“Pagkapukan ni Adan ug ni Eva,” Mga Hilisgotan ug Mga Pangutana (2023)
Giya sa Pagtuon sa Ebanghelyo
Pagkapukan ni Adan ug ni Eva
Tungod sa kalapasan ni Adan ug ni Eva, ang sala ug kamatayon miabot sa kalibotan
Samtang ang asoy sa biblia bahin nilang Adan ug Eva pamilyar sa daghang mga tawo, kini kasagaran masaypan sa pagsabot. Ang mga kamatuoran sa kasulatan nga gipahiuli sa atong panahon makatabang kanato nga mas masabtan ang mga kahimtang didto sa Tanaman sa Eden ug ang pagpili nga gihimo sa atong unang ginikanan nga miresulta sa ilang pagpahawa sa tanaman. Kana nga kasinatian nahibaloan isip ang Pagkapukan ug nagdala og mga sangpotanan nga nakaapekto sa tanang mga anak sa Dios.
Ang Pagkapukan nila Adan ug Eva dili usa ka surprisa ngadto sa Langitnong Amahan. Ang Pagkapukan usa ka mahinungdanon nga bahin sa plano sa Dios alang sa kaluwasan ug kahimayaan sa Iyang mga anak. Human nahitabo ang Pagkapukan, si Adan ug si Eva nahimong mortal ug nakaangkon og abilidad sa pagbaton og mga anak, apan sila usab nahimong napaubos sa sala ug kamatayon.
Tungod sa Pagkapukan, ang tanang buhi nga butang napaubos sa mga kalisdanan, balatian, ug kamatayon. Kini nga oposisyon usa ka bahin sa plano sa Dios alang kanato, ug kini nakatampo ngadto sa atong pagkat-on, paglambo, ug abilidad sa pagsinati og hingpit nga kalipay. Sa pagtubos kanato gikan sa mga epekto sa Pagkapukan, ang Langitnong Amahan mihatag og usa ka Manluluwas—si Jesukristo. Si Kristo adunay gahom sa pagtubos sa kalibotan ug sa tanang anaa niini gikan sa mga epekto sa Pagkapukan.
Unsa ang Pagkapukan ni Adan ug ni Eva?
Ang Pagkapukan ni Adan ug ni Eva nagpasabot ngadto sa pagpili nga ilang gihimo sa paglapas sa balaod sa Dios, diin nakapahimo nila nga mailawom sa kamatayon ug mihimulag kanila gikan sa Iyang presensya. Ang Pagkapukan ni Adan ug ni Eva midala og pisikal ug espirituwal nga kamatayon nganhi sa kalibotan. Usa kadto ka mahinungdanon nga bahin sa plano sa Langitnong Amahan tungod kay si Adan ug si Eva nakabaton lang og mga anak pagkahuman sa Pagkapukan. Ang Pagkapukan sa ato pa ang nakapahimo niini nga posible alang Dios sa “pagpahinabo sa pagka-imortal ug kinabuhi nga dayon sa tawo” (Moises 1:39).
Kinatibuk-ang pagpasabot sa hilisgotan: Pagkapukan ni Adan ug Eva
May kalabotan nga mga giya sa pagtuon sa ebanghelyo: Kabubut-on, Pag-ula ni Jesukristo, Paglalang, Mortal nga Kinabuhi, Plano sa Kaluwasan
Seksiyon 1
Adan ug Eva Migamit sa Kabubut-on
Si Adan ug si Eva mao ang una sa mga anak sa Dios nga mianhi sa yuta. Sila nagpuyo sa usa ka kahimtang sa pagkainosente didto sa Tanaman sa Eden, nagpasabot nga sila walay mga anak ug dili makasinati og kalipay o kauyamot (tan-awa sa 2 Nephi 2:23). Duha ka kahoy sa tanaman ang labi kamahinungdanon—ang kahoy sa kinabuhi ug ang kahoy sa kahibalo sa maayo ug daotan (tan-awa sa Moises 3:9). Ang Dios mimando ni Adan ug Eva sa dili pagkaon gikan sa kahoy sa kahibalo sa maayo ug daotan (tan-awa sa Moises 3:17). Kon sila mituman pa sa sugo, sila nagpabilin unta didto sa tanaman. Kon sila mikaon sa bunga, sila makasinati og kamatayon.
Gihatagan usab og gibug-aton sa Dios nga sila adunay moral nga kabubut-on, o gahom sa pagpili (tan-awa sa Moises 3:16–17). Miabot si Satanas nagtintal nilang Adan ug Eva aron sa pagkaon sa bunga. Siya misulti kanila nga sila dili mamatay apan mamahimong maalamon sama sa Langitnong Amahan (tan-awa sa Moises 4:10–11). Sa dihang si Adan ug Eva mipili sa pagkaon sa bunga, ang ilang mga mata nabuksan nakabaton og kahibalo, apan sila usab misinati og espirituhanong kamatayon, sa kataposan gipapahawa gikan sa presensya sa Ginoo (tan-awa sa Doktrina ug mga Pakigsaad 29:40–41). Sila nahimo usab nga mortal, mailawom sa kasakit, ug balatian, kamatayon, ug uban pang mga kasinatian niining napukan nga kalibotan.
Mga butang nga angay hunahunaon
-
Basaha ang 2 Nephi 2:15–16. Unsay inyong nakat-onan bahin sa kabubut-on pinaagi sa pagsabot og dugang mahitungod sa mga sirkumstansiya sa Pagkapukan? Unsa ang inyong nakat-onan mahitungod sa kaimportante sa atong panginahanglan sa pagpili sa maayo alang sa atong kaugalingon batok sa daotan? Bantayi ang paggamit ni Lehi sa pulong nga “pagdani” niining mga bersikulo. Sa unsang paagi kita nadani sa maayo ug daotan karon? Unsa ang gitudlo niini kaninyo mahitungod sa atong panginahanglan sa usa ka Manluluwas?
Kalihokan alang sa pagkat-on uban sa laing tawo
-
Miingon si Presidente Dallin H. Oaks:
“Gitudlo ni Amahang Lehi nga kon ang Pagkapukan wala mahitabo, si Adan ug si Eva ‘magpabilin diha sa usa ka kahimtang nga walay sala, walay hingpit nga kalipay, kay sila wala makasinati sa pagkauyamot’ (2 Nephi 2:23). Kon walay masinati nga oposisyon sa mortalidad, ‘ang tanan nga mga butang kinahanglan nga malangkob ngadto sa usa,’ diin walay kalipay o pagkauyamot (bersikulo 11). …
“Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” [bersikulo 25].”
Unsa ang inyong makat-onan gikan sa pagtulun-an ni Presidente Oaks ug ni Lehi diha sa Basahon ni Mormon mahitungod sa panginahanglan sa oposisyon?
Pagkat-on pa og dugang
-
Dallin H. Oaks, “The Great Plan of Happiness,” Liahona, Nov. 1993, 72–75
-
“Ang Pagkapukan ni Adan ug ni Eva ug ang Gasa sa Kabubut-on,” Materyal sa Magtutudlo alang sa Mga Pagtulun-an ug Doktrina sa Basahon ni Mormon (2021), 32–38
Seksiyon 2
Gibuntog ni Jesukristo ang mga Epekto sa Pagkapukan
Ang Pagkapukan ni Adan ug Eva nakamugna og usa ka pagpahimulag tali kanila ug sa Dios, nailhan isip espirituhanong kamatayon. Tungod kay ang ilang mga lawas nahimong mortal, sila usab mapailawom ngadto sa pisikal nga kamatayon ug gibutang sa usa ka kahimtang sa oposisyon niining kalibotan, diin posible ang pagpakasala. Ang espirituhanon ug pisikal nga kamatayon ug sa kaulahian nga pagpakasala tanan makapugong ni Adan ug ni Eva ug sa ilang mga kaliwatan sa pagbalik ngadto sa presensya sa Dios.
Sa Iyang walay kinutoban nga gugma alang sa Iyang mga anak, ang Langitnong Amahan naghatag og usa ka Manluluwas, kinsa naghimo niining posible alang ni Adan ug ni Eva—ug kanatong tanan—sa paghinulsol gikan sa sala. Gibayaran ni Jesukristo ang bugti sa atong mga sala. Siya usab nag-antos sa mga kasakit sa matag lalaki, babaye, ug bata kinsa nabuhi, lakip sa kasakit sa atong mga sala, mga pagkaangol, mga balatian, ug mga pagkamatay. Siya mamatay ug mabanhaw aron kita mabuhi pag-usab. Pinaagi sa dili hitupngan nga gasa ni Jesukristo, ang Dios mihimo niining posible alang kanato aron makahinulsol sa mga sala, makakat-on, mouswag, ug sa kataposan makabalik sa pagpuyo uban Kaniya.
Human sa pagbiya sa Tanaman sa Eden, sila si Adan ug si Eva nagmasulundon ngadto sa mga sugo sa Ginoo, naglakip sa paghalad sa unang anak sa ilang mga kahayopan ngadto sa Ginoo isip usa ka sakripisyo. Sa kadugayan ilang nakat-onan ang katuyoan sa ilang sakripisyo nga mao ang pagtabang kanila sa paghinumdom nga si Jesukristo mohatag sa Iyang kinabuhi isip usa ka sakripisyo alang kanatong tanan. (Tan-awa sa Moises 5:4–8.)
Mga butang nga angay hunahunaon
-
Basaha ang Moises 5:11. Niini nga bersikulo, si Eva mihatag og minubong saysay sa unsay iyang nakat-onan sa Pagkapukan. Samtang kita sa kasagaran motan-aw sa Pagkapukan isip usa ka pasiuna sa kasakit ug pag-antos dinhi sa yuta, siya wala gayod naghisgot niini nga mga butang. Sa inyong hunahuna ngano kaha nga si Eva mipili sa paghisgot sa Pagkapukan sa paagi nga iyang gibuhat? Unsa ang atong makat-onan gikan ni Eva mahitungod sa katuyoan sa atong kinabuhi?
Si Presidente Russell M. Nelson nagtudlo:
“Tungod kay si Jesukristo mibuntog niining napukan nga kalibotan, ug tungod kay Siya miula alang sa matag usa nato, kamo usab makabuntog niining puno sa sala, nakasentro sa kaugalingon, ug sa kasagaran makakapoy nga kalibotan.
“Tungod sa Manluluwas, pinaagi sa Iyang walay kinutoban nga Pag-ula, mitubos sa matag usa nato gikan sa kahuyang, mga sayop, ug sala, ug tungod kay Siya nakasinati sa matag sakit, kabalaka, ug palas-anon nga inyong nasinati sukad, nan, samtang kamo tinud-anay nga maghinulsol ug magtinguha sa Iyang panabang, kamo makabuntog sa mga hagit sa walay kasegurohan nga kalibotan karon.”
Unsaon man nato sa pagbuntog niining napukan nga mortal nga kalibotan? Kanus-a nimo nasinati ang Tabang sa Manluluwas sa pagbuntog sa kalibotan?
Mga kalihokan alang sa pagkat-on kauban sa uban
-
Basaha ang Juan 3:16 isip usa ka grupo, ug dayon dapita ang mga sakop sa grupo sa pagpakigbahin kon unsa ang ilang gihunahuna nga kahulugan niing. Dayon basaha ang Moises 5:9, nga naghulagway sa katungdanan ni Jesukristo isip atong Manunubos. Dapita ang mga sakop sa grupo sa pagpakigbahin kon unsa ang ilang nakat-onan gikan niining mga bersikulo mahitungod sa gugma sa Dios ug sa gasa sa sakripisyo ni Kristo ug Pagkabanhaw, nga nagtugot kanato sa pagbuntog sa mga epekto sa Pagkapukan.
-
Basaha ang Alma 7:11–13 isip usa ka grupo, nagtimaan sa matag pulong nga naghulagway og butang nga atong masinati niining napukan nga kalibotan. Pananglitan, lagmit inyong mabantayan ang mga pulong “mga tentasyon” ug “mga balatian.” Paghimo og lista niining mga pulong aron makita sa mga sakop sa grupo. Dayon basaha ang tudling pag-usab, niining higayona hatagi og pagtagad ang mga pulong nga naghulagway sa unsay nabuhat ni Kristo alang kanato. Isulat kining mga pulong sa ikaduha nga lista tupad sa unang lista. Unsa ang gitudlo niining pagbansay diha kanimo mahitungod sa relasyon tali sa Pagkapukan ni Adan ug Eva ug sa katungdanan ni Jesukristo isip atong Manluluwas?
Pagkat-on pa og dugang
-
Jeffrey R. Holland, “Asa ang Hustisya, Gugma, ug Kalooy Mag-abut,” Liahona, May 2015, 104–6
-
Robert D. Hales, “Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Ensign, Okt. 2015, 24–31
Seksiyon 3
Ang Pagkapukan ni Adan ug ni Eva mahinungdanon sa Plano sa Dios
Tungod sa Pagkapukan ni Adan ug Eva, kitang tanan nakabaton og oportunidad sa pagdawat og pisikal nga lawas ug pagsinati sa hingpit nga kalipay ug kalisdanan sa mortal nga kinabuhi. Kita usab adunay mga oportunidad sa matag adlaw sa paggamit sa atong moral nga kabubut-on. Tungod kay kita nahibulag gikan sa Dios nga walay panumdoman sa atong kinabuhi sa wala pa dinhi sa yuta, kita kinahanglan gayod nga makakat-on ug molambo pinaagi sa hugot nga pagtuo ni Jesukristo ug pinaagi sa atong kaugalingong mga kasinatian.
Kining tanan mahinungdanon sa plano sa Dios alang sa atong mahangtoron nga kalipay. Aron makabalik ngadto Kaniya ug mahimong sama Kaniya, kita kinahanglan mogamit sa atong kabubut-on sa pagpili sa maayo batok sa daotan. Samtang kita molatas niining proseso sa pagkat-on, kita makahimo og kasaypanan. Apan si Jesukristo ug ang Iyang Pag-ula nakapahimo niining posible alang kanato sa pagbuntog sa atong mga sala ug mapasaylo ug mahimong limpyo, magtugot kanato nga ugma damlag makabalik ngadto sa presensya sa Dios ug mamahimong sama Kaniya.
Mga butang nga angay hunahunaon
-
Basaha sa 2 Nephi 2:11, 15, paghatag og pagtagad ngadto sa katungdanan sa oposistion diha sa plano sa Dios. Unsay imong makat-onan gikan niini nga mga bersikulo mahitungod sa panginahanglan alang sa oposisyon? Sa unsang paagi ang pagsabot sa katuyoan sa oposisyon makaapekto sa paagi nga kamo maghunahuna mahitungod sa inyong mga pagsulay?
-
Ang Pagkapukan nagdala sa kalibotan sa pag-antos ug sa kalipay. Basaha ang 1 Mga Taga-Corinto 15:21–22 ug 2 Nephi 2:19–25, nga mangita sa mga panalangin nga mahimong magamit sa tanang tawo human sa Pagkapukan. Unsay inyong nakat-onan gikan niini nga mga kasulatan mahitungod sa katuyoan sa kinabuhi?
Mga kalihokan alang sa pagkat-on kauban sa uban
-
Kita nakahibalo gikan sa modernong kasulatan kon unsa ang gibati ni Adan ug Eva mahitungod sa ilang kalapasan. Basaha ang Moises 5:10–11 isip usa ka grupo. Lagmit epektibo ang pagpili og lalaki sa pagbasa sa bersikulo 10 ug usa ka babaye sa pagbasa sa bersikulo 11, matabangan ang mga sakop sa grupo nga maghanduraw nilang Adan ug Eva nga nagsulti. Ipakigbahin ang inyong mga pagbati mahitungod niiing mga bersikulo uban sa inyong grupo. Sa unsang paagi ang hugot nga pagtuo nilang Adan ug Eva diha ni Jesukristo nakatabang kanila sa pagtan-aw sa ilang kalapasan sa paagi nga ilang gibuhat?
-
Unsay makahatag kaninyo og hingpit nga kalipay? Dapita ang mga sakop sa klase sa pagpakigbahin sa ilang mga tubag niini nga pangutana. Dayon basaha og dungan ang 2 Nephi 2:25. Sa inyong hunahuna ngano kaha nga si Lehi nagtudlo sa iyang anak nga lalaki nga “ang mga tawo naingon, nga unta sila makabaton og hingpit nga kalipay”? Unsa man ang kalabotan sa Pagkapukan ni Adan ug ni Eva sa hingpit nga kalipay? Dapita ang mga sakop sa grupo sa pagpakigbahin sa ilang mga ideya.
Pagkat-on pa og dugang
-
Genesis 2–4; 2 Nephi 2:15–26; 9:6–21; Mosiah 3:11–16; Alma 12:21–35; 22:12–14; 42:2–15; Doktrina ug mga Pakigsaad 29:34–44; Moises 3–5; 5:9–13
-
Dallin H. Oaks, “The Great Plan of Happiness,” Ensign, Nov. 1993, 72–75
-
Jeffrey R. Holland, “Asa ang Hustisya, Gugma, ug Kalooy Mag-abut,” Liahona, May 2015, 104–6
-
“Ang Kahingpitan sa Ebanghelyo: Ang Pagkapukan ni Adan ug Eva,” Liahona, Hunyo 2006, 8–9
Uban nga mga Tinubdan mahitungod sa Pagkapukan ni Adan ug ni Eva