinaagi sa atong kinabuhi atong mapakita ang atong pagtuo. Himoa nga walay usa kanato ang maubos sa tunglo pinaagi sa pag-ambit sa sakrament sa dili takus nga paagi, sa ingon mawad-an sa kahigayunan sa pagpakig-uban sa Espiritu sa atong Amahan.¹⁶

Kinahanglan nga kita moambit niini [ang sakrament] diha sa kamapaubsanon, uban sa pagpangandam sa limpyo nga mga kamot ug putli nga mga kasingkasing, ug uban sa tinguha nga mahimong madawat ngadto sa atong Amahan; dayon dawaton nato kini sa takus nga paagi, ug magmaya sa panalangin nga moabut kanato.¹⁷

Unta kita panalanginan sa Ginoo; unta ang Iyang Espiritu padayon nga ibu-bu ngari kanato. Unta kita maghigugmaay sa usag usa, ingon nga ang atong Amahan mimando nga kinahanglan atong buhaton. Kon kita makahimo sa pag-ambit sa sakrament sa takus nga paagi, kita makahimo sa paghigugma sa usag usa, ingon nga mao ang gusto sa Amahan; mohinumdom nga Siya nagaingon kanato: “Kon kamo dili magkahiusa, kamo dili ako.” [D&P 38:27.]¹⁸ [Tan-awa sa sugyot 5 sa pahina 209.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Basaha ang katapusang paragraph sa pahina 199. Kon ang Presidente sa Simbahan motambong sa inyong sakrament miting, sa imong hunahuna unsa man kaha ang iyang ikasulti? Unsa ang mabuhat nimo mismo aron ipakita ang mas dako nga balaang pagtahud alang sa Ginoo ug sa sakrament?
Pamalandonga ang mga pulong ni Presidente Smith sa ikaduha ug ikatulo nga mga paragraph sa pahina 200. Sa unsang paagi nga ang katilingban sa kinatibuk-an makabenepisyo kon mas daghang mga tawo ang motahud sa adlawng Igpapahulay? Unsa ang pipila ka tukma nga mga paagi sa pagtabang sa atong mga pamilya ug sa uban nga makita nga ang pagsunod sa adlawng Igpapahulay usa ka panalangin imbis nga usa ka palas-anon?
Unsa ang pipila ka mga kaayohan sa pagsimba nga manag-uban panahon sa Dominggo nga dili nato madawat pinaagi lamang sa pagtuon sa ebanghelyo diha sa atong mga panimalay? (Tan-awa sa mga pahina 202-03 alang sa pipila ka mga ehemplo; tan-awa usab sa D&P 59:9–12.)
Samtang ikaw nagbasa sa seksyon nga nagsugod sa pahina 203, pamalandonga kon unsa ang imong mabuhat aron sa paghimo sa ordinansa sa sakrament nga mas makahuluganong bahin sa imong kinabuhi. Unsa ang pipila ka epektibo nga mga paagi sa pagtabang sa mga bata sa pagpangandam alang sa sakrament ug sa pagtagad niini nga may balaang pagtahud?
Samtang ikaw nagbasa sa ikawalo nga paragraph sa pahina 207 hangtud sa katapusan sa seksyon, pangitaa ang unsay gisulti ni Presidente Smith nga mopasarang kanato sa takus nga pag-ambit sa sakrament. Ngano sa imong hunahuna nga ang takus nga pag-ambit sa sakrament nagdugang sa atong espirituhanong kalig-on?

May Kalabutan nga mga Kasulatan: Exodo 20:8–11; Isaias 58:13–14; Mateo 18:20; 3 Nephi 18:1–12; 20:8–9; Moroni 6:5–6

Tabang sa pagtudlo: “Ang usa ka hanas nga magtutudlo dili maghunahuna, ‘Unsay akong buhaton sa klase karon?’ pero mangutana, ‘Unsay buhaton sa akong mga estudyante karon sa klase?’; dili ang, ‘Unsay akong itudlo karon?’ pero, ‘Unsaon nako pagtabang ang akong mga estudyante nga makakita sa unsay ilang kinahanglang mahibaloan?’” (Virginia H. Pearce, sa Pagtudlo, Walay Labaw ka Mahinungdanon nga Tawag, 61).

“Tahura ang adlawng Igpapahulay ug ibalaan kini, mga Santos sa Ulahing mga Adlaw, ug kini magdala nganha kaninyo og dakong kalipay.”

“Ang sakrament, nga gi-establisar [sa Manluluwas] sa wala pa siya mamatay, kinahanglan nga alang kanato kini makabayaw ug makapadasig ug usa ka panalangin hangtud sa kahangturan.”