“Paglalang,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Paglalang
Ang katuyoan sa Dios sa paglalang sa tanang butang alang sa Iyang mga anak
Kanus-a ang kataposan nga higayon nga kamo mitan-aw sa mga bitoon sa kagabhion nga kalangitan, naminaw sa mga balod diha sa baybayon, o naglakaw sa kinaiyahan? Nagpuyo kita sa matahom nga kalibotan. Samtang kita wala masayod sa daghang detalye mahitungod kon giunsa sa paglalang ang yuta, kita nasayod nga kini gilalang ni Jesukristo ubos sa direksiyon sa Dios nga Amahan. Ug kita nasayod kon nganong kini gihimo. Ang propeta nga si Moises sa makausa nakakat-on diha sa usa ka langitnong panan-awon nga ang Dios milalang sa mga kalibotan nga dili maihap (tan-awa sa Moises 1:7–8, 27–29). Ang Dios mipasabot ngadto ni Moises nga Siya milalang sa yuta aron, “[sa] pagpahinabo sa pagka-imortal ug sa kinabuhi nga dayon sa tawo” (Moises 1:39). Kon atong masabtan nga ang Paglalang gipatuman pinaagi sa direksiyon ug gahom sa Dios Mismo, atong makita og sugod kon unsa kamahinungdanon kini sa Iyang plano alang sa atong kaluwasan.
Unsa ang Paglalang?
Ubos sa direksyon sa Dios Amahan, si Jesukristo milalang sa mga langit ug yuta ug sa tanang butang sa yuta. Ang Langitnong Amahan milalang ni Adan ug Eva sa Iyang kaugalingong panagway, naghimo niining posible alang sa Iyang mga anak aron matawo dinhi sa kalibotan.
Kinatibuk-ang pagpasabot sa hilisgotan: Paglalang
May kalabotan nga mga giya sa pagtuon sa ebanghelyo: Plano sa Kaluwasan, Kinabuhi sa Wala pa Dinhi sa Yuta, Jesukristo, Pagkapukan ni Adan ug Eva, Mortal nga Kinabuhi
Seksiyon 1
Si Jesukristo Milalang sa Kalibotan ubos sa Direksiyon sa Langitnong Amahan
Diha sa konseho sa langit sa wala pa dinhi sa yuta, ang Dios Amahan mipahibalo sa Iyang plano sa pag-andam sa yuta diin ang Iyang mga anak makasinati og mortalidad (tan-awa sa Abraham 3:24–25). Gipakita sa kasulatan nga si Jesus mipatuman sa Paglalang ubos sa direksiyon sa Dios Amahan (tan-awa sa Moises 2:1). Ang Paglalang sa yuta nahitabo sa unom ka hugna, diin ang mga kasulatan mitawag niini nga “mga adlaw”, (tan-awa sa Moises 2:1–31; Genesis 1:3–31; Abraham 4:1–31). Ang Ginoo wala pa mipadayag kon unsa ka dugay ang matag “adlaw” (tan-awa sa Doktrina ug mga Pakigsaad 101:32–34). Ang mga kasulatan nakatutok sa katuyoan sa Paglalang kay sa proseso nga gigamit sa Dios sa pagpahinabo niini. Tanang butang mahitungod sa Paglalang nagpamatuod sa tiglalang niini, si Jesukristo (tan-awa sa Moises 6:63).
Mga butang nga angay hunahunaon
-
Basaha ang tulo ka nag-unang mga asoy sa kasulatan sa paglalang sa yuta: Genesis 1:1–25; Moises 2:1–25; ug Abraham 4:1–25. Unsa ang inyong makat-onan pinaagi sa pagtandi niining mga asoy?
-
Basaha ang Doktrina ug mga Pakigsaad 101:32–34. Nasayod nga adunay daghan pa kaayo ang ipadayag, unsaon nimo paggamit ang napadayag na mahitungod sa Paglalang aron mapalig-on ang inyong pagtuo karon?
Kalihokan alang sa pagkat-on uban sa laing tawo
-
Hatagi ang matag tawo og usa ka palid nga papel. Ipapilo kini kanila og katunga sa tulo ka higayon ug dayon bukhara kini aron mabahin bahin sa walo ka seksiyon. Ipasulat kanila o ipadrowing diha sa ilang papel unsa ang nahitabo atol sa matag adlaw sa Paglalang, usa ka adlaw sa matag seksiyon, numerohan ang mga adlaw samtang sila magpadayon. Sa ikawalo nga kwadra, ipasulat o ipadrowing ang butang mahitungod sa Paglalang nga mapasalamaton kaayo sila (pananglitan, sa ilang pamilya, sa kadagatan, sa mga hayop, sa niyebe, ug uban pa).
Pagkat-on pa og dugang
-
Mga Taga-Colosas 1:9–17; Doktrina ug mga Pakigsaad 76:22–24; Moises 1:27–39
-
Russell M. Nelson, “The Creation,” Ensign, May 2000, 84–86
-
Bruce R. McConkie, “Christ and the Creation,” Ensign, June 1982, 9–15
-
Thomas R. Valletta, “The Length of Creation,” Liahona, Mar. 1998, ChurchofJesusChrist.org
-
Alicia K. Stanton, “Ang Syensya ug ang Atong Pagpangita sa Kamatuoran,” Liahona, Hulyo 2016, 54–57
-
“We Lived with God” (bidyo), ChurchofJesusChrist.org
Seksiyon 2
Ang Labing Dakong Paglalang sa Tanan Mao ang Katawhan
Si Adan ug si Eva, ang unang lalaki ug babaye sa yuta, giporma pinaagi sa Dios ug gihatagan og mga lawas nga susama niadtong sa atong langitnong mga ginikanan (tan-awa sa Genesis 1:27). Si Adan ug si Eva gihiusa diha sa kaminyoon sa dihang sila gipanalanginan sa Ginoo (tan-awa sa Moises 2:27–28). Ang Doktrina ug mga Pakigsaad mibutyag nga usa sa balaan nga katuyoan sa yuta mao ang pagkonektar sa plano sa Dios alang sa Iyang mga anak sa pag-apil diha sa kaminyoon ug sa pamilya (tan-awa sa Doktrina ug mga Pakigsaad 49:15–17). Tungod sa Paglalang, ang mga espiritu nga mga anak sa Dios makabaton og pisikal nga mga lawas ug makasinati sa mortalidad.
Mga butang nga angay hunahunaon
-
Basaha ang Genesis 1:27; Mga Taga-Roma 8:16–17; Mga Hebreohanon 12:9; Doktrina ug mga Pakigsaad 20:17–18; Moises 2:26–27; 6:8–9. Unsa ang mahimong kalainan nga makahibalo nga kita mga anak sa Dios? Makabasa usab kamo sa Ether 3:6–16; Doktrina ug mga Pakigsaad 110:1–4; 130:22.
-
Basaha kini nga parapo gikan sa “Ang Pamilya: Usa ka Pamahayag ngadto sa Kalibotan”: “Ang unang sugo nga gihatag sa Dios ngadto ni Adan ug Eva mao ang mahitungod sa posibilidad alang kanila isip bana ug asawa. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman. Kami sa dugang mopahayag nga ang Dios misugo nga ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.” Sa unsang paagi ang pagkahibalo sa balaan nga katuyoan makatabang ninyo nga masabtan nganong Ang Dios adunay mga balaod nga nagdumala sa gahom sa paglalang sa kinabuhi?
Kalihokan alang sa pagkat-on uban sa laing tawo
-
Tan-awa ang bidyo nga “God’s Greatest Creation” (2:51). Hisgoti ang pipila sa mga ebidensiya nga kita gilalang diha sa panagway sa Dios.
Pagkat-on pa og dugang
-
Russell M. Nelson, “Mga Desisyon alang sa Kahangturan,” Liahona, Nob. 2013, 106–9
-
Unang Kapangulohan (1909), “The Origin of Man,” Ensign,, Feb. 2002, 26–29
-
Mga Hisgotanan sa Kasaysayan sa Simbahan, “Organic Evolution,” Gospel Library
Seksiyon 3
Ang Yuta Usa ka Gasa, ug Kita ang Tinugyanan Niini
Ang Dios mihatag ni Adan og “kamandoan” ibabaw sa tanang nilalang sa yuta (Moises 2:28; 5:1). Sa modernong pagpahayag, ang Ginoo miingon nga “ang tanan nga mga butang nga gikan sa yuta,” [gihimo] “alang sa kaayohan ug sa paggamit sa tawo” (Doktrina ug mga Pakigsaad 59:18). Apan ang Ginoo miingon nga ang mga kapanguhaan sa yuta kinahanglan gamiton “uban sa paghukom, nga dili mokapin, ni pinaagi sa pagpugos” (Doktrina ug mga Pakigsaad 59:20).
Si Bishop Gérald Caussé mitudlo: “Ang balaang gasa sa Paglalang dili moabot nga walay mga tulumanon ug mga responsibilidad. Kini nga mga tulumanon labing maayo nga gihulagway diha sa konsepto sa pagkatinugyanan. Diha sa mga termino sa ebanghelyo, ang pulong nga pagkatinugyanan naghatag og sagradong espirituwal ug temporal nga responsibilidad sa pag-amuma sa usa ka butang nga gipanag-iya sa Dios diin kita adunay tulubagon.”
Mga butang nga angay hunahunaon
-
Basaha ang Doktrina ug mga Pakigsaad 59:16–20 ug paghimo og usa ka lista sa mga rason ang Ginoo mihatag kanato sa yuta ug sa tanang butang niini. Ikonsiderar kon unsa ang mga aspeto nga ang mga gilalang sa Ginoo nakahatag kaninyo og kalipay.
-
Ang Ginoo misulti ni Joseph Smith nga ang tanan “may tulubagon, ingon nga usa ka tinugyanan ibabaw sa yutan-on nga mga panalangin, diin Ako mihimo ug miandam alang sa akong mga linalang” (Doktrina ug mga Pakigsaad 104:13). Unsaon ninyo nga mahimong usa ka maayo nga tinugyanan o tig-atiman sa mga linalang sa Dios? Sa inyong hunahuna unsa ang gipasabot sa Ginoo sa pasidaan sa paggamit niining mga butang “uban sa paghukom, nga dili mokapin, ni pinaagi sa pagpugos”? (Doktrina ug mga Pakigsaad 59:20).
Kalihokan alang sa pagkat-on uban sa laing tawo
-
Maglakaw-lakaw duol sa inyong panimalay. Pangita og mga butang sa kinaiyahan nga matahom o kanang makahatag og kalipay. Sa inyong hunahuna ngano kaha nga gihimo sa Dios ang kalibotan nga matahom?
Pagkat-on pa og dugang
-
Gérald Caussé, “Atong Pagkatinugyanan sa Yuta,” Liahona, Nob. 2022, 57–59
-
Mga Hilisgotan ug Mga Pangutana, “Pagkatinugyanan ug Pag-alima sa Kalikopan [Environmental Stewardship and Conservation],” Librarya sa Ebanghelyo
Uban pang mga kapanguhaan mahitungod sa Paglalang