Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato
Ni Elder Robert D. Hales
Sa Korum sa Napulog Duha ka mga Apostoles
Ang yawe sa atong kalampusan sa atong kinabuhi sa wala pa dinhi sa yuta mao ang atong suporta sa plano sa Amahan. Mao usab kini ang yawe sa atong kalampusan sa mortal nga kinabuhi.
Kanunay kong namalandong sa kawalay paglaum sa mga anak sa Dios nga nangahisalaag diha sa mangitngit ug awaaw nga kalibutan, wala masayud kinsa sila, diin sila gikan, nganong ania sila dinhi sa yuta, o kon asa sila paingon human sa ilang mortal nga mga kinabuhi.
Dili kita angayng mahisalaag. Gipadayag sa Dios ang mahangturon nga mga kamatuoran aron sa pagtubag niining mga pangutana. Makita kini sa Iyang mahinungdanon nga plano alang sa Iyang mga anak. Sa mga kasulatan kini nga plano nailhan isip ang “plano sa katubsanan,”1 ang “plano sa kalipay,”2 ug ang “plano sa kaluwasan.”3
Pinaagi sa pagsabut ug kamasulundon sa pagsunod sa plano sa Dios, malikay nato ang atong mga kaugalingon gikan sa pagtipas sa dalan pabalik sa atong Langitnong Amahan.4 Dayon, ug niana lamang, kita makapuyo sa matang sa kinabuhi nga Siya naggiya, diin mao ang “mahangturong kinabuhi, … ang labing mahinungdanon sa tanan nga mga gasa sa Dios.”5
Ang gasa sa kinabuhing dayon maoy angay sa bisan unsang paningkamot sa pagtuon, pagkat-on, ug paggamit sa plano sa kaluwasan. Tanang katawhan mabanhaw ug makadawat sa mga panalangin sa pagka-imortal. Apan sa pagkab-ot sa kinabuhing dayon—kinabuhi nga gidumala sa Dios6—maoy angay sa pagsunod sa plano sa kaluwasan sa tibuok natong kasingkasing, hunahuna, gahum, ug kalig-on.
Pagsabut sa Plano sa Kaluwasan
Unsa ka kagamhanan ang masayud sa plano! Ang plano sa kaluwasan mao ang labing dako nga bahandi sa kahibalo nga sukad mahatag ngadto sa katawhan tungod kay gipasabut niini ang mahangturon nga tumong sa kinabuhi. Kon wala kini, kita tinud-anayng mangasaag diha sa kangitngit. Mao kini ngano nga ang sumbanan sa Dios mao ang paghatag og mga kasugoan ngadto sa Iyang mga anak “human nga mapahibalo ngadto kanila ang laraw sa katubsanan.”7
Ang akong tinguha mao ang pagtabang sa matag usa kanato nga mopahimulos niining bahandi sa kahibalo—aron mas masabtan ang plano sa kaluwasan ug gamiton kana nga pagsabut sa atong inadlaw-adlaw nga kinabuhi.
Kabubut-on
Tungod kay ang kabubut-on mahinungdanon niining plano, kita magsugod diha. Ang atong Amahan mihatag kanato sa kapasidad sa paglihok o sa pagbalibad nga molihok8 sumala sa mahangturong mga kamatuoran—ang mga kamatuoran nga mihimo sa Dios kon unsa Siya ug unsa kining langit.9 Kon atong gamiton ang atong kabubut-on sa pagdawat ug pagsunod niini nga mga kamatuoran, makadawat kita sa walay katapusan nga kalipay. Sa bali niini, kon atong gamiton ang atong kabubut-on sa pagsupak, sa pagsalikway sa mga balaod sa Dios, atong masinati ang pag-antus ug kasubo.10
Ang kabubut-on mao ang baruganan nga may kalabutan sa tulo ka mga yugto sa plano sa kaluwasan: kinabuhi nga wala pa dinhi sa yuta, sa mortal nga kinabuhi, ug sa kinabuhi human dinhi sa yuta.
Kinabuhi sa Wala pa dinhi sa Yuta
Sama sa gipamahayag diha sa “Ang Pamilya, Usa ka Pamahayag ngadto sa Kalibutan,” ang matag usa kanato “mao ang usa ka hinigugmang anak nga lalaki o anak nga babaye sa langitnong mga ginikanan” uban sa “usa ka diosnong kinaiya ug padulngan.”11 Didto sa premortal nga konseho, ang Langitnong Amahan mipasabut kanato sa Iyang plano sa katubsanan.12 Ang plano gibase sa doktrina, mga balaod, ug mga baruganan nga anaa nang daan.13 Atong nakat-unan nga kon atong dawaton ug mosunod sa plano, kita kinahanglan nga andam nga mobiya sa presensya sa atong Amahan ug pagasulayan aron makita kon kita mopili sa pagpuyo sumala sa Iyang mga balaod ug mga sugo.14 Kita nagmaya niini nga oportunidad15 ug mapasalamatong gipaluyohan ang plano tungod kay kini gitanyag kanato sa paagi nga mahimong sama sa atong Langitnong Amahan ug makaangkon og kinabuhing dayon.
Apan ang p lano adunay risgo: kon kita mopili diha sa pagka-mortal nga dili magpuyo sumala sa mahangturong mga balaod sa Dios, kita makadawat og ubos sa kinabuhi nga dayon.16 Ang Amahan nasayud nga kita masayop ug makasala samtang kita nakakat-on pinaagi sa kasinatian sa mortalidad, mao nga Siya mihatag og Manluluwas aron sa pagtubos gikan sa sala sa tanan kinsa maghinulsol ug sa pag-ayo sa espiritwal ug emosyonal nga mga samad niadtong motuman.17
Si Jesukristo mao ang hinigugma sa Amahan, gipili ug giorden nang daan nga Anak gikan sa sinugdanan.18 Siya mipaluyo sa plano sa Amahan ug mitanyag nga mahimo natong Manluluwas, nag-ingon: “Ania Ako, ipadala ako.”19 Sa ingon, si Jesus gitudlo sa Amahan nga Usa ka binuhat nga nagpuyo og usa ka kinabuhi sa pagka-mortal nga walay sala, motubos sa atong mga sala ug kasakit, ug mabanhaw aron sa pagbugto sa higot sa kamatayon.
Si Lucifer, kinsa nailhan nga si Satanas, nagpuyo usab didto sa kinabuhi sa wala pa sa yuta.20 Sa hinakog nga mga rason siya misalikway sa plano, nagtinguha sa paglaglag sa kabubut-on sa tawo, ug misukol batok sa Amahan.21 Agig sangputanan, si Satanas ug kadtong misunod kaniya dili gayud makabaton og lawas. Sila dili makadawat sa ilang kahigayunan sa pag-apil sa plano sa Amahan ug nawad-an sa ilang balaanon nga padulngan.22 Karon sila nagpadayon sa ilang gubat sa pagsukol batok sa Dios ug nagtinguha sa mga hunahuna ug kasingkasing sa mga katawhan nga mobatok Kaniya.23
Kini nga yuta giplano ug gihimo alang niadtong kinsa midawat sa plano sa Amahan.24 Dinhi kita makabaton og lawas nga gilalang sa hitsura ug panagway sa Dios. Dinhi kita pagasulayan ug mapamatud-an. Dinhi atong makaangkon ang kasinatian nga gikinahanglan aron makapanunod sa kinabuhing dayon.25
Mortal nga Kinabuhi
Ang Dios milalang ni Adan ug Eva ug mihiusa kanila isip bana ug asawa, mibutang kanila diha sa Tanaman sa Eden, ug misugo kanila nga manganak.26 Sa paggamit sa ilang kabubut-on, si Adan ug Eva napukan gikan sa atubangan sa Dios ug nahimong mortal nga mga binuhat.27 Kini nagtuman sa plano sa Amahan pinaagi sa paghimo niini nga posible alang kanila sa pagbaton og mga anak, nga sila dili makahimo sa Tanaman sa Eden.28 Pinaagi sa mahangturong balaod, ang balaan nga gahum sa paglalang kinahanglang gamiton sulod sa utlanan nga gitakda sa atong Langitnong Amahan. Ang pagbuhat sa ingon makahatag og oportunidad alang sa mahangturong kalipay. Bisan unsang paggamit niining sagrado nga gahum gawas sa utlanan sa Dios sa katapusan mosangput sa pagkauyamot.29
Si Satanas, kinsa nagtinguha nga ang tanan “mauyamot sama ngadto kaniya”,30 naningkamot nga ipahilayo kita gikan sa mga oportunidad nga anaa pinaagi sa plano sa Amahan. Ngano nga ang Langitnong Amahan mitugot ni Satanas sa pagtintal kanato? Tungod kay Siya nasayud nga ang oposisyon gikinahanglan alang sa atong pagtubo ug pag-testing sa pagka-mortal.31 Ang oposisyon naghatag kanato og bililhong oportunidad sa pagduol sa Dios ug mosalig Kaniya. Tungod kay nag-atubang kita sa kanunay sa maayo ug dautan, tataw natong mapadayag ang mga tinguha sa atong mga kasingkasing pinaagi sa paghangop sa usa ug isalikway ang lain.32 Ang oposisyon mahimong matagbuan diha sa mga tintasyon ni Satanas apan anaa usab sa atong mga kahuyang, sa mortal nga kahapyugon nga kinaiyanhon sa tawhanon nga kahimtang.33
Aron matabangan ta nga maalamong mopili, ang Dios mipadayag sa Iyang plano sa katubsanan ug siya mihatag og mga kasugoan,34 sa Kahayag ni Kristo,35 ug sa pagpakig-uban sa Espiritu Santo.36 Gani bisan pa sa tanan niini nga mga gasa, ang kada usa nato dinhi niining napukan nga kalibutan nakahimog sala, ug busa kitang tanan dili angayan sa pagsulod sa presensya sa Dios sa atong kaugalingong buhat.37 Hinungdan nga ang Iyang maloloy-ong plano naghatag og usa ka Manluluwas.
Si Jesukristo mianhi sa yuta isip ang Bugtong Anak sa Dios ug mituman sa hingpit sa Iyang gitudlo nga misyon pinaagi sa pagtugyan ngadto sa kabubut-on sa Amahan sa tanan nga mga butang.38 Sumala sa maloloy-on nga plano sa Amahan, ang mga epekto sa Pagkapukan nabuntog pinaagi sa Pagkabanhaw sa Manluluwas,39 ang sangputanan sa sala mahimong mabuntog, ug ang kahuyang mahimong mabali ngadto sa kalig-on kon atong gamiton ang Pag-ula ni Jesukristo.40
Imahe ni Kristo, ni Heinrich Hofmann, sa maayong kabubut-on sa C. Harrison Conroy Co.
Mahimo kitang angayan alang sa kinabuhing dayon pinaagi lamang sa pakamasulundon ngadto sa mga sugo. Kini nagkinahanglan sa pagkaadunay hugot nga pagtuo diha ni Ginoong Jesukristo, paghinulsol, pagpabunyag, pagdawat sa gasa sa Espiritu Santo, ug sa paglahutay hangtud sa katapusan diha sa sa pagsunod sa ehemplo sa Manluluwas.41 Sa praktikal nga pagkasulti, kinahanglan gayud kita makadawat sa tanang mahinungdanon nga mga ordinansa sa priesthood ug molahutay hangtud sa katapusan diha sa pagsunod sa mga pakigsaad.
Kinabuhi Human dinhi sa Yuta
Human kita mamatay, usa ka adlaw mobarug kita sa atubangan sa Manluluwas aron pagahukman.42 Tungod kay ang Dios maloloy-on, kadtong migamit sa ilang hugot nga pagtuo diha kang Kristo ngadto sa paghinulsol mapasaylo ug makapanunod sa tanan nga anaa sa Amahan, lakip ang kinabuhing dayon.43 Tungod kay ang Dios makiangayon, ang matag tawo kinsa dili maghinulsol dili makadawat sa gasa sa kinabuhing dayon.44 Ang matag tawo gantihan sumala sa iyang hugot nga pagtuo, paghinulsol, mga hunahuna, mga tinguha, ug mga buhat.45
Paggamit sa Plano sa Kaluwasan sa Atong Inadlaw-adlaw nga mga Kinabuhi
Sa higayon nga masabtan na nato ang kinatibuk-ang katuyoan sa plano ug makita ang atong mga kaugalingon dinhi niini, maangkon nato ang butang nga bilihon, gani mahinungdanon: mahangturon nga panlantaw. Ang mahangturon nga panglantaw maoy atong giya sa inadlaw-adlaw nga mga desisyon ug mga lihok. Mopatunhay kini sa atong mga hunahuna ug kalag. Sa higayon nga mapalibutan kita sa mga opinyon nga makapadani apan hiwi hangtud sa hangtud, kita magmakanunayon ug dili matarug.
Sumala sa gitudlo ni Elder Neal A. Maxwell (1926–2004): sa Korum sa Napulog Duha ka mga Apostoles “Kon wala ang pagsabut sa plano sa kaluwasan, lakip sa atong kinabuhi sa wala pa dinhi sa yuta ug sa paghukom ug sa pagkabanhaw, ang pagsabut mismo niining kinabuhia parehas ra sa nagtan-aw og drama sa ikaduhang akto sa tulo ka akto nga drama.”46 Kinahanglan gayud natong masabtan ang unang akto (ang kinabuhi sa wala pa dinhi sa yuta) aron masayran kon unsaon sa paghimo sa labing maayo nga mga pagpili diha sa ikaduhang akto (mortal nga kinabuhi), nga motino kon unsa ang mahitabo kanato sa ikatulong akto (kinabuhi human dinhi sa yuta).
Sa laing pagkasulti, ang pagsabut sa plano sa kaluwasan, inubanan sa sinsero nga pag-ampo, mousab sa atong pag-aninaw sa kinabuhi, sa mga naglibut kanato, ug sa atong kaugalingon. Ang pagsabut sa plano mopatin-aw sa atong espirituhanon nga panan-awon ug magtugot nato nga makakita sa mga butang sa pagkatinuod.47 Sama gyud sa Urim ug Thummim nga nakapahimo ni Propeta Joseph Smith sa pagdawat og pagpadayag ug giya,48 mao nga ang kahibalo sa plano mopakita nato unsaon sa “pagbuhat diha sa doktrina ug baruganan mahitungod sa umaabut, sumala sa moral nga kabubut-on” nga gihatag kanato sa Ginoo.49 Sa ingon, ang atong hugot nga pagtuo malig-on, ug kita masayud kon unsaon pagplano ang atong kinabuhi ug mohimo og desisyon nga nahiuyon sa mahangturong kamatuoran.
Ania ang pipila ka mga ehemplo nga adunay kalabutan ilabi na sa atong panahon.
Ang Katuyoan sa Kaminyoon diha sa Plano sa Dios
DETALYE GIKAN SA SI KRISTO SA EMMAUS, PINAAGI NI CARL HEINRICH BLOCH
Ang kaminyoon ug pamilya anaa ubos sa pag-ataki tungod kay si Satanas nasayud nga kini importante sa pag-angkon og kinabuhing dayon—ingon ka importante sama sa Paglalang, Pagkapukan, ug sa Pag-ula ug Pagkabanhaw ni Jesukristo.50 Napakyas sa paglaglag ni bisan kinsa niadtong mga haligi sa plano, si Satanas nagtinguha sa pagguba sa atong pagsabut ug paggamit sa kaminyoon ug pamilya.
Uban sa plano sa Langitnong Amahan isip usa ka gitakda nga basihanan, ang katuyoan sa kaminyoon klarong matutokan. Ang sugo nga biyaan ang amahan ug inahan, makig-ipon sa iyang asawa diha sa kaminyoon,51 ug magpadaghan ug lukpon ang yuta52 nakapahimong posible sa Iyang plano. Pinaagi sa kaminyoon atong madala ang Iyang mga espiritu nga mga anak ngadto sa kalibutan ug mamahimong kauban Niya sa pagtabang sa Iyang mga anak nga mosalmot sa Iyang plano.53
Ang plano sa Amahan naghatag kanato og agianan aron mapanunod ang kinabuhing dayon, ang kinabuhi nga gipamunoan sa atong langitnong mga ginikanan. Diha sa plano, “diha sa Ginoo, ang babaye dili gawas sa lalaki ni ang lalaki gawas sa babaye.”54 Ang labing mahinungdanon sa kinabuhing dayon naglakip sa mahangturon nga kaminyoon sa lalaki ug sa babaye, nga maoy mahinungdanon nga bahin sa pagkahimong sama sa atong langitnong ginikanan.55
Kaminyoon tali sa usa ka Lalaki ug usa ka Babaye
Diha sa kaminyoon kita mokompleto sa usag usa, isip mao lang ang lalaki ug babaye nga makahimo uban sa ilang katalagsaon ug kamahinungdanon. Naglakaw diha sa mortalidad isip bana ug asawa, magdungan kita sa paglambo, maduol ngadto sa Manluluwas samtang kita mosunod, mosakripisyo sa pagbuhat sa kabubut-on sa Dios, ug magdungan sa pagtukod sa Iyang gingharian. Ang pagkahibalo nga ang mahangturon nga kaminyoon mao ang usa ka sugo sa Dios ug nga Siya nag-andam og paagi alang sa Iyang mga anak aron matuman ang tanan Niyang gimando,56 nasayud kita nga ang atong kaminyoon molampus samtang kita maghiusa sa paghupot sa mga pakigsaad nga atong gihimo.
Pinaagi sa mga ordinansa sa priesthood ug sa pagpili sa pagsunod sa ubang mga pakigsaad nga atong madawat ang gahum sa pagkadiosnon samtang kita moatubang sa mga hagit sa mortalidad.57 Kita natugahan sa gahum sa mga ordinansa sa templo gikan sa kahitas-an ug makapabalik kanato sa presensya sa atong Langitnong Amahan.58 Ang ordinansa sa pagbugkos nagtugot sa bana ug asawa sa dungan nga paglambo pinaagi sa gahum sa Dios ug mahiusa uban sa Ginoo.59 Ang bisan unsang laing ipuli niining matang sa kaminyoon dili makapatuman sa Iyang sagradong katuyoan alang kanato o alang sa mga henerasyon sa Iyang mga anak kinsa mosunod.60
Kaibug ug mga Tinguha
Matag usa nato miabut niining napukan nga kalibutan uban sa kahuyang o hagit nga kinaiyanhon sa tawhanong kahimtang.61 Ang pagsabut sa plano sa Dios makapahimo nato nga makita ang tanang tawhanong kahuyang—naglakip sa mga kaibug ug tinguha nga dili haum sa Iyang plano—isip temporaryo.62 Ang pagkahibalo nga kita nabuhi na sa wala pa dinhi sa kinabuhi isip mga pinalanggang anak nga lalaki ug babaye sa langitnong mga ginikanan makapahimo nato nga i-base ang personal nga pagkatawo ngadto sa balaanon nga kagikan. Ang atong estado isip mga anak nga lalaki ug babaye sa Dios—dili ang atong kahuyang o kalagmitan—nga mao ang tinuod nga tinubdan sa atong pagkatawo.63
Uban niini nga panglantaw, mas makahulat kita sa Ginoo sa mapainubsanon ug sa mapailubon nga paagi,64 nagsalig nga pinaagi sa atong hugot nga pagtuo, kamasulundon, ug paglahutay hangtud sa katapusan, ang atong mga kinaiya ug mga tinguha mamahimong putli, ang atong mga lawas mapabalaan, ug kita tinud-anayng mahimong anak nga mga lalaki ug anak nga mga babaye ni Kristo, nahingpit pinaagi sa Iyang Pag-ula.
Ang mahangturon nga panglantaw sa plano makahatag og kasiguroan nga alang sa matinud-anon, ang adlaw siguradong moabut nga ang “Dios pagapahiran ang tanan nga mga luha; … wala unyay kasakit: kay ang unang mga butang nangagi na.”65 Kining “hingpit nga kahayag sa paglaum”66 makapatunhay sa atong mga hunahuna ug kasingkasing ug makahimo kanato nga mapailubon, matinud-anong maghulat sa Ginoo.
Ang mga Saad alang Niadtong Kinsa Matinud-Anong Molahutay
Kadtong mga naghunahuna kon ang ilang kahimtang o kondisyon makapugong nila gikan sa pagdawat sa kinabuhing dayon kinahanglang mohinumdom nga “walay usa nga gitakda nang daan nga makadawat og minos pa kay sa tanan nga aduna ang Amahan alang sa Iyang mga anak.”67
Walay panalangin ang ihikaw sa matinud-anon. Si Presidente Lorenzo Snow mipahayag: “Walay Santos sa Ulahing mga Adlaw kinsa human sa pagpuyo og matinud-anon nga kinabuhi nga namatay nga nawagtangan og bisan unsa tungod sa kapakyas sa pagbuhat og pipila ka butang kon ang mga oportunidad wala mahatag kaniya. Sa laing pagkasulti, kon ang batan-ong lalaki o batan-ong babaye walay oportunidad nga maminyo, ug sila nagpuyo og matinud-anong kinabuhi hangtud sa panahon sa ilang kamatayon, ilang maangkon ang tanang mga panalangin, kahimayaan ug himaya nga madawat ni bisan kinsa nga lalaki o babaye nga aduna niini nga oportunidad ug mipalambo niini. Kana sigurado ug positibo.”68
Mga Saad alang sa Tanang Nasayud sa Plano ug Naggamit Niini sa matag Adlaw
PAGHULAGWAY PINAAGI NI JAMES JOHNSON; IMAHIN NI KRISTO, PINAAGI NI HEINRICH HOFFMANN
Matag usa kanato sa kinasingkasing nga paagi misuporta sa plano sa Amahan didto sa kinabuhi nga wala pa sa yuta. Nasayud kita nga Siya nahigugma kanato, ug kita nahingangha sa Iyang dakong tanyag niining kahigayunan nga makaangkon sa tanan nga anaa Kaniya, lakip ang kinabuhing dayon. Ang yawi sa kalampusan sa atong kinabuhi sa wala pa sa yuta mao ang atong pagsuporta sa plano sa Amahan. Mao gihapon kini ang yawi sa atong kalampusan sa mortal nga kinabuhi.
Busa ang akong imbitasyon mao nga magdungan kita sa pagbarug agig suporta sa plano sa Amahan. Kini atong gihimo inubanan sa gugma alang sa tanan, kay ang plano mismo maoy usa ka pagpahayag sa gugma sa Dios.
Samtang atong gamiton sa kada adlaw ang atong kahibalo sa plano sa Amahan, magkalawom ang kahulogan sa atong kinabuhi. Atubangon nato ang atong mga hagit uban sa mas dakong hugot nga pagtuo. Magpadayon kita sa unahan uban sa sigurado, hayag, naggilak-gilak nga paglaum sa kinabuhing dayon.