Kapitulo 14

Unsaon sa Pagpakigbahin sa Ebanghelyo sa Epektibong Paagi

Ang atong mga paningkamot sa pagpakigbahin sa ebanghelyo labing epektibo kon kita nahigugma sa atong mga kaigsoonan ug kon anaa ang pagpakig-uban sa Espiritu Santo.

Gikan sa Kinabuhi ni George Albert Smith

Sa iyang walay hunong nga mga paningkamot sa pagpakigbahin sa ebanghelyo ngadto sa uban, si George Albert Smith misunod niini nga pamahayag gikan sa iyang personal nga pamahayag sa gituohan: “Ako dili magtinguha sa pagpugos sa katawhan sa pagpuyo sumala sa akong mga sumbanan apan hinoon mohigugma kanila ngadto sa pagbuhat sa butang nga husto.”¹ Gibati niya nga ang labing epektibo nga paagi sa pagpakigbahin sa ebanghelyo mao ang pagtan-aw sa maayo nga mga hiyas diha sa mga tawo nga dili pareho nato og tinuohan ug dayon, uban sa prangka apan mabination, motanyag nga mopakigbahin og dugang nga mga kamatuoran sa gipahiuli nga ebanghelyo ni Jesukristo. Gisaysay niya ang mosunod nga kasinatian nga iyang nasinati samtang nagdumala sa European Mission:

“Nagsakay ko sa tren usa ka adlaw niana. Ang akong kauban sa compartment usa ka ministro sa Presbyterian, usa ka buotan kaayo nga lalaki, ug sa dihang gihatagan ko niya og oportunidad sa pagbuhat sa ingon, gisultihan ko siya nga ako usa ka miyembro sa Simbahan ni Jesukristo sa mga Santos sa Ulahing mga Adlaw. Nahingangha siya ug mitan-aw siya kanako nga may kahibulong. Miingon siya, ‘Wala ka ba maulaw sa imong kaugalingon nga nahisakop sa ingon nga grupo?’

“Mipahiyum ko kaniya ug miingon, ‘Akong igsoon, ikaulaw nako ang akong kaugalingon nga dili mahisakop niana nga grupo, nasayud sa unsay akong nasayran.’ Dayon nakahatag kana kanako og oportunidad nga akong gitinguha nga makig-istorya kaniya ug mopasabut kaniya sa pipila ka mga butang nga atong gituohan. …

“Adunay usa ka maayong tawo nga wala masayud sa unsay gipaningkamutan namong buhaton. Wala kami miadto didto aron hatagan siya og kasubo ni kasakit; kami naningkamot sa pagtabang kaniya. Ug samtang among giistoryahan og maayo ang sitwasyon miingon ko ngadto kaniya: ‘Sayop ang imong pagtuo sa katuyoan sa Simbahan ni Jesukristo sa mga Santos sa Ulahing mga Adlaw dinhi niini nga dapit. Ania ko dinhi isip usa sa mga representante niini, ug kon ikaw motugot lamang kanako sa pagsulti kanimo og pipila ka mga butang, tingali mobati ka og mas maayo ngari kanamo.’ Miingon ko, ‘Una sa tanan, kami naghangyo kaninyong tanan nga buotan nga mga tawo dinhi sa paghupot sa tanang mahimayaon nga mga kamatuoran nga inyong naangkon diha sa inyong mga simbahan, nga inyong nakuha gikan sa inyong mga kasulatan, hupti kanang tanan, hupti ang tanang maanindot nga mga pagbansay nga inyong nadawat diha sa inyong pang-edukasyon nga mga institusyon, tanang mga kahibalo ug kamatuoran nga inyong nabatunan gikan sa tanang tinubdan, hupti … ang tanang butang nga maayo diha sa inyong pamatasan nga miabut kaninyo agig resulta sa inyong maanindot nga panimalay; hupti ang tanang gugma ug katahum nga anaa sa inyong kasingkasing tungod sa pagpuyo sa matahum kaayo ug talagsaon nga dapit. … Kanang tanan kabahin sa ebanghelyo ni Jesukristo. Dayon manglingkod kita ug ipakigbahin kaninyo ang pipila ka mga butang nga wala pa moabut sa inyong kinabuhi nga nakapalambo sa among kinabuhi ug nakapahimo kanamo nga malipayon. Ihatag namo kini kaninyo nga walay bayad ug walay bili. Ang gihangyo lamang namo mao ang pagpaminaw sa unsay among isulti, ug kon kamo ganahan niini, dawata kini sa walay pagduhaduha. …’

“Kana ang kinaiya sa Simbahan ni Jesukristo sa mga Santos sa Ulahing mga Adlaw.”² [Tan-awa sa sugyot 1 sa pahina 182.]

Mga Pagtulun-an ni George Albert Smith

Ang misyonaryo nga buhat labing epektibo kon himoon nato kini uban sa gugma ug pagkamabination, dili sa pagpamugos o pagsaway.

Ang atong Langitnong Amahan … mipadala kanato, iyang mga representante, ngadto sa kalibutan, dili aron sa pag-obligar o pagpugos, apan sa pagdapit. “Umanhi kamo ug sumunod kanako,” mao ang gisulti sa Manluluwas, “Ug papahulayon ko kamo.” Mao kana ang gitudlo sa Ebanghelyo, ug mao kana ang atong pangalagad.³

Dili katuyoan niini nga Simbahan ang paghimo og mga pamahayag nga makapasakit sa mga pagbati niadtong kinsa wala makasabut sa mga butang. Ang buhat niini nga Simbahan dili ang pagpanaway ug pagpangita og sayop sa uban, apan diha sa diwa sa mahigugmaong pagkamabination ug sa tinguha nga magmatinabangon, ang mga representante niini modala sa mensahe sa Ebanghelyo ngadto sa kanasuran sa yuta.⁴

Diha sa tanang … mga simbahan adunay maayo nga mga lalaki ug maayo nga mga babaye. Ang maayo nga anaa niining nagkalainlaing mga relihiyon ang naghiusa kanila. Kini akong pribilehiyo nga makauban sa mga tawo sa daghang mga dapit sa kalibutan ug makaadto sa mga panimalay sa daghang mga tawo sa nagkalainlaing mga relihiyon sa kalibutan, Kristiyano ug Judeo. Nakauban nako ang [mga Muslim]; nakauban nako kadtong kinsa nagtuo ni Confucius; ug makahisgut pa ko og daghan pa. Nakakita ako og talagsaon nga mga tawo sa tanan niini nga mga organisasyon, ug ako adunay dako kaayo nga responsibilidad bisan asa ako moadto uban nila, nga dili nako sila masilo, dili mapasakitan ang ilang mga pagbati, dili mosaway kanila, tungod kay wala sila makasabut sa kamatuoran.

Isip representante sa Simbahan kita adunay responsibilidad sa pagkuyog kanila uban sa gugma, isip mga sulugoon sa Ginoo, isip mga representante sa Tiglalang sa langit ug yuta. Tingali dili silang tanan modayeg niana; tingali mosupak sila niana ingon og arogante ug dili makiangayon, apan dili kana makapausab sa akong kinaiya. Dili nako sila himoon nga masulub-on kon mahimo pa lang nako. Gusto nako nga malipay sila, ilabi na kon maghunahuna ko sa talagsaon nga mga oportunidad nga miabut kanako tungod sa pagkamiyembro niining balaan nga Simbahan.⁵

Ang atong pangalagad mao ang paghigugma ug pagpailub, ug kita nagtinguha sa paghimo og maayo ngadto sa tanan, ug sa pagtabang sa tanan aron makasabut sa plano sa kinabuhi ug kaluwasan nga gipadayag sa Ginoo niining ulahing mga adlaw.⁶

Dili kita makapugos niining mga batan-on, ug sa atong mga silingan ug mga higala ngadto sa gingharian sa langit pinaagi sa pagpangasaba kanila ug pagpangita og sayop kanila, apan gusto ko nga mosulti kaninyo nga kita makahigugma kanila paingon ngadto sa nahimutangan sa atong Amahan sa langit, ug sa hinay-hinay, tingali, modala kanila usab didto.

Kana ang atong pribilehiyo. Ang gugma mao ang dakong gahum sa pag-impluwensya niini nga kalibutan.⁷

Himoon nato kinsay nakahibalo, kadtong anaa uban kanato nga adunay pagpamatuod, sa pag-adto matag adlaw ug uban sa tiunay nga gugma ug kamabination nga anaa niining mga lalaki ug mga babaye, maanaa man sila sa sulod sa Simbahan o sa gawas sa Simbahan, ug mangita og paagi sa pagtandog sa ilang mga kasingkasing ug mogiya kanila ngadto niana nga dalan nga mopaniguro kanila og kahibalo sa kamatuoran.⁸

Nag-ampo ko og maayo nga kita isip mga sulugoon sa Ginoo unta adunay gugmang putli alang sa katawhan, unta adunay pailub niadtong nakasala, ug sa pagkamabination ug gugma mopadayon sa unahan sa pagtudlo sa yano nga mga baruganan sa ebanghelyo sa atong Ginoo aron mapanalanginan ang tanang kalag nga atong mahimamat.⁹ [Tan-awa sa sugyot 2 sa pahina 183.]

Kita kinahanglan nga dili maulaw sa pagpakigbahin sa unsay atong nahibaloan nga tinuod.

Ako mobati usahay nga wala kaayo nato mabati ang kaimportante [sa ebanghelyo], nga kita wala motudlo niini uban sa pagkasinsero nga gikinahanglan niini.¹⁰

Kini nga ebanghelyo ni Jesukristo mao ang gahum sa Dios alang sa kaluwasan, ingon sa gipamahayag ni Apostol Pablo [tan-awa sa Mga Taga-Roma 1:16]. Kini ang buhat sa Manunubos. Kini mao lamang ang paagi diin mahimo natong makab-ot ang kinatas-an sa kahimayaan nga gitinguha sa Manluluwas sa katawhan nga matagamtaman niadtong misunod kaniya. Wala ko nagsulti niana sa mapahitas-on nga paagi, ako nagsulti niini uban sa gugmang putli alang sa mga anak sa atong Amahan kinsa nahisakop sa laing mga simbahan. Ako nagsulti niini uban sa gugma alang sa iyang anak nga mga lalaki ug anak nga mga babaye nga wala makasabut, apan siya mimando nga kita kinahanglang mosulti niining butanga. Kini iyang kabubut-on nga ang mga tawo kinahanglang masayud.¹¹

Nasayud ako nga ang Dios buhi. Nasayud ako nga si Jesus mao ang Kristo. Nasayud ako nga si Joseph Smith usa ka propeta sa Ginoo. Wala ko sukad makaadto bisan asa nga akong gikaulaw ang pagpamatuod niining mga kamatuoran. Wala ko masayud kon ngano nga ang usa ka tawo kinahanglang ikaulaw ang pagkasayud sa kamatuoran tungod kay ang laing tawo wala masayud niini, ilabi na kon kini may kalabutan sa ebanghelyo nga mao ang gahum sa Dios alang sa kaluwasan.¹²

Dili kini angayang ikonsiderar nga pagpanghambog kon kita nasayud sa kamatuoran aron atong ipahayag ang atong kaugalingon. Dili angayang isipon nga mapahitas-on diha sa atong panglantaw kon kita makaingon ngadto sa uban nga mga anak sa atong Amahan: “Mao kini ang akong nasayran, ug kamo usab mahimong masayud niini kon gusto ninyo.”

Ingon niana katahum ang ebanghelyo ni Jesukristo. Dili kini alang sa kasayuran sa pipila lamang ka mga indibidwal, apan sa tanang kalag nga natawo niini nga kalibutan. … Karon adunay mga nasayud nga ang Dios buhi, ug adunay liboan pa nga mahimong masayud kon gustohon nila. … Kini nga mga tawo wala magdepende kanato aron masayud, apan nagdepende sila kanato sa pagtudlo kanila kon unsaon nga sila mahimong masayud.¹³

Nasayud ko nga ang atong Langitnong Amahan namulong niini nga adlaw ug panahon sa kalibutan, nga ang iyang Ebanghelyo ania sa yuta, ug samtang ako dili mamugos ni bisan kinsa nga kalag sa pagdawat niini, ako nag-ampo nga kita unta adunay gahum ug kaalam ug kalig-on sa pagtabang niining atong mga silingan kinsa wala makasabut sa kamatuoran. Buhaton nato ang atong katungdanan, ug paduolon sila ngadto sa panon sa Manluluwas, nga sila, uban kanato, masayud unta nga siya buhi.¹⁴ [Tan-awa sa sugyot 3 sa pahina 183.]

Atong tinguhaon ang pagdugang ngadto sa kalipay ug kamaayo nga anaa na sa mga anak sa Dios.

Sa dihang ang [mga tawo] nangutana kanako, “Unsa man ang anaa niini nga organisasyon nga imong giapilan? Unsa man ang inyong gikabalak-an og maayo, nga kamo nagpadala sa inyong mga misyonaryo sa tibuok kalibutan?” Mitubag ko usahay, “Gusto namo nga kamong tanan magmalipayon. Gusto namo nga kamo magmaya sama sa among pagmaya.”¹⁵

Liboan ka mga misyonaryo … ang nakaadto sa kalibutan, ug diha sa gugma ug pagkamabination nakaadto sa matag pultahan nga nag-ingon ngadto sa ubang mga anak sa atong Amahan:

“Tuguti kami nga mosulti kaninyo; tuguti kami nga mopasabut kaninyo sa butang nga kami sigurado nga makapalipay kaninyo ingon nga kini nakapalipay kanamo!”

Mao kana ang kasaysayan sa misyonaryo nga buhat sa Simbahan nga atong giapilan.¹⁶

Akong nahinumduman, sa usa ka okasyon, ang usa ka tawo miingon kanako, human sa among dugay-dugay nga panag-istoryahanay, “Hinoon, gikan sa tanan nakong nahibaloan, ang inyong simbahan pareho ra ka maayo sa uban nga simbahan.” Ako naghunahuna nga nagtuo siya nga nakahatag siya kanato og maanindot nga pagdayeg; apan miingon ko kaniya: “Kon ang Simbahan nga akong girepresentar dinhi walay ikadugang nga butang nga mas mahinungdanon ngadto sa katawhan kay sa uban nga simbahan, nan nasayop ko sa akong katungdanan dinhi. Mianhi kami dili aron kuhaon gikan kaninyo ang kamatuoran ug hiyas nga anaa kaninyo. Wala kami moanhi aron sa pagpangita og sayop diha kaninyo o sa pagpanaway kaninyo. … Hupti ang tanang maayo nga anaa kaninyo, ug tuguti kami nga modala kaninyo og dugang pa nga maayo, aron kamo mahimong mas malipayon ug aron kamo maandam sa pagsulod sa presensya sa atong Langitnong Amahan.” [Tan-awa sa sugyot 4 sa pahina 183.]

… Sa dihang ang Manluluwas dinhi pa sa yuta, sa tunga-tungang kapanahonan, adunay laing mga simbahan; adunay daghan kaayong mga relihiyon ug mga sekta, ug nagtuo sila nga nagserbisyo sila sa Ginoo. Ang dagkong mga sinagoga sa Judea napuno sa mga tawo kinsa nagtuo nga sila adunay awtoridad sa priesthood. Gisunod nila ang mga pagtulun-an, nga sa ilang hunahuna, ila ni Abraham ug ni Moises. Gipadayon nila sa pagsangyaw ang pag-anhi sa Manluluwas sa kalibutan. Nag-awhag sila sa mga lalaki ug mga babaye ngadto sa mga buhat sa pagkamatarung. Nagtukod sila og templo, ug mga balay nga ampoanan. Nagtukod sila og mga monumento sa mga propeta kinsa nakahatag og pagpamatuod kabahin sa pagkaanaay Dios, ug ang pipila kanila gipatay ug gisilyohan ang ilang pagpamatuod sa dugo sa ilang kinabuhi. Mao kini ang mga tawo nga gianhi sa Manluluwas. … Adunay daghang mga maayo diha kanila. Adunay daghang maayo nga mga lalaki ug maayo nga mga babaye taliwala kanila. Adunay daghang pagkamatarung taliwala niana nga katawhan. Ang Manluluwas wala moanhi aron kuhaon ang bisan unsa niadtong maayo nga mga butang gikan kanila. Sa dihang nagpakita siya taliwala kanila kadto dili aron sa pagpanghimaraut kanila, apan kadto aron sa pagtawag kanila aron maghinulsol, kadto aron sa pagtawag kanila sa pagbiya sa ilang sayop ug sa pag-awhag kanila nga ipabilin ang tanang kamatuoran nga ilang naangkon.

… Kon kita mosangyaw sa tawhanong pamilya, sama sa atong gihimo, nga ang tawo mipahilayo sa kamatuoran gikan sa ebanghelyo, wala kita magsangyaw og butang nga wala mahitabo sa kalibutan kaniadto. Kon kita moingon nga ang maayo nga mga lalaki ug mga babaye gidala sa pagbuhat ug pagtuo sa mga butang nga dili husto, wala nato kana isulti diha sa panghimaraut, wala kita mamulong uban sa tinguha nga mopasakit, apan kita mamulong uban sa tinguha nga ang mga tawo mahimong mohunong og igong gidugayon aron sa pagsusi sa ilang kaugalingon, aron sa pagsiguro kon asa sila padulong ug unsa ang ilang katapusang padulngan.¹⁷

Ah! nga kita unta makahimo sa paghatag sa katawhan og panabut sa atong mga pagbati, nga sila unta makaamgo nga kita wala magtinguha sa pagpugong sa ilang mga oportunidad, apan nga sila unta mobati nga ang atong kasingkasing adunay pagbati alang kanila diha sa gugma ug pagkamabination, dili sa bisan unsa nga tinguha nga makapasakit. Ang atong misyon sa kalibutan mao ang pagluwas sa mga kalag, sa pagpanalangin kanila, ug sa pagbutang kanila sa usa ka kahimtang nga sila mahimong mobalik ngadto sa presensya sa atong Amahan, kinoronahan sa himaya, pagka-imortal, ug kinabuhing dayon.¹⁸

Kon kita magtudlo uban sa Espiritu Santo, Siya mosaksi sa kamatuoran ngadto niadtong atong gitudloan.

Ang mga misyonaryo gipadala ngadto sa lainlaing dapit sa yuta pinaagi niini nga Simbahan ug sila misangyaw sa Ebanghelyo ni Jesukristo. Adunay daghan nga wala mabansay sa dagkong mga unibersidad sa kalibutan. Ang ilang edukasyon sa kasagaran nalimitahan sa praktikal nga mga kasinatian sa kinabuhi, apan sila adunay mas kusganong pagdasig sa tawhanong pamilya, ang pagpakig-uban sa Espiritu Santo.¹⁹

Sa akong pag-adto ngari sa natad sa misyon akong nakita ang kalamboan niining buotan nga mga lalaki ug mga babaye kinsa nagserbisyo sa dili hinakog nga paagi, ug nakaamgo nga wala lamang sila nakat-on sa mga pinulongan sa mga nasud nga ilang gialagaran, apan sila nasayud nga sila adunay gasa sa Ginoo sa pagsangyaw sa kamatuoran nga dili mahimong maangkon sa mga tawo sa laing paagi.²⁰

Daghan kaninyo o inyong mga katigulangan ang nakadungog sa ebanghelyo ingon nga kini gitudlo pinaagi sa Simbahan ni Jesukristo sa mga Santos sa Ulahing mga Adlaw. … Usahay madungog ninyo kini diha sa kadalanan diin adunay mapaubsanon nga misyonaryo, nagtudlo sa unsay ipatudlo sa Ginoo kaniya.

Adunay usa ka butang nga nakatandog sa mga kasingkasing niadtong kinsa naminaw. Ako adunay mga kasinatian sa natad sa misyon. Nakakita ko og mga grupo sa mga tawo nga nagbarug ug naminaw sa usa ka mapaubsanon nga misyonaryo nga nagpasabut sa katuyoan sa kinabuhi ug nakig-istorya sa mga tawo ug nag-awhag kanila sa paghinulsol sa ilang mga sala, ug nakadungog ko usahay sa mga tawo nga nag-ingon, “Wala gayud ako mobati sukad og impluwensya nga sama sa akong gibati samtang ako naminaw niana nga tawo nga namulong.”²¹

Dili igsapayan kon unsa pa kita kahanas, o unsa kamaayo natong manulti, ang Espiritu sa atong Amahan mao ang motandog sa kasingkasing ug magdala og kombiksyon sa kabalaan niini nga buhat.²²

Kini ang buhat sa Ginoo. Ang mga tawo dili unta makahimo niini sa malampusong paagi ingon sa nahimo sa yano nga mga paagi nga gigamit nato. Ang ordinaryong tawo dili unta makadala nganha sa inyong mga kalag sa kahibalo nga inyong naangkon. Ni makahimo kita isip mga tawo sa pagdasig niadtong anaa sa kalibutan uban sa kasiguroan nga ang Dios buhi ug nga kini iyang Simbahan, apan kon kita mobuhat sa atong bahin, ang atong Langitnong Amahan mopanalangin sa atong paningkamot.²³

Magtrabaho kita sa matag adlaw aron ang atong Amahan mopanalangin unta kanato. Kon anaa kanato ang Iyang Balaang Espiritu, ang mga tawo nga atong mahimamat mobati niini, tungod kay kini mopuno sa palibut nga atong gipuy-an, ug sila moambit niini ug moinum niini.²⁴

Adunay pipila lamang ka mga tawo kinsa midawat sa ebanghelyo ingon nga kini gipadayag sa ulahing mga adlaw; apan adunay minilyon sa mga anak sa atong Amahan kinsa matinguhaon nga masayud sa Iyang kabubut-on; ug kon ang kamatuoran pagadad-on ngadto kanila, ug ang makapakumbinsir nga impluwensya sa Espiritu mosaksi sa kamatuoran ngadto kanila, sila magmaya sa pagdawat niini.²⁵ [Tan-awa sa sugyot 5 sa sunod pahina.]

Mga Sugyot alang sa Pagtuon ug Pagtudlo

Ikonsiderar kini nga mga ideya samtang ikaw nagtuon sa kapitulo o samtang ikaw nangandam sa pagtudlo. Alang sa dugang nga tabang, tan-awa sa mga pahina vii–x.

Tun-i ang katapusang duha ka mga paragraph sa “Gikan sa Kinabuhi ni George Albert Smith” (mga pahina 174–75). Paghunahuna og tawo nga imong nailhan nga dili miyembro sa Simbahan. Unsa nga mga kinaiya ang imong nagustohan niini nga tawo? Unsa nga mga kamatuoran sa ebanghelyo nga iya nang gituohan? Unsa nga dugang nga mga kamatuoran sa ebanghelyo nga labing makatabang kaniya? Sa unsa nga paagi nga ang paghunahuna kalabut sa mga tawo niini nga paagi makaapekto sa paagi sa atong pagpakigbahin sa ebanghelyo ngadto kanila?
Samtang ikaw nagbasa sa unang seksyon sa mga pagtulun-an (mga pahina 175–77), paghunahuna kalabut sa usa ka higayon sa dihang ikaw naimpluwensyahan alang sa kaayohan pinaagi sa gugma nga gipakita sa usa ka tawo kanimo. Ngano nga importante ang paglikay sa pagsaway niadtong kansang mga gituohan lahi kay sa ato?
Basaha ang seksyon nga nagsugod sa pahina 177. Unsa ang ipasabut sa pagpakigbahin sa ebanghelyo uban sa “pagkasinsero”? Sa unsang paagi nga kita makapakigbahin sa atong mga pagpamatuod sa gipahiuli nga ebanghelyo nga dili hambog paminawon o mapahitas-on?
Sa imong hunahuna unsa ang ipasabut ni Presidente Smith sa dihang miingon siya, “Kon ang Simbahan nga akong girepresentar dinhi walay ikadugang nga butang nga mas mahinungdanon ngadto sa katawhan kay sa uban nga simbahan, nan nasayop ko sa akong katungdanan dinhi”? (pahina 179). Unsa ang gitanyag sa Simbahan ni Jesukristo nga makadugang sa kalipay diha sa kinabuhi sa usa ka tawo?
Samtang ikaw nagbasa sa katapusang seksyon sa mga pagtulun-an (mga pahina 181–82), paghunahuna og kasinatian nga imong nasinati diin imong gipakigbahin ang ebanghelyo ngadto sa usa ka tawo. Unsa ang nakahimo sa kasinatian nga malampuson? Unsa ang imong mabuhat aron molambo ang imong mga paningkamot sa pagpakigbahin sa ebanghelyo?

May Kalabutan nga mga Kasulatan: Juan 13:34–35; 2 Timoteo 1:7–8; 2 Nephi 33:1; Alma 20:26–27; Doktrina ug mga Pakigsaad 50:13–22

Tabang sa pagtudlo: Ikonsiderar ang pagbahin-bahin sa mga sakop sa klase ngadto sa gagmay nga mga grupo sa tulo o lima ka mga indibidwal. Pagpili og lider kada grupo. I-assign ang kada grupo og lainlain nga hilisgutan. Hangyoa sila sa pagbasa sa ilang seksyon isip usa ka grupo ug sa paghisgut sa may kalabutan nga mga pangutana sa katapusan sa kapitulo. Dayon himoa nga ang mga sakop sa klase mopakigbahin sa tibuok klase sa unsay ilang nakat-unan sa ilang mga grupo. (Tan-awa sa Pagtudlo, Walay Labaw ka Mahinungdanon nga Tawag, 161.)

“Kita nagtinguha sa paghimo og maayo ngadto sa tanan, ug sa pagtabang sa tanan aron makasabut sa plano sa kinabuhi ug kaluwasan nga gipadayag sa Ginoo niining ulahing mga adlaw.”

“Magtrabaho kita sa matag adlaw aron ang atong Amahan mopanalangin unta kanato. Kon anaa kanato ang Iyang Balaang Espiritu, ang mga tawo nga atong mahimamat mobati niini.”