Kapitulo 19

Temporal ug Espirituhanon nga mga Panalangin gikan sa Pulong sa Kaalam

Ang atong Langitnong Amahan mihatag kanato sa Pulong sa Kaalam aron sa pagpanalangin kanato og pisikal nga kahimsog ug sa pag-andam kanato alang sa kinabuhing dayon.

Gikan sa Kinabuhi ni George Albert Smith

Sa dihang si George Albert Smith bata pa, nag-antus sa sakit nga tipus. Ang doktor kinsa mikonsulta kaniya mitambag sa iyang inahan sa pagpahigda kaniya sulod sa tulo ka mga semana, sa dili paghatag kaniya og gahi nga pagkaon, ug sa pagpainom kaniya og kape. Si Presidente Smith sa kaulahian nahinumdom:

“Sa diha nga siya nakalakaw na, akong gisultihan si mama nga ako dili moinom og kape. Ako gitudloan nga ang Pulong sa Kaalam, nga gihatag sa Ginoo ngadto kang Joseph Smith, nagtambag kanato nga dili mogamit og kape.

“Si Mama nakadala og tulo ka mga anak nganhi sa kalibutan ug ang duha namatay. Siya nabalaka kaayo kabahin nako.”

Ang batan-ong si George Albert Smith mihangyo hinoon og panalangin sa priesthood, nga iyang nadawat gikan sa iyang home teacher.

“Sa diha nga ang doktor miabut pagkasunod buntag ako nagdula sa gawas uban sa laing mga bata. Siya natingala. Iya kong gi-eksamen ug nadiskubrihan nga wala na koy hilanat ug nga ako ingon og naayo na.

“Ako mapasalamaton ngadto sa Ginoo tungod sa akong pagkaayo. Ako nakasiguro nga siya miayo kanako.”¹

Si Presidente Smith gusto nga ang mga Santos makasabut nga ang pagkamasulundon sa Pulong sa Kaalam nagdala dili lamang pisikal nga kahimsog apan espirituhanon nga mga panalangin usab. Sa usa ka sesyon sa priesthood sa kinatibuk-ang komperensya, siya misaysay sa istorya mahitungod sa propeta sa Daang Tugon nga si Daniel, kinsa nabihag ngadto sa Babelonia ug gilauman nga mokaon sa pagkaon sa hari ug moinom sa bino sa hari:

“Si Daniel usa ka propeta sa Dios, ug siya nahimong propeta tungod kay siya misunod sa mga sugo sa Dios. Gusto ko nga kamo … modawat niini nga mensahe nganha kaninyo. Si Daniel misunod sa mga pagtulun-an sa Dios uban sa iyang mga kaubanan, nga may kalabutan ngadto sa matang sa pagkaon ug ilimnon nga kinahanglan nila nga dawaton, ug mibalibad sa pagdawat sa pagkaon nga gisilbi sa lamesa sa hari. [Tan-awa sa Daniel 1:3–16.]”

Si Presidente Smith mipadayon sa pagpasabut nga tungod sa pagkamasulundon ni Daniel ngadto sa balaod sa Ginoo bahin sa kahimsog diha sa iyang panahon, wala lamang maluwas ang iyang kinabuhi, apan si Daniel nakadawat usab og dako nga espirituhanong panalangin: “ang inspirasyon sa Labawng Makagagahum.”² [Tan-awa sa sugyot 1 sa pahina 247.]

Mga Pagtulun-an ni George Albert Smith

Ang Pulong sa Kaalam mao ang mahigugmaon nga tambag gikan sa atong Amahan, kinsa nasayud sa tanang mga butang.

Akong basahon nganha kaninyo ang usa ka bahin mahitungod sa gisulti sa Ginoo ngadto sa Simbahan pagka Pebrero 27, 1833.

“Ang Pulong sa Kaalam, alang sa kaayohan sa konseho sa halangdon nga mga pari, nagtigum diha sa Kirtland, ug sa Simbahan ug usab sa mga Santos sa Zion—

“Ipadala nga katahuran; nga dili pinaagi sa sugo o pagpugos, apan pinaagi sa pagpadayag ug ang pulong sa kaalam, nagpakita sa han-ay ug kabubut-on sa Dios diha sa temporal nga kaluwasan sa tanan nga mga santos sa katapusan nga mga adlaw.”

Karon hunahunaa kana sa makadiyot—“diha sa temporal nga kaluwasan sa tanan nga mga santos sa katapusan nga mga adlaw.”

“Gihatag alang sa usa ka baruganan uban sa saad, gipahiangay ngadto sa kasarang sa maluya ug sa labing maluyahon sa tanan nga mga santos, kinsa mga santos o matawag nga mga santos.” [Tan-awa sa D&P 89:1–3.]

Dayon ang Ginoo nagpadayon sa pagsulti kanato sa mga butang nga maayo alang kanato, nagpasabut sa matang sa pagkaon nga maayo nga atong gamiton, ug dayon mipasidaan kanato batok sa pipila ka mga butang nga labing makahilo ug makadaut [tan-awa sa D&P 89:5–17].

Alang kanako isip usa ka katawhan kita napanalanginan sa kahibulongang paagi. … Ang Ginoo maloloy-on kaayo kanato, sa pagpahimangno kanato, pagtambag kanato ug pagpasidaan kanato kalabut sa daghang mga butang.³

Akong gitan-aw ang Pulong sa Kaalam isip mabination nga tambag sa atong Amahan sa langit, kinsa nagtinguha nga makita ang Iyang mga anak nga mahimong mas mahisama Kaniya. … Gidawat ko kini isip inamahan nga tambag sa usa kinsa, nasayud sa unsay akong gikinahanglan, miingon kanako: “Akong anak, kining mga butanga dili maayo alang kanimo, ug kon ikaw molikay niini ako mohatag kanimo sa pagpakig-uban sa akong Balaang Espiritu ug hingpit nga kalipay samtang ikaw nagpuyo sa kalibutan ug sa katapusan kinabuhing dayon.” Pagkabuang nako kon ako mokaon niining gidili nga mga butang, nga nakabaton sa kasiguroan nga kini ang tambag sa Ginoo nga ako kinahanglang molikay niini. Bation nako nga ubos sa tunglo kon ako moambit niini, nga Siya kinsa mas nakaila kanako kay ni bisan kinsa nag-ingon nga kini makadaut, ug mipasidaan kanako batok niini. …

… Siya naghunahuna niini nga adunay dakong importansya aron ihatag kini kanato, ug aron mopasidaan kanato, ug kon Siya kinsa nasayud sa tanang mga butang naghunahuna niini nga mahinungdanon ang paghatag og tambag kalabut niining temporal nga mga butang, unsa gayud ka kinahanglanon nga kita, kinsa wala masayud kon unsa ang giandam sa umaabut alang kanato, mabinantayong mosunod nianang balaan nga tambag. Akong gibati nga ang mga Santos sa Ulahing mga Adlaw adunay usa ka balaod diha sa Pulong sa Kaalam nga mohimaya kanila ug mobayaw kanila ibabaw niadtong kinsa napakyas sa pagtuman niini.⁴

Ang ebanghelyo ni Jesukristo mao ang pagpanalipod sa mga kalag, diin ang lawas mao ang tabernakulo, alang sa mahangturong kalipay. Pagkabuang nato kon kita motugyan ngadto sa mga nabatasan ug mga gipangbuhat sa kalibutan! … Ang atong Langitnong Amahan sa iyang pagkamabination ug paghigugma [mipasidaan]: “Agi og sangputanan sa mga dautan ug sa mga laraw nga anaa ug motungha diha sa mga kasingkasing sa dautan nga mga tawo sa katapusan nga mga adlaw, Ako nagpasidaan kaninyo, ug magpasidaan kaninyo, pinaagi sa paghatag nganha kaninyo niini nga pulong sa kaalam pinaagi sa pagpadayag.” (D&P 89:4.) … Ang katuyoan sa ebanghelyo ni Jesukristo mao ang pag-andam kanato nga makasabut sa katahum sa kinabuhi sama sa pagpasabut sa Ginoo nga kini kinahanglang pagapuy-an, pinaagi sa pagsulti kanato kon sa unsang paagi nga kita mahimong makalikay sa mga butang nga nagguba sa kalibutan.⁵

Mituo ba kamo nga ang Ginoo mihatag kanato sa Pulong sa Kaalam? Naghunahuna ba gayud kamo nga siya nasayud kon unsa ang maayo alang kanato? Sa inyong hunahuna kini makapahimuot ba kaniya kon kita mosunod niana nga balaod? Siya nag-ingon nga kini makapahimuot kaniya. Sa inyong hunahuna tinuod ba ang iyang gisulti?⁶

Mga kaigsoonan, dili kita mahimong motan-aw sa Pulong sa Kaalam nga may pagbugalbugal nga dili masilotan. Kini gihatag isip tambag, dili pinaagi sa mando o pagpamugos, apan isip usa ka pulong sa kaalam, gikan sa atong Amahan, alang sa temporal nga kaluwasan sa atong mga lawas ug pag-andam sa atong mga kalag alang sa kinabuhing dayon.⁷ [Tan-awa sa sugyot 2 sa pahina 247.]

Ang Ginoo nagsaad og kahimsog sa hunahuna ug sa lawas ngadto niadtong kinsa nagsunod sa Pulong sa Kaalam.

Mapasalamaton ko alang nianang talagsaon nga Pulong sa Kaalam, ingon kini ka yano, ug sama sa gisulti sa Ginoo, “gipahiangay ngadto sa kasarang sa maluya o sa labing maluyahon sa tanan nga mga Santos o matawag nga mga Santos.” Naghunahuna ko sa makadiyot aron mangutana … , angayan ba kita nga pagatawgon og mga Santos? Ang tanan kinsa naglaum nga pagatawgon og mga Santos kinahanglan gayud nga mga tigsunod sa Pulong sa Kaalam. Unsa man ang ipasabut niini ngari kanato? Kini naghatag kanato og kanindot sa kinabuhi, kini nagkuha gikan kanato sa makahilo nga aso nga gihanggap sa daghang mga tawo isip resulta sa pagpanigarilyo. Naglikay kini kanato nianang makalipong nga kahimtang nga maoy resulta sa pag-ugom og tabako. Kini manalipod kanato, kon kita nagtuman niini, gikan sa mga kadaut tungod sa pagpasulod sa atong lawas og [mga drugas] nga anaa sa tsa ug kape, ug gikan sa makadaut nga mga epekto sa bino. …

Ang atong Langitnong Amahan wala lamang mosulti kanato kon unsay kinahanglan natong likayan, apan nagsulti kanato kon unsa ang mahimo natong gamiton nga makaayo. Siya misulti kanato nga ang tanan nga mga lugas, ang tanan nga makaayo sa lawas nga mga hilba, ang bunga sa bagon ubp., maayo alang sa tawo. Ang unod sa mga kahayopan ug sa mga mananap sa kahanginan; ug kining mga butanga nga iyang gipasabut atong gamiton uban ang pagmatngon ug pagpasalamat; ug gusto nakong hatagan og gibug-aton ang uban sa pagpasalamat.⁸

Atong naobserbahan nga ang pagsunod sa mga balaod sa kahimsog nagdala og kalig-on sa hunahuna ug sa lawas, ug atong nadiskubrihan nga pinaagi sa pagkadili masulundon niini, ang kaluya sa hunahuna ug sa lawas mosunod. Kini mao ang atong Tiglalang, ang Amahan sa atong mga espiritu, kinsa mihatag kanato og oportunidad sa pagpuyo dinhi sa yuta, kinsa misulti nga adunay piho nga mga butang nga gipasabut nianang pagpadayag nga dili maayo alang kanato. Siya mihimo kanato og bililhon nga mga saad, kon kita mosunod niini nga balaod,—mga saad sa kaalam, sa kahimsog ug kalig-on, ug nga ang tiglaglag nga anghel mosaylo kanato ug dili mopasakit kanato, sama sa iyang gibuhat sa mga anak sa Israel [tan-awa sa D&P 89:18–21].⁹ [Tan-awa sa sugyot 3 sa pahina 247.]

Ang pagsunod sa Pulong sa Kaalam makapalig-on sa atong pagtuo ug espiritwalidad.

Ako nakumbinsir sa hingpit nga ang Ginoo sa Iyang kalooy, sa dihang Siya mihatag kanato sa Pulong sa Kaalam, mihatag niini kanato, dili lamang aron kita mahimong himsog samtang kita nagpuyo sa kalibutan, kondili aron ang atong pagtuo unta malig-on, nga ang atong pagpamatuod sa kabalaan sa misyon sa atong Ginoo ug Manluluwas unta molambo, nga sa ingon kita unta mahimong mas andam sa pagbalik sa iyang presensya kon ang atong buluhaton dinhi mahuman na. Nahadlok ko nga isip anak nga mga lalaki ug anak nga mga babaye sa Zion kita usahay mapakyas sa pagkaamgo sa kaimportante niining mahinungdanong mensahe ngadto sa kalibutan.¹⁰

Gusto ko nga mosulti kaninyo, sa akong paghukom, nga ang paggamit sa tabako, daw gamay man kini nga butang ngadto sa pipila ka mga tawo, mao ang mga paagi sa pagguba sa ilang espirituhanong kinabuhi, mao ang paagi sa pagpahilayo kanila sa pagpakig-uban sa Espiritu sa atong Amahan, mopahimulag kanila gikan sa mga pagpakig-uban sa maayo nga mga lalaki ug mga babaye, ug nagdala nganha kanila og kawalay pagtahud ug kasuko sa mga anak nga natawo nganha kanila, ug sa gihapon ang yawa moingon ngadto sa tawo, Ah, gamay ra kining butanga!¹¹

Kita nagpuyo sa usa ka panahon nga ang Ginoo namulong pag-usab ngadto sa Iyang katawhan. Kita, kinsa mga miyembro sa Simbahan, kinsa nakatuman sa mga gikinahanglan sa atong Amahan sa Langit, hingpit nga nakasabut nga ang Dios buhi ug nga Siya usa ka tigganti niadtong kinsa makugihong nagserbisyo Kaniya. Kita nakasabut nga Siya mihatag kanato og piho nga mga lagda ug mga patakaran aron modumala kanato niini nga kinabuhi, ug ang pagkamasulundon sa Iyang mga gikinahanglan mopaniguro kanato sa Iyang kalipay, ug ang mga panalangin nga gisaad mosunod sa atong pagkamasulundon; apan, kon kita mapakyas sa pagsunod sa Iyang mga pagtulun-an, kon kita mobaliwala sa Iyang maalamon nga mga tambag, nan dili nato maangkon ang saad gikan Kaniya, ug giusikan nato ang mga oportunidad nga dili na moabut kanato pag-usab. Akong gibati ang kaimportante nga ang mga Santos sa Ulahing mga Adlaw mosunod niining piho nga balaod [ang Pulong sa Kaalam]. Ako nagtuo nga pinaagi sa pagkamasulundon niini, mas labaw pa nga hugot nga pagtuo ang matagamtaman sa mga Santos sa Ulahing mga Adlaw. Atong mabasa diha sa mga pagtulun-an ni Mormon nga kon walay milagro nga mahitabo taliwala niana nga katawhan kini tungod kay sila walay hugot nga pagtuo; ug siya miingon kanila, og dugang, nga kon walay hugot nga pagtuo, “makalolooy ang kahimtang sa tawo.” [Tan-awa sa Moroni 7:37–38.] Kon kita mosupak sa nasayran nga kabubut-on sa Ginoo natural lang nga ang atong hugot nga pagtuo mokunhod, kay ang Espiritu dili sa kanunay magpabilin uban kanato. …

… Ako hugot gayud nga nagtuo nga tungod sa pagbaliwala niining yano nga gikinahanglan, ang hugot nga pagtuo mikunhod diha sa mga kasingkasing sa pipila sa atong mga tawo—nga, pinaagi sa mas piho nga pagtuman sa Pulong sa Kaalam, ang hugot nga pagtuo molambo taliwala sa mga Santos sa Ulahing mga Adlaw, ug ang mas dako nga kahibalo moabut kanato isip resulta; kay pinaagi sa pagsunod niini, adunay moabut nga usa ka kinaiya sa pagsunod sa uban nga mga balaod sa atong Amahan, ug ang pagtuman sa matag usa niini mopaniguro og usa ka panalangin.¹² [Tan-awa sa mga sugyot 3 ug 4 sa pahina 247–48.]

Pinaagi sa pagsunod sa Pulong sa Kaalam, kita nag-andam alang sa kinabuhing dayon.

Usahay maghunahuna ko kon ang mga Santos sa Ulahing mga Adlaw nakaamgo ba nga [ang Pulong sa Kaalam] gihatag ngari kanato alang sa atong kahimayaan; dili lamang alang sa atong temporal nga panalangin, apan sa pag-andam kanato alang sa espirituhanon nga kinabuhi. …

Kita gisultihan nga ang himaya sa Dios mao ang salabutan [tan-awa sa D&P 93:36], ug kitang tanan modayeg sa intelihente nga mga lalaki ug mga babaye, busa kinahanglan mao kini ang atong tinguha nga mopahimutang og pundasyon alang sa gipalambo nga gahum sa hunahuna ug dili mohimo og bisan unsa nga makapahuyang niini. Makita kini diha sa kinabuhi sa pipila nga ilang gihikawan ang ilang kaugalingon sa gahum sa panghunahuna nga matagamtaman unta nila, pinaagi sa padayon nga paggamit sa mga butang nga giingon sa atong Langitnong Amahan nga dili maayo; nahimo silang dili kaayo intelihente isip resulta, ug napakyas sa paghimo sa pagpangandam alang sa Kinabuhing dayon nga mao gayud unta ang ilang pangandoy.¹³

Kon kita mituo sama sa atong giangkon, nga si Jesus mao ang Kristo, ug nga kita mga anak sa atong Langitnong Amahan, nan kinahanglan gayud kita nga magmatngon sa pagdumala sa atong kaugalingon nga kita mahimong takus sa mga templo nga atong gipuy-an, nga gilalang sa panagway sa Dios. Pila man kanato ang nakaamgo nga sa pagpasulod ngari sa atong kalawasan sa mga butang nga gidili sa atong Amahan, atong gihugawan ang templo sa espiritu? Pila man kanato ang mihunong aron sa paghunahuna nga kon kita motugyan ngadto sa kahuyang sa unod, atong gihikawan ang atong kaugalingon sa mga oportunidad nga naghulat kanato sa umaabut, ug gipahimulag sa atong kaugalingon ang mga panalangin nga giandam sa Ginoo alang sa mga matinud-anon?¹⁴

Kon kini nga balaod, nga gipahiangay ngadto sa kasarang sa labing huyang kanato, gisunod, kini mahimong usa ka pundasyon diin mahimong ikadugang ang daghang dagko nga mga panalangin nga ikalipayng ihatag sa atong Amahan, nga sa laing paagi dili nato maangkon ug dili madawat. Sa unsa man nga paagi nga si bisan kinsa kanato mobati nga nahatagan og kaangayan sa pagbaliwala sa yano nga balaod sa Dios nga Siya, pinaagi sa Iyang kaugalingong tingog, miingon nga si bisan kinsa kanato makahimo sa pagsunod? Makapaabut ba kita nga makahimo sa pagtuman og usa ka mas taas nga balaod, ug makahimo sa pagkab-ot sa dakong kahimayaan, kon kita mapakyas sa pagtuman niining yano nga gikinahanglan?¹⁵ [Tan-awa sa sugyot 3 sa pahina 247.]

Ang labing maayo nga paagi sa pagtudlo sa atong mga pamilya sa pagsunod sa Pulong sa Kaalam mao nga kita mismo nagsunod niini.

Ang mga amahan ug mga inahan, kon sila motuman sa Pulong sa Kaalam, mahimong mapasa ngadto sa ilang mga anak ang mga hiyas ug kalig-on nga dili nila mahatag ngadto kanila sa laing paagi. Ako nagtuo nga ang pagpakig-uban sa Espiritu sa atong Amahan maanaa sa mga kasingkasing ug mga panimalay niadtong kinsa nagtuman niini nga balaod, ug ang ilang tinguha nga magmasulundon mapasa ngadto sa ilang mga anak. … Kini usa ka nabantug nga kamatuoran nga ang epekto sa tabako diha sa utok sa bata makadaut kaayo, moguba sa panumduman ug makapaluya sa mas maayo nga pagbati; usab, nga ang epekto sa bino diha sa batan-on nga utok makahilo gayud: kini moguba sa tinguha nga mahimong buotan ug matarung, ug mosangput ngadto sa bisyo ug krimen. … Ang Ginoo mihatag kanato niini nga balaod diha sa pagkamabination ug paghigugma, nagsaad og piho nga mga panalangin kon kita mosunod sa Iyang tambag. Akong gibati ang pag-awhag kaninyo, akong mga kaigsoonan, sa pagtudlo niini diha sa inyong mga panimalay. Kuhaa ang pagtagad sa inyong nagtubo nga mga anak ngadto niini, ug ngadto sa ganti nga gipasikad sa pagtuman niini.

Tuguti ko nga mosulti kaninyo nga ang labing maayo nga pagpakita sa atong hugot nga pagtuo niana nga balaod, nga kita mituo nga kini gikan sa Dios, mao ang makanunayon nga pagtuman niini diha sa atong kinabuhi. Mahimo kitang mosangyaw niini sa tibuok adlaw, apan kon kita nakalapas niini diha sa paghimo, ang atong ehemplo mahimong makadaut niadtong atong gihigugma labaw pa sa kinabuhi, kay sila mobati nga luwas sila sa pagsunod kon asa nato sila dad-on.¹⁶

Tuguti ko sa pagpangaliyupo kaninyo, siksika ang Pulong sa Kaalam sa mainampoong paagi. Dili lang kini basahon; siksika kini sa mainampoong paagi. Diskubrihi kon alang sa unsa nga katuyoan nganong ang atong Amahan mihatag niini. Siya mihatag niini kanato uban sa usa ka saad nga hatagan og taas nga kinabuhi ug kalipay, dili kon kita mapakyas sa pagsunod niini, apan kon kita motuman niini. Basaha ang Pulong sa Kaalam diha sa atubangan sa inyong mga pamilya ug pagpakita og ehemplo. Kon kita mohimo niana ang Zion magpadayon sa pagtubo. Kon kita mohimo niana ang Simbahan sa Kordero sa Dios magpadayon nga mahimong usa ka gahum alang sa kaayohan dinhi sa kalibutan.¹⁷ [Tan-awa sa sugyot 5 sa pahina 248.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Sa pahina 239, si Presidente Smith nagpasabut sa istorya ni Daniel nga mibalibad sa pagkaon ug ilimnon sa hari. Basaha ang Daniel kapitulo 1, ug paghunahuna og usa ka kasinatian nga imong nasinati sa dihang ikaw gidahuman nga mokaon nianang butang nga gidili diha sa Pulong sa Kaalam. Unsa man ang pipila ka tukma nga mga paagi sa pagsunod sa Pulong sa Kaalam diha sa ingon nga mga kahimtang nga sa gihapon nagpakita og kamatinahuron ngadto sa uban?
Ribyuha ang unang seksyon sa mga pagtulun-an (sa mga pahina 239–41). Sa unsang paagi nga ikaw makagamit niini nga mga pagtulun-an aron sa pagtabang sa usa ka tawo kinsa naglisud sa pagsunod sa Pulong sa Kaalam?
Ribyuha og daklit ang mga pahina 241–46, diin si Presidente Smith naghisgut sa pipila ka mga panalangin nga gisaad niadtong kinsa mosunod sa Pulong sa Kaalam (tan-awa usab sa D&P 89:18–21). Sa unsang paagi nga kini nga mga saad natuman diha sa imong kinabuhi? Unsa ang uban nga mga panalangin nga imong nadawat samtang ikaw nagsunod niini nga balaod?
Sa pahina 244, si Presidente Smith nagsaad nga ang pagsunod sa Pulong sa Kaalam nagdala og usa ka “kinaiya sa pagsunod.” Unsa man ang ipasabut niining hugpong sa mga pulong nganha kanimo?
Sa imong opinyon, sa unsang paagi nga ang atong pagsunod sa Pulong sa Kaalam makatabang sa Simbahan nga “mahimong usa ka gahum alang sa kaayohan dinhi sa kalibutan”? (pahina 247). Tun-i sa mainampoong paagi ang seksyon 89 sa Doktrina ug mga Pakigsaad, ingon sa gisugyot ni Presidente Smith, ug pamalandong kon unsa ang imong mabuhat aron sa pagsunod sa Pulong sa Kaalam sa mas hingpit nga paagi.

May Kalabutan nga mga Kasulatan: 1 Mga Taga-Corinto 6:19–20; Alma 34:36; Doktrina ug mga Pakigsaad 29:34; 130:20–21

Tabang sa pagtudlo: “Makapadayag ka og gugma alang sa imong gitudloan pinaagi sa pagpaminaw og maayo ngadto kanila ug kinasingkasing nga ma-interesado sa ilang mga kinabuhi. Ang Kristohanon nga gugma adunay gahum sa pagpahumok sa mga kasingkasing ug sa pagtabang sa mga tawo nga maminaw sa mga paghunghong sa Espiritu” (Pagtudlo, Walay Labaw ka Mahinungdanon nga Tawag, 46).

Si Presidente Smith mitudlo nga tungod sa pagtuman ni Daniel sa balaod sa Ginoo bahin sa kahimsog diha sa iyang panahon, siya takus sa “inspirasyon sa Labawng Makagagahum.”

“Ang atong Langitnong Amahan wala lamang mosulti kanato kon unsay kinahanglan natong likayan, apan nagsulti kanato kon unsa ang mahimo natong gamiton nga makaayo.”